Nga tryeza “Kushtetueshmëria dhe përgjegjësitë institucionale në procesin e Dialogut me Serbinë”

Në ambientet e Kuvendit të Kosovës grupi parlamentar i Lëvizjes VETËVENDOSJE! dhe ai i Lidhjes Demokratike të Kosovës organizuan tryezën me temë: “Kushtetueshmëria dhe përgjegjësitë institucionale në procesin e Dialogut me Serbinë”. Tryeza u hap nga kryetarët e grupeve parlamentare, Glauk Konjufca dhe Avdullah Hoti. Të ftuar ishin profesorë, pjesëtarë nga organizata të shoqërisë civile dhe media.

Në panel morën pjesë me diskutimet e tyre Taulant Kryeziu nga Instuti “Epik”, Jeta Krasniqi nga Instituti Demokratik i Kosovës dhe Dastid Pallaska nga “Pallaska&Associates”.

Pas dorëzimit në Gjykatën Kushtetuese nga dy subjektet opozitare, tashmë debatin për kushtetuetshmërinë e procesit të dialogut po e shtrijmë edhe më gjerë me profesionistët e fushës. I ashtuquajturi proces përfundimtar i dialogut ka ndezur një debat me papajtueshmëri të gjerë shoqërore.

Shumë qëndrime të përfaqësuesve politikë në pushtet kanë qenë kundërthënëse dhe konfuze. Paqartësia e krijuar prej mungesës së transparencës, ka bërë që qytetarët ta humbin besimin te kjo mënyrë e të përgatiturit për dialog. Si pasojë ka shqetësim gjithnjë e më të madh për rezultatet, nëse procesi vazhdon në të tilla binarë. Integriteti i Kosovës nuk mund të shtrohet për diskutim dhe negocim, ndërsa dialogu nuk mund të zhvillohet nga institucione pa legjitimitet.

Dialogu vitin e kaluar i ishte dorëzuar Presidentit nga Kryeministri me deklaratën se do të merrej vetëm me punët e shtëpisë. Ndërsa mungesës së legjitimitetit të qeverisë me 52 deputetë, përgjatë rrugës i ka ardhur në ndihmë një grup deputetësh të cilët ia tradhëtuan besimin qytetarëve që i votuan për qëndrime të kundërta. Dialogu për këtë fazë përfundimtare nuk mundet të vazhdojnë në këtë mënyrë, pa legjitimitet dhe me një president tejet problematik. Kjo fazë përfundimtare duhet kthyer në pikën zero për t’u rimenduar me një legjitimitet të ri dhe në binarë kushtetues.

Në përfundim u listuan edhe konkluzat e tryezës:

· Karakteri unitar dhe kufijtë e Kosovës janë të panegociueshëm;

· Nevoja për rilegjitimim të institucioneve;

· Nevoja për konsesnsus të plotë në raport me dialogun pasi i mungon legjitimiteti;

· Projektligji për dialogun bie ndesh me Kushtetutën dhe cënon kompetencat e Kuvendit e të qeverisë;

· Emërimi i përfaqësuesit të shoqërisë civile është pa kritere sipas projektligjit;

· Ky projektligj nuk mund të sjellë konsensus;

· Delegacioni është jokushtetues dhe sillet si institucion paralel kushtetues;

· Presidenti Thaçi nuk ka kredibilitet të udhëheqë dialogun, nuk ka mandat kushtetues dhe as mandat të deleguar nga Kuvendi;

· Gjykata Kushtetuese ka krijuar precedentë të rrezikshëm me heqjen dorë të trajtimit të marrëveshjes së vitit 2013 mes Kosovës dhe Serbisë;

· Nevoja për ekip uniteti dhe strategji konfidenciale në raport me negociatat;

· Nevoja për përfshirjen e Kuvendit që në fazat fillestare dhe bashkrëndimi i institucioneve;

· Transparenca që duhet ta përcjellë procesin;

· Mungesa e konsensusit e ka dëmtuar pozicionin politik të Kosovës;

· Taksa nuk duhet të ndërlidhet me procesin e dialogut;

· Dialogu ka nisur pa parime;

· Bashkëkryesuesit dhe qeveria nuk ka legjitimitet për shkak të mungesës së shumicës.

Dy subjektet opozitare do ta vazhdojnë përpjekjen për ta futur Kosovën brenda binarëve Kushtetues, për t’ia garantuar integritetin territorial dhe për t’i dhënë legjitimitet politik institucioneve të saj.

Kryeministrin dhe Presidentin e Kosovës i ndan taksa ndaj Serbisë por i bashkon korrupsioni në Kosovë. Dhe, ajo që i bashkon është më e fuqishme sesa ajo që i ndan, meqë po rrinë bashkë në pushtet. Prandaj, këta duhet të shkojnë bashkë. Ne kërkojmë dorëheqjen si të presidentit, ashtu edhe të kryeministrit.

100 ditë në vitin 2004 Haradinajt mund t’i jenë dukur pak për ta treguar veten, mirëpo këto gati 600 ditë në vitet 2017, 2018 dhe tash 2019, janë tepër shumë për të pasur çfarëdo dilema rreth tij. Korrupsioni, papunësia e migrimi po rriten, kurse investimet, rendimentet dhe arsimi po bien. Mbi të gjitha, po shtohet hajnia e po zvogëlohet durimi.

Prej ditës së nesërme fillojmë me tubime me qytetarë, kundër PANhajnisë dhe për zgjedhje të reja. Në ora 14:00, në Sheshin “Adem Jashari”, nesër, pra të premten, jemi në Vushtrri. Pasnesër, të shtunën, në ora 13:00, në Besianë (Podujevë), kurse në ora 15:00, në Mitrovicë. Vazhdojmë pastaj për çdo ditë anembanë nëpër qytetet e qytezat e Kosovës. Me këto tubime nëpër komuna gjithandej Kosovës shkojmë bashkë drejt protestave qytetare dhe mocionit të mosbesimit në Kuvend që e largon këtë qeveri dhe mundëson zgjedhjet e parakohshme demokratike për ndryshimet e dosmosdoshme politike, ekonomike e shoqërore.

Taksa duhet të mbetet, por kjo qeveri duhet të shkojë. Taksën e vendosën 10% e mandej 100%, pa plan, pa strategji, pa përllogaritje e pa mbikëqyrje të zbatimit, në vend se të marrin vendim për reciprocitetit të plotë politik, ekonomik e tregtar ndaj Serbisë, nga i cili hoqën dorë. Sidoqoftë, tash që Vuçiqi na kushtëzon kurrsesi nuk bën të hiqet kjo taksë, ama nuk pranojmë që në emër të kësaj takse të legjitimohet zhvatja e keqqeverisja. Ashtu sikurse që pjesëmarrja në luftën çlirimtare nuk është leje për uzurpime të pasluftës, edhe taksa ndaj mallrave të Serbisë nuk mund të jetë biletë për vjedhjen e pasurive dhe buxhetit në Kosovë.

Nuk ka mbledhje të kabinetit që prej formimit të PAN Qeverisë ku nuk është marrë një vendim kundër interesit publik apo që përbën skandal.

Ky kryeministër,

Emëroi 23 ministra, mbi 80 zëvendësministra, 5 zëvendëskryeministra, e 35 këshilltarë, pa asnjë bazë të arsyeshme dhe në shpërfillje të nevojave e me shpërdorim të buxhetit. Zyrtarë politikë me aktakuza për keqpërdorim e korrupsion i ricikluan si ministra dhe zëvendësministra. Kërcënoi ish prokurorin e vetëm që shprehu integritet profesional dhe guxim publik, Elez Blakajn.

Bëri pazar me kriminelin, Milan Radojçiq, për formimin e qeverisë dhe pagoi 1 milion euro nga buxheti për serbët në veri që nuk paguajnë energjinë elektrike.

I mashtroi qytetarët në Kosovë se do të korrigjonte marrëveshjen e Demarkacionit me Malin e Zi ndërsa ka falur 8.200 hektarë nëpërmjet ratifikimit në Kuvend. Premtoi se për 90 ditë qeverisje do të merret liberalizimi i vizave. Nuk e mbajti fjalën, sepse qysh në fillim ka gënjyer për këtë.

Nënshkroi kontratën më të dëmshme në historinë e sektorit energjetik, atë me “ContourGlobal” që do ta rrisë çmimin e energjisë elektrike prej 45–80% dhe do ta zbraz buxhetin e shtetit, sepse “ContourGlobal”-it do t’i paguhen të gjitha kostot, këstet e kredisë, kamata e tyre, fitimi dhe tatimi, e ku normën e kthimit të brendshëm në kapital, e kanë paraparë tejet e lartë, 18.5%, thua se bëhet fjalë për ndonjërin prej këtyre institucioneve mikrofinanciare.

Ia dha 53 milionë euro kundërligjshëm Bechtel-Enkas.

E rriti 100% pagën për veten dhe stafin e tij, paligjshëm, e legjitimoi me Ligjin mbi Pagat, dhe i la nën mesataren pagat e mijëra shërbyesve civilë.

Liroi nga akciza e produkteve të duhanit, për interes të kompanisë së vetme në Kosovë, atë të këshilltarit të vet, Gazmend Abrashit.

E çoi drejt falimentimit Telekomin e Kosovës duke mos ndërprerë kontratën me Z-mobile, duke mbipunësuar në konflikt interesi. Emëroi drejtor Gent Begollin e AAK-së, mandej Bedri Istrefin PDK-AAK, secili pa përvojë e pa integritet. Emëroi bordin partiak dhe jokompetent të Telekomit. Shkeli Rezolutën e Kuvendit të Kosovës për Telekomin të datës 9 korrik 2018.

Emëroi anëtarë jokompetent në bordin e Trepçës dhe kompromentoi statutin e Trepçës. Emëruan kryeshef ekzekutiv të KEK-ut, Nijazi Thaçin, kushëririn e korruptuar të presidentit.

E dështuan procesin e realizimit të sigurimeve shëndetësore publike.

Dështim i gjithanshëm në politikën e jashtme, çorientim institucional i qëndrimeve politike dhe skandale të njëpasnjëshme përballë partnerëve dhe aleatëve.

Premtuan uljen e papunësisë, sollën të kundërtën. U rritën ca e për disa të ardhurat, por u zvogëlua numri i vendeve të punës, pra u rrit pabarazia. Asnjë kompani e madhe nuk u hap as në vitin 2017 e as në vitin 2018 në Kosovë. Dhe, ndërmarrjet e vogla dhe të mesme nuk po mbërrijnë të hapin vend të ri pune.

PANqeveria është PANhajnia.

Që ta ndalim hajninë duhet ta largojmë qeverinë. Me këtë rast u bëj thirrje dhe i mirëpres të gjithë qytetarët, pa dallim moshe a gjinie, pa dallim feje a partie, nëpër këto tubime anembanë Kosovës, në ditët e javët në vijim.

Prishtina është në hapin përfundimtar para nënshkrimit të marrëveshjes për organizimin e Bienales Evropiane të Artit Bashkëkohor në vitin 2022, të njohur si “Manifesta”. Megjithëse Prishtina ka konkurrencë Vjenën dhe Kievin, gjasat janë të mëdha që të fitojmë e që ky organizim të realizohet në Prishtinë. Qendra e Lëvizjes VETËVENDOSJE! në Prishtinë e mbështet Bienalen “Manifesta”. Ideimi dhe puna për ta realizuar këtë Bienale në Prishtinë ka nisur dhe është çuar përpara në kohën kur Lëvizja VETËVENDOSJE! udhëhiqte Drejtorinë për Kulturën, Rininë dhe Sportin, në Komunën e Prishtinës, përmes drejtorit Yll Rugova.

Organizimi i Bienales “Manifesta” në Prishtinë do të mundësonte ardhjen e mbi 200,000 vizitorëve ndërkombëtarë në Prishtinë, si dhe prurjen e dhjetra miliona euro në ekonominë e Kosovës në format nga më të ndryshme. Duke qenë nikoqire e Bienales “Manifesta”, Prishtina do të kthehej në një kryeqendër evropiane të kulturës, ku emrat më të njohur të artit dhe arkitekturës do të realizonin projekte enkas për qytetin, kurse urbanistë të njohur – si Renzo Piano, Rem Koolhaas, Winy Maas, etj. – do të bënin projekte për zhvillimin e Prishtinës. Emra me ndikim në artin botëror gjithashtu do të gravitonin në kryeqytetin tonë për këtë ngjarje. Prishtina do të përfitonte edhe investime në infrastrukturë, duke rehabilituar hapësira kulturore, e duke ndërtuar hapësira të reja publike.

Në këtë fazë, ka mbetur të sigurohet vetëm garancia bankare nga Qeveria e Kosovës dhe nënshkrimi i marrëveshjes me Komunën e Prishtinës, në mënyrë që Prishtina të shpallet zyrtarisht si nikoqire e Bienales Evropiane “Manifesta” në vitin 2022. Andaj, kërkojmë dhe i bëjmë apel pushtetit Qendror dhe Lokal që të ndërmarrin sa më parë të gjithë hapat e nevojshëm që mundësojë finalizimin e marrëveshjes, përfshirë këtu edhe garancinë bankare për këtë organizim, dhe lehtësimin e të gjitha procedurave.

Ky projekt i takon qytetit të Prishtinës, dhe gjithë Kosovës. Duhet bërë çmos që çdo pengesë të eliminohet dhe çdo bllokadë të rrëzohet, që të kemi në Prishtinë Bienalen Evropiane “Manifesta”. 

Me ftesë nga studentët e universitetit amerikan në Kosovë, RIT Kosova, sot Kryetari i Lëvizjes Albin Kurti mbajti një ligjëratë më temën “Aksioni Kolektiv,” ku më pas edhe u zhvillua një bashkbisedim rreth kësaj teme.

Rëndësia e aksionit kolektiv mund të kuptohet që nga etimologjia e këtyre fjalëve. Fjala “kolektiv” do të thotë të mbledhesh, së bashku, të bashkohesh. E “aksioni” ka të bëj me vënien në lëvizje, me bërjen, me veprimin. Bashkimi i këtyre fjalëve prodhon një sinergji përtej etimologjisë e që merr trajtën e veprimit të dyfishtë: atë të bashkimit për të vepruar dhe atë të veprimit të përbashkët.

Kryetari Albin Kurti, bashkë me Kryetarin e Grupit Parlamentar, Glauk Konjufca, deputeten, Fitore Pacolli, dhe Sekretarin për Marrëdhënie me Jashtë, Boiken Abazi, pritën sot në selinë e Lëvizjes VETËVENDOSJE! Emisaren Speciale për Ballkanin Perendimor të Ministrisë së Jashtme të Republikës së Çekisë, znj. Janina Hrebickova, dhe zëvendës ambasadorin, z. Dusan Kralik.

Në këtë takim, Znj. Hrebickova shprehu mbështetjen e Republikës së Çekisë për Republikën e Kosovës dhe gjashtë shtetet e Ballkanit Perëndimor, për demokratizimin dhe zhvillimin e mëtejshëm të tyre në rrugën drejt integrimit të rajonit në BE. Ajo u interesua më tej edhe për analizat dhe qëndrimet e Lëvizjes VETËVENDOSJE! lidhur me zhvillimet në Kosovë, dhe me gjerë në rajon, si dhe në raport me dialogun me Serbinë.

Sot, me 2 prill, në përvjetorin e demonstratave të vitit 1981 një delegacion i LVV-së i prirë nga Kryetari Albin Kurti dhe deputetë e veprimtarë politik bënë homazhe para pllakave përkujtimore të dëshmorëve të pranverës së vitit 1981.

Me datë 2 prill, 1981 rrugët e Prishtinës, por edhe të qyteteve tjera në Kosovë, u vërshuan nga protestuesit që e hapën pranverën politike duke e hapur çështjen shqiptare. “Republikë-Kushtetutë, ja me hatër ja me luftë”, “Jemi shqiptarë, nuk jemi jugosllavë”, “Bashkim-Bashkim”, “Trepça punon Beogradi fiton” e parulla tjera të ngjashme mbaheshin nga duart e mijëra studentëve dhe qindra punëtorëve që dolën në përkrahje të demostratës që kërkonte të drejta e liri, çlirim e bashkim, nga një regjim që shfrytëzonte shqiptarët për të qëndruar.

Sot, Lëvizja VETËVENDOSJE! përmes një aksioni simbolik para terminalit doganor, njërit prej monopoleve të Kompanisë Devolli, paraqiti shkatërrimin e ndërrmarrjeve publike në vazhdën e shkatërrimit të ekonomisë së vendit dhe dëmtimit të interesit publik, prapa së cilave shpesh fshihen interesa të ngushta politike e klanore që janë të lidhura ngushtë me politikën dhe krimin e organizuar.

Anëtarja e Këshillit të Përgjithshëm të Lëvizjes, Albana Gashi foli për interesin e ngushtë dhe kapitalin që kanë kapur mendjet e ngushta të zyrtarëve publik që nuk shqetësohen për qytetarin e varfër dhe veçanërisht për përfshirjen e pushteteve edhe te vetë shkatërrimi i Telekomit e shumë kompanive të tjera.

“Kompania “Devolli Group” është sinonim i ekonomisë së kapur, por jo vetëm. Ata janë sinonim i politikës së kapur, pushtetit të kapur dhe si rezultat edhe i shtetit të kapur. Nga Devolli Commerce gjatë okupimit te Devolli Company dhe sot te Devolli Group, prodhimi që bëjnë është bërë i parëndësishëm krahasuar me dallaveret që bëjnë. “Serbia deformon tregun”, “Mielli i bukës kontrabandohet si miell biskotash”, “Mashtrimi me tarifat doganore” janë tituj të zakonshëm kur mediat shkruajnë për Devollët”.

Ekzistenca e Z-Mobile është produkt i krimit të organizuar me pjesëmarrje të një numri të madh individësh. Qartazi, Klani ‘Pronto’ ka kurdisur fitoren e Devollëve në tender. Për shkak të kurdisjeve të këtilla, pronarë të vërtetë të bizneseve që figurojnë në emër të Devollëve janë vetë kurdisësit, pra Klani ‘Pronto’.

Terminalet doganore janë dorëzim i pastër i shtetit. Kur privatizohen doganat privatizohen edhe doganierët, shumë prej të cilëve tash më shumë punojnë për Devollët sesa për Republikën tonë. Devollët karakterizohen nga monopoli absolut i transaksioneve me gjithçka që del prej sektorit publik për t’u dhënë si koncension, si privatizim, si kontraktim apo nënkontraktim.

Republikës së Kosovës i nevojitet një qeverisje e re me shtet zhvillimor ku qeveria është e afërt me biznesin e vogël dhe të mesëm në përgjithësi, por jo e afërt me tajkunet e monopoleve.

Sot, më datë 28 mars shënojmë 20 vjetorin e masakrës së Izbicës së Skënderajt dhe masakrës së familjes Bogujevci dhe Duriqi në Besianë. Delegacione të Lëvizjes VETËVENDOSJE!, të prirur nga deputetë e aktivistë të qendrës së Skënderajt, respektivisht Besianës, bënë homazhe duke iu bashkuar familjarëve në dhimbjen e tyre të gjallë dhe në përkujtimin e tyre të thellë për viktimat e krimeve çnjerëzore të Serbisë.

28 mars, 1999 – 20 vite më parë, në Izbicë të Skenderajt, 147 burra e djem shqiptarë u masakaruan mizorisht nga forcat serbe, ndërsa gratë dhe vajzat u dëbuan, për t’u terrorizuar dhe vrarë rrugës për në Shqipëri. Trupat e burrave dhe djemve të masakruar u varrosën nga fshatarët. Krimi kundër tyre nuk mbaroi në gjallje. Forcat serbe i zhvarrosën e i shpërndanë trupat e tyre nëpër Kosovë e Serbi.

Në zyren e Fondacionit socialdemokrat gjerman (Friedrich Ebert Stiftung – FES) në Prishtinë, dje kryetari i Lëvizjes VETËVENDOSJE!, Albin Kurti, dhe nënkryetarët, Prof.Besnik Bislimi dhe Dr.Fatmire Mulhaxha-Kollçaku, u takuan me deputetët e Bundestagut nga radhët e SPD-së, z.Josip Juratoviq dhe znj.Gabriele Weber.

Në këtë takim të përzemërt te nikoqiri, drejtori i FES, z.Frank Hantke, u diskutua për situatën politike në Kosovë dhe rajon, për nevojën e zhvillimit socio-ekonomik si dhe të luftimit të krimit e korrupsionit. Kryetari Kurti tha se zgjedhjet e reja e të parakohshme janë zgjidhja e drejtë dhe e duhur në Kosovë, dhe kritikoi sundimin e autokratëve si dhe bashkëpunimin midis tyre që nuk është i kufizuar vetëm në Ballkan. Në veçanti, ai theksoi se projekti i shkëmbimit territorial Thaçi-Vuçiq ka dështuar porse ideja e tyre ende nuk nuk ka vdekur.

Në ambientet e Kuvendit të Kosovës, Lëvizja organizoi tryezë profesionale mbi mungesën e planifikimit dhe të menaxhimit të resurseve ujore në Kosovë.

Kjo është tryeza e dytë mbi krizën mjedisore, pas asaj të para tre muajve për ndotjen mjedisore, dhe u moderua nga deputeti i Lëvizjes Liburn Aliu.

Kryetari Albin Kurti mbajti parashtrimin fillestar ku foli për domosdoshmërinë e hartimit të politikave zhvillimore ekonomike në përputhje dhe pa i shkaktuar dëme politikave për mirëmenaxhimin e resurseve ujore. Kryetari i Lëvizjes u shpreh se ujërat janë edhe themeli i luftës gjeopolitike bashkëkohore, edhe një nga të drejtat e njeriut për të pasur qasje në to, por edhe nje garanci për cilësinë e jetës. Ne kemi nevojë për një zhvillim ekonomik i cili nuk i dëmton pakthyeshëm burimet e ujit, por i optimalizon këto burime.

Kosova ka një sasi të kufizuar të burimeve ujore, megjithatë kjo çështje nuk ka qenë prioritet për qeveritë e pasluftës. Prandaj, mungojnë të dhëna për sasinë, kontrollin dhe cilësinë e ujit. Përgjegjësia institucionale për menaxhimin e ujërave mbetet e paqartë dhe e shpërndarë mes disa institucionesh dhe ka një mungesë transparence mbi punët dhe të dhënat e tyre. Nga ana tjetër, Ligji i ujërave ka një mori dështimesh si: monitorim jo të mirë të resurseve nëntokësore; keqmenaxhim të përmbytjeve pa plane paraprirëse; ndërtime problematike në zona të mbrojtura ujore; shfrytëzim të egër të inerteve duke dëmtuar lumenj, shtretërit dhe brigjet e tyre; vjedhje e ujit dhe keqpërdorim i tij; dhe ndërtime të paligjshme të HEC-eve.

Në këtë situatë me politika të improvizuara ka komuna dhe fshatra që nuk e ndajnë ujin me një komunë apo fshat tjetër. Po ashtu, infrastruktura e sistemit të ujitjes, kolektorët dhe trupat ujore janë amortizuar, ndotur, pa investime dhe menaxhimi i tyre nuk është i pakoordinuar me problematikat e ndotjes së ambientit. Sikur të mos mjaftonin këto, qeveria i fal borxhet kompanive të ujit për ambalazhimin dhe lejon që në veri të vendit të operojnë kompani pa liçensë për këtë shërbim.

Në përfundim të tryezës u nxorën edhe konkluzionet e mëposhtme:

· Moszbatimi dhe neglizhenca në zbatimin e Ligjit të ujërave po i rrezikon resurset ujore;

· Institucionet bartëse për resurset ujore duhet të funksionalizohen dhe të forcohen sipas Ligjit;

· Hidrocentralet nuk janë dhënë koncesione në bazë të legjislacionit, prandaj është i paligjshëm secili prej tyre;

· Duhen ngritur kuadro dhe profesionistë të rinj të ujërave;

· Duhet inspektim dhe monitorim më i fortë i resurseve;

· Duhen studime dhe të dhëna më të plota për planifikimin dhe hartimin e një plani për të ardhmen;

· Duhet planifikuar akumulimi i ujit dhe formimi i liqeneve të reja;

· Duhet plan parandalues për emergjencat e vërshimeve dhe për raste të ngjashme;

· Duhen bërë publike të gjitha lejet ndërtimore të ndërtimeve në zonat në fjalë;

· Duhet formuar një institut për ujërat dhe hidro-ekonominë e Kosovës, i cili do jetë vend studimi dhe propozimi për këtë sektor;

· Ky sektor duhet të jetë prioritet strategjik për politikat e vendit dhe duhen rritur ndjeshëm investimet për të.

Politika zhvillimore për të ardhmen e vendit dhe zhvillimi i qëndrueshëm i Kosovës e ka të domosdoshëm një planifikim, menaxhim dhe një investim strategjik në sektorin e ujërave. Për Lëvizjen ky sektor duhet të marrë vëmendjen që i takon, të jetë prioritet jetik për vendin, një e drejtë e garantuar për qytetarët dhe një garanci për sovranitetin.

Lëvizja VETËVENDOSJE! mbajti aktivitet simbolik për të denoncuar edhe një herë punësimet e fundit partiake dhe familjare në institucione publike. Pranë njërit prej filialeve të VALA-s në qendër të qytetit aktivistët e Lëvizjes shkruan parullën Partneriteti ‘Publiko-Partiak: Prona Publike, Punëtorët e Partisë’.

Punësimet partiake dhe familjare në kompanitë publike nuk kanë të ndaluar, vetëm këto ditë kishim qindra sosh nga forcat politike në pushtet. Prej 20 vitesh vazhdon rituali i shfrytëzimit të këtyre kompanive shtetërore për të rehatuar nga pushteti elektoratin e pakënaqur me ekonominë në vend. Këto keqpërdorime janë njëri prej shkaqeve pse ndërmarrjet publike humbin produktivitetin e tyre dhe bëhen gati për t’u privatizuar. Sikur të mos mjaftonte kjo, deklaratat e fundit të figurave politike nga rradhët e pushtetit, se sikur të mundeshin të gjithë militantët e tyre do t’i punësonin në kompani shtetërore, tregojnë se situata vetëm sa do të përkeqësohet nëse lihet të rrjedhë në këto linja.

Lëvizja VETËVENDOSJE! mbajti konferencë për media në ambientet e Kuvendit të Kosovës për një vjetorin e ratifikimit të marrëveshjes Demarkacionit me Malin e Zi, prej nga Kosova humbi 8.200 hektarë një vit më parë më 21 mars 2018. Në konferencë folën shefi i grupit parlamentar të Lëvizjes, Glauk Konjufca dhe anëtarja e kryesisë dhe deputetja e Lëvizjes, Arbërie Nagavci.

Haradinaj u bë Kryeministër duke premtuar korrigjimin e gabimeve të Demarkacionit me Malin e Zi. Një vit më pas, nuk është bërë asnjë hap përpara, asnjë raport apo sqarim për korrigjimin e tij. Deputetja Nagavci kujtoi deklaratat ku vetë deputetët e AAK-së shpreheshin se ishin detyruar ta votonin marrëveshjen dhe se vizat do të liberalizoheshin menjëherë pas ratifikimit të saj. Prej një viti, Kosova vteëm ka humbur dhe vizat akoma nuk janë liberalizuar. Për më tepër, deputetja Nagavci shpjegoi se si ratifikimi i Demarkacionit me idenë e korrigjimit të versionit fillestar po shërben aktualisht si precedent për Presidentin Thaçi që të rehatojë në sferën tonë publike idenë e ndryshimit të kufijve me Serbinë. Krejt çka Qeveria ka bërë për një vit janë skandale korruptive, punësime partiake e familjare.

Në konferencë për media, më 18 shkurt paraqitëm qëndrimet tona në raport me pozitat e shumëfishta të zyrtarëve të lartë publikë, ndër të tjera edhe për pozitat e shumfishta të Kryeprokurorit të Shtetit, z.Aleksandër Lumezi.

Një ditë më pas zyra e Kryeprokurorit reagoi duke iu bërë mbulesë punësimit të shumëfishtë të z. Lumezi.

Sot, Lëvizja VETËVENDOSJE! përmes një aksioni simbolik ritheksoi edhe një herë veprimin flagrant antikushtetues të Hashim Thaçit, i cili i vetmuar në zyrën e tij dhe i braktisur nga populli, po rrezikon hapur jetën politike në vend dhe funksionimin e pavarur të institucioneve kushtetuese siç po bën me bllokimin e KQZ-së për më shumë se një vit.

Deputetja Drita Millaku foli për përgjegjësitë kushtetuese që ka presidenti Thaçi për garantimin e funksionimit të organeve kushtetuese, që e ka kthyer zyrën e Presidencës në të kundërtën e funksioneve dhe përgjegjësive dhe që po rrezikon sa integritetin shtetëror, po aq edhe ligjshmërinë dhe kushtetutshmërinë në vend, cënimin e demokracisë dhe funksionimin e institucioneve.

“Është bërë plot një vit nga kur KQZ-ja, ky institucion i rëndësishëm kushtetuese, është shndërruar nga Hashim Thaçi në një institucion ku testohen skenarët e Hashim Thaçit kundër opozitës e për të penguar veprimtarinë politike të subjekteve opozitare, por edhe për të shpërblyer deputetë e grupe deputetësh tregtarë për shërbimet ndaj tij”, tha Drita Millaku.

Gjatë këtij viti, KQZ-ja që do të duhej të kryente shumë punë, thjesht nuk ka ekzistuar. 37 asamblesitë presin për të marrë detyrën, por nuk kanë mundësi, sepse nuk ka KQZ për t’i emëruar ata. Një deputet po humbet mandatin në mungesë të KQZ-së. Është paralizuar funksionimi i brendshëm i sekretariatit të KQZ-së, sepse Presidenti nuk i ka emëruar anëtarët, të cilët duhet të marrin vendime për punën e këtij institucioni. 

Nga bllokimi i KQZ-së, 13 subjekte politike janë privuar nga fondi shtetëror që ia garanton ligji. Pamundësimi i fondit për subjektet politike, është veçanërisht pengesë për opozitën, sepse opozita për aktivitetet e saja politike të vetmin burim të mbulimit të shpenzimeve e ka fondin shtetëror. Partitë në pushtet nuk e kanë këtë problem sepse po pasurohen përmes abuzimit. Andaj, Presidenti Thaçi përmes bllokimit të KQZ-së po synon të pengojë në fakt angazhimin politik të dy subjekteve opozitare.

Si institucion i rëndësishëm për demokracinë në vend, KQZ-ja nuk mund të përdoret për pazare politike, interesa personale apo grupore. Një pakicë qeveritare dhe politike po përpiqet artificialisht që të bëhet shumicë në KQZ, duke shkelur vullnetin e votuesve dhe Kushtetutën e Republikës.

Përbërja e KQZ-së është rrjedhojë e zgjedhjeve dhe e rezultatit zgjedhor. Ndërsa funksionet e Komisionit Qendror të Zgjedhjeve duhet të shihen në raport me organizimin e zgjedhjeve me integritet. Prandaj, cënimi i integritetit të KQZ-së i cënon edhe zgjedhjet, kurse përbërja jokushtetuese prodhon veprime antikushtetuese.

Kjo çfarë ka bërë Presidenti me bllokimin e KQZ-së është cënim i demokracisë dhe shkelje e rëndë e ligjit dhe e Kushtetutës së Republikës, për të cilën duhet dhe do të përgjigjet ligjërisht.

Sot, Lëvizja VETËVENDOSJE! mbajti konferecë për media në lidhje me zyrtarët e lartë publik të cilët jo vetëm që nuk luftojnë krimin dhe korrupsionin, por mbajnë shumë poste të larta shtetërore njëkohësisht. Në konferencë u përmend rasti i Kryeprokurorit Lumnezi si një rast tipik me mbajtjen e pesë pozicioneve zyrtare njëkohësisht.

Anëtarja e Kryesisë dhe deputetja Albulena Haxhiu foli në lidhje me raportet e publikuar nga Transparency International, të Departamentit Amerikan të Shtetit dhe nga shumë kritika nga vetë ambasadorët që veprojnë në Kosovë të cilët kanë denoncuar fenomenin e mbajtjes së shumë posteve zyrtare nga personat e lartë publik.

Lëvizja VETËVENDOSJE! mbajti sot një konferencë për media ku u fol për pasojat e bllokimit të KQZ-së nga Presidenti.

Nënkryetarja e Lëvizjes, znj. Fatmire Kollçaku Mulhaxha tha se nuk kalon ditë që ky president nuk jep ndonjë provë të re që jo vetëm se nuk është konsensual, por as nuk përfaqëson vullnetin e popullit. Ky president, sipas saj, po e bënë të pamundurën për ta bllokuar opozitën. “Me mos dekretimin e anëtarëve të KQZ-së, bazuar në kushtetutën dhe legjislacionin në fuqi, që për rrjedhojë bllokon fondet që iu takojnë të gjitha subjekteve politike, vërehet se qëllimi është të pengohet veprimi i opozitës që deri në një masë është edhe i varur nga ato fonde që rrjedhin nga një organ kushtetues” tha nënkryetarja Kollçaku duke shtuar se ky shqetësim do të duhej t’i prekte edhe partitë në pushtet, por që sipas saj duket se ato kanë burime të tjera mbijetese.

Sot me datë 16 mars, u hap Panairi i Bizneseve të Grave në Prizren, organizuar nën patronatin e kryetarit të komunës z. Mytaher Haskuka. Të shumtë ishin vizitorët që në ecjen e tyre provonin e blinin produkte vendore të prodhuara nga gratë dhe bizneset e tyre. Për vizitë në këtë ditë të ngrohtë marsi, në panair ishte edhe kryetari i Lëvizjes, z. Albin Kurti së bashku me kryetarin e Prizrenit z. Mytaher Haskuka, nënkryetarin e Kuvendit Komunal të Prizrenit z. Artan Abrashi, deputetët Drita Millaku e Arbër Rexhaj si dhe aktivistë nga Qendra e Lëvizjes VETËVENDOSJE! në Prizren.

Kryetari Albin Kurti dhe Sekretari për Marrëdhënie me Jashtë, Boiken Abazi, pritën sot në selinë e Lëvizjes VETËVENDOSJE! një grup të rinjsh nga Presheva, Medvegja dhe Bujanoci, të përbërë nga studentë, profesionistë të rinj dhe disa nxënës.

Në takim, të rinjtë ngritën shqetësimin për probleme nga më të ndryshmet, prej mosnjohjes së diplomave, te mungesa e biokimistëve në ambulanca, nga “pasivizimi” i qëllimshëm i adresave të banimit të shqiptarëve, te rënia e numrit të nxënësve dhe mungesa e literaturës shqipe në shkolla. Ata theksuan gjithashtu mungesën e investimeve kapitale në Luginë, si dhe mosadresimin e këtyre çështjeve nga të dy Republikat shqiptare, që për më tepër ua pamundësojnë edhe sot, në shumicën e rasteve, nxjerrjen e nënshtetësisë dhe të lejeve të qëndrimit.  Nga ana tjetër, ata shprehën mirënjohjen për çështjet që Lëvizja VETËVENDOSJE! ka ngritur brenda dhe jashtë institucioneve të Kosovës për të drejtat e shqiptarëve në Kosovën Lindore.

Albin Kurti u foli pjesëmarrësve në takim për një raport të detajuar që Lëvizja VETËVENDOSJE! ka përgatitur lidhur me situatën e shqiptarëve në Preshevë, Medvegjë e Bujanoc. Duke lexuar pjesë të raportit, ai më tej kërkoi prej tyre të shtojnë kërkesa specifike lidhur me zgjidhjet që propozojnë. Ky raport, si dhe shumë prej propozimeve që Lëvizja VETËVENDOSJE! po merr nga takime si ky dhe me përfaqësues të Kosovës Lindore, do të shërbejnë si udhërrëfyes për masat që do të marrë Lëvizja nesër nga pozicioni i drejtimit të qeverisë së Kosovës.

Takim u mbyll me zotimin për të punuar edhe më shumë edhe më nga afër, në mënyrë që të realizohen të gjitha të drejtat e mohuara e legjitime të shqiptarëve në Preshevë, Medvegjë e Bujanoc.

Sot, Qendra e Lëvizjes VETËVENDOSJE! në Prishtinë përmes një konference për media të mbajtur para objektit të Ndërmarrjes Publike ‘Termokos’, denoncoi dukurinë e punësimeve familjare e partiake në këtë ndërmarrje. Më poshtë gjeni fjalën e plotë të Sekretarit të Qendrës së Lëvizjes në Prishtinë, Valdrin Ahmeti:

Ndërrmarrjet Publike në Kosovë gjatë gjithë kohës nga të gjithë ata që qeverisin si në nivelin qëndror edhe në atë lokal janë parë vetëm si mundësi për zhvatje, përfitime e mundësi për të rahatuar familjarë e militantë partiakë. Në shumë ndërmarrje publike është investuar që ato ndërrmarrje të shkatërrohen, që ose t’i krijohet hapësira për kompanitë private konkurente ose që pastaj të privatizohen ato ndërmarrje apo edhe të privatizohen shërbime që kryejnë ato ndërmarrje.

Një nga proceset e shkatërrimit të ndërmarrjeve publike në Kosovë gjithmonë ka qenë punësimet e bëra pa kritere e pa nevojë për proceset e punës së asaj ndërrmarrje.

Sot jemi këtu që të denoncojmë punësimet që janë bërë në ndërmarrjen TERMOKOS, punësime këto që kryesisht janë bërë nga ish Kryeshefi Ekzekutiv, Naser Canolli e që lidhen kryesisht me familjarë të tij e me njerëz të PDK-së dhe ShIK-ut.

Më lejoni t’i lexojë disa nga të punësuarit gjatë kohës sa Naser Canolli ka qenë i instaluar si KE në këtë ndërmarrje:

1. Arben Canolli – Djali i vëllaut të K.E.-së, Naser Canollit,
2. Maliq Hyseni – Djali i motrës së Kryeshefit Ekzekutiv, Naser Canolli,
3. Përparim Fazliu – Djali i motrës së Kryeshefit Ekzekutiv, Naser Canolli,
4. Ares Ergini – Djali i gruas së Lirak Çelaj,
5. Kastriot Fazliu – Djali i axhës së Përparim Fazliut,
6. Vigan Citaku – djali i Ylber Çitakut, ish-drejtor i instaluar nga PDK në Stacionin e Autobusëve,
7. Artina Selmani – kunatë e aksionarit të PDK-së, Muhamet Selmani,
8. Arbër Makolli – djali i vëllaut të Xhemajl Makollit, drejtor administrativë në Termokos,
9. Marigona Canolli – e afërm e Kryeshefit Ekzekutiv, Naser Canolli
10. Isak Berisha – dhëndërr i Raif Vitija, drejtor i furnizimeve, ish-drejtor financiar dhe ushtrues detyre i KE-së
11. Enis Cakolli – familjar i Bujar Cakolli, sekretar i PDK-së në Prishtinë.

Gjatë kohës kur janë bërë këto punësime ka qenë kryetari i Komunës, në atë kohë pjesë e Lëvizjes sonë, me pompozitet i denonconte këto punësime e keqpërdorimet, dhe thoshte se sapo ta siguronte shumicën e asamblesë komunale do ta ndryshonte këtë gjendje në ndërmarrjet publike. Por tash, edhe pse qeverisja aktuale e Komunës e ka shumicën në asamblenë komunale, punësimet nuk kanë ndaluar, por përkundrazi edhe kryetari i është bashkuar karvanit të punësimeve në këtë ndërmarrje, duke ndjekur shembullin e PDK-së.

Të gjithë jemi dëshmitarë që para disa ditës u raportua që pikërisht në këtë ndërmarrje si drejtor financiar i ndërmarrjes u punësua drejtori Komunal i shërbimeve publike Ismajl Koka.

Si arriti t’i bindë Shpendi PDK-në, që të arrijë ta vëjë në pozitën e drejtorit financiar, drejtorin e tij komunal? Sidomos tash kur dihet që me donacionet e shumta për zgjerim të rrjetit, sidomos ato të Komisionit Evropian, kjo pozitë është një nga pozitat më të rëndësishme për shpenzimin e fondeve nga kjo ndërmarrje publike.

Këto punësime janë vetëm disa nga dhjetëra punësime që këta kanë bërë në këtë ndërmarrje publike, dhe të cilat do t’i publikojmë në vazhdimësi sapo të sigurojmë informacion të plotë për të gjitha. Poashtu ditëve e javëve në vijim do të prezantojmë edhe informacione të tjera që lidhen me keqpërdorimet në këtë ndërmarrje. Këta duhet ndalur, dhe është veç një mundësi për këtë, angazhimi në Lëvizjen VETËVENDOSJE!.