Mbrëmë, në fshatin Rudicë të Komunës së Klinës në një takim të ngrohtë në odën e pasardhësve të bashkëluftëtarit të Shaban Polluzhës, Syl Mehmetaj, përveç diskutimit të situatës politike në vend, Kryetari Albin Kurti, Kryetari i Qendrës së Klinës Xhafer Berisha dhe anëtari i Kryesisë e deputeti Rexhep Selimi mirëpriten 39 anëtarë të rinj që iu bashkuan Lëvizjes VETËVENDOSJE!.

Qendra e LV-së në Klinë tash numëron 1003 anëtarë. Vetëm këtë vit janë bërë 450 anëtarësime të reja. Viti 2018 është vit në të cilin më së shumti anëtarë të rinj i janë bashkuar Lëvizjes prej ekzistencës së saj duke shkuar gjithsej në 5159 anëtarsime të reja. Anëtarët e rinj me angazhimin nëpër pika, fshatra dhe lagje prej nga vijnë forcojnë Lëvizjen e sigurojnë orientimin e saj të drejtë. Masa e njerëzve të pakënaqur me gjendjen socio-ekonomike në vend kthehet në organizim konkret për të ndryshuar orientimin e vendit kah zhvillimi e barazia.

Këshilli i Përgjithshëm i Lëvizjes VETËVENDOSJE!

Duke e ditur se sidomos prej Rilindjes Kombëtare shqiptarët që kanë jetuar në mërgim kanë qenë një prej faktorëve kyç e të pazëvendësueshëm në ngritjen e vetëdijes kombëtare, në luftën për çlirimin e vendit, në emancipimin shoqëror, në arsim, në ekonomi, në politikë e në çdo segment të zhvillimit shoqëror;

Të bindur se mërgata vazhdon ta luajë të njëjtin rol emancipues dhe kontribues edhe sot, duke kthyer në Kosovë shumëçka, përfshirë dije, përvojë dhe dërgesa monetare në vlerën e rreth gjysmës së buxhetit vjetor të shtetit;

Duke patur parasysh se më shumë se 1/3 e popullsisë së Kosovës jeton në mërgim, dhe se emigracioni ka prekur rëndë edhe të gjitha trevat shqiptare të rajonit;

Të shqetësuar që, përkundër gjithë kontributit të vazhdueshëm, shqiptarët në mërgim përjetojnë në vendin e tyre masivisht edhe diskriminim strukturor, ngarkesa të padrejta financiare dhe përjashtim nga institucionet e Republikës së Kosovës dhe nga ligjet në fuqi, që ua reduktojnë në mënyrë drastike përfshirjen në proceset politike të vendit dhe angazhimin ekonomik e kulturor;

Marrë parasysh se shqiptarëve që jetojnë në mërgim u kanë ndodhur ndryshime të mëdha strukturore socio-ekonomike, dhe si pasojë është rritur nevoja për organizime më të frytshme në vendet mikëpritëse;

Të vetëdijshëm se integrimi i mërgatës në shtetet mikëpritëse nuk duhet të lejohet të kthehet në asimilim, që do të nënkuptonte zgjidhje individuale që shpie në tretjen e komunitetit të mërgatës;

Të bindur se gjuha shqipe është nyja që i mban mërgimtarët të përbashkuar dhe të lidhur me atdheun;
Të qartë mbi faktin se dy shtetet shqiptare të rajonit kanë përgjegjësinë kryesore për t’u koordinuar më mirë e për të punuar më shumë në përputhje me nevojat e mërgatës shqiptare dhe me aspiratat kombëtare;

Duke e përshëndetur ngritjen kulturore, arsimore, artistike, politike dhe ekonomike të shqiptarëve në mërgim, si dhe vetorganizimin e tyre si një potencial i jashtëzakonshëm për përparimin e mërgatës dhe të vendit tonë;

Duke qenë thellësisht mirënjohës për përkrahjen e vazhdueshme dhe shumëdimensionale që shqiptarët që jetojnë në mërgim i kanë dhënë e i japin Lëvizjes VETËVENDOSJE!, përfshirë këtu edhe faktin se mbi 70% e votave të mërgimtarëve në zgjedhjet e fundit parlamentare ishin për Lëvizjen VETËVENDOSJE!;

Me nevojën e madhe që sfidave aktuale kombëtare t’i përgjigjemi përmes një angazhimi dhe organizimi të bashkuar e përparimtar brenda dhe jashtë vendit:

Këshilli i Përgjithshëm i Lëvizjes VETËVENDOSJE!:

1. Fton bashkatdhetarët në mërgim, që krahas integrimit të tyre në vendet ku jetojnë, të ruajnë gjuhën, shkollimin dhe identitetin shqiptar, dhe të vazhdojnë e të ripërtërijnë angazhimin e tyre dhe kontributin e pasur, të gjithanshëm e të pazëvendësueshëm, për zgjidhjen e çështjes shqiptare, zhvillimin, modernizimin dhe evropianizimin e Republikës së Kosovës dhe shqiptarëve në përgjithësi.

2. Thërret të gjithë bashkatdhetarët që të angazhohen me Lëvizjen VETËVENDOSJE! masivisht gjatë vitit 2019 për të sjellë ndryshimin e domosdoshëm në Kosovë drejt realizimit të aspiratave tona kombëtare.

3. Kërkon prej Grupit Punues për reforma organizative që në gjysmën e parë të vitit 2019 të shqyrtojë dhe prezantojë propozime për rritjen e efikasistetit të punës dhe mekanizmave të Lëvizjes VETËVENDOSJE! për organizmin e shqiptarëve jë jetojnë në mërgim, bashkë me Qendrat e Lëvizjes VETËVENDOSJE! në mërgatë.

4. Synon që gjatë vitit 2019, krahas 7 Qendrave të Lëvizjes VETËVENDOSJE! që funksionojnë aktualisht në mërgatë, të punohet për të krijuar kushtet për themelimin e Qendrave të Lëvizjes VETËVENDOSJE! në Shtetet e Bashkuara të Amerikës, në Francë, në Itali dhe në vende të tjera ku shqiptarët jetojnë në mërgim dhe ku paraqitet mundësia e organizimit frytdhënës.

5. Kërkon nga të gjitha organet e Lëvizjes VETËVENDOSJE! një angazhim të shtuar për mbështetjen e fuqishme të bashkatdhetarëve dhe angazhim për organizimin e tyre në mërgatë pavarësisht prejardhjes gjeografike.

6. Duke ditur barrierat e qëllimshme që institucionet e Republikës së Kosovës vendosin ndaj përfshirjes së bashkatdhetarëve në proceset politike të vendit, kërkon angazhim të shtuar të të gjitha organeve të Lëvizjes për t’i rrëzuar këto barriera në bashkëpunim të ngushtë me bashkatdhetarët.

7. Synon rritjen e aktiviteteve publike, brenda dhe jashtë insitucioneve, për trajtimin programatik të nevojave dhe problematikave me të cilat përballen bashkatdhetarët.

Prishtinë, 23 dhjetor 2018

Grupi parlamentar i Lëvizjes dhe ai i LDK-së mbajtën konferencë për media në lidhje me gjendjen në sektorin e shëndetësisë me fokus grevën e punëtorëve shëndetësorë. Në konferencë folën dy anëtarët e komisionit parlamentar për shëndetësi, punë dhe mirëqenie sociale, Nënkryetarja e Lëvizjes Fatmire Mullhaxha Kollçaku dhe deputeti i LDK-së Naser Rugova.

Deputetët bënë të ditur angazhimet e tyre mbështetëse si anëtarë të komisionit dhe si deputetë pas vizitës së këshillit të grevës së përgjithshme të organizuar nga Federata Sindikale e Punonjësve Shëndetësorë të Kosovës në të gjitha nivelet e sistemit shëndetësor dhe të këshillit grevist të mjekëve kirurgë me fillim sot në ora 7.00 të mëngjesit.

Këshilli i Përgjithshëm i Lëvizjes VETËVENDOSJE!

Këshilli i Përgjithshëm i Lëvizjes VETËVENDOSJE!

Të ndërgjegjshme/ëm për pabarazinë historike dhe aktuale, të krijuar përmes shtypjes politike dhe shfrytëzimit ekonomik të grave e vajzave në mbarë botën, si dhe në veçanti të grave e vajzave shqiptare, e po ashtu të grave e vajzave të pakicave kombëtare;

Të bindur/a se të drejtat politike dhe ekonomike nuk vijnë asnjëherë dhe për askënd si ndjenjë bujarie prej atyre që përfitojnë nga mohimi i këtyre të drejtave, por fitohen përmes mobilizimit shoqëror, organizimit dhe angazhimit publik;

Të vetëdijshme/ëm se patriarkalizmi ushqehet sot në çdo sferë të jetës nga sistemi aktual ekonomik, politik dhe për pasojë edhe nga disa bindje simboliko-kulturore;

Duke parë se papunësia në Kosovë ka goditur më së shumti gratë dhe vajzat, nga të cilat vetëm
1 në 8 janë sot të punësuara;

Të tronditur/a nga rastet e përdhunimeve seksuale gjatë luftës të cilat kurrë nuk i adresoi as sistemi i drejtësisë ndërkombëtare dhe as ai vendor, me rreth 20.000 viktima pa përkujdesje e trajtim institucional e të cilat mbijetojnë të traumatizuara në rrethet e tyre familjare e shoqërore, diku të heshtura e diku edhe të izoluara;

Të alarmuar/a nga rastet e dhunës në familje dhe neglizhenca e institucioneve për masa dhe reagime që do të mbronin të drejtat e grave dhe të vajzave;

Të indinjuar/a nga mënyra se si gratë e vajzat portretizohen e trajtohen rëndom si objekte a mallra konsumi të përkufizuara nga seksualiteti, ose me atributet e një fëmije të parritur, prej disa institucioneve publike e disa prej kompanive private, nga shoqëria e spektaklit në përgjithësi, nga shumë burra që zotërojnë lloje të ndryshme pushteti, por edhe nga disa gra të tjera të pushtetshme që përfitojnë nga ky trajtim;

Duke ditur se shtypja mbi baza gjinore rëndon më së shumti mbi gratë më të varfra;

Duke njohur edhe ndarjen e pabarabartë të punëve dhe mohimin e vlerës publike dhe ekonomike të punës në familje, që ka peshuar e vazhdon të peshojë më së shumti mbi gratë e vajzat, sakaq që të njëjtave u mohohet edhe e drejta e trashëgimisë;

Marrë parasysh avantazhin ideor social-demokrat dhe përpjekjen organizative të Lëvizjes VETËVENDOSJE! në raport me subjektet e tjera politike në Kosovë sa i takon synimit për barazi gjinore, por duke mbetur shumë të pakënaqur/a nga shpërputhja e qëllimeve tona në raport me situatën brenda dhe jashtë organizatës;

Të vetëdijshme/ëm që organizata jonë nuk e ka të garantuar imunitetin nga diskriminimet gjinore të cilat janë pjesë e mentalitetit të shoqërisë, dhe se ka nevojë për rritje të vetëdijes dhe punës feministe në organizatë;

Të palëkundur/a në përpjekjen tonë të vazhdueshme për të përmirësuar dhe emancipuar së pari veten tonë si organizatë në angazhimin për emancipim politik, ekonomik dhe kulturor të të gjithë shoqërisë;

Të shqetësuar/a nga fakti se gratë përbëjnë vetëm 23% të anëtarësisë së Lëvizjes VETËVENDOSJE!, dhe nga mungesa e angazhimit të grave në disa prej kryesive të organizimit në nivel komunal (Qendrat) dhe shumë prej kryesive në nivel komunitar (Pikat) të Lëvizjes VETËVENDOSJE!;

Të frymëzuar/a nga shembulli dhe kontributi i paçmueshëm i grave dhe vajzave shqiptare në të gjitha etapat historike, në të gjitha nivelet e rezistencës për çlirimin e vendit, si dhe në angazhimin e tyre të sotëm për ndryshime rrënjësore;

Të ndërgjegjshme/ëm se lufta kundër pabarazisë dhe për çlirimin e grave nga shtypja e shfrytëzimi është përpjekja për çlirimin e gjithë shoqërisë:

Këshilli i Përgjithshëm i Lëvizjes VETËVENDOSJE!:

1. Konstaton se gratë dhe vajzat janë potenciali i ndrydhur dhe i nëpërkëmbur i shoqërisë sonë, i cili duhet jetësuar me gjithë fuqinë e vet transformuese.

2. Thërret për angazhim të gjitha gratë e vajzat që jetojnë brenda dhe jashtë Kosovës për t’u bashkuar me Lëvizjen VETËVENDOSJE! në përpjekjen kolektive për lirinë e plotë të vendit dhe çlirimin e grave dhe vajzave.

3. Kërkon prej Grupit Punues për reforma organizative që të trajtojë me prioritet situatën e angazhimit të grave dhe vajzave në Lëvizjen VETËVENDOSJE!, duke dhënë brenda 3 mujorit të parë të vitit 2019 edhe propozimet për mënyra shtesë për përparimin e grave dhe vajzave në struktura dhe në aktivitetet publike të Lëvizjes VETËVENDOSJE!.

4. Kërkon prej organeve përkatëse të Lëvizjes VETËVENDOSJE!, që brenda 6 mujorit të parë të vitit 2019, t’i rishikojnë dokumentet më të rëndësishme, si Statutin dhe Alternativën Qeverisëse, dhe të paraqesin propozimet përkatëse pranë Këshillit të Përgjithshëm në lidhje me shtimin e përfaqësimit dhe angazhimit publik të grave dhe vajzave brenda Lëvizjes VETËVENDOSJE! dhe për realizmin e të drejtave të tyre në shoqëri.

5. Përshëndet nismën e propozuar nga gratë e Sekretariatit të Përgjithshëm, dhe të realizuar sot, për të siguruar një hapësirë për përkujdesjen ndaj fëmijëve të delegateve dhe delegatëve të Këshillit të Përgjithshëm, pranë ambienteve ku mbahet kjo mbledhje e gjatë e organit më të lartë vendimmarrës të Lëvizjes VETËVENDOSJE!, dhe kërkon vazhdimin si dhe përhapjen më të gjerë të kësaj praktike edhe në të ardhmen edhe në struktura dhe nivele të tjera organizative, si dhe përhapjen e mesazhit për përgjegjësinë e barabartë prindërore.

6. Kërkon nga çdo Qendër e Lëvizjes VETËVENDOSJE! ku nuk ka gra anëtare në kryesi, të mbajë zgjedhje brenda 6 mujorit të parë të vitit 2019 për ta ndryshuar këtë situatë.

7. Kërkon angazhimin maksimal nga e gjithë organizata që t’i japë përparësi grave dhe vajzave në angazhime publike, organizative dhe në zgjedhje.

8. Ngulmon në fuqizimin e Sekretariatit të Gruas Aktiviste në të tri nivelet organizative, si dhe në plotësimin e pozicionit të Sekretares së Gruas Aktiviste nga të gjitha Pikat dhe Qendrat e Lëvizjes VETËVENDOSJE!, duke kërkuar edhe raport pune për këtë çështje në Këshill të Përgjithshëm në fund të gjashtëmujorit të parë të vitit 2019.

9. Inkurajon aktivitetet që rrisin ligjërimin për problemet gjinore, bashkëpunimin dhe solidaritetin mes grave.

Prishtinë, 23 dhjetor 2018

Lëvizja VETËVENDOSJE! mbajti konferencë fundviti për media mbi ngjarjet dhe skandalet në fushën e sigurisë për vitin 2018. Në konferencë deputeti dhe anëtari i Kryesisë së Lëvizjes Rexhep Selimi renditi dështimet e institucioneve të sigurisë përgjatë vitit.

Kryeskandali i vitit ishtë deportimi i 6 shtetasve turq në mënyrë tërësisht jo ligjore, aspak kushtetuese dhe tepër jo profesionale.

Ndërkohë, AKI-ja është prej institucioneve më të dëmtuarve në imazh dhe në funksion. Në krye të tij u vendos një person i cili do të duhej shkarkuar nga puna e tij në drejtimin e policisë për shkak të skandaleve të shumta aty në vend se t’i besohej drejtimit i një tjetër institucioni të rëndësishëm. Po ashtu, përgjatë vitit një punonjës i AKI-së është vrarë brenda ambienteve të institucionit, ngjarje kjo për të cilën do të duhej të kishte informacion si për çdo vepër tjetër penale.

Inspektoriari i Policisë së Kosovës është i dëmtuar i radhës, ngjashëm me AKI-në, përmes vendosjes partiake dhe arbitrare në krye të tij të një personi i cili është kapur në shkelje të ligjit gjatë rekrutimit të oficerëve për këtë institucion.

Po ashtu, Policia e Kosovës ka dështuar të ofrojë siguri, sidomos në mbrojtje të viktimave të dhunës në familje dhe njëjtë ka dështuar të ofrojë siguri më të madhe edhe në trafik.

Nga ana e saj, Qeveria ka dështuar të ofrojë dy ligje të rëndësishme për sigurinë në vend: draft-ligjin ngelur pezull ndër vite për pensionimin e parakohshëm në polici dhe plotësim-ndryshimin për ligjin për shpëtim dhe zjarrfikje, i cili do të ofronte siguri më të madhe në komunitet dhe i cili do të merrej drejtpërdrejt me gjendjen e rëndë të zjarrfikësve. Zjarrfikësit nga ana e tyre nuk kanë lënë gur pa lëvizur për plotësimin e kërkesave duke bërë thirrje, peticione dhe protesta.

Përsa i përket 3 ligjeve për FSK-në, deputeti Selimi përmendi mbështetjen e Lëvizjes për to me votë dhe me amendamentet e shumta prej saj. Po ashtu, deputeti Selimi nuk la pa përmendur edhe faktin se, “sukses mbetet kalimi i ligjeve për FSK-në, por do të mbetet vetëm ligj në letër nëse nuk do të mbështetet edhe në aspektin buxhetor dhe financiar, gjë që nuk ka ndodhur me projektligjin të cilin po e procedojnë në Kuvendin e Kosovës. Në projektligjin për buxhetin, FSK-ja trajtohet njëjti sikur më herët, përafërsisht me të njëjtin buxhet dhe me të njëjtën dinamikë financiare. Nëse Forcat e Sigurisë së Kosovës trajtohen në atë formë, atëherë do ta kemi shumë të pamundshme realizimin e objektivave që parasheh ndryshimi i tre ligjeve që kanë të bëjnë me FSK-në”.

Skandalet nuk janë aksidentale në këtë qeveri, por norma e saj e përditshme. Ndryshimi i shpeshtë i ministrave të punëve të brendshme e kanë bërë të pamundur kërkimin e përgjegjësisë dhe etikën profesionale dhe kanë stimuluar keqmenaxhimin e institucionit. Kjo qeveri dështimet dhe sabotimet e punëve të institucioneve i shpërblen me ngritje në detyrë. Prandaj duhet ta rrëzojmë për të filluar rrëzimin e një hierarkie të dhunshme dështimesh.

Sot, Kryetari i Lëvizjes VETËVENDOSJE! (LV), Albin Kurti dhe Nënkryetari, Besnik Bislimi, vizituan Drejtorin e Përgjithshëm të Doganave të Kosovës, z. Bahri Berishën, me bashkëpunëtorët e tij. Në këtë takim, Drejtori Berisha njoftoi z. Kurtin dhe z. Bislimin me punën e Doganave të Kosovës dhe funksionimin e sfidat e tyre. Në interesimin e përfaqësuesve të LV-së ai i njoftoi edhe për rënien drastike të importeve nga Serbia, luftimin e kontrabandës, si dhe u diskutua edhe për mundësitë për shtimin e mbledhjes së TVSh-së brenda shtetit. Të dyja palët shprehën gatishmërinë dhe interesimin për kontakte e takime të vazhdueshme në të ardhmen.

Lëvizja VETËVENDOSJE! uron të gjithë besimtarët dhe shqiptarët e krishterë kudo që ndodhen për festën e Krishtlindjes!

Si ngjarje e triumfit të dashurisë, së mirës, sakrificës dhe bashkëndjesisë për njëri-tjetrin dhe nevojtarët, Kërshëndellat na kujtojnë rëndësinë e angazhimit me dashuri dhe vendosmëri për drejtësi, barazi e mirëqenie.

Sot, pranë Zyrës së Bashkimit Evropian në Kosovë, u dorëzua për dijeninë e Ambasadores Nataliya Apostolova, letra e përbashkët e Kryetarit të Grupit Parlamentar të LDK-së, Avdullah Hoti, dhe Kryetarit të Grupit Parlamentar të Lëvizjes VETËVENDOSJE!, Glauk Konjufca. Letra i drejtohet Përfaqësueses së Lartë të BE-së, Federica Mogherini, dhe Komisionerit Johannes Hahn. Përmbajtja e plotë e kësaj letre është vendosur në vijim në gjuhën shqipe dhe atë angleze:

Shkelqësija e saj, Znj. Federica Mogherini
Përfaqësuesja e Lartë e Bashkimit Evropian për Politika të Jashtme dhe Politka të Sigurisë,

Këshilli i Përgjithshëm i Lëvizjes VETËVENDOSJE! sot ka mbajtur mbledhjen e XXXV-të. Kryetari Albin Kurti pos diskutimit mbi situatën politike ka folur edhe për punën e organizatës sonë gjatë këtij viti. Kurse, sekretarja Organizative Vlora Haxhimehmedi ka prezantuar raportin e punës së qendrave por edhe të Sekretariatit të Përgjjthshëm.

“Gjatë vitit 2018, deri më sot, ne i kemi patur 5.120 anëtarësime të reja. Nuk ka asnjë vit prej se jemi themeluar me kaq shumë anëtarësime brenda vitit. Dhe, pasi i kemi përditësuar e pastruar listat, sot ne i kemi mbi 36.500 anëtarë gjithsej, duke qenë një prej organizatave politike më të fuqishme jo vetëm në Kosovë, por edhe më gjerë. Sigurisht, suksesi nuk ka qenë vetëm tek anëtarësimet, por edhe te strukturimi i brendshëm. Gjatë këtij viti ne i kemi bërë edhe 146 pika të reja, pra jemi shtrirë edhe në 146 lagje qytetesh apo fshatra anembanë komunave të Kosovës ku më përpara nuk kemi patur strukturë”, ka thënë kryetari Kurti.

Në vazhdën e bashkëbisedimeve me bashkatdhetarët, në selinë e Lëvizjes VETËVENDOSJE!, Kryetari, Albin Kurti, së bashku me Sekretaren Organizative, Vlora Haxhimehmedi dhe Koordinatorin e Sekretariateve, Kreshnik Ahmetin, patën një takim virtual me anëtarët tanë në New York, ShBA.

Bashkëbisedimi u bë pas anëtarësimeve te dhjetëra bashkatdhetarëve të rinjë në New York, me synim të zgjerimit të organizatës sonë edhe në ShBA.

Sekretarja Organizative, Vlora Haxhimehmedi, shpjegoi rëndësinë e organizimit të shqiptarëve edhe në Shtetet e Bashkuara të Amerikës. Ajo tregoi përvojën e dëri tanishme me organizimin e strukturave të Lëvizjes VETËVENDOSJE! në shtete të ndryshme të Evropës, organizim i cili së shpejti pritet të realizohet edhe në ShBA. Shpjegime të mëtutjshme për formën e organizimit të Sekretariatit të Përgjithshëm dhe Sekretariateve të Qendrave dha Koordinatori i Sekretariatit të Përgjithshëm, Kreshnik Ahmeti.

Takimi vazhdoi me prezantimin e situatës politike nga Kryetari, Albin Kurti. Ai theksoi rëndësinë historike dhe aktuale të mërgatës shqiptare për dy shtetet shqiptare dhe kombin tonë në përgjithësi. Kryetari Kurti u përqendrua tek zhvillimet e fundit në lidhje me dialogun me Serbinë, veçanërisht tek aventurat personale të Presidentit Thaçi dhe tek propozimi i “Marrëveshjes Gjithëpërfshirëse” të Kryeministrit Haradinaj. Ai theksoi se para çdo dialogu të ardhshëm me Serbinë, Kuvendi i Republikës së Kosovës duhet që së pari të shqyrtoj dhe vlerësoj dialogun e deritanishëm 6 vjeçar, hapi i dytë do të duhej të ishte caktimi i qëllimeve të Republikës sonë nga ky dialog dhe përcaktimi i kërkesave që do të duhej t’i drejtoheshin Serbisë, si hap i tretë do të duhej të caktohej platforma me parime për bisedimet me Serbinë, e si hap i fundit do të duhej të caktohej ekipi negociator gjithëpërfshirës dhe me legjitimitet nga Kuvendi. Përderisa këto hapa nuk po mirren parasysh nga Presidenti e Qeveria aktuale, Kryetari Kurti theksoi rëndësinë e kundërshtimit të procesit aktual të dialogut me Serbinë, i cili po rezulton në përparimin e Serbisë drejt BE-së, e në ndarjen e defunksionalizimin e Republikës së Kosovës. Në vazhdën e këtij kundërshtimi, ai përmendi edhe bashkëpunimin aktual me një pjesë të opozitës për ndaljen e dialogut aktual dhe shkaktimin e zgjedhjeve të parakohshme.

Bashkatdhetarët u shprehën të brengosur me situatën aktuale politike dhe ekonomike të Kosovës. Ata shprehën shqetësimin e tyre për mungesën e zhvillimit ekonomik e korrupsionin në njërën anë dhe skandalet e politikës së jashtme e dialogun e dëmshëm me Serbinë të cilit po i prinë Presidenti i Kosovës dhe të cilit tani i është bashkuar edhe Qeveria me një pjesë të opozitës në Kuvend. Por, ata treguan gatishmërinë e tyre për të punuar për shtrirjen e organizatës së Lëvizjes VETËVENDOSJE! edhe në New York dhe në shtetet e tjera të ShBA-ve, për të u përballur së bashku kundër këtyre proceseve të dëmshme.

Në fund u pajtuam që t’i vazhdojmë takimet tona në shërbim të organizimit sa më të mirë të shqiptarëve në ShBA dhe në shtrirjen sa më të gjerë të Lëvizjes VETËVENDOSJE! atje.

Lëvizja VETËVENDOSJE! mbajti konferencë fundviti për media mbi gjendjen e arsimit në Kosovë për vitin 2018. Në konferencë folën dy deputetët e Lëvizjes, njëherazi edhe anëtarë të komisionit parlamentar për arsim, Ismajl Kurteshi dhe Arbërie Nagavci. Gjendja në arsim është po aq e rëndë sa dy vite më parë, kur në janar të vitit 2017 u miratua rezoluta e iniciuar nga Lëvizja VETËVENDOSJE! e cila e shpallte arsimin prioritet kombëtar për shkak të gjendjes së tij.

Deputeti Ismajl Kurteshi listoi problematikat e cilësisë së ulët të arsimit për të gjitha nivelet. Në Kosovë vazhdon mësimi me tre ndërrime dhe me mungesë laboratorësh e mjetesh të tjera të punës në shumë shkolla. Ndikimi i partive politike dhe vendosja e jashtëligjshme e drejtorëve pa kualifikim adekuat janë mëse të pranishme.

Po ashtu, tekstet shkollore të importuara nga Serbia për nxënësit e komunitetit serb janë në kundërshtim me Kushtetutën e Kosovës, ku përveç të tjerash mbjellin urrejtje nacionale, por askush nuk merret me këtë problem. Një tjetër problematikë e rëndë në arsim që nuk po trajtohet seriozisht është edhe përdorimi i lëndëve narkotike në shkolla.

Për sa i përket arsimit të lartë, deputeti Kurteshi përmendi faktin se asnjëri nga universitetet rajonale publike nuk i ka plotësuar standardet për akreditim. Në kolegje private gjendja është edhe më e rëndë me pranimet e tepërta të studentëve, pranimet në programe të pa akredituara, mosrespektimin e afateve të regjistrimit, mosregjistrimet në librat e amzës, etj. Ndërsa sa i përket monitorimit të IAL-ve, Agjencia Kosovare e Akreditimit ka kapitulluar duke thënë se nuk ka kapacitete të mjaftueshme për përcjelljen e punës së institucioneve të akredituara.

Deputetja Nagavci duke përmenduar rezultatet e testit PISA dhe të indeksit të ri të kapitalit human tregoi se nxënësit e Kosovës për 13 vite shkollim marrin njohuri ekuivalente me vetëm rreth 7 vite. 5 vite shkollim humbasin dhe rrjedhin nga 13 vite për shkak të problemeve të sistemit tonë arsimor. Një 15 vjeçar i Kosovës është 6 vite mbrapa një moshatari të tij nga Singapori.

Po ashtu, deputetja Nagavci përmendi shkarkimin e KSHC të Agjencisë së Kosovës për Akreditim duke thënë, “vendim ky i marrë me kërkesën e Kryeministrit Haradinaj, gjë që çoi deri te përjashtimi i Agjensinë Kosovare të Akreditimit nga Regjistri Evropian për Sigurimin e Cilësisë në Arsimin e Lartë (EQAR), duke dëmtuar kështu arsimin e lartë për shkak të betejave krejtësisht partiake e biznesore në mes të grupeve të caktuara të interesit”.

Përkushtimi për përmirësimin e cilësisë nuk shihet as tek Projektligji për buxhetin. Shpenzimet kapitale në arsimin parauniversitar vazhdojnë të dominohen nga shpenzimet për ndërtimin dhe renovimin e shkollave, me investime të papërfillshme në cilësinë e arsimit. Buxheti nuk ka prioritet investimin në institucionet e edukimit të fëmijërisë së hershme. Nga Projektbuxheti, ku planifikohen 69 milionë euro per MASHT, vetëm 27 milionë drejtohen për arsimin e lartë duke lënë një shumë të papërfillshme për hulumtimin shkencor dhe projektet zhvillimore.

Me këtë trend të politikbërjes për arsimin, viti 2019 dhe vitet në vazhdim janë ogurzeza për fëmijët dhe të ardhmen tonë. Kjo qeveri është e verbuar dhe e burgosur nga përfitimet e të tashmes dhe e ka të pamundur të mendoj për të ardhmen e rinisë dhe të arsimit.

Qendra e Lëvizjes VETËVENDOSJE! në Dardanë, në një sallë të madhe e të mbushur plot me mbështetës e simpatizantë të LV-së ka mbajtur një takim ku është diskutuar gjatë mbi situatën politike në nivel vendi dhe për atëlokale.

Lëvizja VETËVENDOSJE! mbajti konferencë për media në lidhje me shkeljet kushtetuese që Presidenti Thaçi po i bën që një vit e gjysmë duke mos emëruar anëtarët e KQZ sipas rezultatit të zgjedhjeve të 11 qershorit 2017.

Anëtari i Kryesisë së Lëvizjes dhe deputeti Xhelal Sveçla duke folur për Komisioni Qendror të Zgjedhjeve si organ i rëndësishëm kushtetues dhe i pavarur, ligjshmëria dhe kushtetutshmëria e të cilit është parakusht për garantimin e paanshmërisë dhe integritetit të zgjedhjeve, foli për degradimin dhe kapjen që Presidenti po i bën këtij institucioni, mirëpo tash edhe me bashkëpunëtorët e tij negociatorë, jo vetëm PDK, kryetar i së cilës ishte, por edhe me AAK-në, NISMA-n dhe PSD-në.

“Përbërja dhe funksionet e Komisionit Qendror të Zgjedhjeve duhet të shihen nga këndvështrimi i ndikimit në integritetin e zgjedhjeve, besueshmërinë e paanshmërinë e procesit zgjedhor dhe ndërtimit të konsolidimit të demokracisë nëpërmjet garës elektorale të subjekteve politike që kanë marrë pjesë në zgjedhje dhe që kanë qenë të çertifikuara nga ana e KQZ-së në zgjedhjet e fundit. Kjo është norma dhe fryma që mbartë Kushtetuta e Republikës, e veçmas e ligjit për zgjedhjet e përgjithshme në Kosovë. Andaj, çfarëdo cenimi i integritetit të KQZ-së, siç po bënë Presidenti Thaçi, është cenim i demokracisë e shkelje e rëndë e ligjit dhe e Kushtetutës së Republikës”, tha Xhelal Sveçla.

Ai po ashtu foli edhe për ligjin për zgjedhjet që thekson qartë se“Mandati i anëtarëve të KQZ-së fillon jo më vonë se gjashtëdhjetë (60) ditë pas certifikimit të rezultateve të zgjedhjeve për Kuvend”. Pra mandatet në KQZ nuk kanë të bëjnë me Kuvendin, por direkt me rezultatin e zgjedhjeve. Sipas rezultateve të zgjedhjeve të 11 qershorit 2017 koalicioni PAN do të duhet të ketë 2 anëtarë, Lëvizja VETËVENDOSJE! 2 anëtarë dhe koalicioni LAA dy anëtarë.

Ndërkaq, anëtarja e Kryesisë dhe deputetja Albulena Haxhiu foli për Aktgjykimin e Gjykatës Kushtetuese, por edhe procedurat dhe kushtet e emërimit të anëtarëve të KQZ-së të cilat janë të qarta.

“Sipas Kushtetutës, grupi më i madh parlamentar duhet te konsiderohet partia, koalicioni, iniciativa qytetare dhe kandidatë të pavarur që kanë më shumë vende në Kuvend, në kuptim të nenit 64 (1) të Kushtetutës, se çdo tjetër parti, koalicion, iniciativë qytetare dhe kandidatë të pavarur që kanë marrë pjesë si të tillë në zgjedhje…”, tha ajo duke cituar Aktgjykimin e Gjykatës Kushtetuese.

Hashim Thaçi nuk mund ta përdorë zyrën e Presidentit, për t’ia mohuar opozitës përfaqësimin që ua ka dhënë votuesi në zgjedhje, e ia garanton Kushtetuta, ligji, por edhe standardet ndërkombëtare.

Lëvizja VETËVENDOSJE!, në përputhje me Kushtetutën dhe Ligjin për zgjedhje, sot do të dorëzojë tek presidenti dy nominime për anëtarë të KQZ-së, Adnan Rrustemin, anëtarin e deritanishëm të KQZ-së nga Lëvizja dhe Nazlie Balen. VETËVENDOSJE! kërkon nga Presidenti që sa më parë të konfirmojë dy anëtarët e propozuar të KQZ-së që do të përfaqësojnë Lëvizjen VETËVENDOSJE! në këtë mandat dhe të tërhiqet nga skenarët e tij për të tregtuar përbërjen e KQZ-së. Çfarëdo vendimi tjetër përveç atij që na garanton Kushtetuta, ligji për zgjedhjet dhe rezultati i zgjedhjeve të 11 qershorit, do të jetë i papranueshëm dhe do të kontestohet në të gjitha rrugët ligjore dhe kushtetuese.

Qeveria e Kosovës, Kryeministri dhe ministri Shëndetësisë ia kanë rritur pagat 100% vetes para një viti. Edhe pse disa herë kanë premtuar se do të marrin parasysh rritjen e pagave për sektorin e shëndetësisë, pra mjekët e punëtorët shëndetësor në tërësi ende sot nuk ka asnjë shenjë në atë drejtim.

Edhe në projektligjin për paga mjekët specialistë, farmacistët, infermierët dhe mjekët familjarë ishin vendosur tepër ultë në hierarkinë e pagave të punëtorëve në sektorin publik.

E drejta për ajër të pastër është e drejtë themelore e qytetarëve tanë. Nuk ka dhe nuk duhet të ketë kompromis me këtë çështje.

Nën këtë frymë Grupi parlamentar i Lëvizjes së bashku me deputetë nga Lidhja Demokratike e Kosovës sot në Kuvend mbajtën një debat mbi krizën mjedisore në vend. Tema ishte e fokusuar në ndotjen e ajrit. Anipse prej 1 shkurtit është miratuar rezoluta për masa imediate, sot ende nuk kemi asnjë rezultat. Po ashtu, asnjë veprim serioz nuk pritet nga planet e qeverisë për vitin 2019. Në tryezë ishin të ftuar profesorë, studiues, ekspertë mjedisor dhe organizata të shoqërisë civile.

Kriza mjedisore është emergjencë lokale, kombëtare dhe globale. Raporti me mjedisin po na shtyn si njerëzim të rikonsiderojmë të gjitha presupozimet e marra si të mirëqena deri tani mbi zhvillimin ekonomik, politikbërjen dhe të ardhmen tonë.

Në rajonin e Prishtinës, një ditë më parë ndotja e ajrit arriti nivelin e fundit, atë helmues. Aspak më mirë nuk qëndron situata në rajonin e Drenicës për shkak të Ferronikelti dhe në atë të Hanit të Elezit për shkak të Sharr Cemit.

Ndotjes i ka dhënë ndihmesë të madhe edhe mënyra e qeverisjes. Mungojnë investimet serioze për sistemet e ngrohjes. Termokosi mbulon pak lagje në Prishtinë dhe zgjerimi i shtrirjes së tij po ecën tepër ngadalë. Çmimi i energjisë është rritur 4 herë nga KEDS-i, që prej privatizimit të vitit 2013. Rritja e çmimit të energjisë e ka nxitur edhe më tepër përdorimin e lëndeve të tjera si qymyri për ngrohje shtëpiake. Industritë prodhuese private dhe publike nuk mbikqyren dhe as nuk ndëshkohen për efektet e tyre të dëmshme dhe të papërgjegjshme mjedisore. Ndërsa për zonat e rrezikuara nga shpyllëzimi nuk ka ndonjë projekt ambicioz për krijimin e brezave të gjelbërt.

Kryetari i Lëvizjes VETËVENDOSJE! Albin Kurti midis të tjerash në fjalën e tij tha se po të shihet planifikimi buxhetor për 2019 të krijohet përshtypja se Kosova nuk ka fare probleme mjedisore.

Mungesa e matjeve dhe e analizave të përhershme për nivelin e krizës mjedisore, ndonëse ka matje e studime të pjesëshme, e bën edhe më të komplikuar situatën.

Diskutimi përgjatë tryezës shtroi problemin e mungesës së implementimit të pikave të miratuara në rezolutën e vitit të kaluar për krizën mjedisore.

Po ashtu, u përmend fakti se në rastin e Prishtinës, futja e autobusëve të rinj nuk e ka ndryshuar ndotjen e ajrit. Plani i mobilitetit urban të Prishtinë duhet të planifikojë një infrastrukturë të posaçme për autobusët me ndotje të vogël, në mënyrë që qytetarët ta shohin të natyrshëm përdorimin e transportit publik.

Profesionistët e profileve të ndryshme nuk e kursyen as kritikën për institucionet të mbrojtjes mjedisore. Përgjegjësit për mjedisin janë të padukshëm dhe vuajnë nga tepria e korrupsionit, mungesa e kompetencës, mungesa e një vizioni strategjik. Jeta pa ndotje për ta është rrëfim i konferencave jashtë vendit, jo detyrë e panegociueshme e punës së përditshme.

Propozimet për zgjidhjen e krizës tonë mjedisore variojnë dhe disa sosh janë: izolimi i ndërtesave publike; investime në energji diellore dhe në erë; ndërprerje e liçensave për futjen e ujrave nëpër tuba; studim fizibiliteti për nevojat e Kosovës për energji elektrike; studime mbi përdorimin e qymyrit dhe të ekonomisë ilegale të lidhur me të, etj.

Prodhimin, konsumin, zhvillimin dhe raportin tonë me hapësirat publike duhet t’ia nënshtrojmë kësaj të drejtë primare, të drejtës për ajër të pastër. Parimeve dhe jetësimit të drejtësisë sociale, jetës së dinjitetshme duhet t’i bashkëngjisim angazhimin për mjedisin.

Lëvizja VETËVENDOSJE! mbajti konferencë për media mbi premtimet e dështuara dhe skandalet që s’kanë të ndalur nga politika e jashtme e Republikës së Kosovës. Në konferencë foli deputetja dhe anëtarja e kryesisë së Lëvizjes Fitore Pacolli. Viti 2018 është viti i premtimeve të papërgjegjshme për politikën e jashtme me mjete e tentativa kaotike e të rrezikshme për realizimin e tyre dhe si përfundim me rezultate dëshpëruese.

Këtë vit, dialogu 8-vjeçar pa parime e pa kushte me Serbinë, në vend të njohjes nga Serbia premtuar nga qeveria jonë, ka mbërritur në vënien në dyshim të shtetësisë së Kosovës me idenë e “korrigjimit të kufijve” të Presidentit Thaçi. “Presidenti Thaçi e ka kthyer vendin në kohën para shpalljes së pavarësisë. Ka dobësuar subjektivitetin ndërkombëtar dhe ka fuqizuar Serbinë. Ka krijuar kështu hapësirë më të gjerë lobimi kundër shtetësisë së Kosovës”, tha deputetja Fitore Pacolli.

Në këto kushte, Serbia ka intensifikuar fushatën kundër Kosovës tek shtetet që ende nuk na kanë njohur. Ndërkohë, institucionet e politikës tonë të jashtme japin deklarata kundërthënëse dhe të çakorduara mbi tërheqjen e njohjeve nga vendet që na kanë njohur më parë, duke konfirmuar më shumë antifushatën e Serbisë sesa fushatën për Kosovën. Po ashtu, edhe presidenti i vendit i ka hedhur benzin zjarrit të kësaj antifushate të Serbisë me takimet e tij me Medvedevin dhe Putinin, kundërshtarët kryesorë të Pavarësisë së Kosovës. Nuk mund dhe nuk duhet zëvendësuar Gjermania, dhe partneriteti strategjik me të, me Rusinë.

Më tutje, përgjatë këtij viti diplomacia jonë nuk ka arritur asnjë anëtarësim në ndonjë organizatë të rëndësishme ndërkombëtare dhe as aplikimin për anëtarësim në Këshillin e Evropës, për të cilën Qeveria ka thënë se është gati që në muajin prill. Ndërsa për rastin e INTERPOL-it, jo vetëm që nuk siguruan anëtarësimin, por i morën edhe fytyrën shtetësisë së vendit me mungesën e dinjitetit dhe integritetit në paraqitjen e tyre.

Në lidhje me nivelin e diplomacisë, deputetja Pacolli renditi problematikate saj duke thënë, “shërbimi i Jashtëm dhe funksionimi i përfaqësive diplomatike e konsullore nuk ka përmirësime. Degradimi i mëtejshëm dëshmohet edhe nga diplomatët tashmë të dorëhequr. Kanë ndërmarrë vendime arbitrare, për interesa partiake e individuale të cilat bien në kundërshtim me legjislacionin në fuqi nga Presidenti te Ministri i Punëve të Jashtme. Ligji për Shërbimin Diplomatik në Kosovë e përcakton që kuota për përfaqësuesit diplomatikë është 50% politikë dhe 50% të emëruar nga detyra në Shërbimin e Jashtëm, apo siç njihen ndryshe ambasadorë të karrierës. Në Kosovë kjo kuotë është tejkaluar, duke bërë që gati 80% të përfaqësuesve diplomatikë në vendet e huaja të jenë të emëruar politikë”.

Po ashtu, Qeveria s’kishte hezituar të premtonte marrjen e statusit të shtetit kandidat për anëtarësim në BE në fund të vitit 2018. Ky proces lidhet direkt me zbatimin e Planit Kombërare të MSA-së dhe reformave kyçe në kuadër të Agjendës për Reformë Evropiane. Deputetja Pacolli përmendi nivelin e progresit për këto reforma, “informatat zyrtare paraqesin se vetëm 13% e prioriteteve në Planin Kombëtar për zbatimin e MSA-së janë përmbushur, ndërsa vetëm 4 prioritetet prej 22 prioriteteve të Agjendës Evropiane për Reforma janë përmbushur plotësisht”.

Kjo qeveri dështoi edhe me Liberalizimin e Vizave, premtuar në mënyrë të përsëritur prej vitit 2009. Madje, Kryeministri ende po e premton këtë fundvit liberalizim e tyre edhe pse, për informacion, institucionet e BE-së nga data 21 deri më 2 janar marrin pushimet dimrërore. Por edhe për luftimin e krimit të organizuar dhe të korrupsionit, që ka qenë kriter kryesor i vendosur për liberalizim, sipas raportit të ekspertëve të Komisionit Evropian është theksuar mungesë e vullnetit për zbatimin e ligjit dhe e kapaciteteteve institucionale me përgatitje profesionale për të luftuar korrupsionin në nivelin e lartë dhe të ardhurat nga krimi dhe shpëlarjen e parave.

Në mbyllje të viti 2018, mund të themi pa mëdyshje se me këtë mendësi të qeverisje nuk mund të presim avancime në proceset e integrimit dhe në politikën e jashtme. Pa politikë të brendshme zhvillimore, të qëndrueshme dhe me integritet, politika e jashtme është vetëm një iluzion.

Ditën e sotme, hapave të sigurt të Lëvizjes i janë bashkuar edhe 47 anëtarësime të reja në Kaçanik. Domosdoshmëria e angazhimit politik po ndihet kudo në Kosovë. Angazhim ose arrati është zgjedhja e thjeshtuar dhe aspak e thjeshtë për çdo qytetar të republikës. Thirrja për ta ndryshuar veten dhe Kosovën bashkë me të na e rrit entuziazmin dhe na e shton vendosmërinë. Lëvizjes po i shtohet masa dhe intensiteti, përgjegjësia dhe pritshmëritë. Mbështetja e rritur për Lëvizjen tregon se Lëvizja është një domosdoshmëri popullore dhe një vizion kolektiv për të ardhmen tonë.

Mbrëmjen e sotme Imri Demelezi nga komiteti për bujqësi mbajti prezantimin mbi “Çka prodhojmë – me çka po ushqehemi?” Në diskutimin me fermerë, agronomë, veterinerë, studiues, ekonomistë e specilistë të zhvillimit rural e të shëndetit publik që pasoi, u fol për secilin segment nga ku u trajtua prodhimi si qëllimi jo vetëm i punësimit e ndërmarrësisë por si agregat final i ushqimit të popullatës.

Lëvizjes VETËVENDOSJE!, po vazhdojnë t’i forcohen radhët. Parimeve të drejta po i shtohet ditë e më shumë edhe fuqia organizative përmes anëtarsimeve të shumta. Mbrëmë, Kryetari i Lëvizjes Albin Kurti, Kryetari i Komunës së Prizrenit Mytaher Haskuka, Kryetari i Qendrës dhe i Kuvendit Komunal të Prizrenit Artan Abrashi si dhe deputetët Drita Millaku e Arbër Rexhaj mirëpriten dhjetëra anëtarë e rinj që së fundmi iu bashkuan Lëvizjes.

Angazhimi i përditshëm politik në lagje e në fshat, në Komunë e Republikë janë jo vetëm nevojë, por edhe garanci e ruajtjes së parimeve politike dhe vazhdimit të rrugës së drejtë për zhvillim. Politika e shkëputur nga qytetari është qeverisje dhe pasurim për vete, qytetaria në qeverisje është mirëqenie dhe barazi për të gjithë.

Ditën e sotme, në ambientet e Kuvendit të Kosovës u mbajt tryeza e diskutimit me temë “Raporti i Republikës së Kosovës me Bashkimin Evropian – Lëvizja e lirë, Reformat, MSA” e ftuar nga deputetët anëtarë të Komisionit parlamentar për integrime, dr. Fatmire Kollçaku nga Lëvizja VETËVENDOSJE! dhe Armend Zemaj nga LDK-ja. Pjesmarrës në tryezë ishin profesionistë të fushës, përfaqësuesit e instituteve dhe organizatave që mbulojnë këtë fushë dhe profesorë e studiues të çështjeve të integrimit dhe politikës së jashtme. Qëllimi i tryezës ishte mbledhja e kritikave, propozimeve dhe rekomandimeve mbi raportin e vendit tonë me BE-në në mënyrë që këto çështje të mund të ngrihen dhe të çohen më tutje në Kuvendin e Kosovës dhe në Komisionet përkatëse parlamentare.

Mosliberalizimi i vizave, ngecja e zbatimit të Agjendës Evropiane të reformave, mosshfrytëzimi për anvacim të mëtejmë i MSA-së europiane dhe dialogu problematik me Serbinë e bëjnë të domosdoshme organizimin e një debati të gjatë publik në fushën e integrimeve nga opozita bashkë me profesionistët e fushës dhe me përfaqësuesit e shoqërisë civile.

Tryeza theksoi detyrën e opozitës për mbikqyrjen e ngecjeve të proceseve integruese, duke u kontribuuar pikërisht kështu proceseve përmes kritikës dhe rekomandimeve të saj. Në vazhdim të fjalëve u përmend fakti se Kosova cilësohet sipas të gjitha raporteve ndërkombëtare si “shtet me elementët të shtetit të kapur”. Është pikërisht kapja e shtetit ajo që po e ngulfat dhe nuk po i lë të lëvizin politikat integruese të Kosovës.

Më tutje, të pranishmit treguan rrjedhën e proceseve të hapura nga BE-ja për Kosovën nga viti 2003 e këtej. Këtu u kritikua fakti se në vitin 2011 qeveria e Kosovës i dërgoi mesazhin e gabuar BE-së me hapjen e dialogut me Serbinë. Tashmë dialogu me Serbinë, edhe sipas strategjisë së fundit për zgjerim, është bërë kërkesa më e fortë ndaj Kosovës në raport me integrimin, edhe pse pa asnjë vizion dhe datë të qartë për përmbylljen e këtij procesi.

Sa i përket axhendës evropiane të reformave dhe strategjive të nënshkruara në kuadër të MSA-së, të pranishmit listuan ngecjet e këtyre reformave dhe moszbatimin e strategjive për të cilat janë zotuar nënshkruesit tanë.

Po ashtu, edhe mbi mosliberalizimin e vizave u argumentua se problemi kryesor duhet të shihet te lufta e munguar e korrupsionit. Plotësimi i kritereve për liberalizim do të duhej të ishte ndjekur nga zbatimi i tyre, çka nuk ka ndodhur. Asnjë akt final gjykimi nuk është dhënë nga gjykatat tona mbi ndonjë rast të korrupsionit në nivele të larta. Korrupsioni që e shqetëson BE-në në Kosovë nuk është ai i niveleve të ulëta, por ai institucional përmes zhvatjes së buxhetit të shtetit.

Ndryshe nga pushteti, i cili është fokusuar në kritikën vend e pavend ndaj BE-së, një plan dhe strategji për çkapjen e shtetit është detyra kryesore e opozitës për t’u hartuar në bashkëpunim me deputetë, profesionistë, profesorë dhe organizata të shoqërisë civile. Ky plan do të duhej të hartohej me vizionin se integrimet ndërkombëtare nuk duhet të jenë më shumë qëllime në vetvete sesa efekte të zhvillimit të brendshëm dhe se nuk mundet të ketë integrime ndërkombëtare pa integritet të brendshëm politik dhe institucional.

Në vazhdim të diskutimit u kritikuan edhe komisionet parlamentare për mungesë të përgatitjes së duhur, mungesë të memories institucionale dhe mungesë të mbikqyrjes në lartësinë e detyrës të punëve të qeverisë dhe të proceseve integruese.

Në përfundim, nga tryeza u nxorrën disa konkluzione për t’u patur parasysh nga deputetët e opozitës deri në organizimin e tryezës së radhës:

1. Ngecja në reforma dhe moskryerja e obligimeve për të cilat institucionet e Kosovës janë zotuar para organizmave të BE-së;

2. Miratimi i ligjeve dhe plotësimi i kritereve nuk është pasuar nga zbatimi i tyre dhe legjislacioni vijon të pësojë ndryshim – plotësime të njëpasnjëshme që në vitin e parë ose të dytë të miratimit;

3. Mungesa e luftimit të krimit të organizuar dhe të korrupsionit;

4. BE duhet ta marrë në konsideratë qasjen pro BE-së nga qytetarët e Kosovës;

5. Kuvendi nuk ka qenë në lartësinë e përfaqësimit të vullnetit të qytetarëve në raport me mekanizmat e BE-së dhe mbikëqyrjen e kritereve të pranuara nga të dy palët;

6. Opozita duhet të udhëheqë Komisionin Parlamentar për Integrime;

7. Komisioni për Integrime duhet të kryejë shumë më shumë monitorim e mbikëqyrje se deri më tani.