Të nderuar familjarë të Arben Xheladinit dhe Mon Balajt,

të nderuar deputetë e ministra,

Kryeparlamentar Konjufca,

qytetarë të Republikës,

anëtarë të Lëvizjes,

15 vjet të shpalljes së Pavarësisë së Kosovës mbushen sot 1 javë por 16 vjet të demonstratës së 10 shkurtit janë mbushur sot.

Ka qenë ditë e shtunë 10 shkurti i vitit 2007. U nisëm nga rruga “Perandori Justinian” në rrugën “Garibaldi” dhe mandej në këtë “Nëna Terezë” e para “Skënderbeut” na ndali kordoni i policisë.

8 ditë më herët me 2 shkurt u pat publikuar paketa e ndërmjetësit Ahtisaari për të cilën ne kishim shumë kritika e që i shpalosëm në tubime publike me qytetarë anë e kënd Kosovës. Ishim të pakënaqur sepse të bindur që Kosovës i takon shumë më tepër, që populli i Kosovës meriton më shumë dhe që padrejtësitë e reja nuk i durojmë.

Me të drejtë e kritikuam dhe e kundërshtuam Paketën e Ahtisaarit sepse aty kishte komuna të reja mbi baza etnike, zona të veçanta serbizuese rreth kishave e manastireve ortodokse, shuarje përfundimtare të Trupave Mbrojtëse të Kosovës, pjesëmarrje të Kosovës në borxhin e jashtëm të Serbisë, e drejta e vetos për deputetët serb me ulëse të rezervuara e të garantuara në Kuvendin e Kosovës, dhe vazhdimi i sundimit ndërkombëtar në Kosovë me fuqi ekzekutive mbi neve e pa llogaridhënie ndaj neve.

Dhjetëra mijëra qytetarë demonstruan para 16 vjetëve e në ballë të tyre ishte baca Adem Demaçi në moshën 71 vjeçare.

232 plumba gjithsej u shkrepën në trupat dhe kokat e qytetarëve nga policia e UNMIK-ut në një situatë ku asgjë s’shihej prej gazit të shumtë lotsjellës. Arben Xheladini dhe Mon Balaj u vranë kurse 80 demonstrues të tjerë u plagosën rëndë e lehtë. Hysni Hyseni Doda e humbi syrin, Mustafë Nerjova e ka ende sot një pjesë plastike në kafkën e kokës kurse Zenel Zeneli e mbanë plumbin akoma afër zemrës sepse nuk do të arrinte t’i mbijetonte operacionit kirurgjik. Doda i Prizrenit ka vdekur para tri vjetëve kurse Zenel Zeneli dhe Mustafë Nerjova janë këtu sot me neve.

Ish shefi i shtyllës së parë të UNMIK-ut, i shtyllës së drejtësisë atëbotë, Robert Dean, pat bërë një hetim atë pranverë nga i cili doli konkluzioni që për menaxhimin e asaj demonstrate vrasjet e Monit dhe Arbenit kanë qenë edhe të panevojshme edhe të evitueshme.

Policët e UNMIK-ut shfrytëzuan imunitetin ndërkombëtar, ndërkaq Sekretari i Përgjithshëm i Organizatës së Kombeve të Bashkuara ka ngelur t’i përgjigjet ministrisë sonë të drejtësisë.

Një javë para demonstratës sonë u pat publikuar Paketa e Ahtisaarit ndërkaq 6 javë pas asaj demonstrate Ahtisaari e shtoi rekomandimin për pavarësi të mbikëqyrur si faqe të parë të propozimit të tij.

Të dashur qytetarë, kurrë nuk ka qenë me e diskutueshme gjithandej, nëse ja kanë vlejtur komunat mbi baza etnike. Prandaj Beogradi zyrtar me kaq nervozë kërkon asociacion të tyre. Si “Zajednicë” komunash pat nisur edhe Republika Srpska në Bosnje dhe Hercegovinë. Jam i bindur që këtë nuk e duan serbët e Kosovës por jam i bindur që mu këtë e do Serbia.

Kosova ka nevojë për më shumë demokraci e ndër aspektet e rëndësishme të demokracisë është pluralizmi politik. Te komuniteti serb në Kosovë njëmend nuk ka pluralizëm politik. Mirëpo ai megjithatë po lind me qeverisjen tonë demokratike e progresiste. Prandaj Serbia është në panik. Duan që t’i bëjnë bashkë sa më parë 10 kryetar komunash të së njëjtës parti që i dirigjojnë ata, ta shpallin një president zajednice dhe me atë ta shkelin ministrin tonë të qeverisë tonë, ministrin nga radhët e komunitetit serb. E padrejtë dhe e gabueshme, e dëmshme dhe e papranueshme.

Të dashur aktivistë e anëtarë.

Vetëvendosja si ide te ne i ka tri burime.

Së pari, rilindjen tonë kombëtare aty sidomos Lidhjen e Prizrenit. Së dyti, programin 14 pikësh të ish presidentit amerikan Woodroë Wilson i cili jo më pak është i famshëm në Shtetet e Bashkuara të Amerikës për amendamentin 19 të Kushtetutës që u dha grave të drejtën e votës si dhe për ligjet që e kufizuan orarin e punës në 8 orë. Dhe së treti, burim për vetëvendosjen si ide janë lëvizjet e ndryshme antikolonialiste e çlirimtare anembanë globit e përgjatë historisë moderne të njerëzimit.

Kjo ide e vetëvendosjes e lansoi Lëvizjen tonë me 12 qershor 2005. Mirëpo, pikërisht me 10 shkurt 2007 gërshetohet kjo ide me ngjarjen e asaj demonstrate dhe prodhon organizatën tonë të përbashkët të Lëvizjes si dhe besnikërinë e anëtarit të veçantë të VETËVENDOSJE!-s.

Vetëvendosja edhe gjetiu, edhe te ne, paguhet edhe me jetë. Por edhe jeta që ja vlen është ajo me vetëvendosjen.

Rruga jonë është e vështirë sepse është rrugë përpjetë por edhe kjo rrugë e jona është e qartë sepse është rrugë e drejtë.:

Lavdi Monit dhe Arbenit. Lavdi gjithë dëshmorëve të kombit.

Lule të freskëta te varri i Monit dhe Arbenit për të kujtuar që brezat e shqiptarëve e bartin pishtarin e lirisë nga njëri te tjetri duke mundësuar kështu ecjen e popullit tonë.

Kryeministri, Albin Kurti, bashkë me Kryetarin e Kuvendit, Glauk Konjufca, Nënkryetaren e Kuvendit, Saranda Bogujevci, Kryetarin e Podujevës, Shpejtim Bulliqi, familjarë e miq të Monit dhe Arbenit, ministra, anëtarë të kryesisë dhe deputetë e aktivistë të Lëvizjes VETËVENDOSJE!, bënë sot homazhe te varri i Mon Balajt në Podujevë dhe te varri i Arben Xheladinit në Prishtinë.

16 vjet më parë, 10 shkurt 2007, Arben Xheladini dhe Mon Balaj krahas mijëra demonstruesve të tjerë që po kundërshtonin në formë të marshimit paqësor padrejtësitë e Pakos së Ahtisaarit, u qëlluan nga policia rumune e UNMIK-ut, që siç edhe dëshmuan përplot raporte të organizatave që merren me të drejta të njeriut, përfshi vetë Panelin Këshillëdhënës për të Drejtat e Njeriut të UNMIK-ut (2 mars, 2015) kishte përdorur forcë absolutisht të panevojshme për t’i shpërndarë demonstruesit.

16 vjet më vonë ende nuk ka drejtësi për Arben Xheladinin dhe Mon Balajn.

Nuk do të ndalemi së kërkuari drejtësi për Monin dhe Arbenin. Drejtësia për ta dhe liria e vetëvendosja e popullit të Kosovës janë të lidhura bashkë në këtë shekull.

Lavdi jetës dhe veprës së Mon Balajt dhe Arben Xheladinit.

23 vite më parë, 8 muaj pas përfundimit të luftës, në natën mes 3 dhe 4 shkurtit të vitit 2000, formacioni kriminal serb “Rojat e Urës” filloi aksionin për spastrimin etnik të veriut të Mitrovicës nga shqiptarët. Ngjarjet ndodhën para syve të pjesëtarëve francezë të KFOR-it.

10 shqiptarë u vranë. Më i riu 13 vjeç. Më e moshuara 65 vjeç. Mbi 100 të tjerë u torturuan e plagosën. 11,364 shqiptarë u dëbuan nga shtëpitë e tyre. Të gjithë të pambrojtur nga askush. Mijëra shqiptarë ende nuk janë kthyer në shtëpitë dhe trojet e tyre.

Kjo masakër, ky dëbim i shqiptarëve civilë e të paarmatosur, nga shtëpitë e tyre në pjesën veriore të Mitrovicës përmbysi demografinë aty në favor të asaj që kërkonte Serbia.

Ndarja e qytetit të Mitrovicës do të bëhej e mundur pas kësaj masakre dhe dëbimi duke krijuar artificialisht një gjoja shumicë serbe në pjesën veriore.

Kjo u arrit përmes këtij krimi makabër në sy të forcave të KFOR-it dhe u fashit përmes ish drejtuesve politikë të atyre viteve.

Frazat e thënë ato ditë se së shpejti do të kthehen në shtëpitë e tyre dhe se Mitrovica nuk do të ndahen mbeten vetëm video. Realiteti e dërgoi diku tjetër. Plani i Ahtisaarit e formalizoi këtë ndarje që në thelb e ka një masakër dhe dëbimin masiv të shqiptarëve.

Për qytetarët shqiptarë që përjetuan dhe i mbijetuan masakrës duke humbur më të dashurit e tyre presin ende vendosjen e drejtësisë nga Prokuroria dhe Gjykatat në Kosovë.

Në vitin 2013, 13 vite pas masakrës së 3-4 shkurtit, mazhoranca e asaj kohe bashkë me disa nga partitë opozitare hartuan e miratuan ligjin për amnistinë e kriminelëve në veri të vendit tonë.

Atë botë Lëvizja VETËVENDOSJE! dhe deputetët kundërshtuan dhe rezistuan për të mos ta miratuar këtë akt të turpit. Për fat të keq ligji kaloi dhe amnistia ndodhi.

Sot 23 vite pas ne jemi para një padrejtësie të pa adresuar. E njëjtë nuk mund dhe nuk duhet të vijojë pafundësisht.

Për ata që u flijuan vetëm pse ishin shqiptarë nga lagjet e veriut të Ibrit në Mitrovicë, për ata që sot gjenden nëpër Kosovë por jo në shtëpinë e tyre në Mitrovicë, për të sotmen e shqiptarëve që jetojnë aty dhe për të ardhmen e të gjithë vendit tonë drejtësia duhet vënë në vend.

Lëvizja VETËVENDOSJE përkujton me nder dhe respekt të rënët e 3 dhe 4 shkurtit të vitit 2000 dhe vijon të jetë e përkushtuar që drejtësia për ta të gjejë dritë.

Sot, ministrja Albulena Haxhiu, njëherazi kryetarja e organizatës Gratë për VETËVENDOSJE!, së bashku me deputeten Tinka Kurti, kryetaren e GVV-së në Gjakovë, Afërdita Kumnova, dhe asambleistet e Qendrës së Lëvizjes në Gjakovë, vizituan familjen e të ndjerës Zoje Prendi, nënës që ju vranë pesë fëmijët në masakrën e Mejës, dhe shtëpinë e zonjës Nevzete Luzha, nënës që humbi dy djem në luftë.

Te familja e zonjës Zoje Prendi ato përkujtuam jo vetëm humbjen e Viktorit, Sokolit, Markut, Robertit dhe Gjergjit por edhe vetë dhimbjen e madhe të nënës Zoje. Ajo sot nuk është më por sakrifica e saj do të jetë e paharrueshme.

Kurse te zonja Nevzete Luzha, nëna që ka humbur Albertin dhe Armendin, dy djem të mitur në luftë, bashkëndjemë si me dhimbjen ashtu edhe me luftën e saj ndaj padrejtësisë për kaq gjatë.

Në qendër të bashkëbisedimit të përzemërt me zonjën Kristina, Flora Prendi dhe nënë Nevzete, në qendër ishte mungesa e drejtësisë për krimet që ka kryer Serbia në Kosovë dhe rezistencën e grave tona gjatë luftës. Gratë në forma të ndryshme kanë kontribuuar në luftën tonë çlirimtare, ato kanë rezistuar pa kursim.

Theksuam bindjen që nuk i harrojmë krimet, do jemi pranë tyre edhe fizikisht dhe duke insistuar bashkë me to për vënien e drejtësisë.

Sot, në zyrën e Lëvizjes VETËVENDOSJE!, Sekretari Organizativ, Alim Rama dhe Sekretari për Marrëdhënie Ndërkombëtare, Hajrulla Çeku mirëpritën në takim drejtorin e FES për Kosovë dhe Maqedoni të Veriut, René Schlee.

Gjatë këtij takimi u vlerësua bashkëpunimi i mirë mes LV dhe FES ndër vite. U dakordua për koordinimin e bashkëpunimit për vitin 2023, me theks të veçantë në fuqizimin e kapaciteteve organizative, politikën publike dhe qeverisjen lokale. Bashkëpunimi në mes LV dhe Partisë Social Demokrate të Gjermanisë do të jetë një nga objektivat kryesore gjatë këtij viti në kuadër të rritjes së koordinimit me familjen Social Demokrate në BE dhe në botë.

Veç tjerash në këtë takim u ritheksua qëndrimi i LV kundër themelimit të një asociacioni dhe çdo marrëveshje tjetër mbi baza etnike.

Republika e Kosovës ka një nga sistemet më të mira në botë për mbrojtjen e të drejtave të komuniteteve jo shumicë, brenda kornizave ligjore/kushtetuese, thanë përfaqësuesit e LV gjatë takimit.

Ata ftuan FES që të bëjnë një studim krahasimor për respektimin e të drejtave të komuniteteve në Kosovë dhe në vendet e tjera përfshirë Serbinë.

Sot përfunduan punimet e Kongresit të 80 të Partisë Socialiste të Francës, që u mbajt në Marsejë. Midis shumë partive socialdemokrate dhe progresiste nga e gjithë bota, morën pjesë edhe një delegacion nga Lëvizja, i përbërë nga Arbër Zaimi, anëtar i kryesisë, dhe Sebastien Gricourt, aktivist e këshilltar.

Në aktivitetet shoqëruese përfaqësuesit e Lëvizjes e uruan për rizgjedhjen z. Olivier Faure, sekretarin e parë të PS, dhe patën takime miqësore me përfaqësues e veprimtarë nga vende të ndryshme të botës. Me një pjesë prej tyre që vijnë nga vende të cilat ende nuk e njohin Kosovën, u vunë kontakte të mira për të punuar drejt afrimit të vendeve.

Në këtë aktivitet për herë të parë në 13 vitet e fundit morën pjesë së bashku edhe drejtuesit e dy organizatave të mëdha ndërkombëtare të socialdemokratëve. Me këtë rast përfaqësuesit e Lëvizjes u takuan me znj. Benedicta Lasi, sekretaren e përgjithshme të Internacionales Socialiste, si dhe me z. Conny Reuter, koordinatorin global të Aleancës Progresive, me të cilët diskutuan edhe për aktivitete rajonale e ndërkombëtare që do të mund të organizohen në Kosovë.

Pjesëmarrja dhe afirmimi i Lëvizjes VETËVENDOSJE! në aktivitete të tilla, midis partive simotra, është një pjesë e rëndësishme e politikës sonë partiake, pasi nuk mund të krijohet e të çohet përpara një vizion politik, pa i diskutuar e pa i kuptuar edhe zhvillimet globale. Internacionalizmi është element i rëndësishëm i të majtës progresiste e reformiste.

Në zyret e Lëvizjes VETËVENDOSJE! Kryeministri, njëherit Kryetari i LV-së, Albin Kurti së bashku me Nënkryetaren e Dytë, Mrika Limani Myrtaj, Sekretarin Organizativ, Alim Rama dhe Sekretarin për Marrëdhënie Ndërkombëtare, Hajrulla Çeku pritën në takim deputetin dhe Kryetarin e Partisë Forca e Re Demokratike Genc Nimanbegu, i cili ishte i shoqëruar nga Ardian Mavriqi, Sekretar i Pergjithshëm – aktualisht Kryetar i Kuvendit të Komunës së Ulqinit dhe Nënkryetarët e Partisë: Ilir Çapuni dhe Arbin Çapriqi.

Përgjatë takimit Kryeministri Kurti njoftoi përfaqësuesit e partisë shqiptare nga Mali i Zi për situatën politike dhe ekonomike në vend. Në kuadër të diskutimit u theksuan edhe marrëdhëniet e Republikës së Kosovës me Malin e Zi me ç’rast u përmend edhe ndërtimi i rrugëve Pejë-Rozhajë dhe Deçan-Plavë çka do të lehtësojë qarkullimin e qytetarëve dhe forcojë lidhjen ekonomike dhe tregtare.

Në anën tjetër, përfaqësuesit nga Mali i Zi njoftuan me situatën politike atje me theks të veçantë ndërhyrjen e Kishës Ortodokse Serbe në jetën politike e institucionale çka ka tensionuar edhe më shumë raportet etnike dhe ndërhyrjet e Serbisë në shtetin e Malit të Zi.

Në fund pjesë e diskutimeve ishte edhe bashkëpunimi në fushën e kulturës dhe trashëgimisë kulturore në mes të të dy vendeve.

Përfaqësuesit e organizatës International Republican Institute, drejtoreshën rezidente të kësaj organizate për Kosovë, znj. Marta Onorato dhe znj. Edona Bajrami Shala, dje në zyret tona i mirëpritën Sekretari Organizativ, Alim Rama, Sekretari për Marrëdhënie Ndërkombëtare, Hajrulla Çeku dhe anëtarja e këtij sekretariati, Anila Vrajolli.

Në këtë takim miqësor u njoftuam për punën dhe projektet e deritashme të International Republican Institute, për planet e mëtejme të kësaj organizate, si dhe diskutuam për mundësinë e bashkëpunimit në çështje na bashkojnë. Dy drejtime ku kemi interes të ndërsjellët kanë të bëjnë me fuqizimin e rinisë dhe grave. Ne i njoftuam znj. Onorato dhe znj. Bajrami Shala, për dy organizatat e reja që i kemi formuar Rinia për VETËVENDOSJE! dhe Gratë për VETËVENDOSJE!, për strukturat e tyre që janë ndërtuar tashmë në secilën pjesë të vendit.

Në fund të këtij takimi ndamë bindjen e përbashkët për shtim të bashkëpunimit në të ardhmen.

– Granti i performancës komunale në vlerë 8 milionë euro;

– Ndamë 1.5 milion euro për “Programin Komunal për zhvillim të infrastrukturës socio-ekonomike dhe bashkëpunim ndërkomunal”;

– Zbatuam:

– Projektin “Municipality 4 Youth” me vlerë 2,7 milionë dollarë;
– Programin për Zhvillim Rajonal: 17 projekte të investimeve kapitale në 16 komuna, në vlerë prej 1,4 milion euro;
– Programin për Zhvillim Rajonal të Balancuar në vlerë 3 milionë euro. Përfituan 335 biznese dhe gjeneruam 770 vende të reja pune;
– Programin për bashkëpunim me OShC, në vlerë prej 107 mijë euro. Nga 38 projekte, përfituan 200 të rinj dhe gra;

– Avancuam bashkëpunimin ndërkufitar me Shqipërinë, Maqedoninë e Veriut dhe Malin e Zi. Janë paraparë mbi 25 milionë euro;

– Inicuam zhvillimin e portalit E-Komunat për digjitalizim në nivel lokal;

– Mbështetëm komunitetet nëpërmjet Fondit prej 1 milion euro;

– Forcuam të drejtat e komuniteteve nëpër komuna;

– Hartuam Planin Kombëtar të Veprimit për Partneritetin për Qeverisje të Hapur – PQH me qëllim të anëtarësimit në organizatën ndërkombëtare PQH;

– Miratuam Strategjinë Kombëtare për menaxhimin dhe kontrollin e qenve me dhe pa pronar. 

– Vitin 2022 e shpallëm Vit të Personave me Aftësi të Kufizuar;

– Në kuadër të masës 1.6 të Pakos së Ringjalljes Ekonomik – Mbështetja e Personave me Aftësi të Kufizuara, u punësuan 239 veta (119 burra dhe 120 gra).

– Përfshimë në platformën për konsultime me publikun qytetarët që nuk dëgjojnë dhe qytetarët e verbër duke u mundësuar atyre kontributin në ligje, politika dhe dokumente që hartohen prej Qeverisë përmes shërbimeve në gjuhën e shenjave dhe zërim;

– Proceduam në Kuvend propozimin për përfshirjen e Konventës Ndërkombëtare për të Drejtat e Personave me Aftësi të Kufizuara në Kushtetutën e Kosovës;

– Zyra e Kryeministrit ofroi gjithsej 4868 orë shërbime të interpretëve në gjuhën e shenjave për qytetaret që nuk dëgjojnë;

– Miratuam Strategjinë Kombëtare për Mbrojtje nga Dhuna në Familje dhe Dhunën ndaj Grave 2022-2026;

– Për shpërndarje të barabartë të burimeve dhe mundësi të barabarta, miratuam koncept dokumentin për Buxhetimin e Përgjegjshëm Gjinor;

– Mbështetëm me 400,000 euro 10 strehimore për viktimat e dhunës në familje;

– Miratuam Strategjinë për Avancimin e të Drejtave të Komunitetit Rom dhe Ashkali 2022-2026;

– Themeluam Ekipin ndërinstitucional për nxitjen dhe promovimin e punësimit për komunitetet rom, ashkali dhe egjiptian në Republikën e Kosovës;

– Lansuam Platformën Kombëtare për Raportimin e Rasteve të Diskriminimit ndaj Komunitetit Rom, Ashkali dhe Egjiptian;

– Mbështetëm 123 projekte për biznese të vogla dhe start-up për komunitetet joshumicë

– Ndamë 300,000 € për bursa për nxënësit e komuniteteve rom, ashkali dhe egjiptian, 300,000 € për qendrat mësimore te fëmijëve rom, ashkali dhe egjiptianë dhe 350,000€ për punë me fëmijë me talente dhe fëmijë me nevoja të veçanta;

– Ndamë 96 grante për organizata për projekte nga të cilat përfitojnë komunitetet jo shumicë.

Sot, në zyrën e Sekretariatit të Përgjithshëm të Lëvizjes VETËVENDOSJE! u mbajt mbledhja me kryetarët e Qendrave të Rinisë për VETËVENDOSJE!.

Bashkëbisedim i hapur për punën e deritanishme të strukturave tona në terren, për situatën politike dhe planet për të ardhmen.

U diskutua mbarëvajtja e kampanjës “Bojkoto produktet e Serbisë”, e cila u zhvillua nga aktivistët e Rinisë për VETËVENDOSJE! gjatë muajit të kaluar. Jemi krenar me rezultat e vërejtëshme të kësaj kampanje, e në të njëjtën kohë diskutuam për çka na pret në muajt ne vijim.

Lëvizjes, ashtu si popullit tonë, përherë i kanë prirë të e rinjtë, të rejat e studentët. Ata kanë qenë prijës të zhvillimeve e të ndryshimeve të mëdha, siç po vazhdojnë të jenë edhe sot.

Viti 2023 do të jetë i jashtëzakonshëm për RVV-në me planet e aktivitetet që na presin. Entuziazmi e vullneti i aktivistëve po kanalizohet në intensifikim të punës gjithandej vendit.

Lëvizja VETËVENDOSJE! shprehë gatishmërinë vullnetare të aktivistëve e anëtarëve të saj për të ndihmuar bashkëqytetarët në zonat e vërshuara.

Të shqetësuar kemi përcjellë situatën me vërshimet e djeshme nëpër qytetet dhe fshatrat tona.

Teksa institucionet qendrore e komunale, emergjencat civile, Policia e FSK, mjekët, Instituti i shëndetit publik, punëtorët e ujësjellësve, po vazhdojnë të jenë në terren duke ndihmuar qytetarët që kanë pësuar nga kjo fatkeqësi, Lëvizja VETËVENDOSJE! shprehë gatishmërinë vullnetare të aktivistëve gjithandej komunave për të ndihmuar në rast nevoje.

Ndërkohë, ftojmë të gjithë qytetarët e vendbanimeve të prekura nga vërshimet që të qëndrojnë të informuar, t’i përcjellin dhe ndjekin udhëzimet e institucioneve tona e sidomos ato të IKSHPK-së lidhur me sigurinë e cilësinë e ujit të pijes.

T’i shmangemi zonave me rrezik të vërshimeve gjatë orëve në vijim. Atyre me potencial të rrëshqitjes së dheut. Të njoftojmë autoritetet sapo të vëmë re se dikush gjendet në rrezik dhe të lehtësojmë njoftimin e institucioneve për t’i dhënë sa më parë ndihmë atyre në nevojë.

E mbi të gjitha të sigurohemi që të jemi prezent në rast të kërkesës për ndihmë nga institucionet.

Qendrat Operative Emergjente janë prej ditës së djeshme të aktivizuara dhe për çdo urgjencë duhet të kontaktojmë në numrin emergjent 112.

Viti i kaluar ishte vit i hapave historik për agjendën tonë integruese dhe i konfirmimit të aleancave dhe orientimeve tona diplomatike:

– Në maj, aplikuam në Këshillin e Evropës;
– Në dhjetor, aplikuam për anëtarësim në BE;
– Nga 1 janari 2024, më së voni, hiqet regjimi i vizave për qytetarët e Republikës;
– Nënshkruam tre marrëveshje në kuadër të Procesit të Berlinit: për lëvizjen e lirë me letërnjoftime; njohjen e kualifikimeve të arsimit të lartë; dhe njohjen e kualifikimeve profesionale të mjekëve, dentistëve dhe arkitektëve;
– Themeluam Grupin Punues për anëtarësim në NATO;
– Vendosëm Marrëdhënie Konsullore me Poloninë, Marrëdhënie Diplomatike me Timorin Lindor dhe avancuam statusin e Zyrës së Kosovës në Greqi;
– Rreshtuam politikën tonë të jashtme me BE-në, ShBA-në dhe Britaninë e Madhe duke dënuar agresionin ushtarak rus ndaj Ukrainës dhe vendosur sanksione ndaj Federatës Ruse;
– Mirëpritëm 12 gazetarë ukrainas dhe ndamë mjetet për pesë tjerë afganë;
– Finalizuam reformën e brendshme dhe kthyem ligjshmërinë në ministrinë e Punëve të Jashtme dhe Diasporës
– Lansuam programin e parë për Diplomaci Qytetare në kuadër të së cilit janë përzgjedhur 10 profesionistë të rinj nga mërgata që po angazhohen në Ministrinë e Punëve të Jashtme dhe Diasporës;
– Blemë objektin e ambasadës në ShBA, ndërkaq jemi në proces të blerjes së objektit të ambasadës së Kosovës në Mbretërinë e Bashkuar;
– Zhvilluam platformën “Dialogu me Mërgatën” në 16 lokacione të ndryshme jashtë vendit, dhe lansuam programin për mërgimtarë “Shijo Kosovën” në 15 komuna të Republikës së Kosovës;
– Organizuam Samitin Digjital për Ballkanin Perëndimor “Prishtina 2022”, ngjarja më e madhe rajonale në sektorin e Teknologjisë së Informacionit dhe Komunikimit, me rreth 500 pjesëmarrës dhe më shumë se 60 folës;
– Së bashku me Presidencën, lansuam edicionin e parë të Forumit për Gratë, Paqen dhe Sigurinë;
– Prishtina u bë nikoqire e Samitit të Ballkanit Perëndimor 2022, organizim ky i revistës prestigjioze “The Economist”, në bashkëpunim me Zyrën e Kryeministrit.

Të vetëdijshëm për lidhjen e ngushtë mes popujve tanë dhe duke synuar ngritjen e bashkëpunimit shumë të mirë mes dy partive tona në një nivel të ri brenda frymës së bashkëpunimit dhe në interes të drejtësisë, solidaritetit dhe paqes, palët dakordohen për një sërë çështjesh thuhet në fillim të Memorandumit të Bashkëpunimit që u nënshkrua sot mes Lëvizjes VETËVENDOSJE! dhe Partisë Socialdemokrate zvicerane.

Bashkëpunimi mes dy partive tona do të jetë në nivel të organizimit, politikës së jashtme, udhëheqjes, dhe diasporës. Do të ndajmë dije dhe përvojë që lidhen me këto fusha njëherazi duke synuar politika promovuese dhe zhvillimore mes dy vendeve tona në ekonomi, përfshirje më të madhe të diasporës në jetën politike dhe institucionale, përshpejtim të proceseve integruese në institucione të BE-së, dhe mbështetje të ndërsjellë për zgjedhjet nacionale në të dy vendet tona.

Këtë memorandum në nivelin e liderëve partiak, e nënshkruan Kryetari i PS zvicerane, z. Cédric Wermuth dhe Kryetari i LVV, z. Albin Kurti, i cili ishte i shoqëruar nga Sekretari i Organizativ i LVV, z. Alim Rama dhe Drejtuesi i Sekretariatit për Marrëdhënie Ndërkombëtare nga LVV, z. Hajrulla Ceku.

Kemi miratuar dy nga projektligjet më të rëndësishme të reformës së administratës:

– Projektligji për Zyrtarët Publik; dhe
– Projektligji për Paga në Sektorin Publik.

Me Ligjin për Zyrtarët Publik kemi krijuar, ndër të tjera, të gjithë mekanizmat e duhur për:

– Rekrutime të hapura për të gjithë nga jashtë dhe brenda administratës publike;
– Rigjenerim dhe përforcim të kapaciteteve njerëzore (mërgata, praktika për të rinjtë e të rejat);
– Hapja e sistemit për pjesëmarrjen e grave dhe vajzave në pozitat drejtuese;
– Përfaqësimin e drejtë të komuniteteve në çdo kategori;
– Mundësi të barabarta për punësimin e personave me aftësi të kufizuara;
– Jetësim i konceptit të karrierës;
– Mundësi reale për ngritje në karrierë përmes mekanizmit të mandateve me kohë të caktuar në nivelet menaxheriale;
– Matje e drejtë e performancës dhe cilësisë.

Me Projektligjin për Paga në Sektorin publik:

– Dallimin mes pagës më të lartë dhe asaj më të ulët e kemi nivelizuar nga 20 herë, në vetëm 4.78 herë;
– Dallimi mes koeficientit më të lartë që është Presidentja, dhe ushtarit të FSK-së është vetëm 3.21 herë; dallimi mes pagës së Kryeministrit dhe ushtarit të thjeshtë është vetëm 2.93 herë;
– Dallimi në mes të Ministrit dhe policit të lartë është vetëm 2.77 herë, ndërsa dallimi mes Kryeministrit dhe policit të lartë është vetëm 2.88 herë;
– Dallimi në mes të kreut të shtetit, Presidentes dhe mjekut specialist është vetëm 1.5 herë;
– Mjeku specialist në institucionet shëndetësore është në të njëjtin raport me sistemin e drejtësisë në gjykatën dhe prokurorinë themelore, dhe të përafërt me Profesorin e rregullt.

Kemi përmirësuar furnizimin me barna: përqindja e furnizimit me barna nga Lista Esenciale e Barnave është rreth 70%, ajo me material shpenzues rreth 90% kurse furnizimi me insulina arriti në 100%.

Zgjeruam mbulimin e trajtimit me terapi nga lista komplementare (për fibrozë cistike).

Funksionalizuam Qendrën Kombëtare të Mjekësisë Sportive.

Funksionalizuam Klinikën e Mjekësisë Fizikale me Rehabilitim Mjekësor.

Hapëm depon e re qendrore të vaksinave.

Për herë të parë siguruam vaksinat kundër HPV.

Miratuam:

-Ligjin për sëmundjet ngjitëse;
– Koncept dokumentin për sëmundjet e rralla dhe atë për shëndetin mendor.

Me udhëzimin administrativ për licencimin e profesionistëve shëndetësorë të huaj lehtësuam procedurat e licencimit të profesionistëve të mërgatës, si dhe të atyre të trojeve të banuara me shqiptarë.

Të udhëhequr nga parimi se për një ekonomi të qëndrueshme nevojitet rritje e prodhimit vendor dhe përmirësim i infrastrukturës, gjatë vitit 2022:

Kemi ndarë mbi 70 milionë euro për 28 mijë fermerë nga 27 nën-sektorë të ndryshëm;

Kemi ndarë 8 milionë euro për plehërimin pranveror për grurë, misër, patate dhe fasule;

Për herë të parë kemi subvencionuar naftën për bujqit në vlerë prej 5 milionë euro;

Hartuam dhe miratuam Strategjitë dhe Planet e Veprimit për Bujqësi dhe Zhvillim Rural, dhe për Zhvillimin e Pylltarisë;

Kemi mbjellë 1 milion fidanë;

Kemi pyllëzuar 111 ha sipërfaqe të tokave pyjore;

Kemi rehabilituar dhe ndërtuar sistemin e ujitjes për 7,750 ha tokë bujqësore në vlerë prej 4.1 milionë euro për 8 komuna;

Më shumë se 100 milionë euro grante nga BE dhe Gjermania për trajtimin e ujërave të zeza dhe menaxhimin e mbeturinave;

Filluam punimet e fazës së dytë për rehabilitimin e linjës së 10-të hekurudhore Fushë Kosovë – Mitrovicë;

Nënshkruam marrëveshjen për ndërtimin e rrugës Pejë-Rozhajë dhe asaj Deçan-Plavë;

Miratuam marrëveshjen për bashkëfinancim të hartimit të projektit për rrugën Prizren-Tetovë;

Kemi përfunduar asfaltimin e rrugëve në veri të vendit, në Jasenovik, Syriganë, Cerajë, Koshtovë, Bistricë e Vllahisë, Dedi dhe Magjerë;

Miratuam Planin Hapësinor të Kosovës; Planin Hapësinor për “Parkun Kombëtar Sharri”, si dhe atë për “Bjeshkët e Nemuna”.

Në 24 vjetorin e Masakrës së Reçakut, Kryeministri, Albin Kurti, bashkë me presidenten, znj. Vjosa Osmani, Kryetarin e Kuvendit, z. Glauk Konjufca dhe ambasadorin z. William Walker, bënë sot homazhe tek Kompleksi Përkujtimor në Reçak.

Pas homazheve u mbajt Akademia Përkujtimore për Masakrën e Reçakut.

Kryeministri Albin Kurti në fjalën e tij drejtuar akademisë tha se ata të cilët e mohojnë gjenocidin ëndërrojnë përsëritjen e tij.

Kryeministri Kurti kujtoi se një krim i tillë nuk mund të fshihet e as të amnistohet.

“Ata të cilët e mohojnë gjenocidin, ata ëndërrojnë për përsëritjen e tij. Por, një krim kundër njerëzimit, e një gjenocid si ai që kryen forcat e Serbisë në Reçak me 15 janar, nuk mund të fshihet, nuk mund të mjegullohet dhe nuk mund të amnistohet.”

Ai tha se janë lëshuar fletarreste ndërkombëtare për 18 persona serbë që dyshohet për pjesëmarrje në kryerjen e masakrës së Reçakut.

“Duke u thirrur në dëshmitë e kohës në deklaratat e 63 dëshmitarëve të intervistuar dhe në provat e tribunalit të Hagës, Prokuroria Speciale e Kosovës ka lëshuar fletarreste ndërkombëtare për 18 persona serbë që dyshohet për pjesëmarrje në kryerjen e masakrës së Reçakut”, tha ai.

Tutje, Kryeministri Kurti u shpreh se shteti ynë nuk i amniston kriminelët dhe nuk i harron krimet e luftës.

“Sot në 24-vjetorin e masakrimit të 45 shqiptarëve nga forcat e Serbisë në Reçak, teksa kujtojmë dhe nderojmë të gjitha viktimat e asaj kohe të errët, më lejoni që para jush, nga pozita e Kryeministrit të Republikës së Kosovës t’iu them që shteti ynë demokratik nuk i amniston kriminelët dhe nuk i harron krimet e luftës.

Lavdi të gjithë dëshmorëve dhe martirëve tanë!

Gjaku i tyre është udhërrëfyes në rrugëtimin tonë politik.

Kemi qartësuar e trasuar rrugën për zhvillimin e Vetingut në sistemin e drejtësisë, bartës i së cilit do të jetë Kuvendi i Republikës;

Miratuam Strategjinë e Sundimit të Ligjit;

Miratuam Strategjinë Kombëtare për mbrojtje nga dhuna në familje dhe Planin e veprimit për vitet 2022-2026;

Lansuam Protokollin Shtetëror për Trajtimin e rasteve të Dhunimeve Seksuale;

Ndryshuam Kodin Penal për dënime plotësuese ndaj atyre që shpallen fajtor për dhunim seksual dhe dhunë në familje;

Komisioni i Venecias i ka aprovuar ndryshimet për Projektligjin për Byronë Shtetërore për verifikimin dhe konfiskimin e pasurisë së pajustifikueshme;

Është miratuar në Kuvend Projektligji për Këshillin Prokurorial të Kosovës;

Janë miratuar në lexim të parë Projektligji për Prokurorin e Shtetit dhe ai për Prokurorinë Speciale;

Është miratuar në lexim të parë Projektligji për Themelimin e Institutit për adresimin e krimeve të kryera gjatë luftës;

Miratuam Planin e Veprimit për zbatimin e projektit “Memoriali për fëmijët e vrarë gjatë luftës 1998-99 në Kosovë”.

Me synim mbrojtjen e sovranitetit dhe integritetit territorial, sigurinë publike, mbrojtjen e rendit kushtetues, gjatë vitit të kaluar:

Dyfishuam buxhetin për ushtrinë e Kosovës krahasuar me vitin 2021, ndërkaq në 2023 do të ketë rritje edhe për 20%;

Miratuam Strategjinë e Sigurisë 2022-2027;

Nënshkruam marrëveshje bashkëpunimi me Mbretërinë e Bashkuar, Shqipërinë, Malin e Zi, Maqedoninë e Veriut dhe Kroacinë. Janë në proces marrëveshjet SOFA me Gjermaninë, Turqinë dhe Kroacinë;

Janë rekrutuar 820 ushtarë të rinj dhe 30 kadetë;

Në proces të rekrutimit janë edhe 612 ushtarë aktiv dhe 388 rezervë;

Moshën e rekrutimit e kemi ngritur nga 23 në 25 vjeç;

Janë trajnuar jashtë vendit 2547 ushtarakë: 3 herë më shumë se në 2020, 16 herë më shumë se në 2019;

‘’Edukim në Siguri’’ do të jetë pjesë e kurrikulës shkollore.

Ky vit ishte vit i zhvillimit dhe përmirësimit të gjithmbarshëm, e veçanërisht në ekonomi:

Është rritur për 23% vlera e eksporteve. Janë eksportuar mallra në vlerë 801 milionë euro;

Janë rritur për 21,9% të hyrat tatimore. Në total 673,6 milionë euro;

Të hyrat e Doganave janë rritur për 11,4% në krahasim me vitin e kaluar. Në total: 1 miliardë e 381 milionë euro të hyra;

Investimet e huaja gjatë (janar – shtator) 2022 kanë arritur për herë të parë në 566,9 milionë euro ose rritje prej 43,6%, krahasuar me të njëjtën periudhë të vitit 2021;

Rritje për 67% të numrit të inspektimeve gjatë këtij mandati, me 2.830 inspektime gjatë vitit 2022;

Funksionalizuam Gjykatën Komerciale;

Subvencionuam kreditë e mbi 200 bizneseve prodhuese, me vlerë të kreditimit të mundësuar 87 milionë euro;

Mbështetëm 139 biznese me potencial eksportues me 9.8 milionë euro grante. 30% të përfitueseve janë vajza dhe gra;

Përkrahem 62 ndërmarrje përfituese përmes projektit “Iniciativa për fuqizim digjital”, ku 43% prej tyre janë në pronësi nga vajzat dhe gratë;

Promovuam 560 produkte vendore, duke mbështetur 83 ndërmarrje tona për pjesëmarrje në 13 panaire ndërkombëtare;

Negociuam 21 marrëveshje financiare në vlerë rreth 350 milionë euro, prej të cilave afro 140 milionë janë grante;

Mbështetëm Parkun e Inovacionit dhe Trajnimit në Prizren me 3 milionë euro;

Shtuam rezervat shtetërore të mallrave, si: gruri, vaji, sheqeri dhe nafta.

Në kujtim dhe nderim të Rexhep Malës dhe Nuhi Berishës

Në 39 vjetorin e rënies së Rexhep Malës dhe Nuhi Berishës, një delegacion i Lëvizjes VETËVENDOSJE! i prirë nga Kryetari i Gjilanit, Alban Hyseni, së bashku me ministra, deputetë dhe aktivistë të Lëvizjes, bënë homazhe te varrezat e dëshmorëve në Gjilan, ku vendosën lule të freskëta në kujtim dhe nderim të dëshmorëve që dhanë gjithë çfarë patën nga vetja e tyre për çlirimin e vendit tonë.

Ky delegacion vizitoi edhe kazermën e FSK-së që mban emrin e Rexhep Malës dhe Nuhi Berishës.

Lavdi Rexhep Malës dhe Nuhi Berishës, Lavdi për të gjithë dëshmorët e kombit.