Pas pak ditësh bëhen 10 vite nga themelimi me ndryshime kushtetuese dhe ligje të veçanta të Gjykatës Speciale. Katër nga drejtuesit e Ushtrisë Çlirimtare Jakup Krasniqi, Hashim Thaçi, Rexhep Selimi dhe Kadri Veseli kanë afër 5 vite në paraburgim.

Vendimi i sotëm për rrëzimin e mocionit të mbrojtjes nga Gjykata Speciale është dëshmi e një logjike të përmbysur të drejtësisë, ku vija ndarëse midis çlirimit dhe agresionit zbehet qëllimshëm, ndërsa përpjekja e një populli për liri vihet nën dyshim me mjete juridike. Ky model i drejtësisë selektive nuk bën drejtësi universale, por prodhon një narrativë të rreme, që e zhvendos fajësinë nga pushtuesi te i çliruari.

Gjykata Speciale, e themeluar përtej çdo praktike të zakonshme ndërkombëtare, ka vepruar si instrument i imponuar mbi sovranitetin e Kosovës. Në vend që t’i shërbejë të drejtës, ajo i ka shërbyer paragjykimit. Madje duke hetuar dhe gjykuar padrejtësisht vetëm një palë, ajo ka përjashtuar sistematikisht dhunën shtetërore serbe që është burimi real i gjenocidit dhe krimeve të luftës e krimeve kundër njerëzimit të kryera në Kosovë.

Me 29 prill dhe 15 maj 2023 Enver Dugolli si i mbijetuar i masakrës në Burgun e Dubravës i është drejtuar Prokurorit të Prokurorisë Speciale në Hagë me kërkesën për nisjen e hetimeve të krimeve të kryera gjatë planifikimit dhe ekzekutimit të masakrës së Burgut të Dubravës. Ndonëse Prokurori ka kthyer përgjigje se kërkesa do të shqyrtohet ende sot nuk ka asnjë veprim të njoftuar në këtë drejtim.

Sot është sërish moment reflektimi. Ata qeveritarë e deputetë që e miratuan e votuan e ata gjyqtarë të Gjykatës Kushtetuese që e konfirmuan këtë gjykatë në vitin 2015 bartin përgjegjësi të drejtpërdrejtë. Ata duhet sot të kërkojnë falje, jo si akt formal, por si shenjë vetëdijeje për dëmin e madh institucional dhe moral që kjo gjykatë i ka shkaktuar vendit, kujtesës sonë kolektive dhe të ardhmes tonë. Ky do të ishte hapi i parë me të cilin duhet nisur një përbashkim për t’u mbrojtur jo vetëm juridikisht por edhe shoqërisht nga rreziku i shtrembërimit të thelbit të luftës sonë.

Lëvizja VETËVENDOSJE! ka qenë dhe mbetet e qartë: e mbrojmë luftën çlirimtare si themel të shtetit tonë dhe e kundërshtojmë çdo përpjekje për ta relativizuar të drejtën tonë historike për çlirim. Drejtësia nuk mund të jetë mjet për të rishkruar historinë, as për ta heshtur të vërtetën.

16 korrik 2025
Lëvizja VETËVENDOSJE!

Dita e tretë e fushatës

Qendrat tona me aktivitete, takime e bashkëbisedime me qytetarët.

Bashkë, me numrin 105, vazhdojmë drejt fitores!

Dita e dytë e fushatës

Qendrat tona me aktivitete, takime e bashkëbisedime me qytetarët.

Bashkë, me numrin 105, vazhdojmë drejt fitores!

Dita e parë e fushatës

Qendrat tona me aktivitete, takime e bashkëbisedime me qytetarët.

Bashkë, me numrin 105, vazhdojmë drejt fitores!

Sot, në një atmosferë të jashtëzakonshme në sheshin “Skënderbeu” të Prishtinës, hapëm fushatën zgjedhore për zgjedhjet lokale të 12 tetorit, fushatën fituese të Lëvizjes VETËVENDOSJE! me numrin 105.

Nga çdo anë e Kosovës, qytetarë e përfaqësues, kryetarët tanë dhe kandidatët për asamble u bashkuan për të nisur rrugëtimin tonë drejt një fitoreje të re.

Koha e komunave dembele dhe e komunave të bllokuara nga interesat private ka marrë fund. Ka ardhur momenti që edhe qeverisja lokale të bëhet shembull i punës, drejtësisë dhe zhvillimit. Na presin shumë punë e projekte të mëdha, sepse qeverisjes së mirë qendrore do t’i bashkohet qeverisja e mirë lokale në shumicën dërrmuese të komunave tona.

Lëvizja jonë, që sivjet ka mbushur 20 vjet, ka dëshmuar se ndryshimi nuk mund të ndalet. Me energjinë e aktivistëve, besimin e qytetarëve dhe përkushtimin e kandidatëve tanë, po e shtrijmë këtë vizion edhe në nivel lokal.

Komunat tona meritojnë të jenë vend i modernizimit, i projekteve konkrete, i mirëqenies dhe i transparencës. Me vendosmëri dhe Bashkë, ne po hyjmë në këtë garë për ta fituar. Sepse e ardhmja janë kryetarët me numrin 105. Sepse e ardhmja e komunave tona është VETËVENDOSJE!

Nga çdo anë e Kosovës, qytetarë e përfaqësues, kryetarët tonë e kandidatët për asamble nga ora
17:30 janë mbledhur sot në sheshin “Zahir Pajaziti”, për të ecur së bashku drejt sheshit
‘Skënderbeu’ këtu në kryeqytet. Ky parakalim nuk është vetëm një bashkim i zemrave dhe i
mendjeve tona, por edhe na tregon se ashtu siç parakalojnë fitimtarët e kësaj fushate, asisoj do
vijojmë me Lojërat Mesdhetare Prishtina 2030, të cilët do t’i presim me krenari në kryeqyteti të
Republikës si nikoqire e tyre. Të gjithë bashkë nga çdo komunë e Republikës, do punojmë për të
fituar.

Të nderuar kryetarë të ardhshëm të komunave tona, asambleistë të ardhshëm të kuvendeve
komunale,
Të nderuar deputetë të Kuvendit, ministra e zëvendësministra të Qeverisë,
Të nderuar aktivistë, anëtarë e mbështetës të Lëvizjes VETËVENDOSJE!
I dashur Glauk, e dashura Albulenë, të dashur Dimal e Besnik,
Të nderuar miq nga Maqedonia e Veriut dhe Lugina e Preshevës,
Izet Mexhiti, Bilall Kasami, Besar Durmishi, Bekim Qoku, Adnan Azizi, Ardita Sinani, Enkel
Rexhepi, e Ragmi Mustafa,
Shumë të dashur qytetarë, të dashur pjesëmarrës, mirëmbrëma,

Mirë se riktheheni dhe mire se e rigjejmë njëri-tjetrin këtu në sheshin Skënderbeu të Prishtinës,
Në këtë shesh ku dikur jemi mbledhur për protesta e demonstrata kundër privatizimeve, kundër
korrupsionit e kundër përpjekjeve për copëtimin e Kosovës,
Në këtë shesh ku gjithmonë jemi mbledhur edhe për hapjet edhe për përmbylljet e fushatave tona
zgjedhore.

E sivjet VETËVENDOSJE!-a i bëri plot 20 vite prej se kur ka lindur. Pesë vitet e para ishim
subjekt jasht-parlamentar e opozitë jashtë sistemit. E gati pesë vitet e fundit qeverisim me
Kosovën, gjatë e mirë si askush tjetër para nesh. Njëkohësisht, tash e tetë vjet jemi subjekti më i
madh në vend e në Kuvend dhe më i votuari e më i dashuri në popull. 

Shpesh kundërshtarët tanë të këtyre partive më të vjetra politike janë përpjekur të na ndalin. Por
ndryshimi nuk mund të ndalet. Sepse Lëvizja nuk mund të ndalojë. Besimi dhe vota e qytetarëve
nuk mund të mohohet. Dëshira juaj për përparim nuk mund të stopohet. E provuan siç e dimë në
vitin 2020, dështuan pak muaj më pas. Po e provojnë edhe sivjet në vitin 2025, do të dështojnë
sërish. S´na ndalin dot, të nderuar qytetarë, jo pse ne jemi të fortë, por për shkak se ne jemi të
drejtë. S’na ndalin dot jo pse ne jemi të ashpër, por për shkak se jemi të arsyeshëm. Jo pse ne
jemi me gjoks e me muskuj, por pse jemi me zemër dhe me mendje. Ne jemi si ju, duam një
Kosovë që zhvillohet me drejtësi. Duam një shtet që funksionon për popullin e vet. Duam një
qeveri që punon për të gjithë. E sot, po e hapim këtë fushatë për zgjedhje lokale, dhe unë jam
këtu qysh në fillim për të thënë një mesazh të qartë e kryesor: Jemi lodhur nga komunat dembele
– duam komuna që sjellin modernizim, zhvillim, mirëqenie, pastërti e siguri. Ka ardhur momenti
që qeverisja e mirë, qeverisja e kujdesshme, qeverisja e cila dëgjon qytetarin, të shtrihet edhe në
nivelin lokal.

Vetëm paramendojeni, sa shumë projekte të mira, sa shumë vepra do të mund të bëheshin, kur të
bashkohet qeveria e mirë qendrore me qeverinë e mirë lokale. Vetëm përfytyrojeni sa investime
do të mund të realizoheshin aty ku kryetari do ta kishte interesin kryesor bashkëpunimin me
Kryeministrin e jo sabotimin e tij. 

Ne vijojmë aleancën dhe bashkëpunimin tonë të frytshëm me Partinë Guxo të drejtuar nga
Donika Gërvalla Shëarz dhe Faton Peci dhe me Partinë Alternativa të drejtuar nga Mimoza
Kusari Lila, për kandidatët për kryetar e për kuvendet komunale gjithandej Kosovës.
Të dashur pjesëmarrës, aktivistë e qytetarë, është momenti të mendojmë mirë për komunat tona.
Neve si qeveri e Republikës e mua si kryeministër na duhen kryetarë që na vijnë me kërkesa
konkrete, nuk na duhen kryetarë të cilët përtojnë, sabotojnë, i ikin përgjegjësisë. Kryetarë që
punojnë ditë e natë, e jo kryetarë që ankohen orë e ças.    

Komuna është e përbashkëta, është bashkësia jonë më konkrete, është vend ku duhet të punohet
për të përmbushur nevojat tona kolektive. Nuk ka shumë vend për politika abstrakte nëpër
komunat e shetit tonë. Tema e ditës në komunat tona duhet të jetë infrastruktura, kanalizimet,
trotuaret, ujësjellësi, gjelbërimi, pastrimi i mbeturinave, qentë endacakë, parkimi, ndriçimi i
rrugëve të fshatrave e të lagjeve, zbukurimi i shesheve për festa, transporti publik dhe transporti
privat, lejet e ndërtimit, dhe natyrisht plani urbanistik që duhet të balancojë edhe nevojën e
komunitetit për ndërtime e banime të reja, por edhe domosdoshmërinë për të ruajtur hapësirat e
gjelbra dhe proporcione të bukura. Sa për kryetarët që kemi patur deri tani, nuk dua të merrem
shumë më gjatë me ta, por nëse hidhni sytë në lagjet e reja të qyteteve do të vini re diçka
medoemos: shumë ndërtesa të reja, por shumë pak bukuri. E pra e reja do të duhet të ishte e
bukur. Si kanë mundur këta që edhe të renë ta bëjnë të shëmtuar? E vetmja gjë që mund ta bëjë
edhe të renë të shëmtuar, është lakmia. Kësaj duhet t´i vëmë kufi, e prandaj i kemi këtu
kandidatët tanë për kryetarë komunash: njerëz që kanë ambicie për të zhvilluar qytetin dhe
fshatin, por jo lakmi për të mbushur xhepin. Njerëz prioriteti i të cilëve është puna për qytetarët
dhe jo spektakli i pushtetarit.

E mbi të gjitha, kandidatët tanë janë njerëz që vijnë prej jush të dashur qytetarë. Të hapur për të
dëgjuar mendimet dhe nevojat tuaja, për të qeverisur së bashku me ju. Ky është modeli që ne
kemi dhënë edhe si qeveri, ku i kemi pritur e i kemi dëgjuar vazhdimisht qytetarët nëpër zyrat
tona. Patjetër se edhe komunat tona do ta kenë derën e hapur, për të rinjtë e të rejat, për gratë dhe
burrat, për pleqtë e plakat, për fshatarët dhe qytetarët e organizuar sipas lagjeve e rrugëve ku
banojnë. Sepse populli është garancia më e mirë për funksionimin e komunës: atje ku kryetari
bëhet mbret, komuna ngelet e mbyllur jashtë zyrës së kryetarit.

Andaj programi ynë në të gjitha komunat do t’i ketë planet për mësimin gjithëditor, për artin dhe
sportin në shkolla, për mjekun e familjes, për poliklinika, për kuzhinën qendrore, për transportin
publik, për banimin e përballueshëm, për bizneset e të rinjve, për mbështetjen e vajzave dhe
grave, për sigurinë në shkolla e në lagje, për buxhetimin që vendosin qytetarët, për ngrohjen, për
kanalizimin, për ujin e pijes, për transformimin e lagjes dhe për mbështetjen e familjeve, për
ekonominë e komunës, turizmin e agroturizmin, për mbështetjen e fermerëve të vegjël, për
sheshet, parqet e çarshitë, për historinë dhe trashëgiminë kulturore, për stadiumet e reja dhe për
qendrat sportive.
 

Të dashur qytetarë që me siguri na dëgjoni edhe në media e në platformat të rrjeteve sociale.
VETËVENDOSJE!-a, Lëvizja jonë e përbashkët 20 vjeçare, është një subjekt që ka arritur
rezultatet më të larta që asnjë parti tjetër nuk i ka arritur dot. Merita këtu është e gjitha e juaja, që
na keni mbështetur dhe na keni votuar. Por ka një arsye pse arriti VETËVENDOSJE!-a ka arritur
të thyejë këto rekorde historike dhe të bëhet kaq e madhe. Partitë e vjetra, kudo ku kanë
qeverisur, qoftë në qendër apo nëpër komuna, kanë krijuar një konflikt të rrezikshëm. Konfliktin
midis interesit privat dhe interesit publik. E kur ata drejtonin, këtë konflikt e fitonte gjithmonë
interesi privat i vetë atyre dhe i miqve të tyre. VETËVENDOSJE!-a ka sjellë ndryshim të madh
në dy aspekte. E para, ne nuk dëshirojmë konflikt dhe nuk nxisim konflikt mes privates dhe
publikes. Mendojmë se ka hapësirë të mjaftueshme, që të zhvillohet edhe privatja edhe publikja,
duke mbështetur njëra-tjetrës. E dyta, ne kurrë nuk e dobësojmë publiken, interesin tonë të
përbashkët, për t´ia përmbushur dëshirat apo xhirollogarinë dikujt. Kjo qasje e jona është arsyeja
pse populli na ka mbështetur dhe vazhdon të na mbështesë kaq shumë. Jo Privatja kundër
Publikes, por Privatja në shërbim të Publikes dhe Publikja në ndihmë të Privates, së bashku drejt
zhvillimit. Këtë koncept dhe këtë parim, ka ardhur koha ta zbatojmë edhe në të gjitha komunat e
Republikës së Kosovës.

Të dashur aktivistë që jeni sonte këtu. Është koha të takohemi me qytetarët derë më derë dhe
dorë më dorë. Këto zgjedhje janë një betejë e veçantë. Ju i shihni si janë shumë nga komunat sot.
Ato janë të lidhura dhe të bllokuara prej interesave private të klaneve të caktuara dhe prej
drejtuesve të korruptuar. Komunat kanë mbetur bastioni i vetëm i korrupsionit kundër qeverisjes
tonë të mirë. Me komunat duan të na bëjnë bllokada. Por ne duhet t´i tejkalojmë këto pengesa,
dhe me punën tonë prej aktivisti shoqëror e kombëtar e qytetar, duhet t´i thyejmë këto bllokada. 
Sot Lëvizja jonë i ka njëzet vjet, e njëzetvjeçarët janë energjikë, me ide të reja, kreativitet cilësor
dhe me dëshirë për ndryshim. Ata shumica janë ose duke u përgatitur për provimet e diplomimin,
ose duke u përgatitur për intervistat e punës, që të nisin jetën e tyre profesionale. E pra, provimi
ynë kryesor, të dashur aktivistë, janë pikërisht këto zgjedhje lokale.

Kundër nesh do të shpenzohen shumë para. Janë ato edhe para të krimit e të korrupsionit të
viteve të kaluara. Janë paratë e juaja të vjedhura prej atyre. Janë paratë që ne, me qeverisjen tonë
të mirë, kemi filluar t´i kthejmë te ju apo t´i investojmë për zhvillimin e Kosovës. Me para që
kanë vjedhur prej jush, ata do të blejnë emisione televizive dhe reklama të shtrenjta. Do të marrin
kompani marketingu, do të shpikin rrena e do të sajojnë shpifje, do të paraqesin projekte
madhështore. I kemi parë edhe më përpara ato projekte si fotografi e rendera, por kurrë nuk i
pamë të realizojnë ndonjë gjë. Ata do të shpenzojnë shumë para, por ka ardhur koha që ata të
kuptojnë diçka: qytetari i Republikës e shqiptari patriot as nuk blihen e as nuk shiten. Nga Sharri
e deri në Leposaviq, nga Juniku e në Kamenicë, nga Prishtina e madhe e deri te Kllokoti i vogël,
nga Prizreni historik Peja e bjeshkëve e Gjakova e kuqe e deri te Ferizaji dhe Gjilani modern,
nga secili fshat e qytet, ne do ta japim këtë mesazh: zemrat tona nuk i blini dot, mendjen tonë
nuk e thyeni asnjëherë. Ne së bashku e kemi shpëtuar Kosovën nga prangat e korrupsionit dhe
nga tendencat për ndarje, prandaj jemi ne që sërish së bashku duhet ta çlirojmë e do ta çlirojmë
secilën komunë nga prapambeturia e hajnia e partive të vjetra. Ka ardhur koha që në komunat
tona të fitojë subjekti që pasurinë nuk e mat me konto bankare, por me zhvillim ekonomik.
Subjekti që zhvillimin nuk e sheh te betoni i vrazhdë, por te gjelbërimi e modernizimi. Subjekti
njëzetvjeçar, subjekti më i madh, subjekti më i ndershëm, më idealist, më punëtor, më i
sjellshëm, më modest, pra Lëvizja VETËVENDOSJE!. 

Të nderuar pjesëmarrës,

Komuna, secila komunë është njësi e veçantë administrative. Por Lëvizja VETËVENDOSJE!
secilës komunë, i jep përmasa të veçantisë politike. Raporti i shtrembëruar mes komunave të
korruptuara dhe pushtetit tonë qendror anti-korrupsion, do të drejtohet vetëm kur edhe në
komuna të kemi udhëheqës të pakorruptuar. Ne kemi nevojë për kryetarë komunash që
bashkëpunojnë me qeverinë. Ne nuk na duhen pushtetarë që përjashtojnë qytetarët nga
vendimmarrja, por na duhen kryetarë që bashkë me qytetarët vendosin për të bërë punë dhe vepra
të mëdha e të vogla gjithnjë në shërbim të qytetarëve. Shikoni arritjet në komunat ku ka drejtuar
VETËVENDOSJE!-a. Shikojeni Gjilanin, Podujevën, Shtimen, Kamenicën. Shikoni madje edhe
Leposaviqin, por edhe Mitrovicën e Veriut që është një komunë me territor të vogël e të kufizuar.

Sa shumë projekte të realizuara mirë, sa shumë zhvillim dhe modernizim, pavarësisht
skepticizmave e pengesave. Këto duhet të jenë shembujt për të paramenduar të ardhmen, kur me
siguri kryetarët nga VETËVENDOSJE!-a do t´i kemi në një numër shumë më të madh komunash
në Kosovë. Angazhohuni pra, të dashur aktivistë të Lëvizjes, që edhe komuna e juaj të jetë pjesë
e zhvillimit të shpejtë e të drejtë, e të mos mbetet pa e kapur trenin e progresit, ku lokomotiva do
të jetë padyshim kryeqyteti, Prishtina, e që do të ketë për kryetar një nga ministrat më të
suksesshëm e më punëtorë që Kosova ka patur ndonjëherë, Hajrulla Çekun. 
E në prezantimet e shkurtra të kandidatëve për kryetarë të komunave, të kryetarëve të ardhshëm
të komunave nga VETËVENDOSJE! le t’ia fillojmë pikërisht nga Hajra i Prishtinës që do ta bëjë
Prishtinën e Hajrit.

Të nderuar pjesëmarrës, të dashur qytetarë,

Në këtë tubim kemi edhe Hanin e Elezit me listën për Kuvend Komunal që e udhëheq Medina
Imishti, dhe ku ne e mbështesim kandidatin e pavarur, Rufki Suma për kryetar të Komunës.
Si dhe Kllokotin me listën për Kuvend Komunal që e udhëheq Admirim Etemi.
Të nderuar qytetarë, banorë fshatrash e qytetesh. Zonja e zotërinj, motra dhe vëllezër, shoqe dhe
shokë. Aktivist apo votues. Të moshuar e të rinj. Na duhet jetesë e re, prandaj na duhet kryetar
më i mirë. Na duhen rrugë e trotuare, parqe e lulishte, shkolla e çerdhe, transport modern e
qarkullim i hapur, qendra mjekësore, e investime të reja në infrastrukturë e ekonomi. Ne së
bashku e dimë çka na duhet. Ne së bashku e dimë kush mundet. Ne së bashku e dimë kush ka
vullnet dhe dije. Prandaj, në datën 12 tetor, pasnesër kaër javë, sot një muaj, të gjithë së bashku
të shkojmë ta votojmë opsionin që na duhet, kryetarin që mundet, që ka vullnet e që ka dije, e ai
kryetar e ka numrin 105, dhe i përket Lëvizjes sonë kombëtare e përparimtare, zhvilluese dhe
modernizuese, Lëvizjes së dashur e të besueshme VETËVENDOSJE!. Të gjithë juve, secilës e
secilit ju uroj një fushatë të mbarë, e do të jemi çdo ditë bashkë, gjithandej deri në fitore. Ju
falemnderit, natën e mirë e mirupafshim.

Ju faleminderit të gjithëve, secilës dhe secilit për këtë besim të madh që e keni në qeverisjen tonë, në mua si kryeministër dhe që të vazhdojmë me Kurti 3 pas Kurti 1 e Kurti 2, në qeverisjen e mirë të Republikës së Kosovës demokratike e gjithëpërfshirëse, për të gjithë qytetarët pa dallim e pa lënë asnjëri mbrapa. Jam thellësisht e përzemërsisht mirënjohës, për jetë.

Të nderuar delegatë të Këshillit të Përgjithshëm të VETËVENDOSJE!-s, kryesuese, Arbërie Nagavci,

sekretar, Alim Rama,

I nderuari nënkryetar i parë i Lëvizjes VETËVENDOSJE!, Glauk Konjufca, Nënkryetare e dytë, Mrika Limani-Myrtaj,

I nderuari Kryetar i Kuvendit të Republikës, Dimal Basha,

Nënkryetare e Kuvendit të Republikës, Albulena Haxhiu,

E nderuara Koordinatore e Komiteteve Profesionale, Dejona Mihali,

Të nderuar partnerë të koalicionit tonë, bashkëkryetarë të GUXO, Donika Gërvalla-Schwarz dhe Faton Peci,

Kryetare e Alternativës, Mimoza Kusari-Lila,

Të nderuar anëtarë të Kryesisë së VETËVENDOSJE!-s,

Kryetar të Qendrave,

Deputetë të Kuvendit,

Kandidatë për Kryetar të Komunave në zgjedhjet që na presin së shpejti,

të dashur aktivistë e mbështetës së Lëvizjes,

Të dashur qytetarë që po na ndiqni përmes rrjeteve sociale,

Të nderuar të pranishëm,

Mirë se e gjejmë njëri-tjetrin në mbledhjen e 59-të të Këshillit të Përgjithshëm të VETËVENDOSJE!-s. Meqë këto mbledhje i patëm filluar para diçka më shumë se 14 viteve, i bie që i kemi mbajtur pak më shpesh se çdo tre muaj; e vështirë të gjendet ndonjë subjekt tjetër politik jo vetëm në Kosovë që është kaq i rregullt dhe i dendur në organin më të lartë të vendimmarrjes politike. Unë ju falënderoj për këtë disiplinë të zellshme, për këtë përkushtim të pareshtur.

E teksa ne jemi mbledhur këtu në Prishtinë në mbledhjen e radhës së Këshillit të Përgjithshëm të Lëvizjes VETËVENDOSJE!, nuk mund të mos e kujtojmë që pikërisht sot, pra më 7 shtator, bëhen plot 35 vite nga mbledhja e deputetëve të Kuvendit të Kosovës më 7 shtator 1990 në Kaçanik, ku ata e miratuan Kushtetutën e Republikës së Kosovës. Vërtet ajo republikë u njoh vetëm nga Republika e Shqipërisë atëbotë, por ajo republikë e parë, e luajti rolin e saj historik si një republikë për rezistencë, për rezistencë paqësore dhe të armatosur, e që kulmoi me luftën e drejtë të Ushtrisë Çlirimtare të Kosovës, ndërhyrjen legjitime të NATO-s, dhe me çlirimin e Kosovës nga Serbia në qershor të vitit 1999. Liri kjo e cila i hapi rrugë shpalljes së dytë të Republikës së Kosovës nga deputetët e saj të zgjedhur në mënyrë demokratike, në mbledhjen historike të Kuvendit të Kosovës më 17 shkurt 2008.

Nëse me republikën e parë të Kosovës, atë të shpallur para 35 vjetëve iu hap rruga rezistencës dhe luftës për çlirimin e Kosovës, me republikën e dytë Kosovës, atë të shpallur më 2008, Kosovës i është hapur rruga për zhvillim dhe subjektivitet ndërkombëtar përmes 119 shteteve që na kanë njohur deri më tani, vendosjes dhe mirëmbajtjes së marrëdhënieve ndërkombëtare me këto shtete si dhe përmes anëtarësimit në dhjetëra organizata e mekanizma të ndryshëm ndërkombëtarë. Lëvizja VETËVENDOSJE!, ka qenë dhe mbetet subjekti politik me referencat më të qarta historike: nga Rilindja Kombëtare Shqiptare e qendërzuar te mendimi i Sami Frashërit, te beteja anti-kolonialiste e popujve për liri e pavarësi botës mbarë, te rezistenca e të burgosurve politikë e identifikuar me Adem Demaçin dhe deri te lufta çlirimtare dhe sakrifica për liri e kryekomandantit Adem Jasharit dhe e UÇK-së. Andaj sot dhe për jetë e mot, nderime dhe mirënjohje të gjitha gjeneratave që janë angazhuar për lirinë e Kosovës dhe për shtetndërtimin e saj.

E kemi thënë disa herë që Kosova ka nevojë për një republikë të tretë, por jo si një republikë e shpallur në Kuvendin e saj prej 120 deputetë, pra jo si një republikë e re por si një republikë e rinuar, si një republikë e përtrirë, e cila frymon sipas idealeve përparimtare të rilindasve shqiptarë; që zemrën dhe mendjen i ka te demokracia dhe përparimi, sikurse edhe synimet gjeopolitike që i ka të drejtuara kah integrimet euro-atlantike, në rrugën e saj për anëtarësim në Bashkimin Evropian dhe në NATO. Një republikë për barazi sociale dhe për shtet të së drejtës, me një ekonomi që zhvillohet me prodhim, me shërbime, me tregti gjithnjë për mirëqenien tonë; me një ushtri që forcohet në vazhdimësi për sigurinë tonë dhe të aleatëve tanë; me sistem arsimor dhe shëndetësor që modernizohet për formimin e aftësimin dhe për shëndetin tonë publik; një republikë me ligje të drejta që mbrojnë liritë dhe të drejtat e njeriut e të pakicave si dhe që promovojnë lirinë e shprehjes e që garantojnë kushte për realizimin e talenteve dhe shprehjen e individualitetit të secilit në komunitetet ku përkasim. Për të gjithë, për secilin, për komunitetet shumicë dhe pakicë, për çdo qytetar pa dallim. Pa të keqen dhe rrezikun e askujt, për të mirën, për sigurinë dhe mirëqenien e secilit!

E sivjet festuam edhe 20-vjetorin e Lëvizjes tonë. Mijëra tubime e takime anembanë Kosovës e në mërgatë, qindra aksione simbolike, aktivitete publike e protesta politike, dhjetëra demonstrata popullore, kanë bërë që të themi se përderisa populli ynë historikisht nuk e ka lënë veten pa lëvizje, në shekullin XXI kjo lëvizje e ka emrin VETËVENDOSJE!. Këto dy dekada ishin përplot punë e sakrificë, me shumë angazhim e kontribut e suksese. Ju faleminderit të gjithëve që jeni këtu, juve që nuk jeni këtu por po na ndiqni drejtpërdrejt, juve që njiheni e sidomos juve që nuk njiheni, juve që flisni e juve që nuk flisni, por që ju flet edhe më zëshëm puna që bëni. U jemi përjetë mirënjohës që e doni Lëvizjen dhe që nuk harroni se i duheni asaj. Secili nga ne e përbëjmë Lëvizjen dhe të gjithë ne bëhemi prej saj.

E gjersa në fillim të verës shënuam dy dekada të VETËVENDOSJE!-s, në fund të verës ndodhemi në muajin e gjashtë të vitit të pestë të mandatit tonë të plotë katërvjeçar.

Kemi menaxhuar shkëlqyeshëm: së pari, pandeminë Covid-19 (e cila shfaqet një herë në 100 vjet në botë), së dyti, kemi menaxhuar me krizën energjetike pas agresionit rus në Ukrainë dhe rritjen e kostos së jetesës (e cila ishte e paparë në 50 vitet e fundit në kontinentin evropian), dhe, së treti, kemi menaxhuar suksesshëm me sfidat e sigurisë nga sulmet e strukturave të Serbisë (më të mëdhatë dhe më të egrat së paku që nga shpallja e pavarësisë së Kosovës e këtej). Në anën tjetër, ekonominë të cilën e kemi marrë nën 7 miliardë e kemi sjellë në mbi 10 miliardë euro, punësimin nga 350 mijë qytetarë të punësuar në 430 mijë përfshirë këtu dyfishim të punësimit të rinisë, mandej kemi bërë më shumë se dyfishim të pagës minimale që e kemi rritur dy herë, e kemi gjetur 130 përkatësisht 170 euro, tash është 350 euro. Po ashtu kemi më shumë se dyfishim edhe të eksporteve tona jashtë vendit edhe të investimeve të huaja direkte në vendin tonë, e për herë të parë ofruam shtesa për fëmijë e për nëna lehona, 400 mijë fëmijë e rreth 70 mijë gra lehona e plus edhe i rritëm ato. E shtuam fuqishëm mbështetjen për ndërmarrjet në sektorin privat sidomos me programin SUPERPUNA ku për 6 muaj moshave prej 16 deri 29 vjeç ua kemi dhënë pagën minimale si bonus e me programin tjetër të subvencionimit të kredive investive përmes masës 2.1 në blerjen e makinerisë prodhuese deri në 20% të vlerës së tyre. Më tej, fuqishëm e kemi shtuar mbështetjen për ndërmarrjet në sektorin privat dhe i kemi shumëfishuar subvencionet sipas meritës për fermerë. E kemi shtuar buxhetin për shkolla e spitale, qendra të mjekësisë familjare e për ilaçe. Arsimin e bëmë falas për të gjithë. Ndërtuam e rinovuam godina sportive e objekte të trashëgimisë kulturore cep më cep Kosovës. Investimet publike kapitale i ngritëm në nivel rekord. Rritëm tre herë pagat në sektorin publik brenda këtij mandati, rritëm pensionet e ndihmat sociale si dhe shtuam bursat për studentë. Zbatuam drejtësi dhe ligjshmëri. Luftuam me shumë sukses krimin e organizuar dhe korrupsionin. U mbyllën dhjetëra laboratorë të drogës e prodhime ilegale të kriptovalutave. U mbyllën dhjetëra rrugë ilegale e u vendos rendi në çdo cep të territorit të vendit tonë. E bëmë Kosovën ndër tri shtetet me progresin më të shpejtë në botë në reformat në drejtësi. E ndërpremë me sukses keqpërdorimin e skajshëm nëpër ndërmarrjet publike dhe nga ndërmarrje që operonin me humbje të vazhdueshme e mbipunësim partiak, shumicën e tyre i ndihmuam të shënojnë rezultate pozitive financiare. Implementuam reformë të thellë të sistemit të drejtësisë. Falë përmirësimit të imazhit të shtetit tonë tani në botë dhe angazhimit tonë me shtetet skeptike brenda zonës Schengen, u sigurua liria e lëvizjes pa viza për qytetarët tanë që nga 1 janari i vitit 2024, duke mundësuar qindra mijëra familjeve të vizitojnë lirshëm mërgatën tonë, e dhjetëra mijëra të rinjve të vizitojnë vendet e tyre të preferuara anekënd Evropës. E po ashtu siguruam që Kosova të organizojë Lojërat Mesdhetare Prishtina 2030, duke u bërë vendi i parë në rajon që i mundësohet organizimi i kësaj ngjarje kaq të madhe sportive. Pothuaj në secilën fushë të angazhimit shënuam rekorde të suksesit. Tani në mandatin e ri në qeverisje synojmë të thyejmë secilin rekord të vendosur nga vetë ne.

Do të vijojmë me të gjitha punët e mira që i kemi nisur e do të kemi plot projekte të reja. Do të përshpejtojmë rritjen ekonomike me mbështetje të ndërmarrjeve prodhuese dhe të inovacionit, e do të rrisim pagat, pensionet, dhe mbështetjen sociale. Do të shënojmë rekorde të reja në investime kapitale me projekte strategjike që rrisin aktivitetin ekonomik. Synimi ynë është që investimet kapitale të kalojnë 1 miliardshin në vit. Do të sigurojmë edhe shumë vende të reja të punës si për të vajzat e djemtë ashtu edhe gratë për ta tejkaluar shifrën prej gjysmë milioni të punësuar në Republikën e Kosovës. Do të kujdesemi për më shumë siguri, drejtësi e barazi, dhe më pak krim, korrupsion e varfëri. E do të përkushtohemi për më shumë kualitet të jetës e rritje të mëtejshme të jetëgjatësisë. Do të vazhdojmë punën për arsim cilësor e shëndetësi efikase. Do ta rrisim edhe më tej prodhimtarinë dhe eksportin, e do të kemi më shumë siguri energjetike e më pak ndotje të ambientit.

Më lejoni të theksoj para jush të nderuar delegatë të Këshillit të Përgjithshëm disa nga zotimet tona kryesore dhe programet e reja të qeverisë sonë të ardhshme për mandatin e ardhshëm.

Në mandatin e ardhshëm do ta nisim valutën digjitale të Kosovës. Valuta digjitale, e bazuar në blockchain, e krijuar nga shteti, do të përdoret për pagesa. Krijimi i valutës digjitale hap mundësitë të reja për inovacion dhe krijon ekosistem të inovatorëve. Me këtë e vendosim Kosovën në qendër të zhvillimeve më të fundit teknologjike.

Për kompanitë në fushën e teknologjisë së informacionit dhe komunikimit që po tregohen të suksesshme në rritjen e punësimit do të ideojmë dhe ndërtojmë një ICT apo Tech Tower (Kulla TIK) si investim publik në qendër të Kryeqytetit si dhe do të ofrojmë mbështetje për hapësira e objekte në qytetet kryesore.

Do të largojmë të gjitha kufizimet për njohjen e shpenzimeve të trajnimit si shpenzime të zbritshme.

Transporti publik në vendin tonë është një nga fushat ku kërkohet shumë angazhim e transformim, andaj do të fillojmë me jetësimin e Programit “Anembanë”. Do të krijojmë, pra rrjet të integruar të transportit publik në tërë territorin e vendit. Fillimisht për trafikun urban, e në vijim edhe për trafikun ndër-urban. Integrimi do të jetë nëpërmjet biletës mujore të integruar. Secili shfrytëzues do të mund të udhëtojë anembanë Kosovës, pa pasur nevojë për biletë tjetër, dhe duke përdorur vetëm transportin urban dhe ndërurban. Bileta do të jetë e subvencionuar dhe me kosto minimale për shfrytëzuesit. Synimi është që me një kosto të përballueshme prej 10 euro në muaj, secili të ketë mundësi të shfrytëzojë programin “Anembanë”.

Për prodhimtarinë dhe ndërmarrësinë ne do të veprojmë përmes Bankës Zhvillimore, programit 1 miliardë euro për prodhim dhe ndihmesë bizneseve. Secili investitor do të ketë mundësinë të përfitojë nga garancia që shteti do të ofrojë për kreditë e nevojshme për investim. Për të mbështetur likuiditetin e bizneseve, mbledhjen e TVSh-së për mallrat që hyjnë në kufi do ta zhvendosim nga kufiri në brendi të vendit e data e pagesës së detyrimit të TVSh-së do të zhvendoset në muajin pasues nga muaji kur lind detyrimi në kufi, ngjashëm siç e kanë bërë edhe me bizneset për TVSh-në e brendshme.

Këtë mandat të ri e nisim me projektin e madh “Brezovica”. Ne do të investojmë deri në 500 milionë euro apo gjysmë miliardë euro në infrastrukturë rrugore, akomodime moderne, pista të reja e rrjet bashkëkohor të teleferikut. Do të sigurohemi që Brezovica të bëhet e famshme jo vetëm në rajon por edhe në Evropë e botë.

Nëpërmjet “Dritares për Investime të Diasporës” do të mbështeten ndërmarrës nga diaspora deri në 100 milionë euro investime që bëhen në Kosovë. Integrimi i Kosovës në SEPA sigurisht se do të krijojë lehtësi të mëdha për transferet e parave në Kosovë. E kësisoj do të eliminoheshin përfundimisht tarifat e larta dhe do të kurseheshin miliona euro të parave të diasporës tonë.

Mësimi i gjuhës shqipe me kurrikul të dedikuar për fëmijët e familjeve që jetojnë e punojnë jashtë vendit. Së bashku me Shqipërinë do të sigurohemi që të mbahet mësimi i gjuhës shqipe në të gjitha shtetet ku ka komunitet më të madh shqiptar.

Ne kemi mbështetur familjet nëpërmjet subvencionimit të rrymës, pastaj me shtesa për fëmijë e për mandatin e ri po shtojmë një program të ri për gjyshërit e gjyshet e secilës familje që ka fëmijë. Në kuadër të mbështetjes pra për familjen, do të nisim skemën e mbështetjes së gjyshërve pensionistë që kujdesen për nipat dhe mbesat në rastet kur të dy prindërit punojnë. Secila gjyshe apo gjysh pensionist që përkujdeset për nipa e mbesa të moshës prej 13 deri 36 muaj kur prindërit punojnë do të marrin edhe 100 euro shtesë për çdo muaj mbi pensionin e tyre ekzistues. Paralelisht masave që mbështesin vajzat në studime e gratë në biznes, nënat me fëmijët, artistet dhe sportistet, në mandatin e ri që në 6 muajt e parë do të startojmë me programin e ri për punësimin shtesë të grave.

Programi Superpuna për Gratë do të garantojë pagën minimale për 6 muajt e parë, për secilën grua që dëshiron të rikthehet në tregun e punës. Pra, për bizneset bëhet e leverdishme të punësojnë gratë, sepse pagën e paguan shteti për 6 muajt e parë, kurse për gratë bëhet më e lehtë të gjejnë punë.

Gjatë mandatit të ardhshëm paga minimale do të rritet mbi 500 euro. Paga minimale njëjtë nuk do të tatohet. E kjo nënkupton që dhe për biznesin e vogël individual, 6000 eurot e para të fitimit vjetor do të jenë të liruara nga tatimi.

Më tej, për veturat e importuara nga Shtetet e Bashkimit Evropian do të heqim taksën doganore prej 10% gjë që do të mundësojë kosto më të lirë për qytetarët për blerjen e veturave.

Do ta themelojmë Fondin e Sigurimeve Shoqërore përmes të cilit do të mbulohet pagesa për pushimin e lehonisë dhe prindëror dhe pagesa në rast të humbjes së vendit të punës.

Për këtë mandat të ri do ta rrisim sërish numrin e inspektorëve deri në 200 inspektorë të punës.

Tashmë kemi një seri programesh të bursave të bazuara në merita dhe prioritete strategjike shtetërore që i kemi aplikuar gjatë këtij mandati që nuk po përfundon. Në mandatin e ri po shtojmë bursat e mobilitetit dhe mbështetjen për të gjithë studentët. Studentët që kualifikohen për programin e bursës “Mobiliteti për studentë”, për çdo muaj do të marrin një bursë, varësisht nga distanca që ka vendi ku studiojnë me vendin prej nga vijnë.

Pasi rritëm mbështetjen për studentët në universitetet publike dhe për studentet vajza e gra në STEM, pra në Shkencë, Teknologji, Inxhinieri dhe Matematikë, mbështetjen me bursa do ta zgjerojmë edhe për studentët që vijojnë studimet në shkollimin universitar jo-publik. Për këtë, do të dyfishojmë buxhetin e ndarë për bursa nga ai që kemi aktualisht.

Do vazhdojmë mbështetjen me prioritet të lartë për edukimin e hershëm. Vendi ynë i ka përafërsisht 108 mijë fëmijë nga 1 deri në 5 vjeç. Sigurojmë që krahas rritjes së përfshirjes së tyre në çerdhet publike do të fillojmë edhe me sistemin e bonove për ata prindër që vendosin të dërgojnë fëmijët e tyre në çerdhe jopublike.

Po ashtu synojmë përfshirjen në ciklin parafillor të të gjithë fëmijëve nga mosha 5-6 vjeç ku në Kosovë janë përafërsisht rreth 20 mijë fëmijë.

Do të vijojmë dhe thellojmë procesin e rishikimit dhe rivlerësimit të të gjitha teksteve shkollore. Nga gjuha e matematika që i rishikuam, tanimë do të vijohet me të gjitha tekstet e tjera për të gjithë arsimin parauniversitar. Si dhe për disa lëndë do të fillojmë me përkthimin dhe digitalizimin e materialeve shkollore.

Për Arsimin dual e profesional do të krijojmë platformën me profilet e secilit të diplomuar në arsimin profesional dhe arsimin dual për qasje të lehtë e të shpejtë në tregun e punës. 10 profile të reja do të shtohen në mësimin dual në përgjigje të kërkesave të industrisë, duke ia bashkëngjitur atyre aktuale që janë 12 sosh, pra nga 12 do t’i kemi 22 profile të arsimit dual gjithsej.

Do të bëjmë digitalizimin e certifikatave dhe materialeve shkollore dhe finalizimin e një Platforme të centralizuar digjitale për menaxhimin e shkollave, ditarëve dhe materialeve shkollore digjitale si hapat tonë të ardhshëm në arsim.

Klasat e mësimit do t’i pajisim me tabela të mençura. Do të shtrijmë internetin brezgjerë me shpejtësi të lartë edhe në 1000 institucione të arsimit parauniversitar së bashku me qasjen falas në internet.

Ne do të mbështesim gjithnjë e më shumë programet e kërkimit shkencor të universiteteve publike.

Ndërkaq në Qendrën e Studentëve të Universitetit të Prishtinës “Hasan Prishtina” do ta ndërtojmë një konvikt të ri dhe tri salla të reja për bibliotekë universitare brenda Qendrës së Studentëve.

Pas hyrjes në fuqi të ligjit të ri për sigurimet shëndetësore dhe kompletimit të sistemit informativ shëndetësor hapet rruga drejt funksionalizimit përfundimtar të sistemit të sigurimeve shëndetësore.

Në mandatin e ri do ta decentralizojmë në tërësi shërbimin shëndetësor. Për këtë do të investojmë në çdo spital rajonal në pajisje, shërbime të reja dhe infrastrukturë, kuadro profesionale. Do të ndërtojmë spitalin e ri në Mitrovicë dhe në Ferizaj.

Poliklinikat specialistike do t’i ndërtojmë në Drenas, Sharr, Podujevë, Viti, Rahovec e Leposaviq.

Si dhe do të hapim Poliklinikat specialistike stomatologjike në Prishtinë, Pejë, Gjakovë, Prizren, Gjilan, Mitrovicë, Ferizaj e Podujevë. Do të ndërtojmë rrjetin e laboratorëve publikë që mbulojnë të gjitha llojet e analizave me kosto të përballueshme.

Për Listën esenciale të barnave sigurojmë shtim të buxhetit deri në 100 milionë euro. Ndërkaq kemi unifikuar tashmë çmimet e barnave në të gjithë territorin e vendit me çmime të përballueshme.

Në mandatin që s’po përfundon, fermerët e Kosovës i bëmë më të mbështetur në rajon e për këtë dëshmitarë i kemi mbi 120 mijë fermerë që përfituan mbi 300 milionë euro grante e subvencione. Më e rëndësishmja është që subvencionet kanë shkuar të gjitha te fermerët e vërtetë pra te ata që e meritojnë dhe janë ndalur abuzimet e shpërdorimet që mbizotëronin në të kaluarën.

Në mandatin e ri përqendrimi ynë do të jetë te rritja e produktivitetit dhe konkurrueshmërisë përmes mbështetjes së investimeve në teknologji e rrjetëzim të mbledhjes dhe shpërndarjes së produkteve bujqësore.

E kemi subvencionuar akcizën e naftës, dhe tash do ta bëjmë edhe skemën e sigurimit nga fatkeqësitë natyrore për prodhimin tonë bujqësor. E për të pasur sigurinë e furnizimit me ujë do të fillojë puna për 5 diga të reja në Kosovë. Siç e dini Kosova i ngjan një pjate të kthyer përmbys ku burojnë lumenjtë por me shpejtësi dalin nga vendi ynë duke u derdhur në tri detra të ndryshëm: Adriatik, Jon, edhe Deti i Zi. D.m.th. këto detra ku derdhen lumenjtë e Kosovës bëjnë që ne patjetër të kemi diga të reja që na i akumulojnë ujërat nëpërmjet liqeneve artificiale por njëkohësisht edhe mund të shndërrohen në prodhues të energjisë elektrike nëpërmjet ujit që gjithashtu është një mundësi për siguri energjetike dhe për energji të pastër.

Do të ndërtohen pra 5 rezervuarë për ujë të pijshëm, ujitje dhe industri dhe po përgatitemi për 4 të tjerë shtesë si studime fillestare të fizibilitetit.

Rezervuarët që do të ndërtohen janë këto: Rezervuari i poshtëm i Firajës, Rezervuari i Pollatës, Rezervuari i Kuçicës, Rezervuari i Dragaçinës dhe ai i Desivojcës.

Prandaj, Kosova pra do të ketë një miks të energjisë që bazohet në burime vendore, dhe gjithnjë e më shumë të pastra e të ripërtëritshme nga era e dielli. Por jemi të vetëdijshëm që nuk mund ta tejkalojmë as kollaj e as shpejt qymyrin. Termocentrali “Kosova B” do të modernizohet, ndërkaq Termocentrali “Kosova A” do të rehabilitohet thellësisht ashtu që të rritet siguria e furnizimit, dhe të ulet ndjeshmëria ndaj krizave eventuale nga jashtë e gjithnjë të kemi çmime të përballueshme.

Do ta intensifikojmë bashkëpunimin për ndërtimin e kapaciteteve të përbashkëta energjetike me Shqipërinë.

Do të ndërtojmë sisteme të reja të ngrohjes qendrore edhe në Ferizaj edhe Gjilan. Ndërkaq do të dyfishojmë kapacitetin e mbulueshmërinë e ngrohjes qendrore në Prishtinë.

Do të vazhdojmë investimet në efiçiencë të energjisë, me vlerë 150 milionë euro për familjet që kanë nevojë për përkrahje për të izoluar shtëpitë e tyre, e për të siguruar kushte më të mira për nxënësit, pacientët, sportistët e zyrtarët në ndërtesa publike si shkolla, spitale, salla sporti, etj.

Trepça do të jetë në qendër të sektorit minerar, ndërkohë që hulumtimet e investimet do të zgjerohen në zonat e tjera me potencial të lartë.

Në mandatin e ri do të fillojmë me ndërtimin e hekurudhës Prishtinë – Durrës, që përmban segmentin Gjakovë – Shkodër, dhe do të projektojmë linjën hekurudhore që lidh Prizrenin e Ferizajin me Gjilanin dhe Bujanocin.

Do të përfundojmë ndërtimin e rrugës Prizren–Tetovë, autostradën Prishtinë – Gjilan me vazhdim deri tek Dheu i Bardhë dhe autostradën Duhle-Shtime-Banullë. Po ashtu do të ndërtojmë rrugën e Dukagjinit që lidh Prizrenin, Rahovecin, Gjakovën, Deçanin me Pejën e Istogun. E do të vazhdojmë me ndërtimin e rrugëve Deçan – Plavë dhe Pejë – Rozhajë.

Rruga Dollc – Gjakovë, Kijevë – Zahaq do të finalizohen krahas rehabilitimit dhe modernizimit të të gjitha rrugëve rajonale.

Ndërtimi i Portit të thatë i cili e vendos Kosovën në hartën ballkanike të transportit të mallrave është një nga projektet madhore të cilin do ta finalizojmë.

Siç e thash më herët, ekzekutimi i investimeve kapitale të tejkalojë 1 miliardë euro në vit. Dy vitet e fundit të mandatit kemi shënuar rekorde në ekzekutimin e investimeve kapitale dhe këtë ritëm do ta përshpejtojmë edhe më tutje duke reformuar sistemin e prokurimit publik. Nëpërmjet krijimit të sistemit për gjurmim të faturave që siguron se çdo faturë paguhet në kohë ndaj operatorit ekonomik, do të kompletojmë edhe integrimin e sistemit të menaxhimit të financave publike me sistemin e e-prokurimit.

Lojërat Mesdhetare 2030 janë kyçe për transformim të Kosovës në epiqendër sportive në rajon dhe më gjerë. Pallati i Rinisë dhe i Sporteve dhe Qendra e Studentëve në Prishtinë do të kthehen në hapësira moderne mikpritjeje, duke vazhduar t’u shërbejnë qytetarëve për dekada. Plani për infrastrukturën e futbollit, duke përfshirë edhe Stadiumin Nacional, Qendrën Akuatike me pishina olimpike, si dhe pishinat gjysmë-olimpike do të jenë themel i zhvillimit dhe cilësisë, ndërsa palestrat ekzistuese do të modernizohen sipas standardeve ndërkombëtare.

Programet “Sport në Shkolla” dhe “Arti në Shkolla” dhe “Drejt Malit” do të zgjerohen. Projekte të mëdha si Teatri i Operës dhe Baletit dhe Muzeu i Artit Bashkëkohor do të bëhen pika referimi globale, duke ofruar hapësira të denja për krijimtari e bashkëpunime ndërkombëtare. Programi për muzetë i nisur në mandatin e parë do të zgjerohet në shumë komuna, me funksionalizim të muzeve ekzistues e themelim të muzeve të rinj. Krahas hartimit të master-planit, do të kujdesemi për nisjen e punëve konservuese në Kullat e Rezistencës brenda Kompleksit Memorial “Adem Jashari” në Prekaz që kujton e përkujton e nderon sakrificën flijimin sublime të Jasharëve në mars të vitit 1998, po ashtu edhe projektin e Kompleksit Memorial për masakrën e Reçakut.

Do të vijojmë me mbështetjen e Policisë dhe institucioneve të sigurisë me pajisje të specializuara e bashkëkohore, me shkollim e trajnim si dhe me armatim adekuat. Do të avancojmë Njësinë e Dronëve dhe Antidronëve për të forcuar mbikëqyrjen dhe gatishmërinë për t’u përballur me format e reja të rreziqeve të sigurisë, duke ndihmuar në hetime, mbrojtje dhe mbikëqyrje të kufirit si dhe rritjen e sigurisë publike në përgjithësi.

Për ushtrinë tonë në katër vitet e mandatit të ardhshëm do të ndajmë buxhet mbi 1 miliardë euro.

Do të thellojmë dhe zgjerojmë bashkëpunimin ndërkombëtar bilateral dhe multilateral me shtetet anëtare të NATO-s.

Funksionalizimin e Fabrikës së Municioneve dhe zhvillimi i industrisë ushtarake të Kosovës.

E gjithashtu do të zhvillojmë dronët ushtarakë “Made in Kosova”.

Fuqizimi i ushtrisë do të realizohet përmes blerjes së armatimit, stërvitjes dhe edukimit brenda vendit, dhe në bashkëpunim me Shqipërinë dhe në akademitë më të shquara ushtarake në vendet partnere.

Do ta krijojmë Njësinë ushtarake të përbashkët me Forcat e Armatosura të Republikës së Shqipërisë.

Rekrutimi i kadetëve të rinj do të vijojë me ritëm të shtuar. Synojmë që brenda mandatit të ri të kemi 1000 gra e vajza ushtarake.

Programi i Mbrojtjes Gjithëpërfshirëse do të zbatohet në të gjithë vendin. Në kuadër të këtij programi secili rezervist vullnetar do ta ketë trajnimin adekuat si dhe armatimin në rast mobilizimi.

Do të forcojmë edhe më tej marrëdhëniet strategjike të vendit me partnerët, me Shtetet e Bashkuara të Amerikës, Mbretërinë e Bashkuar, Gjermaninë, Francën, Italinë, Turqinë, dhe të gjitha vendet anëtare të Bashkimit Evropian e të NATO-s.

Marrja e statusit të vendit kandidat në Bashkimin Evropian do të jetë një nga angazhimet kyçe tonat.

Dyfishimi i rrjetit të atasheve të mbrojtjes dhe shtimi i shteteve partnere me të cilat nënshkruajmë marrëveshje SOFA janë hapat që do t’i ndërmarrim në vijim drejt anëtarësimit të plotë në NATO.

Do të zgjerojmë dhe thellojmë marrëdhëniet dypalëshe me shtetet mosnjohëse, me theks të veçantë me shtetet mosnjohëse të NATO-s, Bashkimit Evropian dhe të Këshillit të Evropës. Me 15 dhjetor 2022, siç e dini të gjithë, zyrtarisht dorëzuam aplikimin për anëtarësim në Bashkimin Evropian me synim marrjen e statusit kandidat në Pragë të Republikës Çeke kur ajo kishte presidencën e Bashkimit Evropian. E synimi ynë është që deri në vitin 2030, vendi ynë të ketë përmbyllur me sukses të gjithë kapitujt nga procesi i integrimit, drejt anëtarësimit në BE.

Gjithsej pra janë 25 zotimet tona që së bashku me programet e reja që kemi planifikuar për mandatin e ri do t’i kthejmë në një ansambël të aksioneve dinamike të gjithanshme për ta thelluar progresin e solidaritetin, për të zgjeruar drejtësinë e lirinë, e për të lartësuar republikën e demokracinë.

Ndërmjet mandatit tonë që s’po përfundon dhe mandatit të ri që s’po fillon, të nderuar delegatë të Këshillit të Përgjithshëm të Lëvizjes VETËVENDOSJE! e dimë që ndodhet Gjykata Kushtetuese e cila po funksionon si një hije politike e opozitës ndaj VETËVENDOSJE!-s. Meqë tash u zgjodh kryetari i Kuvendit dhe katër nënkryetarë, Gjykata mori masë të përkohshme sipas kërkesës të Listës Serbe. Paarsyeshëm besoj unë, dhe kërkoi që 120 deputetë të Republikës, merreni me mend, të vegjetojnë deri më 30 shtator, plot 25 ditë kot. Kjo është ngjashëm sikur ministri ynë i Shëndetësisë Arben Vitia të lëshojë një vendim mjekësor që ata shtatë gjyqtarë duhet të shkojnë në pushim mjekësor për shkak të gjendjes së rënduar të tyre. Të vetmen dilemë që e kam në këtë situatë është nëse është më shumë absurde apo më shumë e dëmshme kjo masë 25-ditore. Por, që është edhe shumë absurde edhe shumë e dëmshme, nuk kam dyshime.

Të dashur aktivistë,

Nga katër muaj e gjysmë që nga fillimi i seancës së konstituimit të kuvendit në mes të prillit e deri te zgjedhja e Dimal Bashës kryetar e Albulenës nënkryetare dhe e dy nënkryetarëve nga PDK e LDK dhe e Emilja Rexhepit nga komunitetet jo-shumicë serbe po ashtu nënkryetare në fund të gushtit, pra nga gati katër muaj e gjysmë prej mesit të prillit deri te zgjedhja e Kryetarit dhe katër nënkryetarëve në fund të gushtit, tre muaj janë vonesë e Gjykatës Kushtetuese. Një muaj e gjysmë kanë votuar për ta trajtuar ankesën e AAK-së dhe po aq ankesën e PDK-së dhe LDK-së. Pra, përgjatë këtyre katër muajve e gjysmë, dy të tretat e kohës realisht kemi qenë në pritje të Gjykatës Kushtetuese, të cilës i adresohej opozita, jo ne. Ne donim frymë bashkëpunimi e konsultime konstruktive e marrëveshje politike, ata orë e çast vrap te Gjykata Kushtetuese. A e dini pse? Sepse 5 nga 7 gjyqtarët e Gjykatës Kushtetuese janë zgjedhur në vitin e largët 2018, kur në pushtet ishte koalicioni i PAN-it me Listën Serbe. E pas vitit 2018, ne i fitojmë zgjedhjet për herë të parë në vitin 2019, pastaj i fitojmë zgjedhjet herën e dytë në vitin 2021, e i fitojmë zgjedhjet edhe sivjet herën e tretë, por ja që ata ngelen të njëjtët aty në gjykatë, thua se është viti 2018. Ka ndërruar shumë përbërja e parlamentit prej atëherë, ka ndërruar shumë orientimi i qeverisë prej atëherë, e ata kanë ngelur të njëjtit aty si relikte të një trashëgimie jokulturore.

Por, të nderuar delegatë të Këshillit të Përgjithshëm,

Nuk është hera e parë që Gjykata Kushtetuese vonon, zvarrit, pengon, e qëllimshëm dëmton procese të dobishme për qytetarët e Republikës sonë. Në tetë raste, me vendimet e tyre ka penguar nismat reformuese e qëllimmira të Qeverisë, duke i shpallur ato si antikushtetuese. Në plot herë vendimmarrja e tyre ka vonuar mbi një vit, mbi një vit, njëherë të vonojnë e pastaj të rrëzojnë. E nëse e llogarisim mesataren e tyre, Gjykata Kushtetuese është vonuar 329 ditë, pra afërsisht 11 muaj për një vendim të vetëm. Ndërkohë që Qeveria jonë vetëm me mbledhjet e Qeverisë, ka miratuar 2349 vendime për këtë mandat, pra mbi një vendim në ditë nëse e shpërndajmë në kohë, e Gjykata Kushtetuese ka nevojë mesatarisht 329 ditë apo 11 muaj për një vendim të vetëm. Ne kemi marrë si qeveri më shumë se një vendim në ditë e ata më shumë se 11 muaj për një vendim. E kur e marrin atë vendim është vendim zakonisht i mbrapshtë, e ne i kemi të gjitha këto vendime të mira. A po e kuptoni se pse e kemi Gjykatën Kushtetuese të këtillë çfarë është ndërmjet mandatit që nuk po përfundon dhe mandatit i cili nuk ia nis.

Gjykata Kushtetuese na e ka rrëzuar ligjin për vendosjen e çmimeve tavan. Një ndër ditët më të pikëllueshme, kur kam qenë më i mërzituri si kryeministër ka qenë 24 nëntori i vitit 2023. 24 nëntor 2023, kur na e rrëzojnë ligjin tonë për Çmimet Tavan për Produktet Bazë. Pastaj, na e kanë rrëzuar ligjin për Këshillin Prokurorial, ligjin për Byronë për konfiskimin e pasurisë së pajustifikueshme, ligjin për Këshillin e Pavarur Mbikëqyrës për Shërbimin Civil, Kodin Doganor dhe Akcizë, vendimin e Kuvendit për shkarkimin e anëtares së bordit të OShP-së dhe së fundmi edhe Statutin e ShSKUK-së.

Derisa flasim, Gjykata po e pengon edhe zhvillimin ekonomik të vendit me mosmarrjen e vendimit për Ligjin për Fondin Sovran. Na ka ndihmuar Friedrich Ebert Stiftung – 1 vit e 8 muaj dhe 13 ditë sot – 1 vit e 8 muaj dhe 13 ditë që nuk merr vendim për ligjin për Fondin Sovran. E gjithashtu po e pengon avancimin e mëtejshëm të arsimit të lartë në Kosovë, me mosmarrjen e vendimit për Statutin e Universitetit të Prishtinës – 1 vit e 1 muaj e 20 ditë sot. Është dërguar Statuti i Universitetit të Prishtinës në Gjykatë Kushtetuese – 1 vit e 1 muaj e 20 ditë pa përgjigje. Janë plot 18 ligje në pritje të vendimmarrjes së Gjykatës Kushtetuese, përpos këtyre që i përmenda, pra në pritje të shqyrtimit dhe të gjitha këto gati që 9 muaj.

1.Ligji për Banimin Social dhe të Përballueshëm;

2.Ligji për Sigurimin e Detyrueshëm të Kujdesit Shëndetësor;

3.Ligji për Byronë Shtetërore dhe Konfiskimin e Pasurisë së Pajustifikueshme;

4.Ligji për Lojërat Mesdhetare “Prishtina 2030”;

5.Ligji Kundër Dukurive Negative në Sport;

6.Ligji për Kontabilitet, Raportim Financiar dhe Auditim;

7.Ligji për Bankat;

8.Ligji për parandalimin e pastrimit të parave dhe luftimin e financimit të terrorizmit;

9.Ligji për Gjykatën Administrative;

10.Ligji për Prokurorinë Speciale;

11.Ligji për Shërbimin e Pagesave;

12.Ligji për Maturën Shtetërore;

13.Ligji për Financimin e Menaxhimit të Resurseve Ujore;

14.Ligji për Inspektoratin Qendror të mjedisit, ujërave, natyrës, ndërtimit si dhe për mbrojtjen nga rrezatimi dhe siguria bërthamore;

15.Ligji për Inspektoratin Qendror të Trashëgimisë Kulturore;

16.Ligji për Inspektoratin Qendror për Mbikëqyrjen e Tregut.

Të gjitha këto qe gati 9 muaj në pritje në Gjykatën Kushtetuese e cila nuk merr vendim për këto, por kur kërkon masë të përkohshme Lista Serbe thotë 25 ditë, 120 deputetë të Republikës duhet të vegjetojnë.

Derisa Qeveria punon çdo ditë për qytetarët, Gjykata Kushtetuese pra vazhdon të vonojë vendime jetike, duke bllokuar reforma, duke shkaktuar pasoja të drejtpërdrejta për demokracinë, për qytetarët, për zhvillimin e vendit.

E pesë deputetë të opozitës shqiptare, nga 52 sa janë veç 5, as 10%, as çdo i dhjeti i tyre, veç 5 deputetë të opozitës po të votonin për Nenad Rashiqin, po të votonin për Nenad Rashiqin, do ta kishim edhe nënkryetarin nga komuniteti serb. Jemi angazhuar me partitë opozitare por kot ata votojnë me zell kundër Albulenës por nuk guxojnë të votojnë kundër Listës Serbe. Shteti i pavarur i Kosovës, të nderuar të pranishëm, është republikë demokratike, jo republikë multietnike. Kosova është shoqëri multietnike, por jo shtet multietnik. E jemi shoqëri multietnike sepse nuk jemi 100% shqiptarë, por jemi 92% shqiptarë, 8% nuk janë shqiptarë, 8% janë pakica, e gjysma e tyre serbë e gjysma tjetër boshnjakë, turq, ashkalinj, romë, egjiptianë e të tjerë. Ne si qeveri iu shërbejmë të gjithëve pa dallim si qytetarë të barabartë të Republikës, por politikisht është e pafalshme të mos bëhet dallimi ndërmjet Nenad Rashiqit dhe Sllavko Simiqit siç e bëri opozita.

Të dashur qytetarë,

Përveç sukseseve që i kemi në nivelin qendror dhe pengesat që na i nxjerrin të tjerët për të na vonuar sepse edhe ata e dinë, po si ne, që veç vonim se shpëtim nuk ka, ne po hyjmë tash edhe në një palë tjetër të zgjedhjeve lokale kësaj radhe jo si një subjekt që e teston forcën e vet, po si forcë që tashmë ka dëshmuar qeverisje, drejtim dhe përgjegjësi. Organizimi ynë është i qartë, në zgjedhjet lokale garojmë në 32 komuna me 906 kandidatë për kuvendet komunale. Ky është rrjeti ynë politik e qytetar, kjo është shtrirja jonë e gjerë kombëtare. Pra ajo që e dallon Lëvizjen nuk është vetëm numri, është thelbi. Në 12 komuna bartëset e listave tona janë gra dhe në nivel vendi 40% e gjithë kandidatëve në listat tona janë gra. Ky nuk është dekorim statistikor, është politikë emancipatore. Është përpjekje që udhëheqja të mos jetë privilegj i disave por përgjegjësi e të gjithëve. Listat tona janë ndërtuar me kujdes, me njerëz që kanë kurajo dhe karakter. Nuk janë lista të interesave të ngushta, por të përgjegjësisë së madhe. Prandaj zgjedhjet e ardhshme janë më shumë se garë, janë përballje me të kaluarën që ende mundohet të rikthehet dhe për këtë përballje ne nuk kemi vetëm organizim por kemi besimin e qytetarëve dhe fuqinë e bindjes sonë e të ideve tona.

Të dashur qytetarë,

Të dashur aktivistë,

Sot, nuk vuajmë më nga mungesa e informacionit sikur dikur, por nga kaosi i tij. Në njëfarë mënyre tash më shumë se një çerekshekulli terri informativ nën okupim të egër të Serbisë është zëvendësuar me një mjegull dezinformative në kushte të lirisë. Dhe këtë kaos prej mjegulle po gjejnë vend lajmet që shpeshherë nuk ua dimë as burimin se prej nga vijnë ato. Sot nuk është problemi as te identifikimi i gënjeshtrës, sepse nuk po fshihen më nga ajo, por te përsëritja e vazhdueshme e saj. Në intoksifikimin të atmosferës publike të mjedisit socio-politik problemi kryesor pra nuk është gënjeshtra sa përsëritja e saj. Përsëritja e gënjeshtrës në njërën anë, por edhe relativizimi i të vërtetës e i fakteve në anën tjetër janë pjesë e luftës hibride që i bëhet jo vetëm Republikës së Kosovës, shtetit tonë, por edhe vetë të vërtetës si të tillë. Nëse ata përsërisin gënjeshtrën, më duhet të them që ne e kemi për detyrë të insistojmë ta themi dhe ta rithemi të vërtetën. Dhe kurrë nuk është mjaft deklarimi i së vërtetës, sidomos në kohërat e gënjeshtrave të shumta që vazhdojnë të përsëriten.

Kësisoj, si asnjëherë më parë duhet pasur kujdes edhe për adresat nga po informohemi e kush po i thotë ato. Nëse ata që kanë për detyrë të informojnë nuk kanë filtra ndaj këtyre lajmeve, nëse edhe nuk i bëjnë ato me qëllim, duhet ne vet si qytetarë e si aktivistë të kemi filtrat tanë ndaj këtyre informacioneve aq shpesh aq shumë dezinformuese. Në anën tjetër kjo nuk ka se si të mos lidhet edhe me raportin e pazgjidhur që kemi me fqinjin tonë verior e ku e kemi një kontrast të thellë edhe sa i përket të kaluarës, edhe sa i përket të tashmes edhe sa i përket të ardhmes. Sa i përket të kaluarës për shkak të gjenocidit që u ushtrua mbi ne, sa i përket të tashmes për shkak se janë regjim autoritar e ne jemi Republikë Demokratike, ne luftojmë krimet e luftës, i zbardhim ato, ndërkaq ata duan revizionizëm të historisë dhe nuk pranojnë çfarë kanë bërë, mohojnë krimet e kryera. Por më duhet të them edhe për shkak të ardhmes meqenëse ne dëshirojmë Bashkimin Evropian dhe NATO-n ndërkaq Serbia autoritare gjithnjë e më shumë po orientohet kah Federata Ruse në krye me presidentin despotik Putin dhe nga Republika Popullore JoDemokratike e Kinës.

E tash të nderuar të pranishëm,

Ju e patë që së fundmi, Presidenti i Serbisë, Aleksandër Vuçiq, na kishte akuzuar neve, më kishte akuzuar mua, se unë po ia organizoj e urdhëroj protestat atje, se ato po bëhen nga ne. Kjo nuk është çudi. Kështu ndodh me të gjithë ata diktatorë që janë të shkëputur nga populli i tyre të cilin e shtypin e shfrytëzojnë dhe nuk i besojnë atij. E në rrethana kur nuk i beson popullit tënd gjithçka duket se po të vjen disi prej jashtë. Aleksandar Vuçiqit protestat po ia organizon populli, populli i Serbisë dhe jo Kryeministri i Kosovës. Krejt çfarë mund të kemi ndihmuar për këto vite është veç shpërfaqja e fytyrës së tij të vërtetë nga perspektiva e shtetit dhe e popullit të Kosovës dhe ndërhyrjet që ai ka dashur t’i bëjë te ne e ne ia kemi ndaluar. Ia kemi ndaluar sepse parasëgjithash ia kemi ndalur. Atij i humbi fillimisht fuqia destabilizuese përmes bandave kriminale e strukturave ilegale në Kosovë, ndërkohë që tash populli i vet atje po ia humb fuqinë edhe brenda shtetit të Serbisë. Kjo dhe kaq është e vërteta.

Për fund, dua t’iu falënderoj jo veç për punën e angazhimin, rolin e kontributin, fitoret e sukseset tona të përbashkëta por edhe vështirësitë e mëdha, sakrificën e paimagjinueshme nëpër të cilën keni kaluar gjatë punës, kontributit, rolit, fitoreve dhe sukseseve tona të përbashkëta. Pra nuk është thjesht punë, është punë e rëndë. Nuk është thjesht angazhim, është angazhim i vështirë. Dhe këtë e kemi arritur bashkërisht sepse s’jemi ndalur, s’jemi lodhur dhe sepse e keni kuptuar që bashkëpunimi nuk nënkupton që vetëm të jemi bashkë por edhe të punojmë sa jemi bashkë. Prandaj edhe siç tha Nënkryetari i parë Glauk Konjufca ne e kemi arritur këtë sukses kaq të madh përkundër kaq shumë vështirësive. Kemi bartur pesha shumë të rënda teksa kemi vrapuar kur të tjerët s’kanë guxuar as të ecin. Dhe për këtë si kryetar i Lëvizjes, si Kryeministër i Republikës, si kryesi e VETËVENDOSJE!-s, u jemi si nga hera ashtu përherë falënderues e mirënjohës sa s’thuhet.

Në zgjedhjet e kaluara siç e dini edhe veçmas i kemi pasë kundër krejt opozitën të cilën e bashkoi inati e xhelozia ndaj nesh. I kemi pasë bashkë kundër nesh të gjithë oligarkët të cilët i bashkoi frika nga drejtësia e ligjshmëria jonë, dhe i kemi pasë krejt bashkë pothuajse të gjitha mediat, të cilave nuk u pëlqente e vërteta e suksesit dhe suksesi i të vërtetës së qeverisjes tonë të mirë. I kemi pasë bashkë komplet klikën e prokurorisë, merreni me mend, përkundër të gjitha këtyre së bashku fituam. Andaj po përpiqem ta shpij edhe një hap më tutje atë çfarë tha Glauk Konjufca, që mospranimi i rezultatit të zgjedhjeve nga opozita kosovare, mospranimi i fitores së VETËVENDOSJE!-s në fakt është se ata nuk po mund të përballen me diçka që e kanë konsideruar të pabesueshme. Ata nuk po pranojnë sepse ende nuk po mund të besojnë. Aq shumë kanë investuar kundër nesh, aq ngushtë u patën bërë bashkë saqë po thonë nuk është e mundshme që VETËVENDOSJE! ka fituar më 9 shkurt 2025. Ky është halli i tyre. Nuk po mund të besojnë dhe rrjedhimisht nuk po mund ta pranojnë. Mirëpo çka t’iu bëjmë këtyre njerëzve që s’mund të besojnë? Ne mund t’i vetëdijsojmë por nuk mund të ngecim, ne duhet të ecim përpara. Dhe kjo është arsyeja pse ata po përpiqen që mosbesimin e tyre, mospranimin e tyre, ta shndërrojnë në një tension institucional i cili e dëmton edhe vetë shtetin e Kosovës në reputacionin e tij ndërkombëtar. E keni vërejtur qysh kur organizata të ndryshme ndërkombëtare tregojnë indekset e tyre për progresin e Kosovës nuk e mirëpresin asnjëra prej tyre. Pra suksesi i Kosovës nuk është sukses me të cilin ato ndjehen të identifikuara apo marrin pjesë. Kjo tregon që e duan shtetin për pushtet për dallim prej neve që e duam qeverisjen për shtet.

Kanë bërë premtime marramendëse e të palogjikshme, për buxhet më të lartë se BPV, pastaj për rritje pagash e pensionesh për 50% e 70%, për pagë minimale që do të ishte 50% më e lartë se paga mesatare etj. etj. e përkundër këtyre, e megjithëkëto ne fituam. Kanë gënjyer pa ia nda, kanë përdorur miliona në fushatë, kanë vjedhur në votën me postë të diasporës, e megjithëkëto VETËVENDOSJE! GUXO dhe Alternativa fituan së bashku. Përkundër të gjithave ne kemi marrë pothuaj gjysmën e votes shqiptare. Kjo tregon se sa mirë kemi qeverisur dhe sa shumë ka besim e pritje populli ynë te ne, ky është nderi më i madh në jetë që mund ta përjetojë dikush.

E si mosbesues e si mospranues të rezultatit të zgjedhjeve tash janë bërë të gjithë bashkë sërish dhe po përdorin levat e tyre në prokurori e në gjykata për me marrë në letrë në tavolinë a nën tavolinë atë që populli nuk ua dha e nuk ua jep në kuti e në vendvotim.

Por të nderuar delegatë të Kuvendit, të Këshillit të Përgjithshëm të VETËVENDOSJE!-s,

Mbase problemi themeltar është që ata nuk e dinë çka duan. Ata nuk duan zgjedhje të reja, ata nuk duan Kurti 3, dhe nuk duan madje as qeverinë e opozitës, të vetes së tyre. Në rastin më të mirë pra, ata e dinë çfarë nuk duan, por kurrsesi se çka duan. E ne e dimë se çka duam, sepse ne e duam popullin. Prandaj e duam mandatin e radhës. Sa më parë, aq më mirë. E ndërkohë ne punojmë pa kursim e pa pushim, me krejt çfarë dimë e mundemi, për qytetarët e republikës, për popullin e Kosovës, për të gjitha komunitetet, për kombin shqiptar.

Ju faleminderit shumë.

Lule të freskëta mbi varret e tyre, për të kujtuar se brezat e shqiptarëve e mbajnë gjallë pishtarin e lirisë, duke ia përcjellë njëri-tjetrit dhe duke mundësuar kështu përparimin e popullit tonë.

Kryeministri, Albin Kurti, bashkë me zv. Kryeministrin Besnik Bislimi, Kryetarin e Kuvendit, Glauk Konjufca, Nënkryetaren e Kuvendit, Saranda Bogujevci, Kryetarin e Podujevës, Shpejtim Bulliqi, Bashkë Kryetaren e Guxo, Donika Gërvalla, bacën Avni Dehari, Kryesuesen e Grupit Parlamentar të Lëvizjes VETËVENDOSJE!, Mimoza Kusari, Sekretarin Organizativ, Alim Rama, familjarë e miq të Monit dhe Arbenit, ministra, anëtarë të kryesisë, deputetë dhe aktivistë të Lëvizjes VETËVENDOSJE!, bënë sot homazhe te varri i Mon Balajt në Podujevë dhe te varri i Arben Xheladinit në Prishtinë. Më pas, ata vazhduan homazhet te Pllaka Përkujtimore e dëshmorëve Arben Xheladini dhe Mon Balaj, në sheshin “Nëna Terezë” në Prishtinë.

Më 10 shkurt 2007, pikërisht 18 vjet më parë, Arben Xheladini dhe Mon Balaj, bashkë me mijëra demonstrues të tjerë, marshuan paqësisht kundër padrejtësive të Pakos së Ahtisaarit. Gjatë kësaj proteste, ata u qëlluan nga policia rumune e UNMIK-ut, e cila – siç vërtetohet në shumë raporte të organizatave për të drejtat e njeriut, përfshirë edhe Panelin Këshillëdhënës për të Drejtat e Njeriut të UNMIK-ut (2 mars 2015) – kishte përdorur forcë krejtësisht të panevojshme për t’i shpërndarë protestuesit.

Sot, 18 vjet më vonë, ende mungon drejtësia për Arben Xheladinin dhe Mon Balajn. Megjithatë, kërkesa jonë për drejtësi nuk do të ndalet kurrë, sepse ajo është e pandashme nga liria dhe vetëvendosja e popullit të Kosovës.

Nderim dhe lavdi jetës e veprës së Mon Balajt dhe Arben Xheladinit!

Nga çdo cep i Kosovës e nga secili drejtim që mërgata vjen në atdhe, qytetarët e bashkuar në Prishtinë, në Sheshin Skënderbeu, shënuan historinë me tubimin elektoral të kuq flakë e më të madhin ndonjëherë që prej pasluftës. Fushatës tonë që kulmoi me këtë tubim të paparë e të papërsëritshëm, qytetarët i dhanë vulën sonte, e ajo mban numrin 118, që përbashkon 500 mijë zemra që rrahin si një.

Në fjalën e tij të hapjes së këtij tubimi të jashtëzakonshëm, ministri Arben Vitia iu drejtuar qytetarëve të pranishëm duke thënë: “Virtyti i lartë i një qeverie është të lartësohet bashkë me popullin e vet. Dhe sot ne jemi këtu, në tubimin përmbyllës falënderues për ju, të betimit solemn para jush, se do të shërbejmë me çdo çmim, përulësisht, pa u ndalur, përgjithmonë, për Republikën e Kosovës.”

“Ju që të dielën votoni për herë të parë, duhet t’ua dëgjojmë zërin fuqishëm, t’ua dëgjojmë rrahjet e zemrës fuqishëm, t’ua shohim buzëqeshjen dhe dritën në sytë tuaj që do ta bëjnë Kosovën të fortë, të dinjitetshme e të begatë”, tha Zëvendëskryetarja e Kuvendit, Saranda Bogujevci teksa iu drejtua të rejave dhe të rinjve të Kosovës.

Më tutje, ministrja Albulena Haxhiu pasi mori fjalën e saj iu drejtua grave dhe vajzave të vendit tonë: “Më shumë se kurrë, vajzat dhe gratë e Kosovës do ta shënojnë 9 shkurtin me emrin e tyre, do ta shënojnë fitoren e thellë të Lëvizjes VETËVENDOSJE! dhe të kryeministrit Albin Kurti. Nuk ndalemi për asnjë çast deri në finale.”

Teksa mori fjalën e tij përballë një mase madhështore qytetare e një entuziazmi të zjarrtë, Kryetari i Kuvendit, Glauk Konjufca u shpreh se tani që po ju shoh kaq shumë, e di se pse jemi mbledhur këtu sonte: për me thënë “mirupafshim në zgjedhjet e 2029-ës”, se këto zgjedhje të 2025-ës qënkan kry.

“Mbasnesër duhet të dalim të gjithë, secili, sepse krejt arritjet shumë të rëndësishme, si shtesat për fëmijët e nënat lehona, e deri te ndërhyrja e suksesshme në veri dhe sovraniteti jonë, janë në fije të perit nëse nuk dalim secili prej nesh pasnesër edhe me e mbështet Lëvizjen VETËVENDOSJE!, numrin 118 dhe me e bë kryeministër Albin Kurtin për herë të tretë”, tha më tutje Kryetari i Kuvendit, Glauk Konjufca.

Kryetarja e partisë Alternativa, Mimoza Kusari Lila theksoi se me fitoren tonë do të fitojë ekonomia dhe mirëqenia e vendit. Më pas ajo vijoi të thotë: “Koha e përqindjeve, haraçit e zhvatjes ka përfunduar, e kemi pre. Ne jemi vendi i grave dhe burrave punëtorë e të drejtë, vendi i intelektualëve patriotë, ne e duam vendin të përparuar për të gjithë, nuk jemi vendi i oportunistëve që pushtetin e deshën vetëm për vete.”

Ndërsa ministrja Donika Gërvalla, bashkëkryetare e partisë Guxo, solli në vëmendje se “ata” të gjithë janë kundër nesh, por as ne nuk jemi vetëm, e jemi shumë më të fuqishëm se ata, se ne kemi qytetarin e Kosovës. Më tutje ajo u shpreh: “Kemi pasur një bashkëpunim të jashtëzakonshëm dhe partneritet të rrallë me LËVIZJEN VETËVENDOSJE! dhe këtë do ta vëmë në dispozicion të zhvillimit të vendit edhe pas datës 9 shkurt.”

Në këtë tubimin elektoral, më të madhin ndonjëherë në Kosovën e pasluftës e që tejkaloi çdo pritshmëri, përpara qytetarëve doli kryeministri Albin Kurti, që pamjes madhështore të pranisë masive e me entuziazëm të pashtershëm të qytetarëve i dha kulmin më kuptimplotë.

Ai tha se 9 shkurti është referendum për katër vitet që shkuan, por edhe për katër vitet që do të vijnë, duke numëruar më pas të gjitha arritjet e bëra nga qeverisja jonë dhe më pas zotimet për të gjitha punët që do të realizohen, si dhe ato që do të fillojnë përgjatë qeverisjes së ardhshme të Lëvizjes VETËVENDOSJE, e që ky “referendum” numrin e ka 118.

Kryeministri Kurti theksoi se Republikën e Kosovës e kemi bërë shtet solidar, që kujdeset për të gjithë, që u jep të gjithëve mundësi të barabarta për zhvillim, pa diskriminim e pa privilegje. Përbri kësaj, shtoi se qeverisja jonë e mirë e bëri Kosovën edhe shtet të shumicës e me drejtësi për të gjithë, një shtet të shumicës që garanton edhe të drejtat e pakicave. E po ashtu shtoi: “Me neve edhe lëvizim pa viza në Evropë, edhe nuk lëviz kufiri në veri.”

“Qeveria jonë kurrë nuk i ka rrezikuar raportet me ShBA-në dhe BE-në. Përkundrazi. Kurrë nuk ka pasur marrëdhënie më të gjera, më të thella, më përmbajtësore, më cilësore me aleatët, partnerët, miqtë tanë ndërkombëtarë nga Perëndimi sesa me qeverinë tonë. Ne kemi ndërtuar partneritet të mirëfilltë. Armiqësia dhe serviliteti janë dy ekstremizma. Ne jemi kundër ekstremizmave, ne jemi për normalitet, që është partneritet”, nënvizoi kryeministri Albin Kurti.

Duke vazhduar fjalën e tij, ai foli edhe rreth opozitës, për të cilën tha se për 4 vjet nuk ka mundur të organizojë as edhe një protestë qytetare, duke vënë theksin te pafuqia e saj e gjithanshme: “Oligarku më i madh në Kosovë, i pakënaqur me opozitarizmin filloi t’i marrë partitë opozitare me qira në fushatë kundër qeverisë, sidomos njërën prej tyre, porsi veturën ‘rent a car’ dhe të hënën në mëngjes atë veturë duhet ta kthejë në parking, aty ku e ka marrë, në opozitë, edhe më të lodhur sesa e ka marrë.”

“Shenja ‘V’ me dy gishta do të thotë VETËVENDOSJE!, tash, këtu, cep më cep Republikës më 9 shkurt. Së fundmi, për shkak të qeverisjes tonë ky simboli “V” është bërë edhe simbol i gërshërëve, se ne fitojmë me ‘V’, por edhe prejmë me ‘V’. Prejmë korrupsionin, krimin, strukturat e Serbisë, keqpërdorimet, të gjithë ata kriminelë e armiq, të cilët nuk ia duan të mirën Republikës dhe popullit tonë”, u shpreh kryeministri Albin Kurti.

Ai shtoi se gjatë mandatit tonë, kemi marrë vesh çfarë kemi bërë, por edhe çfarë nuk u bë 20 vjet: “20 vjet në pushtet, herë LDK e herë PDK, por u desh të vijë VV që të restaurohet edhe Kompleksi i Epopesë së UÇK-së i kryekomandantit Adem Jashari, edhe shtëpia e presidentit historik Ibrahim Rugova. Ata votat i merrnin në emër të UÇK-së e në shpinë të Rugovës, por nuk e kujtonin, nuk e rimëkëmbnin as UÇK-në as Ibrahim Rugovën.”

“Neve na bashkon shpirtërorja dhe idealja, shpirti kombëtar dhe ideali i dëshmorëve e ideali na bën besnikë. Në këtë rrugëtim tonin të përbashkët, besa dhe shpresa janë bashkë. Këtë bashkim tonin cep më cep Republikës e keni garanci që ua siguron sovranitetin, mirëqenien, dinjitetin, cep më cep, 118. Kosova është vendi ynë, 9 shkurti është vendimi ynë. Na priftë dhe na përcjelltë e mbara, drejtë fitores së madhe me 500 mijë vota”, tha kryeministri Kurti në këtë tubim historik në prag të fitores historike të 9 shkurtit.

Letra e z. Sánchez në shqip:

I nderuar Kryeministër Kurti,

Në emër të Internacionales Socialiste, dëshiroj t’ju përcjell urimet e mia më të sinqerta juve dhe Lëvizjes Vetëvendosje për fitoren tuaj të fundit zgjedhore. Ky rezultat është një dëshmi e besimit dhe mbështetjes që populli i Kosovës ka në udhëheqjen dhe vizionin tuaj për të ardhmen.

Ndërsa vijoni punën tuaj për forcimin e demokracisë, drejtësisë sociale dhe progresit ekonomik, ju uroj çdo sukses dhe shpresoj që së shpejti të mund të formoni zyrtarisht qeverinë tuaj.

Internacionalja Socialiste mbetet e përkushtuar në mbështetjen e Kosovës në këtë rrugëtim dhe pret me kënaqësi bashkëpunimin tonë të vazhdueshëm.

Me përshëndetje vëllazërore,
Pedro Sánchez
President i Internacionales Socialiste 

Qytetarët e Pejës nuk mund t’i ndalë asgjë, e këtë e treguan në këtë tubim madhështor të mbushur cep më cep e me entuziazëm që përshkonte secilën zemër, të bindur për fitoren e madhe të 9 shkurtit. Peja e Haxhi Zekës, lulja e Dukagjinit, e luftës, kulturës dhe artit foli njëzëri, qartë dhe vendosur, për numrin 118 me 500 mijë zemra anemabanë Kosovës.

Duke e hapur këtë tubim, kryeministri Albin Kurti tha se Peja është fole e shqiponjave në bjeshkët e larta sipër, por gjithashtu e dimë se fatkeqësisht ka edhe një çerdhe tjetër të nëntokës me gjarpërinj, duke shtuar: “Por a e dini çka të dashur Pejanë? Shqiponja e mund gjarprin, kudo, cep më cep, këtu, gjithnjë, përgjithmonë.”

Më tutje, përgjatë fjalës së tij, ai tha se në Spitalin e Pejës e kemi shtuar rezonancën magnetike, po e ndërtojmë depon moderne të barnave dhe po punojmë në funksionalizimin e sallës gjinekologjike, duke përmendur edhe investimin në lidhje me spitalin e këtij qyteti, që do të bëhet në bllokun operativ e sidomos në ortopedi.

“Fondin Sovran do ta bëjmë. Kryetari i Komunës që është këtu, partia e tij LDK-ja e quante projekt komunist. Ndërkohë, ShBA-ja tash po themelon Fond Sovran. Atë që e kemi kaluar ne me ligj, një vjet e dy muaj është duke pritur në Gjykatën Kushtetuese dritën jeshile. Por vetëm vonim, se shpëtim s’ka. Fondi Sovran i Republikës së Kosovës do të bëhet”, nënvizoi kryeministri Albin Kurti.

Me mbështetjen dhe entuziazmin e qytetarëve të Pejës, që rritej gjithnjë e më shumë përgjatë tubimit, kryeministri Kurti iu drejtua atyre duke thënë: “Kjo opozita shpreson së brendshmi te pazaret mbas partive dhe jo te programet e secilës. Opozita shpreson së jashtmi edhe te ndonjë ndërkombëtar. Kjo soj opozite e lyp fatin me qiri te ndonjë ndërkombëtar i cekët, e jo në thellësinë historike të kombit tonë, ku gjithnjë gjenden zgjidhjet më të mira për popullin tonë. Në vend që me e mirëpërdorë ShBA-në kundër Serbisë, këta kqyrin me gjet ndonjë zyrtar kundër kryeministrit tuaj. Prandaj, më 9 shkurt, këta ish-qeveritarë që duan të kthehen, i çoni në pakthim.”

Në vijim të fjalës së tij, kryeministri Kurti theksoi se fëmijëve të Kosovës nuk bën me iua lënë problemin me Serbinë dhe se gjenerata jonë, brezi jonë duhet ta kryejë atë një herë e përgjithmonë, e fëmijët e Kosovës sot nuk bën me e përjetu as burgun, as luftën, as okupimin, as masakrat, as torturat që i kemi përjetuar ne; ne duhet me qenë brezi që e mbyllim këtë kapitull. Më pas, ai shtoi se nëse ne nuk qëndrojmë kur është nevoja, ne i rrezikojmë fëmijët tanë dhe ne nuk kemi të drejtë t’i rrezikojmë ata, por e kemi obligim të rrezikojmë për fëmijët tanë. E ky obligim, tha ai, kryhet duke ua lënë brezave të rinj një ushtri të fortë, që e mbron Kosovën cep më cep.

“Një ndër gjërat e këqija që kanë ndodhur në Kosovën e pasluftës, në Kosovën e rrënuar, të djegur e të shkrumbuar, është se disa u bënë milionera. Nuk mund të pasurohet brezi jonë pa e rindërtuar njëherë Kosovën. Ku po don, në magje të fukarasë me i shti duart, në hambarin e bujkut që ia kanë vra me bagëti, me familje e ia kanë djeg traktorin? E t’i po don me ia marrë tokën tash, hektarin me 300 euro, se arin me 3 euro e kanë marrë. Kanë ndodhur gjëra të këqija, prandaj ne kemi thënë se do të bëhet Byroja për Konfiskimin e Pasurisë së Pajustifikueshme. Do i kthejnë cent më cent çka kanë vjedhë”, tha kryeministri Albin Kurti.

Në vazhdë të kësaj, ai theksoi: “Nëse këta që kanë vjedhur pasuri të Kosovës iua lënë trashëgimi fëmijëve të tyre, fëmijët e tyre do të bëhen pronarë, e fëmijët e tjerë të Kosovës do të bëhen rrogëtarë. E unë nuk e lejoj këtë gjë. Prandaj 9 shkurti është referendum. Nuk ka me u përdorë trashëgimia materiale e plaçkitur që i përket shtetit, si legalizim për hajninë edhe për vjedhjen. Duhet të ndërtojmë një shtet ku fëmijët janë të barabartë, e jo ku dihet që në fëmijëri që dikush kur të rritet do të jetë multimilioner, e dikush do të jetë buzë varfërisë. Nuk mundemi që ne të mbyllim sytë edhe veshët para tragiedive që do të ndodhin pas 10 vjetëve, kur fëmijët e sotëm do të jenë rrogëtarë të fëmijëve të këtyre që kanë plaçkitur e janë bërë pronarë. Nuk e lejojmë këtë gjë, mua më keni garancion.”

“Një ish-komandat që ka kontribuuar në luftë, mbas lufte e privatizoi një terminal doganor. Çka i vyen, çka ka punë ish-komandanti me terminalin doganor? Ai donte me ia lënë edhe djalit të vet, mirëpo: VETËVENDOSJE!. VETËVENDOSJA! Kur fitoi, kjo V-ja e gishtave u bë gërshërë, edhe ia kemi pre terminalin doganor. Terminalin doganor e bëmë shtetëror. Nuk ka me ia bart djalit të vet, se e ka marrë shteti që iua jep krejt djemve dhe vajzave të Kosovës”, potencoi kryeministri Kurti, i cili më pas shtoi sërish:

“Këtu ju e keni këtë korporatën Devolli. Hala s’ia kishin kthy 62.6 milionë euro Telekomit. Blerim, Shkëlqim, ktheja paret se s’janë tuajat, me arbitrazh të kurdisur i keni marrë. Ku është Z Mobile tash? E Burbuqe Hana që e kemi në Telekom, e ka kthyer Telekomin e Kosovës me 15 milionë euro fitim, 15 stacione bazë të transmetimit i ka vendosur në veri të Kosovës. Veç kur ka mundur policia me komuniku, ka mundur me i arrestu dhe me i luftu suksesshëm grupet kriminale e strukturat paralele atje. Këtë ka bërë Burbuqe Hana, Telekomi i Kosovës që vëllezërit Devolli ia kanë 62.6 milionë euro borxh. Duhet me ia kthy paret Telekomit, se e ka shtri rrjetin në veri dhe e kami shtri sovranitetin në veri. Ku është Z Mobile me shtri sovranitetin në veri?”

Prandaj, shtoi më tutje kryeministri Kurti, 9 shkurti është referendum, është referendum historik: o tash o kurrë, o krejt o asgjë.

Kryeministri Albin Kurti prezantoi në vazhdim përballë qytetarëve të pranishëm kandidatët e listës tonë 118 nga rajoni i Pejës: Fatmire Mullhaxha Kollçaku, Raif Çavolli, Rozeta Hajdari, Shpëtim Hajdaraj, Gramos Agusholli, Gazmir Raci, Teuta Mulaj, Mentor Arifaj, Zef Ndrejaj, Taulant Kelmendi dhe Donika Gërvalla.

Në fund të këtij tubimi, kryeministri Kurti tha se këto 4 vjet e këtë fushatë, fjalët që më së shumti i kemi dëgjuar nga qytetarët janë “Mos lësho pe!”: “Unë po ju them që nuk lëshoj pe, e më 9 shkurt ju mos lëshoni pe. Më 9 shkurt, tri fjalët ‘Mos lësho pe’ i kanë tri shifra: 118, cep më cep Republikës.”

Në Prizren, në më të bukurin vend, më bukur e më hijshëm se kurrë më parë, për fitoren më të madhe që ndonjëherë është parë, për numrin 118 e me 500 mijë zemra. Në shatërvanin e Prizrenit, në vend të ujit sonte kishte zjarr, duke buruar prej atyre zemrave të bëra bashkë për fitoren e madhe të 9 shkurtit, prej qytetarëve të Prizrenit që mbushën sheshin cep më cep në këtë tubim madhështor.

Në nisje të fjalimit të tij, e i shoqëruar vazhdimisht me brohoritje zemre e mbështetjeje të pakursyer, kryeministri Albin Kurti tha se Prizreni na ka dashur gjithmonë si Lëvizje, por edhe ne si Qeveri e kemi dashur fort Prizrenin, e provuar kjo nga buxheti që është ndarë, por edhe nga emërimet e bëra, e në këtë mënyrë Prizreni nuk ka qenë asnjëherë më i përfaqësuar sesa tani në nivelin qendror.

Më pas ai theksoi: “Në secilën prej masave e politikave tona, komunitetet joshumicë janë përfaqësuar e shpesh edhe mbipërfaqësuar. Për shembull, komunitetet joshumicë përbëjnë 17% të përfituesve të subvencioneve për pajisje efiçente dhe 16% të praktikantëve me pagesë në programin Kosovo Generation Unlimited. Pra, ne jemi nga të gjithë, për të gjithë, për secilin e pa lënë asnjeri mbrapa.”

“Kurrë qytetarët e Kosovës nuk e kanë pasur gjendjen e sigurisë dhe atë socioekonomike më të mirë se në këto katër vjet. Ka të pakënaqur nëpër studiot televizive, por ata nuk janë të pakënaqur pse janë të papunë ose të varfër, por janë të pakënaqur nga lakmia dhe xhelozia. Qeveria jonë nuk mund të merret me disa individë të pakënaqur nga lakmia e nga xhelozia, siç janë edhe krerët e partive opozitare. Ne merremi me shtimin e punësimit dhe zvogëlimin e varfërisë dhe këtë e kemi bërë si askush tjetër, si asnjëherë më parë”, shtoi kryeministri Kurti.

Në vazhdim ai theksoi se për katër vjet Kosova i ka 80 mijë të punësuar më shumë, apo sa gjashtë stadiume “Fadil Vokrri” të mbushura plot në Prishtinë, duke përmendur edhe se sipas Bankës Botërore, e kemi zvogëluar për gati 25% varfërinë.

“Me Qeveritë e kaluara, partneri kryesor tregtar i Kosovës në rajon ishte Serbia, me neve partneri kryesor tregtar në rajon është Shqipëria. Me ato ish-qeveritë, Kosova importonte më së shumti mallra nga Serbia, me Qeverinë tonë ne importojmë më së shumti nga Turqia”, nënvizoi kryeministri Kurti përballë qytetarëve të Prizrenit.

Po ashtu, foli edhe rreth raportit të Nismës Globale Kundër Krimit të Organizuar Transnacional, sipas të cilit Kosova është vendi me më së paku krim në Ballkanin Perëndimor dhe ajo është në mesin e top 10 vendeve në Indeksin më të lartë të Ligjit dhe Rendit, si dhe një ndër vendet më të sigurta për qytetarët, sipas raportit të organizatës amerikane Gallup, që tregon shumë për popullin tonë dhe për profesionalizmin e policisë tonë.

“Në këto 4 vjet, në Prizren kemi investuar gjithsej mbi 240 milionë euro, e në mandatin e ri vetëm rruga Prizren-Tetovë do të jetë 200 milionë euro, që do ta ndërtojmë e financojmë bashkë me Maqedoninë e Veriut. Do ta ndërtojmë edhe rrugën e Dukagjinit, që zgjerohet dhe lidh Prizrenin, Rahovecin, Gjakovën, Deçanin me Pejën dhe Istogun. Spitalit rajonal të Prizrenit ia kemi shtuar rezonancën magnetike, shërbimet e kardiologjisë invazive, e do t’i vazhdojmë investimet milionëshe për repartin e Pediatrisë dhe do ta ndërtojmë Poliklinikën Specialistike në Sharr”, theksoi kryeministri Kurti.

Në vazhdim të fjalës së tij, kryeministri Albin Kurti tha se do t’i shtojmë edhe 10 profile të tjera te sistemi dual: “Në këtë mënyrë, të rinjtë tanë, prej moshës 15 apo 16 vjeçare fillojnë dhe e lidhin fitimin e përfitimin me punën dhe angazhimin, e jo me fatin dhe me krimin. Ky është aspekt tejet i rëndësishëm socio-kulturor, që mëson qysh në moshë të re se pasurimi dhe fitimi nuk vjen prej fatit apo krimit, por prej angazhimit dhe punës.”

Në vijim ai prezantoi kandidatët për deputetë nga lista jonë fituese e LËVIZJES VETËVENDOSJE!, që janë nga rajoni i Prizrenit: Hajrulla Çeku, Dafina Alishani, Mytaher Haskuka, Arbër Rexhaj, Haxhi Avdyli, Jetmire Vrenezi, Ilir Gashi, Salih Zyba, Albena Reshitaj, Gani Krasniqi, Jetmir Ajdini, Nora Fetoshi, Lendrit Iljazi, Valon Hoti, Hysen Durmishi dhe Artan Abrashi.

Në përmbyllje të këtij tubimi frymëzues në Prizren, kryeministri Albin Kurti tha se në mesin e këtyre 500 mijë zemrave, nga Prizreni i duam, sepse na duhen, 40 mijë zemra apo 40 mijë vota për numrin 118: “Punoni të gjithë, e flejmë pas 10 shkurtit. Deri më 9 shkurt le ta kursejmë edhe gjumin, por jo punën. Ne kemi koalicion me popullin, VETËVENDOSJE! në koalicion me Guxo, me Alternativën dhe popullsinë e Prizrenit dhe popullin e Kosovës. Faleminderit që po e bëni dimrin verë. Më 9 shkurt Prizreni, Kosova e diaspora, do të votojnë bashkë, do të festojmë bashkë e do të fitojmë bashkë me mbi 500 mijë vota.”

Të dashur qytetarë të Mitrovicës, mirëmbëma dhe mirë se ju gjej këtu në sheshin Mehë Uka.
Ju e bëni dimrin verë me këtë mikpritje kaq të zjarrtë për listën tonë me 110 kandidatë dhe me numrin 1-1-8. E duhet ta bëjmë dimrin verë sepse sivjet pranvera ja nis më herët, ja nis më 9 shkurt e jo 40 ditë më vonë, siç shkruan kalendari.

Të nderuar të pranishëm, nuk ka brim a piskamë nëpër studio televizive, e as germë nëpër portale që mund ta mohoj apo ta shtrembëroj realitetin e ri të Mitrovicës që është realizuar duke ju falënderuar qëndresës suaj dhe qeverisë sonë. Kushdo mund të shkojë kurdo andej Ibrit për punë, për pushime dhe për qejf, në ditë të javës dhe në ditë të fundjavës, të rrijë, të kthehet, të rikthehet, e sidomos ju, të dashur qytetarë të Mitrovicës.
Një milion lajme të rreme nuk mund ta mposhtin të vërtetën. E vërteta ekziston në popull dhe ajo fiton çdo herë. Fiton përherë. Fiton këtu, kudoherë në Kosovën tonë, cep më cep. Kurse e vërteta këtu me ju është se sot në veri të Kosovës valon flamuri i Republikës së Kosovës. E vërteta është se ushtria dhe policia e Kosovës janë më të forta se kurrë më parë. Se fëmijët e nënat marrin shesa për herë të parë, të cilat edhe u dyfishuan e u trefishuan. Se Kosova është një nga vendet me rritjen më të madhe ekonomike e ngritjen më të lartë demokratike. Sot lëvizim të lirë kudo në Evropë. Ecim krenarë kudo nëpër botë, sepse punojmë me dije e plan dhe shërbejmë me dinjitet e përkushtim. Këto janë të vërtetat e popullit që populli i njeh shumë mirë dhe s’ka portal, e as analist që mund t’i shtrembërojë apo t’i mohojë.

Të gjitha komunat në Republikën e Kosovës janë anëtarë të Asociacionit të Komunave të Kosovës. Komuna e fundit që është anëtarësuar aty është Komuna veriore e Mitrovicës, me 22 gusht 2023.
E falënderoj kryetarin Erden Atiq, i cili është me ne këtu sonte bashkë edhe me kryetarin e Leposaviçit, Lulzim Hetemi, për iniciativën me marr detyrën e cila u kurorëzua me sukses që në Asociacionin e Komunave të Kosovës të jetë anëtare pjesëmarrëse me përgjegjësi e të drejta të plota edhe Komuna veriore e Mitrovicës.
Fiks për tre javë, të dashur qytetarë, bëhen një vit e gjysmë që Asociacioni i Komunave të Kosovës është plotësuar e kompletuar. Të gjitha komunat janë anëtare aty tani. Prandaj, Republika e Kosovës, me qeverinë tonë në udhëheqje, i thotë jo, kurrë Zajednicës dhe po Asociacionit të Komunave të Kosovës, ku tash e kemi edhe Komunën veriore të Mitrovicës sonë të dashur.

E dashura rini e Mitrovicës,
Rinia nuk është vetëm e ardhmja, e ardhmja i takon gjithsesi rinisë. Veç se e ardhmja tashmë po ndodh; rritja e ekonomisë, shpërndarja e mirëqenies dhe shtrirja e sovranitetit janë ardhmëria e dëshiruar që tashmë po ngjan. Këto 4 vite ishin 4 vite të VETËVENDOSJES! dhe Mitrovicës. Kjo dekadë është e Mitrovicës dhe e VETËVENDOSJES. E ky shekull është i Republikës dhe i Shqiptarëve. Ju faleminderit përzemërsisht për kontributin dhe përkrahjen!

Të nderuar të pranishëm, kur e morëm detyrën në fund të marsit të vitit 2021, 512 milion euro na i patën lënë deficit buxhetor, ata që ikën, e mos u kthefshin. E borxhe gjetëm pothuajse në çdo ministri, te bujqësia 40 milionë, 141 milionë të papaguara për bizneset vendore, ndërmarrjet publike na i lanë me 59 milionë euro humbje e të tjera, e të tjera. Por ekonominë që ne e morëm me më pak se 7 miliardë euro vlerë, e sollëm në pikën kur e përmbyllim mandatin tonë me bruto produktin vendor mbi 10 miliardë euro vlerë. Jemi qeveria e parë që e çon mandatin deri në fund e që ekonominë e rrit për gati 50%.
E gjatë kësaj rritjeje të ekonomisë i kemi dyfishuar eksportet e vendit tonë e po ashtu edhe investimet e huaja direkte në vendin tonë. Investimet kapitale shënuan rekord të ri me 654 milionë euro të ekzekutuara në vitin që po lëmë pas, 2024. E nga 350.000 të punësuar që i kemi gjetur në pranverën e vitit 2021, tash që jemi këtu e po flasim bashkë, i kemi 430.000 të punësuar dhe shumica e të punësuarve shtesë janë të rinj dhe gra.

Në atë vitin e parë të qeverisjes patëm sfida gjigante nga kriza të trefishta globale. Pandemia Covid-19 që vjen një herë në shekull dhe kriza energjetike dhe ajo e inflacionit që vijnë një herë në gjysmë shekulli. Të trija për një herë, në fillim të mandatit. Dhe a e dini çfarë? Dolëm fitimtarë në të tri këto fronte!
Asnjë vaksinë e asnjë kontratë për vaksina nuk e gjetëm, e për 7 muaj arritëm të vaksinojmë më shumë se gjysmën e popullsisë. Nga inflacioni që dikur e kalonte 11%-in, vitin e kaluar e kemi mbyllur me inflacion vetëm 1,6%. Kurse energjia elektrike në Kosovë është më e lira në Evropë, vetëm 7 cent të euros për kWh (kilovat orë), kurse i mbështetëm 2.008 familje me subvencionim faturash.

E rritëm mbështetjen për fermerë e për ndërmarrës. Shtuam buxhetin për shkolla, spitale, qendra të mjekësisë familjare dhe barna.
Arsimin e bëmë falas edhe nivelin universitar për të gjithë.
Ndërtuam e rinovuam objekte sportive e të trashëgimisë kulturore, cep më cep në Republikën e Kosovës.
E po ashtu e rritëm financimin për më shumë rend e ligj, siguri e sovranitet.
Rritëm pagat në sektorin publik, tri herë brenda mandatit, e rritëm dy herë pagen minimale. Rritëm pensionet e ndihmat sociale, si dhe i shtuam bursat për studentë.
Për herë të parë, ofruam mbulim universal të shtesave për mbi 400.000 fëmijë të Kosovës e afër 70.000 gra lehone të vendit tonë.
Luftuam e luftuam me shumë sukses krimin e organizuar dhe korrupsionin. U mbyllën dhjetra laboratorë të drogës e prodhime ilegale të kriptovalutave. U mbyllën dhjetra rrugë ilegale e u vendos rendi në çdo cep të territorit të vendit tonë. Me këtë rast, ndërmarrjet publike, që i gjetëm me 59 milionë euro humbje, i sollëm në pikën ku i kanë 139,6 milionë euro fitim, 17 ndërmarrje publike qendrore të Republikës së Kosovës.
E tash, të dashur qytetarë në veri të Kosovës, edhe paguhet energjia elektrike që konsumohet, edhe janë shuar strukturat ilegale të Serbisë e kriminelët e tyre, nëse s’janë vrarë ose janë në burg, kanë ikur, janë arratisur jashtë prej vendit tonë.
E bëmë vendin tonë ndër tri shtetet me progresin më të shpejtë në botë të reformave në drejtësi. Siguruam lirinë e lëvizjes pa viza brenda zonës Schengen për qytetarët tanë, duke filluar nga 1 janari i vitit 2024, duke punuar në dy drejtime; i pari, përmirësim i imazhit ndërkombëtar të shtetit tonë dhe i dyti, angazhim aktiv me shtetet skeptike.
Siguruam që Kosova të organizojë Lojrat Mesdhetare, Prishtina 2030, duke u bërë vendi i parë në rajonin tonë që i mundësohet organizimi i një ngjarjeje kaq të madhe sportive.

E, të dashur qytetarë, këtë rritje, këtë progres, këtë zhvillim nuk e kemi mbajtur vetëm në kryeqytet ose në komunat ku qeveris Lëvizja VETËVENDOSJE, jo! E kemi shpërndarë gjithandej në Kosovë.
Buxheti për komunat është rritur nga 547 milionë euro, sa e kemi gjetur në 2021-shin, në 788 milionë euro sivjet, që i bie 44% rritje e buxhetit përmes grantit qeveritar për Komunat e Republikës së Kosovës.
VETËVENDOSJA qeveris në 6 komuna, vetëm në 6 komuna nga 38, dhe prej këtyre 6, 2 janë në veri të Kosovës, mirëpo ne e dimë që qytetarët e Republikës janë edhe banorë në komunë, andaj i ndihmojmë me krejt çka mundemi e dim, që të gjitha komunat.

E këtu në Mitrovicë, ta zëmë, mbështetje direkte me subvencione dhe grante, 4,5 milionë euro – 4 milionë euro e gjysmë, për më shumë se 2.200 bujq e fermerë.
Rreth 2.600 nëna të reja, nëna lehona dhe gati 17.000 fëmijë kanë përfituar shtesa.
600 të rinj janë punësuar përmes platformës ‘Superpuna’.
16.000 pensionistë të Komunës së Mitrovicës, nga tetori i vitit të kaluar, kanë marrë shtesën prej 20% në pensionet e tyre, përveç se e kanë marrë 5 herë për 4 vite pensionin e 13-të, e nga janari pensionet me rritje kanë filluar t’i marrin edhe kategoritë e dala nga lufta, veteranët, invalidët, familjet e dëshmorëve e familjet e të pagjeturve.
Po, nga muaji janar, edhe mbi 80.000 zyrtarë të shtetit, shërbyes civil do të marrin rrogen me rritje, e cila do të rritet përsëri në korrik të këtij viti. Pra, 55 euro shtesë me janar dhe 55 euro të tjera shtesë, në korrik.

Qeveria jonë, Qeveria juaj, të dashur qytetarë të Mitrovicës, është qeveria e parë e cila në sektorin publik tri herë i rriti pagat e shërbyesve civil dhe dy herë e rriti pagën minimale. E kemi gjetur 130 euro dhe 170 euro varësisht, a je mbi 35 apo po nën 35 vjeç, e kemi bërë 350 euro, e në mandatin e ardhshëm paga minimale do të jetë mbi 500 euro. E kur jemi te paga minimale, ajo nuk do të tatimohet, që do të thotë se ajo do të ngritet në 500 euro për biznesin e vogël individual dhe 6000 eurot e para të fitimit vjetor gjithashtu lirohen nga tatimi.

Përveç faturave të energjisë elektrike, sivjet në veri të Kosovës po faturohën edhe tatimi në pronë për 4 komunat veriore. Për herë të parë pas 25 vitësh. Dhe kështu, një pas një, dalë nga dalë, gjërat po bien në vend të vetin. Na duhet edhe një mandat për t’u siguruar që gjërat rrinë në vend të vetin.
Universiteti i Mitrovicës “Isa Boletini” është përmirësuar për 2.268 vende në renditjen botërore të Webometrics, ka qenë gati në vendin e 13.000, e tash është më mirë se 10.700 për 4 vite. Pra, përmirësim përmbajtësor në ranglistën botërore të performancës, cilësisë, vlerës së Universitetit tuaj “Isa Boletini”, në Mitrovicë.

Pra, ne e kemi ndihmuar vazhdimisht Komunën jugore të Mitrovicës edhe Komunën veriore të Mitrovicës. Por, a e dini çfarë, të dashur qytetarë? Kandidati për Kryeministër i PDK-së dhe Kryetari i Komunës këtu, një mandat si guvernator i Bankës Qendrore të Kosovës, nuk është marrë fare me dinarin serb si mjet pagese. Dhe jo vetëm kaq! Kryetari i Komunës jugore këtu, përveç se ka qenë guvernator një mandat, ka qenë edhe dy herë Ministër i Financave dhe gjatë këtyre dy herëve që ka qenë Ministër i Financave nuk u kujtua asnjëherë që në këtë vend ka nëna lehona e ka fëmijë që kanë nevojë për mbështetje financiare të shtetit. E sikur kjo të mos mjaftonte, ky kryetar i Komunës jugore të Mitrovicës, kur i ka fituar zgjedhjet në veri të Mitrovicës Erden Atiqi i VETËVENDOSJES, nuk ia ka uruar fitoren. Nuk ia ka uruar fitoren dhe as nuk ka shkuar asnjëherë në zyrë ta vizitojë. Prandaj, Kryetarin e Komunës jugore të Mitrovicës këtu, unë e ftoj publikisht që të shkojë në veri e të pijë një kafe te Kryetari i Komunës Veriore të Mitrovicës, Erden Atiqi. E ftoj publikisht! E ftoj publikisht Bedri Hamzen që të kalojë Ibrin e të shkojë te Erden Atiqi! Se edhe atje është Kosovë! Edhe ajo është Republika e Kosovës!

Në mandatin që na pret, të dashur qytetarë, do t’i ndajmë 1 miliard euro për Ushtrinë e Kosovës! Në këtë mandat që po e përmbyllim, 630 milionë euro, përafërsisht, i kemi ndarë. E tash këtyre 630 milionë eurove ja shtojmë edhe më shumë se 50% sepse në mandatin e ardhshëm 1 miliard euro për ushtrinë tonë. Ju e dini shumë mirë që e kemi hequr tavanin prej 5.000 pjesëtarëve, mund të shkojmë edhe më shumë se kaq, ndërkohë që kufizimin e moshës prej 23 vjeç, e kemi bërë 25 vjeç, e kemi dyfishuar numrin e çizmave në tokën tonë, të ushtarëve tanë dhe i kemi katërfishuar trajnimet jashtë vendit në shtetet e NATO-s për oficerët, nenoficerët dhe ushtarët e Forcës së Sigurisë së Kosovës.
Kemi blerë drone luftarake Bayraktar TB2 prej Turqisë, kemi blerë sistemin Javelin Amerikan, antitank dhe gjithashtu edhe ‘Skifterat e Zi’, helikopterët Black Hawk. Pra, kur kësaj ia shtojmë faktin që do të kemi fabrikë të municionit dhe drona ‘Made in Kosova’, ushtria jonë do të na mbrojë cep më cep, bashkë me policinë tonë, dhe ai kojshia i keq që e kemi duhet me mendu tri katër herë para se të na sulmojë. E kur të mendon tri katër herë, nuk ka me ja mbajtë me sulmu. E masi s’ka me ja mbajtë me sulmu, është më mirë edhe për ne, se s’do të ketë luftë, por është më mirë edhe për ata, se nuk do kenë nevojë me vdek.

Përveç se 1 miliard për ushtri, edhe 1 miliard për prodhimtari dhe, për çdo vit, se paku 1 miliard euro investime kapitale nga buxheti i Republikës së Kosovës.
Do të ndërtojmë spital të ri në Mitrovicë dhe Ferizaj. Poliklinika Specialistike në 6 komuna, e buxheti për listën e barnave esenciale që veç se është në nivel rekord tash, afër 70 milion euro, prej 24 milion euro, sa e kemi gjetur, pra gati trefishim, do ta bëjmë 100 milion euro. Si dhe për herë të parë do ta kemi listën e rimbursueshme të barnave jasht-spitalore, mbështetje kjo shtesë për shpenzimet e qytetarëve tanë.

Ekonomia jonë po rritet. Ekonomia jonë do të rritet edhe më shumë, sepse kur rritesh, rriten edhe mundësitë për t’u rritur. Por kjo rritje e ekonomisë është shumë më e rëndësishme edhe për një aspekt tjetër; e shton punësimin. Por, ne kemi nevojë për gjithnjë e më shumë të rinj e të reja që punësohen. Prandaj, e kemi programin ‘Superpuna për Rininë’, prej 18 deri në 29 vjeç, 6 muaj pagën minimale ja japim bonus apo prim. E kësaj do t’ja shtojmë edhe ‘Superpuna për Gratë’, sepse ka shumë gra të cilat do të mund të punojnë, pikërisht kur ta marrin këtë shtesë të nivelit të pagës minimale, në pagën në sektorin privat, në kompani të ndryshme.

E tash, ne e dimë që grave u shkaktohen vështirësi në rritjen e fëmijëve, atëherë kur do të punojnë, prandaj do ta shtojmë numrin e çerdheve. 65 çerdhe i kemi ndërtuar, adaptuar ose rinovuar. Kemi mundur shumë më tepër, po komunat nuk kërkonin, e përshtypja ime, te dashur qytetarë, është që komunat nuk po lypin fort prej qeverisë qendrore, se s’po u jep atyre kurgjë. Pra, janë mësuar me lyp ndonjë projekt ku u mbetet 10% apo 20%. Tash jo që s’ka 10% e 20%, po s’ka as 0,1%. Nuk ka më ashtu, rroga e vogël, fitimi i madh. S’ka më as rryshfet në fillim, e as haraq në fund. Gjithçka me punë e talent, me nderë e me ligj.
Përveç çerdheve, ka 100 euro që do t’iu paguajmë shtesë pensionistëve, gjysheve e gjyshërve që kujdesen për fëmijët prej 1 deri në 3 vjeç, kur të dy prindërit atyre punojnë.

Do ta themelojmë edhe fondin e sigurimeve shoqërore, përmes të cilit mbulohet pagesa për pushimin e lehonisë dhe prindor dhe pagesa në rast të humbjes së vendit të punës.
Në muajt e parë të qeverisë sonë, do ta heqim taksën doganore prej 10% për vetura nga Bashkimi Evropian, kurse me draftligjin e ri për automjete, që është gati dhe vetëm pret miratimin fillimisht në qeveri e pastaj në Kuvend, do ta heqim kufizimin 10-vjeçar për veturat që importohen prej jashtë. Në vend të tij do të jetë kriteri i emetimit të gazrave Euro 5. Kriterin e vjetërësisë po e zëvendësojmë me kriterin e Bashkimit Evropian për mjedis të pastër.

Raporti i tatimit të mbledhur brenda vendit dhe në kufij nga doganat ka avancuar nga 44%, sa e kemi gjetur, në 56%, aktualisht. Mbledhjen e TVSH-së në mandatin e ardhshëm për mallrat që hyjnë në kufij, do ta zhvendosim nga kufiri në brendi të vendit, sikurse e kanë ndërmarrjet, bizneset për TVSH-në e brendshme. Pra, data e pagesës së TVSH-së bëhet në muajin pasues të muajit të importimit, që është lehtësim shumë i madh për ndërmarrjet tona, për bizneset tona.
Gjithandej Republikës do të ndërtojmë 5 rezervuare për ujë të pijes, ujitje dhe industry.
Në Mitrovicë e kemi Ujmanin, që ka 75% të rezervave ujore të Republikës tone, e që ne kurrë për asnjë kusht e asnjë çmim, kurrë nuk e ndajmë, sepse është i yni! Nuk e ndajmë me askënd, sepse është pronë e Republikës së Kosovës!

Të dashur pjesëmarrës të këtij tubimi madhështor, Trepçës ja kemi kthyer edhe terminalin rajonal, të cilin ish-qeveritarët, ish, ish, ish-qeveritarët, e patën privatizuar. E kemi ndaluar përvetësimin e rezervave dhe të pasurive. Ja kemi përmirësuar menaxhimin, ja kemi ulur shpenzimet, ja kemi rritur të hyrat. Minierat muaj për muaj po nxjerrin xehe gjithnjë e më shume. Veç miniera e Stantergut, për shembull, për 4 muajt e fundit të vitit të kaluar, prej shtatorit deri në dhjetor, i ka nxjerrë mesatarisht në muaj 15.000 ton xehe, që është rekord në Kosovën e pasluftës.
Trepçën do ta fusim nën ombrellën e fondit sovran që është në Gjykatën Kushtetuese më shumë se 13 muaj, dhe do t’ia zgjërojmë prodhimin përmes hapjes së punishteve të reja të nxjerrjes së xehes. E gjithashtu do t’ia përmirësojmë procesin e flutacionit të xehes dhe rikthejmë industrinë e plumbit dhe të zinkut.
Na duhet mandati i ri edhe për punishte të reja. Na duhen 500k vota me zemër, në mënyrë që nga 250 mijë ton xehe të kalojmë në 500 mijë ton xehe nga Trepça juaj, Trepça jonë e dashur.
Pra, Trepça i bashkohet fondit sovran dhe, të dashur qytetarë, të dashur punëtorë, gra e burra, djem e vajza, më lejoni që me këtë rast t’ju shpreh ngushëllimet e mia të gjithë minatorëve, po dhe të gjithë juve, se i kemi humbur midis dy palëve të zgjedhjeve, midis shkurtit 2021 dhe shkurtit 2025, 3 kolosë të Trepçës: Nazmi Mikullovcin, Shyqri Kelmendin dhe Minir Dushin.

Qeveritë e mëhershme, lërë që e ndanë e e lanë të ndarë Mitrovicën, thuajse përfitonin nga plaga e Kosovës, por nuk arrinin as të lidhin Prishtinën me Mitrovicën.
Rruga Prishtinë-Mitrovicë ka nisur, merreni me mend, në vitin 2009, para gati 16 vitësh. Herë nuk bëhej pronësimi, e herë nuk kryheshin punimet. 5 qeveri i ka pritur e i ka përcjellë kjo rrugë Prishtinë-Mitrovicë. Po duket që ka qenë tu na pritur neve, e ne po i prijmë asaj. E kemi përfunduar segmentin e parë nga Prishtina në hyrje të Vushtrrisë dhe në pranverë kryhet edhe pjesa tjetër deri në Mitrovicë.

Të nderuar të pranishëm, punimet në stadiumin e qytetit “Adem Jashari”, do të përfundojnë në fillim të vitit të ardhshëm. Do të jetë stadiumi me kapacitetin më të madh në Kosovë. Do të jetë një nga stadiumet kryesore të Lojërave Mesdhetare, si për futboll ashtu edhe për atletikë.

Të dashur qytetarë, në këtë listë tonë me 110 kandidatë, pasi t’i rumbullaksoni numrin 1-1-8, duhet t’i rumbullaksoni edhe 10 kandidatë për deputet. Më herët ka qenë 5, tash është 10. Pra, e keni pak më kollaj, se me 5 të mbet dikush merak që s’e rumbullaksove. Edhe 10 nuk është kollaj, sepse secili prej këtyre 110 është më i mirë se tjetri, e këta krejt bashkë janë më të mirët që kanë ekzistuar ndonjëherë në Kosovën e çliruar, po me 10 është pak më kollaj se me 5.
Andaj, më lejoni që t’i ftoj nga mesi juaj, këtu para jush në skenë, disa prej tyre që vijnë nga Mitrovica e rrethi juaj këtu: Faton Peci, Arjeta Fejza, Agim Bahtiri, Hasime Tahiri-Sinani, Sanije Rexha dhe Armend Muja.

Faleminderit shumë të nderuar pjesëmarrës për këtë mbështetje. Në këto zgjedhje, dallimi është i qartë: ose do të ecim përpara drejt të ardhmes me më shumë mundësi, më shumë drejtësi dhe më shumë zhvillim, ose do të kthehemi pas tek ata që këtë vend e trajtuan si pronë të tyre personale. Ata që kërkojnë kthimin mbrapa, ata që sallat i mbushin me autobusa e ekranet dhe portalet me propagandë, janë po të njëjtit që ju i njohni mirë si “parën e kuqe”, e po të njëjtit me të njëjtat qëllime. Ata s’kanë as parime, as vlera

Në mes të zotimeve tona për mandatin e ardhshëm është edhe prokuroria e re speciale kundër krimit të organizuar dhe korrupsionit, përveç Byrosë për konfiskimin e pasurisë të pajustifikueshme.
Të dashur qytetarë, ne nuk jemi kundër pasurive. Ne nuk jemi kundër pasurimit. Ne veç kemi qejf të na tregojnë ata që kan bërë shumë miliona, si i kanë bërë? Nuk do tw duhej që dikujt që ka punuar me nderë e me djersë e sipas ligjit, që t’i vijë marre të tregojë ku i ka marrë paratë. E unë nuk besoj që ka njerëz që nuk e kujtojnë si janë pasuruar.
Pra, Byroja për konfiskimin e pasurisë të pajustifikueshme nuk është kërcënim për popullsinë, po po e përjetojnë si të tillë vetëm ata që, siç thotë populli, ‘e kanë mizën nën kapuç’. Vetëm ata po e përjetojnë si kërcënim, jo qytetarët. Ata që kanë zhvatur, plaçkitur, vjedhur, përvetësuar, keqpërdorur, ne nuk mund t’ua falim sepse ka shumë viktima me plagë të hapura. E kanë vjedhur ardhmërinë e vendit tonë, ne po ia kthejmë atë pak e nga pak, po gjithnjë e më shpejt dhe kjo është arsyeja pse padyshim kjo prokurori e re do të krijojë një fazë të re në drejtësinë e Republikës sonë. Ata që kërkojnë kthimin mbrapa, ata që sallat i mbushin me autobusa, se nuk e di nëse e keni dëgjuar atë më të renë: Njëri zakonisht kur hip në autobus e pyet shoferin ‘për sa mbërrijmë’, por këta kur po hipin në autobus po pyesin ‘ku jemi sot?’.

Pra, këta që veç pare dhe reklamë nëpër portale, edhe autobusa që enden për t’i mbushur sallat me ‘qyk të zorit’, nuk kanë as parime, as vlera, sepse për ta pushteti nuk është shërbim e nder, por përfitim dhe pasurim. Po populli ynë i njeh mirë se kush janë ata, populli ynë as nuk blihet e as nuk shitet, as nuk gënjehet e as nuk mashtrohet.

Para se të mbyllim këtë tubim, diaspora jonë, e cila është regjistruar online, duhet të votojë sa më parë. Mos e lini për ditën e fundit, votoni sa më parë, se vetëm regjistrimi online është gjysma e punës. Gjysma tjetër është votimi. E votoni numrin 1-1-8, mandej edhe 10 kandidatë aty, e futni në zarfe dhe e dërgoni me postë në ambasadat tona ose në konsullatat tona, kudo që jeni në Evropën Perëndimore apo gjetiu. Pra, mos lejoni që të shkojnë ditët, sepse mund të vonoheni e vota të bëhet e pavlefshme. Kjo është një mundësi e shkuar huq, mos e rrezikoni votën tuaj, votoni sa më parë. Mos votoni në 5 minutat e fundit, po ndani 5 minuta këto ditë dhe kryeni votimin. Sepse nëse jeni regjistruar online, e nuk e dërgoni me postë votën, është njësoj si në futboll, më lujtët gjysmën e parë dhe pas pushimit mos të dilni më në fushë. Nuk bëhet ashtu! Domethënë, është edhe pjesa e dytë, tash ka mbetur edhe pjesa e dytë, 107.000 janë regjistruar. Ju thoni familjarëve, kolegëve, miqve, dashamirëve që i keni në perëndim. Nëse jeni regjistruar online, votoni sa më parë nëse tashmë nuk keni votuar. E ata të tjerët, të cilët janë regjistruar për të votuar fizikisht në ambasada e konsullata, mund ta bëjnë këtë me datën 8 shkurt, prej 7 të mëngjesit deri në 7 të mbrëmjes, sepse ka edhe të tillë në diasporë që kanë thënë: “Nuk votojmë me postë, po shkojmë votojmë në kuti, në ambasadë ose në konsullatë.” Ata e kanë ditën e shtunë, 8 shkurtin. Por mos e prisni 7 shkurtin që të votoni me postë. Votoni menjëherë! Sot, nesër, më së largu pasnesër. Sepse nëse nuk votoni sot, nesër, më së largu pasnesër tjetër pasnesër, unë prapë në tubim do të them këtë punë. Mirë do të ishte mos të thosha më këtë. E unë statistikat i shoh, i shoh sa po votojnë, prandaj është e domosdoshme ta kryeni sa më shpejt edhe këtë gjysmën e dytë të punës së njëjtë me kurorëzim të suksesshëm, ashtu që në mbrëmje të 9 shkurtit, të dielën, nga kutitë, edhe në diasporë, edhe në Kosovë, të shpërthejnë 500 mijë zemra për fitoren më të madhe, historike, rekord dhe të paparë në Kosovën e pasluftës.

E në kuadër të këtyre 500 mijë zemrave, në kuadër të këtyre 500 mijë votave, i dashur Armend Muja, e dashura Arjeta, i dashuri Faton, i dashuri Agim, po edhe Hasime e Sanije dhe të gjithë ju, në kuadër të 500 mijë votave me 9 shkurt, nga Mitrovica i duhem sepse i duam, i duam sepse na duhen 30.000 vota! 30.000 zemra në kuadër të 500 mijë votave e zemrave të datës 9 shkurt! Prandaj, punoni ditë e natë, natë e ditë, ashtu që nesër një javë votojmë bashkë, fitojmë bashkë, festojmë bashkë!
Numri 1-1-8, Lëvizja VETËVENDOSJE!, me Guxo dhe Alternativen dhe kandidatët më të mirë që ja u sjellin 4 vite të reja me mirëqenie, integritet, sovranitet dhe dinjitet!

Ju faleminderit përzemërsisht! Natën e mirë dhe mirupafshim!

Të dashur banorë të Hasit, edhe për neve të Vetëvendosjes, sikur në këtë vend ku jemi mbledhur për këtë tubim madhështor, vetëm qielli është tavan, sikur ajo fotografia aty. Na nuk kemi tavan, përveç qiellit, sepse më 9 shkurt të gjithë do të jenë dëshmitarë që 500 mijë vota, 500 mijë zemra do të shpërthejnë prej kutive të votimit, atëherë kur do të numërohen me numrin 1-1-8. Ky është numri i mirëqenies, dinjitetit, sovranitetit, dhe i progresit të kombit shqiptar të Republikës së Kosovës dhe Hasit këtu.

Ne jemi mbledhur këtu, gjithë Hasi në Romaj, në vendin e Ferhat Romajës, një njeri shumë i mençur e pleqnar, fort i zoti. Pra, jemi mbledhur në një vend edhe të mendjes, edhe të zemrës, e Romaja njihet si vendbanim i lashtë ilir, 5000 vite i vjetër, se këtu janë gjetur tumat ilire. Domethënë, është një vendbanim i cili është dëshmi e lashtësisë sonë dhe autoktonsisë sonë si popull që jetojmë këtu.

Ka njerëz të ardhur në epoka të ndryshme, por ju keni qenë gjithmonë këtu dhe ju do të jeni gjithmonë këtu. Ne nuk e ndajmë Hasin, jo Hasi i Shqipërisë, jo Hasi i Kosovës, jo Hasi i Prizrenit, jo Hasi i Gjakovës, ka vetëm një Has, Hasi.

E tash po e bëjmë një herë bashkimin infrastrukturor rrugor me Hasin andej kufirit. Rruga Dobrune-Blinisht ka përfunduar, është lëshuar për qarkullim vitin e kaluar. Aktualisht po ndërtohet edhe rruga Guruzhub-Bogaj-Mariq, ku ne, bashkë me Qeverinë e Shqipërisë, po i lidhim si rezultat i vullnetit tonë, nevojës së banorëve dhe marrëveshjeve të dala nga mbledhjet e përbashkëta me Qeverinë e Shqipërisë.

E ne duhet t’i japim gjithnjë e më shumë Hasit, sepse ju i keni dhënë shumë kombit. E ju jeni edhe vendi i furrtarëve më të famshëm, i bukës më të mirë që mund ta prodhojë njeriu. Sa herë që nëpër qytetet evropiane, kur shkojmë nëpër konferenca, ngelim të uritur sepse kemi harruar të hamë, e dimë që duhet të takohemi me ndonjë hasjan me ndonjë furrë dhe të marrim energji, për t’u bërë gati për ditën e nesërme.

Unë ju falenderoj shumë edhe për mbështetjen që ja keni dhënë edhe Lëvizjes, edhe Qeverisë në kohë të vështira, sepse për besë, në vitin e parë të mandatit tonë, na ra kriza e pandemisë COVID-19, që ndodhi njëherë në 100 vite. Ai gripi spanjoll ka qenë para 100 vitësh, kurse pandemia COVID-19 na gjeti pa asnjë vaksinë, pa asnjë kontratë për vaksina. Për disa muaj arritëm që më shumë se gjysma e popullsisë të vaksinohet dhe të dalim prej asaj situate. Po ashtu, vitin e parë patëm edhe dy kriza të tjera që ndodhin njëherë në gjysmë shekulli, njërën prej tyre kriza e inflacionit dhe tjetrën atë energjetike, për shkak të agresionit rus në Ukrainë, por prej të dyjave atyre, po ashtu, dolëm me sukses.

Ndërkaq, sikur kjo mos të mjaftonte, i kemi pasur sulmet më të mëdha të Serbisë në Kosovën e çliruar, pikërisht gjatë mandatit tonë, sepse ne nuk ua morëm listen Serbe në koalicion dhe i luftuam strukturat ilegale, institucionet paralele, një nga një, derisa i eliminuam ato me sukses. Sepse, të dashur qytetarë, ne nuk dëshirojmë që problemin me Serbinë t’ja lëjmë brezit të ardhshëm, është brezi ynë që duhet ta kryjë këtë punë. Asnjë brez i shqiptarëve nuk ka kaluar pa luftë. Ka breza shqiptarësh që kanë pasur dy luftëra, por edhe tri, po pa asnjë luftë nuk ka, por ne dëshirojmë që brezi i ardhshëm i shqiptarëve, i hasjanëve, i gjithë rajoneve të shqiptarisë, të jetë pa lufta, me paqe, me siguri, dhe për këtë na duhet një ushtri e fortë dhe e fuqishme.

Se na ka qellu një kojshi shumë i keq, e kur e ke kojshinë e keq, duhet me pas edhe pushkën e mirë, edhe pushkën plotë.
Prandaj, në mandatin e ardhshëm, për më shumë se 50%, do t’i rrisim shpenzimet dhe investimet në ushtrinë tonë. I kemi pasur 630 milionë këto 4 vite, do t’i bëjmë 1 miliardë euro, ku bëjnë pjesë edhe fabrika e municionit dhe dronët ‘Made in Kosova’.
Ushtrinë tonë ja kemi hequr këtë tavanin prej 5000 pjesëtarëve, tashmë e kemi dyfishuar numrin e qizmëve në tokë, pra të ushtarëve të FSK-së, dhe kemi blerë dronë Bayraktar prej Turqisë, sistemin anti-tank Javelin dhe helikopterët ‘Skifterat e Zi’- ‘Black Hawk’ prej Amerikës. Dhe në këtë mënyrë, cep më cep, Kosova do të jetë e sigurt njëherë e përgjithmonë.

Përveç mbrojtjes, 1 miliard euro, gjithashtu edhe mbështetjes për investime në kapacitet prodhuese, përmes garantimit të kredive për ndërmarrësit tanë. Kush prodhon, do ta ketë dorën e mirë të shtetit, në mënyrë që ta rrisë prodhimtarinë, ta shtojë punësimin, të na I rrit eksportet, dhe në këtë mënyrë të pasurohen njerëzit me ligj, me nder, me punë dhe me talent.

Ndërkaq, për ata që kanë zhvatur në të kaluarën, në mënyrë që të ecim shpejt përpara, edhe vettingun në drejtësi do ta bëjmë, se s’bën ndryshe, dhe do ta kemi prokurorinë e re speciale për luftimin e krimit të organizuar dhe korrupsionit. Ne s’kemi asgjë kundër njerëzve të pasur dhe që duan të pasurohen, mirëpo ata, këto 20 vite që bënë shumë miliona, disa dhjetra miliona, e disa të tillë qindra miliona, duhet të na tregojnë se si i kanë bërë ato.
E tash, të dashur qytetarë, unë s’besoj që ndonjë prej tyre kur të merret në pyetje, ka me thënë “vallahi, s’më kujtohet”. I kujtohet, besoj, që i kujtohet.
Tjetra, do të hiqet taksa doganore prej 10 përqind për automjetet prej vendeve të Bashkimit Evropian, kriter do të jetë mbrojtja e mjedisit, jo vjetërsia e automjeteve.

Do ta bëjmë programin e transportit ‘Anëmbanë Kosovës’,transport publik i integruar, urban dhe ndërurban, me biletë mujore 10 euro. Me 10 euro do të mund të shkosh prej Hasit kudo nëpër Kosovë, dhe në këtë mënyrë do të rritet qarkullimi, vizitat dhe lëvizshmëria e qytetarëve.

Kemi me ndërtu hekurudhën Prishtinë-Durrës, ku brenda duhet të ketë segmentin Gjakovë-Shkodër, dhe gjithashtu do të përmbyllim Dollc-Gjakovë, Kijevë-Zahaq, sepse është e domosdoshme që këto të marrin fund njëherë e përgjithmonë. Tani po i korrigjojmë keqplanifikimet, mungesën e projekteve dhe shpronësimet me hile, ne po i rregullojmë këto një nga një, dhe këto rrugë do të bëhen. Do të ndërtohet edhe rruga e Dukagjinit dhe Porti i Thatë i Prishtinës.

500 milionë euro për Brezovicën, për të krijuar një qendër turistike e cila sjell shumë të ardhura. Edhe është e rëndësishme që tash, pasi që ja kemi marrë kontrollin Beogradit, njëfarë kompanie Ineks e Beogradit, edhe e kemi qit te AKP-ja jonë, e kemi fiskalizuar dhe tani mund të bëjmë investimet me partneritetin publiko-privat.

E kemi pasur programin ‘Superpuna’ për të rinjtë, kush është prej 18-29 vjeç, pagën minimale do t’ia japim si bonus për 6 muaj në ndërmarrjen ku punon, dhe kjo ka punësuar shumë të rinj e të reja. Këtë do ta vazhdojmë, por do ta bëjmë edhe programin ‘Superpuna për Gra’. Pra, gratë që mund të punojnë, ta kenë pagën minimale për 6 muaj si shtesë. Për shembull, nëse në një firmë paga është 400, do t’ju bëhet 750. E dimë që gratë kujdesen më shumë për fëmijët, por ne do ta rrisim numrin e çerdheve; 65 çerdhe për katër vite, me 36 milionë euro, i kemi renovuar, ndërtuar apo adaptuar. Ata para neve, 17 vjet, 1.2 milionë, vetëm katër çerdhe. Në disa komuna kemi ndërtuar më shumë çerdhe për katër vite se ata në gjithë Kosovën për 17 vite.
E shtrohet pyetja, pse, të dashur qytetarë? Se ata nuk janë marrë me fëmijët tuaj, ata janë marrë vetëm me fëmijët e vet. Pra, janë bërë ministra, kryeministra, zëvendësministra, vetëm me fëmijët e vet janë marrë. Për fëmijët tuaj nuk u ka interesuar, dhe nuk u ka interesuar as për nëna lehona nëpër Kosovë. Pra, ky është dallimi i madh me qeverinë tonë, se ne jemi qeveri për nënat, qeveri për fëmijët, qeveri për rininë, qeveri për pleq, qeveri për djemtë dhe burrat, qeveri për popullin tonë, jo qeveri për vete.

E këta kundërshtarët tanë, këta çdo pranverë thoshin “në vjeshtë zgjedhjet”. Sa herë vijke vjeshta thoshin “në pranverë zgjedhjet”. Këta kanë menduar që ne kemi me u rrëzuar disi me ndërkombëtarë për ndonjë muaj, nëse edhe jo për ndonjë javë, dhe u bënë 4 vite. E tash, kur e kanë kuptuar se do të bëhen së paku edhe katër të tjera, po dojnë me u trranu krejt.

Tjetra është kujdesi për fëmijë, përveç çerdheve, kudo që nuk ka çerdhe dhe gjyshja dhe gjyshi kujdesen për fëmijët prej moshës 1-3 vjeç, ku punojnë të dy prindërit, ne si shtesë pensioneve të tyne ja japim 100 euro. Këtë model e ka nisur Suedia, ne jemi vendi i dytë në Evropë që po ashtu do ta zbatojmë.

Për studentët një program modaliteti; për ata që studjojnë më larg, sa më larg prej vendit ku jetojnë, ata do të kenë mbështetje më të madhe prej shtetit. Do ta rrisim pagën minimale nga 350 në 500 euro në mandatin e ardhshëm. E kemi gjetur pagën minimale 130 euro nëse ke nën 35 vite, dhe 170 nëse ke mbi 35 vite, e kemi bërë 350, tash do ta bëjmë 500, në mënyrë që të kemi një prag minimal jetik, mbi të cilin duhet të shkojmë, por poshtë të cilit nuk lejohet.

Do të kemi një fond të sigurimeve shoqërore për mbulimin e pagesës për pushimin e lehonisë, prindëror ose në rast të humbjes së vendit të punës. Nëse e humb vendin e punës, mos me humb krejt, me pas njëfarë rrjeti që të mban. A e keni pa, për shembull, ai që bën akrobacione në ajër, ka njëfarë rrjeti që nëse rrëzohet, mos të bjerë në tokë, dhe një kësi rrjetë sociale do t’ja bëjmë edhe ne të gjithë punëtorëve. Ne duam që ata kurrë të mos humbin punën, por nëse e humbin, të kenë rrjetin që i mban dhe jo të bien në tokë. Pra, një rrjet mbrojtës të sigurimit shoqëror.

Më tutje, gjithashtu do të kemi investime në energji. Termocentralin Kosova A do ta rehabilitojmë thellësisht, do ta modernizojmë atë të Kosova B, dhe 150 milionë euro për efiçience për familjet, për të rregulluar kulmet, dyert, dritaret, që të ken verës freskët dhe dimrit ngrohtë, sepse një pjesë e madhe e energjisë shkon dëm, dhe do t’ja bëjmë izolimin e shtëpive, edhe private edhe ndërtesave publike.

Ndërkaq, në shëndetësi, e kemi kaluar ligjin për sigurimet shëndetësore, mirëpo tash po e pret dritën e gjelbër nga Gjykata Kushtetuese Ndërkohë, buxhetin për listën e barnave esenciale e kemi gjetur 24 milionë, dhe e kemi bërë 7 milionë, në mandatin e ardhshëm do ta bëjmë 100 milionë. Njerëzit në Kosovë në përgjithësi blejnë barna 120 milionë, pra prej 120 milionëve që blejnë barna, 100 shteti do t’i rimbursojë.

Me datën 9 shkurt, të nderuar të pranishëm, merrni gjithë anëtarët e familjes, bile edhe ata që kanë bërë 18 vite me 9 shkurt, sepse edhe kush bëhet 18 vjeç me 9 shkurt ka të drejtë. Prej 18 deri në 88 ose 98, se këtu jetojnë ndoshta njerëzit edhe më shume, e keni ndonjë plak, apo plakë që janë edhe më të moshuar, krejt dilni. Nuk mjafton të dalin prej një familje 7 anëtarësh 3 ose 4, bile as 6, të 7-të duhet të dalin, sepse të gjithë kanë të drejtë vote. Mos thoni “Hajt se shkoj baba me djalin apo me vajzën, e nëna po rrinë me fëmijët e tjerë në shtëpi”, ose anasjelltas, krejt duhet të dalin.
Dhe a e dini çka ish kan mire, përveç që të dalin krejt? Të thërrasin edhe tezet, hallat, dajtë, axhallarët, kushërinjtë e gjitha anëve dhe të thonë: “Unë dola, a shkove ti me votu, a si është puna?”. Merrni pak në pyetje kushërinjtë, pyetni a dolën në zgjedhje dhe mos e kanë ‘huqur’ rastësisht numrin 118. Nuk bën  numrit 118 me ja huq, sepse referendum është kjo.

Po, dikush prej jush që është më organizator në familje, sepse secila familje ka një person që është pak më organizator, ju e dini këtë punë. Secila familje e ka një djalë ose një vajzë, është baba, ose është nana, por prej gjithë familjes, njëri është pak më organizator. Dhe ai që është më organizator, që e ka pikëpamjen më të gjerë prej familjes ose fare fisit, ose si të themi më mire; ai që bën listen kanë me thirr në dasëm, ai është shumë i rëndësishëm. Ai person le të bëjë listën sikur kur i thërret në dasëm, dhe le t’i thërrasë për zgjedhje të 9 shkurtit. Drejt me thënë, kur t’i thirr në dasëm, nashti për dikë thotë: ‘Qita s’pe thirri’, ama këtu zgjeroje listën, se nuk është dasëm, po është zgjedhje, është 9 shkurt dhe dasmën e mbajmë ne pastaj. E bëjmë pas orës 7 në mbrëmje, kur ti numërojmë votat dhe të shihet që 500 mijë vota janë për VETËVENDOSJE!, Guxo dhe Alternativa, me numër 1-1-8, sepse do ta realizojmë fitoren historike, rekord dhe të pa parë, dhe 4 vitet e ardhshme do të jenë edhe më të mira se këto 4 vite që kaluan, dhe këto 4 vite që kaluan ishin më të mirat prej që u çlirua Kosova.

Faleminderit shumë!
Tash, na duhet pak të lëvizim shpejt për në palestrën e sporteve “Shan Ninushi”, sepse kemi tubimin në Gjakovë në ora 19:00, dhe po ju kërkojmë falje që duhet të lëvizim me shpejtësi, por jeni më shumë të mirëseardhur nëse keni mundësi të vini, sepse atje do të themi edhe shumë gjëra të tjera dhe mund të bëjmë edhe fotografi me ata që nuk mundemi t’i bëjmë këtu duke dalur.

Faleminderit shumë dhe mirupafshim!

Edhe nëse rastësisht e keni lënë dikë te shtëpia sonte, sot një javë krejt, i madh e i vogël prej 18 deri në 88, a 98, sa i keni më së shumti plak a plakë, drejt vendvotimeve për fitoren e numrit 1-1-8, me 500 mijë vota që kanë me shpërthy si 500 mijë zemra prej kutive, atëherë kur do të hapen në orët e mbrëmjes e do të numërohen nga komisionerët e Republikës së Kosovës, Cep më Cep vendit tonë.

Të dashur qytetarë të Lipjanit, ju faleminderit shumë për këtë mbështetje kaq të zjarrtë, në këtë mot të ftohtë dimri që po tregon që sivjet pranvera vjen më herët, vjen me 9 shkurt, nja 40 ditë para se që shkrun në kalendar.

E ne jemi këtu në Lipjanin që i ka dhënë shumë edhe zhvillimit, edhe kulturës të vendit tonë, por njëkohësisht edhe ka sakrifikuar gjatë luftës, me ç’rast nga komuna e Lipjanit i kemi 21 dëshmorë dhe 170 martirë. Lavdi atyre dhe të gjithë dëshmorëve të kombit, e martirëve të popullit tonë.

Nuk duhet asnjëherë ta harrojmë gjenocidin e Serbisë dhe kërkojmë nga gjyqësia dhe prokuroria që sa më shumë të punojnë, të gjykojnë e dënojnë, qoftë edhe në mungesë, kriminelë të luftës, meqenëse drejtësia sa do që vonohet, kurr s’guxon të mohohet. Sa më shpejtë, aq më mirë, dhe kriminelë nuk duhet të ketë në liri, e viktima nuk duhet të ketë që nuk shpaguhen, e nuk rehabilitohen.
E mënyra tjetër se si ne i dalim hakut të dëshmorëve e martirëve të kombit, është pikërisht duke e forcuar ushtrinë tonë, duke e zhvilluar shtetin tonë, në mënyrë që askush, asnjëherë në të ardhmen të mos guxojë të na e mësyjë, të na sulmojë, sepse do t’i dalë shumë më keq sesa që ka mundur me imagjinu.

Edhe pse Lëvizja Vetëvendosje, siç e dini ju, qeveris me 6 prej 38 komunave, e dy prej tyre janë në veri të Kosovës, ne asnjëherë nuk kemi bërë diskriminim sa i përket buxhetit për pushtetin lokal për komunat e Republikës, sepse jemi të vetëdijshëm që qytetarët e shtetit tonë janë edhe banorë të komunave, prej të cilave i varet shumë zhvillimi dhe mirëqenia. Andaj, do të jemi gjithmonë pranë juve, pavarësisht se kush qeveris në komunën e Lipjanit, dhe këtë e kemi dëshmuar edhe në grantin qeveritar, ku buxheti për komunën e Lipjanit është rreth 50% më i madh sot sesa kur ne e morëm qeverisjen para 4 vjetëve.

E po ashtu, kemi zhvilluar edhe një sërë shpenzimesh e investimesh kapitale këtu, sepse dëshirojmë që puna të jetë në qendër dhe frytet e punës të shpërndahen gjithandej në qytete e në fshatra të Kosovës, e posaçërisht këtu në Lipjan, ku ka shumë tokë pjellore e popullësi punëtore. 2.5 milionë euro është shuma e investimit tonë për infrastrukturën në Lipjan, për të ndërtuar aty ku më herët s’kishte as vullnet, as interes, as iniciativë, e për të ndrequr aty ku projektet ose nuk ekzistonin fare, ose keqmenaxhoheshin, pa çka se ekzistonin.
Nga rrugët Bajram Gashi, Marie Shllaku, e Sadik Shala, te ato të fshatrave Gadime, Smalluzhë, Bujarinë, Llugaxhi, e infrastrukturën rreth lumenjëve të Sitnicës, Gadimes dhe Janjevës, qeveria e Republikës është dëshmuar për komunën e Lipjanit.

I kemi edhe rreth 3 milionë e gjysmë euro që janë investim vetëm i Ministrisë tonë të Kulturës, Rinisë edhe Sportit. Prej tyre, 2 milionë janë për infrastrukturë të sportit, në palestrën e sportit dhe për stadiumin e qytetit, dhe 1.6 milionë euro për mbrojtjen e trashëgimisë sonë kulturore. Shumë vende në Kosovë janë ruajtëse të gjurmëve të civilizimit e të historisë. Fjalët “Janjevë” dhe “e braktisur” nuk duhen të shqiptohen kurrë më bashkë në të njëjtën fjali, siç ka qenë dikur. Tash e kemi një qytezë të vjetër, me një pamje krejt tjetër. Cep më Cep u restauruan dhe u rivitalizuan shtëpitë tradicionale, sepse i ndamë 1.6 milionë euro atje. Lipjani e Janjeva janë në zemër të Kosovës e s’janë më zemra të humbura artistike, kulturore e infrastrukturore, por tashmë të rigjetura e të rimëkëmbura.

Natyrisht, që investimin kryesor e kemi pasur për bujqësi. Mbi 13 milionë euro mbështetje me subvencione dhe grante për 6 mijë bujq e fermerë të Lipjanit.
2600 nëna lehona dhe mbi 15 mijë fëmijë në Lipjan kanë marrë shtesa për herë të parë, duke përjetuar dorën e mirë të shtetit, shtesa që u dyfishuan, e u trefishuan, në kuadër të mandatit tonë që tash ngadalë po e përmbyllim.
Edhe më shumë se 8 mijë pensionistë prej mbi 304 mijë pensionistëve gjithsej në komunën e Lipjanit, nga tetori, i marrin pensionet e rritura për 20%, dhe ata njëkohësisht, në 4 vjetët e fundit, 5 herë e kanë marrë pensionin e 13-të. E nga janari, pensionet me rritje kanë filluar t’i marrin edhe kategoritë e dala nga lufta, invalidët, veteranët, familjet e dëshmorëve dhe familjet e të pagjeturve.

Po, pavarësisht kësaj dashamirësie tonë të madhe për Lipjanin, pavarësisht se ju rrit buxheti nga 16 milionë, sa e kemi gjetur, në 24 milionë, sa është sivjet, këtu, siç e thanë edhe kryetari i Qendrës, edhe kryetari i Kuvendit, është një kryetar komune i cili s’ka nda mendjen a në komunë, a në parlament. E, meqenëse s’ka nda mendjen, më së miri është pa asnjërën.
Andaj, me datën 9 shkurt, meqenëse po don me një këmbë knej e me një këmbë anej, me datën 9 shkurt populli jon e ka një shprehje të mirë, thotë: “Një rrugë, dy punë.” Pra, me datën 9 shkurt në Lipjan mund të thuhet që janë jo një palë zgjedhje, por dy palë zgjedhje: kallzojani vendin, as në komunë, as në kuvend. Sepse ata që sakrificës së Policisë së Kosovës, vendosmërisë së Qeverisë së Republikës thonë se po bëjnë filma, ata nuk e kanë vendin në publik e në pushtet.

Të dashur qytetarë të Lipjanit, gjatë këtyre 4 viteve është rritur 50% buxheti i shtetit, është rritur 50% ekonomia e vendit. Po ashtu, në vitin e kaluar, përveç se ka kaluar bruto produkti vendor mbi 10 miliardë, mbi 3 miliardë janë të hyrat tatimore, mbi 1 miliardë janë eksportet, dhe këto do të vazhdojnë edhe më tej, që do të thotë se do të na duhet fuqi e shtuar punëtore.
E fuqinë e shtuar punëtore do ta marrim nëpërmjet sistemit dual, ku lidhim arsimin profesional me tregun e punës, ashtu që për çdo diplomë shkolle e të fakultetit të kemi një vend pune në ekonomi. Do të arrijmë që me diasporën, që unë parashoh se do të kthehet gjithnjë e më shumë, do të kemi nga diaspora që do të vijnë në Kosovë, të investojnë dhe të fitojnë.
Dhe tjetra është investim i shtuar për gratë. Programit ‘Superpuna për Rininë’ do t’ja shtojmë programin ‘Superpuna për Gratë’. Kjo do të thotë që paga minimale për 6 muaj do t’ju jepet grave si shtesë në vendin e punës, në sektorin privat, në ndërmarrësinë ku do të punësohen. E pagën minimale që e kemi gjetur 130-170 euro, ne e bëmë 265, e bëmë 350, në mandatin e ardhshëm do ta bëjmë 500 euro.

Por gjithashtu e dimë që kur të punojnë gratë më shumë, atëherë edhe fëmijët duan përkujdesje më të madhe nga shteti. Do ta rrisim edhe numrin e çerdheve, por njëkohësisht edhe mbështetjen për 100 euro shtesë pensioneve të gjysheve dhe gjyshërve të cilët kujdesen për fëmijët nga 1 deri në 3 vjeç, atëherë kur atyre u punojnë të dy prindërit.
Për 4 vjet, 65 çerdhe i kemi renovuar, adaptuar ose ndërtuar me 36 milionë euro, e ata para neve, 17 vjet, veç 4 çerdhe në krejt Kosovën me 1.2 milionë euro. Ne kemi ndërtuar më shumë çerdhe në një komunë sesa ata në krejt Kosovën për 17 vjet. Kurr s’ju ka shkuar mendja as për mbështetje financiare për nënat e reja, gratë lehona, s’ju ka shkuar mendja kurr për mbështetje financiare me shtesa për fëmijë. A e dini pse? Pse ata nuk kanë qenë qeveri për familje, qeveri për nëna, qeveri për fëmijë, qeveri për gratë e Kosovës. Ata kanë qenë qeveri veç për veti, qeveri për fëmijët e tyre, nënat e tyre, gratë e tyre, qeveri për veti. Po a e dini çka, të dashur qytetarë? Burrat, djemtë, edhe ata përfitojnë më së shumti me fitu ne. Pra, vetëm ata që nuk i duan familjet e veta dhe fëmijët e vet, ata mund të mos votojnë për Vetëvendosjen, e të votojnë për vete, por nëse i duan familjet e veta, nëse i duan fëmijët e vet, nëse i duan prindërit e vet, prapë edhe ata duhet të votojnë për Vetëvendosjen, sepse veç ne kemi program për këto kategori shoqërore që i kanë nevojat më të mëdha dhe kanë pasur historikisht kontributin më të lartë për shtetin e për kombin tonë.

Ju këtu keni ardhur vullnetarisht, nuk ka asnjë njeri këtu që ju është paguar rruga për të ardhur sonte. Ju keni ardhur vullnetarisht sepse ne kemi zemër, kemi pasion, kemi dëshirë, kemi vullnet, kemi solidaritet. E derisa vishim këtu në tubimin tuaj, besoni, pashë një tubim të një partie tjetër me autobusa. Merrni me mend, tu i bajtë njerëzit me autobusa nëpër tubimet e tyre. Prandaj, ne e duam një Kosovë Republikë, në të cilën qytetarët, kur hypin në autobus, eventualisht e pyesin shoferin për sa mbërrin, e jo sikur këta që kur hypin në autobus, i thonë shoferit: “Shef, ku jena sot?

Natyrisht që gjatë këtyre 4 vitëve ne e kemi pasur buxhetin më së shumti të alokuar për mbrojtje dhe për siguri; 630 milionë euro për Ministrinë e Mbrojtjes për ushtrinë tonë dhe 66% rritje e buxhetit për Policinë. Tash këtë 630 milionëshin, do ta rris më shumë se 60%, 1 miliardë euro për Ushtrinë e Kosovës në 4 vitët e ardhshme, se ju, të dashur lipjanas, e dini fort mirë që ashtu siç është shtëpia për familjen, shteti është për popullin, shteti është shtëpia e popullit, e shtëpia është e sigurt aq sa është i sigurt pragu i shtëpisë, e pragu i shtëpisë është i sigurt aq sa është i sigurt oborri i shtëpisë, e oborri i shtëpisë është i sigurtë aq sa është i sigurtë gardhi i oborrit. E gardhi i oborrit janë kufinjtë e shtetit, prandaj edhe ne themi: Republika e Kosovës, cep më cep, mbrohet nga Ushtria, Policia, Qeveria, institucionet e shtetit tonë të pavarur.

Përveç se 1 miliardë për ushtrinë, 1 miliardë edhe për prodhimtarinë, sepse duhet të kemi sa më shumë ndërmarrje që prodhojnë, e rrisin rendimentin, e zvogëlojnë dhe zëvëndësojnë importet dhe në këtë mënyrë i shtojmë vendet e punës në Kosovë dhe eksportet jashtë Kosovës.
Në institucionet e Kosovës së sigurisë, në Polici, do të investojmë në pajisje, trajnime dhe armatim, por edhe do ta avancojmë njësinë e dronëve dhe anti-dronëve për të ndihmuar në hetime, mbrojtje dhe mbikëqyrje të kufirit dhe sigurinë publike në përgjithësi.

Do ta heqim taksën doganore prej 10% për veturat nga Bashkimi Evropian, dhe kufizimin 10-vjeçar nga veturat që importohen prej jashtë. Në vend të tij do të jetë kriteri i emitimit të gazrave Europass, pra jo sa është vetura e vjetër, por sa nuk e dëmton ambientin ajo.
Për transportin public e kemi programin ‘Anembanë Kosovës’, me 10 euro biletë të integruar me transport urban e ndërurban, secili qytetar do të mund të udhëtojë lirisht nëpër Kosovë.
Në mesin e projekteve të rëndësishme infrastrukturore që ka shumë rëndësi për Lipjanin, e kemi edhe autostradën Duhël-Shtime-Banullë. Kjo është shumë e rëndësishme për inkuadrimin e Lipjanit në rrjetin e rrugëve të mira e të shpejta të Republikës sonë.

Po ashtu, do ta kemi edhe programin e mobilitetit për studentë, i cili i mbështet studentët në nevojë, veçanërisht ata nga distancat më të largëta ku studiojnë prej vendeve ku jetojnë. Studentët që klasifikohen për këtë program, për çdo muaj do të marrin një bursë, varësisht prej distancës. Pra, natyrisht që do t’i mbështesim edhe studentët e Lipjanit që studiojnë në Prishtinë, por ata që shkojnë në Mitrovicë do të marrin mbështetje më të madhe sesa ata që shkojnë në Prishtinë. E më besoni, që Mitrovica është shumë më afër se sa që e menojnë njerëzit.
Në mandatin e parë, buxheti për bursa për studentë ka qenë 15 milionë euro, kurse numri i përfituesve ka qenë 16 mijë studentë. Kjo është mbështetja më e madhe historike që qeveria, shteti ua kanë bërë studentëve të Republikës. E në mandatin e ardhshëm do të ndajmë bursa edhe për studentët që studiojnë në universitete apo në kolegje jopublike.

Do ta themelojmë edhe Prokurorinë e re të Specializuar kundër krimit të organizuar dhe korrupsionit, e po ashtu byroja për konfiskimin e pasurisë së pajustifikueshme do të jetësohet sivjet. Bëhen reformat e thella në drejtësi, procesi i vettingut, në mënyrë që të marrë fund një herë e përgjithmonë jo vetëm zhvatja, plaqkitja, e vjedhja, por edhe posedimi i asaj që e kanë përvetësuar, pajustifikueshëm, e pa ligj, e pa nderë, e pa punë, e pa djersë, në vitet kaluara. Ato kanë marrë fund, janë në të shkuarën. Në të ardhmen, cent më cent do t’i kthehet, cep më cep, shtetit tonë prej atyre të cilët pushtetin e përdorën për zullum e pasurim, e jo për shërbim e punë.

Të dashur qytetarë të Lipjanit, e di që shumë prej jush janë në diasporë. Rreth 105 mijë qytetarë janë regjistruar online për të votuar. Ata kanë pasur dy mundësi për të votuar. Fizikisht nëpër ambasada dhe konsulata, data 8 shkurt, pra e shtunë, një ditë para zgjedhjeve në Kosovë. Ata kanë 12 orë, prej 7 të mëngjesit deri në 7 të mbrëmjes, për të votuar nëpër ambasada dhe konsulata. Disa janë regjistruar asisoj, pra 12 orë i kanë, me datën 8 shkurt. Ja u përkujtoni sepse ka regjistrime të tilla online, por shumica e tyre që janë regjistruar online, janë regjistruar për të votuar me postë. Ju lutem që sa më parë të votojnë me postë, në adresat që i ka përcaktuar KQZ-ja nëpër shtetet perëndimore evropiane dhe të tjera anë e mbanë botës. Pra, jo për të votuar me postë në ambasadë e në konsulatë, në ambasadë e në konsulatë mund të votoni fizikisht. Me postë duhet të votoni në adresat postare që i ka përcaktuar KQZ-ja. Për Gjermani është një kuti e tillë postare, një adresë postare në Shtutgart, ndërkaq për Zvicër është në Cyrih. Edhe shtetet tjera i kanë kësisoj adresat postare të përcaktuara nga KQZ-ja.
Mos e lini në 5 minutat e fundit, por ndani 5 minuta qysh sonte ose nesër, më së largu pasnesër. E nëse nuk e bëni pasnesër, unë ua kujtoj tjetër pasnesër, se s’kam çare.
Por sa më shpejtë 5 minuta i ndani dhe votoni, se e keni kryer pjesën e parë. Kur e kryejmë pjesën e parë, regjistrimin online, nuk ka vlerë, është mundësi e shkuar kot, nëse nuk e kryeni edhe pjesën e dytë. E pjesa e dytë është vota në zarf dhe në kutitë postare të KQZ-së.

Ndërkaq, ju që do të votoni me datën 9 shkurt këtu në Lipjan, votoni sa më herët paradite, me familje e me farefis, me kolegë, shoqe e shokë e dashamirë, i thirrni krejt, edhe ata që i keni pasur në klasë në shkollë fillore, edhe ata në klasë në shkollë të mesme, edhe ata në atë punën e motshme që e keni lënë, edhe ata në këtë punën që e keni tash, edhe ata në atë mahallën e vjetër, edhe këta në këtë mahallën e re, hallat, dajtë, tezet, axhallarët, kushërinjtë e të gjitha anëve. Thirrni masivisht!
Unë e di që në secilën familje është një person që është pak më organizator, domethënë i cili e organizon punën e familjes; kur duhet të shkojë në ndonjë udhëtim, ai është personi kryesor që e organizon udhëtimin, kur duhet të presin musafirë, kur vijnë pak më shumë, ai organizatori i familjes e përgatit familjen për vizitën që do ta ketë musafirë të shumtë. Ai organizatori, e lus atë organizator! Nganjëherë organizatori është djali i madh, nganjëherë motra e madhe, nganjëherë nëna, nganjëherë babai, nganjëherë është ai djali i vogël që di më së miri të punojë me kompjuter, pra, çdo familje e ka atë organizatorin. Ai organizatori është duhur që komplet trungun familjar të farefisit ta shkruajë në letër dhe t’i thirrë, t’i thirrë të vijnë në zgjedhje në referendumin e 9 shkurtit që është datë historike për të ardhmen e Kosovës. E lus atë organizator në familje që ta bëjë këtë gjë, këtë gjë po e bëjmë edhe secili prej nesh, 110 kandidatëve. E kemi bërë edhe më herët në zgjedhje, prandaj edhe kemi dalë mirë.
Tu e nxjerrë trungun familjar asisoj, ju e dini që kam marrë vesh që Kryetarin e Kuvendit, Glauk Konjufcën, e kam diçka… Pra, veç kur e kemi nxjerrë trungun familjar në letër për t’i mobilizuar për zgjedhje, e mora vesh që unë dhe Glauku, që thonë në Gjakovë, ishim ilake.
E që tash po ju tregoj çka kam me Glaukun, mos të paça harru. Gjyshja e Glaukut kah ana e babës së tij, e ka vajzë të djalit të agjës, nënën e burrit të çikës së tezës time. Qe pra, Glaukun, Glauk Konjufca, kryetar i Kuvendit, duke nxjerrë trungun familjar në letër, edhe unë, e pashë si po lidhemi.
Ose për ta bërë edhe më thjesht se tash, ai organizatori zakonisht është personi në familje që e bën listën e dasmës. Kur duhet të thirren për dasmë, ai e bën listën e dasmës. Ai le të bëjë listën si për dasmë me 9 shkurt, edhe le të lëshojë dorën pak, edhe le të thërrasë krejt, së me datën 9 shkurt ne votojmë bashkë, fitojmë bashkë dhe pastaj festojmë bashkë në dasmën e 500 mijë zemrave për numrin 1-1-8!

Ju duam fort! Faleminderit përzemërsisht!
Urime qysh tash kjo fitore e madhe plebishitare. Mirë u pafshim e natën e mirë!

“Unë, deputet i Kuvendit të Republikës së Kosovës, betohem se me nder e përkushtim do ta kryej detyrën time dhe do të përfaqësoj me dinjitet popullin, do të punoj në interes të Kosovës dhe të gjithë qytetarëve të saj, do të angazhohem për mbrojtjen dhe respektimin e kushtetutshmërisë dhe ligjshmërisë, për mbrojtjen e tërësisë territoriale dhe integritetit institucional të Kosovës, për garantimin e lirive dhe të drejtave të njeriut, në përputhje me ligjet e vendit dhe me standardet evropiane.”

Të nderuar deputetë të ardhshëm të listës me numër 118, ky është teksti i betimit të Kuvendit të Republikës së Kosovës.

Republika jonë është demokratike dhe parlamentare, Kuvendi është vendi ku përfaqësohet populli, ku flitet në emër të popullit e për popullin, ku i mbrohet atij interesi e ku i shprehet vullneti. Kuvendi është vendi që nxjerr dhe ndryshon edhe Kushtetutën, që përkufizon formën e shtetit tonë, vendi ku nxirren ligjet që përcaktojnë cilësinë e demokracisë, drejtimin ekonomik dhe përkujdesjen sociale, por, edhe nivelin tonë të zhvillimit e të progresit. Është vendi ku zgjidhet Qeveria dhe mbahet përgjegjëse ajo për punën e saj. Parlamenti është institucion i shenjtë në demokraci, prandaj edhe deputeti e ka një mandat e mision fisnik.

Pikërisht për shkak se Parlamenti është kaq i rëndësishëm për funksionimin e shtetit, përfaqësuesit tanë idealisht do të duhej të ishin njerëzit më të përgatitur e më të merituar të shoqërisë, në mënyrë që Parlamenti të reflektojë vlerat tona më të larta e arritjet tona më të mëdha. Qytetarë me edukim cilësor e me integritet njerëzor, me parime e me dashuri të dëshmuar për vendin, njerëz që dinë të dalin mbi interesat e ngushta në mbrojtje të vendit, çdo herë dhe kudo.

Lista jonë përbëhet nga gra e burra me edukim cilësor, me atdhedashuri të dëshmuar, me profesionalizëm të lartë e me aktivizëm shoqëror.

Të dashur qytetarë, të nderuar të pranishëm,

Me këta 110 kandidatë ne kërkojmë votën tuaj për datën 9 shkurt, pra sot një javë, atëherë kur cep më cep Kosovës, njerëz të Republikës do t’i drejtohen kutive të votimit, kur ne me 500 mijë vota, 500 mijë zemra, presim fitoren rekord, historike, të paparë në Kosovën e çliruar.

E arsyeja pse ne kërkojmë votën tuaj është e dyfishtë; në njërën anë, për atë që kemi bërë e në anën tjetër, për atë që do të bëjmë.

Sot në Kosovë, në aspektin socio-ekonomik, kulturor, të sigurisë, të sovranitetit, të tërësisë territoriale, kurrë nuk ka qenë gjendja më e mirë dhe kurrë nuk kemi pasur përmirësim më të madh të gjendjes, se në këto katër vite që qeverisim ne.

E kemi gjetur ekonominë me më pak se 7 miliardë e tash i ka më shumë se 10 miliardë. Eksportet vitin e kaluar kanë kalu 1 miliardë, të hyrat tatimore kanë kalu 3 miliardë. Ndërkaq, edhe investimet e huaja direkte janë rritur më shumë sesa 130%. Gjatë mandatit tonë, kemi pasur investime të huaja direkte afër 700 milionë euro, ndërkaq para nesh, në baza vjetore natyrisht, mesataren nuk e kanë pas as 300 milionë euro. Pra, një rritje prej më shumë se 2.3 herë.

Dhe jo vetëm kaq, rritja jonë ekonomike ka qenë e tillë që e ka shtu punësimin. Prej 350 mijë të punësuarve që i kemi gjet në pranverën e vitit 2021, tash që po flasim janë 430 mijë apo rritje gati 23%. Dhe kjo rritje e punësimit është shprehur më së shumti tek gratë dhe tek të rinjtë, se ky ka qenë synimi ynë: gratë dhe të rinjtë të punojnë sa më shumë, cep më cep Kosovës.

Me programin Superpuna për të Rinjtë, kemi dhënë pagën minimale për të gjitha të rejat dhe të rinjtë që duan të punojnë, prej moshës 18 deri në 29 vjeç. Dhe pagën minimale e kemi gjetur 130 euro ose 170 euro, varësisht a je nën 35 apo mbi 35 vjeç dhe tash e kemi bërë 350 euro, e në mandatin e ardhshëm paga minimale do të bëhet 500 euro.

Ndërkaq, programin Superpuna për të Rinjtë do ta zgjerojmë edhe në një program të ri, Superpuna për Gratë. Pra, gratë të cilat duan të punojnë në sektorin privat, në ndërmarrje të ndryshme, për gjashtë muaj si bonus, a si prind, do ta marrin pagën minimale mbi pagën që ua jep punëdhënësja ose punëdhënësi.

Gjithashtu, në mandatin që po e përmbyllim ngadalë, por sigurtë, kemi shtuar jashtëzakonisht shumë investimet në bujqësi, në arsim, në shëndetësi edhe në mbrojtje e siguri.
Ta zëmë, në bujqësi para katër viteve, e mbaj mend që çmimi i qumështit me të cilin blegtorët e jepnin ka qenë 18 cent të euros. Një litër qumësht ka qenë 18 cent për pika grumbulluese. Dhe a e dini çfarë bëmë ne para katër viteve? Premtuam që në mandatin tonë do të bëhet 28 cent për litër. A e dini sa është sot? 45 cent për litër, 7 cent prej tyre i jep Ministria e Bujqësisë, Pylltarise dhe Zhvillimit Rural.

Nuk po e krahasoj me vitin pandemik, meqënëse ka pas tkurrje ekonomia dhe çdo sferë e jetës dhe e zhvillimit, por me vitin parapandemik 2019, toka që është punuar, lëvruar, mbjellur, korrur në vitin e kaluar, është 50% më e madhe sesa ajo në vitin 2019. Diçka mbi 81 mijë hektarë i kemi pas të punuar në vitin 2019, në vitin e kaluar mbi 121 mijë hektarë të tokës tone, cep më cep Republikës.

Buxhetin për arsim e kemi rrit për afër 30%. Dhe jo vetëm kaq, e kemi bërë falas në nivelin universitar edhe për Bachelor, edhe për Master. Universiteti i Prishtinës ka përparuar për mbi 400 vende në Webometrics, në ranglistën botërore. E kemi gjetur në vendin 3009, tash është më mirë se 2600. Por, është interesante që të gjitha universitetet publike anembanë Kosovës kanë bërë përparime të mëdha me mijëra vende në rangim përpara. Dhe bursat për studentë, sidomos për vajza studente, por jo vetëm, kanë qenë në fokus tonin, mbi 11 mijë bursa me mbi 15 milionë euro, në mënyrë që sa më shumë rinia jonë të mësojë, të studiojë, të kualifikohet edhe për ngritje në karrierë, edhe për dinjitet personal, edhe për pasurim intelektual e shpirtëror, por edhe për ekonominë e vendit tonë.

Gjatë këtyre katër viteve, 36 milionë euro, 65 çerdhe janë ndërtuar, renovuar ose adaptuar, por nuk ka kërkesa të komunave që nuk i kemi trajtuar. Ne komunave çerdhet për fëmijë me zor nuk mundemi me ia dergu. Sistemi i arsimit në Kosovë nuk është i centralizuar si në Shqipëri. Drejtori i Arsimit është shumë i rëndësishëm në komunë. Prandaj, kërkesa të patrajtuara nga komunat për çerdhe nuk ka. 65 çerdhe i kemi ndërtuar për katër vite me 36 milionë euro, e ata para neve për 17 vite me 1.2 milionë euro veç 4 çerdhe. Ka komuna ku ne i kemi ndërtuar më shumë çerdhe për një mandat katër-vjeçar sesa ata në krejt Kosovën për 17 vite.

Por, jemi të vetëdijshëm që nuk mjaftojnë çerdhet. Ka fshatra ku nuk do të ketë çerdhe. Si t’ia bëjmë aty? Si t’ia bëjmë aty që të punojnë gratë edhe në ato fshatra? E kemi marrë modelin e Suedisë, jemi vendi i dytë në Evropë që në mandatin tonë të ardhshëm do ta kemi një shtesë prej 100 euro pensioneve të gjysheve dhe gjyshërve, të cilët do të kujdesen për fëmijë prej moshës 1-3 vjeç, atëherë kur të dy prindërit iu punojnë atyre.

Në mbrojtje dhe në siguri kemi investu më së shumti. Janë mbi 2500 zyrtarë të rinj policorë, prej të cilëve rreth 8% janë serb, rreth 6% janë të pakicave të tjera. Dhe njëkohësisht, buxhetin për ushtri e kemi shtuar si askush tjetër asnjëherë më parë. 2018-2020 për armatim edhe për municion as 4 milionë euro nuk janë dhënë, ndërkaq, gjatë qeverisjes sonë mbi 319 milionë euro, për katër vite janë 630 milionë euro për mbrojtjen, për Ministrinë e Mbrojtjes së Republikës së Kosovës.
Dhe jo vetëm kaq, e kemi dyfishuar numrin e çizmeve në tokë, e kemi hequr tavanin prej 5 mijë pjesëtarëve të FSK-së dhe e kemi rritur moshën prej 23 vjeç deri në 25 vjeç, e kemi bërë për të gjithë ata të cilët do të rekrutohen në vijim, dhe unë i ftoj të gjitha vajzat e djemtë e Kosovës që sa më shumë të aplikojnë për Forcën e Sigurisë së Kosovës. Synimi ynë është që në fund të mandatit të ardhshëm t’i kemi 1 mijë vajza ushtarake në Forcën e Sigurisë së Kosovës.

Ndërkaq, në mandatin e ardhshëm do të kalojmë prej 630 milionë euro, që i kemi pas deri tash për mbrojtjen, në 1 miliardë euro për ushtrinë e Republikës së Kosovës. E këtu, përveç asaj që tashmë e kemi thënë, domethënë dronat Bayraktar luftarak TB2 nga Turqia, pastaj sistemin antitank Javelin nga Shtetet e Bashkuara të Amerikës, si dhe helikopterat ‘Black Hawk’ apo ‘Skifteri i Zi’ nga Shtetet e Bashkuara të Amerikës, gjthashtu do të kemi edhe fabrikë të municionit dhe drona që i prodhojmë vetë ne, ‘Made in Kosova’.

Pra, 1 miliardë për mbrojtje, por gjithashtu edhe mbi 1 miliardë për investime kapitale në vit. Në vitin që shkoi kemi pas rekord 654 milionë euro, para asaj po ashtu rekord 2023-shin 561 milionë euro. Pra, ne nuk kemi thyer më rekordet e atyre para neve, por kemi thyer rekorde të vetvetes tonë. E në mandatin e ri, nuk do të kemi vite me shpenzime kapitale, investime kapitale nën 1 miliardë euro, por do t’i kemi edhe 1 miliardë euro gjatë mandatit për prodhimtari, përkatësisht për mbështetje kreditore të mëdha e të mesme për të gjitha ndërmarrjet prodhuese, sepse ne e kemi të domosdoshme të prodhojmë sa më shumë, të mos jemi veç popull konsumator, por të jemi popull prodhues.

Raportin eksport-import e kemi gjetur 1 me 9, e kemi bërë 1 me 6, kemi me e bë 1 me 5, 1 me 4, 1 me 2, 1 me 1, pse jo një ditë edhe 2 me 1.

Vetëm në Brezovicë do të investojmë gjysmë miliardi euro, partneritet publiko-privat. Kjo tashmë është e mundur, sepse Republika e Kosovës e ka fiskalizuar dhe e ka marrë Brezovicën nën kontroll. Para neve e ka kontrollu Beogradi.

Buxhetin për Listën e Barnave Esenciale e kemi rritur nga 24 milionë euro sa e kemi gjetur, në afër 70 milionë euro, pra gati trefishim i buxhetit për barnat esenciale. Kemi shtu edhe barna të reja. Ndërkaq, këtë 70 milionësh në mandatin e ri e bëjmë 100 milionë euro. Për herë të parë do të kemi edhe listën e rimbursueshme të barnave jashtëspitalore, mbështetje kjo shtesë për shpenzimet e qytetarëve, si dhe 6 poliklinika specialistike në 6 komuna, përfshirë edhe njërën në Drenas, që është në kuadër të rajonit të Prishtinës.

Do ta themelojmë edhe Fondin e Sigurimeve Shoqërore për mbulimin e pagesës për pushimin e lehonisë dhe atë prindëror, si dhe në rast të humbjes së vendit të punës, që të ketë një rrjetë sociale të sigurisë për punëtoret.

Tash, nga janari pensionet me rritje kanë filluar t’i marrin edhe kategoritë e dala nga lufta, e po nga muaji janar edhe mbi 80 mijë zyrtarë të shtetit, shërbyes civilë, e marrin rrogën me rritje, e cila do të rritet përsëri edhe për 55 euro të tjera, në korrik sivjet.

Qeveria jonë është e vetmja qeveri, e cila brenda një mandati i rrit tri herë rrogat në sektorin publik dhe e ngren pagën minimale në sektorin privat dy herë. Pra, nga 130 e 170 në 265, nga 265 në 350, e po e ritheksoj, në mandatin e ardhshëm, nga 350 në 500 euro, me ç’rast nuk tatohet paga minimale, që do të thotë që kushdo që ka biznes të vogël nuk i tatohen të ardhurat, deri në 500 herë 12, 6 mijë eurot e para. Pra, nuk i tatohen fare bizneseve të vogla këto të hyra, që me siguri do të jetë një stimulim shumë i mirë për bizneset e vogla familjare, që janë kurrizi i ekonomisë së vendit tonë.

Po ashtu, pensionistët i kanë marrë edhe 5 pensione të trembëdhjeta gjatë katër viteve, me ç’rast përfitues në përgjithësi me këtë skemën tonë pensionale janë mbi 300 mijë qytetarë të Republikës. Tash e kemi edhe regjistrimin e popullsisë, do të bëjmë planifikime, analiza dhe shumë më të mira sesa në të kaluarën.

Vendin do ta bëjmë me një valutë digjitale të bazuar në blockchain, e krijuar nga shteti e që do të përdoret për pagesa. Në kryeqytet do ta ndërtojmë një ICT Tower ose Tech Tower, një kullë Tech, të teknologjisë së informacionit dhe komunikimit, që me siguri është lajm i jashtëzakonshëm për të gjithë njerëzit e sektorit, por edhe për ekonominë tonë e financat në përgjithësi.

Do ta heqim atë taksën doganore prej 10% të veturave nga Bashkimi Evropian dhe kufizimin 10-vjeçar për veturat që importohen prej jashtë. Në vend të tij kriteri do të jetë ai i emetimit të gazrave. Pra, jo vetëm ashtu paushall 10 vjet po sa e dëmton ambientin një veturë e caktuar, e jo sa formalisht është vjetërsia e saj. Pra, kriteri Euro 5 është ai i cili do të jetë përcaktues.

Për transportin publik e kemi programin Anembanë Kosovës. Me 10 euro biletë të integruar mujore do të mund të udhëtojnë anembanë Kosovës, të gjithë qytetarët me transport publik. Do ta nisim me trafikun urban, për të vazhduar me atë ndërurban, sepse një shtet është i zhvilluar jo sepse qytetarët mund të blejnë vetura të mira për vete, por për shkak se kanë transport publik të mirë për të gjithë pa dallim.

Në qendrën e studentëve të Universitetit të Prishtinës “Hasan Prishtina” do të ndërtojmë një konvikt të ri dhe tri salla të reja për bibliotekë universitare, brenda qendrës së studentëve.

Në Prishtinë do ta dyfishojmë kapacitetin e mbulueshmërisë së ngrohjes qendrore, kurse në dy komuna të mëdha, në Ferizaj dhe në Gjilan do të ndërtojmë ngrohtore të re.

Fillimi i ndërtimit të hekurudhës Prishtinë-Durrës, që e lidh Portin e Thatë të Prishtinës me Portin e ri të Durrësit, do të jetë në fokus të qeverisjes sonë, sepse mandati i ardhshëm është mandat i hekurudhave, dhe ku asnjëherë nuk do të harrojmë edhe përfundimisht, linjën 10 prej Hanit të Elezit në Leshak, duke kaluar në Fushë-Kosovë dhe në Mitrovicë. Pra, cep më cep, vertikalja Gryka e Kaçanikut me Grykën e Leposaviqit, t’i lidhim me hekurudhë.

Do ta ndërtojmë edhe Teatrin e Operës dhe Baletit, ndërkohë që do të vazhdojmë të modernizojmë objektet kulturore ekzistuese, si dhe të vazhdojmë mbështetjen për skenën e pavarur kulturore, përfshirë statusin e artistit të pavarur.

Do ta themelojmë edhe Gjykatën për Çështje Familjare, që përfshin çështje të pronësisë, trashëgimisë, dhunës në familje, të shkurorëzimeve dhe të alimentacionit dhe Prokurorinë e re Speciale Kundër Krimit të Organizuar dhe Korrupsionit.

Në mandatin e tretë e bëjmë Prokurorinë Speciale Kundër Krimit të Organizuar dhe Korrupsionit, Byronë për Konfiskimin e Pasurisë së Pajustifikueshme, Vetingun në Sistemin e Drejtësisë, me reforma të thella, sepse nuk mund të bëjmë zhvillim çfare po bëjmë, ku jo vetëm po rritet ekonomia, por po rriten edhe mundësitë për t’u rritur më tej, pa e pasur një sistem të drejtësisë i cili është i drejtë, efikas, i ndershëm, me integritet, me profesionalizëm e me kompetencë. Pra, neve e kemi të domosdoshme një gjë të tillë dhe unë jam i bindur që pas 500 mijë votave më 9 shkurt, nuk ka send që na ndal me drejtu drejtësinë.

Por, ju e dini që unë këtë nuk mund ta bëj vetëm, nuk mund ta bëj as Qeveria vetëm, na duhet i gjithë populli, na duhen 500 mijë vota në një referendum të 9 shkurtit, e për këtë do ta keni para jush listën me 110 kandidatë të të gjitha profileve e profesioneve, nga të gjitha vendbanimet, të të dy gjinive e të të gjitha moshave. 41 gra i kemi në listë, që është më shumë sesa kushdo tjetër,  kurdoherë më parë, përfshirë edhe neve vetë në zgjedhjet e fundit parlamentare të shkurtit të vitit 2021.

Sonte në Rahovec o e kem konakun!

Të dashur qytetarë të Rahovecit, të nderuar pjesëmarrës të këtij tubimi madhështor, ju faleminderit për këtë mikëpritje kaq të zjarrtë, në këtë vend të zjarrit, të pushkës, të pendës së dijes, e të tokës së bukës. Në çdo fazë dhe etapë të zhvillimit e të ngritjes së kombit tonë, Rahoveci ka qenë gjithmonë në qendër, ka qenë në qendër me ide dhe ka qenë në qendër me sakrificë.
Mbi 150 ishin viktimat civile vetëm midis 17 dhe 20 korrikut 1998, ndërsa në betejën e Rahovecit ranë heroikisht komandanti Gëzim Salihamza, i njohur ndryshe me nofkën Piktori, dhe patriotët Abdullah Bugari, Mizahir Isma, Bekim Isma, Eshrafedin Kastrati, Arian Brahimi, Shkodrani i cili u kthye nga emigrimi dhe dha jetën në Kosovë, Agim Qela, Sadik Shala, Afrim Krasniqi, Hamdi Berisha, Gani Paqarizi, Habib Berisha, Liman Gegaj dhe Ramadan Morina. Lavdi të gjithë atyre dhe të gjithë dëshmorëve të kombit shqiptar.

E pas betejës së Rahovecit, u vranë në fshatin Opterushë komandantët Xhelal Hajda Toni, dhe Selajdin Mullabazi Mici, e në pyjet e Hamocit, Bekim Sylka, Mexhit Mustafa dhe Sadetin Hajda, si dhe Sheh Muhedin Shehu i vrarë në Teçen e Halvetive, po në korrik të vitit 1998.
Të nderuar të pranishëm, ne kurrë nuk i harrojmë se gjithsej 950 persona u vranë ose u zhdukën në Rahovec gjatë luftës, e në Krushë të Madhe kemi 64 të zhdukur, 241 të rënë, 22 dëshmorë dhe 7 fëmijë të vrarë. Masakra e Pastaselit ka 105 civilë të vrarë dhe dy dëshmorë, ndërsa në fshatin Celinë janë vrarë gjithsej 82 qytetarë, mes të cilëve 5 dëshmorë. Asnjëherë nuk harrojmë dhe kurrë nuk do ta falim gjakun e tyre.

Rahoveci ka lindur dhe ka rritur trima, si figura e pendës dhe e pushkës, profesor Sabajdin Ceno, kurse Krusha e Madhe ka lindur një veprimtar dhe politikan, një profesor dhe filozof që ia ka dhuruar jo vetëm Republikës së Kosovës, jo vetëm kombit shqiptar, por botës mbarë me thellësinë e mendimit të tij dhe me idetë brilante që na i ka lënë si vepra të shkruara, profesor Ukshin Hoti – Baca Ukë, të cilit i përkulemi me përplot nderim për trashëgiminë e tij, e cila rron në sjelljet, veprimet, mendimet dhe politikat tona.
Kur e mendon Rahovecin, secili prej nesh e mendon punën, patriotizmin, luftën, dëshmorët, martirët dhe heronjtë, por gjithashtu edhe kulturën dhe letërsinë, një plejadë të gjerë të poetëve nga Bejtegjinjtë që i përmendi Ali Dula, deri te poetët modernë, ku ai që e kemi shumë për zemër është ai i cili na u nda nga jeta para më pak se tre vitesh, Xhevdet Bajraj.
Xhevdet Bajraj ka një poezi që unë e kam shumë për qejfi për Rahovecin, me titull “Rrush dhe Djath”.
Po ua lexoj një varg: “Në dorë mbaj një copë bukë me ca djath dhe një kalavesh rrushi të Rahovecit, që ma përkujtojnë që ende mund të qaj nga bukuria.” Xhevdet Bajraj.

Të dashur qytetarë të Rahovecit, gjatë këtyre katër viteve në qeverisje, me gjithë çka kemi ditur e mundur, secili prej nesh ka punuar që shtetit t’i shtojmë sovranitetin, territorit t’i shtojmë integritetin, pasaportës dinjitetin, institucioneve stabilitetin, ekonomisë produktivitetin, e qytetarëve mirëqenien dhe respektin.
E tash na ndajnë më pak se 10 ditë, deri te 9 shkurti, por a e dini çfarë? Më 9 shkurt nuk ka zgjedhje të zakonshme, më 9 shkurt nuk ka as zgjedhje të jashtëzakonshme, më 9 shkurt ka referendum! Zgjedhje ka në vitin 2029, por më 9 shkurt ka referendum. Referendum për të vazhduar përpara me punët e mira dhe të mbara që i kemi nisur, ose për t’u kthyer prapa dhe për të rrënuar punët e mira e të mbara që i kemi nisur. I thoni po qeverisë tonë, i thoni po referendumit, dhe këto dy shkronja të arta për të mirën, “PO”, e kanë numrin 1-1-8 të dielën e 9 shkurtit.

Progresi i këtyre katër viteve është ndjerë cep më cep Republikës, edhe këtu në Rahovec. Po e mbështesim Rahovecin me afër 8 milionë euro për ndërtimin e rrugës me katër korsi Rahovec-Xërxë, me gati 5 milionë euro për tre vitet e ardhshme për ndërtimin e Stadiumit në Rahovec dhe me 2.5 milionë euro për ndërtimin e Qendrës kulturore multifunksionale në Rahovecin tuaj e tonë të dashur.
E në mandatin e ardhshëm, do ta përfundojmë rrugën Prizren-Tetovë, autostradën Prishtinë-Gjilan deri te Dheu i Bardhë, rrugën Dolc-Gjakovë, atë Kijevë-Zahaq dhe Duhël-Shtime-Banullë. Po ashtu, do të ndërtojmë edhe rrugën e Dukagjinit për ta lidhur Prizrenin-Rahovecin-Gjakovën-Deçanin me Pejën dhe Istogun.
Në Kramovik të Rahovecit do të ndërtohet parku solar me kapacitet 100 MW për gjenerimin e energjisë nga burimet e ripërtrishme, nga dielli. Ankandin e ka fituar konzorciumi Y nga Arllati, nga mërgata jonë, që quhet Arllati, me ofertën më të mirë e më të lirë, më pak se 49 euro për një MW në orë, dhe ku do të investohen 70 milionë euro për ndërtimin e parkut, që është edhe i pari në vendin tonë, dhe më i madhi. Ky park do ta shtojë gjenerimin e energjisë elektrike në vendin tonë, por njëkohësisht edhe do të hapë vende të reja pune për ju këtu.

Sigurisht që nuk ka vend më të mirë për të folur për bujqësinë sesa në Rahovec, në kryeqytetin e bujqësisë të Republikës së Kosovës. Në cep më cep të Kosovës, i kemi mbështetur me mbi 300 milionë euro, 120 mijë bujq e fermerë me grante e subvencione, por njëkohësisht këtu në Rahovec, i kemi edhe vreshtaritë e lashta, aq sa jemi edhe ne si popull të lashtë. E verarinë tonë, duke ju falënderuar vreshtave të Rahovecit, po e bëjmë gjithnjë e më të njohur edhe ndërkombëtarisht. E kemi dyfishuar mbështetjen për vreshtarët dhe sasinë e verës së dorëzuar, kurse për herë të parë, si qeveri, e kemi mbuluar plehërimin dhe naftën me 36 cent të euros për litër.
Ju në Rahovec, e bujqit gjithandej Kosovës, e dijnë mirë çka është sistemi pikë-pikë, sistemi i ujitjes pikë-pikë. Mirëpo, të mirat vijnë pikë-pikë nga toka, prej njerëzve punëtorë, ama ata të cilët nuk i kanë marrë të mirat nga toka ose përmes punës e pikë-pikë, ata që janë pasuruar në kurriz të popullit, do ta mësojnë çka është sistemi cent për cent.
Se këtu në Rahovec dhe bujqit gjithandej Kosovës, sistemi pikë-pikë, e ata milionë-milionë dikur nuk shkon. Ne vazhdojmë me pikë-pikë, por byroja për konfiskimin e pasurisë së pajustifikueshme dhe prokuroria, dhe sistemi i ri i drejtësisë cent për cent do t’ia kthejnë popullit pasurinë e plaqkitur, të vjedhur, e të zhvatur ndër dy dekada.
E të dashur qytetarë, prej 120 mijë fermerëve e bujqve që i kemi mbështetur, 1/10 e tyre, 12,000 janë në Rahovec. Çdo i dhjeti bujk ose fermer që e kemi mbështetur është në Rahovec, me gjithsej mbi 26 milionë euro.

Po ashtu, këtu në Rahovec i kemi mbështetur 1,900 nëna lehona dhe gati 12,000 fëmijë kanë përfituar shtesa. Edhe nënat lehona, edhe shtesat për fëmijë, janë për herë të parë në Republikën e Kosovës, me qeverinë tonë të mirë, me qeverisjen tuaj demokratike, të cilën pikërisht ju e keni sjellë në pushtet me zgjedhjet e shkurtit 2021.Të dashur qytetarë, para neve nuk ka pasur qeveri për nëna lehona, e as kryeministër për fëmijë. Para neve, këta nuk kanë parë as nëna, as fëmijë në Republikën tonë. Me qeverinë tonë, në pikëvështrimin, në vëmendjen, në zemrën e qeverisë ndodhen edhe nënat, edhe fëmijët.

255 të rinj janë punësuar përmes platformës Super-Puna, mbi 6,100 pensionistë të Rahovecit e kanë marrë pensionin nga tetori i vitit të kaluar, me rritje 20%, dhe për 4 vjet e kanë marrë 5 herë pensionin e 13. Ndërkaq, i kemi mbështetur 142 familje me 3,800 euro mesatarisht secila, për t’i izoluar shtëpitë e tyre, në mënyrë që t’i kenë dimrit ngrohtë e verës freskët.

Po ashtu, i kemi renovuar për efiçiencë të energjisë 9 shkolla: shkollën fillore “Gëzim Hamza-Piktori” në Rahovec, “Isa Boletini” në Rahovec, “Bekim Sylka” në Rahovec, “Rilindja” në Cibllak, “Faik Konica” në Celinë, “Dëshmorët e Zatriqit” në Zatriq, “Hamzë Thaçi” në Xërxë, “12 Maji” në Ratkoc dhe shkollën “Skender Kastrati” në Gexhë. Ndërkaq, gjimnazin “Xhelal Hajda Toni” dhe shkollën “Hamzë Thaçi” dhe “12 Maji” i kemi lidhur me internet të shpejtë nëpërmjet rrjetit kosovar për edukim dhe hulumtim, KREN. Të gjitha së bashku këto investime janë mbi 1 milion euro.

Në infrastrukturën arsimore në Rahovec kemi bërë investime afër 4 milionë euro. Një çerdhe për 120 fëmijë tashmë e kemi ndërtuar dhe një tjetër për 60 fëmijë është në proces të ndërtimit dhe do të përfundojë sivjet. Së bashku, këto dy çerdhe kanë vlerën financiare 1 milion euro, por vlera e tyre për fëmijët, për gjeneratat e ardhshme, është e pamatë. Përveç çerdheve, me financim të qeverisjes qendrore është ndërtuar shkolla “Tre Dëshmorët” që gjendet ndërmjet dy fshatrave, Vrajak dhe Bratonit, ndërkaq një shkollë tjetër, shkolla në Pastasel, është në ndërtim e sipër dhe do të jetë e gatshme në vitin e ardhshëm 2026.

Të dashur qytetarë të Rahovecit, në mandatin e ardhshëm do të ndajmë 1 miliardë euro për ushtrinë, 1 miliardë euro për prodhimtarinë dhe mbi 1 miliardë euro investime kapitale në vit. Vetëm në Brezovicë do të investojmë gjysmë miliardi euro në partneritet publiko-privat, që ta bëjmë destinacion të turizmit kombëtar e ndërkombëtar.

Pagën minimale, që e kemi gjetur 130 euro dhe 170 euro, e kemi bërë 350 euro, dhe në mandatin që vjen do ta bëjmë së paku 500 euro. Do ta mbështesim punësimin e grave nëpërmjet programit të ri “Super-Puna për Gratë”, ku gratë që duan të punojnë do ta kenë si bonus pagën minimale për 6 muaj, dhe në këtë mënyrë të rritet fuqia punëtore, të forcohet gruaja shqiptare dhe pa dyshim që do të kujdesemi edhe për fëmijët e tyre, duke ndërtuar më shumë çerdhe, por edhe duke ia shtuar nga 100 euro shtesë pensionit të gjysheve dhe të gjyshërve që kujdesen për fëmijët e moshave prej 1-3 vjeç, atëherë kur të dy prindërit punojnë.
Për 4 vjet, 65 çerdhe i kemi ndërtuar, renovuar ose adaptuar, me gjithsej 36 milionë euro, e ata që shkuan e nuk kthehen në pushtet, ata ish- ish qeveritë për 17 vjet, vetëm 4 çerdhe me 1.2 milionë euro. Kjo tregon që për 17 vjet ata nuk kanë parë fëmijë në Kosovë përveç fëmijëve të tyre, nuk i kanë parë fëmijët e juaj. Ata nuk i kanë parë fëmijët e juaj, nuk i kanë parë nënat e Kosovës, ata i kanë parë vetëm gratë e veta dhe fëmijët e vet. Prandaj s’kemi pasur çerdhe, prandaj s’kemi pasur mbështetje për nënat lehona, prandaj s’kemi pasur shtesa për fëmijë, e me qeverinë tonë ka mbështetje edhe për nënat lehona, e do të ketë gjithnjë e më shumë çerdhe dhe gjithmonë mbështetje financiare në shtesa për fëmijët anë e mbanë, pa e dalluar askënd.
Dhe jo vetëm kaq, ne do t’i mbështesim edhe prindërit që t’i dërgojnë fëmijët në çerdhe jo publike, duke i përkrahur me bona. Pra, edhe prindërit që nuk kanë arritur t’i çojnë fëmijët në çerdhe publike, ndonëse këto 65 çerdhe do të shtohen në 25 komuna në të gjitha 7 rajonet e Kosovës, edhe nëse i çojnë në çerdhe jopublike, ne do t’i mbështesim prindërit, që në këtë mënyrë dora e mirë e shtetit të kujdeset për brezin aktual dhe brezin e ardhshëm, e gjeneratat e ardhshme në përgjithësi.

Të dashur qytetarë të Rahovecit, ne këtu i kemi 110 kandidatë në listën tonë me numër 1-1-8, 110 kandidatë! Dikur është dashur t’i rrumbullakësojmë 5, e keni pasur më të vështirë ku me u përcaktuar vetëm në 5, kur të pëlqejnë 50, mirëpo tash mundemi t’i rrumbullakësojmë 10 dhe e keni pak më kollaj, por jo shumë kollaj, sepse secila dhe secili janë më të mirë se tjetri. Po besoni, më të mirë se këta 110 nuk mundeni me gjet! Këta e kanë numrin 1-1-8, i keni të të gjitha profileve e profesioneve, të të gjitha vendbanimeve, të të dy gjinive e të të gjitha moshave. E këtu, nga Rahoveci, i kemi dy: profesor Bylbyl Sokolin dhe aktivisten Nora Fetoshi.

Të dashur qytetarë, neve na kanë kritikuar duke na sfiduar ose liri ose siguri, e ne kemi thënë: i kemi bërë të dyja, edhe liri edhe siguri. Neve na kanë kritikuar dhe sfiduar duke na thënë: jeni të detyruar të zgjedhni, ose rregullativë, ose investime. Ne e kemi thënë, e kemi bërë të dyja: edhe rregullativë, edhe investime. Na kanë kritikuar, sulmuar, dhe sfiduar duke na thënë: ose sovranitet shtetëror, ose partneritet ndërkombëtar, e ne e kemi thënë dhe kemi bërë të dyja: edhe sovranitet shtetëror, edhe partneritet ndërkombëtar. Na kanë kritikuar e sfiduar duke na thënë: zgjedhni e merrni, ose rritje ekonomike, ose të drejta të njeriut. E ne kemi thënë, sepse kemi bërë të dyja: edhe rritje ekonomike, edhe të drejta të njeriut.
E nëse këtu, ndojkujt i shkon mendja të na sfidojnë pas këtij tubimi në Rahovec e të na thonë: zgjedhni e merrni, ose Bylbyl ose Sokol, ne atyre ju themi: të dyja. Edhe Bylbyl, edhe Sokol, Bylbyl Sokoli.

Të dashur të pranishëm të këtij tubimi, ne do të ndërtojmë spital të ri në Mitrovicë dhe në Ferizaj, kurse këtu në Rahovec do ta ndërtojmë poliklinikën specialistike, një nga 6 poliklinikat që do t’i ndërtojmë në mandatin e ri. E ndërkohë, për buxhetin për listën e barnave esenciale që është tashmë në nivel rekord, afër 70 milionë euro, e kemi gjetur veç 24 milionë euro, do ta ngrisim në 100 milionë euro, duke rimbursuar qytetarët tanë në lartësinë prej mbi 80%. Si herë të parë, do ta kemi po ashtu edhe rimbursimin e barnave jashtë spitalore, mbështetje kjo shtesë për shpenzimet potenciale të qytetarëve.

Të dielën e 9 shkurtit, 2 numra janë të rëndësishëm si asgjë tjetër, si asnjëherë tjetër: numri 1-1-8 i koalicionit tonë Lëvizja VETËVENDOSJE!, Partia Guxo dhe Partia Alternativa. Pra, numri 1-1-8 që tashmë e kemi është numër në fletëvotim dhe numri tjetër është ai 500 mijë vota që do ta bëjmë, sepse do ta përbëjmë me 500 mijë zemra të cilët bëhen bashkë, jehojnë, kumbojnë e rrahin porsi një te numri 1-1-8, me datën 9 shkurt!

118, 118, 118, 118, 118…

E për këto 500 mijë vota, gjysmë milioni zemra të bashkuara, kryetar Ali Dula dhe deputetë të ardhshëm Bylbyl Sokoli dhe Nora Fetoshi, këtu në Rahovec prej 500 mijë votave, Cep më Cep të Kosovës, Cep më Cep Rahovecit i duam, na duhen 15 mijë vota.

Tash, kur kanë ngelur më pak se 10 ditë deri te zgjedhjet historike, që do të prodhojnë fitore të paparë, jo vetëm në Republikën e Kosovës, por edhe në Kosovën e çliruar, është e domosdoshme që të punoni secila e secili, të gjithë. Kjo fushatë zgjedhore është pak si Ramazani, 10 ditët e fundit janë më të vështira, por pikërisht në 10 ditët e fundit duhet t’i jepni zor më shumë dhe mandej, pas muajit të Ramazanit vjen festa e Bajramit! E festa e Bajramit, para Bajramit e ka numrin 1-1-8, e ka emrin VETËVENDOSJE! dhe ju ka juve që votoni bashkë, fitoni bashkë e festoni bashkë!

Faleminderit shume! Faleminderit përzemërsisht! Ju dua fort dhe mirënjohje e pafund për mbështetjen e pa rezervë që na e keni dhënë edhe si Lëvizje, edhe si qeveri!
Natën e mirë e mirëupafshim!

Mirëmbrëma Gjakovë. Mirë se ju gjej në këtë vend historik të punës e dijes, të pushkës e shijes. E në këtë sallë, në palestrën “Shani Nushi”, të mbushur përplot, cep më cep, drejt 9 shkurtit, atëherë kur 500 mijë vota, 500 mijë zemra, cep më cep Kosovës, do të shpërthejnë prej kutive të votimit, kur do të numërohen ato nga komisionerët dhe numri 118 shënon fitore historike, rekord e të paparë në Republikën e Kosovës e Kosovën e çliruar.

Të nderuar të pranishëm, formula jonë e qeverisjes në këto gati 4 vite ka qenë “Krejt dhe Drejt”, sepse për të gjithë ne kërkojmë të drejta dhe drejtësi, e formula jonë e qeverisjes është edhe “Cep më Cep”, sepse çdo pjesë e vendit dhe shoqërisë tonë meriton të njëjtin përkushtim nga të gjithë dhe secili prej nesh. Pra, atdheu dhe popullsia cep më cep, kjo është qeveria, kjo është qeveria e mirë, e mbarë dhe demokratike e Lëvizjes VETËVENDOSJE!

Për ne bastioni i vërtetë është zemra e madhe e qytetarit. Ne duam që dinjiteti të jetë e drejtë e maksimumit të qytetarëve, prandaj Kosova nuk pranon më bastione partiake e politike. Kosova është e të gjithëve dhe për të gjithë, cep më cep, zemër për zemër. Atdheu matet me zemrat e njerëzve të tij, e fitorja jonë matet me 500 mijë zemra, me 9 shkurt.

Demokraci do të thotë maksimumi i shoqërisë në maksimumin e drejtësisë, në profesione dhe në pronësi, në shkencë dhe në art, në ekonomi dhe në kulturë. Gratë kanë qenë gjithnjë aty të fuqishme, ndonëse shpesh pak të dukshme. Po, gratë kanë qenë gjithnjë të fuqishme, madje edhe të padukshme, ashtu si themelet që e mbajnë shtëpinë të sigurt e që nuk i shohim teksa banojmë aty, mirëpo pikërisht me qeverinë tonë kurrë më shumë nuk kanë pasur dukshmëri puna e grave dhe gratë në punë.

Vërtetë që ne kemi sjellë politika që u ndihmojnë grave, por ato, të dashur qytetarë, kanë ardhur direkt nga ju, së pari si obligim, por edhe si propozim. Qeveria e cila është përcaktuar nga gratë, patjetër që ndjen obligim të realizojë politika për to. Fitorja na kishte ardhur prej vajzave dhe grave, dhe politikat tona iu kthyen pikërisht atyre me dorën e mirë të shtetit që i mbështeti e i përkrahu. E asnjë organizim i madh, asnjë ngjarje historike nuk ka ndodhur pa gra. Edhe me ngjarjet e lëvizjes sonë, e aktivitetet e qeverisë tonë ka qenë kështu. Jam i sigurt që me 9 shkurt shumica e 500 mijë votave të të vendosurve janë vetë ato të vajzave e të grave. Ju të dashura vajza dhe gra, e di që do të dilni herët në mëngjes të së dielës së 9 shkurtit me shumicë, në shumicë, por edhe se do ti bindni djemtë e burrat të votojnë pa vonesë, me 9 shkurt, masivisht, ashtu që fitorja të jetë e parashkët, edhe për gratë e vajzat, edhe për burrat e djemtë, edhe për fëmijët e pleqtë.

Me 9 shkurt nuk ka zgjedhje, zgjedhjet janë në 2029. Me 9 shkurt ka referendum, e në referendum janë dy opsione, është opsioni “po” edhe është opsioni “jo”. Duke i thënë “po” qeverisë tonë, “po” numrit 1-1-8, ju u thoni njëkohësisht “jo” numrave të tjerë dhe “jo” atyre që keq qeverisën për më shumë se dy dekada. E këto dy opsione më tej janë në njërën anë ndryshimi juaj i madh që e keni realizuar në Kosovë më 14 shkurt 2021, e që ishte revolucioni elektoral, meqë një subjekt, subjekti ynë i mori mbi 50% të votave, dhe ata që keqpërdorën për më shumë se dy dekada, sepse qeverisën vetëm për vete nga lakmia. Por po ashtu, në atë anë të tyre është edhe kapitali i oligarkëve, e sidomos i njërit prej tyre, me kompaninë e tij që e regjistrojnë me “Đakovica” e “Peć, Srbija”, dhe që e dëbojnë nga puna motrën e dëshmorit, vetëm pse në familjen e tyre më kanë pritur mua për vizitë, dhe në anën tjetër jemi ne njerëzit, jo kapitali i zhvatur, por njerëzit, njerëzit me zemër të madhe, njerëzit që duam të pasurohet e të forcohet shteti dhe pasurimi të bëhet për të gjithë e jo për disa, dhe atë me punë, me ligj, me nderë dhe jo me zhvatje, plaçkitje e arbitrazhe të kurdisura. Prandaj, të dashur qytetarë, të nderuar gjakovarë, ne e duam vendin tonë, Kosovën Republikë e jo Kosovën klan.

Ata që kanë qenë të privilegjuar, ata që janë pasuruar përtej imagjinatës së tyre, e sigurisht jashtë ligjit, atyre kur ne u kërkojmë të heqin dorë nga privilegjet dhe ta kthejnë pasurinë e plaçkitur, mendojnë se po e pësojnë një padrejtësi. Por me privilegje e pasurim të pajustifikueshëm nuk ka barazi, ne duam barazi dhe pikërisht barazia atyre u duket se është padrejtësi. Në fakt, barazia është drejtësi dhe drejtësia do të veprojë mbi të gjithë ata të cilët e plaçkitën vendin tonë, ia morën të mirat materiale dhe na e vonuan neve zhvillimin e progresin. Kjo është arsyeja, ky është shkaku pse në mandatin tonë të ardhshëm do të kemi një prokurori të re speciale kundër krimit të organizuar dhe korrupsionit.

Në katër vitet e ardhshme do ta përfundojmë rrugën Prizren – Tetovë, autostradën Prishtinë – Gjilan deri te Dheu i Bardhë, rrugën Dollc – Gjakovë, Kiev – Zahaq dhe gjithashtu atë Duhël – Shtime – Banullë, por gjithashtu do ta ndërtojmë edhe autostradën e Dukagjinit, rrugën e zgjeruar që lidh Prizrenin, Rahovecin, Gjakovën, Deçanin me Pejën dhe Istogun. Pra, ata premtonin autostrada për të bërë shpronësime të tokave të miqve me çmime stratosferike, ndërkaq ne do të zgjerojmë rrugët dhe do të bëjmë magjistrale të cilat do të funksionojnë si autostrada, për të cilat ata flasin, por kurrë nuk i bëjnë, e ne i bëjmë edhe atëherë kur s’flasim. Tjetra, kur jemi te rrugët, në muajt e parë të qeverisjes sonë do të heqim taksën doganore prej 10% për veturat nga BE, kurse me draft-ligjin e ri për automjete, që është gati dhe vetëm po pret fillimisht miratimin në qeveri e pastaj edhe në Kuvend, do ta heqim kufizimin 10-vjeçar për veturat që importohen nga jashtë, e në vend të tij do të kemi kriterin e emetimit të gazrave Euro 5, kriterin e vjetërsisë po e zëvendësojmë me kriterin e BE për mjedis të pastër.

Me rrugët që po i ndërtojmë e zgjerojmë, lidhjet po i bëjmë më të mira e udhëtimin më të rehatshëm, por gjithashtu, me heqjen e kësaj takse doganore prej 10% për veturat nga BE që do ta bëjmë në muajt e parë të qeverisjes, dhe me heqjen prej qafe të tallit të homologimit të Devollëve, pronësinë e veturave po e bëjmë të përballueshme. Ndërkaq, me programin “Anembanë Kosovës”, me 10 euro biletë mujore të integruar, do të mund të udhëtojmë anembanë Kosovës me transport publik. Do të kemi edhe trafik urban, edhe ndërurban, dhe me 10 euro mund të qarkulloni brenda muajit kah të doni, cep më cep në Kosovën tuaj të dashur. Dhe kësisoj, qarkullimi do të mundësohet jo vetëm sepse thjesht do të ketë vetura më të mira, por për shkak se do të ketë transport publik të mirë urban e ndërurban.

Në mandatin e ri, do të fillojmë me ndërtimin e hekurudhës Prishtinë – Durrës, e cila duhet ta ketë përbrenda segmentin Gjakovë – Shkodër. Mandati i ardhshëm, të dashur qytetarë, është mandati i hekurudhave, sepse përveç rehabilitimit dhe modernizimit të linjave ekzistuese, do të projektojmë edhe linja hekurudhore të reja që lidhin Prizrenin e Ferizajin me Gjilanin dhe Bujanocin, dhe sidomos këtë linjën 10 nga Hani i Elezit në Fushë Kosovë, në Mitrovicë e deri në veri, në Leshak, cep më cep.
Lidhjet mes Gjakovës dhe Shkodrës janë të hershme dhe historike. Kur ekzistonte aksi i korridorit për shkëmbime tregtare mes Gjakovës dhe Shkodrës, u rrit jo vetëm vëllimi i tregtisë, por edhe mirëqenia dhe të ardhurat për banorët e zonave përreth. Ajo kohë u quajt koha e bollëkut. Hekurudha Prishtinë – Durrës, me segmentin Gjakovë – Shkodër, do ta mbushë boshllëkun dhe do ta kthejë bollëkun, për Gjakovën e për Shkodrën, për Kosovën e për Shqipërinë.
Me shqiptarët e Maqedonisë së Veriut po lidhemi edhe më fort me rrugën Prizren – Tetovë që tashmë ka nisur, me shqiptarët e Shqipërisë po lidhemi edhe më ngushtë me këtë hekurudhën Prishtinë – Durrës, me shqiptarët në Luginën e Preshevës po lidhemi edhe më sigurt me autostradën Prishtinë – Gjilan – Dheu i Bardhë, dhe me hekurudhën për në Bujanoc, Kosovën po e bëjmë nyjen që i bashkon shqiptarët.

Ju e dini që pagën minimale për punëtorët tanë e kemi gjetur 130 euro nëse je nën 35 vjeç dhe 170 nëse je mbi 35 vjeç – e kemi rritur në 350 euro, e në mandatin e ardhshëm do ta bëjmë së paku 500 euro.
Do t’i mbështesim gratë me programin e ri “Superpuna për Gratë”, dhe meqenëse gratë kujdesen më shumë për fëmijët, do ta rrisim numrin e çerdheve gjithandej nëpër Kosovë. 65 i kemi ndërtuar me 36 milionë euro në 25 komuna, në 7 rajone, ndërkaq 17 vjet para nesh, ish-ish-qeveritë që dikur ishin dhe kurrë më nuk do të kthehen, ata për 17 vjet ndërtuan vetëm 4 çerdhe me 1.2 milionë euro. Të dashur qytetarë, ne kemi ndërtuar më shumë çerdhe në një komunë sesa ata për 17 vjet në krejt Kosovën. Dhe a e dini pse është kështu? Sepse ata nuk kanë qenë në qeveri as për nënat, as për fëmijët. Ata kanë qenë në qeveri për vete, ata kanë qenë në qeveri për fëmijët e vet, ata kanë qenë në qeveri për gratë e veta dhe për nënat e veta, por jo për nënat e Kosovës, jo për gratë e Kosovës, jo për fëmijët e Kosovës, siç është qeveria jonë!
E nëse ka vend në të cilin, nuk do të ketë çerdhe, atëherë gjysheve dhe gjyshërve do t’ua japim nga 100 euro shtesë mbi pensionin e tyre, përderisa kujdesen për fëmijët nga 1 deri në 3 vjeç, atëherë kur të dy prindërit punojnë. Këtë e ka bërë Suedia, ne jemi shteti i dytë në Evropë që e përvetësojmë këtë model dhe e zbatojmë me qeverinë tonë në mandatin e ardhshëm pas 9 shkurtit.
Madje, me bono do t’i mbështesim edhe prindërit që i çojnë fëmijët në çerdhe jo publike. Pra, jemi qeveria për prindër, qeveria për fëmijë, qeveria për familje.

Ndërkaq, me programin tjetër “Mobiliteti për studentë”, do të mbështesim studentët në nevojë çdo muaj, varësisht nga distanca ku studiojnë prej vendit ku jetojnë.

E, të dashur qytetarë, në mandatin e ardhshëm do të ndajmë 1 miliard euro për ushtrinë, deri në 1 miliardë euro për prodhimtari, e mbi 1 miliard euro në vit shpenzime apo investime kapitale. Vetëm në Brezovicë do të investojmë gjysmë miliardi euro nga partneriteti publiko–privat, tash që e kontrollojmë ne dhe e kemi fiskalizuar ne, për dallim prej kohërave të mëhershme kur kontrollohej e përfitohej prej saj nga strukturat ilegale, institucionet paralele të Serbisë që ne i mbyllëm, i eliminuam, i shporrëm, cep më cep.
Aq shumë struktura ilegale, të ashtuquajtura paralele. kishte pasur, të dashur gjakovarë, në Kosovë, saqë po më duket më shumë kishtë pasur paralele sesa kësi të shtetit. Aq shumë kemi mbyllur ne, aq shumë i kemi eliminuar ato. A e dini pse e kemi bërë këtë? Sepse është e ligjshme, sepse është e drejtë, sepse është e vërtetë, sepse është e mirë, sepse është kushtetuese, por edhe sepse nuk dëshirojmë që këtë barrë t’ua lëmë fëmijëve tanë. Ne duhet ta kryejmë këtë punë! Nuk mund ta gjeni asnjë brez të shqiptarëve pa një luftë. Ka breza të shqiptarëve edhe me dy luftra e tri luftra, por s’mund ta gjeni asnjë brez të shqiptarëve pa asnjë luftë. E ne punojmë që brezi i ardhshëm i shqiptarëve, fëmijët tuaj, të mos kenë luftë, e për këtë na duhet ushtria e fortë dhe e fuqishme.

Andaj, edhe kemi blerë dronë luftarak Bayraktar TB2 prej Turqisë, sistemin amerikan antitank Javelin, po blejmë edhe helikopterë ‘Skifterë të Zi’, ‘Black Hawk’, e do ta kemi edhe fabrikën tonë të municionit dhe do t’i prodhojmë edhe vetë ne dronët ‘Made in Kosova’.
630 milionë euro ka qenë buxheti në këto 4 vjet për mbrojtje për ushtri, mbi 50% do ta rrisim në mandatin e ardhshëm. 319 milionë euro kemi blerë armatim e municion, e ata para nesh, në vitet 2018–2020, as 4 milionë euro nuk i patën. E të dashur qytetarë, po ua shtroj një pyetje për të cilën nuk po përgjigjem sonte, edhe pse ju e dini përgjigjen, e dini që unë e di, edhe unë e di përgjigjen, edhe e di që ju e dini. Por pyetja për të cilën s’po përgjigjemi sonte është: pse këta para nesh nuk e kanë armatosur ushtrinë? Pse këta para nesh nuk kanë blerë municion? A nuk kanë dashur me blerë, apo ata që mundëm me ua shitur kanë refuzuar këtyre me ua shitur? A nuk kanë kërkuar municion, armatim për ushtrinë tonë, apo ata që i prodhojnë armatimin e municionin u kanë thënë këtyre “juve s’ua japim”? Kjo është pra pyetja në të cilën nuk po përgjigjem unë sonte, dhe unë e di që ju e dini, e ju e dini që unë e di.

Ne synojmë paqe e siguri, progres dhe drejtësi, liri, demokraci, andaj edhe me këto aspirata e gjejmë vendin tonë të ardhshëm sa më shpejtë, aq më mirë, e për këtë do të punojmë dhe do të angazhohemi në BE dhe në NATO, e në partneritet, e aleancë, e miqësi me Shtetet e Bashkuara të Amerikës.

E këta kundërshtarët e mi e kundërshtarët e juaj, këta të dashur qytetarë, prej vitit 2021 në pranverë u thonin aktivistëve të vet: “Në vjeshtë po bie qeveria, në vjeshtë ka zgjedhje, në vjeshtë thonin, në pranverë ka zgjedhje, në muajin e ardhshëm po bie qeveria.” E dëgjuan një ndërkombëtar që tha: “Ky muaj nuk i nxë”, e të dashur qytetarë, hajt një javë e hajt një muaj, hajt një stinë e hajt një vit, u bënë 4 vite, e tash kur po mendojnë që janë edhe 4 të tjera, duan me u tranu.
Andaj, kemi me i mund, s’kemi çare pa i mund! Megjithatë, është mirë pak mirëkuptim për ta, se ata që kanë menduar se ne do të rrëzohemi disi me ndërkombëtar muajin e ardhshëm, e ne e kemi çuar mandatin cep më cep 4 vjet – qeveria e parë që e plotëson mandatin në Kosovën e pavarur – tash pas këtyre zgjedhjeve të 9 shkurtit, më mirë me thënë pas një referendumi gjithpopullor të 9 shkurtit, kur po u kujtohet që kemi me qenë së paku edhe 4 vjet të tjera, s’po dijnë çka me bë. E kur s’di çka me bë, flet palidhje, e kur flet palidhje, të mundin edhe më kollaj sesa kanë pasur me të mund edhe ashtu.

Unë jam krejt këtë pasdite sot në Gjakovë, dhe nuk kam çare pa ju tregu çka po më thonë: ngado që po shkoj po i takoj dy grupe njerëzish, kanë edhe pak dallim moshe, dorën në zemër, por nuk është kjo kryesorja. Një grup po më thonë: “Me 9 shkurt duhet me i mund flliqt”, e një grup po më thonë: “Me 9 shkurt duhet me i mund pastër.” Por të dy grupet po pajtohen që duhet me i mund ata!
Ama nuk duhet vetëm me i mund, duhet 500 mijë vota, 500 mijë zemra, jo vetëm me dalë të parët, por ne me formu qeverinë vetë, në mënyrë që me qeverisë drejt, mbarë, mirë, sikur në këto 4 vjet, bile edhe më shpejtë, edhe më shumë!

Para se të vijmë në këtë tubim madhështor këtu në Therandë, ne ishim nëpër komunën e
Therandës. Pra, para se të vijmë këtu, ishim në Bllacë, në Peqan, në Gjinoc e Greikoc, dhe pas
këtij tubimi, do t’i kemi edhe dy vizita e takime të tjera në Therandë, sepse nuk po mund të
kthehemi në Prishtinë aq kollaj për shkak të kësaj mikpritjeje kaq të përzemërt për koalicionin
tonë të Lëvizjes VETËVENDOSJE!, me Partinë Guxo dhe Partinë Alternativa.
Faleminderit shumë, mirënjohje e thellë për këtë mikpritje të paharrueshme, Therandë e dashur!
Mirë se po takohemi në qytetin e punëtorëve fisnikë e bujqve të ndershëm. Në këtë komunë të
kulturës e të patriotizmit, në Therandën e pendës, të bukës, të këngës, të pushkës. Në vendin e
shumë dëshmorëve e veprimtarëve të çështjes kombëtare. Në Therandën e Ramë Bllacës, Fadil
Vatës, Besim Ndrecës, dhe 93 dëshmorëve të kombit tonë nga lufta e fundit në Kosovë.
Por Theranda gjithmonë ka pasur veprimtarë, patriotë e dëshmorë të kombit, në secilën fazë e
etapë të zhvillimit, ndërtimit e ngritjes sonë, që nga Mulla Nuredin Haliti pas Luftës së Dytë
Botërore, atëherë kur patëm riokupimin tonë nga Serbia e Jugosllavia, e deri te demonstratat e
fuqishme në çdo dekadë, e sidomos në marsin e vitit 1989, atëherë kur e vranë dëshmorin,
veprimtarin tonë Nysret Gashi, e deri te luftëtari i Ushtrisë Çlirimtare të Kosovës, e Kryetari i
Komunës së Therandës Ukë Bytyqi. Ndërmjet të gjithë atyre personaliteteve të shquara që kanë
kontribuar shumë në zhvillimin e Kosovës, në çdo aspekt, ku janë panumerisht, po unë po i
përmendi dy prej tyre: ish-drejtorin e Rilindjes Asllan Fazlia dhe ish-drejtorin e Institutit
Albanologjik, profesor Kadri Fetiun.
E këtu në Komunën e Suharekës, në Therandën tonë të dashur, jemi edhe në vendin e këngës, të
artit, në Therandën e Riza Bllacës, të Shkurte Fejzës, Shyhrete Behlulit, të Bilbilave të
Mushtishtit, por edhe në Therandën e Bekim Lumit, artistit të jashtëzakonshëm të Kosovës e të
kombit shqiptar, universal në gjenialitetin e tij, në thellësinë e mendimit, në talentin e paparë, i
cili përndryshe nuk njihet vetëm për dramat e tij dhe tekstet brilante, por edhe si autori i këngës
që është bërë himn në tubimet tona, por edhe anë e mbanë ku ka shqiptar, me titullin Jo, nuk
ndahet Mitrovica.
Por, unë kam kënaqësinë të jem edhe në Therandën e dy super ekipeve, të Superligës së futbollit
tonë, të Ballkanit dhe Suharekës në futboll, dhe gjithashtu të Golden Eagle Yllit në basketboll.
Të nderuar të pranishëm, për gjatë këtyre katër viteve, koalicioni ynë përgjithësisht është rritur.
Mund të mos jetë rritur nga java në javë ndonjëherë, por rregullisht është rritur nga muaji në
muaj, e sidomos nga viti në vit. Dhe tash, në vitin 2025, jemi më të mëdhenj se kurrë më parë e
se askush tjetër! Andaj, edhe ne që jemi të mëdhenj si askush tjetër, e më të mëdhenj se kushdo
tjetër, fitoren e kemi të sigurt me 9 shkurt, me numrin 1-1-8, e cila do të jetë fitorja rekord dhe
historike, më e madhja e parë ndonjëherë, pra fitore e paparë e koalicionit VETËVENDOSJE!,
Guxo, Alternativa!
E kandidatët tanë, gjithsej 110 të listës sonë, janë edhe qytetarë aktivë, edhe aktivistë politikë, të
profesioneve e të moshave të ndryshme, por patriotë të të njëjtit atdhe. Me shembullin e tyre, ata

e dëshmojnë veten çdo kund, çdo herë, dhe garantojnë qytetarin e qytetarinë, cep më cep dhe
gjatë gjithë kohës. Unë ju uroj të gjithëve shumë punë e angazhim, sepse ju uroj suksese të
përbashkëta dhe fitore për secilin e secilën! Ju faleminderit që jemi bashkë, punojmë bashkë, e
pa dyshim që më 9 shkurt do të votojmë bashkë, e do të fitojmë bashkë!
Gjatë këtyre më pak se 4 viteve, kemi arritur që ta rrisim ekonominë, ta shtojmë prodhimin, ta
rrisim punësimin, por gjithashtu edhe të mbështesim si sektorin privat, ashtu edhe atë publik.
Konkretisht, gati 10 milion euro kemi ndarë mbështetje me subvencione dhe grante për më
shumë se 4600 bujq e fermerë këtu në Therandë.
Po ashtu, kemi investuar 300 mijë euro në sistemin e ujitjes, i cili përfshin ndërtimin e kanaleve
të ujitjes në fshatin Mushtisht, Vraniq dhe Reshtan, kurse për rrjetin e ujësjellësit në fshatin
Bllacë kemi investuar mbi 100 mijë euro, duke lidhur në rrjet 600 konsumatorë që kanë qenë
duke vetëmenaxhuar furnizimin me ujë. Pra, 400 mijë euro për sistemin e ujitjes dhe të pijes në
komunën tuaj.
Rreth 2000 nëna lehona dhe mbi 14,000 fëmijë të moshës deri në 16 vjeç, kanë marrë shtesa nga
buxheti i shtetit për herë të parë. Kjo është dora e mirë e shtetit për kategoritë që kanë më shumë
nevojë.
320 të rinj janë punësuar përmes platformës “Superpuna” dhe në mandatin e radhës do ta kemi
edhe programin “Superpuna për Gra”, ndërkaq paga minimale që e kemi ngritur në 350 euro, nga
130 dhe 170 sa e kemi gjetur, do të bëhet mbi 500 euro.
Nga tetori i vitit kaluar, afër 8000 pensionistë të Komunës së Therandës kanë marrë pensione me
rritje prej 20%, dhe gjatë këtyre 4 viteve 5 herë e kanë marrë pensionin e 13-të. Në mandatin e
ardhshëm, për të gjitha kategoritë, e në veçanti që është e dobishme për të moshuarit, do ta rrisim
buxhetin për listën e barnave esenciale në 100 milion euro, nga 70 milion euro sa është tani, e
nga 24 milion euro sa e kemi gjetur në vitin 2021.
E meqenëse kemi një shkallë të lartë të rritjes ekonomike, na duhet që të kemi edhe më shumë
fuqi punëtore për ekonominë, për industrinë, për bujqësinë e për zejtarinë tonë, andaj do të na
duhet të punësojmë sa më shumë djem e vajza, sa më shumë burra, por sidomos gra, dhe për këtë
arsye do të ndërtojmë gjithnjë e më shumë çerdhe për fëmijë, por do të mbështesim edhe gjyshet
e gjyshërit që kujdesen për fëmijët nga 1-3 vjeç, atëherë kur atyre u punojnë të dy prindërit, me
një shtesë prej 100 euro në muaj mbi pensionin e tyre.
Gjatë këtij mandati që ende nuk ka përfunduar, por është i pari që shkon deri në fund në Kosovën
e pavarur, mbi 13 milion euro kemi pasur investime në infrastrukturë. Tashmë e kemi nënshkruar
kontratën edhe për ndërtimin e rrugës Mushtisht – Shtërpcë, me gjatësi 18 km, që do të jetë e
gatshme deri në fund të vitit të ardhshëm.
Kemi ndarë buxhetin për ndërtimin e rrugës së vjetër Duhël – Bllacë, që pastaj vazhdon edhe për
Shtime e deri në Banullë të Lipjanit, dhe rrugën Suharekë – Peqan – Peqan i Vogël, kurse
mandatin që e kemi pas 9 shkurtit, përqendrimi ynë do të jetë pikërisht në ndërtimin e asaj

autostrade Duhël – Banullë. Dhe në këtë mënyrë, padrejtësia që iu është bërë Suharekës do të
korrigjohet me këto rrugë të reja, me këtë autostradë të re.
Në Therandë e kemi edhe një projekt tejet të rëndësishëm, e ai është projekti i Digës së
Dragaqinës. Rëndësinë e këtij projekti askush në Kosovë nuk e di më mirë se ju vetë, e ai do të
jetë në mesin e pesë rezervuarëve të ujit që do t’i ndërtojmë gjatë qeverisjes sonë të re në
mandatin e ardhshëm. Pra, Suhareka, Theranda, do të bëhet edhe me autostradë edhe me digë të
re që sigurojnë edhe qëndrueshmëri edhe zhvillim.
Në Therandë i kemi mbështetur 133 familje me mesatarisht secila 3,800 euro për izolimin e
shtëpive, në mënyrë që gjatë dimrit ta kenë ngrohtë, e gjatë verës ta kenë freskët. E përveç kësaj,
do të renovojmë për efiçiencë edhe 3 ndërtesa: dy shkolla dhe një institucion parashkollor, me
një investim rreth 1 milion euro; Institucionin e Arsimit dhe Aftësimit Profesional “Skënder
Luarasi”, Shkollën Fillore të Mesme të Ulët “Shkendija”, dhe Shkollën Fillore të Mesme të Ulët
“Flamuri i Arbërit”.
Në fushën e energjisë për republikën tonë, do ta modernizojmë termocentralin “Kosova B”, do ta
rehabilitojmë thellësisht termocentralin “Kosova A”, dhe 150 milionë euro për familjet dhe
amvisëritë cep më cep të Kosovës për efiçiencë të energjisë elektrike që na e kursejnë energjinë
të gjithëve.
Gjatë këtyre më pak se 4 vjetëve, i kemi mbështetur rreth 30 kompani nga Theranda, me gjithsej
800 mijë euro nga skemat për makineri, certifikim, inovacion dhe digjitalizim. 15 kompani kanë
marrë pjesë në panaire të industrisë ushqimore dhe përpunuese të sektorit të drurit dhe verërave.
Sa i përket çerdheve e shkollave, kemi investuar më shumë se 5 milionë euro në infrastrukturë
arsimore në Suharekë. Një prej çerdheve më të mëdha në Kosovë është pikërisht këtu në
Therandë. Ka kushtuar rreth 750,000 euro dhe është shtëpia e dytë për 120 fëmijë. Investime të
tjera i kushtohen ndërtimit të shkollave në Dobërdelan, Vranik dhe Samadrexh, si dhe
furnizimeve të nevojshme me pajisje të shkollave e sallave të sportit. Sa i përket kulturës dhe
trashëgimisë kulturore dhe sportit, këtu në Therandë e kemi qendrën më të mirë të kulturës në
krejt Kosovën. Ajo ka kushtuar gati 4 milionë euro, por ju që keni qenë aty e dini që ja ka vlejtur
secili cent i investuar. Kjo qendër e mban emrin e ish-të burgosurit politik, luftëtar i Ushtrisë
Çlirimtare të Kosovës dhe ish-Kryetarit të Therandës së çliruar, Ukë Bytyqi.
E në këto 4 vjet e kemi shpëtuar, të nderuar të pranishëm, trashëgiminë kulturore e historike që
po degradohej. I kemi kryer mbi 100 ndërhyrje në monumente në tërë territorin e Kosovës. Kemi
restauruar më shumë se sa në dy dekada pararendëse, mbarë së bashku. Në Suharekë e kemi
restauruar Kullën e Jonuz Hasan Tafollit të shekullit 19, e Therandën do ta bëjmë po ashtu për
sport, me një stadium të ri, për të cilin sivjet nis procedura e prokurimit.
E sa herë që vij në Therandë tani, na kujtohet kur vinim në Therandë dikur dhe ka qenë e
pamundur pa i takuar grevistët te shtëpia e ish-kulturës, ish-punëtorët e fabrikës së Ballkanit, të
cilët për gati 20 vjet e pritën shpërblimin e djersës së tyre që kishin lënë në këtë fabrikë, e të
cilën ata ish-ish-qeveritarët ua patën shitur. Pronën e ndërmarrjes Damperi, që deshën ta
shndërrojnë në supermarket – merreni me mend – ja kemi kthyer shtetit, shteti ja kaloi ushtrisë

sonë, e më pare që shteti ja siguroi, ja mundësoi që, gati 20 vjet pas, t’u shpaguhet 20%
punëtorëve të Ballkanit.
Siç e kemi parë, sepse e dinë të gjithë, punëtorët më nuk janë në grevë, në Damper po vjen
Ushtria e Kosovës dhe në Therandë po rriten mirëqenia dhe siguria.
Në 10 shkolla në Therandë e kemi vendosur, e kemi instaluar internetin e shpejtë të rrjetit
kosovar për edukim dhe hulumtim KREN, e ato janë Shkollat “Jeta e Re”, “Naum Veqilharxhi”,
“Vllazërit Frashëri”, “Rame Bllaca”, “Sadri Dula”, “17 Shkurti”, “Vaso Pash Shkdorani”,
“Kongresi i Manastirit”, “Sadri Dula” dhe “Ismet Jashari Kumanova”. Të gjitha këto janë shkolla
në të cilat e kemi internetin e shpejtë, në mënyrë që t’i ofrohet arsimimi sa më cilësor fëmijëve,
nxënësve aty.
Të dashur qytetarë të Therandës, përkundër të gjitha këtyre investimeve kapitale, kur kryhen
punimet, nuk e shihni në tabela që ka investuar Qeveria e Republikës me ministritë përkatëse,
sepse kemi përpjekjen e vazhdueshme të dëshpëruar, tendencën e pandershme për të përvetësuar
investimet që shprehin dashurinë e Qeverisë së Republikës së Kosovës për komunën tuaj në
Therandë. Dhe a e dini çfarë, të dashur qytetarë të Therandës? Nga 23.3 milionë euro që është
buxheti i komunës së Therandës, të hyra vetanake të komunës së Therandës nuk janë as 11.5%.
Pra, mbi 88.5% janë grant qeveritar i Republikës së Kosovës.
Lëvizja VETËVENDOSJE! që unë e udhëheqi, qeverisë vetëm në 6 komuna nga 38; 2 prej tyre
në veri, Leposaviq dhe veri i Mitrovicës, por ne nuk diskriminojmë komuna, sepse ne e dijmë që
qytetarët e Republikës jetojnë edhe si banorë të komunave dhe ne i duam ata dhe ne duam t’i
ndihmojmë ata, sepse jemi zyrtarë e shtetarë të përgjegjshëm ndaj të gjithëve dhe secilit.
Kështu, granti qeveritar i Republikës së Kosovës për komunën e Therandës nga viti 2021, që ka
qenë buxheti i atyre ish-ish-qeveritarëve i trashëguar, në buxhetin e vitit 2025 është rritur më
shumë se 41%. Granti qeveritar për komunën e Therandës nga 2021 në 2025 është rritur më
shumë se 41%. Kjo tregon që ne nuk e diskriminojmë Therandën, pavarësisht kush e qeveris
këtu, sepse ne i duam pa kushte, pa rezerva therandasit, juve të dashur banorë të komunës dhe
qytetarë të Republikës.
Ne e kemi rritur buxhetin, e alokuar në shumë fusha për të gjitha kategoritë shoqërore. Mirëpo,
është një fushë ku jemi detyruar ta rrisim më shumë, e ajo është mbrojtja. Ushtria. Siguria. Në
vitet 2018-2020 ju e dini kush ka qenë në qeveri atëherë. Buxheti për armatim ka qenë më pak se
4 milion euro. Ndërkaq, në vitet 2021-2024 ne kemi blerë armatim mbi 319 milion euro, pra 100-
fish më shumë. E në mandatin e ardhshëm, 4-vjeçar, 1 miliard euro për mbrojtje, për ushtrinë e
Kosovës.
Në mandatin e ardhshëm, për 4 vjet, 1 miliard euro për të mbështetur investime të mëdha e të
mesme, ndërmarrje prodhues dhe po ashtu 1 miliard euro për mbrojtjen, për Ushtrinë tonë. Unë
do të kisha dëshiruar që të mos jemi të detyruar që 1 miliard euro t’i japim për mbrojtje e për
ushtri, mirëpo, të dashur qytetarë, na ka rënë kojshia i keq. E kur e ke kojshinë e keq, ka vetëm
një zgjidhje: pushka e mirë. Por, jo vetëm pushka e mirë, po edhe pushka plot. Prandaj, përveç se
kemi blerë drona luftarakë Bayraktar TB2 nga Turqia dhe sistemin Anti-Tank Javelin nga
Amerika, dhe po blejmë helikopterë ‘Skifterë të Zi’/’Black Hawk’ nga Amerika, gjithashtu do ta

kemi edhe fabrikën tonë të municionit e do të fillojmë edhe ne vetë të prodhojmë drona ‘Made in
Kosova’, të cilët do të jenë pjesë e Forcës së Sigurisë së Kosovës.
E kështu, kur të jemi të mbrojtur cep më cep, kur ta kemi kufirin e ruajtur nga ushtria dhe policia
jonë me këtë armatim modern, me këtë municion të shumtë, padyshim që edhe kojshia i keq
mendon një dy-tre herë a me na e msy a jo, e kur të mendoj një dy-tre herë, s’na e msyn hiç, e me
besoni që kjo është më mirë edhe për ne, edhe për ata. Për ne është mirë, sepse nuk kemi nevojë
të luftojmë, e edhe për ata është mirë, se nuk do të kenë nevojë të vdesin.
Të dashur qytetarë, ne edhe ja kemi shtuar sovranitetin shtetit, integritetin territorit, zhvillimin
ekonomisë, prodhimtarinë zhvillimit, punësimin prodhimtarisë, arsimin cilësor punësimit.
Njëkohësisht, ne kemi zhvilluar një dialog fortë të suksesshëm në Bruksel. Atje në Bruksel
vazhdimisht ata më bëjnë presion me nënshkrimet e pararendësve të mi, Mustafa e Thaçi, e
marrëveshjen me mua ikin, se s’dojnë me e nënshkru. Kur të gjitha ish-qeveritë po e zhvillonin
dialogun, dikur në Bruksel, kishim Serbinë që forcohej, e Kosovën jo stabile që dobesohej. Me
qeverinë tonë dhe dialogun që udhëheqim ne, kemi Serbi jo stabile dhe Kosovë që po ngritet e po
forcohet.

Të gjithëve ju kujtohet, të dashur pjesëmarrës të këtij tubimi të zjarrtë e madhështor, se si dikur
në Kosovë Kryeministrat jepnin dorëheqje, e tash Kryeministrat po e japin dorëheqjen në Serbi.
Ajo çka e kemi parë të gjithë ne nga përvoja është që korrupsioni brenda Kosovës dhe
koncesionet jashtë ndaj Serbisë për dy dekada kanë qenë të lidhura me njëra-tjetrën. Prandaj,
është e domosdoshme që në Kosovë të ndalohen koncesionet, të ndalohet korrupsioni e të
vendoset më në fund drejtësia e urtë dhe efikase për të gjitha viktimat anë e mbanë Kosovës.
Nuk mund të lejojmë që Kosova të zhvatet e të plaçkitet as si buxhet shteti, as si pasuri natyrore.
Prandaj, me mandatin tonë të ri do të kemi një Prokurori të re Speciale kundër Krimit të
Organizuar dhe Korrupsionit në Kosovë. Ne kemi shumë respekt për gjithë ata që kanë
kontribuar me çfarë kanë mundur e si kanë ditur, mirëpo asnjëherë nuk mund ta falim, nuk duhet
ta falim e nuk do ta falim korrupsionin dhe dëmin që ia kanë shkaktuar interesit të përgjithshëm
publik. Prandaj, pasuria e përvetësuar paligjshëm, pasuria e pajustifikueshme private do të
konfiskohet dhe kthehet cent me cent, cep më cep nga Byroja për konfiskimin e pasurisë së
pajustifikueshme.
Unë ju falenderoj, të dashur qytetarë, për krejt mbështetjen, përkrahjen, ndihmën, solidaritetin që
keni treguar, edhe me Lëvizjen, edhe me qeverinë, në çdo fazë, e pavarësisht krizave e stuhive në
të cilat jemi ndodhur. Por, tash jemi para një referendumi të ri, para referendumit të 9 shkurtit,
para referendumit ku ju duhet ta gjykoni pozitivisht qeverisjen tonë, ti ndëshkoni me votë ata që
nuk duhet të kthehen më kurrë në pushtet dhe të na i jepni lejen për zotimin tonë, që ne t’ju
shërbejmë për programin e ri qeveritar, me ato 25 premtime tona, dhe në këto 4 vjet të ngritet
çdo aspekt i jetës sociale, ekonomike, kulturore, artistike, sportive dhe siguria e mbrojtja anë e
mbanë, gjithandej, cep më cep, Republikës tonë të dashur.
Pra, nuk ka zgjedhje më 9 shkurt. Zgjedhjet janë në vitin 2029. Me 9 shkurt 2025 ka referendum
dhe numri 1-1-8 është numri me të cilin ju thoni PO në referendum! Prandaj, deri me 9 shkurt,
deri në të dielën e 9 shkurtit, mos u ndalni asnjë orë, ditë e natë! Në secilën rrugë të çdo lagjeje,
në të gjitha fshatrat e komunës së Therandës, për fitoren e numrit 1-1-8, të Lëvizjes

VETËVENDOSJE!, me partinë Guxo dhe me partinë Alternativa dhe 110 kandidatët tanë të
shkëlqyeshëm, 10 prej të cilëve mund t’i rrumbullaksoni pas rrumbullaksimit të numrit fitues, 1-
1-8!
E fitorja që brohorasim në secilin tubim, edhe këtu, e ka numrin 500 mijë vota, apo më mirë të
themi, 500 mijë zemra, cep më cep Kosovës së pavarur, të cilat do të dalin nga kutitë e votimit në
orët e mbrëmjes së së dielës së 9 shkurtit. Por, në kuadër të këtyre 500 mijë zemrave, të dashur
kandidatë që vini në listën tonë nga Theranda; Sali Zyba, Albena Reshitaj dhe Hysen Durmishi,
Sali, Albena dhe Hysen, në kuadër të këtyre 500 mijë zemrave me 9 shkurt, nga Theranda na
duhen sepse i duam, i duam sepse na duhen 500 mijë zemra. Pra, 15.000 vota nga Theranda, për
fitoren me 500 mijë vota.
Atëherë, të dashur qytetarë të Therandës, a pajtoheni të gjithë, secila e secili që do të punoni e do
të angazhoheni që të kontribuoni, ta realizojmë synimin tonë – 500 mijë vota në Kosovë dhe
15.000 vota në Therandë!
Faleminderit shumë, urime fitorja që sonte! Urime, Therandë! Urime, VETËVENDOSJE!
Urime, Guxo! Urime, Alternativa! Urime, Kombi Shqiptar! Urime, Republika e Kosovës! Natën
e mirë e mirëupafshim!

Najkush ka menduar që ndoshta nuk mund të qëndrojmë në shi, por ne i gëzohemi edhe shiut,
sepse jemi këtu në Vushtrri. Vushtrria është toka pjellore për bujqësi, është fabrika punëtore për
industri, Vushtrria është ura për kulturën, Vushtrria është vatër e ngrohtë për miqtë, dhe
Vushtrria është kala e pa mposhtur për armiqtë.
Të dashur qytetarë të Vushtrrisë që jeni mbledhur sonte këtu, unë në mandatin e ardhshëm,
bashkë me kabinetin qeveritar dhe mazhorancën tonë, legjislaturën e nëntë, atëherë kur do të
kemi edhe më shumë ulëse në Kuvend, sepse kësaj rradhe janë 500 mijë vota, gjysmë milioni
zemra që me datën 9 shkurt dalin, shpërthejnë prej kutive dhe realizojnë fitoren më të madhe
historike, rekord e të pa parë në Kosovën jo vetëm të pavarur, por edhe të çliruar.
E në këtë mandat të ardhshëm, pas 9 shkurtit, bashkarisht, një nga një, do t’i realizojmë zotimet
tona të reja, përveçse do t’i vazhdojmë punët tona të mbara e të mira të këtij mandati.
Kësisoj, le t’ja fillojmë me programin “Gjenerata për gjeneratë”, që nënkupton 100 euro shtesë
mbi pensionin ekzistues, për gjeneratën e pleqve tanë, gjysheve dhe gjyshërve, që do të kujdesen
për fëmijët prej moshës 1-3 vjeç, kur të dy prindërit t’ju punojnë atyre; që do të thotë që të dy
prindërit duhet t’ju punojnë sepse shteti do t’i mbështesë fëmijët me çerdhe të reja, por edhe
brenda çerdheve familjare, duke ua dhënë nga 100 euro në muaj të gjitha gjysheve dhe gjyshëve,
cep më cep, Republikës së Kosovës.
Pastaj, programi “Super-Puna” për gratë, kudo që punësohen gratë nëpër ndërmarrjet private, ne
do t’ia japim për 6 muaj shtesë nivelin e pagës minimale, që është 350 euro aktualisht. Ka qenë
130-170 euro, dhe në mandatin e ardhshëm do ta bëjmë mbi 500 euro pagën minimale.
Përveç spitalit në Ferizaj, do ta ndërtojmë edhe spitalin e ri në Mitrovicë, dhe deri në 100 milion
euro buxhet për listën e barnave esenciale. Në vitin 2021 i kemi gjetur 24 milionë euro, dhe në
mandatin tonë që po i vjen fundi tani, e kemi bërë 70 milionë. Në mandatin tonë të ardhshëm,
100 milion euro për listën e barnave esenciale në shtetin tonë.
Do ta kemi programin e mobilitetiti për studentët, i cili i mbështet studentët në nevojë çdo muaj,
pavarësisht nga distanca ku studiojnë. Sa më larg që studion një studente apo një student prej
vendbanimit, vendlindjes së tij, aq më shumë do ta mbështesim si shtet. Gjithashtu, do të ketë
bursa edhe për studentët që vijojnë studimet në shkollimin universitar jopublik, pra jo vetëm në
Universitetin e Prishtinës e në universitete të tjera publike, por edhe në çdo universitet tjetër.
Sepse nga studentët tanë varet cilësia e punëtorëve tanë në ekonominë tonë.
Do ta fillojmë programin anembanë Kosovës, transportin publik me biletë të unifikuar, 10 euro
transporti urban e ndërurban për të gjithë qytetarët. Pra, për vetëm 10 euro do të mund të
udhëtoni kudo në Kosovë.
Tjetra, 1 miliardë euro mbështetje për investime në kapacitete prodhuese, përmes garantimit të
kredive për investitorët. Gjithashtu, do ta heqim për muajt e parë taksën doganore për veturat nga

Bashkimi Evropian. Pra, që në fillim të mandatit tonë, e heqim atë taksën 10% për veturat nga
BE-ja.
Në mandatin e parë, i kemi mbështetur 120 mijë bujq e fermerë me mbi 300 milion euro për
grante dhe subvencione. Në mandatin e ri do të përqendrohemi në rritjen e produktivitetit dhe
konkurrueshmërisë, përmes mbështetjes së investimeve në teknologji, dhe rrjetëzimit të
mbledhjes dhe shpërndarjes së produkteve bujqësore. Pra, edhe më shumë përkrahje për edhe më
shumë bujq, për edhe më shumë prodhimtari, për edhe më shumë rendiment, për edhe më shumë
eksport. Më shumë bukë në tryezat tona, nga toka jonë.
Në mandatin që po i afrohet fundi, dy vitet e fundit kemi pasur rekord të investimeve kapitale:
561 milionë euro në 2023 dhe 654 milionë euro në vitin që lamë pas, 2024. E në mandatet në
vijim do të kemi, duke filluar nga ky i ardhshmi, së paku 1 miliardë euro shpenzime, investime
kapitale në vit.
E kësisoj, do ta përfundojmë rrugën Prizren-Tetovë, autostradën Prishtinë-Gjilan që shkon deri te
Dheu i Bardhë, dhe do ta përfundojmë edhe rrugën Dollc-Gjakovë, Kijevë-Zahaq, rrugën e
Dukagjinit që lidh Prizrenin-Rahovecin-Gjakovën-Deçanin-Pejën-Istogun, si dhe do të vazhdojë
ndërtimi i rrugëve Deçan-Plavë dhe Pejë-Rrozhajë. E krahas infrastrukturës rrugore, mandati
tjetër do të na gjejë edhe me fillimin e ndërtimit të hekurudhës Prishtinë-Durrës, që do të lidh
portin e thatë të Prishtinës me portin e ri të Durrësit, dhe përveç kësaj, projektimi i linjës
hekurudhore që lidh Prizrenin dhe Ferizajin me Gjilanin dhe Bujanocin. Përveç asaj linje
hekurudhore të rëndësishme që shkon prej jugut në veri, prej veriut në jug, pra Hani i Elezit-
Leshak, Leshak-Han i Elezit, dhe kalon nëpër Mitrovicë dhe Fushë Kosovë.
Do t’i ndërtojmë 5 rezervuare për ujë të pijes, ujitjes dhe industri, Diga e Firajës, e Pollatës,
Kuqicës, e Dragaqinës dhe e Decivojcës, se të dashur qytetarë, Kosova është si një pjatë e kthyer
mbrapsht, ku lumenjtë dalin dhe neve na vyjnë rezervuarë të rinj të ujit, që ta mbajmë ujin
brenda Kosovës, sepse na duhet për pije, na duhet për amvisëri, na duhet për ujitje, na duhet për
industri.
Përveçse 1 miliardë për prodhimin, po ashtu së paku 1 miliardë për ushtrinë. Gjatë këtij mandati
që po e përmbyllim, për mbrojtjen tonë gjithsej i kemi dhënë rreth 630 milionë euro të buxhetit, e
tash nga 630 milionë euro do të kemi rritje mbi 50% në mandatin e ardhshëm, sepse do t’i
kalojmë 1 miliardë euro, me ç’rast edhe do të funksionalizojmë fabrikën e municioneve, për të
cilën tashmë kemi nënshkruar kontratë me kompaninë turke MKE. Gjithashtu, edhe mezi presim
t’i zhvillojmë dronët tanë ushtarake, Made in Kosova.
E të dashur qytetarë të Vushtrrisë, tash po ju shtroj një pyetje: ne kaq shumë po e zhvillojmë,
ndërtojmë, forcojmë ushtrinë tonë, po pyetja është, a thua pse qeveritë para nesh nuk kanë blerë
armatim për ushtrinë tonë? Forca e Sigurisë së Kosovës ka ekzistuar edhe më parë, pse ata nuk
kanë blerë armatim për ushtrinë tonë? Veç dy mundësi janë: ose nuk kanë dashur të blejnë
armatim, ose perëndimorët nuk ua kanë shitur armatimin. Unë nuk e di, a është e para apo është e
dyta, unë në fakt, sikurse ju, e di a është e para a është e dyta, por sonte nuk do të përgjigjem. Po
ju lë të gjith ju të mendoni, pse këta nuk kanë blerë armatim dhe municion për ushtrinë tonë, a
nuk kanë dashur, apo nuk ua kanë shitur?
Vetëm një fakt po ua tregoj: në vitet 2018-2020, as 4 milionë euro këta nuk i kanë shpenzuar për

armatim, ndërkaq ne, nga 2021-2023, mbi 319 milionë euro për bijat dhe bijtë më të mirë
ushtarë, oficerë, nënoficerë të popullit tonë. Kemi blerë drona Bayraktarë luftarakë nga Turqia
për ushtrinë tonë, po ashtu edhe sistemin antitank Amerikan, Javeline dhe skiftera të zi,
helikopterë Black Hawk. Gjithashtu, do t’i kemi pilotët e flotës së Forcës së Sigurisë së Kosovës.
Drona, helikopterë… po pra, UÇK, sepse forcimi i Ushtrisë tonë është në përputhje, është
besnikëri ndaj idealeve të dëshmorëve, invalidëve e veteranëve të UÇK-së. Faleminderit!
Të dashur qytetarë të Vushtrrisë, me neve u shtua prodhimi i mallrave dhe ranë politikanët e
mallrave. Me neve shteti u bë bankë për qytetarët e jo plaçkë e pushtetarëve, dhe askush këtë nuk
e kupton më mirë se Vushtrria, që është pjesë e rëndësishme e hambarit tonë. Por, a e dini çka, të
nderuar të pranishëm? Ne i kemi disa parti opozitare që kinse i kanë disa kandidatë për
kryeministra. Bile, kur e dinin ata që edhe ju po e dini, që ata nuk mund të kthehen më në
pushtet, njëri prej tyre e solli një ide, ai mendon shumë të mençur, tha: ‘Ne bëhemi, tha,
kryeministra me rotacion.’
Pra, duke e ditur që askush nuk do t’iu besojë, se ata nuk i besojnë as vetes, thanë që e bëjmë me
rotacion. Po ju këtu në Vushtrri e dini më së miri çka bëhet me rotacion. Me rotacion toka
mbillet njëherë patate, pastaj speca vitin e ardhshëm, ajo është rotacion. Ose, nëse janë serra, me
rotacion sallata, lakra, purri, kastraveca – këto janë me rotacion. S’ka kryeministra me rotacion.
Qeveria jonë vazhdon edhe pas 9 shkurtit, sepse në këtë vend ka popull, në këtë vend ka qytetarë
të Republikës. Ne e duam vendin tonë, Kosova Republikë, e jo Kosova klan. Ne jemi ata që e
kemi besuar atë që kemi thënë: I dalim zot atdheut!
Ashtu siç plejadat e dëshmorëve tanë, deri tek Enver Zymberi e Afrim Bunjaku, që
përfundimisht i kallën datën armikut, dhe cep më cep, Republika e Kosovës sot e ka shtetin me
sovranitet e territorin me integritet, e qytetarin me dinjitet, dhe neve me numrin 1-1-8.
Këtu, bashkë me neve, i kemi edhe shumë musafirë që na kanë ardhur nga Maqedonia e Veriut.
E kemi Zëvendëskryeministrin Arben Fetain, e kemi Ministrin e Shëndetësisë Arben Taravarin,
por kemi edhe shumë deputetë të tjerë, të cilët i falënderojmë nga zemra që kanë ardhur nga
Shkupi, Tetova, Kumanova, Gostivari e Struga. E po ashtu, kemi edhe miq që kanë ardhur nga
Novi Pazari, nga Sanxhaku, Amina Nuraj. I falënderoj nga zemra që janë bashkëngjitur sot.
E tash po fillojmë me kandidatët tanë të cilët janë nga Vushtrria: Besim Muzaqi me numër 53,
Fjolla Ujkani me numrin 98, me numrin 89 Nasuf Bejta, me numër 84 Sylejman Meholli.
Më lejoni të përmend edhe disa emra të politikanëve, përfaqësuesve dhe zyrtarëve që na janë
bashkangjitur sonte, përveç atyre që i thashë: Rijad Shaqiri, Mimoza Musa, Halil Snopçe, Sadik
Sylejmani, Salim Sylejmani, e kemi kwtu edhe Valton Limanin kryetarin e komunës së
Gostivarit, pastaj Flakron Bexhetin, Elfete Ismajlin, e shumë të tjerë që edhe njëherë i falënderoj
nga zemra që na janë bashkangjitur këtu në Vushtrrinë e Hasan Prishtinës, në Vushtrrinë e
VETËVENDOSJES!, në Vushtrrinë e fitores më 9 shkurt, për numrin 1-1-8!
Të dashur qytetarë të Vushtrrisë, herët në mëngjes, të dielën më 9 shkurt, dilni i madh e i vogël,
prej 18 deri në 88, a 98, a sa e keni më të moçmin në familje, shkoni bashkë edhe votojeni
numrin 1-1-8, Lëvizja VETËVENDOSJE! Një numër është i hajrit aty! 1-1-8 është numri i
zgjidhjes edhe i zgjedhjes për 4 vjet të mbara e të mira në vijim.

Unë ju falënderoj për këtë mikpritje kaq të zjarrtë në qytetin tuaj e tonë të Vushtrrisë, ku kurrë
nuk e kam parë më të gjallë shtatoren e Hasan Prishtinës, të rrethuar me ata të rinj, me ata fëmijë
të cilëve ju buzëqesh fytyra sepse e dinë që e ardhmja është e ndritshme dhe e sigurt për ata, për
Republikën e Kosovës, dhe për popullin shqiptar.
Faleminderit shumë! Ju dua fort! Do të jemi gjithmonë bashkë me juve dhe pranë juve, dhe mos i
harroni kandidatët tuaj, dhe kësaj radhe do të mund t’i rumbullaksoni 10 veta, pasi ta
rumbullaksoni numrin 1-1-8. Mos u ndalni në çdo shtëpi, në çdo rrugë dhe në çdo lagje, në çdo
fshat të Vushtrrisë dhe më tej, për një fitore rekord të 500 mijë zemrave, të gjysmë milioni
votave për Lëvizjen VETËVENDOSJE! dhe koalicionin e saj, Guxo dhe Alternativen.
Faleminderit shumë! Mirënjohje e thellë nga të gjithë ne, natën e mirë e mirupafshim!

Do të kemi 10 profile të reja në sistemin Dual që edhe e rrit fuqinë punëtore por edhe e
ngrit cilësinë e fuqisë punëtore. Tash për tash, i kemi 25 shkolla profesionale, 12 profile,
në 15 komuna, deri javën e kaluar 1.607 nxënës. Kjo do të vazhdojë të rritet sepse do të
shtojmë edhe 10 profile të reja ashtu që ta vendosim urën që e kalon atë hendekun e
shkathtësive dhe i bën bashkë aftësitë e arsimin profesional me tregun e punës në
ekonominë e vendit tonë.
Të nderuar të pranishëm, ne dikur jemi qeverisur prej politikanëve që i kanë pasur
mendjen e cekët e xhepat e thellë. Populli i Kosovës, gjithmonë e ka merituar të
qeveriset prej njerëzve të mendshur e të dijshëm, të guximshëm e të ndershëm,
punëtorë e patriotë. Të tillë janë pikërisht, njerëzit e qeverisë sonë, të koalicionit tonë.
Këta 110 kandidatë që më datën 9 shkurt e kanë numrin 118, 1-1-8. E pra, këta 110
kandidatë, të cilët vijnë nga Kosova, cep me cep, janë të të gjitha moshave, e
profesioneve të të dy gjinive. Janë njerëz në lëvizje të vazhdueshme që duan Kosovën
të lëvizë përpara. Njerëz që vendosin vetë sepse duan që populli i Kosovës të
vetevendosë. Njerëz që e bëjnë sovranitetin të lëvizë e integritetin të rritet, e dinjitetin e
shtetit tonë në arenën ndërkombëtare të ngritet.
Prandaj, nga ky tubim këtu në Viti, mund të parashikohet sepse po paralajmërohet që
më 9 shkurt do të kemi shpërthim demokratik me guximin e 500k zemrave për numrin 1
1 8.
Ajo çfarë kemi ndryshuar në pranverën e vitit 2021 ja ka vlejtur fort. Ja ka vlejtur edhe
për nga socio-ekonomia, ja ka vlejtur edhe për nga demokracia, ja ka vlejtur edhe për
nga mbrojtja dhe siguria. Prandaj atë ndryshim të revolucionit elektoral të 14 shkurtit
2021, ne duhet ta shpjejmë edhe më tej, ashtu që gjysmë milioni vota bëhen bashkë te
numri 1 1 8, në Viti dhe Kosovës, cep me cep i kundohët lajmi që koalicioni
Vetëvendosje, Guxo!, Alternativa është edhe i pari, edhe ka fituar, edhe i ka numrat e
mjaftueshëm për të qeverisur vetë pa përfshirë aso të tjerash që i patën 4 vjet për tu
reformuar por nuk u reformuan asnjë grim.
Me qeverisjen tonë që është e para e cila e çon mandatin deri në fund, kemi kaluar nga
qeveria si pushtet që privatizon nga e kaluara, te qeveria si shërbim që zhvillon.
Me qeverinë tonë ka dalur tregtia prej politikës dhe ka shkuar tregtia aty ku e ka vendin;
te bizneset, te tregu i gjelbër, te pazari i kafeve ose i kërrëve, te shetitoret. Por jo
Institucionet e shtetit. Aty ka demokraci, aty ka integritet, aty ka devotshmëri, aty ka
patriotizëm, aty ka ndershmëri.
E kur të themelohet Byroja për konfiskim të pasurisë të pajustifikueshme, se boll e kanë
shtyrë por i ka ardhur radhës sivjet me u themeluar. Ata politikanë e zyrtarë të

korruptuar edhe do t’i nxjerrim të pensionuar të dinjitetshëm edhe do t’ju konfiskohet
pasuria e paligjshme dhe e pajustifikueshme. Edhe Prokuroria e re e shtetit me një
gjyqësore aktive, të urtë, të ri, efikas, do të merret në vijim sepse viktimat kërkojnë
drejtësi. Duhet drejtësi për ata që janë përjashtuar, margjinalizuar, shtypur e shfrytëzuar
por gati dy dekada, në Kosovë të lirë, e sidomos në Kosovën e pavarur.
Të dashur qytetarë, më 9 shkurt, para kutive të votimit, ka edhe numra të tjerë aty
përveç 118, domethënë ka shumë opsione por ka vetëm dy kahje të së njëjtës rrugë.
Vazhdimi përpara ose kthimi mbrapa. Ecja drejtë ardhmërisë ose rikthimi tek e kaluara.
Kthimi është shumë i dëmshëm, përparimi është i dobishëm. Deri më tani ata që e kanë
dashur Vetëvendosjen e kanë dashur progresin. Tash ata që e duan progresin, e duan
Vetëvendosjen, kahje e progresit është orientimi i Vetëvendosjes. Numri i progresit, cep
me cep, është numri i Vetëvendosjes, është numri 1 1 8.
Zgjedhja e vërtetë është kur qytetarët vendosin vetë. Zgjedhja e vërtetë është kur
qytetarët vendosin për veten. Kjo zgjedhje është zgjidhja dhe ajo e ka numrin 118 e me
qeverisjen tonë edhe në mandatin e ardhshëm do të sundojë vullneti i popullit e jo
dëshirat e politikanëve.
Të nderuar pjesëmarrës, në asnjë vend tjetër ngado që kam shkuar unë nuk kam takuar
njerëz bujar, mikpritës, dashamirës, të durueshëm e të qëndrueshëm si në qytetarët e
Kosovës, si populli ynë.
Në asnjë vend tjetër nuk ka kësaj rinie dinamike, masive e të shëndoshë. Prandaj
energjitë e këtij populli, potenciali i kësaj rinie duhet të ngriten edhe më tej për ta
zhvilluar e përparuar vendin tonë. Për ta lartësuar e për ta rregulluar shtetin tonë.
Sami Frashëri ka thënë; Mos i ankohet fatit ai që bie rastin, le të mos e bjerë këtë rast,
le ta shfrytëzojmë këtë çast. Qasja e ka datën 9 shkurt, numrin 118 dhe emrin
Vetëvendosje.
Këtu në Viti, Kryetari i Komunës po ashtu po garon për Deputet të Kuvendit. Prandaj 9
shkurti është një shans më i kry dy parë zgjedhje. Populli ynë e ka një shprehje të mirë,
thotë një rrugë e dy punë. Se edhe në Levizjen Vetëvendosje kemi mundur Albanu
Hysenin, Shpejtim Bulliqin, Qemal Aliun, Kadri Rahimajn, Lulzim Hetemin, Erden Atiqin
me i shty në listë e me rrit numrin e votave, mirë po jo të dashur qytetarë. Sepse ne
bëjmë sepse duam shtet e jo nuk udhëhiqemi asnjëherë, asnjëri prej nesh nga lakmia
për pushtet.
Udhëheqja politike, krerët institucional nuk janë pozita por aktivitet. Janë përgjegjësi e jo
karrige. Prandaj më datën 9 shkurt, këtu në Viti ka më shumë se një parë zgjedhje dhe
ju e dini më së mirë se çka duhet të bëni.

E ata që i takoni, gjatë dy javëve të ardhshme ndërsa të bindeni qysh duhet me votu
paradite numrin 118 nëse ndonjëherë prej tyre rastësisht, se nuk i dihet, rastësisht
ndonjë prej tyre, ndonjë kushëri i largët po mendoj, ju thotë juve që ‘jo unë do të votoj
për këtë partinë tjetër, me atë numrin tjetër’, pra jo me numrin 118, unë ju kisha sugjeru
ti thoni kështu; ‘Në vitin 2029, gjithë ama krejt do ta votojnë Vetëvendosjen. Pse po e
shtyn për 4 vjet? Nuk ka nevojë me e shty për 4 vjet, votoje në 2025-ën.’ Në 2029-en
edhe ata që nuk s’e kanë mendjen me na votu qetash, kanë me na votu neve. Prandaj
më 9 shkurt mos e zgjat, Levizja Vetëvendosje, numri 1 1 8.
Sigurisht që territorit ja kemi shtuar integritetin, ekonomisë prodhimin, prodhimit
punësimin, punësimit arsimin, të gjitha kategorive shëndetësinë por ajo çka e kemi më
shumti për zemër natyrisht është që shteti tonë ja kemi shtuar sovranitetin. Prandaj sot
kauza për sovranitet, po thërret të bëhemi bashkë, 1 1 8. Sovranitet, sovran 1 1 8.
Sovran 1 1 8. Sovran 1 1 8. Sovran 1 1 8. Sovran 1 1 8. Sovran 1 1 8. Sovran 1 1 8.
Sovran 1 1 8. Sovran 1 1 8. Sovran 1 1 8. Sovran 1 1 8. Faleminderit shumë Viti, ju dua
fort! Mirupafshim e mos ndalni duke punuar, që më 9 shkurt të votojmë bashkë, të
festojmë bashkë sepse fitojmë bashkë e Arsim Ademi e organizon një tubim po ashtu të
madh, vetëm në mbrëmje për ta kremtuar fitoren tonë të përbashkët. Mirupafshim.