Në kuadër të Javës së Lëvizjes, dje shënuam edhe “Ditën e qeverisjes lokale” me ç’ rast organizuam një mbledhje virtuale me Kryetarët e Komunave, Drejtorët dhe Anëtarët e Kuvendeve Komunale nga radhët e Lëvizjes tonë, për të folur rreth alternativës që kemi paraqitur dhe programit që kemi implementuar në nivelin lokal. Në këtë takim mori pjesë edhe Kryetari i Lëvizjes, Albin Kurti.

Gjatë këtij viti, në disa Komuna të Kosovës kemi arritur të kalojmë propozime të rëndësishme si ai për buxhetimin gjinor, pastaj pagesën e shumës mbi 100 euro për fëmijët e sapo lindur, ndalimin e disa projekteve të dëmshme për ambientin, lirimin nga taksa për shfrytëzimin e hapësirës publike për bizneset e gastronomisë gjatë periudhës së pandemisë etj. punë, që edhe i diskutuam në këtë mbledhje, bashkarisht me raportin përmbledhës të çështjet kryesore të ngritura nga anëtarët tanë në Kuvendet Komunale.

Lëvizja VETËVENDOSJE! përherë është angazhuar dhe vazhdon me zellin e njëjtë të punoj në çdo Komunë për të transmetuar e ofruar zgjidhje si për nevojat ashtu edhe për kërkesat e vazhdueshme të qytetarëve. Pushteti lokal është adresa e parë e qytetarit dhe është mekanizmi kyç për zgjidhjen e problemeve të përditshme me te cilat ballafaqohemi. Rruga, çerdhja, shkolla, Qendra e Mjekësisë Familjare, parku dhe urbanizimi i lagjeve e fshatrave tona varen nga politikat lokale të cilave ne iu kushtojmë shumë rëndësi. Si Lëvizje VETËVENDOSJE!, do e shtojmë përpjekjen që alternativa jonë qeverisëse të vazhdojë të ndërthuret në kontakt me qytetarin dhe do ta shtojmë punën që ajo të jetësohet në secilën komunë të Republikës tonë.

Pas sajimit të qeverisë së paligjshme, deklarata e parë e presidentit Thaçi ishte se duhet të largohen të gjitha pengesat karshi dialogut, dhe ashtu ndodhi: qeveria koti largoi masën e reciprocitetit ndaj Serbisë, duke e zhveshur tërësisht Republikën e Kosovës nga sovraniteti e dinjiteti shtetëror. Ndërkaq sot emisari i presidentit Trump, Richard Grenell, na njoftoi për vendimin e radhës së kësaj qeverie: që të heqë dorë nga përpjekja për anëtarësimin e Kosovës në organizatat ndërkombëtare.

Qeveria Koti e Hashim Thaçit tashmë është në të njëjtën linjë me përpjekjen e Serbisë, me zotimin e kryeministrit Koti dhe Hashim Thaçit, se Kosova nuk është e barabartë me Serbinë dhe se Kosova nuk do të angazhohet për subjektivitet ndërkombëtar. Ky është pozicioni me të cilin këta shkojnë në dialog me Serbinë. Ky vendim erdhi pak orë pas takimit Hoti-Thaçi.

Sot më shumë se kurrë kuptohet përpjekja e gjithë këtij Klubi të Stërvjetëruar Politik për ta larguar qeverisjen që filloi të sillet si shtet normal në arenën ndërkombëtare e të forcojë sovranitetin për së brendshmi. Qeveria Kurti i ka penguar pazaret me thika mbi harta që po i kanoseshin Republikës së Kosovës. Për tandemin Thaçi-Vuçiq ishte e nevojshme një qeverisje pa legjitimitet popullor, e diskredituar, marionetë, e cila ndjek aventurën e tyre të nisur tash e disa vite.

Lëvizja VETËVENDOSJE! thekson se asnjë marrëveshje që cënon integritetin territorial e funksional të Republikës së Kosovës nuk do të mund të implementohet në vendin tonë dhe se nuk mund të ketë dialog nga një qeveri ilegale dhe ilegjitime që është në diskrepancë totale me vullnetin e popullit. Konjukturat e kapura nuk mund të dëmtojnë vullnetin e shumicës. Lojërat me copëtime krijojnë parakushtet për destabilizim të rajonit, e vënë në rrezik një numër të madh njerëzish.

Në Drenas, por pastaj edhe në Dardanë e Gjilan, entuziazmi për zgjedhje të reja është i lartë në këto ditë të nxehta qershori dhe kjo nuk ka të bëjë vetëm me rritjen e numrit të nënshkrimeve në peticion. Nëpër takimet tona, e sidomos në këto tri të fundit me qytetarë, hetohet dëshira e nevoja për një qeveri të mirë, e jo një qeveri koti. Për një qeverisje që jep ndjenjën e sigurisë dhe zhvillimit, e jo të shantazhit, e të presidentit. Kryetari Kurti vizitoi këto qytete, ku takoi aktivistët punëtorë nëpër tenda dhe qytetarët nënshkrues të peticionit më të madh ndonjëherë. Koha e zgjedhjeve po afron e puna jonë do të shtohet në ditët e radhës. Rikthimi ynë do të jetë edhe më i fuqishëm, sepse nuk do të jetë vetëm rikthim i yni, por edhe i vetë popullit në qeverisje.

Sot, në kuadër të Javës së Lëvizjes, u mbajt edhe një takim me të rinjtë, me ç ‘rast Kryetari Albin Kurti dhe Drejtuesi i Lëvizjes Studentore për Barazi (SKV) Flamur Pireva bashkëbiseduan me studentë rreth rëndësisë së arsimit dhe ndërlidhjes së tij me ekonominë e prodhimin, si dhe për aktivizmin rinor.

Të rinjtë patën rastin të njoftohen më shumë edhe rreth situatës politike, zgjedhjeve që po afrojnë, për të cilat edhe shprehën bindjen që si në nivelin lokal ashtu edhe nacional do t’i fitoj Lëvizja VETËVENDOSJE!, që tashmë edhe e ka dëshmuar jo vetëm që e ka alternativën më të mirë qeverisëse, por që edhe është e vetmja alternativë për të qeverisur me vendin.

Pas diskutimit, u mbajt edhe një koktej që zgjati shkurt, ku të pranishmit patën rastin të bashkëbisedojnë me njëri-tjetrin për aktivitetet e ditëve në vijim.

Gratë përherë kanë qenë të përfshira në Lëvizje, me punën e tyre ato përveç se e kanë shtrirë organizatën në të gjitha skajet e vendit dhe jashtë tij, edhe e kanë siguruar çdo fitore tonën. Sot, në kuadër të Javës së Lëvizjes, zhvilluam një bashkëbisedim online me gratë aktiviste për ecjen e organizatës tonë ndër vite, si dhe për angazhimet e shumta që na presin.

Sekretarja Organizative, Vlora Haxhimehmeti, foli për rritjen e numrit të anëtareve ndër vite dhe për forcimin e strukturave tona me pjesëmarrjen e grave aktiviste në to. Anëtarja e Kryesisë së Lëvizjes, ish-ministrja e Drejtësisë, Albulena Haxhiu, përmendi punën e bërë nga organizata, e sidomos gratë brenda organizatës tonë në adresimin e dhunës mbi baza gjinore, dhe për financimin e strehimoreve për viktima të dhunës që ka bërë qeveria Kurti. Ajo shprehu bindjen se kjo punë e mirë do të vazhdoj përmes një përfshirje edhe më të gjerë të grave në Lëvizje.

Kryetari, Albin Kurti, uroi aktivistet dhe anëtaret për 15 vjetorin e Lëvizjes, dhe mes të arriturave të qeverisjes së mirë, theksoi punën e rëndësishme që kanë bërë gratë që qeverisja të jetë e tillë. Duke iu referuar vullnetit qytetar të shprehur në peticionin që kërkon zgjedhje, ai tha se qeveria e punës dhe e drejtësisë, ajo e barazisë do të rikthehet shumë shpejtë.

Gratë aktiviste nga Qendrat e Lëvizjes në Kosovë, nga Qendrat e Mërgatës dhe Qendra jonë në Shqipëri shtruan shumë ide se si duhet të ecet përpara me organizimin e grave shqiptare kudo që janë, ato e rikonfirmuan gatishmërinë për angazhim edhe më të përkushtuar e dinamik në të ardhmen.

Lëvizja VETËVENDOSJE! bashkë me Sekretariatin e Gruas Aktiviste, do ta rris angazhimin për të sfiduar çdo imponim e rëndesë mbi gratë. Kundër pabarazisë dhe diskriminimit dhe për sa më shumë solidaritet e barazi, e sidomos gjinore.

Përveçse jashtë vendlindjes e larg njëri-tjetrit, sivjet pandemia na e ka shtuar edhe më shumë largësinë, kjo ndikoi edhe në ditën tonë tradicionale që si Lëvizje tash për të tretin vit radhazi ja kushtojmë mërgatës sonë, ditën e mërgatës. Në pamundësi që të takohemi me ju këtë herë fizikisht, organizuam takim virtual për të diskutuar e festuar jo vetëm 21 vjetorin e çlirimit të vendit, por edhe 15 vjetorin e Lëvizjes VETËVENDOSJE!

Në këtë takim morën pjesë Kryetari Albin Kurti, Sekretarja Organizative Vlora Haxhimehmedi dhe deputetja Fitore Pacolli, ndërsa takimi u moderua nga Lirika Komoni, Koordinatore e qendrave në mërgatë.

Vlora Haxhimehmedi duke folur për rritjen e mbështetjes ndaj Lëvizjes njoftoi ndër të tjera edhe shtrirjen më të madhe të LV-së në Kosovë dhe jashtë saj. Ajo po ashtu foli edhe për historikun e organizimit të Lëvizjes përgjatë 15 viteve të ekzistencës së saj.

Në anën tjetër, Fitore Pacolli u fokusua tek vendimet që Qeveria Kurti kishte ndërmarrë në lidhje me mërgatën, që nga vendimi për fillimin e proceduarave për pagesën e Kartonit të Gjelbërt për bashkatdhetarët që vijnë në vendlindje, te ligji i diasporës dhe për nismën ligjore për votimin e mërgatës nëpër ambasada dhe konsullata, që u propozua nga deputetet e Lëvizjes ditë më parë.

Në fund, Kryetari i Lëvizjes VETËVENDOSJE! informoi bashkëbiseduesit nga mërgata për situatën politike në vend, për 100 ditëshin e qeverisë së mirë, për rëndësinë dhe mbështetjen e madhe për peticionin ”Duam Zgjedhje!” si dhe përgatitjet për zgjedhjet lokale e hapat e metutjeshëm të organizimit tonë në mërgatë dhe në Kosovë.

Me një interesim të jashtëzakonshëm, mes qindra kërkesash për pjesëmarrje në këtë takim virtual, këtë herë nuk arritëm që t’i përfshijmë të gjithë bashkatdhetarët në këtë bisedë për çka edhe ju kërkojmë ndjesë, ndërkaq ju njoftojmë që së shpejti Lëvizja do organizojë takime të ngjashme përsëri për të cilat do t’ju tregojmë me kohë.

Lëvizja VETËVENDOSJE! i është përherë falenderuese mërgatës për kontributin dhe rolin pashoq të saj që ka në raport me Kosovën, atdheun tonë të përbashkët.

Mijëra qytetarë, aktivistë dhe anëtarë u mblodhën në festimin e 21 vjetorit të çlirimit të vendit dhe 15 vjetorit të themelimit të Lëvizjes VETËVENDOSJE!.

Në mesin e tyre, folën deputetët Liburn Aliu dhe Saranda Bogujevci, aktivistja Aulonë Bytyçi dhe Drejtori i Qendrës së Lëvizjes në Shqipëri Boiken Abazi, ish-ministrat e Qeverisë Kurti, Albulena Haxhiu dhe Arben Vitia, dhe në fjalën e fundit Kryetari Albin Kurti.

Në tubimin festues nuk munguan fjalët që kujtojnë angazhimin dhe sakrificën e aktivistëve, aktivitetet dhe rezistencën e Lëvizjes dhe punët e mira të Qeverisë Kurti. Tashmë ekziston një dëshirë e zjarrtë dhe një entuziasëm i madh për ta parë Lëvizjen në Qeverisje, për ta parë forcë të parë përballë bashkimit të kotësisë dhe antidemokracisë kundër saj.

Në tubim nuk munguan as këngët e grupit Troja përmes anëtarit të bandës Bujar Berisha, këngët që kanë përshkuar ndër vite tubimet dhe protestat e Lëvizjes.

Rezistenca dhe përkushtimi i sinqertë dhe i pakompromis i Lëvizjes ndër vite i ka sjellur frytet e veta me besimin e madh të popullit për të. 100 ditët e Qeverisë Kurti kanë ngjisur entuziasmin se po, një qeverisje e mirë është e mundur. Këto janë të vërteta të pakthyeshme.

Në fjalën e tij, mes ngazëllimit të të pranishëmve me plot dashuri për vendin dhe Lëvizjen, Kryetari Kurti tha se, “këtë vit dhe vitin që vjen neve do të na ngelet i gjithë pushteti në duart tona, pushteti qendror këtu, por edhe ai lokal nëpër komuna. Kjo do të na gëzojë shumë, por duhet edhe të na brengosë për punët e shumta dhe përgjegjësinë e madhe që do ta kemi. Bëhuni gati për pushtetin. Do të ikë kjo Qeveria Koti, e ne nuk kemi kohë për të humbur, nuk kemi kohë koti”.

Aktivistët dhe qytetarët duan zgjedhje dhe janë gati për to, sepse aktivistët dhe qytetarët duan një tjetër Qeveri Kurti, një qeveri popullore të shumicës, një qeveri të shpejt të Lëvizjes dhe një qeveri të mirë siç e meriton Kosova.

Edhe në këto komuna nuk mungon entuziasmi për zgjedhje të reja, për qeveri me legjitimitet popullor dhe për një shtet demokratik. Qeveria Kurti i ka bindur qytetarët se një qeverisje e mirë dhe që e trajton me dinjitet qytetarin është e mundur. Rrëzimi i saj i ka bindur se asgjë nuk mund ta garantojë demokracinë nëse mungon angazhimi dhe pjesmarrja qytetare në skenën politike. Peticioni është vetëm fillimi i një pjesmarrjeje popullore në skenën politike e cila do të kulmojë me votimin masiv në zgjedhjet e reja. Lëvizja e sheh qeverisjen me popullin, ndërsa qeveria Koti fshihet pas qeverisjes ilegjitime vetëm për të mos u përballur me popullin.

Më 3 qershor në seancën e Kuvendit të Republikës në të cilën u votua Qeveria ilegale dhe kundër vullnetit të votuesve, mori pjesë edhe deputeti i dënuar me aktgjykim të formës së prerë për vepër penale me një vit e tre muaj burg.

Pjesëmarrja e z. Etem Arifi në seancë dhe votimi i tij, aq më tepër si votë përcaktuese, e thellon edhe më shumë paligjshmërinë e kësaj Qeverie dhe e bën edhe proceduralisht të paligjshëm vendimin e Kuvendit për votimin e Qeverisë. Është e përcaktuar qartë me Kushtetutën e Republikës së Kosovës se mandati i deputetit humb ose bëhet i pavlefshëm në rast të dënimit për vepër penale me një vit e më shumë burg.

Qeveria Koti është e diskredituar në të gjitha drejtimet. Pa bazë kushtetuese dhe pa vullnetin e votuesve, e varur plotësisht nga Lista Serbe dhe madje me vota të deputetëve përkundër vullnetit të tyre, ajo është e pavlefshme edhe ligjërisht prej votimit të z. Etem Arifi si i dënuar me vendim përfundimtar gjyqësor për vepër penale.

Përveç Qeverisë që nuk gjen mbështetje as në Kushtetutë dhe as në rezultatin e zgjedhjeve, por është imponim nga Presidenti e për vetë atë dhe planet e tij, ka humbur integritetin dhe besueshmërinë çdo mekanizëm kushtetues për mbrojtjen e ligjshmërisë e të kushtetutshmërisë së veprimeve e vendimeve institucionale.

Me provat që dëshmojnë qartazi se z. Etem Arifi është dënuar me aktgjykim të formës së prerë dhe për rrjedhojë ka humbur mandatin e deputetit, sot, disa deputetë të Grupit Parlamentar të Lëvizjes VETËVENDOSJE! kanë dorëzuar në Gjykatën Kushtetuese kërkesën për antikushtetuetshmërinë e pjesëmarrjes dhe të votimit të z. Arifi, i cili e bën të pavlefshëm dhe jokushtetues vendimin e Kuvendit të Kosovës.

Kjo kërkesë është rasti i radhës që ose do të shpërfaqë edhe më shumë rënien e shtetit të së drejtës në justifikimin e çdo paligjshmërie, ose do të konstatojë atë që e thotë Kushtetuta se një deputet i dënuar me mbi një vit burg humb mandatin dhe se vendimi që merr për bazë votimin e tij është në kundërshtim me Kushtetutën.

Sot, Lëvizja VETËVENDOSJE! dorëzoi në Kuvendin e Kosovës nismën ligjore për peticione. Vullneti kolektiv dhe kërkesat e qytetarëve të shprehura përmes peticionit janë një e drejtë politike dhe kushtetuese që i japin kuptim demokracisë dhe e mbrojnë atë nga shpërdoruesit dhe mohuesit e saj.

Pjesëmarrja e qytetarëve në vendimmarrje është element esencial për demokracitë kudo dhe sidomos në Kosovë. Projektligji i proceduar nga deputetët e Lëvizjes VETËVENDOSJE! përcakton ligjërisht për herë të parë në Kosovë rolin dhe rëndësinë e peticioneve, mënyrën, përmbajtjen dhe efektet e tyre.

Një ligj i tillë i ka munguar Kosovës kaherë. Në një kohë kur vullneti i shprehur edhe përmes zgjedhjeve zhvleftësohet, kur demokracia përkeqësohet, kur hendeku midis institucioneve dhe qytetarëve thellohet, bëhet edhe më i domosdoshëm krijimi i mundësive ligjore për qytetarët që të shprehin vullnetin e tyre dhe që të bëhen pjesë e marrjes së vendimeve në jetën politike e institucionale.

Ditën e sotme Kryetari Albin Kurti së bashku me aktivistët e Lëvizjes mbajtën homazhe në 6 vjetorin e ndarjes nga jeta të aktivistit Arbënor Dehari.

Sot Arbënori do të kishte qenë 35 vjeçar me plot angazhim e përkushtim, mendim dhe entuziazëm për vetëvendosjen e popullit tonë, për barazi shoqërore dhe për zhvillim ekonomik. Arbënori mishëronte modelin e aktivistit që veprimin politik nuk e shihte si një akt spontan të izoluar, por si rezultat dhe kulmim të një pune organizative. Veprimi politik për të ishte shpallja publike e ekzistencës së mrekullueshme të një kolektivi politik barazitar që e mundëson veprimin. Kjo e mbante Arbënorin jo në akte politike të izoluara dhe individualiste, por në një lëvizje permanente kolektive. Aktivisti është i tillë vetëm për sa është me të tjerë aktivistë. Kjo bindje e Arbënorit është bindja jonë dhe kjo e mban atë të pandashëm prej nesh dhe kujtimi i tij na mban edhe ne po ashtu.

Java e Lëvizjes u hap sot me shënimin e Ditës së Lidhjes. Përveç interesimit të madh të qytetarëve për ta nënshkruar peticionin për zgjedhje të reja, pati edhe interesim të madh për të marrë pjesë në bashkëbisedimin e organizuar nga Lëvizja VETËVENDOSJE! në Platonë e Lidhjes, për rëndësinë historike dhe politike të Lidhjes së Prizrenit. Të ftuar për të folur në këtë 142 vjetor, ishin Glauk Konjufca dhe historianja Mrika Limani Myrtaj.

Glauk Konjufca në fjalën hapëse tregoi sesi kemi nevojë jo vetëm ta kujtojmë e festojmë por edhe ta shqyrtojmë Lidhjen Shqiptare të Prizrenit. Më së shumti theksoi faktin se përballë projekteve ekspansioniste të fqinjëve në mesin e shek. XIX, intelektualët shqiptarë punuan mbi projektin e gjuhës shqipe si një gjuhë e veçantë e që shënjonte mëvetësinë e një identiteti kulturor të shqiptarëve, ndërsa organizimi politik përgjatë kësaj periudhe bëhej në fshehtësi ku vlen të kujtohet Komiteti i Stambollit, i cili i paraprin organizimit të Lidhjes së Prizrenit.

Studiuesja e historisë, Mrika Limani Myrtaj, parashtroi sesi shqiptarëve u binte të pësonin barrën e degradimit të Perandorisë Osmane në shek. XIX, kjo edhe për faktin se shqiptarët nuk kishin projekte ekspansioniste si fqinjët serb, grek dhe malazez. Në mesin e kësaj gjendjeje dhe pas traktatit të Shën Stefanit shqiptarët u vetëdijesuan se ata dhe trojet e tyre nuk do të mbroheshin prej tjetërkujt nëse nuk do të mbroheshin më së pari prej vetë atyre.

Në këtë bashkëbisedim mori pjesë edhe Kryetari i Lëvizjes, Albin Kurti, i cili ndau me të pranishmit mendimin se Lidhja Shqiptare e Prizrenit është kulmi i organizimit politik dhe ushtarak të kombit tonë dhe se prej këtij organizimi mund të mësojmë ende ngase kemi nevojë të bashkohemi si shqiptarë në mënyrë që të krijohet një paqe afatgjate, një siguri për të gjithë dhe një stabilitet i cili nuk është i një rendi të padrejtë.

“Pra ka nevojë për forcim të shqiptarëve, për fuqizim të tyre, jo për inat të ndokujt tjetër, por për hirë të vetes së tyre duke i kontribuar kështu edhe mbarë rajonit”, tha ai.

Në diskutim u rikujtua edhe se Lidhja e Prizrenit përveç se ishte organizim mbarëkombëtarë, ishte edhe mbifetar, duke u bërë kështu simboli i bashkimit të shqiptarëve pavarësisht ndarjeve nga jashtë dhe dallimeve fetare të brendshme. Mbyllja e tij u shoqërua me ndezjen e 142 flakadanëve në muret e kalasë ne nderin e këtij përvjetori. Lidhja është ende gjallë dhe vazhdon të na thërras drejt bashkimit si shqiptarë, për një të ardhme më të mirë, me më shumë paqe, siguri e mirëqenie dhe barazi.

“Jemi të bindur që ekziston dalja nga kjo krizë, ekziston zgjidhja për problemet në Kosovë, dhe ajo zgjidhje janë zgjedhjet e reja, në mënyrë që në njërën anë qytetarët ta shprehin vullnetin në ato zgjedhje dhe në anën tjetër ta rifreskojmë legjitimitetin e institucioneve të Kosovës. Asnjëherë nuk ka pasur hendek më të madh të legjitimitetit midis ekzekutivit që teknikisht ekziston edhe popullit i cili politikisht dëshiron diçka tjetër. Prandaj, ky peticion, është duke u bërë peticioni më i madh në Kosovën e pasluftës”, tha Kryetari Kurti sot në Prizren, ku pas vizitës në Therandë dhe Mushnikovë, takimeve me struktura e qytetarë që po punojnë dhe nënshkruajnë peticionin atje, qëndroi në Prizren në hapjen e Javës së Lëvizjes që fillon me Ditën e Lidhjes.

Afër tendës së peticionit në Prizren, ku vetëm sot 8 mijë qytetarë nënshkruan për zgjedhje, Kryetari Kurti tha se Qeveria Koti që nuk varet thjeshtë prej Listës Serbe, por prej secilit deputet të kësaj liste, nuk ka as kredibilitet e as legjitimitet për të qëndruar, dhe se Lëvizja VETËVENDOSJE! që e bënë më së miri edhe qeverisjen edhe opozitën është e interesuar dhe po punon që Qeveria Koti të jetë e kotë, por jo edhe qeveri më.

Prej nesër fillon Java e Lëvizjes. Hapjen e saj e shënojmë me Ditën e Lidhjes në Prizren, për të vazhduar ditën e premte me kremtimin e 15 vjetorit të Lëvizjes tonë në sheshin ‘Skënderbeu’, dhe për ta përmbyllur me ditëlindjen e veprimtarit dhe aktivistit të shquar të çështjes kombëtare, Ukshin Hoti.

Ndërkohë që nënshkrimi i peticionit do të vazhdojë pa ndërprerje, ditën e dytë të kësaj jave të Lëvizjes, të enjten, do t’ia dedikojmë pikërisht atij, duke e shtuar punën dhe numrin e nënshkrimeve për zgjedhje të reja. Ditët e tjera, do të jenë për Mërgatën, Gruan dhe Rininë, qeverisjen lokale dhe qendrore, ku edhe do t’i prezantojmë të arriturat e qeverisjes tonë.

Ju mirëpresim në aktivitetet tona.

Sot, Lëvizja VETËVENDOSJE! ka dorëzuar në Kuvend kërkesën për interpelancë mbi heqjen e masave të reciprocitetit të Republikës së Kosovës ndaj Serbisë.

Reciprociteti është parim ndërkombëtar që bazohet në barazinë midis shteteve. Republika e Kosovës me shpalljen e pavarësisë ka subjektivitet ndërkombëtar dhe dokumentacioni apo çdo formë tjetër ndërveprimi në marrëdhëniet ndërkombëtare nuk mund të jetë ndryshe përpos se reciproke.

Barazia është parakusht, kurse reciprociteti definon shtetësinë e Kosovës në raportet me të tjerët, e sidomos me Serbinë. Është obligim shtetëror e kushtetues, përveçse në interes të shtetit që qytetarët, ndërmarrësit dhe profesionistët të trajtohen barabarësisht e pa paragjykime.

Heqja e masave të reciprocitetit, është heqje dorë nga subjektiviteti shtetëror, kurse lejimi nga Qeveria e paligjshme dhe jolegjitime i emërtimeve jo kushtetuese në kohën përkundër se kishte filluar të respektohej emërtimi kushtetues Republika e Kosovës, është zmbrapsje e dëmshme politike dhe tregtare për shtetin e Kosovës.

Sot, Kryetari Kurti vizitoi qendrat e Lëvizjes VETËVENDOSJE! në Besianë, Kastriot dhe Fushë Kosovë, të cilat edhe kanë vënë pikat për nënshkrimin e peticionit. Gjatë vizitës në Besianë, së bashku me deputetët Saranda Bogujevci dhe Shpejtim Bulliqi, ata takuan qytetarë që po nënshkruanin për zgjedhje të reja, me të cilët bashkëbiseduan edhe për rëndësinë e mbajtjes së zgjedhjeve lokale në atë qytet, të shtyra për shkak të pandemisë, që pritet të mbahen së shpejti.

Mijëra qytetarë po nënshkruajnë çdo ditë peticionin, të vetëdijshëm që zgjedhjet janë burim i legjitimitetit për një shtet demokratik dhe jo një procedurë lehtësisht e mënjanueshme apo e zëvendësueshme. Zgjedhjet nuk janë e gjithë demokracia, por nuk mund të ketë demokraci pa zgjedhje.

Javën e Lëvizjes e fillojmë nesër me Ditën e Lidhjes. Këtë 142 vjetor, te Platoja e Lidhjes së Prizrenit, duke filluar nga ora 19:00, Glauk Konjufca dhe historianja Mrika Limani Myrtaj do të mbajnë një bashkëbisedim për rëndësinë historike dhe politike të Lidhjes së Prizrenit. Ndërsa, në ora 21:00 do të bëhet ndezja e flakadanëve në kalanë e qytetit, pa marshim kësaj radhe. Ju ftojmë të merrni pjesë.

Në 21 vjetorin e çlirimit dhe 15 vjetorin e themelimit të Lëvizjes do të mblidhemi së bashku në Prishtinë, në Sheshin “Skënderbeu”, në orën 17:00, gjithnjë në përputhje me rekomandimet duke ruajtur distancën fizike.

Shihemi të premten në Prishtinë.

Sot, Kryetari Albin Kurti vizitoi disa prej pikave ku po nënshkruhet peticioni në Prishtinë. Së bashku me disa aktivistë, ai fillimisht vizitoi pikën në lagjen Kodra e Trimave, ku përherë numri i nënshkruesve është i madh, për të vazhduar në Tauk Bahçen e freskët ku takoi disa qytetarët që po e nënshkruanin peticionin, e më pas edhe në lagjen Mati, te rrethi i qytetit dhe sheshi qendror.

Nënshkrimi i peticionit po vazhdon nëpër të gjitha qytetet. Mbrëmë kaloi numrin 150 mijë, dhe besojmë se këtë javë do ta kaloj numrin 200 mijë. Qytetarët janë të bindur se e vetmja mënyrë për ta rikthyer një qeverisje legjitime në vend është përmes zgjedhjeve të lira që duhet të organizohen sa më parë.

Ditëve në vijim, Kryetari Kurti do t’i vizitojë edhe qytetet tjera ku po nënshkruhet peticioni.

Sot, një grup i deputetëve të Lëvizjes VETËVENDOSJE! ka proceduar nismën ligjore për ndryshimin dhe plotësimin e Ligjit për Zgjedhje të Përgjithshme, përmes të cilit iu mundësohet bashkatdhetarëve që të përmbushin të drejtën e tyre kushtetuese për të votuar në ambasada dhe konsullata të Republikës së Kosovës.

Mërgata përbën më shumë se 1/3 e popullsisë së tërësishme në Kosovë. Roli dhe kontributi i bashkatdhetarëve ka qenë dhe vazhdon të jetë shumë i rëndësishëm në jetën ekonomike dhe sociale e politike në Kosovë. Rreth 700 milionë euro në vit, vijnë nga mërgata. Fatkeqësisht dhe jo për fajin e saj, roli politik i mërgatës është reduktuar shumë kur bëhet fjalë përfshirjen e tyre në vendimmarrje.

Megjithëse, formalisht mundësia e pjesëmarrjes në zgjedhje ju njihej, praktikisht atyre ju është pamundësuar përmes burokracisë e pengesave teknike e administrative. Mospërputhja e numrit të madh të bashkatdhetarëve, kontributit politik, kombëtar dhe ekonomik të tyre dhe përfshirjes në zgjedhje, duhet të marrë fund, duke ju ofruar mundësi që të votojnë aty ku jetojnë, në ambasada dhe konsullata të Republikës së Kosovës.

Me projektligjin e propozuar nga deputetët e Lëvizjes VETËVENDOSJE! votuesit nga mërgata do ta kenë mundësinë që të realizojnë të drejtën e tyre kushtetuese që të votojnë në ambasadat dhe konsullatat e Republikës së Kosovës në vendet ku jetojnë.

Kosova ka nevojë për zgjedhje të reja sepse vetëm përmes tyre mund të ketë legjitimitet qeverisja e re. Për të dalë nga kjo krizë, si hap të parë po mbledhim nënshkrimet për peticionin që ka vetëm këtë kërkesë: zgjedhje të reja.

Jo qeveri pa zgjedhje e për vjedhje. Jo qeveri për ndarje e copëtim. Por zgjedhje, demokraci e zhvillim.

https://www.duamzgjedhje.org/