Dy misione të shenjta: angazhimin për liri e barazi dhe student i mjekësisë. I përkushtuar i tëri për shoqërinë dhe mirëqenien e saj. Aktivist e humanist i vërtetë ishte Astrit Dehari. Në respekt të angazhimit të Astritit, rrugëtimit të mjekësisë që iu ndal në gjysmë, sot në mënyrë vullnetare dhuruam gjak në zyrën e Lëvizjes, ndërkohë që studentë e kolegë të Astrit Deharit nga Fakulteti i Mjekësisë së bashku me drejtorin e Drejtorisë së Shëndetit në Komunën e Prishtinës Arben Vitia dhe nënkryetaren e Lëvizjes Fatmire Mulhaxha – Kollçaku të shoqëruar nga mjekë të tjerë organizuan vizita mjekësore falas tek disa nga familjet në nevojë.

Me propozimin e grupit të asamblesitëve të Lëvizjes në Kuvendin Komunal të Prishtinës u vendos që një rrugë të mbajë emrin e aktivistëve Arbënor dhe Astrit Dehari, për nder të jetës dhe veprës së tyre atdhetare.

Në vendin ku gërshetohen rrugët ”Muharrem Fejza” dhe ”Bahri Fazliu” sot u vendos dhe ajo e ”Arbënor e Astrit Dehari” .

Lavdi të gjithë heronjve të Kombit. Lavdi Arbënor e Astrit Deharit

Sot në adresën e Lëvizjes VETËVENDOSJE!, drejtuar Kryetarit Albin Kurti, është dërguar një letër nga Internacionalja Socialiste në lidhje me rastin e Astrit Deharit. Internacionalja Socialiste është grupacioni më i madh ndërkombëtar i partive social-demokrate, ku bën pjesë edhe Levizja VETËVENDOSJE!. Në vijim teksti i plotë i letrës dërguar sot nga Internacionalja Socialiste:  

INTERNACIONALJA SOCIALISTE 

5 nëntor 2018

Albin Kurti
Kryetar i Lëvizjes VETËVENDOSJE!
Kosovë

I dashur Kryetar, i dashur mik,

Teksa përkujtojmë sot përvejtorin e dytë të vdekjes së trishtueshme të anëtarit të Këshillit të Përgjithshëm të Lëvizjes VETËVENDOSJE!, Astrit Deharit, i cili vdiq në burg ndërkohë që aty mbahej pa aktakuzë, ne ju shprehim juve, familjes dhe shokëve të tij, konsideratën dhe solidaritetin tonë.

Është tërësisht e papranueshme që pas dy vitesh rrethanat e vdekjes së tij tragjike ende nuk janë sqaruar dhe se ende nuk është vendosur drejtësi. Ne e mirëpritëm vendimin e marrë nga qeveria në shkurt të vitit 2018 për të lejuar një hetim të pavarur nga “Qendra Universitare e Mjekësisë Ligjore – Romand”, (CUTML), në Zvicër, por mbetemi thellësisht të shqetësuar për vonesat në përmbylljen e këtij procesi, duke sjell ndër mendje se “drejtësia e vonuar është drejtësi e mohuar”.

Shfrytëzojmë rastin për t’i bërë thirrje qeverisë që të nderojë dhe respektojë të drejtat e Astrit Deharit dhe familjes së tij, të shpejtojë zbardhjen e këtij rasti, si dhe të bashkëpunojë plotësisht dhe pa vonesa me hetimin e pavarur që po zhvillohet në Qendrën e Mjeksësisë Ligjore në Zvicër.

Familja globale politike e Internacionales Socialiste, anëtare e së cilës është Lëvizja VETËVENDOSJE!, do të vazhdojë t’i ndjekë nga afër zhvillimet e këtij rasti.

Përshëndetje të përzemërta,

Luis Ayala
Sekretar i Përgjithshëm

Sot, në selinë qendrore të Lëvizjes VETËVENDOSJE! në Prishtinë, u mbajt mbledhja e rregullt me Qendrat tona në Kosovë e mërgatë.

Në mbledhjen që e udhëhoqi Sekretarja Organizative, Vlora Haxhimehmedi, u diskutuan raportet e punës, raportet për protestën e 29 shtatorit, planifikimi buxhetor për vitin 2019 si dhe anëtarësimet e reja për vitin 2018 sipas Qendrave.

Në kuadër të diskutimeve për situatën politike, Kryetari Albin Kurti, përveç tjerash theksoi: “Pazari me Serbinë i presidentit të Kosovës ka pësuar zbaticë. Protesta masive, paqësore dhe qytetare e 29 shtatorit tregoi se ka kaluar koha e udhëheqësve shqiptarë që bëjnë ujdi me Nikolla Pashiqin për t’i falur Serbisë territore. Pra, Hashim Thaçi është një shekull i vonuar. Kosova sot ka nevojë urgjente për zhvillim dhe shtetndërtim, e jo për kryeministër zhvatës dhe president shtet-rrënues.”

Mirëdita aktivistë të dashur, të nderuar anëtarë të Këshillit të Përgjithshëm të Lëvizjes VETËVENDOSJE!

Ua uroj mirëseardhjen në këtë mbledhje të organit tonë më të lartë, e i përshëndes edhe gazetarët që janë këtu sot për ta përcjellë këtë aktivitet tonin.

Kjo mbledhje është shumë e rëndësishme. Ajo po mbahet në një moment të mirë për Lëvizjen VETËVENDOSJE! dhe në një moment të vështirë për shtetin e Kosovës. Moment i mirë për Lëvizjen tonë sepse është moment i konsolidimit të brendshëm organizativ si dhe kohë e rritjes së mbështetjes popullore për VETËVENDOSJE!-n. Në njërën anë, është shtuar vazhdimisht anëtarësia jonë dhe kemi mbajtur zgjedhje të brendshme në 16 qendra për kryetarë degësh, me ç’rast në tetë prej tyre ka pasur garë me kundërkadidatë. Në anën tjetër, sondazhet tregojnë edhe për mbështetje popullore të madhe, edhe për rritje të vijueshme të kësaj mbështetjeje. E, këto dëshmojnë se ne jemi në rrugën e drejtë e të duhur në të cilin po ecim përherë e më shpejt.

Por kjo mbledhje është e rëndësishme edhe për faktin se – fatkeqësisht – Kosova është duke kaluar një moment të vështirë politik. Një udhëheqësi e kapur dhe e kriminalizuar, në majë të së cilës qëndron presidenti Thaçi, po e nxjerr në shitje territorin e Kosovës për të fituar paprekshmëri vetjake. Ne këtë nuk mund ta lejojmë dhe nuk do ta lejojmë. Ata po e sjellin punën që shqiptarët prapë të largohen nga trojet tona kombëtare, ku jemi autoktonë. Por këtë gjë, e kemi detyrë historike e kombëtare, detyrë qytetare e njerëzore, që ta ndalojmë, që ta parandalojmë.

Situata politike është aso që ka nevojë për pjekuri dhe forcim të organizatës, dhe disiplinim të aktivistëve, sepse në ditët e javët e ardhshme do të vendosemi në krye të një procesi protestash qytetare e paqësore, për ta ndalur këtë krim që po bëhet ndaj Kosovës dhe popullit tonë.

Ju i keni parë disa analistë që njihen si shërbëtorë mediatikë të regjimit, se si ditët e fundit po e paraqesin opsionin e shkëmbimit të territorit me Serbinë, apo të korrigjimit të kufijve, si një alternativë më të mirë se sa ‘Zajednica’. Më në fund, edhe këta njerëz të Thaçit po e pranojnë atë që ne kemi thënë gjithnjë, që ‘Zajednica’ e defunksionalizon dhe e bosnjëzon Kosovën.

Mirëpo, duke u thirrur te ndalimi i ‘Zajednicës’, këta që vetë na e sollën ‘Zajednicën’, po na thonë se duhet t’i japim Serbisë veriun, për të marrë ndonjë pjesë të vogël të territorit në Kosovës Lindore.

Arsyeja pse duan ta japin veriun është për shkak se atë pjesë po e kontrollon Serbia. Pra, edhe këtë gjë që ne e kemi thënë prej vitesh, sot po na e pranojnë. Por, pse po e kontrollon Serbia veriun? Kush i ka lejuar mbajtjen e zgjedhjeve të Serbisë në veri? Kush e ka lejuar dhe e ka favorizuar kontrabandën në atë pjesë të Kosovës, madje edhe duke bashkëpunuar me ta në biznese të paligjshme? Kush e ka lejuar kontrollin e asaj pjese të Kosovës prej kriminelëve të armatosur, për vite me radhë? Kush ka negociuar me ata kriminelë për koalicione zgjedhore e qeveritare në Prishtinë? Kush e ka lejuar, pra, kontrollin e Kosovës nga biznesmenët e kontrolluar prej Beogradit? Pikërisht këta qeveritarë me në krye Hashim Thaçin. Madje këta i kanë amnestuar kriminelët në veri para pesë vjetëve dhe i kanë lejuar e inkurajuar kriminelët të bëhen pjesë e institucioneve të Kosovës, duke i bërë bile edhe policë. Kanë bërë fond zhvillimor për veriun. Kosova s’ka fond zhvillimor, por ajo e ka bërë një të tillë për veriun. Kinse për të integruar veriun. Ne iu kemi thënë edhe atëherë, që Kosova nuk duhet të lëshojë pe përballë kriminelëve. Se nuk ka integrim me privilegje por veçse me barazi. Por, kur pushteti sundohet nga kriminelët, sigurisht që shteti lëshon pe përballë kriminelëve.

Thaçi na i solli dy të këqija të mëdha dhe sot na thotë zgjidhni njërën. Ose ‘Zajednicën’, ose shkëmbimin e territoreve. Kjo është si ta marrësh njeriun e shëndoshë e t’i thuash zgjidh, a po don me ta pre dorën apo këmbën? Asnjërën nuk duam me na i pre! I duam të gjitha gjymtyrët, na duhet edhe dora edhe këmba. Nuk është luks të duash të ruash gjymtyrët e tua. Prandaj ky shantazh i dyfishtë është i papranueshëm. Serbia nuk ka të drejtë të kërkojë që Kosovës t’i pritet ose këmba ose dora, dhe, Hashim Thaçi e të tjerët nuk kanë të drejtë të negociojnë se a duhet të pritet dora apo këmba. Kosovës i nevojitet dhe i takon veriu i saj. Madje 115 shtete kanë thënë që veriu i Kosovës i takon shtetit të pavarur të Kosovës. Kurse Presheva, Medvegja dhe Bujanoci kanë bërë edhe referendum edhe luftë për t’u bashkuar me Kosovën, mirëpo, ky që tash është president, në dy mandate si kryeministër dhe në një tjetër si ministër i jashtëm, nuk e ndihmoi Kosovën Lindore aspak me buxhet shteti dhe nuk e ngriti asnjëherë çështjen e tyre në Bruksel.

Nëse duhet të ketë bisedime me Serbinë, ato duhet të jenë parimore, dhe t’i shërbejnë përparimit dhe demokratizimit në të dyja vendet. Ato duhet të bazohen tek njohja e Kosovës dhe pranimi, kërkimfalja dhe dëmshpërblimi për krimet e luftës. Sepse, bisedimi me Serbinë pa njohje të Kosovës e pa pranim të krimeve të luftës, e forcon në Serbi faktorin anti-shqiptar, ultranacionalist e shovinist. Ne e kemi në dorë ta mbrojmë jo vetëm vetveten nga Serbia, por edhe Evropën nga Serbia. Sepse ne e kemi në dorë që ta detyrojmë Serbinë të ndryshojë veten para se të anëtarësohet në BE. Me bisedimet e Thaçit është forcuar rryma çetnike në Beograd dhe Serbia e atillë ka avancuar drejt BE-së. Në Serbi përdoren proceset gjyqësore për t’i rehabilituar çetnikët dhe nazifashistët: një herë u rehabilitua Drazha Mihajloviq e tash edhe Milan Nediq. Gjykatat e bëjnë anën juridike dhe politike të punës, ndërkaq kisha ortodokse atje e bën anën ideologjike dhe shpirtërore.

Dhe kjo ka qenë një nga pasojat e strategjive të dështuara të Thaçit në dialogun me Serbinë. Ai e ka forcuar dhe po e forcon faktorin ultranacionalist në Serbi. Me lëshimet që i ka bërë, Thaçi e ka shfajësuar ndërkombëtarisht Aleksandër Vuçiqin, i cili ka qenë ministër i Milosheviqit në kohë të luftës. Aq shumë është forcuar Vuçiq sot në Serbi, sa pothuajse nuk ka më opozitë. A është kjo ajo që duam ne? Një Serbi e cila qeveriset nga bashkëpunëtorët e Millosheviqit? Ministri i Jashtëm serb është ish-zëdhënës i partisë së Milosheviqit. Ministri i Mbrojtjes serb është ish-zëdhënës i partisë së gruas së Milosheviqit. E pra, një Serbi e cila qeveriset nga bashkëpunëtorë të Milosheviqit këtë e ka ndihmuar pikërisht Thaçi. Ne jemi një forcë e majtë. Jemi socialdemokratë. Ne jemi të interesuar që edhe në Serbi të qeverisin forca demokratike e sociale e progresiste, dhe jo forca shoviniste që rehabilitojnë kriminelët e luftës. Vetëvendosja në pushtet nuk do ta forconte Vuçiqin, por do të gjendte dhe do të ndihmonte forca progresive në Serbi, që e duan reciprocitetin dhe nuk duan të mbeten peng të së shkuarës.

Këta po na thonë se po diskutojnë për të mirë të shqiptarëve të Luginës, mirëpo ndryshimi i kufijve e dëmton rëndë Luginën, sipas mënyrës së tyre. Ne e dimë se kështu siç po flitet, për faktorë demografikë etnikë, pa përmendur të drejtat historike e pronësore, shqiptarët dalin të humbur. Po të jetë vetëm për demografi, shumicën e shqiptarëve të Luginës tashmë Serbia e ka përzënë dhe ata jetojnë në Kosovë, ose në mërgatë. Pa u llogaritur edhe ata që janë shpërngulur nga Lugina, atëherë ne e humbim Medvegjën, sepse aty shqiptarët aktualisht janë pakicë, edhe pse kanë prona dhe dikur kanë qenë shumicë. Po ashtu, është bërë e qartë nga Serbia se ata nuk do të lejojnë të preket territori matanë autostradës e hekurudhës, që ata e konsiderojnë të jetë strategjike meqë e lidh Beogradin me Shkupin, Sofjen, Stambollin e Athinën. Kjo do të thotë që një numër i madh i fshatrave në komunat shqiptare, të cilat janë në të dyja anët e autostradës, nuk do të lejoheshin t’i bashkoheshin Kosovës. E pra, a e kuptoni çka do të thotë kjo? Që sipas parimit demografik dhe duke mos lejuar afrimin te autostrada e hekurudha, Serbia ka mundësi që të lejojë vetëm qytetin e Preshevës, fshatin e Tërrnocit e Konçulit, që të bashkoheshin me Kosovën. Dikush mund të thotë se edhe kjo është fitore, sepse të paktën merr diçka, mirëpo kjo është humbje e madhe. Territoret e tjera shqiptare do të detyroheshin të shndërroheshin në minoritet të papërfillshëm, do të humbnin të drejtat e tyre politike e përfaqësuese, dhe shpejt do të spastroheshin prej shqiptarëve. Cilët janë ata që mendojnë se kanë të drejtën të bëjnë marrëveshje për spastrimin e shqiptarëve prej Medvegjës e prej qytetit të Bujanocit? Sa për Tërnoc e Konçul, Serbia sonte t’i jep, sepse ashtu shqiptarët ngelen pakicë në komunën e Bujanocit dhe në vend të Shaip Kamberit atje bëhet kryetar një serb i Vuçiqit mandej.

Ideja dhe diskutimi për shkëmbim territorial (që po quhet korrigjim kufiri) sjell veçse ndarjen e Kosovës dhe ndarjen e Kosovës Lindore. Ndarjen e Kosovës në lumin Ibër dhe ndarjen e Kosovës Lindore, përkatësisht veçimin e Preshevës nga Aksi A-10 dhe Bujanoci e Medvegja.

Nëse pranojmë një logjikë të tillë, çka do të bëjmë kur Maqedonia të ofrojë shkëputjen e Tetovës, Gostivarit e Kërçovës? A do të pranojmë spastrimin e Shkupit, Kumanovës, Strugës etj., sikur që është bërë me Ohrin e me Manastirin, por edhe më shpejt se aq? Kjo logjikë është antishqiptare dhe ne do ta luftojmë atë. Ajo çka i duhet Luginës dhe shqiptarëve atje, janë respektimi i të drejtave njerëzore e politike, ndihma institucionale dhe ekonomike, e Kosovës dhe e Shqipërisë, si dhe këmbëngulja për reciprocitet, që ata të kenë po aq të drejta sa serbët në Kosovë.

Ndryshimi në veri është në dëm të shqiptarëve, sepse falja e territorit në veri është shkatërrim përfundimtar i shpresave për bashkim të Mitrovicës dhe për kthim të shqiptarëve në shtëpitë e tyre. Të mos harrojmë se shumë shqiptarë janë shpërngulur nga ajo që sot këta po e quajnë veri. Hashim Thaçi i ka mashtruar ata shqiptarë, i ka premtuar se do të kthehen atje qysh para 18 viteve. Prandaj ne themi se bëhet fjalë për një mashtrim të ri të një mashtruesi të vjetër. Dhe mos le të harrojmë se edhe sot në veri të Ibrit ka mijëra shqiptarë. A do të lejojmë spastrimin e tyre?
Ne duhet të angazhohemi në protesta për ta larguar Thaçin, për të ndalur shitjen e Kosovës që po bëhet për imunitet politikanësh nga gjykatat ndërkombëtare të imponuara prej vetë atyre. Jo të na i ndryshojë kufijtë një kriminel i cili është i shquar për dallavere me Serbinë dhe që na ka larguar edhe më shumë prej Shqipërisë gjatë qeverisjes së vet.

Duhet të angazhohemi për largimin e Thaçit sepse Thaçi sot është më i dobët se kurrë, prandaj po bën edhe marrëveshje më të këqija se kurrë ndonjëherë më parë.

Jemi edhe dëshmitarë që Prokuroria e Kosovës është bërë dhëmb i kalbur i republikës sonë. E qeveria është bërë qeveri e brejtësve që e gërryejnë buxhetin e shtetit dhe pasuritë e Kosovës. Ne nuk mund ta durojmë një president qyqe ndaj Serbisë dhe as një kryeministër zhvatës të buxhetit.

Ne duhet të angazhohemi për Republikën e Tretë, e cila do të jetë Republikë për zhvillim që sjell punësim, për drejtësi që ndalon korrupsionin. Ne duhet të angazhohemi për Aleancë Ballkanike me kroatët e me bullgarët, me Sarajevën, Podgoricën e Shkupin zyrtar kundrejt Serbisë çetnike dhe proruse, derisa ajo të mos jetë më as çetnike dhe as proruse. Ne duhet të angazhohemi për afrim, integrim e bashkim me Shqipërinë që kalon nëpërmjet federatës shqiptare. Vetëm kësisoj ne do të jemi në gjendje të punojmë edhe për zhvillim më të shpejtë ekonomik, edhe për mirëqenie më të lartë shoqërore, edhe për integrim e respektim të minoriteteve, edhe për të forcuar ushtrinë e kapacitetet mbrojtëse, edhe për të bashkëpunuar e ndihmuar aleatët tanë në synimet e tyre gjeopolitike.

Kjo është porosia ime sot: ta ndalim Thaçin, t’i afrohemi Shqipërisë.
Jo pazare me Serbinë, por Republikë e Tretë për Kosovën.
Jo pazare me Serbinë, por Aleancë Ballkanike karshi saj.
Jo pazare me Serbinë, por bashkim me Shqipërinë.

Ju falemnderit.

Sot në zyrët e Lëvizjes VETËVENDOSJE! erdhën në vizitë përfaqësuesit e FMN-së, Ruud Veremulen dhe Selim Thaçi të cilët u pritën nga Kryetari i Lëvizjes VETËVENDOSJE!, Albin Kurti dhe Nënkryetari, Besnik Bislimi.

Me përfaqësuesit e FMN-së u diskutua shqetësimi për rreziqet fiskale që nuk përmbushin planifikimin buxhetor për të hyrat në këtë vit si dhe për ndikimin buxhetor afatmesëm dhe afatgjatë të një sërë vendimesh qeveritare si në paga e poashtu edhe në politika sociale që më shumë janë iniciativa të fragmentarizuara që nuk ndikojnë në uljen e varfërisë në Republikën e Kosovës.

Përfaqësuesit e FMN-së njoftuan edhe me angazhimet e tyre aktualisht dhe për vizitën e ardhshme që do ta kenë në Republikën e Kosovës.

28 qershor 2018,
Lëvizja VETËVENDOSJE!

Kryetari i Lëvizjes VETËVENDOSJE!, Albin Kurti, dhe Sekretari për Marrëdhënie me Jashtë, Boiken Abazi, po marrin pjesë në punimet e Këshillit të Internacionales Socialiste që po zhvillohen në Gjenevë në selinë e Organizatës së Kombeve të Bashkuara (OKB).

Në agjendën e punimeve të Këshillit do të trajtohet kontributi i social-demokracisë në zgjidhjen e konflikteve për siguri dhe paqe ndërkombëtare, tejkalimi i sfidave me të cilat ballafaqohet demokracia nëpër botë për të fituar lirinë dhe të drejtat për të gjithë, si dhe përgjigja e bazuar mbi vlerat dhe parimet globale në lidhje me krizën aktuale të refugjatëve.

Gjenevë, 26 qershor 2018
Lëvizja VETËVENDOSJE!

Sot, në ditën kur në Bruksel po pritet të zhvillohet takimi Thaçi-Vuçiq, Lëvizja VETËVENDOSJE! mbajti konferencë për media për të shpalosur dëmet që ka shkaktuar dialogu me Serbinë gjatë periudhës 2011-2017.

Nënkryetarja dhe deputetja Fatmire Mulhaxha-Kollçaku solli në vëmendje mungesën e legjitimitetit të Qeverisë që s’i ka as numrat minimal. Ndërsa Presidenti është plotësisht jokredibil dhe nuk paraqet unitetin e vendit.

“Me një president jokonsensual dhe jokredibil, i cili ka nënshkruar marrëveshje të dëmshme si ajo për Zajednicën dhe pa u bërë një bilanc për të gjitha marrëveshjet e arritura deri tani pala e Kosovës do të vazhdojë me kompromise të reja”, tha Fatmire Mulhaxha-Kollçaku.

Ndërkaq, deputetja Albulena Haxhiu foli mbi marrëveshjet e dëmshme që ka sjellë kjo mendësi e negocimi.

“Para 7 viteve, në kohën kur nisi procesi i dialogut me Serbinë, u tha se do të ishte thjesht në proces teknik dhe se nuk do të diskutohet për çështje të brendshme të Kosovës. Në fakt ishte dialog politik i ndërtuar mbi premisa të gabuara.”, tha Albulena Haxhiu.

Kujtojmë se gjatë këtyre viteve padrejtësisht Kosova i pësoi dëmet nga këto marrëveshje të dala një proces asimetrik dhe për çështje të brendshme të Kosovës. Nga ky dialog:

·Kosovës iu vendos fusnota e cila u tha se do të shkrihet porsi fjollat e borës, më tej nga ky proces i dialogut u krijua një subjekt që e lufton Republikën e Kosovës e i cili është dorë e zgjatur e Serbisë në Kosovë pra Lista serbe pra ne Serbinë e kemi në mes të Kuvendit të Kosovës.

· Iu nda në dysh buxheti i vendit përmes fondit për veriun, u amnistuan strukturat kriminale përmes ligjit për Amnisti,

– Iu nda në dysh drejtësia me marrëveshjen për drejtësi të vitit 2015, e iu krijua një proces fals kinse për integrimin e gjyqtarëve në sistemin tonë të drejtësisë, por në fakt ata gjyqtarë ishin caktuar me listë nga Vuqiqi. Madje u nënshkrua edhe një marrëveshje të cilën ende sot e mbajnë të fshehur e që ka të bëj me njohjen e aktgjykimeve të strukturave paralele të Serbisë e që është goditje shumëdimensionale për Republikën e Kosovës.

·Marrëveshja për Energjinë ku kontestohet pronësia e Republikës së Kosovës sipas kërkesave të Serbisë, mbi resurset dhe rrjetin tonë energjitik.

·Lejimi i kompanisë serbe “Elektrosever-it” që të operojë brenda territorit të Kosovës ose thënë konkretisht që Serbia do të ketë kontrollin mbi resurset e shpërndarjen e energjisë elektrike në Kosovë. Kompanisë serbe “Elektrosever” ia kanë njohur të drejtën e transmisionit të energjisë elektrike që përbën një problem serioz të përmasave sa rrezikon ta zhbëjë fuksionim e sistemit energjetik të Kosovës.

·Kodin telefonik thuhej se do të na jepet për 3 muaj më së shumti. Kanë kaluar më shumë se dy vite dhe ende nuk kanë treguar se në pronësi të kujt është, të Kosovës a të Serbisë.

·Marrëveshja për Zajednicën që parasheh një entitet ligjor me karakter të veçantë me rend vetanak juridik dhe me kompetenca sikurse të Qeverisë.

Thaçi sot në takim me Vuçiqin nuk përfaqëson Kosovën, ai mundet veç veten të përfaqësojë atje. Kosovës i duhet një bilanc. Duhet një pasqyrë e plotë për marrëveshjet nga Energjia te Telekomunikacioni, nga liria e lëvizjes te njohja e diplomave, nga policia e gjyqësia në veri te përfaqësimi diplomatik i ndërsjellë, nga menaxhimi i përbashkët i kufirit e deri te denominimi antikushtetues i Republikës së Kosovës (fusnota).

Hashim Thaçi duhet të ndalet, askush nuk mundet të pranojë dëme të reja për avazet e vjetra të tij.

Në kohën kur vetë qeveria pranon se Telekomi i Kosovës është duke u përballuar në një situatë të vështirë financiare që ka ardhur para së gjithash për shkak të menaxhimit të dobët të kësaj ndërmarrjeje, Bordi i kësaj kompanie ka emëruar në krye të kësaj kompanie Gent Begollin, një zyrtar të AAK-së, pa asnjë eksperiencë në fushën e telekomunikacionit dhe të menaxhimit.

Kuvendi i Kosovës, në disa diskutime në lidhje me Telekomin, ka kërkuar që Qeveria të ndërmarrë masa për nxjerrjen nga kriza të kësaj kompanie. Emërimi i Begollit tregon se ky pushtet është duke e bërë saktësisht të kundërtën, pra, po vazhdon praktikën e ndjekur nga PDK-ja, e cila për vite me radhë përdori këtë kompani për qëllime politike, elektorale e korruptive.

Është pikërisht kjo qasje e ndjekur gjatë nga partitë e pushtetit, që ka sjellur kompaninë më fitimprurëse në Kosovë buzë falimentimit, praktikë kjo që është përcjellur edhe në kompani të tjera publike, të cilat pasi janë zhvlerësuar tejmase, u janë dhënë grupeve të interesit të lidhura me pushtetin nëpërmjet privatizimeve abuzive.

Lëvizja VETËVENDOSJE! ka folur e shkruar shumë mbi qasjen e pushtetit që e ka sjellur Telekomin dhe kompani tjera publike në prag të kolapsit, herë me qëllim dhe herë për shkak se thjesht nuk ka pasur dije e përgatitje profesionale.

Kur një drejtor menaxhues emërohet në një kompani publike pa pasur ekspertizën e duhur, ai e di se është aty duke iu falenderuar partive në pushtet, dhe, kur kjo ndodhë, vendimet e tij do të jenë të orientuara më shumë drejt shpagimit të borxheve ndaj politikës sesa drejt zhvillimit të kompanisë.

Tekekomi i Kosovës, përkatësisht ish-PTK, është ngritur me mund e sakrifica nga profesionistët vendor në dekadën e parë pas luftës, kurse është shkatërruar nga partitë politike në dekadën e dytë të tij.

Gjatë një numri të madh të diskutimeve publike dhe të brendshme, VETËVENDOSJE! ka paraqitur një plan të përgjithshëm për nxjerrjen e PTK-së nga kriza, me masa konkrete e të detajizuara për zhvillimin e kësaj kompanie, e cila ka qenë bartëse e sektorit më fitimprurës të kësaj epoke, telekomunikacionit.

Përkundër faktit se kjo kompani në vazhdimësi është dëmtuar nga politika e korruptuar, në një ambient tërësisht zhvatës të krijuar nga bordet krejtësisht politike, si rezultat i ekspertizës së krijuar në fillimet e saj, kjo kompani u ngrit deri në masën sa në vitin 2009 pagoi dividendë prej 200 milionësh për Buxhetin e Kosovës. Mirëpo, politika e korruptuar dhe e papërgjegjshme, pati pasoja të rënda për këtë kompani dhe sot ajo përballohet me rrezikun e falimentimit.

Emërimi i Begollit në krye të kësaj kompanie rrezikon të jetë një goditje finale ndaj një biznesi publik që në botën bashkëkohore konsiderohet të jetë tregu më fitimprurës dhe me ndikim të madh në zhvillim në sektorët tjerë të ekonomisë. Falimentimi i Telekomit mund të jetë i pashmangshëm nëse ne nuk i dalim në rrugë korrupsionit të instaluar në këtë sektor nga të partitë politike që deri sot patën pushtet.

Goditje e rëndë ndaj kompanisë më të madhe publike, Telekomit, përveç se nëpërmjet korrupsionit, ka ndodhur edhe me bartjen e ndikimit industrial, i cili është anti-ligjor e kundër parimeve të OECD-së, e që ka ardhur para së gjithash nga PDK-ja, por që është përcjellur edhe nga AAK-ja, LDK-ja dhe të gjitha partitë që deri sot kanë pasur pushtet. Njerëz me interesa në sektorin privat të telekomunikacionit kanë pasur kompetenca vendimmarrëse në Telekom. Këta njerëz gjatë marrjes së vendimeve, i kanë pasur primare interesat private dhe kanë lansuar e zbatuar politika që kanë dëmtuar Telekomin, për interesa të bizneseve private të lidhura me partitë politike. Qysh moti, VETËVENDOSJE!, profesionistë dhe ekspertë të ndershëm vendas si dhe grupe të ndryshme të shoqërisë civile kanë alarmuar opinionin publik dhe institucionet kosovare, përfshirë këtu edhe organin më të lartë të vendit, Kuvendin.

Lëvizja VETËVENDOSJE! ka dhënë zgjidhjen për të dalur nga kriza, por Qeveria është duke u sjellur me shpërfillje mbi këto propozime. Pasojat do të jenë shumë të rënda.

Ne konsiderojmë se falimentimi eventual i Telekomit do të ketë pasoja të shumta për ekonominë e Kosovës: jo vetëm për faktin se do të hedhë në rrugë mijëra punëtorë, por se do të ndikojë negativisht në sjelljen e teknologjisë për sektorët tjerë të ekonomisë, për nxitjen e inovacionit, dhe madje edhe për sigurinë kibernetike të vendit.

Me fjalë të tjera, ne nuk përballohemi vetëm me zhbërjen e një kompanie publike, por jemi në prag të shkatërrimit të një lokomotive të zhvillimit në ekonominë moderne të vendit. Shkatërrimi i kësaj kompanie do të pamundësojë prospektet e Kosovës që të ndërtojë një ekonomi funksionale, do të thellojë varfërinë e do ta rrisë papunësinë. Kjo duhet të shqetësojë gjithkënd dhe jo vetëm politikën.

Sot, një grup i profesionistëve të rinj, u takuan me Kryetarin e Lëvizjes VETËVENDOSJE!, Albin Kurti, Sekretaren Organizative, Vlora Haxhimehmedi dhe Koordinatoren e Komiteteve Profesionale, Dejona Mihalin.

Këta profesionistë të rinj, arkitektë, artistë, inxhinerë, ekonomistë, gjeodetë, inxhinierë të IT-së, iu bashkuan sot Lëvizjes VETËVENDOSJE!.

Midis tjerash, Sekretarja Organizative iu uroj mirëseardhjen dhe e theksoi lidhshmërinë mes çështjeve organizative dhe dijeve profesionale.

Kryetari Kurti theksoi se një shoqëri e qëndrueshme dhe demokratike mund të bëhet vetëm me qytetarë të ndershëm dhe të dijshëm. Përmes Këshilleve profesionale, Lëvizja VETËVENDOSJE! do të synon që të ngritë rolin e profesionistëve të rinj, pasi e ardhmja ju takon atyre.

Profesionistët u ankuan për mungesën e përgjithshme të zhvillimit në Kosovë, por ku e shohin Lëvizjen VETËVENDOSJE! si të vetmen shpresë për ndryshime progresive. Me këtë rast u zotuan që do të japin ndihmën për Lëvizjen dhe për Kosovën përmes angazhimit të tyre.

Lëvizja VETËVENDOSJE! mbajti konferencë për media lidhur me problemet e mëdha që i bart projektligji për RTK, i hartuar nga Komisioni parlamentar për Administratë Publike, Qeverisje Lokale dhe Media.
Deputeti Valon Ramadani, anëtar i këtij komisioni paraqiti propozimet që ka bërë gjatë hartimit të projektligjit si dhe shqetësimet mbi skemën e financimit të RTK-së. Deri tani asnjë prej këtyre propozimeve nuk është marrë parasysh.

“Hartimi i këtij projektligji është përcjellë me probleme të mëdha. Do të doja sot t’ju bëja me dije një problem tepër të madh siç është skema e financimit të RTK siç parashikohet me këtë projektligj”, tha Valon Ramadani.

Gjithashtu ai theksoi se anëtarët e grupit punues të këtij komisioni kanë vendosur në këtë version pagesën me 2.5 euro në muaj për çdo subjekt fizik dhe subjekt juridik në Republikën e Kosovës. Po ashtu kanë vendosur që këto të ardhura të mblidhen nëpërmjet kompanisë private KEDS/KESCO. Provizioni për këtë shërbim që do t’i jipet kompanisë private është 50 cent për konsumator pra 2.5 milionë euro në vit.

Deputeti Ramadani ka kërkuar që, së pari, para se të hartohet skema e financimit nga qytetarët e Kosovës duhet që RTK të reformohet thellë, të garantohet që ka menaxhim të përgjegjshëm, që nuk ka korrupsion dhe që secili që merr pagë aty e bën edhe një punë konkrete, të matshme dhe të vlerësueshme.

Së dyti, kemi kërkuar që grupi punues të përfshijë specialistë të lartë të inxhinierisë së fushës dhe mbi të gjithë specialistë të lartë të ekonomisë e financave. Ne nuk besojmë dhe objektivisht është e pamundshme që këtë projektligj kaq të rëndësishëm mund ta hartojnë qoftë Nait Hasani qoftë Xhevaire Izmaku apo anëtarë të tjerë të komisionit të cilët asnjëri nuk janë të thirrur në ndonjë nga fushat e nevojshme.

Së treti, ne kemi kërkuar të organizojmë debate publike në çdo komunë të Kosovës me qytetarë dhe përfaqësues të tyre. Me qëllim që të marrim edhe qëndrimet e tyre për mundësinë e financimit të RTK nga qytetarët. As kjo nuk është pranuar.

Së katërti, ne kemi kundërshtuar prerazi që edhe në rast të financimit nga qytetarët të RTK kjo shumë të mblidhet nga KEDS/KESCO kompania private që menaxhon shpërndarjen e rrymës në Kosovë. Sepse nuk është një kompani e përgjegjshme dhe se provizioni që do të marr prej këtij shërbimi është tepër i lartë, pra e papranueshme që qytetarët të paguajnë sërish për fitime të KEDS.

Së pesti, tarifa e propozuar pra 2.5 euro në muaj e lidhur me matësat e energjisë në çdo ndërtesë të Kosovës qoftë ajo amviseri qoftë këpucar, zyrë noteri, bukëpjekës, fabrikë etj është jo vetëm arbitrare, por e padrejtë dhe antikushtetuese.

Së gjashti, asnjë studim, vlerësim apo diskutim serioz me njerëz të fushës nuk është bërë paraprakisht për formulën e financimit.

Së shtati, edhe nëse RTK do të reformohej duke rritur dukshëm cilësinë e përgjegjshmërinë, edhe nëse specialistët pas një studimi të hollësishëm do të na kishin sugjeruar skemën e financimit nga publiku tarifat duhet të ishin plotësisht të përballueshme nga familjet e Kosovës dhe ato sipas nesh do të duhej të mblidheshin nga Posta e Kosovës.

Kështu siç është ky version është i papranueshëm dhe përbën zhvatje të qytetarëve. Andaj, ne i bëjmë thirrje edhe deputetëve të tjerë nga opozita, deputetëve të LDK që të mos ta pranojnë këtë version skandaloz. I rikujtojmë edhe njëherë Komisionit që ky projekt është jo serioz, i dëmshëm, i padrejtë dhe antikushtetues.

I ftojmë gazetarët që nesër, 20 qershor ora 10:00 të ndjekin mbledhjen e komisionit parlamentar ku do të paraqitet për shqyrtim ky projektligj.

Lëvizja VETËVENDOSJE! mbajti konferencë për veprimet jokushtetuese të zyrës së Presidentit Hashim Thaçi lidhur me anëtarët e Komisionit Qendror të Zgjedhjeve.

Albulena Haxhiu tha se është e drejtë e subjekteve politike që në bazë të fuqisë të marrë në zgjedhjet e fundit të dërgojnë anëtarët e tyre në Komisionin Qendror të Zgjedhjeve.

“Në KQZ duhet t’i ketë dy anëtarë kolicioni PAN, dy anëtarë Lëvizja VETËVENDOSJE! dhe dy anëtarë LAA siç e kërkon Kushtetuta dhe Ligji për zgjedhje, dhe siç e përcaktoi rezultati i zgjedhjeve të 11 qershorit 2017. Përkundër që Presidenca nuk inicioi procedurën e emërimit të anëtarëve të KQZ-së, Lëvizja VETËVENDOSJE! më 17 prill të këtij viti dorëzoi dy nominimet, Adnan Rrustemin dhe Nazlie Balajn, për dy anëtarë në KQZ, ashtu siç parashikohet me Kushtetutë dhe Ligjin për Zgjedhje’’, tha Albulena Haxhiu.

Aktualisht zyra e Presidentit në vend se të procedojë me këto nominime po pengon emërimin e anëtarëve të KQZ-së nga opozita. Ata në shpërfillje të ligjit kanë njoftuar për betimin tek Presidenti vetëm nga një përfaqësues e jo siç i takon opozitës, nga dy anëtarë.

Adnan Rrustemi numëroi shkeljet kushtetuese që Presidenti Thaçi po i bën, sidomos me vendimet e fundit për mandatimin e përfaqësuesve të subjekteve politike në KQZ.

Rrustemi konstatoi që ndonëse kanë kaluar mbi dy muaj prej kur Lëvizja VETËVENDOSJE! ka dërguar dy nominimet e saj për anëtarë të KQZ-së, presidenca nuk i ka përmbushur përgjegjësitë që ka në konfirmimin e këtyre nominimeve si anëtarë të KQZ-së. Në bazë të ligjit për zgjedhje, mandati i anëtarëve të Komisionit Qendror të Zgjedhjeve fillon jo më vonë se gjashtëdhjetë (60) ditë pas çertifikimit të rezultateve të zgjedhjeve për Kuvend të Kosovës. Gjersa, rezultati i zgjedhjeve për Kuvend të Kosovës është certifikuar më 8 korrik dhe sipas ligjit do të duhej që përbërja e KQZ-së të ndryshonte më së largu deri në fillim të shtatorit të vitit të kaluar, duke reflektuar kështu përbërjen e re në bazë të rezultatit të zgjedhjeve të 11 qershorit’’, shtoi Adnan Rrustemi.

Nazlie Bala tregoi për thirrjen krejtësisht në mënyrë joserioze, pa asnjë shkresë apo e-mail zyrtar që ajo ka marrë nga ana e Zyrës së Presidentit. “Të enjten e kaluar, nga Zyra e Presidentit , gjegjësisht nga zyra ligjore, kam pranuar një telefonatë për të marrë pjesë në betimin si anëtare e KQZ-së. Kjo thirrje nuk është as zyrtare e as ligjore sepse nuk kam pranuar asnje dokument zyrtar e aq më tepër kur i nominuari tjetër nga Lëvizja, Adnan Rrustemi, nuk është kontaktuar fare. Kjo ka ndodhur pa asnjë shpjegim zyrtar dhe kësilloj është e papranueshme’’, shtoi Nazlie Bala.

Ky proces po përdoret qëllimshëm nga Presidenti Thaçi dhe kjo pashmangshëm ndërlidhet edhe me faktin, por jo vetëm, se në bazë të rezultatit të zgjedhjeve të 11 qershorit, PDK-së, kryetar i së cilës ishte Hashim Thaçi, nuk do t’i takojnë dy anëtarë siç ishin deri më tani, por vetëm një, respektivisht dy anëtarë si PAN, ndërsa Lëvizja VETËVENDOSJE! duhet t’i ketë dy anëtarë në KQZ, sikurse edhe LDK duhet t’i ketë po ashtu dy. Lëvizja VETËVENDOSJE! në përputhje me Kushtetutën dhe Ligjin për zgjedhje ka bërë nominimet për anëtarë të KQZ-së, duke ofruar të gjithë dokumentacionin e kërkuar.

Andaj kërkojmë nga zyra e Presidentit pa vonesa të mëtejshme që sa më parë të konfirmohen të dy anëtarët e KQZ-së që do të përfaqësojnë Lëvizjen VETËVENDOSJE! dhe të dy anëtarët e LDK-së

Në kuadër të Ditës së Mërgatës që po shënohet brenda Javës së Lëvizjes, aktivistët e Lëvizjes VETËVENDOSJE! nëpërmjet një aksioni të zhvilluar afër Ministrisë së Diasporës i kanë rikujtuar shpërfilljet institucionale që u bëhen mërgimtarëve tanë. Njëkohësisht, u dha alternativa dhe zgjidhjet e Lëvizjes për kërkesat dhe nevojat e mërgimatërvë karshi institucioneve të Kosovës.

Sekretarja organizative e VETËVENDOSJE!-s Vlora Haxhimehmedi e cila vetë është kthyer nga Norvegjia tha se “Sikur të mos mjaftonin vështirësitë e mëdha, dhe në shume raste diskriminimi politik, ekonomik, dhe kulturor me të cilin ballafaqohen bashkadhetarët tanë jashtë vendit, ata gjithnjë e më shumë po trajtohen nga institucionet si të huaj edhe në vendin e tyre. Nga nëpërkëmbja e të drejtës për të votuar, te pagesa e padrejtë për kartonin e gjelbërt, nga radhët e gjata në kufi dhe vonesat e tjera administrative, e deri te kërkesat për rryshfete, këto institucione e kanë kthyer mërgatën tonë në objekt mashtrimi dhe abuzimi”.

Sakaq, është mërgata ajo që ka qenë jetike për mbijetesën dhe çlirimin e shqiptarëve nën ish Jugosllavi. Ajo u kthye jo vetëm në strehë për të përndjekurit politikë, gazetarët, artistët e shkrimtarët, por financoi me dekada ekzistencën ekonomike, politike dhe arsimin. Gjatë luftës mërgata dha një mbështetje të fuqishme me njerëz dhe materiale. Por qeverisjet e deritanishme, pas luftës, ia kanë reduktuar rolin mërgatës në minimum, përveç në aspektin e remitancave, ku mërgata kthen në Kosovë rreth 1 miliard Euro. Megjithatë edhe ky kontribut shkon kryesisht për konsum të mallrave të huaja, për shkak të mungesës së prodhimit vendas, dhe për pasojë këto para dalin prap jashtë vendit.

Kjo situatë thërret për ndryshim të menjëhershëm. Ne angazhohemi për garantimin e të drejtës elementare të votës, për vende në Parlament për mërgatën dhe shtrirje të politikave për mërgatën në të gjithë aparatin shtetëror, nga ekzekutivi te diplomacia, nga zhvillimi ekonomik e kulturor e deri të ngritja e Institutit të Mërgatës. Duhet të punojmë për atë që njihet si “rikthimi i trurit” që është larguar nga vendi.

Përmes bankës zhvillimore që Lëvizja VETËVENDOSJE! synon të themelojë, remitancat do të kalojnë nga konsumi në investime të mbrojtura në sektorët strategjik të ekonomisë, duke i dhënë mërgatës përparësi. Vetëm në Gjermani janë aktualisht të regjistruara mbi 32,000 biznese shqiptare. Paramendoni çfarë mund të bëjnë këto bizneze sikur të ndihmoheshin të organizoheshin më mirë. Paramendojeni çfarë ndikimi do të kishin në ekonominë e Kosovës këto biznese sikur të investonin qoftë dhe 10% të kapitalit të tyre. Ata po investojnë, por shumë më pak nga ç’dëshirojnë sepse u kërkohet rryshfet, sepse u pritet hovi që ne start përmes korrupsionit dhe mashtrimit.

Le të bëhemi bashkë që ky vend mos të jetë më i huaj për qytetarët e vet.

Lëvizja VETËVENDOSJE! mbajti konferencë për media në lidhje me aktgjykimin e Gjykatës Kushtetuese mbi vendimin e Qeverisë Haradinaj për rritjen e pagave.

Anëtarja e Kryesisë dhe deputetja Albulena Haxhiu foli për shkeljet kushtetuese që ka bërë vetë trupi e GJK-së kur e ka nxjerrë vendimin se ngrijta e pagave nuk e cenon Kushtetutën e Republikës së Kosovës.

“Në vend që Gjykata Kushtetuese të ndalonte abuzimin me paranë publike, gjyqtarët si Arta Rama – Hajrizi, Ivan Cukalovic, Allta Suroy, Snezhana Botusharova, Bekim Sejdiu, Selvete Gërxhaliu- Krasniqi, përmes këtij vendimi mundësuan ngritjen e pagave edhe për vete. Aktgjykimi i Gjykatës se rritja e pagave nga qeveria për vetë qeverinë dhe stafet e tyre është brenda normës kushtetuese tregon më shumë për karakterin në të cilin është zhytyr trupa e gjyqtarëve se sa për vet vendimin’’, tha deputetja Haxhiu.

Duke folur për këtë vendim dhe rrethanat e një shteti të kapur, ajo theksoi se ky veprim po ashtu i shërben konjukturës së pushtetit duke konstatuar se shumica e gjyqtarëve të Kushtetueses u shndërruan në rojtarë të kësaj konjukture duke shpërfillur detyrën e mbrojtjes së Kushtetutës si kohezion shoqëror.

“Vendimi i Qeverisë Haradinaj për rritje të pagave përpos që është vepër penale është edhe kundërkushtetues pasi që ka ndërhyrë në kompetencat e Kuvendit. Këtë e dëshmon edhe qëndrimi mospajtues i dy gjyqtarëve te Gjykatës Kushtetuese, znj.Gresa Caka-Nimani dhe Almiro Rodriguez”, shtoi Haxhiu.

Ndërkaq, Avni Zogiani krahasoi pagat e kryeministërve të vendëve të rajonit karshi pagës mesatare të këtyre vendeve përkatëse që tregon se Qeveria e Republikës së Kosovës, përkundër që ka varfëri e pabarazi të madhe sociale i ka pagat më të larta në rajon.

Sipas shifrave të vitit 2017, paga mesatare në Mal të Zi është 509 euro, ndërkaq Kryeministri i këtij shteti paguhet 1130 euro. Në Bosnjë paga mesatare është 439 euro, kurse ajo e Kryeministrit 1700 euro, duke vijuar tutje me Maqedoninë ku mesatarja është 372 euro dhe ajo e Kryeministrit 1300 euro, në Serbia 407 euro mesatarja dhe 1000 euro e Kryeministrit, në Shqipëria 347 euro krahasuar me atë të Kryeministrit që merr 1700 euro. Ndërsa Kryeministri i Republikës së Kosovës ka pagën 2950 euro përkundër pagës mesatare që është 405 euro (sipas disa të dhënave edhe më e ulët).

Autoriteti që merr vendime në Republikën tonë lidhur me pagat është Kuvendi përmes ligjit për buxhetin dhe ligjit për pagat. Por jo vetëm kaq, vendimi për rritje të pagave është edhe shkelje e Ligjit për Buxhetin e Republikës së Kosovës për shkak se kjo rritje nuk është paraparë me buxhetin për vitin 2018. Ligji i Buxhetit 2018 ka paraparë vetëm rritjen e pagave 4% për të gjithë punësuarit që paguhen nga buxheti i shtetit.

Në bazë të përllogaritjeve të ekspertëve tanë, ky vendim ka implikime buxhetore prej 6 deri në 7 milionë euro që do të thotë se një pjesë e parave do të merren nga kategoritë e tjera buxhetore, mirëpo ky vendim nuk do të mund të merret pa vendim nga Kuvendi.

Do ia marrin ndonjë kopshti, shkolle, buxhetit per shendetësinë specifkisht për barnat apo kategorive sociale.

Lëvizja VETËVENDOSJE! ka nisur të hartojë kallëzimin penal për Kryeministrin dhe ministrat që kanë marrë pjesë në votim, perfshirë edhe gjyqtarët e Kushtetueses të cilët rriten edhe pagat e tyre.

Sot, në ditën kur janë bërë saktësisht tre muaj prej ratifikimit të Demarkacionit me Malin e Zi, Lëvizja VETËVENDOSJE! mbajti konferencë për media për të rikujtuar se Qeveria nuk ka ndërmarrë asnjë hap drejt korrigjimit të këtij Demarkacionit, ndërkaq Hashim Thaçi, i cili ka nënshkruar këtë marrëveshje, kokë në vetë po niset drejt pazareve të reja me Serbinë.

Kryetari i Lëvizjes VETËVENDOSJE!, Albin Kurti foli për mungesën e numrave të Qeverisë aktuale dhe mungesës së legjitimitetit të saj, në njërën anë, dhe në anën tjetër, ngarendjen e Thaçit për të bërë pazare të reja me Vuçiqin.
‘’Nuk mund të ketë edhe demokraci edhe qeveri të pakicës. Numri i partive në koalicionin qeverisës është dyfish më i madh sesa numri i deputetëve të partisë së kryeministrit. Ne kemi kërkuar dorëheqjen e kryeministrit Haradinaj i cili për çdo javë bën së paku nga një skandal. Ai duhet ta testojë qeverinë me votëbesim në Kuvend. Kosova nuk mund ta bëjë shtetndërtimin e saj pa demokraci. E, nuk ka demokraci me qeveri të pakicës. Kemi nevojë për zgjedhje të reja e të lira’’, tha Albin Kurti.
Ai poashtu foli edhe për Strategjinë e Bashkimit Evropian (BE) për Ballkanin Perëndimor, nga e cila Serbia është privilegjuar shumë duke u futur në të njëjtën kategori me Malin e Zi për anëtarësim në vitin 2025.

‘’ Qëllimet e Beogradit janë të qarta: 1) ‘Zajednica’ e Serbisë në Kosovë; 2) Anëtarësim sa më i shpejtë i Serbisë në BE. Në përputhje me këto qëllime Vuçiqi shtron kërkesa. Kosova nuk i ka formuluar qëllimet dhe parimet e saj dhe rrjedhimisht as kërkesat ndaj Serbisë. Krerët e institucioneve nuk e thonë as që synojmë e as që e kërkojmë njohjen e pavarësisë dhe dëmshpërblimin nga Serbia. Presidenti flet për ‘kompromis të dhimbshëm’ dhe besoj që e ka fjalën për dhimbjen që do ta ketë Kosova si shtet dhe populli ynë dhe jo vetë ai. Thaçi nuk është duke shkuar në Bruksel. Vuçiqi po shkon në Bruksel, kurse Thaçi po shkon te Vuçiqi’’, shtoi Albin Kurti.

Lëvizja VETËVENDOSJE! kërkon që të bëhet vlerësimi zyrtar i dialogut me një raport qeveritar 2011-2017, të raportohet në Kuvend dhe të kemi debat parlamentar. Nuk mund të ketë dialog që na i merr 6 vjet pa pasur së paku edhe një vlerësim që na i merr 6 javë.
Presidenti Thaçi nuk është njeri që bën gabime të paqëllimshme, por njeri që ka qëllime të gabuara. Thaçi nuk është as kredibil, as kompetent. Ai është edhe gënjeshtar, edhe i paditur. Thaçi është President për vete, jo për Kosovën. Marrëveshjet e Presidentit apo ujditë e fshehta të tij nuk do të vlejnë në Kosovë. T’i përcaktojmë synimet e kërkesat tona dhe vetëm më pas të vazhdojmë me emra të përveçëm, ekipesh e liderësh, të dialogut që duhet të jetë padyshim me parime e me kushte.

Në 13 vjetorin e themelimit u mbajt konferencë për media ku u fol për aktivitetin politik, rezistencën karshi proceseve të dëmshme në Republikën e Kosovës e rolin progresiv të Lëvizjes VETËVENDOSJE!.

Tri koncepte të Lëvizjes VETËVENDOSJE! janë kyçe dhe për të cilat ka dëshmuar koha dhe proceset politike se VETËVENDOSJE! ka pasur të drejtë:

Kritika e VETËVENDOSJE!s ndaj klasës politike udhëheqëse në Kosovë, të cilët kanë vendosur gjithmonë interesin e tyre privat përkundër atij publik duke përfunduar në njerëzit më të pasur në vend karshi shumicës së qytetarëve të varfër.

Kundërshtimi i dialogut me Serbinë, i cili nuk po përfundon as sot si proces. Dhe në lidhje me këtë dialog Lëvizja mendon se me Serbinë nuk duhet të dialogohet, por ajo që është e nevojshme është vetëvendojsa. Ky dialog nuk i ka sjellur asnjë të mirë vendit tonë.

Kritika e VETËVENDOSJE!s ndaj UNMIK-ut, ku vetëm pas shpalljes nga të gjithë u pranua kritika e Lëvizjes se UNIMIK-u ishte një mision i dëmshëm për Kosovën. Poashtu VETËVENDOSJE! vazhdoi edhe me kritikën për EULEX-in duke thënë se ai është vetëm vazhdimësi e misionit paraprak, UNMIK-ut.

Drejtuesi i Grupit Parlamentar Glauk Konjufca foli edhe për orientimin e Lëvizjes VETËVENDOSJE! dhe etapat në të cilat ka kaluar Lëvizja që nga themelimi i saj më 12 qershor 2005.

“Me 10 shkurt 2007 në protestën e organizuar nga Lëvizja VETËVENDOSJE! u vranë dy protestues, Mon Balaj dhe Arben Xheladini, ndërkaq me 5 nëntor 2016, në Burgun e Prizrenit, gjeti vdekjen aktivisti ynë, Astrit Dehari”, tha Glauk Konjufca teksa rendiste hapat e rezistencës e përpjekjes së pandalur të Lëvizjes.

Ai renditi po ashtu dhe etapat e Lëvizjes si alternativë e zgjedhur në nivel qendror dhe lokal. Në zgjedhjet parlamentare të qershorit 2017, Lëvizja u votua masivisht nga qytetarët e Republikës duke dalë si subjekti më i votuar në vend me 32 deputetë dhe 27% të votës së përgjithshme. Ndërsa në nivel lokal, kishim fitoren në Komunën e Prishtinës në vitin 2013 dhe 2017 dhe fitoren në Komunën e Prizrenit dhe atë të Dardanës në zgjedhjet e fundit.

“Ideologjia e Lëvizjes VETËVENDOSJE! është socialdemokracia, horizonti ynë i veprimit politik është shqiptarizmi, kurse sistemi politik shtetëror në të cilin ne besojmë, është republika”, shtoi Glauk Konjufca.

Nënkryetarja Fatmire Mulhaxha-Kollçaku foli për figurën e aktivistit dhe aktivistes si figurën më të rëndësishme të Lëvizjes VETËVENDOSJE!. Ajo theksoi vlerat që shpreh e përfaqëson kjo figurë, aktivizmin politik, vullnetarizmi dhe sakrifica.

“Lëvizja VETËVENDOSJE! ka aktiviste e aktivistë që nuk kanë hezituar asnjëherë të jenë aktiv politikisht sepse një gjë e tillë ishte e domosdoshme për kohën. Ata nuk janë vetëm edhe ardhmja, por janë edhe e tashmja. Është koha e të rinjve që t’u prijnë proceseve”.

Në këtë 13 vjetor Lëvizja VETËVENDOSJE! vijon të strukturojë e shtrijë organizimin e saj në të gjithë Kosovën e në mërgatë, kudo ku jetojnë e punojnë shqiptarët. Me solidaritet e përkushtim, me vullnet e dije, me guxim e nder për të realizuar atë që e thotë dhe manifesti ynë:

Vetëvendosje, sepse asnjë populli nuk mund t’i vendosen kushte për lirinë e vet. Sepse çdo popull ka të drejtë të dekolonizohet; të jetë përcaktues absolut i kahjeve të zhvillimit të mundësive të veta; i resurseve vetanake ekonomike; i pasurive të veta nëntokësore. Të përcaktojë lirshëm identitetin e tij dhe të kultivojë i papenguar frymën autentike kulturore. Vetëvendosje, sepse kjo është diçka e natyrshme: është gjë e pritshme të vendosim në interes të vetes më shumë se ç’do ta bënte këtë gjë tjetërkush dhe gjithkush tjetër për ne.

Deputetët e Lëvizjes VETËVENDOSJE! Albulena Haxhiu dhe Saranda Bogujevci mbajtën konferencë për media në lidhje me dërgimin, nga ana e Lëvizjes, në Kuvend të draftligjit, që ka në qendër të trajtimit çështjen e gjykimit në mungesë të personave të akuzuar për kryerjen e krimeve të luftës në Kosovë.

Albulena Haxhiu foli mbi gjithë këto vite të pasluftës ku ende nuk kanë dalë para drejtësisë kriminelët e regjimit të Millosheviçit, që kryen krime në Kosovë.
Për më keq, jo rrallë, kemi parë që ata të hyjnë të papenguar në Republikën e Kosovës.

“Së fundi në Kuvend u zhvillua debati parlamentar sa i takon çështjes së të pagjeturve nga lufta e fundit. Njëra nga kërkesat e rezolutës së miratuar është hartimi i projektligjit për gjykimin në mungesë të personave të akuzuar për krime lufte në Kosovë dhe ndaj shtetasve të Kosovës. Ne kemi përgatitur draftligjin, që ka në qendër të trajtimit çështjen e gjykimit në mungesë personave të akuzuar për kryerjen e krimeve të luftës në Kosovë,” ‒ tha Albulena Haxhiu.

Ajo po ashtu foli edhe për dështimin e misioneve të huaja në Kosovë, UNMIK-ut dhe EULEX-it, që nuk patën si qëllim shqyrtimin e krimeve të kryera nga shteti i Serbisë në Kosovë ndaj shqiptarëve dhe të tjerëve. Ata më shumë se çdokush kanë qenë në dijeni për hollësi të masakrave, të dhunimeve dhe të mijëra rasteve të dhunës së kriminelëve të ushtrisë e të policisë së Serbisë në Kosovë, por asnjëherë nuk vepruan.

Në anën tjetër, deputetja Saranda Bogujevci foli për mungesën e drejtësisë për familjet që kanë pësuar nga lufta e fundit në Kosovë, ku tash e sa vite ende nuk kanë gjetur drejtësi.

“Ky ligj do t’u japë një formë të drejtësisë këtyre familjeve. Në bazë të përvojës sime personale, sa u përket gjykimeve të krimeve të luftës, por edhe nga studimet që janë bërë nga gjykimet e gjykatave ndërkombëtare kanë dëshmuar, që proceset gjyqësore dhe nxjerrja e një vendimi sa u përket këtyre proceseve është tejet me rëndësi për familjarët. Me këtë ligj do të dokumentohen të gjitha krimet e kryera në Kosovë dhe do të ketë drejtësi për familjarët,” ‒ tha Saranda Bogujevci.

Ky projektligj parasheh dërgimin e 20 neneve të Kodit të Procedurës Penale.
Këto nene nuk do të vlejnë më si dispozita të Kodit të Procedurës Penale në rastet e hetimeve dhe të gjykimeve të krimeve të luftës:

Neni 103 (3) – Parimet e përgjithshme të fazës së hetimeve;
Neni 132 (7) – Marrja e deklaratës në procedurën paraprake;
Neni 151 – Marrja në pyetje e të pandehurit në procedurën paraprake;
Neni 152 ‒ Zbatimi i marrjes në pyetje të të pandehurit në procedurë paraprake;
Neni 153 ‒ E drejta e të pandehurit në përkthim;
Neni 154 ‒ Marrja në pyetje e të pandehurit gjatë deklaratës në procedurë paraprake;
Neni 157 – Pezullimi i hetimit;
Neni 245 – Shqyrtimi fillestar;
Neni 246 – Pranimi i fajësisë;
Neni 248 – Pranimi i fajësisë gjatë shqyrtimit fillestar;
Neni 254 – Shqyrtimi i dytë dhe caktimi i shqyrtimit gjyqësor;
Neni 285 (4) – Caktimi i shqyrtimit gjyqësor;
Neni 307 – Mosparaqitja e të akuzuarit në shqyrtim gjyqësor;
Neni 321 – Prania e personave të thirrur në shqyrtimin gjyqësor dhe vërtetimi i identitetit të të pandehurit;
Neni 322 – Udhëzimet fillestare të gjykatës lidhur me dëshmitarët dhe të dëmtuarit;
Neni 323 – Udhëzimet për të akuzuarin;
Neni 324 – Leximi i aktakuzës;
Neni 325 – Deklarimi i të pandehurit për aktakuzën;
Neni 326 – Pranimi i fajësisë nga i pandehuri në shqyrtimin gjyqësor dhe
Neni 346 – Marrja në pyetje e të akuzuarit.

Kriminelët e luftës, që i shërbyen dhe zbatuan planin e Millosheviçit për vrasjet e dhunimet e shqiptarëve dhe të tjerëve në Kosovë duhet të dënohen. Nuk kemi asnjë arsye për të pritur më gjatë për vendosjen e drejtësisë.

Me pikëllim të thellë sot morëm lajmin për ndarjen nga jeta të kryetarit të FFK-së dhe njërit prej personaliteteve më të shquara dhe më kontributdhënëse në fushën e sportit, Fadil Vokrri.

Fadili ishte mjeshtër i madh i futbollit. Nga një i ri i talentuar në KF Llapi, ai u bë qendërsulmues dhe kapiten i gjeneratës së artë të KF Prishtina, klub të cilin e udhëhoqi në nivelin më të lartë, ligën e parë të futbollit. Atëherë kur futbolli nuk ishte vetëm sport por edhe rezistencë, 55 golat e Fadil Vokrrit në fanelën e Prishtinës i bënin krenarë shqiptarët në gjithë ish Jugosllavinë dhe jo vetëm. Përkundër shtypjes dhe urrejtjes antishqiptare talenti i i tij e bëri atë shqiptarin e vetëm që luajti nën fanelën e ish Jugoslavisë. 2 golat e tij kundër Irlandës Veriore bën që tërë stadiumi i Sarajevës të brohoriste emrin e tij. Vokrri shkëlqeu edhe në Partizanin e Beogradit, Fenerbahçen e Stambollit e Nimes të Francës.

Vepra dhe përkushtimi i tij i vazhdueshëm në ngritjen e nivelit të sportit në Kosovë ndër breza mbetet vlera më e madhe që ky sportdashës i madh po na lë të trasuar rrugën për të vazhduar tutje.

Lëvizja VETËVENDOSJE! ndan dhimbjen me familjen Vokrri dhe u shpreh ngushëllimet më të sinqerta familjes, Federatës së Futbollit të Kosovës dhe gjithë qytetarëve të Kosovës.

Sekretarja organizative Vlora Haxhimehmedi dhe deputeti i VETËVENDOSJE!-s Liburn Aliu kanë shpalosur sot në një konferencë për media Javën e Lëvizjes, që po organizohet në 13-vjetorin e organizatës sonë.

Sekretarja Haxhimehmedi ka treguar për aktivitetet e secilës ditë:
Nga nesër më 10 qershor, fillon “Java e Lëvizjes” me shënimin e 140 vjetorit të Lidhjes së Prizrenit.

Gjatë kësaj jave do të organizojmë aktivitete ditore me dhe për qytetarët dhe për aktivistët.

Kemi caktuar nga një temë për çdo ditë të Javës së Lëvizjes, si në vijim:

• E diel, 10 qershor, është Dita e Lidhjes. Pas 140 vjetëve Lidhja Shqiptare e Prizrenit është gjallë dhe shërben si burim frymëzimi.

• E hënë, 11 qershor, është Dita e Anëtarësimit. Do të përkujtojmë një ndër aktivistët tanë më shembullor, Arbënor Deharin, që ka dhënë një kontribut të çmueshëm për anëtarësimet e reja në Lëvizje. Në frymën e kontributit të tij, do të përqendrohemi te rekrutimi dhe te anëtarësimi, si dy shtylla te organizimit

• E martë, 12 qershor, është Dita e VETËVENDOSJES!, që do ta shënojmë në Prishtinë me temën: “13 vjet ballafaqim dhe organizim”.

• E mërkurë, 13 qershor, është Dita e Mërgatës, dita e atyre që edhe pse kanë jetuar jashtë trevave shqiptare, nuk kanë reshtur të çojnë përpara proceset më të rëndësishme të shqiptarisë.

• E enjte, 14 qershor, është Dita e Komunës, ajo që e përbën të përbashkëtën tonë. Prandaj, do të organizojmë aktivitete për të fuqizuar lidhjen e komunës me qytetarin.

• E premte, 15 qershor, është Dita e Solidaritetit në komunitet, që shënon edhe përfundimin e muajit të Ramazanit dhe festën e Bajramit, ku do të gjendemi pranë njerëzve më në nevojë.

• E shtunë, 16 qershor, është Dita e Organizimit. Do t’ia kushtojmë organizimit bazë në komunitet ‒ pikave të VETËVENDOSJE!-s.

• E diel, 17 qershor, e përmbyllim Javën e Lëvizjes me shënimin e ditëlindjes së Ukshin Hotit dhe të veprës së tij.

Kjo javë do të mbyllet me një aktivitet socio-kulturor në Parkun e Gërmisë në Prishtinë.

Deputeti Liburn Aliu ka folur për Lidhjen e Prizrenit, 140 vjetori i së cilës e hap Javën e Lëvizjes.

Lëvizja Kombëtare e mbajti Lidhjen gjallë. Në shumë forma organizimi, herë legale, herë ilegale, lufta për liri vazhdoi, fshehurazi ose haptazi. Ajo u zhvillua dhe në terrenin e letrave e të arteve, ku pasardhësi më i spikatur i Abdyl e Sami Frashërit, si ideolog i Lëvizjes, u bë Ukshin Hoti. Ai ia vendosi vetes dhe secilit veprimtar imperativin “Shqipërinë e pabërë, bëje të bërë. Bëje ose vdis!”.

Maksimën e Ukshin Hotit e mishëroi në mënyrë më sublime Adem Jashari dhe mijëra veprimtarë. Me organizimin e UÇK-së shqiptarët iu kundërvunë edhe një herë forcave spastruese dhe në vitin 1999 arritën t’i ndalin ato, duke e çliruar Kosovën.

Detyrat që na i ka dhënë Lidhja e Prizrenit ende nuk janë realizuar. Rusia e disa nga fqinjët vazhdojnë të kenë pretendime ndaj nesh, kurse ne nuk e kemi organizimin e duhur ushtarak për vetëmbrojtje. Nuk kemi arritur të ndërtojmë diplomaci që t’i përfaqësojë shqiptarët në mënyrë të dinjitetshme. Fatkeqësisht kemi ambasadat e konsullatat plot miq e kushërinj të pushtetarëve. Ende nuk e kemi një shtet shqiptar mjaftueshëm të fortë, që t’u japë garanci e mbrojtje shqiptarëve që jetojnë jashtë Kosovës dhe Shqipërisë. Ç’është më e keqja, ende qeverisemi nga klika vjedhësish, shpresa e vetme e të cilëve është servilizmi ndaj perandorive. Këta na kanë lënë me ekonomi, me shoqëri dhe me kulturë të pazhvilluar.

Për sa kohë që këto probleme të jenë aktuale, Lidhja vazhdon të jetë gjallë, jo vetëm në zemrat e mendjet e të shqiptarëve, por edhe si Lëvizje, në një shumësi formash të ballafaqimit e të organizimit. Njëra prej këtyre formave është Lëvizja VETËVENDOSJE! Frymëzohemi prej Lidhjes së Prizrenit, gurthemelin e kemi po aty.

Për këtë, nesër, më 10 qershor, në Prizren do të mbahet tribuna me temën “Situata gjeopolitike e shqiptarëve – siguria dhe mbrojtja”. Në panel do të marrin pjesë, kryetari i Lëvizjes VETËVENDOSJE!, z. Albin Kurti, profesori i filozofisë politike, z. Hysamedin Feraj dhe gjenerali, z. Enver Dugolli.

#JavaeLeviz13s

Grupi Parlamentar i Lëvizjes VETËVENDOSJE! dhe Komiteti për Telekomunikacion mbajtën tryezën mbi gjendjen aktuale në Telekomin e Kosovës me analizë rreth shkaqeve të problemeve dhe zgjidhjen e tyre.

Në këtë tryezë përveç deputetëve dhe ekspertëve e njohësve të kësaj lëmie, ishin edhe Kryetari i Lëvizjes VETËVENDOSJE!, Albin Kurti, profesor Ismet Hamiti dhe profesor Salem Lepaja.

Në hapje të tryezës Kryetari Albin Kurti foli mbi rëndësinë që ka Telekomi në zhvillimin e vendit duke konstatuar se “Telekomi, KEK-u dhe Trepça janë historia dhe shansi për zhvillim të Republikës së Kosovës”.

Ai po ashtu foli edhe degradimin e Telekomit të Kosovës, ku nga një ndërmarrje shumë fitimprurëse tash nuk arrin të mbulojë shpenzimet e veta.

Ndërkaq, profesor Ismet Hamiti foli në lidhje me mënyrën se si Telekomi ka degraduar deri në këtë pikë.

“Nuk di ndonjë kompani në botë të kësaj veprimtarie të ketë falimentuar, ndërkaq Telekomi në Kosovë aktualisht nuk arrin t’i mbulojë as shpenzimet e veta rrjedhëse. Kjo për shkak të plaçkitjes së të hyrave përmes kontratave, aranzhmaneve dhe skemave nga me të ndryshmet. Një skemë plaçkitëse është operatori virtual mobil i njohur si Z-Mobile. Përmes kësaj skeme aktualisht, deri sa po flasim, plaçkiten së paku 30% e të hyrave nga shërbimet mobile të Telekomit të Kosovës”- tha Prof. Ismet Hamiti dhe vazhdoi:

“Kjo skemë për herë të parë u shfaq publikisht me 30 mars 2007 me shpalljen e PTK për krijimin e një skeme të tillë me urdhër të individëve në nivele të larta qeverisëse e partiake ndërsa në vitet në vijim e realizuan drejtues e borde të PTK-se dhe të rregullatorit, e mbrojtën ministra dhe kryeministra dhe nuk veproi prokuroria dhe drejtësia”.

Në anën tjetër, profesor Salem Lepaja foli në lidhje me disa hapa që duhet të ndërmerren për të dalë nga kjo gjendje, duke u nisur nga suspendimi i kontratës nga Prokuroria, formimi i një grupi për menaxhimin e krizës, që më pas do të kishte autorizim të plotë dhe do të ristrukturonte TK.

Ai foli edhe për politikat e kuadrit dhe kontratën e Telekomit të Kosovës me Dardafonin si dy faktorë kryesor të shkaktimit të kësaj krize.

Gjithashtu, i gjithë ky proces do të ishte transparent dhe publik përmes raportimeve të rregullta në Kuvendin e Republikës së Kosovës.

Nënkryetari i Lëvizjes, Besnik Bislimi tha se përveç kontratës së dëmshme me Z-Mobile, duhet të rishikohen edhe kontrata të tjera që janë po aq të dëmshme si ajo me “Artmotion”, marrja në shfrytëzim me qira të shumë objekteve si dhe mbipunësimi e luksi nga drejtuesit e TK-së.

Avni Zogiani përmendi edhe tenderët me operatorët e tjerë, siç është rasti me operatorin Koscell, ku edhe pasi Koscell ishte ranguar e para, fitues u shpall Telekomi slloven e jo Koscell ku ndër të tjera ishte edhe Telekomi austriak. Pas kësaj ajo, përmes firmës ligjore, nisi pesë raste gjyqësore. Që nga nisja e këtyre rasteve gjyqësore, ministri i atëhershëm i Financave, Ahmet Shala, e kishte marrë këtë kompani si këshilltare për privatizimin e Postës.

Pjesëmarrës të tjerë gjithashtu folën edhe për dimensione të tjera të plaçkitjes nga kontrata me Z-Mobile që nga vlerësimi se kjo kontratë po ashtu bie ndesh me ligjin për konkurrencën, për të vazhduar më pas me keq-menaxhimin e vazhdueshëm të resurseve njerëzore e deri te luksi i udhëheqësve të lartë në Telekomin e Kosovës.

Në fund të gjithë u pajtuan se Telekomi i Kosovës është në krizë, por mund të shpëtohet dhe të rikthehet në kontribuues të rëndësishëm të buxhetit të shtetit. Se a do të ndodhë kjo është ne dorë të prokurorisë dhe të qeverisë. Prokuroria duhet urgjentisht të bëjë suspendimin e menjëhershme dhe të nisë hetimet e kësaj kontrate në tërësinë e saj. Ndërsa qeveria duhet të emëroi menaxhmentin e krizës, të përbërë nga profesionistët e kësaj fushe, me detyra të qarta për kthimin e Telekomit në gjendje normale.

Lëvizja VETËVENDOSJE! nuk do të ndalet asnjëherë të vë në pah krimin e organizuar, që nga Qeveria e deri te drejtorët e bordet e TK-së, dhe as nuk do të rresht së kërkuari ndjekjen penale të kryerësve të këtij krimi që po falimenton ndërmarrjen shumë fitimprurëse të Republikës sonë.

Nesër, e premte Grupi parlamentar i Lëvizjes VETËVENDOSJE!, do ta ballafaqojë më këto çështje kryeministrin Haradinaj, në interpelancën e kërkuar prej datës 3 maj.

Po ashtu gjejmë rastin që sërish t’i bëjmë thirrje prokurorisë që të mos të mbyllë veshët e sytë por të veprojë. Kjo heshtje nuk duket aspak e paqëllimtë dhe çdo vonesë po i bën ata bashkëfajtorë.