Mbrëmë, në kuadër të fushatës zgjedhore, Lëvizja VETËVENDOSJE! mbajti tubim në fshatin Çabër të Komunës së Zubin Potokut dhe Lagjen e Boshnjakëve të Mitrovicës së Veriut. Kandidatët për kryetarë nga këto dy komuna, Liridona Kahrimani dhe Erden Atiq të shoqëruar edhe nga Kryetari i Lëvizjes Albin Kurti, deputetët, Rexhep Selimi e Xhelal Sveçla e nga Kryetari dhe Nënkryetari i Komunës së Mitrovicës, Agim Bahtiri e Faruk Mujka, shpalosën para qytetarëve të kësaj ane prioritetet për këtë zonë.

Korrupsioni mirëmbahet nga prokuroria dhe gjyqësori për sa kohë nuk ka asnjë profil të lartë të dënuar përfundimisht.

Lëvizja VETËVENDOSJE! organizoi në ambientet e Kuvendit të Kosovës tryezë mbi korrupsionin e profilit të lartë. Në tryezën e moderuar nga deputetja e Lëvizjes Albulena Haxhiu parashtrimet hapëse i mbajtën Betim Musliu nga Instituti i Kosovës për Drejtësi, Berat Thaqi nga Instituti GAP dhe Taulant Kryeziu nga Instituti EPIK. Në diskutim morën pjesë shumë deputetë të opozitës dhe organizata joqeveritare.

Korrupsioni dhe krimi i organizuar është kthyer në problemin kryesor në Kosovë në kushtet kur nuk qeveriset me një  projekt zhvillimor. Projektet e mëdha publike përdoren jo për zhvillim, por për të zhvatur paratë e tyre. Me gjithë skandalet e shumta, akoma nuk kemi asnjë dënim përfundimtar për rastet e korrupsionit të profilit të lartë.

Akt-akuzat që ngrihen përgjithësisht bazohen në axhenda partiake apo në grupe të tjera të interesit brenda policisë dhe gjykatave. Shumica janë ngritur për shkelje administrative dhe jo për korrupsion. Dosjet e tyre kanë gjysmë-prova dhe gjysmë-të-vërteta. Aktakuzat e shumta të prokurorisë speciale që rrëzohen që në seancën fillestare tregojnë se ato ngrihen qëllimisht për të dështuar.

Rrëzimi i akt-akuzës së prokurorit Blakaj për listat e rreme të veteranëve dhe fakti se kryeprokurori i Kosovës ka ardhur në detyrë falë aferës Pronto tregojnë se puna e prokurorisë sabotohet nga brenda. Madje, kryeprokurori Lumezi ka shkuar edhe më tutje duke e centralizuar prokurorinë deri në pikën sa çdo procedim për korrupsion në nivele të larta duhet paraprakisht të miratohet prej tij.

Për të ndërhyrë në këtë situatë në tryezë dolën rekomandimet e mëposhtme:

• Për të ndryshuar gjendjen e drejtësisë është i domosdoshëm ndryshimi politik i qeverisë;
• Kërkohet vetting në gjyqësor dhe në prokurori;
• Kryeprokurori duhet të jetë politik që të mbajë përgjegjësi për mosveprim;
• Nevojitet ligji antimafia;
• Duhet themeluar një prokurori speciale për krimin e organizuar dhe korrupsionin;
• Buxheti duhet proceduar në Kuvend 3 muaj më herët që të rritet transparenca;
• Prokurorët e gjyqtarët duhen mbrojtur për çështje kur u rrezikohet jeta dhe jo të kërcënohen nga instancat shtetërore;
• Duhen rritur kapacitetet financiare dhe njerëzore për hetimin dhe gjykimin e korrupsionit në nivele të larta.

Lëvizja do ta vazhdojë përpjekjen për të ngritur një front të përbashkët kundër korrupsionit dhe krimit të organizuar me të gjithë ekspertizën e nevojshme dhe me të gjithë forcën politike për t’i dalë ballë atij.

Sot, në zyrat qendrore të Lëvizjes VETËVENDOSJE! në Prishtinë, ish Sekretari për Marrëdhënie me Jashtë, Boiken Abazi, bashkë me Sekretarin e ri për Marrëdhënie me Jashtë, Kreshnik Ahmeti, pritën në takim drejtorin për Ballkanin Perëndimor të Fondacionit Westminster për Demokraci (WFD), Emil Atanasovski, menaxherin e projekteve për Ballkanin Perëndimor të WFD, Rob van Leeuwen dhe përfaqësuesin e WFD në Kosovë, Fitim Mulollin.

Në këtë takim u diskutua për problemet kryesore me të cilat po përballet aktualisht Kosova. Përfaqësuesit e Lëvizjes prezantuan analizën e tyre mbi degradimin e insitucioneve shtetërore në Kosovë dhe nivelin e lartë të korrupsionit. Më tej ata shpjeguan edhe qëndrimet e Lëvizjes në lidhje me dialogun asimetrik dhe jodemokratik të udhëhequr nga Hashim Thaçi dhe Aleksandër Vuçiq, si dhe për alternativën e Lëvizjes VETËVENDOSJE! në raport me këtë dialog. Aty u diskutua edhe për gjendjen e rëndë ekonomike në vend, veçanërisht tek moshat e reja. Gjithashtu, përfaqësuesit e WFD u njoftuan edhe me aktivitetet e fundit të Lëvizjes VETËVENDOSJE!, në kundërshtim të korrupsionit të qeverisë aktuale, nëpërmjet fushatës Kundër “PANhajnisë”.

Përfaqësuesit e WFD prezantuan projektet e tyre, të cilat janë duke i realizuar në shtetet e Ballkanit Perëndimor. Palët e vlerësuan bashkëpunimin e deritanishëm mes WFD dhe Lëvizjes VETËVENDOSJE! dhe u pajtuan për vazhdimin dhe zgjerimin e bashkëpunimit në të ardhmen.

Mbrëmë, në Selinë e Lëvizjes VETËVENDOSJE!, Kryetari Albin Kurti dhe Nënkryetari Besnik Bislimi bashkë me deputetet, Fitore Pacolli dhe Saranda Bogujevci, pritën në takim delegacionin e Lutjeve të Mëngjesit nga Shtetet e Bashkuara të Amerikës. Në këtë delegacion të shoqëruar nga z. Ahmet Shala dhe z. Visar Azemi ishte kongresmeni z. Randy Hultgren së bashku me z. Michael Stoltzfus, z. Todd Hendricks, z. Kent Ford. Gjithashtu të panishëm ishin edhe përfaqësuesit e orgaizatës “Kosovo Hope”, z. John Walden dhe z. Berat Gegaj.

Sot, Kryetari i Lëvizjes VETËVENDOSJE!, Albin Kurti, së bashku me deputetin Valon Ramadani, pritën udhëheqësit e Sindikatës së RTK-së, z.Fadil Hoxha, kryetar, znj.Albana Murseli, nënkryetare dhe z.Visar Duli e z.Veton Rugova, anëtarë.

U bisedua lidhur me gjendjen e rëndë në RTK, programin televiziv dhe situatën e punëtorëve aty, si dhe problemet që veç po shtohen çdo ditë.

Bashkarisht u konstatua nevoja që të mbahet një seancë e veçantë në Kuvendin e Kosovës për RTK-në, për ta rritur cilësinë e këtij institucioni të rëndësishëm dhe transmetuesi publik. Në këtë seancë do të propozohej edhe një komision hetimor parlamentar, me theks të veçantë mbi paligjshmërinë pas shpalljes arbitrare të drejtorit pa vota të plota të bordit drejtues.

Sot, vizituam vendin ku paradite për shkak të rrëshqitjeve të dheut është rrezikuar jeta e një numri të qytetarëve të kësaj pjese, dhe nxënësve të cilët vijojnë mësimin në shkollën Naim Frashëri. Rrëshqitja e dheut ka ardhur si pasojë e punimeve që po zhvillohen në këtë objekt. Komuna e Prishtinës u mundua që fajin ta hedhë te shpërthimi I një gypi të ujësjellësit. Kjo u demantua nga KRU-Prishtina të cilët pas analizës së marrë nga tereni konstatuan se, po citoj, “ekzekutimi I punëve në gropën ndërtimore të objektit poshtë rrugicës, është bërë në mënyrë joprofesionale, jashtë standardeve për ndërtim dhe mbrojtje të gropës ndërtimore”.

Në kohën kur Telekomit të Kosovës i kërcënohen se edhe një javë kohë i ka mbetur për t’ia paguar borxhin që buron nga një kontratë e kriminalizuar Zmobile, Lëvizja VETËVENDOSJE!, përmes drejtuesit të Grupit Parlamentar të saj, z. Glauk Konjufcës njoftoi për dy nisma emergjente për ta ndalur krimin që ka gjunjëzuar gjyqësorin, prokurorinë dhe Qeverinë.

E para ka të bëjë me thirrjen e një seance të jashtëzakonshme në kuvend, dhe e dyta ka të bëjë me një nismë ligjore, së cilës nëse ia ngushtojmë kuptimin siç tha Konjufca në konferencë për media, i bie që t’i ndalohet veprimtaria kompanisë Z-Mobile.

Deri te keto nisma, sipas Konjufcës ka ardhur për shkak se kompania private “Devolli” e ka kapur qeverinë, dhe bashkë me të po qëndron mbi kuvendin e Kosovës dhe mbi institucionet e drejtësisë në vend.

Kontrata me Zmobile është produkt i krimit të organizuar dhe implikimet prej saj për Telekomin nuk duhet të njihen si obligime për Tekomin. Të gjitha pjesëtarët dhe mbështetësit e kësaj kontrate nga të gjitha qeveritë duhet të nxirren para drejtësisë.

Prej 12 korrikut të vitit 2018, në Kuvendin e Kosovës është në fuqi një rezolutë e cila është votuar nga shumica e deputetëve të kuvendit të Kosovës. Ajo rezolutë në pikën e 7-të të saj thotë: “Qeveria e Kosovës si aksionari kryesor duhet të tërhiqet nga marrëveshja abuzive e ish-drejtorit të Telekomit me kompaninë Z-Mobile.” Kjo rezolutë sipas Konjufcës është shpërfillur që disa muaj nga qeveria e Kosovës dhe nuk po zbatohet.

Arsyeja se përse kjo rezolutë nuk po zbatohet sipas tij ka të bëjë me faktin se qeveria është plotësisht e gatshme që përmes ministrit Valdrin Lluka t’ia vazhdojë kompanisë “Z-Mobile” kontratën me Telekomin e Kosovës.

“Kjo nuk po zbatohet ngase këta janë të gatshëm që edhe për 10 vite të tjera ta zgjasin kontratën me atë kompani. Dhe kërcënimi i kompanisë “Devolli” po bëhet pikërisht me këtë qëllim, pra si shantazh ndaj qeverisë së Kosovës për vazhdimin e kontratës edhe për 10 vite të tjera. Mos të harrojmë se rezoluta që është momentalisht në fuqi, pika e saj 12 thotë kështu: Kuvendi i Republikës së Kosovës fton Prokurorinë e Kosovës që të vendosë në prioritet hetimin e kontratës me Dardafon (më tej Z-mobile).” tha Konjufca, duke përmendur edhe çështjen e arbritrazhit dhe gjykatës ndërkombëtare.

Siç dihet kompania në fjalë është ankuar në arbitrazh dhe e ka fituar rastin. Por edhe kjo e ka anën e vet kriminale, ngase ne si Lëvizje VETËVENDOSJE! besojmë se krejt kjo çfarë ka i ndodhur Kosovës ka të bëjë me krim të organizuar mes kompanisë “Devolli” dhe Bordit të Telekomit të Kosovës.

“Bordi është udhëhequr nga Rexhë Gjonbalaj – njërit prej drejtuesve kryesor të PDK-së në qytetin e Pejës. Dhe mënyra se si është bërë mbrojtja lë për të dëshiruar ngase është bërë përmes një institucioni krejt fantom i cili i ka marrë Kosovës gati gjysëm million euro për kinse mbrotjejn e telekomit. Në rastin e AXOS-it, kur kishim një angazhim më serioz asokohe, e fituam rastin, kurse në këtë rast duket se qëllimi ka qenë që rasti të humbet, dhe 32 milionë euro të merren nga taksapaguesit”

Ne e dimë që Telekomi nuk ka mundësi për këto para, dhe që kjo do të thotë bankrotim. Kjo është bashkëpjesëmarrje në krim për bankrotimin e Kosovës. Kjo nënkupton që punëtorëve të telekomit u rrezikohet puna.

Konjufca tutje tha se këta i kanë kapur edhe instucionet e drejtësisë, ngase në Gjykatën Themelore të Prishtinës ka mundur të ndodhë një apelim ndaj masës së arbitrazhit që së paku kjo gjobë të mos shkonte drejtpërdrejt me përmbarim, por kjo nuk është bërë.

Për fund, duke folur në emër të Lëvizjes, Konjufca tha se mbështesim peticionin e punëtorëve dhe kërkesën e tyre për ndërprerjen e kontratës me “Z-Mobile” dhe se do të angazhohemi si Lëvizje përmes dy iniciativave në Kuvend, një seance të jashtëzakonshme dhe një ligji që ndalon operimin e operatorëve virtualë si “Z-mobile”, ta ndalim këtë krim të organizuar mes qeverisë dhe kompanisë që është ulur këmbëkryq në të dhe po tenton zhvatjen e taksapaguesve.

Lëvizja VETËVENDOSJE! i uron të gjithë besimtarët muslimanë për fillimin e muajit të Ramazanit. Ky muaj është i mbushur me domethënie shpirtërore e me shenjtëri, për të gjithë besimtarët.

Muaji i Ramazanit është muaji jo vetëm i besimit, por i besimit me besnikëri. Në Ramazan besohet jo vetëm përmes shpresës e dëshirës, por më së shumti përmes vullnetit, disiplinës e guximit. Agjërimi na tregon se pastrimi dhe kalitja e mendjes dhe e zemrës nuk vjen nga jashtë, por duhet të bëhet vetë dhe mund të bëhet vetë, prej të gjithëve atyre që zgjedhin të jenë pjesë e një komuniteti dhe e një fryme.

Lëvizja VETËVENDOSJE! mbajti konferencë për media rreth korrupsionit të lartë dhe sistemik në prokurimin publik në Kosovë ku folën nënkryetari i Lëvizjes, Besnik Bislimi dhe eksperti i sapo anëtarësuar në Lëvizje, Jeton Zulfaj.

Korrupsioni në vend është bërë barrierë për proceset integruese të vendit, liberalizimin e vizave, rritjen ekonomike, zvogëlimin e pabarazisë dhe forcimin e kapaciteteve të adminsitratës publike. Krijimi i koalicionit PAN me bashkangjitjen e AKR-së kanë qenë shenjë ogurzezë se apetitet për korrupsion do të shtohen.

“Tani kemi pasurim të shpejtë përmes metodave korruptive si stërngarkimi i administratës publike me punësime familjare, falje e borxheve, rritje arbitrare e pagave, ndryshime të ligjeve për të privilegjuar klientelën politike dhe shumë e shumë të tjera”, denoncoi nënkryetari Bislimi.

Ndërkohë që kjo qeveri tenton korrupsionin ta trajtojë si kulturë dhe rezistencën qytetare ndaj tij si të pashpresë, Besnik Bislimi theksoi se Lëvizja e ka për mision të bindë se, “luftimi i korrupsionit është i mundur dhe nuk ka asnjë alternativë tjetër”.

Më tutje, Jeton Zulfaj tregoi me statistika gjendjen e rëndë të krijuar nga korrupsioni në prokurim publik. Kjo është mundësuar për shkak të numrit të madh të autoriteteve kontraktuese, planifikimit të dobët të nevojave buxhetore, menaxhimit të dobët të kontratave dhe mungesës së transparencës.

Në vitin e kaluar më shumë se 1/4 e buxhetit ka kaluar përmes prokurimit publik me mbi 35% rritje të volumit dhe vlerës së kontratave krahasuar me vitin 2017. Rritjen më të madhe e ka Ministria e Infrastrukturës me 1/5 e të gjithë vlerës së prokurimit, një rritje kjo prej gati 500%, kurse komuna e Deçanit ka shtuar për 9 fish vlerën e prokurimeve. Numri më i madh i ankesave dorëzuar për parregullsi në procedura prokurimi është pikërisht për Ministrinë e Infrastrukturës, 70 sosh. Kjo ministri prin me numrin e kontratave të lidhura fshehurazi, që ndryshe njihet si procedure e negociuar, pa publikim të kontratës. Ka dhjetra aneks kontrata për punë të papërfunduara në kohë apo për shpenzime shtesë që shkojnë deri në 100 milion euro dhe ka kompani të cilat janë të lidhura me pushtetin të cilat po bën monopole në fushën ku operojnë.

Po ashtu, gjatë vitit 2018 është dyfishuar numri i kontratave me vlerë minimale në mbi 4 mijë, për më shumë se 4 milion euro për shërbime dhe mallra të cilat duhet të jenë subjekt i hetimit të prokurorisë, por edhe i monitorimit nga KRPP dhe agjensia antikorrupsion, sepse në këtë kategori janë blerë ora dore, kostume dhe veshmbathje pa arsyetim dhe pa adresë me taksat e qytetarëve.

Afër 100% e tenderëve kanë kaluar përmes cmimit më të ulët, kriter ky i kritikuar vazhdimisht nga Bashkimi Evropian sepse lë hapsirë për korrupsion para dhënies së tenderit dhe pas tij për shkak të ritenderimeve nga cilësia e dobët e punimeve fillestare.

Ndërsa masat që do të duhej të merreshin për zgjidhjen e kësaj situate Jetoni i listoi duke thënë se, “duhet një reformë e thellë e cila prek edhe agjensinë për regjistrimin e bizneseve. Kemi tepër pak njohuri se kush qëndron prapa bizneseve që fitojnë tenderët. ARBK duhet të bëjë transparente përfituesit përfundimtar të kompanive, menaxhmentin e kompanive dhe aktet ligjore me ndryshimet e tyre. Kjo është kërkesë edhe e Komisionit Evropian. Kompanitë që duan të bëjnë biznes me shtetin duhet të i nënshtrohen një standardi më të lartë të transparencës. KRPP duhet të përjashtojë nga prokurimi kompanitë që operojnë në zonat pa taksa (tax heavens) dhe të bëjë transparente të gjitha kontratat, urdhërpagesat dhe faturat që qarkullojnë përmes prokurimit publik. Kjo mund të arrihet shumë lehtë nëse ministria e financave e hapë thesarin për publikun. Thesari mbushet me djersën e popullit, por populli nuk e din se si shpenzohet paratë e tij. Thesari mund dhe duhet të lidhet direkt me modulin për menaxhim të kontratës në KRPP duke treguar se ku shkon secili cent i qytetarëve. Agjensia kundër korrupsionit duhet të zgjerojë listen e zyrtarëve publik të cilët deklarojnë pasurinë duke përfshirë të gjithë zyrtarët e prokurimit. Ka vite të tëra që Komisioni Evropian kërkon hetimin e pasurisë së pashpjegueshme të zyrtarëve të lartë shtetëror”.

Kjo qeveri nuk është e interesuar ta zbardhë këtë gjendje sepse prek direkt interesat e bizneseve me të cilat është e lidhur. Ndërsa Lëvizja as nuk është e kapur me dhe nga bizneset, as nuk i mungon ekspertiza dhe as nuk i mungon guximi për ta luftuar korrupsionin brenda dhe rreth institucioneve shtetërore.

Ditët e Pashkës janë shenjim i vlerave që frymëzojnë besimtarët. Disa prej këtyre vlerave janë besnikëria ndaj angazhimit të marrë, mbajtja e fjalës së dhënë, vetësakrifikimi e përkushtimi ndaj së vërtetës së mbrujtur në të përbashkëtën, në komunitet.

Porosia e ripërtëritjes i mbush besim e gëzim ata e ato që besojnë e të gjithëve i udhëzon se edhe “ripërtëritja” kombëtare e shoqërore do të vijë si pasojë e punës, sakrificës dhe përkushtimit të atyre që besojnë në të.

Në selinë e Lëvizjes VETËVENDOSJE! në Prishtinë u organizua një prezantim mbi sfidat e partive politike në shekullin XXI dhe praktikat më të mira ndërkombëtare. Prezantimin e mbajti z. Iain Gill, konsulent i “Westminster Foundation for Democracy” (Fondacioni Westminster për Demokraci). Z. Gill ka një përvojë të gjerë bashkëpunimi si konsulent me mbi 200 parti politike në Evropë, ShBA, etj. Prezantimi u zhvillua në kuadër të projektit të bashkëpunimit mes Lëvizjes VETËVENDOSJE! dhe Fondacionit Westminster për Demokraci (WFD), që funksionon si një agjenci e pavarur publike në Mbretërinë e Bashkuar (MB) e cila punon me partitë politike brenda dhe jashtë MB-së në mbështetje të demokracisë.

Kryetari i Lëvizjes, Albin Kurti dhe kryetari i grupit parlamentar të Lëvizjes Glauk Konjufca dorëzuan sot në Prokurorinë Themelore në Prishtinë kallzim penal për dëshmi të rrejshme nën betim ndaj Presidentit të Kosovës, Hashim Thaçi dhe ndaj Kryetarit të Kuvendit, Kadri Veseli. Thaçi dhe Veseli kanë deklaruar rrejshëm nën betim më datën 28 dhjetor të vitit 2018 në procesin gjyqësor ndaj të ashtuquajturës organizata Syri i Popullit, ku kanë deklaruar se Kryetari Kurti dhe deputeti Konjufca janë pjesë e kësaj organizate të quajtur terroriste.

Ardhja e Aleksandër Lumezit në krye të prokurorisë paska qenë për ta centralizuar dhe monopolizuar gjithë praktikën e hetimit të korrupsionit të profilit të lartë, tha Glauk Konjfuca, shefi i grupit parlamentar të Lëvizjes, në konferencën e sotshme për media ku u fol edhe për protestën e së premtes.

Aleksandër Lumezi ka krijuar një komision i cili brenda pesë ditëve duhet t’i raportojë atij për secilin rast të profilit të lartë publik që është nën hetim për korrupsion, tha ai, duke përmendur 70 rastet e zyrtarëve të lartë publik, ndaj të cilëve në kohën e Lumezit, ose janë braktisur aktakuzat, ose kanë pushuar hetimet ose dënimi nuk ka qenë efektiv.

Këta qeveritarë e vodhën shpresën, popullin dhe kërcënuan drejtësinë. Ata janë kundër mirëqenies, kundër zhvillimit ekonomik e hapjes së vendeve të punës dhe kundër ligjit e rendit. Prandaj edhe janë bërë bashkë në koalicionin e hajnisë, PANhajnisë.

Si është e mundur që shqetësimi kryesor i qytetarëve të vendit të jetë korrupsioni, i raporteve të huaja të jetë po ashtu korrupsioni, ndërkohë ende nuk kemi luftim të krimit e korrupsionit, përkundrazi ka bashkëjetesë mes prokurorisë e krimit. Kryeprokurori i zgjedhur nga partia siç e kemi dëgjuar në ”Pronto-aferë” sigurisht se nuk mund ta luftojë krimin. Ai është emëruar në detyrë nga krimi.

Korrupsioni në vendin tonë është shtuar e përhapur si asnjëherë më parë. Kurrë shteti i Kosovës nuk ka qenë më i kapur sesa sot.

Prokuroria e shtetit nuk po i ndjek as krimet e luftës e as krimet e paqes, as krimet ekonomike e as krimet politike. Në vend se presidenti, kryeministri e kryeparlamentari t’i frikësohen kryeprokurorit, ky iu frikësohet atyre.

Lëvizja VETËVENDOSJE! uron të gjithë besimtarët katolikë gëzuar pashkët, këtë kremtim të virtyteve më të larta njerëzore të vetësakrificës, mëshirës dhe dashurisë për liri e barazi.

Pashka është dita e lajmit të mirë ku vetësakrifica dhe mëshira zëvendësojnë sakrifikimin e të tjerëve, ndërsa dashuria dhe drejtësia tregojnë se janë më të mëdha se shtypja dhe hakmarrja. Pashka është dita kur kuptojmë se liria është e pamundur të realizohet pa bashkimin barazitarmes besimtarëve, dita kur kuptojmë se barazia dhe bashkimi mes besimtarësh janë filizat e lirisë kundër perandorisë.

Qeverisja e re do të bëjë investime që gjenerojnë vende të reja pune, por jo në asfalt që mbetet i zbrazur. Këta politikanë që mbyllin perspektivën për qytetarë nuk mund të hapin vende të reja të punës. Këta investimin dhe investitorin së pari e shohin si përqindje pastaj si investim.

PANqeveria që ndjek prokurorin nga shteti nuk mund të sigurojë investime për vendin. Pa drejtësi e siguri nuk mund të ketë zhvillim e punësim. Andaj, me qeverisjen e re, siguria e ligji, zhvillimi e barazia do të jetë rruga e vetme për ta nxjerrë Republikën nga kjo ngrehinë.