Lajme

Fjala e Visar Ymerit për skandalin me Telecom Serbia dhe Dardafonin

visar-ymeri

22 Dhjetor 2016 - E enjte 10:28

Shprendaj me te tjeret

Në harkun kohor të një jave i patëm dy rezultate njërin më katastrofik se tjetrin. E kam fjalën për licencimin e paligjshëm të Telekomit shtetëror të Serbisë  brenda Kosovës dhe zhvatjen e 30 milionë eurove në arbitrazh nga Kompania Dardafone.net e njohur në treg si Z-mobile. Secili nga rezultatet e kanë fillin shumë më herët se tash. Por me të dyja këto procese lidhet padyshim Hashim Thaçi dhe klani Pronto i PDK-së.

Prej shpalljes së pavarësisë (madje dhe më herët) në vend se të mbylleshin operatorët ilegal të Serbisë në Kosovë, dhe të aplikohej rezoluta e Kuvendit për aplikimin e kodit +355 në Kosovë, kjo çështje u fut në negociata me Serbinë. E kur negocion sektorë të kësaj rëndësie strategjike për sovranitetin e ekonominë e vendit natyrisht që në fund përfundon duke zyrtarizuar kompaninë famëkeqe të Serbisë në Kosovë dhe merr një kod gjeografik duke e futur telekomunikacionin e Kosovës nën atë të Serbisë.

Historia e kontratës kriminale të bërë midis PTK-së dhe Dardafon.net është diskutuar dhe në këtë kuvend, e atë botë Ministri Shala, ose personazhi që i realizoi Hashim Thaçit gjithë punët e pista në ekonomi, deklaronte se gjithçka është bërë sipas ligjit, anipse  Dardafon, një kompani private do të përdorte të gjithë infrastrukturën e entit publik dhe do të merrte 73% të fitimit kundrejt 27 % që i lihej PTK-së. Për këtë kontratë të dëmshme, u patën hapur dhe hetime të bujshme që u mbyllën në heshtje nga EULEX. Teksa çdokush me mendje normale do të priste përfundimin apo rinegociimin me themel të kësaj kontrate skandaloze, ndodh krejt e kundërta. Sajohen precedentë të mosrespektimit të kontratës që duhej të hetohej, dhe ndërtohet një rast kundër kompanisë publike në arbitrazh. Rasti i cili rezultoi me një gjobë 30 milionëshe kundrejt PTK-së e si fitim për një kompani private. Vetëm që ta kemi parasysh një ministër tjetër i punëve të pista të Hashim Thaçit dhe PDK-së Besim Beqaj e pati shitur gjithë rrjetin tonë të shpërndarjes së energjisë për 26 milionë euro . S’është çudi që në këto kohë të fundit të pushtetit që iu ka mbetur ta dërgojnë dhe KEK-un në ndonjë arbitrazh e t’i nxjerrin paratë e privatizimit dhe të tjerat. 

Secila prej këtyre që përmenda më lart e plot të tjera duhet dhe do të jenë objekt i hetimit të detajuar. Paratë që i keni zhvatur këtij vendi me kontrata të këtij lloji apo me marrëveshje me partnerët tuaj në Serbi, jo vetëm që s’do t’i gëzoni po do të detyroheni t’i ktheni shumëfish. Nuk do të ketë amnisti ndaj krimit e as vjetërsim të tij.