Mijëra dërgesa me fletëvotime të bashkatdhetarëve të nisura brenda afatit dhe para datës së zgjedhjeve, e të cilat padrejtësisht Komisioni Qendror i Zgjedhjeve nuk i kishte shqyrtuar dhe numëruar, me vendimin e sotëm të Gjykatës Supreme ato do të numërohen dhe do të bëhen pjesë e rezultatit të zgjedhjeve.

E drejta e votës si e drejtë kushtetuese, është e garantuar dhe nuk mund të mohohet me justifikime teknike që bien ndeshë me ligjet dhe Kushtetutën e Republikës. Andaj, Gjykata Supreme shmangi një padrejtësi të madhe, e konfirmoi një të drejtë kushtetuese të mijëra votuesve nga mërgata.

Kërkojmë që pa humbur kohë të fillojë shqyrtimi dhe numërimi i këtyre fletëvotimeve, që vullneti i votuesve nga mërgata të përfshihet në rezultatin përfundimtar.

Kryetari Kurti, së bashku me anëtarin e Kryesisë së Lëvizjes, z. Xhelal Sveçla, priti sot anëtarin e Partisë Demokratike Turke të Kosovës (KDTP) z. Fikrim Damka.

Me z. Damka biseduam për mbarëvajtjen dhe rezultatin e zgjedhjeve, planet e qeverisë së re dhe për mundësitë e një bashkëpunimi për shtetndërtim demokratik me progres shoqëror dhe ekonomik për vendin.

Kryetari Kurti e njoftoi z. Damka se prioritetet i qeverisë së re do të jetë zhvillimi ekonomik që sjell punësim, luftimi i korrupsionit të lartë dhe politikat që zbusin pabarazinë në shoqëri. Kurti e siguroi se qeveria e re do t’i trajtojë të gjithë qytetarët e Republikës si të barabartë dhe do të punoj për zhvillimin dhe integrimin e të gjitha pakicave kombëtare në vend, pa bërë dallime.
​
Në fund të takimit, u shpreh gatishmëria për ta shtuar komunikimin dhe bashkëpunimin mes nesh në të ardhmen.

Kryetari i Lëvizjes, z. Albin Kurti, priti sot në takim, ambasadorin italian z. Piero Cristoforo Sardi.

Z. Sardi përshëndeti mbarëvajtjen e rregullt të procesit zgjedhor duke vlerësuar pjesëmarrjen aq të madhe të qytetarëve në zgjedhjet demokratike në vend. Ai tha se, pas çertifikimit të rezultateve, është e rëndësishme të formohen institucionet dhe qeveria e re.

Z. Kurti e falënderoi ambasadorin Sardi për përkrahjen e deritanishme të Italisë ndaj Republikës së Kosovës dhe shprehu bindjen se me qeverinë e re bashkëpunimi mes dy vendeve tona do të ndërtohet e avancohet tutje. Kryetari Kurti e njoftoi ambasadorin se prioritet i qeverisë së re do të jetë zvogëlimi i pushtetit për forcim të shtetit, drejtësia institucionale e ligjore dhe zhvillimi ekonomik e punësimi. Në këtë drejtim, tha ai, janë duke u zhvilluar bisedimet nga Lëvizja VETËVENDOSJE! dhe Lidhja Demokratike, që do t’i japin qeverinë e re Republikës. Për fund, z. Kurti foli edhe për parregullsitë dhe shkeljet gjatë procesit zgjedhor në komunat me shumicë serbe ku mungojnë sundimi i ligjit, pluralizmi politik e demokracia.

Në mbyllje të takimit, u shpreh interesimi për kontakte të vazhdueshme dhe takime bashkëpunuese në të ardhmen.

Sot pasdite kryetari Albin Kurti i shoqëruar nga deputetet Fitore Pacolli dhe Saranda Bogujevci vizituan Zyrën për Punë Jashtme të Qeverisë Britanike.

Kryetari Kurti u prit nga z. Andrew Page, kryesuesi i Departamentit për Ballkanin Perëndimor, znj. Lamce Domm, nënkryetare e departamentit për Ballkanin Perëndimor, znj. Catherine Barnes, kryesuese e sektorit për Kosovë, Shqipëri dhe Maqedoninë e Veriut, znj. Helen Walker, kryesuese e sektorit për Serbi dhe Mal të Zi, znj. Lisa Farrington zyrtare përgjegjëse për Serbi, znj. Elise Nelson zyrtare përgjegjëse për Kosovë, znj. Rachel Chetham, kryesuese e zyrës për Siguri dhe Luftimin e Krimit të Organizuar, znj. Gemma Warren, kryesuese e sektorit për marrëdhenie të jashtme dhe shumëpalëshe.

Z. Page shprehu interesim të kuptojë prioritetet e qeverisë së ardhshme dhe për mënyrat e bashkëpunimit dhe përkrahjes që mund të na ofroj Britania e Madhe në realizimin e tyre. Kryetari Kurti prezantoi zotimet dhe hapat e menjëhershëm që do të ndërmarrë qeveria e re duke veçuar reformën në sistemin e drejtësisë dhe luftimin e korrupsionit dhe krimit të organizuar, reformat në sistemin e edukimit dhe ndërlidhjen e arsimit me ekonominë, kthimin e trurit, dhe themelimin e fondit sovran e të bankës për zhvillimore në vend.

Z. Page deklaroi se është i gatshëm të thellojë bashkëpunimin me qeverinë e re dhe të ndihmojë e të ofrojë ekspertizën e Britanisë në fushën e drejtësisë, në veçanti në fushën e konfiskimit të pasurisë së pajustifikueshme, në fushën e reformimit të kurikulave dhe përmirësimin e edukimit primar dhe sekondar.

Dje në Parlamentin Britanik në Londër u shtrua një darkë nga ana e Grupit të Miqësisë me Kosovën, John Grogan, deputet i Partisë Laburiste dhe Martin Vickers, deputet i Partisë Konservatore, për nder të kryetarit të Lëvizjes VETËVENDOSJE!, Albin Kurti dhe të deputeteve Fitore Pacolli dhe Saranda Bogujevci.

Në darkë morën pjesë edhe Alex Sobel, deputet i Partisë Laburiste, Nick Dakin, deputet i Partisë Laburiste, Earl of Sandwich John Montag dhe Lordi Dykes. Në një atmosferë të ngrohtë e miqësore u shkëmbyen mendime e ide rreth situatës socio-ekonomike, politike e rajonale, si dhe për prioritetet e qeverisë Kurti.

Delegacioni i Lëvizjes VETËVENDOSJE! vazhdon me vizitën dyditore në Britani të Madhe.

Sot, Lëvizja VETËVENDOSJE! ushtroi ankesë në Panelin Zgjedhor për Ankesa dhe Parashtresa lidhur me mosnumërimin në Qendrën e Numërimit të Rezultateve të 4639 të dërgesave postare me fletëvotime të ardhura nga mërgata.

Mbrëmë u numëruan 13 491 fletëvotime të votuesve nga mërgata. Presim që PZAP, të marrë vendim brenda afateve ligjore dhe të urdhëroj KQZ-në, shërbimin për votimin jashtë vendit, që pa vonesë të procedojë për numërim të gjitha fletëvotimet e ardhura nga mërgata jonë.

Arsyetimet procedurale që artificialisht po i mbivendosen vullnetit të lirë të zgjedhësve nga mërgata e cenojnë demokracinë. Andaj ato fletëvotime duhet të numërohen.

Qindra aktivistë, anëtarë e simpatizantë të Lëvizjes VETËVENDOSJE! u mblodhën mbrëmë në festën e fitores. Vullneti i fuqishëm, puna e përkushtimi i jashtëzakonshëm i të rejave dhe të rinjve, grave dhe burrave sollën ndryshimin për Republikën. Pa këtë lloj aktivizmi fitorja do të ishte e pamundur. Teksa një numër i madh i qyetarëve po festonin, një numër tjetër i konsiderueshëm dhe më ndërrime po mbronin votën e qyetarëve në Qendrën e Numërimit. Deri në çertifikimin e rezultateve në të cilën kohë po thellohet edhe më shumë diferenca e Lëvizjes me subjektet e tjera ne po bëjmë përgatitjet maksimale për një qeverisje ndryshe, me mendësi të re dhe për të gjithë.

Urime!

Kryetari i Lëvizjes, z. Albin Kurti, mirëpriti sot në zyrën e tij, ambasadorin e Republikës së Shqipërisë, z. Qemal Minxhozi.

Z. Minxhozi e uroi kryetarin Kurti për rezultatin zgjedhor dhe për organizimin e fushatës që arriti t’i adresojë me sukses brengat e qytetarëve të Republikës. Ai përshëndeti daljen e madhe të qytetarëve në këto zgjedhje që tregoi pjekuri e vendosmëri për ndryshime.

Z. Kurti e falënderoi ambasadorin Minxhozi për urimin dhe e njoftoi atë për nismat që do t’i ndërmarrë qeveria e re në funksion të sovranizimit, zhvillimit dhe bashkëpunimit të Kosovës e Shqipërisë. Ne do të angazhohemi, tha ai, që në të ardhmen të kemi komisione të përbashkëta qeveritare sa i përket politikës së jashtme, burimeve natyrore dhe mbrojtjes e sigurisë. E, po ashtu, edhe një regjistër të përbashkët të bizneseve e për një regjistër të përbashkët civil, për sistem unik doganor, për një sistem të integruar elektro-energjetik dhe për një treg të përbashkët. 50 marrëveshjet e nënshkruara mes shteteve tona nuk do të mbesin në letër por do të zbatohen.

Dje, Kryetari i Lëvizjes VETËVENDOSJE!, z. Albin Kurti, mirëpriti një delegacion nga Lugina të kryesuar nga Kryetari i Komunës së Preshevës, z. Shqiprim Arifi, Nënkryetari i kësaj komune, z. Armend Aliu, Kryetari i Degës së Alternativës për Ndryshim – Dega Bujanoc, z. Arbër Pajaziti dhe Shefi i Zyrës për të Rinj në Preshevë, z. Altin Boriçi.

Z. Shqiprim Arifi e uroi Kryetarin Kurti për rezultatin zgjedhor dhe për mbarëvajtjen e drejtë dhe të rregullt të gjithë procesit. Pjesëmarrja kaq e madhe e qytetarëve të Republikës së Kosovës në këto zgjedhje tregon se interesimi për politikën dhe besimi për ndryshime janë në rritje dhe se kjo është një gjë e mirë si për Kosovën ashtu edhe për gjithë shqiptarët.

Kryetari Kurti i falënderoi për vizitën dhe urimet. Ai tha se Institucionet e Kosovës dhe Shqipërisë duhet të angazhohen më shumë për shqiptarët, e bashkarisht të bëjnë më shumë për ta, sidomos në Luginë, me qëllim që të rritet punësimi e të bie emigrimi, të shtohet cilësia në arsim e të realizohen të drejtat kombëtare e njerëzore.

Fitorja e Lëvizjes i ka dhënë një kuptim përpjekjeve historike të shqiptarëve për një politikë barazimtare me dinjitet dhe kjo tashmë po ndihet gjithandej.

Kryetari i Lëvizjes, z. Albin Kurti, së bashku me anëtaren e Kryesisë znj. Fitore Pacolli, priti sot në takim ambasadorin e Mbretërisë së Bashkuar në Kosovë, z. Nicholas Abbott dhe Kryesuesin e Departamentit Politik në Ambasadën Britanike, z. Samuel Paice.

Z. Nicholas Abbott e uroi Kryetarin Kurti për suksesin zgjedhor. Ai tha se Mbretëria e Bashkuar do ta vazhdojë përkrahjen për Republikën e Kosovës. Përveç luftimit të korrupsionit, nevojitet edhe përqendrimi i mëtejshëm edhe në krijimin e kushteve të reja për investime dhe mundësi për të rinjtë në vend.

Z. Kurti e falënderoi ambasadorin Abbott për përkrahjen e deritanishme të Mbretërisë së Bashkuar dhe shprehu bindjen se me qeverinë e re bashkëpunimi mes dy vendeve tona vetëm sa do të thellohet. Kryetari Kurti e njoftoi ambasadorin se prioritet i qeverisë së re do të jetë zvogëlimi i pushtetit për forcim të shtetit, drejtësia institucionale e ligjore dhe zhvillimi ekonomik e punësimi. Sa i përket procesit zgjedhor, ai tha se nevojitet adresimi i parregullsive dhe shkeljeve që e përcollën atë në komunat me shumicë serbe si dhe fillimi i dialogut nga poshtë me serbët lokal që jetojnë në Kosovë.

Sot, në zyrën e Lëvizjes VETËVENDOSJE!, Kryetari Kurti, së bashku me anëtaren e Kryesisë së Lëvizjes, znj. Arbërie Nagavci, pritën në takim ambasadorin e Turqisë në Kosovë, z. Çağrı Sakar.

Z. Çağrı Sakar e uroi Kryetarin Kurti për rezultatin zgjedhor dhe mbarëvajtjen e procesit zgjedhor. Ai tha se mbështetja e Turqisë do të vazhdojë dhe se me rëndësi është të zhvillohet një partneritet mes dy vendeve tona sidomos në fushën e ekonomisë dhe shëndetësisë. Turqia po ashtu do ta ndihmojë dhe e përkrahë anëtarësimin e Republikës tonë në NATO dhe organizmat tjerë ndërkombëtarë.

Nga ana e tij, Kryetari Kurti e falënderoi ambasadorin për mbështetjen e vazhdueshme të Turqisë, duke shprehë besimin se partneriteti mes republikave tona do të përparojë me qeverinë e re të Kosovës. Shqiptarët në Turqi mund të jenë një urë e fuqishme për bashkëpunim ekonomik në mes të Republikës së Kosovës dhe Republikës së Turqisë dhe me qeverinë e re do të shtrohet mundësia që kjo të ndodhë. Gjithashtu, në aspektin e shëndetësisë mund të bëhen përmirësime të ndjeshme, si dhe në fushën e mbrojtjes dhe sigurisë që do e forconte aleancën mes dy shteteve tona.

Në mbyllje të takimit u shpreh gatishmëria për ta vazhduar si komunikimin ashtu edhe bashkëpunimin mes nesh.

Më 20 tetor 2019, në Zvicër do të mbahen zgjedhjet parlamentare në nivelin federal. Diaspora shqiptare atje është e madhe në numër, e suksesshme në angazhimet e saj dhe e fuqishme ekonomikisht. Interesat dhe të drejtat e shqiptarëve në Zvicër duhet të përfaqësohen sa më shumë edhe në nivelin institucional. Bashkatdhetarët tanë tanimë janë më të organizuar se më parë dhe po marrin pjesë në garë për këto zgjedhje.

Nëpërmjet kësaj letre publike, Lëvizja VETËVENDOSJE! mbështet kandidatët shqiptarë në Zvicër, të cilët garojnë në zgjedhjet parlamentare në nivelin federal, të cilat mbahen më 20 tetor, 2019.

Disa nga këta kandidatë janë:

1. Shëndrit Sadiku, i cili garon në Kantonin Schaffhausen nëpërmjet Partisë Socialiste të Zvicrës

2. Ylfete Fanaj, e cila garon në Kantonin Luzern nëpërmjet Partisë Socialistë të Zvicrës

3. Arbër Bullakaj, i cili garon në Kantonin St.Gallen nëpërmjet Partisë Socialistë të Zvicrës

4. Islam Aliaj, i cili garon në Kantonin Zürich nëpërmjet Partisë Socialistë të Zvicrës

Gjithashtu, nëpërmjet kësaj letre, Lëivzja VETËVENDOSJE! mbështet të gjithë kandidatët shqiptarë, në të gjitha subjektet politike të cilat përpiqen për politika progresive dhe në të mirë të mërgatës shqiptare, dhe nxitë shqiptarët në Zvicër dhe veçanërisht strukturat e Lëvizjes VETËVENDOSJE! atje, që të angazhohen në fushatat zgjedhore të të gjithë kandidatëve shqiptarë.

Këto zgjedhje janë mundësia e diasporës tonë që të krijojë hapësirë për përparimin e të drejtave dhe interesave të kombit shqiptarë në Zvicër dhe më gjerë.

Akademia Suedeze vendosi që për vitin 2019 çmimi Nobel t’i shkojë shkrimtarit austriak Peter Handke. Justifikimi i vendimit që ka marrë akademia ka qenë tërësisht letrar, mirëpo letërsia ka një autor, të cilit i jepet çmimi. E ky autor, Peter Handke, ka qenë mbështetësi më i famshëm i spastruesit etnik, Millosheviqit, gjatë kohës kur elitat ndërkombëtare të kulturës, e më pas edhe ato të politikës, u distancuan dhe e dënuan politikën e tij gjenocidale.

Ç’prej 1996 Handke u angazhua me publicistikë në mbështetje të veprimeve kriminale të Serbisë në Bosnjë, duke u përpjekur të mohojë gjenocidin në Srebrenicë, ku humbën jetën mijëra të pafajshëm. E në 1999, kur miliona shqiptarë ishin përzënë nga shtëpitë e tyre dhe nga vendi i tyre, Handke doli në përkrahje të Millosheviqit. Në 2006, kur kryeshovinisti serb vdiq i padënuar kurrë, në burgun e Hagës, shkrimtari austriak mori pjesë në ceremoninë funerale, ku mbajti një fjalim lavdërues për Millosheviqin para dhjetëra mijëra adhuruesve të atij krimineli.

Për kujtesën e viktimave të dhunës serbe në Kosovë, për mbi 12.000 të vrarët gjatë luftës, për mbi 20.000 gra, burra e fëmijë të dhunuar seksualisht, për njerëzit të cilët vuajtën dhe ende vuajnë traumën e pësuar, për familjarët e mbi 1600 personave ende të pagjetur, ky çmim i dhënë nga Akademia Suedeze për Peter Handken është fyerje e rëndë. Plagët ende të pambyllura, dhembin e djegin. Nuk është letërsi e mirë, nuk është letrar i mirë, ai që i bashkohet dhunës së luftës, ai që poshtëron e fyen viktimat.

Lëvizja VETËVENDOSJE! zyrtarisht proteston ndaj dhënies së këtij çmimi për këtë autor.

Z. Jean Hubert Lebet e uroi kryetarin Kurti për rezultatin zgjedhor dhe për fushatën që adresoi me sukses shqetësimet e qytetarëve.

Kryetari Kurti e njoftoi se prioritet i qeverisë së re do të jetë shtetndërtimi demokratik me sundim të ligjit e luftim të korrupsionit, zhvillimi ekonomik për punësim dhe ndryshimet aq të nevojshme në shëndetësi, arsim, e kujdes për ata që kanë më së shumti nevojë.

Në mbyllje të takimit, u shpreh interesimi për kontakte dhe takime bashkëpunuese në të ardhmen.

Kryetari i Lëvizjes VETËVENDOSJE!, Albin Kurti, së bashku me nënkryetarin Besnik Bislimi, sot priti në takim Ambasadorin e ShBA-së në Kosovë, shkëlqesinë e tij, z.Philip S. Kosnett, shoqëruar nga këshilltarja politike, znj.Jessica Long dhe zyrtarja politike, znj.Mia Ter Har.

Në një takim miqësor, ambasadori Kosnett shprehu kënaqësinë e tij për mbarëvajtjen e procesit zgjedhor, pjesëmarrjen e lartë të qytetarëve dhe uroi kryetarin Kurti për një fushatë që adresoi shqetësimet e votuesve. Ai tregoi interesim të veçantë në përparimin kundër korrupsionit, për ekonominë, dhe për përparimin në dialogun me Serbinë, drejt arritjes së një marrëveshje gjithëpërfshirëse që do të sillte stabilitet dhe paqe të qëndrueshme në rajon.

Nga ana e tij, kryetari Kurti e siguroi z.Kosnett se do të jetë kryeministër për të gjithë qytetarët e Kosovës. Ai e njoftoi ambasadorin se konsolidimi i brendshëm i Kosovës me shtetndërtim demokratik, sundim të ligjit, zhvillim ekonomik dhe progres shoqëror është prioritet që do ta zbatojë, meqë edhe nevojat e qytetarëve e vullneti i tyre i shprehur në këto zgjedhje ishte për këtë.

Kryetari Albin Kurti tha se dialogu do të fillojë me serbët e Kosovës, nga poshtë lartë për zhvillim e integrim të serbëve qysh në javën e parë. Ndërkaq, në muajin e parë nevojitet takim me z.Borrel, përfaqësuesin e ri të lartë të BE-së për Siguri e Politikë të Jashtme, si dialog me Brukselin për dialog me Serbinë, sepse dialogu me Serbinë duhet të jetë i përgatitur mirë e me parime të qarta. Paraprakisht duhet të mbyllet kapitulli i 33 marrëveshjeve të mëhershme, përkatësisht vlerësimi i zbatimit dhe i ndikimit të tyre. Nuk duhet të vonohemi por s’kemi as pse nxitohemi e bëjmë gabime që na kushtojnë pastaj.

Në fund të takimit, të dy palët shprehën interesimin për komunikim të vazhdueshëm e takime të mëtutjeshme.

Sot pritëm shumë mërgimtarë entuziastë të sapoardhur në Kosovë nga ShBA-të, Anglia, Gjermania, Zvicra e Austria, për tubimin e fundit të madh sonte e për votimin, fitorën e festën e së dielës. Mijëra të tjerë në kufij, në ajër e në nisje drejt vendit i përshëndetëm dhe i uruam rrugë të mbarë për në atdhe.
Mërgata e ka mbështetur gjithmonë ndryshimin dhe Lëvizjen tonë. Madje edhe paqen sociale e mbijetesën në Kosovë e kemi vetëm falë remitancave të tyre.

Megjithatë, të dielën mërgata do të votojë për më shumë se paqe e mbijetesë, do të votojë për ardhjen e barazisë, drejtësisë e zhvillimit në Kosovë. Varfëria, papunësia e mungesa e të ardhmes i detyroi të fluturojnë nëpër botë, angazhimi i Lëvizjes po i ngazëllen të fluturojnë prapa në shtëpi për të mundësuar vendin që patën ëndërruar e e lëshuar.

Mërgata jonë është vula e fitorës sonë. Me mërgatën dhe me qeverinë Kurti e ardhmja do të jetë e ndritur e me plot mundësi për rikthimin e investimin e tyre.

Tubimi e trumpetimi masiv i radhës për fitoren e Lëvizjes u mbajt në Vushtrri. Të pranishëm ishin edhe qindra mërgimtarë të sapo kthyer për të votuar e shpërndarë lajmin për për fitoren e Lëvizjes.

Besim Muzaqi, si kandidat dhe si Kryetar Qendre, në fjalwn e parë tha se erdhi dita për fëmijët që të kenë shtesa, erdhi dita për bujkun, fermerin e prodhuesin qëë të subvencionohen drejt, për pacientët që të kenë trajtim e shërim, për profesionistët që të kenë punë e llogari, studentët bursa e sigurime shëndetësore për policët e zjarrfikësit. Ndërsa kandidati i ri Gazmend Gjyshinca shprehu me bindje se pas çdo rrënimi të kobshëm ka një shpresë që vjen hovshëm, pas Kosovës që e kanë gjunjëzuar është një Lëvizje që po vjen për ta shpëtuar. “Rinia është gjenerata që ka më së shumti nevojë për ndryshim dhe do ta votojë më së shumti qeverinë Kurti”, tha ai.

Kandidatja Albulena Haxhiu iu drejtua qytetarëve e bindur se pas 6 tetorit hajnave, mungesës së përgjegjshmërisë, improvizimeve, krimit të organizuar, pabarazive dhe padrejtësive iu vjen fundi. “Qytetarët dhe Lëvizja nuk kanë asnjë dilemë, sepse të gjithë e dimë se ne nuk e duam pushtetin për ta kthyer në parti, por e duam pushtetin për ta vënë shoqërinë në Lëvizje”, tha Haxhiu.

Në fjalën e radhës, Glauk Konjufca, kujtoi se në politikën tonë kemi më shumë se kurrë nevojë për shembullin e Hasan Prishtinës dhe ne në këtë sallë e kemi shembëllimin e tij, modelin e Hasan Prishtinës dhe ky është Albin Kurti. Në gjurmët e Hasan Prishtinës dhe besnike ndaj Republikës së Kosovës, Konjufca u zotua se qeveria Kurti në punësim do të vendosë merita, në arsim dija, në shëndetësi përgatitja, në ekonomi profesionalizmi, sepse në qeveri do të vendosë VETËVENDOSJE!”.

Albin Kurti si kryeministër në ardhje iu drejtua mijëra të pranishëmve se epoka e zhvillimit e përparimit do të njohë 2-fishimin e prodhimit bujqësor përmes granteve, subvencioneve e mbrojtjes së prodhimit vendor dhe se fitimi nga bujqësia do të 5-fishohet nga nxitja e hapjes së fabrikave për përpunimin e produkteve bujqësore. “Lëvizja VETËVENDOSJE! pas 6 tetorit nuk do të lejojë që toka bujqësore të shndërrohet në sheshe ndërtimi ku shpërlahen paratë e kontrabandës e krimit të organizuar, Kosova nuk ka tokë për të shitur, ndotur e lënë djerrë. Ne do t’ia kthejmë bujkut arën cilësore dhe arës rendimentin e lartë”, tha i pari i fitores së madhe dhe shtoi se, “Lëvizja VETËVENDOSJE! ofron mbrojtje sociale, sepse me program nëpërmjet mbrojtjes sociale edhe punëtori edhe i papuni, dhe jo vetëm pronari e i pasuri, bëhen qytetarë të Republikës me të drejta të barabarta e të barbartë para ligjit”

Në fund të fjalës Kryeministri që po e pret mbarë shqiptaria iu bëri thirrje të gjithë qytetarëve se, “gënjeshtra është si kredia, kënaqu sot e paguaj nesër. Këta kanë gënjyer sa kanë mundur e me 6 tetor bëni që ta paguajnë shtrenjt duke votuar Lëvizjen VETËVENDOSJE!”

Dje, një delegacion nga Partia Socialdemokrate e Zvicrës, i udhëhequr nga deputetja shqiptare në Kantonin e Zurich-ut, Qëndresa Sadriu, vizitoi Lëvizjen VETËVENDOSJE!. Delegacioni u prit nga Sekretari për Marrëdhënie me Jashtë, Kreshnik Ahmeti, kandidatët për deputetë Arben Vitia dhe Venera Llunji, dhe këshilltari i Kuvendit Komunal të Prishtinës, Egzon Azemi.

Në këtë takim, delegacioni nga Zvicra i përbërë nga deputet të nivelit kantonal e të qyteteve, u interesuan për fushatën zgjedhore dhe prioritetet qeverisëse të Lëvizjes VETËNDOSJE!. Ata u njoftuan me 20 prioritetet qeverisëse, të cilat janë zgjidhja e vetme për tejkalimin e krizës kronike ekonomike e sociale në vend. Me këtë rast, u diskutuan problemet e punësimit dhe zhvillimit të ulët ekonomik dhe masat konkrete të cilat do t’i zbatojë qeverisja e VETËVENDOSJE!-s në mandatin e radhës.

Në anën tjetër, në këtë takim u shkëmbyen përvojat e strategjive dhe metodave të fushatave zgjedhore. Përfaqësuesit nga Partia Socialdemokrate e Zvicrës u njoftuan me fushatën zgjedhore të Lëvizjes VETËVENDOSJE! dhe me faktin që subjekti ynë ka shpenzimet më të ulta të fushatës, sepse është i bazuar në aktivistët/et dhe vullnëtarët/et e saj, dhe se është subjekti i vetëm i cili po i respekton rregullat e fushatës me rigorozitet.

Në fund palët u pajtuan që t’i vazhdojnë kontaktet edhe në të ardhmen, me ç’rast delegatët nga Zvicra shprehën dëshirën që të marrin pjesë në tubimin e fitores së Lëvizjes VETËVENDOSJE!, i cili mbahet sot, më 4 tetor, në ora 20:00, në sheshin “Skenderbeu” në Prishtinë.

Erdhi dita që nga këto vende ku frymoi liria e u bënë ndryshimet e kohës të ngrihet qeveria Kurti.

Drilona Jakaj që kandidon nga komuna e Klinës, shprehi shqetësimin për gratë e papuna dhe punëtorët e sektorit privat, duke shprehë bindjen se Qeveria e re do të rris punësimin dhe do kujdeset për punëtorin. Kurse kandidatja Drita Millaku theksoi se me Lëvizjen do të ketë sistem të informimit shëndetësor e sigurime shëndetësore, punësim e mirëqenie për të gjithë e pa diskriminim.

Kandidati nga Skenderaj, Nezir Bejta pohoi se me Qeverinë Kurti përfundon qeverisja e asfaltit që largoi bujqit nga toka, nxënësit nga shkolla dhe të rinjtë nga vendi. Kandidati Enver Dugolli tha se Drenica nuk ka sakrifikuar që disa të pasurohen. Erdhi dita që Drenica ta thotë fjalën e saj për një shtet ku ka punësim e mundësi të barabarta për të gjithë.

Fitore Pacolli potencoi se pas 6 tetorit nuk do të ketë më emra fëmijësh që thirren nëpër sheshe të Kosovës. Shteti do të përkujdeset për shëndetin e gjithë qytetarëve të vendit. Shteti do përkujdeset t’i nxjerrë familjet nga varfëria ua dhënë mundësinë e zhvillimit.

10-tshi, siç e thërrasin nëpër tubime, gjenerali Rexhep Selimi tha se pas 6 tetorit qyteti i Mujës dhe Ademit do të frymojnë lirshëm ashtu siç deshën ata. Një kombinim i Drenicës dhe Lëvizjes VETËVENDOSJE! është një kombinim që tremb çdo armik të jashtëm e të brendshëm të këtij vendi. Andaj me 6 tetor, Klina dhe Drenica po ngriten në këmbë me Lëvizjen dhe për Albin Kurtin Kryeministër.

Kandidati Glauk Konjufca u shpreh se kjo nuk është Kosova për të cilën u flijuan dëshmorët duke theksuar që secili politikan që del para popullit për t’i kërkuar diçka duhet ta ketë në mendje e zemër gjakun e atyre që u flijuan për themelet e këtij shteti. Qeverisjes së deritanishme i erdh fundi dhe nga e diela në krye të vendit do të jenë ata që zhvillojnë punësimin e shëndetësinë, drejtësinë e barazinë, e atyre që kujdesen për të rinjtë dhe të moshuarit, e Lëvizjes VETËVENDOSJE! dhe e kryeministrit Albin Kurti.

Pan-i po bjen se dita po vjen.

Në Prizrenin e historisë e bukurisë, mes mijëra qytetarësh deri në majat e pallatit të sportit, Lëvizja mbajti tubimin madhështor për fitoren e jashtzakonshme të 6 tetorit.

Në hapje, Kryetari i Komunës, Mytaher Haskuka deklaroi se, “me Albinin Prizrenit do t’ia kthejmë shkëlqimin dhe Kosovës zhvillimin”. Pas 6 tetorit fabrikat do të kenë makina e punëtorët punë me dinjitet, trashëgimia do të mbrohet e nderohet, spitalet do të garantojnë shëndet dhe shkollat arsim bashkëkohor e emancipues.

Për kandidatin e Kryetarin e Qendrës Artan Abrashi, “me 20 pikat e programit të qeverisë Kurti askush më nuk do të jetë i braktisur, punëtori do të jetë i mbrojtur, prodhuesi i mbështetur, bukju i subvencionuar, mjeku do të jetë i pajisur “. Ndërsa kandidatja tjetër nga Prizreni, Drita Millaku u bëri thirrje qytetarëve që, “me 6 tetor mos hezitoni të dilni e të votoni nëse keni ëndërr për ndryshim, besoni VETËVENDOSJE!-n dhe besoni Albinin. Distanca mes ëndrrës e realizimit të saj quhet veprim e në këtë rast votim”.

Sipas kandidatit Arbër Rexhaj dallimi mes Lëvizjes e rivalëve tanë politik është se, “me ne Koosva bëhet republikë ndërsa me ta Kosova mbetet pa republikë”, “me Albin Kurtin do të kthehet çdo ëndërr e thyer, çdo fëmijë i përbuzur do të ketë ëndrra dhe trajtim dinjitoz”. Në fjalën e radhës Hajrulla Çeku pohoi, “janë 3 gjëra që duhet t’i bëjmë urgjentisht: duhet ta ndalojmë hajninë e zhvatjen e shtetit, duhet ta ndalojmë ikjen e rinisë dhe duhet ta ndalojmë degradimin e burimeve natyrore dhe të shtetit tonë”.

Në përmbyllje të tubimit, me temperaturat rritur nga ngazëllimi i zjarrtë i të rinjve, Kryeministri i 6 tetorit Albin Kurti kujtoi se, “që nga ndërhyrja e NATO-s e çlirimi i vendit, që nga dita e shpalljes së pavarësisë, nuk kemi parë një ngazëllim në zemra e shkëlqim në sy të popullit tonë sikurse e shohim tani” dhe vazhdoi të thotë, “dje në Gjakovë i shpallëm luftë varfërisë dhe sot në Prizren po i shpallim luftë pabarazisë”. Për bindjen e Albin Kurtit dhe për të ardhmen e vendit gratë do të kenë barazi gjinore e shanse të barabarta në shoqëri, ndërsa për punëtorët, “unë zotohem para jush se siguria në punë, të drejtat e punëtorëve dhe dinjiteti i tyre do të jenë prioritet i qeverisë së VETËVENDOSJE!-s pas 6 tetorit”.

Më në fund, Prizrenit e Kosovës i erdhi dita e shumë pritur e luftës kundër varfërisë e luftës për barazi, zhvillimit në ekonomi dhe dinjitetit në punë. Pas 6 tetorit ndryshon humori i qytetarëve, ngazëllimi e virtyti do të na mbajnë gjallë në një të ardhme me të mirën e përgjithshme për të gjithë.

Mbrëmë Lëvizja VETËVENDOSJE! pranoi mbështetjen ndërkombëtare të radhës. Internacionalja Socialiste, organizatë e cila përbëhet nga 147 subjekte socialdemokrate nga e gjithë bota dhe pjesë e së cilës është edhe Lëvizja VETËVENDOSJE!. Nëpërmjet letrës së mëposhtme Internacionalja Socialiste mbështet Lëvizjen si qeverisja e ardhshme dhe Albin Kurtin si kryeministri i saj, si zgjidhjen e vetme për situatën e rëndë politike, ekonomike dhe sociale në Republikën e Kosovës.

Më poshtë gjeni letrën e përkthyer ne shqip:

I dashur shok, I dashur mik,

Në emër të familjes botërore politike të Internacionales Socialiste, anëtare e së cilës është edhe subjekti juaj, është kënaqësia ime që t’ua dërgoj juve, dhe nëpërmjet juve të gjithë anëtarëve të Lëvizjes VETEVENDOSJE!, urimet më të mira për sukses në zgjedhjet e ardhshme të 6 tetorit.

Në këtë kohë të vështirë e cila aktualisht na sundon, ekonomikisht ashtu sikurse politikisht, sot është më e qartë se asnjëherë më parë se populli i Kosovës do të përfitonte nga programi i juaj socialdemokrat, të cilin e përfaqësoni dhe për të cilin e angazhoheni ju e i cili bazohet në vlerat dhe parimet të cilat i ndajmë të gjithë gjithandej në familjen tonë botërore politike. Në këtë përpjekje, ju mund të llogarisni në mbështetjen e Internacjonales Socialiste.

Suksesi juaj në zgjedhjet e se dielës është sukses për të gjithë ne dhe është e sigurtë që do të jetë e dobishme jo vetëm për Kosovën, por edhe për regjionin dhe më gjerë.

Përshëndetje vëllazërore,

Luis Ayala

Sekretar i Përgjithshëm