Si VETËVENDOSJE! kemi kërkuar që qytetarët të ndihmohen nga buxheti i shtetit e jo të detyrohen t’i prekin kursimet e tyre në Trustin Pensional në këtë kohë krize. Sot, kjo qeveri e paligjshme bashkë me PDK-në e kaloi projektligjin që me para të taksapaguesve ndihmon bizneset që edhe ashtu kanë qenë të favorizuara kurse qytetarët i varfëron duke i shërbyer ata me kursimet e tyre edhe ashtu të mangëta. Madje me këto kursime e përmes tyre kjo qeveri po mundohet të zëvendësojë një detyrim të saj në kuptimin e ngritjes së kërkesës agregate. Kjo është shkelje e kushtetutës pasi shteti duhet t’i ndihmoj qytetarët në kohë krize dhe jo e kundërta. Tutje ky projektligj vetëm sa e rritë pabarazisë sociale e i favorizon milionerët dhe bizneset e tyre, thanë Hekuran Murati dhe Mimoza Kusari Lila, dy deputetët e Lëvizjes VETËVENDOSJE! në konferencën për media të mbajtur pas përfundimit të seancës.

—

Hekuran Murati tha se përmes këtij projektligji qeveria po synon t’i ndihmojë oligarkët dhe bizneset e afërta me ta.

“E kemi parë në të kaluarën, 60 milionëshi që është shpërndarë, kryesisht shumicën e mjeteve e kanë përfituar kompanitë, korporatat e mëdha të cilat jo domosdoshmërisht kanë qenë të mbyllura gjatë pandemisë por përkundrazi kanë pasur fitime rekorde siç janë supermarketet. Edhe tash, këto amendamentet e fundit e pamë që janë të dizajnuara për t’iu dedikuar një oligarku, një kompanie e cila operon në Kosovë, e që për më tepër kanë kërkuar amendamente që të lirohen nga tantiema apo renta minerare, që është shumë milionëshe dhe po ashtu të lirohen edhe nga pagesa e energjisë së ripërtrishme.”

Këto dy kosto, por edhe shumën e nxjerrë të 10%-shit do t’i bartë taksapaguesi i varfër i Kosovës andaj kjo assesi nuk mund të quhet rimëkëmbje ekonomike tha ai, duke theksuar se ky ligj merr para nga të varfrit dhe i orienton ato drejtë të pasurve e oligarkëve në vend.

Deputetja Kusari-Lila tha se ky ligj është gjithçka përveçse ligj për rimëkëmbjen ekonomike dhe e bëri një krahasim të tij me Pakon Emergjente të Qeverisë Kurti.

“Ligji për rimëkëmbje është gjithçka përveçse ligj për rimëkëmbje. Për dallim nga Pakoja Emergjente e Qeverisë Kurti e cila e ka shpërndarë ndihmën për të gjitha kategoritë, kjo pako së pari nuk e ka transparencën, nuk e ka formën që përshkruan se sa mjete shkojnë në secilin sektor as në aspektin e industrisë dhe as në aspektin e shërbimeve. Nuk e inkurajon sektorin prodhues e as ndonjë sektorë në veçanti. Ka shumë sektorë ekonomik në Kosovë të cilët gjatë kohës së pandemisë kanë ardhur me forma kreative të të bërit biznes po nuk ka stimulim të tyre. Nuk ka stimulim as të kompanive shërbyese e as të Startup-ave por ka vetëm pako të përgjithësuara në shuma milionëshe që nuk barazohen mes vete. As nga propozuesit dhe as nga kjo qeveri e paligjshme nuk mund të thuhet se cilat biznese do të përfitojnë nga vlera e përgjithshme e kësaj pakoje.”

Spitaleve të mbingarkuara me pacientë me COVID-19, po u shtohet edhe mungesa e oksigjenit. Ditëve të fundit, sikurse muajve të fundit, janë raportuar raste të shumta të vështirësive deri në mbetje pa oksigjen medicinal të spitaleve rajonale.

Fshehtësia dhe papërgjegjësia e qeverisë, ministrit dhe SHSKUK e Agjencioneve përgjegjëse po i kushtojnë vendit me jetë të humbura. Oksigjeni medicinal është element i domosdoshëm në përballje me COVID-19 për pacientët e shtrirë nëpër klinika.

Gjendja është e rëndë dhe institucionet përgjegjëse duhet të ndërmarrin veprimet për të garantuar furnizim të rregullt e mbi të gjithë të pandërprerë me oksigjen medicinal dhe nga kompani që i përmbushin të gjithë kriteret duke i mbikëqyrur pa ndërprerë.

Sot, disa nga deputetët e Lëvizjes VETËVENDOSJE! në përgjigje të kërkesave të panumërta të qytetarëve nga gati të gjitha komunat e Kosovës, si dhe deputetët nga komisioni për shëndetësi, kanë ndërmarrë një protestë simbolike para Ministrisë së Shëndetësisë për t’i kujtuar se qytetarët po përballen me rrezik të dyfishtë, kurse punonjësit shëndetësor me vështirësi në punën e tyre, nga mungesa e oksigjenit.

Një delegacion nga Lëvizja VETËVENDOSJE!, i kryesuar nga kryetari i Lëvizjes, Albin Kurti, sot në ditën e 28 Nëntorit, bënë homazhe tek memoriali i familjes Jashari, 59 anëtarët e së cilës ranë heroikisht duke i dhënë hovin vendimtar çlirimit të Kosovës.

Pas homazheve në Prekaz, kryetari Kurti tha se Skënderbeu në Krujë, Ismail Qemali në Vlorë dhe Adem Jashari në Prekaz, përbëjnë tre ngjarje historike që të përbashkët kanë 28 Nëntorin e që përkon me gurëthemelin e identitetit kombëtar shqiptar. Në mungesë të kryetarit të Grupit tonë Parlamentar, Rexhep Selimi, por në praninë e bashkëshortes së tij, Shqipe Selimi, pas homazheve në Prekaz, ky delegacion vizitoi edhe familjen e tij në Prishtinë. Nga aty, homazhe bënë edhe tek lapidari dhe varrezat e dëshmorëve në Llap, për të vazhduar tek shtatoret e heronjëve Edmond Hoxha, Hakif Zenjullahu, Zahir Pajaziti dhe Ilir Konushevci e Ali Ajetit në Besianë. 

Kurse në anën tjetër, një delegacion tjetër i përbërë nga anëtarë të kryesisë së Lëvizjes VETËVENDOSJE! bënë homazhe e nderime te shtatorja e Ismail Qemalit dhe ajo e Zahir Pajazitit në Prishtinë, busti i Isa Kastratit e pllaka përkujtimore për Afrim Zhitinë e Sokol Sopin, varrezat e dëshmorëve në Prishtinë dhe te varri i veprimtarit Adem Demaçi.

Dy delegacionet u takuan në Prishtinë për të bërë së bashku nderime tek lapidari i Demostratave për Republikë dhe Vetëvendosje për Kosovë dhe viset shqiptare të vitit 1968.

Ngjarje, personalitete, veprimtarë të kombit tonë në periudha të ndryshme, në beteja politike e ushtarake, në paqe e në luftë, në okupim e në lëvizje ilegale ose legale, të gjithë e kanë 28 Nëntorin pikë referuese dhe synim të përmbushjes së idealit që kjo datë përfaqëson. Kështu do të mbetet për shqiptarët kudo që janë.  

Në selinë e Lëvizjes VETËVENDOSJE!, kryetari i saj, Albin Kurti, bashkë me deputetin e Lëvizjes, Fitim Uka pritën fëmijë, prindër dhe përfaqësues të shoqatës “Autizmi” të themeluar në vitin 2011, si dhe një pjesë të ekipit multidisciplinar të përbërë nga psikologët, logopedët dhe ergoterapeutët që ofrojnë për çdo ditë terapi individuale dhe grupore për këta fëmijë.

Autizmi nuk mund ta definojë një person. Secili fëmijë është unik dhe ata i definon vetëm puna dhe angazhimi i tyre. Por, autizmi mund ta bëjë jetën e një personi të vështirë. Prandaj, duhet mbështetja e të gjithëve për të lehtësuar këtë rrugëtim dhe për ta bërë të veçantë secilin hap të jetës së tyre.

Kryetari Kurti pranoi dhurata të veçanta të punuara nga fëmijët e shoqatës “Autizmi”. Ato që janë edhe dëshmia më e mirë se identifikimi i hershëm i autizmit dhe intervenimi profesional kulmojnë me punën e pavarur të fëmijëve dhe e nxjerrin në pah edhe kreativitetin e tyre unik. Përpos tyre, u shkëmbyen edhe urime për Ditën e Flamurit kombëtar e të Pavarësisë së Shqipërisë, 28 Nëntorin.

Sidoqoftë, përkundër punës së shkëlqyeshme që bëjnë shoqatat dhe organizatat që punojnë me fëmijët me autizëm, që të gjitha pa dallim ballafaqojnë sfida dhe vështirësi të ndryshme. Jo vetëm mungesa e financave të qëndrueshme, hapësirave të përshtatshme për punë, por edhe mungesa e kuadrove të trajnuara e specializuara janë nevoja urgjente që duhet të adresohen.

Ashtu siç kemi bërë në qeverisjen tonë do të vazhdojmë që të punojmë edhe në qeverinë e ardhshme dhe në Kuvend, që shoqatat dhe organizatat e personave me nevoja të veçanta të kenë gjithë përkrahjen e duhur institucionale.

Sot, kryetari Lëvizjes VETËVENDOSJE!, z. Albin Kurti, i shoqëruar nga ushtruesi i detyrës së Kryetarit të Grupit Parlamentar të Lëvizjes, z. Liburn Aliu, dhe deputetja, znj. Fitore Pacolli, priti në takim Shefin e Zyrës së Bashkimit Evropian/Përfaqësuesin e Posaçëm të BE-së, ambasadorin Tomas Szunyog, zëvendësin e tij, z. Riccardo Serri, dhe këshilltaren politike, znj. Blerta Bejtullahu.

Gjatë takimit u diskutua situata aktuale politike në Kosovë, dhe çështja e zgjedhjes së presidentit. Kryetari Kurti theksoi se është tejët e rëndësishme që presidenti i ri të zgjedhet pasi që të kenë folur qytetarët në një proces të ri demokratik zgjedhor. Kjo për arsye se qeveria e tanishme nuk ka legjitimitet dhe Kuvendi i Kosovës është bërë jofunksional. Kur nuk kemi keqqeverisje është mosqeverisje. Kjo qeveri nuk është në gjendje ta drejtojë vendin drejt zhvillimit ekonomik dhe integrimit në BE. Uniteti i korpusit politik vjen pas zgjedhjes së një qeverie me legjitimitet qytetar. Njëherë legjitimitet, pastaj unitet.

Ambassador Szunyog nënvizoi rëndësinë e funksionimit demokratik të institucioneve, një Kuvendi të aftë për të miratuar ligje, nevojën e vazhdimit të dialogut me Serbinë, dhe nevojën për avancimin dhe zbatimin e agjendës së MSA-së.

Kryetari Kurti bëri të ditur se agjenda evropiane e shtetit tonë është e rëndësishme për zhvillim dhe avancim të shtetit të Kosovës. Tani kur Kosova po përballet me pandeminë COVID-19 dhe ndikimi që ajo po ka në ekonomi, më së shumti kemi nevojë për politika zhvillimore dhe mbështetëse për qytetarët dhe bizneset në vend. Ndërsa, për dialogun Kosovë-Serbi është i domosdoshëm një fillim i ri që procesi të ketë kredibilitet. E për këtë, duhet të ndodh demokratizimi dhe evropianizimi i dialogut, zëvendësimi i qasjes transaksionale me atë transformuese dhe transatlantike.

Të dyja palët u pajtuan se është e nevojshme dhe e dobishme që të vazhdojnë komunikimin dhe bashkëpunimin.

Përmes një konference për media të mbajtur sot, nënkryetari Besnik Bislimi i shpalosi rezultatet e një sondazhi të mbajtur nga data 12 nëntor deri me datë 15 nëntor, 2020, që kanë të bëjnë me zgjedhjet në Podujevë. Sondazhi me marzhë të gabimit +- 5%, ku 1/3 e të anketuarve janë nga zona e qytetit, dhe 2/3 nga zonat rurale, duke marrë për bazë edhe strukturën gjinore të votuesve, e nxjerrë si fitues Shpejtim Bulliqin me 46.8%. Ky sondazh i bërë para intensifikimit të fushatës tregon që numri i pjesëmarrësve në votim do të jetë më i lartë se më herët, tregon një përkrahje të lartë të rinisë për kandidatin Bulliqi dhe një lëvizje të votuesve sidomos nga LDK-ja drejt VETËVENDOSJE!-s.

Nënkryetari Besnik Bislimi i prezantoi të dhënat e më poshtme që janë në interes të publikut, por pa hyrë në detajet që janë për përpunim të brendshëm.

Pyetja e parë ka të bëjë me atë se si e perceptojnë qytetarët kandidatin e Podujevës, ku të anketuarit kanë mundur të zgjedhin prej 1 deri në 5 dhe e kemi këtë rezultat: Shpejtim Bulliqi del të jetë kandidati më i preferuar i qytetarëve të Podujevës apo votuesve ku ata e kanë votuar me 3.5 që është jashtëzakonisht notë e mirë për një kandidat, kurse kandidati i dytë ikën bukur shumë poshtë kandidatit Bulliqi.

Pyetja tjetër ka të bëjë me gatishmërinë e qytetarëve për të marrë pjesë në zgjedhje. Nuk di të kem parë ndonjë sondazh ku vendosmëria e qytetarëve për të marrë pjesë në zgjedhje është kaq e madhe sa në zgjedhjet e 29 nëntorit. 88.8% janë të sigurte që do të marrin pjesë në zgjedhje dhe 8.8% që ndoshta do të votojnë, kurse numri i atyre që nuk do të dalin është shumë i vogël apo nën 3%. Kjo tregon se qytetarët e Podujevës e kanë kuptuar se sa i rëndësishëm është votimi i ditës së diel dhe sa e rëndësishme është vota e secilit prej për rezultatin final, tha Bislimi.

Nëse e marrim vetëm votën e deklaruar dhe i largojmë ata që kanë deklaruar që nuk do të votojnë, bashkë me ata që nuk e kanë deklaruar votën, atëherë shpërndarja e rezultateve të anketës është si vijon: 46.8% të votave do të shkonin për profesorin Shpejtim Bulliqi kundrejt 42% për kandidatin e LDK-së dhe në fund është kandidati i PDK-së me 11.2%.

Këto janë rezultate të datës 15 nëntor, ne besojmë që situata është dukshëm më e mirë, falë angazhimit maksimal të kandidatit Bulliqi dhe të Kryesisë e Grupit Parlamentar, tha Bislmi, i cili edhe theksoi se kjo mes tjerash tregon që edhe brenda marzhës së gabimit është shumë e mundur që zgjedhja e kryetarit të Podujevës të përfundojë të dielën, do të thotë nuk do të ketë nevojë për balotazh. Ky është edhe mesazhi kryesorë që ne po ua përcjellim edhe votuesve, që me pak angazhim gjithçka të përfundojë me 28 nëntor, në mënyrë që mos t’i mundojmë qytetarët me balotazh e as arkën e shtetit me shpenzime shtesë, tha ai.

Një detaj tjetër që Bislimi e ndau ka të bëj me mbështetjen e madhe që kandidati Shpejtim Bulliqi ka te moshat e reja. Tek mosha nën 24 vjeç, 54.1% e votuesve deklarojnë se do ta votojnë Shpejtim Bulliqin kundrejt 37.8%. Po ta marrim pastaj këtë e ta shikojmë me përqindje relative i bie që tek të rinjtë nën 24 vjeç ka 43% më shumë përkrahje sesa kandidati i LDK-së. Njësoj është gjendja edhe tek moshat 25-34 vjeç ku Shpejtim Bulliqi ka mbi 50% të votave, me 51.5%. Kjo tregon që nëse themi se e ardhmja i takon rinisë atëherë rinia tashmë ka vendosë se si dëshiron të qeveriset në të ardhmen. Ndërkaq rezultati është pak a shumë i njëjtë si për gjininë mashkullore ashtu edhe për femërore, nuk ka ndonjë ndryshim të madh.

Informacioni tjetër është për lëvizjet e mëdha që kanë ndodhur te votuesit në Podujevë. Mendoj që Podujeva nga viti 2000 nuk ka pasur zhvendosje më të madhe të votuesit sesa tani. Sipas këtij sondazhi shumica e elektoratit është duke u zhvendosur në drejtim të Lëvizjes VETËVENDOSJE!, sidomos i madh është zhvendosja e votuesve nga LDK-ja, tha Bislimi. Kandidati i LDK-së e ka vetëm 70% të përkrahjes që e kishte kandidati paraprak i LDK-së në vitin 2017. Pjesa më e madhe e atyre që kanë ikur nga LDK-ja, apo mbi 80% kanë shkuar drejt Lëvizjes VETËVENDOSJE! Do të thotë 80% e elektoratit që e ka votuar LDK-në në vitin 2017 dhe ka vendosur që mos ta votoj më, ka shkuar te Lëvizja VETËVENDOSJE! Ngjashëm është situata edhe me subjektet tjera politike. E shihni p.sh., 21% e votuesve që kanë votuar PDK-në në vitin 2017, tani do ta votojnë LDK-në, 100% të AAK-së do ta votojnë Lëvizjen VETËVENDOSJE! dhe e njëjta vlen për Fjalën edhe NISMA-n, ku më shumë se gjysma e tyre kanë deklaruar se do ta votojnë Shpejtim Bulliqin.

Ndërkaq është interesant të shihet që nga votuesit që kanë deklaruar se do ta votojnë VETËVENDOSJE!-n në vitin 2017, po thuajse të gjithë kanë qëndruar në Lëvizjen VETËVENDOSJE! që do të thotë e kanë vlerësuar konsistencën, qëndrimet e përfaqësuesve të Lëvizjes VETËVENDOSJE!

Në fund, nënkryetari Bislimi shprehu bindjen që situata do ta marr një epilog me datë 29 nëntor, për arsye se rezultati është brenda marzhës së gabimit dhe për shkak se janë rezultate para intensifikimit të fushatës. Përmes pyetjeve del se edhe nëse do të kishte balotazh mes dy kandidatëve, prapë do të fitonte Shpejtim Bulliqi. Nëse e marrim vetëm votën e deklaruar që është 93.9% atëherë del që 52.8% do të votonin për Shpejtim Bulliqin, e ne mendojmë se në balotazh kjo do të ishte më shumë se 55% në rast se ka nevojë të shkohet në balotazh, tha Bislimi.

Kryetari i Lëvizjes VETËVENDOSJE!, z. Albin Kurti, së bashku me nënkryetarin, z. Besnik Bislimi, sot zhvilluan një bashkëbisedim virtual me ambasadorin e Shteteve të Bashkuara të Amerikës, z. Philip Kosnett, dhe dy këshilltaret e tij, znj. Amy Carnie dhe znj. Mia Ter Haar.

Gjatë këtij takimi diskutuam rreth shumë temave, me fokus në situatën aktuale politike në Kosovë dhe marrëdhëniet bilaterale mes dy vendeve tona, si dhe gjendjen e rëndë me pandeminë dhe Gjykatën Speciale.

Të dyja palët u pajtuan që të vazhdojnë komunikimin.

Në hapje të fushatës zgjedhore për zgjedhjet e parakohshme në komunën e Besianës, Lëvizja VETËVENDOSJE! sot mbajti një konferencë për medie më kryetarin e saj, Albin Kurti dhe kandidatin e saj për kryetar në këtë komunë, profesorin dhe deputetin Shpejtim Bulliqi.

Llapi gjithmonë ka qenë në ballë të qëndresës e të çlirimit, kurse tani e tutje është koha që të jetë edhe në ballë të zhvillimit. Fitorja e jonë dhe juaja përmes Lëvizjes VETËVENDSOSJE! do të jetë pikërisht hapi i parë në atë drejtim, tha profesori Bulliqi. Ai foli për nevojat e komunës së Besianës dhe qytetarëve të saj. Për projektet infrastrukturore të cilat asnjëherë nuk u realizuan sado që shpesh herë janë premtuar nga qeverisja keqe e deritanishme. Për bibliotekën e qytetit, për hapësira kulturore, sportive e rekreative për të rinj, për mungesën e një spitali të qytetit, për gjendjen e dobët në shkolla, për rrugët e punuara keq dhe pa trotuar për shkak të cilave aksidentet rrugore janë të shpeshta e madje edhe tragjike. Me qeverisjes e Lëvizjes VETËVENDOSJE! në Besianë dhe me kryetar profesorin Shpejtim Bulliqi punësimet do të bëhen në baza profesionale, e jo në baza partiake e familjare siç janë bërë deri sot. Për këtë, profesori Bulliqi tha se do të kujdeset që procesi i aplikimit e konkurrimit të jetë sa më transparent, duke i publikuar konkurset për punësime në komunë edhe në faqën e tij. Si kryetari i ardhshëm i komunës së Besianës, profesori Bulliqi do të jetë kryetar i të gjithëve, i hapur e i qasshëm për të gjithë qytetarët e komunës dhe më bashkëpunuesi nga të gjithë kryetarët që ka pasur ndonjëherë Podujeva. “Unë e di se partitë e vjetra bëhen shpejtë bashkë e janë bërë bashkë”, tha profesori Bulliqi, “por ata janë më pak se sa qytetarët që e duan ndryshimin”. E ndryshimi dhe fitorja drejt ndryshimit e ka numrin 12, përfundoi profesori Bulliqi.

“Këto zgjedhje të jashtëzakonshme, kërkojnë një subjekt të jashtëzakonshëm si Lëvizja VETËVENDOSJE! dhe një kandidat të jashtëzakonshëm si profesori Shpejtim Bulliqi”, nënvizoi kryetari i Lëvizjes Albin Kurti. Ai tregoi se më profesorin Bulliqi është lidhur shumë gjatë kohës së kundërshtimit të përbashkët të marrëveshjes për kufirin ndërshtetëror më Malin e Zi. Gjatë asaj kohe, profesori Bulliqi me integritetin e tij personal e profesional nuk ka lejuar që as ofertat e mira e trusnitë e këqija ta lëkundin atë nga pozicioni i tij, duke i qëndruar besnik interesit shtetëror dhe të vërtetës shkencore. “Ky vyrtyt e kjo qëndresë e profesorit Bulliqi, më bën të jem ballëhapur ndaj çdokujt që e takoj këtu në Llap”, tha kryetari Kurti. Qeverisja e Lëvizjes VETËVENDSOSJE! në Podujevë dhe kryetari i ardhshëm Bulliqi do të përkushtohen për një administratë publike profesionale, të paanshme e të përgjegjshme, për arsim cilësor sepse në shërbim të zhvillimit, rekrutim të personelit civil mbi baza profesionale, për zhvillim bujqësor përmes mbështetjes së fermerëve, për planifikim urban, për politika ambientale dhe zgjerim të hapësirave të gjelbra, dhe për infrastrukturë të domosdoshme. Këto zgjedhje të parakohshme janë shancë për ndryshime edhe në Llap me qëllim që të arrijmë të dalim nga kriza e shumëfisht, jo vetëm shëndetësore por edhe socio-ekonomike, tha në fund kryetari Kurti.

Lëvizja VETËVENDOSJE! mbajti sot një konferencë për media në oborrin e Kuvendit të Kosovës, ku ushtruesi i detyrës së Kryetarit të Grupit Parlamentar të saj, Liburn Aliu, kërkoi shkarkimin e zv. kryeministrit, Driton Selmanaj. Arsyeja për kërkesën për shkarkim të Selmanajt deputeti Liburn Aliu tha se janë deklaratat e fundit të Driton Selmanajt në interpelancën për të pagjeturit të cilat u zgjeruan më pas në televizionet e Kosovës.

“Një qëndrim i tillë është i papranueshëm. Së pari nga pikëpamja morale, së dyti sepse është në mungesë të thellë respekti ndaj viktimave dhe familjarëve të tyre, së treti sepse dëmton në mënyrë të pakorrigjueshme pozicionin shtetëror të Kosovës kudo”, tha Aliu. Duke kujtuar që kjo qeveri e paligjshme vazhdon të jetë e kontestuar në Gjykatën Kushtetuese, Aliu tha se qëndrimet e Driton Selmanajt janë përtej çdo çështje që kemi në raport me formimin e qeverisë pa zgjedhje.

“Çështja e personave të pagjetur nuk është çështje subjekti politik apo individi, por është çeshtje dhe dhimbje që prek të gjithë qytetarët e kësaj Republike. Bashkë me dëshmorët,  dhe të gjithë kontribuesit për lirinë e vendit, çështja e personave të pagjetur, përbën shtyllë identitare të shtetit të Kosovës dhe vlerë të paprekshme. Andaj dhe në këtë pikë nuk mund të ketë tolerancë”, tha ai. Duke iu referuar reagimit qytetarë, indinjatës së madhe në shoqëri për shkak të qëndrimeve të shprehura nga Selmanaj, Liburn Aliu tha se ai nuk është më i mirëseardhur në Kuvendin e Kosovës dhe kërkoi shkarkimin e tij. “Çdo ditë që kalon pa marrë masa për largimin e Driton Selmanajt nga pozicioni i zëvendëskryeministrit nga Qeveria e Republikës së Kosovës është dëmtim përveçse dhe fyerje për viktimat e krimeve të Serbisë në Kosovë. Ndaj, i apostrofuari këtu në Kuvend nuk është i mirëseardhur, ky dhe është qëndrimi ynë, në solidarizim me indinjatën e thellë të qytetarëve dhe familjeve të viktimave. Presim që sa më parë, të njëjtin të largojnë pra shkarkojnë nga pozita zyrtare që mban.”

Në javën që lamë pas, në Hagë, në atë që po e quajmë Gjykatë Speciale, u paraqitën dhe thanë fjalët e tyre hyrëse ish zëdhënësi i UÇK-së, Jakup Krasniqi, ish Drejtori i Drejtorisë Politike të UÇK-së, Hashim Thaçi, ish Drejtuesi i Shërbimit Inteligjent të UÇK-së, Kadri Veseli dhe ish Inspektori i Përgjithshëm i UÇK-së, Rexhep Selimi.

Ne kemi folur gjerë e gjatë për Gjykatën Speciale në këto shtatë vjetët e fundit dhe nuk ka nevojë të përsëritemi këtu. Kosova ka pasur vazhdimisht gjykata speciale, njëherë UNMIK-un e Tribunalin e Hagës, pastaj EULEX-in, edhe prokuroria e gjykatat në Kosovë përgjithësisht kanë qenë bukur speciale me pasivitetin e tyre, por kjo gjykata e fundit tash, sërish në Hagë, sigurisht se është më specialja.

Jo çmimin e lirisë, por çmimin e gabimeve politike jemi duke e paguar tani. Në njërën anë, UÇK-ja është lënë jashtë Deklaratës së Pavarësisë dhe Kushtetutës së Republikës, ndërkaq, në anën tjetër, kjo Gjykatë e cila ju sipërvendos shtetit, me votat e 82 deputetëve u pranua të bëhet pjesë përbërëse e Kosovës përmes amendamentimit të kushtetutës më 3 gusht të vitit 2015.

Sigurisht se është Gjykatë e padrejtë dhe e njëanshme në raport me UÇK-në si palë dhe me etninë tonë shqiptare si përkatësi. Ngrehina e kësaj gjykate shkon kundër kujtesës sonë individuale e kolektive, kundër përvojës sonë njerëzore e politike.

Në veçanti, sot, po ndalem në dy elemente të rëndësishme të aktakuzës kundër Krasniqit, Thaçit, Veselit e Selimit.

Ajo çfarë pretendon prokuroria në aktakuzë është se në UÇK ka ekzistuar një grup kriminal përbrenda, me shprehjen që ia përcakton kjo prokurori si Ndërmarrje e Përbashkët Kriminale. Pra, njëfarë strukture paralele kriminale brenda UÇK-së, thua se kemi pasur edhe UÇK edhe NPK! Edhe Ushtri Çlirimtare të Kosovës edhe njëlloj Ndërmarrje të Përbashkët Kriminale aty. Prokuroria e ka gabim. Nuk ka pasur strukturë të tillë paralele kriminale. UÇK-ja kishte Shtabin e Përgjithshëm dhe Drejtoritë përkatëse, Zyrën e Përfaqësuesit të Përgjithshëm Politik, Adem Demaçi, Zonat Operative, brigadat e batalionet e njësitë etj. që i dimë të gjithë, e jo aty tash një strukturë paralele siç pretendon prokuroria. Ky lajmi më i ri në Kosovë, për njëfarë NPK-je brenda UÇK-së, nuk është i vërtetë.

Më tej, për ta vërtetuar kjo prokurori që paska ekzistuar kjo strukturë paralele të cilën e quan ndërmarrje e përbashkët kriminale, ajo natyrisht se është dashur të thotë se ka pasur një qëllim paralel. Insinuata për strukturën paralele nuk është e mundshme pa shpikjen e një qëllimi paralel. Prandaj, sipas prokurorisë, qëllimi nuk ishte më ai i UÇK-së e që është çlirimi i Kosovës, por qëllimi i kësaj ndërmarrjeje, i atij grupi, e i asaj strukture, na paska qenë të fitojë dhe ushtrojë kontroll gjithandej në Kosovë. Dhe, madje, kjo qysh nga marsi 1998. Po të thuhej që ndokush prej këtyre ka pasur për qëllim kontrollin në mars të vitit 2008 apo në mars të vitit 2018 edhe mund të besohet, por kurrsesi në mars të vitit 1998 siç pretendon prokuroria. Çlirimi ishte qëllimi, dhe jo fitimi e ushtrimi i kontrollit.

Në Hagë, nuk janë duke u përndjekur vetëm individët, por as nuk mund të mbrohen të pandehurit vetëm si individë. Shteti i Kosovës duhet ta organizojë e ta koordinojë mbrojtjen e të pandehurve. Ata e pamë se i kanë avokatët e tyre secili, mirëpo nevojitet bashkërendimi nga shteti. UÇK-ja nuk ka qenë e asnjërit por e të gjithëve dhe që të gjithë duhet ta mbrojmë atë. Me fjalë të tjera, kjo është edhe punë qeverie, kjo është sidomos punë qeverie. Është qeveria e Kosovës ajo që duhet të angazhohet për sintezën e përfaqësimit dhe mbrojtjes në këtë proces. Mbrojtja dhe përfaqësimi duhet të bashkërendohen e të sintetizohen. Për fat të keq në këtë kohë të vështirë, Kosova nuk ka një qeveri që mund ta bëjë këtë. Kjo qeveri e paligjshme e cila që nga fillimi varej prej secilit deputet të Listës Serbe e që tash është veçse qeveri e pakicës që po tkurret përditë, nuk mund ta mbrojë e shpëtojë as vetveten, se lëre më ndokënd tjetër. E keni parë se si preokupimi i saj në këtë muaj ishte eliminimi i Task Forcës kundër korrupsionit, e jo mbrojtja e UÇK-së në arenën ndërkombëtare e në Gjykatën Speciale.

Ne duhet të jemi bashkë për luftën tonë çlirimtare dhe kundër Serbisë e cila nuk na njeh sepse është e papenduar për krimet e kryera. Janë bërë shumë gabime në të kaluarën në Kosovë. Nuk kemi pse të bëjmë gabime të reja.

* * *

Pyetjet nga gazetarët:

G: A ju ka ftuar kryeministri Hoti për të biseduar rreth postit të presidentit për shkak se të premten e kaluar në Argument Plus ka paralajmëruar se do t’i ftojë partitë? Edhe një pyetje nëse ka mundësi, a keni biseduar me Ramushin ose me PDK-në për postin e presidentit?

AK: Ne konsiderojmë që nuk mund të ketë unitet pa legjitimitet. Presidenti ose Presidentja e re duhet të përfaqësojë unitetin e popullit. Dhe kjo nuk mund të bëhet në kushtet kur kemi një qeveri të paligjshme. Unë nuk kam pasur takime për çështjen e zgjedhjes së presidentit. Kosova ka Ushtrues Detyre të Presidentit, pra, nuk është e zbrazët ajo karrige edhe për së paku 6 muaj teorikisht në bazë të Kushtetutës tonë. Por, pas zgjedhjeve të reja mund të kemi president të ri, dhe, qeveria e vjetër nuk e ka as legjitimitetin, as autoritetin, as kredibilitetin për iniciativa të tilla.

G: A pritet që zgjedhjet të jenë opsioni i vetëm dhe kur eventualisht mund të mbahen ato zgjedhje?

AK: Ne besojmë se zgjedhjet duhet të mbahen sa më parë meqenëse çdo ditë vonesë është ditë e fituar për të korruptuarit dhe një ditë më pak për qytetarët e vendit tonë. Jemi të interesuar që këto zgjedhje të jenë një orë e më parë, apo, siç thotë populli ynë: qysh dje. Por ju e dini që kjo nuk varet vetëm prej Lëvizjes VETËVENDOSJE! e cila ka si grup parlamentar 31 deputetë që janë të pamjaftueshëm pa të tjerë për ta shkaktuar zgjedhjet e reja nëpërmjet rrëzimit të kësaj qeverie.

G: Kryeministri i Shqipërisë, Edi Rama, para disa ditësh në një emision televiziv ju ka akuzuar juve dhe z. Haradinaj, po e citoj: “e kanë dëmtuar Kosovën në luftën diplomatike qoftë njëri, qoftë tjetri, janë treguar sylesh dhe të paaftë në atë luftë”. Cili është komenti juaj për këtë?

AK: Është e qartë, ka kohë që me kryeministrin e Shqipërisë, z. Edi Ramën, ne nuk kemi të njëjtin qëndrim sa i përket presidentit të Serbisë. Pra, kjo është një pikë e rëndësishme në të cilën ne dallojmë fort. Fatkeqësisht kryeministri i Shqipërisë nuk guxon ta thotë të vërtetën për presidentin e Serbisë, për çfarë motivesh e arsyesh unë nuk jam në gjendje ta them. Ne duhet të bashkohemi për luftën çlirimtare, për Ushtrinë Çlirimtare të Kosovës, por edhe kundër Serbisë e cila është kundër nesh. Nuk do të mund të bashkohemi si komb, nuk do të mund të bashkëpunojmë si shtete me qëndrime të ndryshme karshi Serbisë. Kosova dhe Shqipëria, nuk e kanë jo vetëm luksin, por as të drejtën që të dallojnë sa i përket Beogradit. Unë besoj që mospajtimet tona vijnë nga ky dallim. Dallimi thelbësor është te qëndrimet e ndryshme që i kam unë dhe kryeministri i Shqipërisë për presidentin e Serbisë. Ai po përpiqet që krimet e Serbisë t’i lokalizojë në figurën e Milosheviqit. Kjo është e padrejtë ndaj Kosovës dhe kombit shqiptar. Prandaj, edhe kryeministrit të Shqipërisë, por sidomos Kuvendit të Shqipërisë i bëjë thirrje që ashtu siç e ka miratuar Kuvendi i Republikës së Kosovës rezolutën për dënimin e gjenocidit në Kosovë, ta bëjë edhe Kuvendi i Republikës së Shqipërisë.

* * *

Njoftim nga Kryetari Albin Kurti:

Tash e tutje Grupi Parlamentar i Lëvizjes VETËVENDOSJE! do ta ketë si Ushtrues Detyre deputetin Liburn Aliu i cili do ta zëvendësojë Kryetarin tonë të Grupit Parlamentar, Rexhep Selimi. Ne nuk do të zgjedhim kryetar të ri, nuk kemi pse nxitohemi, ne e kemi kryetarin, Rexhep Selimin, por funksionalisht detyrën e tij do ta kryej tash e tutje Liburn Aliu. Këtë e kemi diskutuar dhe vendosur në Kryesi e në Grupin tonë Parlamentar. Përndryshe, unë dy herë në këto ditët e fundit kam biseduar me kryetarin e Grupit tonë Parlamentar, Rexhep Selimin, dhe ai të gjithë qytetarët, aktivistët e juve gazetarë ju përshëndet e ju bën të fala. 

Sot, deputetja e Lëvizjes VETËVENDOSJE! dhe Kryetarja e Komisionit për Çështje të Sigurisë dhe të Mbrojtjes, znj. Fatmire Mullhaxha – Kollçaku, ka dërguar kërkesë për sqarime me shkrim lidhur me çështjen e fshirjes së dokumenteve të prokurimit nga sistemi elektronik i Policisë së Kosovës.

Në media është raportuar se janë fshirë dokumente të rëndësishme të prokurimit nga sistemi i brendshëm elektronik i Policisë së Kosovës, PRIMS. Për shkak të fshirjes së këtyre dokumenteve raportohet se kanë filluar hetimet, kurse drejtoresha e Prokurimit në Polici ka dhënë dorëheqje.

Marrë parasysh faktin që një gjë e tillë ka ndodhur brenda Policisë së Kosovës, një institucioni detyrë e së cilit është pikërisht luftimi i keqpërdorimeve dhe veprimeve të jashtëligjshme, e bën një veprim të tillë shumëfish më shqetësues.

Nisur nga përgjegjësia që ka Ministria e Punëve të Brendshme, kemi kërkuar sqarime lidhur me këtë rast. Përkatësisht, a janë fshirë dokumente të prokurimit nga Sistemi i brendshëm elektronik i Policisë së Kosovës, PRIMS? Për çfarë dokumente konkretisht bëhet fjalë dhe me çfarë kontrata kanë të bëjnë këto dokumente të fshira? Poashtu, informacione të detajuara lidhur me funksionimin e Departamentit të Prokurimit në kuadër të Policisë së Kosovës, respektivisht sfidat dhe problemet me të cilat është përballur ky departament.

Lëvizja VETËVENDOSJE!, si subjekti më i madh politik në Kosovë, e uron popullin amerikan për zgjedhjen e presidentit të ri, Joe Biden, dhe zv. presidentes, Kamala Harris. Qysh gjatë fushatës ne e kemi dhënë mesazhin tonë mbështetës për z. Biden, sepse e kemi dëshiruar vërtet fitoren e tij. Joe Biden është një politikan me përvojë të angazhimit në Ballkan, ku vazhdimisht ka mbajtur qëndrime të drejta në raport me agresionet e agresorët, por edhe në ndihmë të viktimave e të lirisë së tyre. Si mik i dëshmuar i shqiptarëve, ne besojmë se ardhja e tij në detyrë është arsye për shpresë për kombin tonë, nëse ne shqiptarët punojmë siç duhet e ndershmërisht, e nëse i largojmë prej qeverive të korruptuarit e të gjitha ngjyrave.

Presidenti i ri, Biden, pritet të jetë një përforcues i aleancave e jo një dobësues i tyre. Ai është një politikan që e njeh mirë kontekstin e fuqive, para dhe pas Luftës së Ftohtë, për pasojë besojmë se do të jetë fuqizues i NATO-s e do të ndihmojë për vendosjen e kufijve ndaj ndikimit të fuqive si Rusia e Kina në rajonin tonë. Prirja programore e Partisë Demokratike të ShBA, për politika sociale, gjithëpërfshirje, luftim kundër diskriminimit dhe rritje të mirëqenies, përputhet me kahjen e përpjekjen e politikave tona, prandaj përkrahja për ta ka qenë e natyrshme. Zhvillimi i përgjegjshëm ekonomik, duke ruajtur e shëruar natyrën, duke përparuar njerëzoren e duke mos e cënuar assesi lirinë, këto janë çështje për të cilat mezi presim të bashkëpunojmë.

Ndryshimi në ShBA duhet të reflektohet edhe me ndryshim në Kosovë, ku tash disa muaj kemi një qeveri të paaftë dhe jolegjitime. Kjo qeveri u ndërtua me detyrën e vetme: dobësimin ndërkombëtar të Kosovës, dhe servilizmin ndaj emisarit të presidentit Trump, Richard Grenell, i cili pati si synim zhbërjen e trashëgimisë demokratizuese e lirisjellëse të presidentëve Clinton e Bush në Ballkan. Fatkeqësisht, përpjekje të tilla destabilizuese gjetën mbështetje edhe te disa shqiptarë, të gatshëm të shkojnë kundër historisë sonë, vetëm për pushtet. Kosova ka nevojë urgjentisht për zgjedhje të reja dhe qeveri e institucione legjitime, të cilat do të kenë mundësinë të zhvillojnë raporte të drejta me fqinjët, e të thellojnë aleancën me ShBA e me presidentin e ri z. Biden.

Sot, në katërvjetorin e vdekjes së Astritit, një delegacion i VETËVENDOSJE!-s, i prirë nga kryetari i Grupit Parlamentar të Lëvizjes, Rexhep Selimi, bashkë me prindërit dhe familjarët e Astritit, deputetët e tjerë dhe shokët e shoqet aktiviste, bënë homazhe në kujtim të tij. Po bëhen katër vjet prej vrasjes së Astrit Deharit në burgun e Prizrenit, në duar të shtetit e nga vetë shteti.

Drejtësia për Astritin nuk është vënë në vend ende. Vrasja e Astritit filloi që kur u arrestua me akuza të fabrikuara e të montuara dhe teksa po mbahej padrejtësisht në burg, në duar të një shteti të kapur e të korruptuar, i cili po vazhdon pengimin e zbardhjes së këtij akti.

Sikundër kemi bërë deri tani, edhe në këtë katërvjetor të mungesës fizike, Astritin do ta kujtojmë si aktivistin e zellshëm e të pashembullt, punëtor e fjalëpak, i cili nuk qe asnjëherë rehat me degradimin e vazhdueshëm që po i bëhej vendit.

Ai do të duhej të ishte në krye të aktiviteteve si aktivist, e në krye të detyrës si mjek, pranë familjes si familjar. E, megjithatë, për secilin aktivist të Lëvizjes VETËVENDOSJE!, e për secilin qytetar që do drejtësinë e barazinë në këtë vend, Astriti mbetet personifikim i përpjekjes së përditshme që Republikës t’ia kthejmë dinjitetin e qytetarëve shpresën.

Astriti, shihte më larg e më gjerë se të gjithë ne. Herët e kishte kuptuar që fati individual fiton rëndësinë vetëm në një shoqëri të mirëqenë, të lirë, të drejtë, të barabartë e të dinjitetshme. Ashtu siç ishte shembull i përkushtimit për të mirën e përgjithshme, është bërë simbol i gjithmonshëm i përpjekjeve për drejtësi e barazi, përherë frymëzues për ne dhe të tjerët që do të vijnë.

Ai na ndriçon rrugën përpara me dëshminë e tij, e ne do të ecim palëkundur drejt idealeve të Astritit.

Lëvizja VETËVENDOSJE! dhe populli shqiptar, gjithmonë do ta kujtojmë e do ta nderojmë Astrit Deharin dhe asnjëherë nuk do të pushojmë së kërkuari Drejtësi për Astritin.

Me rastin e katërvjetorit të vrasjes së aktivistit Astrit Dehari, Lëvizja VETËVENDOSJE! organizoi një konferencë për media ku ish-ministri i Punëve të Brendshme dhe Administatës Publike, Xhelal Sveçla dhe ish-ministrja e Drejtësisë, Albulena Haxhiu, kujtuan kontekstin e arrestimit dhe vrasjes së Astrit Deharit në burgun e Prizrenit. Haxhiu e Sveçla kërkuan që prokuroria speciale ta përshpejtojë hetimin e rastit, si dhe bënë thirrje për lirim nga aktakuza të aktivistëve që padrejtësisht akuzohen për për rastin e sulmit të inskenuar në Kuvend. Me bindje të plotë ata u shprehën se e vërteta do të zbulohet dhe jo vetëm vrasësit por edhe ideatorët, nxitësit, urdhërbartësit e urdhërdhënësit do të vihen para drejtësisë. Për sonte, ata ftuan të gjithë qytetarët që prej orës 20:00 në shtëpitë ose banesat e tyre ta ndezin qirinj në kujtim të jetës dhe veprës së Astrit Deharit.–Anëtari i Kryesisë, Xhelal Sveçla, fillimisht kujtoi ngjarjet e viteve 2015-2016 që rezultuan edhe me arrestimin e Astrit Deharit dhe pesë aktivistëve të Lëvizjes VETËVENDOSJE!.

“Ngjarjet e vitit 2015-2016 ishin ato të kundërshtimeve masive qytetare e opozitare të prira nga Lëvizja VETËVENDOSJE! ndaj ‘Zajednicës’ që e ndan Kosovën në vija etnike dhe Demarkacionit që na i humbi 8200 hektarë. Përball nesh, prej vjeshtës së vitit 2015 deri në gushtin e vitit 2016, qëndroi pushteti, i cili me gjithë makinerinë e represionit ushtroi dhunë të shfrenuar duke arrestuar e burgosur arbitrarisht aktivistët e Lëvizjes, në mesin e të cilëve edhe Astritin dhe pesë aktivistët e tjerë.”

Sveçla po ashtu kujtoi se Astrit Dehari u mbajt për 78 ditë në burg pa u marrë asnjëherë në pyetje nga organet e rendit që përbën shkelje të të drejtave të njeriut, si dhe përpjekjen e pushtetit asokohe për t’i fshehur gjurmët e këtij krimi.

“Prej vrasjes së Astritit e pastaj edhe përpjekjeve për mbulimin e gjurmëve te vrasjes, deklaratave kontradiktore e zhdukjeve të dëshmive materialeve, dëshmive të dëshmitarëve si dhe të vet dëshmitarëve, pamë një mobilizim kriminal prej ish-ministres së Drejtësisë të asaj kohe, prokurorëve e krerëve të shërbimit korrektues dhe policisë. Kulmi ishte kërcënimi i ekspertëve të jashtëm me aktakuzë vetëm e vetëm se ata thanë një të vërtetë. Tash edhe tentativat për sabotimin e procesit të hetimeve në të cilin proces janë përfshirë ekspertë të institutit ligjor të Lozanës. Por nuk kanë për t’ia dalë. Dhe patjetër që ky proces do të shkojë deri në fund dhe jo vetëm vrasësit por edhe ideatorët, nxitësit, urdhërbartësit e urdhërdhënësit duhet të vihen para drejtësisë”, tha ai.

Anëtarja e Kryesisë së Lëvizjes, Albulena Haxhiu tha se Astritit dhe pesë aktivistëve të VETËVENDOSEJE!-s padrejtësisht iu është mveshur vepra më e rëndë që njeh legjislacioni penal i Kosovës, ku si pasojë e kësaj ata u mbajtën në burg prej ku Astriti nuk doli i gjallë.

Duke shpjeguar kërkesën që me rastin të merret prokuroria speciale, Haxhiu theksoi se kanë kaluar katër vjet nga vrasja dhe një nga kalimi i rastit te prokuroria speciale dhe ende nuk ka drejtësi.

“Prej momentit kur është publikuar raporti i Institutit Zviceran, duke pasur parasysh që prokuroria e Prizrenit, konkretisht Sylë Hoxha, kishte paragjykuar rastin e Astritit dhe kishin dhënë deklarata që ka qenë vetëvrasje, pas raportit të Institutit zviceran, ne kemi kërkuar që rasti të transferohet në prokurorinë speciale por qëllimi i kërkesës tone ka qene që prokuroria speciale të trajtonte e hetonte në detaje rastin, pa ndikime, me seriozitet dhe profesionalizëm. Por ja ku jemi sot, katër vjet pas vrasjes së Astritit dhe një vit nga koha kur ky rast i ka kaluar Speciales, ende mungon drejtësia për Astrit Deharin.”

Tutje, Haxhiu tha se përmes kësaj konference i bëhet thirrje institucioneve të drejtësisë për trajtim të duhur e të pandikuar të rastit Dehari, si dhe ndërprerjes së përndjekjes ndaj aktivistëve që padrejtësisht akuzohen për rastin e inskenuar të Kuvendit. Ajo falënderoi shtetin Zviceran për mbështetjen, konkretisht Institutin Zviceran për ndihmën e ofruar në zbardhjen e rastit.

“5 vjetori i vrasjes së Astritit nuk do të duhej të na gjente me kërkesën për drejtësi. Në 5 vjetorin e vrasjes së Astritit, drejtësia do të duhej të shkonte në vend. Përgjegjësit për Astritin kanë emër e mbiemër. Prokuroria Speciale duhet ta bëj punën e saj,” tha ajo, duke kujtuar ftesën e bërë që sot nga ora 20:00 të ndizen qirinj nëpër shtëpitë/banesat e qytetarëve në kujtim të jetës dhe veprës së Astrit Deharit.

Morëm vesh sot për thirrjen para Gjykatës Speciale edhe të presidentit të Kosovës, Hashim Thaçi, e të kryetarit të PDK-së, Kadri Veselit. Akuzat ndaj tyre lidhen me luftën e UÇK-së, e cila për ne mbetet gjithnjë forcë e drejtë, e pastër dhe çlirimtare. Si shqiptarë, natyrisht, shpresojmë që ata të kthehen të pafajshëm.

Fatkeqësisht Kosova sot nuk është në gjendje ta mbrojë UÇK-në me institucionet e saj, për shkak se keqqeverisja në dekadat e pasluftës ka rezultuar në institucione të brishta të drejtësise, të cilat nuk kanë fituar besimin e qytetarëve, e njëkohësisht i ka përkeqësuar marrëdhëniet e Kosovës me partnerët ndërkombëtarë.

E vlerësojmë gjestin e dorëheqjes prej presidencës të Hashim Thaçit si të duhur, por të vonuar. Do të ishte mirë të vepronte qysh kur erdhi lajmi për akuzat, e jo të linte vend për të menduar se në prapaskenë po negocion për të shpëtuar veten prej atyre akuzave. Dhjetë vitet e fundit janë dëshmi se si kushdo që ka pretenduar ta mbrojë UÇK-në përmes pazareve të fshehta, ka dështuar, dhe vetëm sa e ka rritur dëmin. Vetë Gjykata Speciale është padrejtësi e prodhuar prej tyre, përderisa ne si Lëvizje, bashkë me shumë veteranë e qytetarë, protestuam kundër saj.

Tash Kosovës i duhen zgjedhje të reja e të lira, prej të cilave do të dalë një qeveri e cila gëzon mbështetje dhe legjitimitet prej shumicës së qytetarëve, qeveri që ia kthen besueshmërinë vendore e ndërkombëtare Kosovës. Presidenti i ri nuk mund të dalë prej pazareve në Kuvendin e vjetër e të deformuar, por do të dalë me integritet e besueshmëri, nga Kuvendi i ri, pas zgjedhjeve të reja. E deri atëherë, në një tranzicion të shkurtër e transparent drejt zgjedhjeve të reja, znj. Vjosa Osmani si ud. e presidentes, do të kontribuojë për mirë në imazhin ndërkombëtar të Kosovës. Vetëm një qeveri e pakorruptuar, e zgjedhur demokratikisht e jo produkt i pazareve, do të mund ta përparojë Kosovën e ta mbrojë UÇK-në dhe ta vlerësojë ashtu siç e meriton. Të gjithë duhet të bëhemi bashkë në respektim të ligjit, vullnetit të qytetarëve e demokracisë, e jo për t’iu mbivendosur asaj.

Lëvizja VETËVENDOSJE!, përmes nënkryetares së Kuvendit, znj. Arbërie Nagavci i ka dërguar kërkesë Kryesisë së Kuvendit që të ftohet Armend Zemaj për raportim para deputetëve për situatën me COVID-19 në Kosovë.

Gjendja pandemike në vend është përkeqësuar në mënyrë drastike. Pavarësisht përpjekjes vetëmohuese dhe përkushtimit të punonjësve shëndetësorë, numri i madh i të infektuarve, spitalet e mbingarkuara dhe paaftësia e kësaj Qeverie po e bëjnë përballjen me COVID-19 trefishë më të rëndë për qytetarët e Kosovës.

Gjatë javës së fundit janë regjistuar rreth 2500 raste të reja, kurse betejën me këtë virus e kanë humbur mbi 30 qytetarë. Këto shifra janë alarmante. Kjo është indikative se Kosova po shkon drejtë thellimit të krizës. Ndonëse Ministri kishte premtuar spital të veçantë për COVID-19, realizimi i tij nuk duket gjëkundi, e Klinika Pulmologjike dhe spitalet rajonale nuk kanë kapacitet për trajtim të një vale të re të të prekurve. Qytetarët e Republikës ndodhën pa mbështetje dhe pa përkujdesje.

Shpërfillëse ndaj gjendjes së qytetarëve, kjo Qeveri është zënë e befasuar në paaftësinë e saj. Me riciklim masash pa efekt e jo të duhura, të vonshme e të pazbatuara, Ministria e Shëndetësisë është shndërruar në një departament të dobët të mbledhjes së statistikave. Shifrat tregojnë se masat e ndërmarra nga Qeveria e Kosovës janë të mangëta, pa analizë dhe pa vlerësim për efektet e tyre në terren.

Është e rëndësishme që Kuvendi i Kosovës të diskutojë për gjendjen pandemike në vend, dhe se ministri Zemaj të raportojë para deputetëve për situatën, masat që janë ndërmarrë dhe ato që duhet të ndërmerren për të mbrojtur jetën e qytetarëve dhe shëndetin publik në përgjithësi.

Sot, Grupi parlamentar i Lëvizjes VETËVENDOSJE!, i asistuar nga Komiteti për Drejtësi i Lëvizjes, organizoi dëgjim publik lidhur me Projektkodin Civil të Republikës së Kosovës. Për shkak të rrethanave të krijuara nga pandemia COVID-19, dëgjimi publik u mbajt përmes platformës ZOOM.

Pos përfaqësuesve të Lëvizjes, përkatësisht znj. Albulena Haxhiu dhe deputetëve e njëherit anëtarëve të Komisonit Parlamentar për Legjislacion, Alban Hyseni dhe Dimal Basha, në këtë dëgjim morrën pjesë edhe profesorë, ekspertë, përfaqësues nga institucionet, përfaqësues nga shoqëria civile, noterë, avokatë si dhe disa studentë të Fakultetit Juridik.

Nga përfaqësuesit e Lëvizjes, u tha që Ministria nuk është dashur të ngutet me procedimin e draftit të Kodit prandaj edhe ata nuk do të japin mbështetjen për një dokument që është i mangët dhe se më shumë do rëndojë marrëdhëniet civile sesa t’i zgjidhë problemet.

Pjesëmarrësit në këtë dëgjim dhanë vlerësimet e tyre profesionale për këtë projektkod në të cilin është punuar mbi tre vjet. Megjithatë, problemet dhe kritikat për të janë mjaft të theksuara. Shumica e pjesëmarrësve vlerësojnë se ky draft në versionin aktual nuk duhet asesi të miratohet. Ai vlerësohet si një improvizim i dobët, përplot gabime logjike dhe praktike si dhe kundërdhënie në mes librave, pjesë të kodit. Po ashtu në këtë dëgjim publik u tha se mungojnë edhe përkufizime të koncepteve juridike. Prandaj, nevoja për përmirësime dhe intervenime është e pashmangshme. Por ato nuk mund të jenë thjesht amendamente në Kuvend por në nivelin fillestar të hartimit.

Disa prej çështjeve që u adresuan në këtë dëgjim publik ishin edhe se i njëjti ka përzierje të së paku dy apo tri shkollave filozofike juridike, i së paku tri kodeve të ndryshme pa ndonjë konsistencë konceptuale, filozofike a gjuhësore. U tha gjithashtu që ky kod përmban vetëm lidhje mekanike të ligjeve pozitive dhe në anën tjetër kurfarë lidhje normative e cila për një kod është e domosdoshme.

Tutje, u përmend edhe mungesa e memorandumit shpjegues, për institutet e gjithashtu u dhanë propozime për pasurinë e përbashkët, kontrata martesore e cila u konsiderua regres nga rregullimi aktual, alimentacionin si dhe nevoja për përfshirjen e kërkesave të komunitetit LGBT të cilat janë injoruar e shpërfilluar nga Ministria e Drejtësisë.

Pjesëmarrësit në përgjithësi theksuan që për institute të reja, për ndryshime të reja duhet analizë e detajuar e ekspertëve të fushës dhe jo eksperimentime, dhe se kodi nuk duhet të shtyej përpara intersa individuale apo grupeve por duhet t’i përshtatet rrethanave në Kosovë. Lidhur me këtë u adresua edhe nevoja e ndalimit të zhvatjes së qytetarëve nga bankat përmes kamatës së dyfishtë apo kamatës mbi kamatë.

Anëtarët e Grupit parlamentar të Lëvizjes dëgjuan me vëmendje të gjitha kritikat dhe sugjerimet e pjesëmarrëseve. Ato janë shumë të vlefshme, dhe në bazën e tyre, Lëvijza do të zhvillojë edhe takimet tjera me grupe të ndryshme të interesit, ekspertë e profesionist në mënyrë që ndryshimet t’i përgjigjen nevojave dhe shqetësimeve të ngritura nga të gjitha palët. Kjo me synimin që Kodi Civil të jetë në formën më të mirë të shërbimit për qyetarët e Republikës.

Sot në zyre të Grupit Parlamentar të Lëvizjes VETËVENDOSJE! në Kuvendin e Republikës, Kryetari i Grupit tonë Parlametar, Rexhep Selimi, dhe kryetarja e Komisionit për Çështje të Sigurisë njëherit nënkryetarja e Lëvizjes, Fatmire Mulhaxha Kollçaku bashkë me asistenten e Grupit Valëza Mjeku pritën në takim Shefin e Zyres së Bashkimit Evropian (BE) në Kosovë/Përfaqësuesin e Posaçëm, ambasadorin Tomáš Szunyog.

Takimi kishte karakter njoftues mbi punën e Komisioneve Parlementare dhe rolin e Grupit Parlamentar të LV në raport me to. Ambasadori Szunyog mes të tjerash vuri theks të veçantë tek projektligji për Financimin e Partive Politike dhe votimin për zgjedhjen e Komisionerit për Mbrojtje të Dhënave Personale dhe Privatësi. Ai poashtu tha se agjenda evropiane duhet të jetë prioritet i të gjitha subjekteve dhe grupeve parlamentare.

Nga ana tjetër, përfaqësuesit tanë e njoftuan ambasadorin për punën e Kuvendit, me theks tek interpelancat të cilat janë mbajtuar deri tani e tjerat që priten të mbahen në javët në vijim. Fatmire Mulhaxha Kollçaku tha se e sheh të dëmshëm vendimin e Qeverisë për shuarjen e Task-forcës së Anti Korrupsion dhe për këtë duhet kërkuar llogari. Në këtë drejtim, ajo tha se komisioni të cilin ajo e drejton do të bëjë çmos që kjo çështje ta merrë vëmëndjen dhe trajtimin e duhur. Kurse, Rexhep Selimi në lidhje me marrëveshjen e Asociacionit të Komunave serbe ripërsëriti qëndrimin e Lëvizjes VETËVENDOSJE!, e cila që nga fillimi e ka konsideruar të dëmshme atë dhe që tashmë e sheh edhe të vdekur pas vendimit të Gjykatës Kushtetuese të 23 dhjetorit të 201

Sot, nënkryetarja e Kuvendit të Kosovës, Arbërie Nagavci, bashkë me Kryetaren e Kuvendit, Vjosa Osmani, në kuadër të një vizite më të gjerë, kanë vizituar edhe shoqatat “Thirrjet e Nënave”, “Shoqatën e Pensionistëve” dhe “Medica Gjakova” në Gjakovë.

Çdo takim me nënat gjakovare, është takim prekës ku spikasin po aq sa plagët e familjarëve për më të dashurit e tyre të pagjetur nga lufta e fundit, edhe papërgjegjësia e vazhdueshme për çështjen e të pagjeturve nga ana e institucioneve.

Kujtimet e nënave janë të freskëta, e lotët ende të njomë. Familjarët e të pagjeturve përditë jetojnë me mallin për më të dashurit e tyre. 21 vjet nga lufta dhe Serbia vazhdon të fshehë të vërtetën e mbi 1600 të pagjeturve, kurse qeveritë e Kosovës kanë normalizuar atë.

Trajtimi jo i duhur i çështjes së të pagjeturve ka rënduar edhe më shumë familjet. Kthimi i mbetjeve mortore të pjesshme është lëndim shtesë.

Ishte bindje e përbashkët se nuk mund të ketë dialog me Serbinë pa zbardhjen e fatit të pagjeturve. Ndërsa, barazimi i të pagjeturve me të ashtuquajturit kthimin e të zhvendosurve është i papranueshëm dhe potencialisht siç u tha, barazim të viktimës me kriminelin e luftës.

Nënkryetarja Nagavci i njoftoi drejtueset e “Thirrjet e Nënave” për interpelancën që ka thirrur Grupi parlamentar i Lëvizjes VETËVENDOSJE! pikërisht për këtë, duke e konsideruar se çështja e të pagjeturve nuk mund të ndërlidhet a kushtëzohet me asnjë çështje tjetër, por është vetë dialogu që duhet të kushtëzohet me zbardhjen e të pagjeturve nga ana e Serbisë. Po ashtu u diskutua për idenë që të ftohen në Kuvend familjarët e të pagjeturve, për të adresuar këtë çështje dhe kërkesat e tyre para deputetëve. “Thirrjet e Nënave” paraqiten edhe njëherë kërkesat e tyre që Serbia të ofrojë informacionet, të nxirren para drejtësisë autorët, të bëhen pjesë e bisedimeve dhe të mbështetën familjet e të pagjeturve.

Nënkryetarja Nagavci, vizitoi po ashtu edhe shoqatën e pensionistëve të Gjakovës, ku u njoftua me gjendjen dhe kërkesat e pensionistëve, si dhe nevojën e adresimit të drejtë të kthimit të fondit pensional të plaçkitur nga Serbia. Ndërsa, në takimin në Shoqatën “Medica Gjakova”, shoqatë e cila ka trajtuar e mbështetur rehabilitimin e grave të dhunuara gjatë luftës, u njoftua për punën e vlefshme që po bëjnë, por edhe me sfidat që përballen.

“Medica Gjakova” duke falenderuar krijimin e Komisionit për verifikimin dhe regjistrimin e rasteve të dhunimeve seksualisht gjatë luftës, e ngriti nevojën e zgjatjes së periudhës për verifikimin dhe regjistrimin e këtyre rasteve, për shkak se shumë gra nuk janë lajmëruar.

Lëvizja VETËVENDOSJE!, sot ka mbajtur një konferencë virtuale të ndarë në dy panele mbi moratoriumin një vjeçar të Kosovës për anëtarësim në organizata ndërkombëtare, në kuadër të zotimeve të 4 shtatorit 2020.

Në panelin e parë të drejtuar nga ish-Ministrja e Drejtësisë dhe anëtarja e Kryesisë së Lëvizjes VETËVENDOSJE!, znj. Albulena Haxhiu, morën pjesë njohës, ekspertë dhe përfaqësues të ndryshëm nga organizata të ndryshme joqeveritare vendore, për të diskutuar mbi sfidat e Kosovës mbi marrëdhëniet ndërkombëtare, pas zotimeve të Uashingtonit për moratoriumin një vjeçar.

Folës në këtë panel ishin z. Glauk Konjufca, ish-Ministër i Punëve të Jashtme dhe anëtar i Kryesisë të Lëvizjes VETËVENDOSJE!, z. Blerim Reka, profesor dhe ish-Ministër i Integrimeve Evropiane, znj. Gjyljeta Mushkolaj, profesoreshë dhe ish-gjyqtare e Gjykatës Kushtetuese, z. Sabri Kiçmari, profesor dhe diplomat, z. Armend Muja, ligjërues në Riinvest, znj. Donika Emini, përfaqësuese nga CIVIKOS, znj. Arbreshë Loxha, përfaqësuese nga Grupi për Studime Juridike dhe Politike, znj. Jeta Krasniqi, përfaqësuese nga KDI, znj. Luljeta Aliunga, përfaqësuese nga INJECT, z. Taulant Kryeziu, ish-zëvendësministër dhe ekspert i integrimeve evropiane, z. Sami Kurteshi, ish-deputet, politolog dhe njohës i marrëdhënieve ndërkombëtare, z. TienMu Ma, ekspert i të drejtave të njeriut.

Në këtë panel, diskutimi ky moratorium u cilësua si privim dhe kontestim i shtetësisë dhe sovranitetit të Kosovës. Qeveria e Kosovës me zotimet e saj në Uashington, ka humbur në subjektivitetit shtetëror në raport me vetvetën dhe të tjerët në arenën ndërkombëtare. Këto zotime janë si pasojë e një rrugëtimi të gjatë të dialogut me Serbinë, i nisur që nga 2011, me mospërgatitjen adekuate dhe parashtrimit të kërkesave të Kosovës ndaj Serbisë në tavolinën e bisedimeve. U përmend që kjo Qeveri në mungesë të legjitimitetit dhe politikave hibride, vullnetarisht e ka dëmtuar Republikën e Kosovës në rrafshin ndërkombëtar. Gjithashtu u theksua që ky zotim vjen si pasojë e plotësimit të një kërkese të kahmotshme të Serbisë, që Kosova të pezullojë anëtarësimin në organizma ndërkombëtarë. Askush nuk mund të na sigurojë që Serbia, me interferimet e saja diplomatike nuk do të provojë që të cenojë shtetësinë e Kosovës në vendet që ende nuk na kanë njohur. Nga folësit u theksua që duhet të ndryshojë narrativi për konsolidimin e shtetndërtimit në dialogun me Serbinë. Kosovës dhe instititucioneve të saj, i nevojitet një legjitimitet i ri dhe politika të reja në ruajtjen e sovranitetit shtetërorë dhe vullnetit qytetar.

Paneli i dytë u drejtua nga deputetja e Kuvendit të Republikës së Kosovës dhe anëtarja e Kryesisë së Lëvizjes VETËVENDOSJE!, znj. Fitore Pacolli, ku përveç profesorëve, ekspertëve e korrespodentëve të jashtëm, sikurse z. Florian Bieber, profesor në Universitetin e Graz-it, z. James Ker Lindsay, z. Adam Fagan dhe z. Gëzim Visoka, profesorë në universitete britaneze, z. Aidan Hehir, njohës i marrëdhënieve ndërkomëbtare dhe ligjërues në Universitetin eWestmister, z. Tim Judah, korrospodent në The Economist, z. Bodo Weber, Hulumtues i Lartë në Këshillin për Politika Demokratizuese, e znj. Dana Landau, studieuse e lartë në institutin Swisspeace, ishte edhe kryetar i Lëvizjes VETËVENDOSJE!, z. Albin Kurti.

Kryetari Kurti foli për zotimet e nënshkruar më 4 shtator në Uashington, duke thënë se më e dëmshme se vetë ato është mendimi prapa tyre. Ai potencoi se “marrëveshja” e nënshkruar kinse për shqiptarët në Kosovë e serbët në Serbi është më shumë dakordim për shqiptarët në Miçigen e serbët në Ohajo, pra dakordim në shërbim të zgjedhjeve presidenciale që do të mbahen së shpejti në ShBA

Sot, Grupi parlamentar i Lëvizjes VETËVENDOSJE! dorëzoi kërkesën për interpelancë për Avdullah Hotin, lidhur me vendimin e qeverisë për shuarjen e Task-forcës antikorrupsion.

Në kohën kur kërkohet ndërmarrja e veprimeve konkrete në luftimin e korrupsionit, krijimin e mekanizmave efikas dhe të pandikuar për të hetuar, gjykuar e konfiskuar pasurinë e përfituar në mënyrë të kundërligjshme, Qeveria e Kosovës e bënë të kundërtën, duke shpërbërë Task-forcën antikorrupsionn në Policinë e Kosovës.

Ky vendim është i dëmshëm dhe i shërben më shumë mirëmbajtjes së korrupsionit. Kësisoj pengon edhe ato pak mekanizma kundër keqpërdorimit të detyrës zyrtare e pasurisë publike.

Nuk ka asnjë dyshim se kjo Qeveri e korruptuar edhe për nga mënyra e zgjedhjes, nuk ka as vullnet, as aftësi e as integritet për të luftuar korrupsionin në Kosovë. Por, shfuqizimi i Task-forcës është mesazh inkurajues për zyrtarët e korruptuar e të përfshirë në keqpërdorime të ndryshme të detyrës zyrtare dhe parasë publike. Me këtë vendim, Qeveria e Kosovës është vënë në anën e keqpërdoruesve, e kundër luftimit të korrupsionit.

Nga deklaratat koti për zhdukjen e fjalës “korrupsion” nga fjalori, po përfundojmë me përligjjen e korrupsionit si dukuri, normalizimin e keqpërdorimit të detyrës zyrtare dhe të ndërhyrjes e presionit mbi sistemin e drejtësisë.

Korrupsioni në Kosovë është endemik e i përqendruar në pozita të larta institucionale. Çfarëdo përpjekje kundër korrupsionit pashmangshëm duhet të fillojë e kalojë përmes zyrtarëve të lartë institucionalë. Luftimi i korrupsionit mund të bëhet vetëm nga një Qeveri e ligjshme, e ndershme, dhe që ka me vullnetin politik.