Sot, në Kuvendin e Kosovës, Grupi parlamentar i Lëvizjes VETËVENDOSJE! dhe Komiteti për Drejtësi organizoi një tryezë, në lidhje me Projektligjin për shqyrtimin dhe vërtetimin e pasurisë së pajustifikuar.

Të pranishëm ishin deputetë, përfaqësues të institucioneve të drejtësisë, avokatë, përfaqësues të zyrës së Bashkimit Evropian, shoqërisë civile, profesorë dhe studentë.

Këtë diskutim e hapi Deputetja e VETËVENDOSJE!-s, Albulena Haxhiu që është njëkohësisht dhe kryetarja e Komisionit parlamentar për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit.

Në strategjinë legjislative për vitin 2016, Qeveria kishte paraparë procedimin në Kuvend të rishikimit e ligjit për konfiskimin e pasurisë së paligjshme më 30 qershor të vitit 2016.

Qeveria, konkretisht Ministria e Drejtësisë, as nuk e ka sjellë për diskutim një iniciativë të tillë. Praktikisht ka dështuar në realizimin e axhendës legjislative, madje i njëjti projektligj është hequr edhe nga strategjia legjislative e vitit 2017. Sigurisht që kjo sjellje e Qeverisë dëshmon mungesën e plotë të vullnetit që qoftë dhe formalisht ta adresojnë çështjen e pasurimit të paligjshëm dhe krimit të organizuar.

Duke e pasur në vëmendje nivelin e lartë të krimit të organizuar dhe korrupsionit e në anën tjetër pasivitetin e institucioneve të drejtësisë për të luftuar atë, të pranishmit vlerësuan lart nevojën e nxjerrjes së këtij projektligji.

Diskutimet u përqendruan në fuqinë retroaktive të këtij ligji, pra në përcaktimin kohor se prej kur duhet të vlejë shqyrtimi i pasurisë. Po ashtu u diskutua edhe për mbështetjen e sistemit të drejtësisë, duke pasur parasysh që ka mungesë të prokurorëve dhe gjyqtarëve, ngritjen e një departamenti përbrenda prokurorisë i cili do të përfaqësohej nga prokurorë të profilizuar që do të merreshin me rastet e korrupsionit dhe të tjera çështje të ngjashme.

Përfaqësuesit e grupit parlamentar të Lëvizjes VETËVENDOSJE!, u kërkuan të pranishmëve që vërejtjet e tyre për draftin e propozuar të këtij projektligji, t’i parashtrojnë me shkrim deri më 6 shkurt, në mënyrë që projektligji më pas të procedohet në Kuvend.

Lëvizja VETËVENDOSJE! e kishte propozuar edhe në legjislaturën e kaluar këtë nismë por ajo ishte zvarritur e penguar për të vijuar më tej qoftë nga mazhoranca e asaj kohe, qoftë nga një pjesë e opozitës që tash është në qeveri.

Po ashtu ne jemi të vetëdijshëm se vetëm normat ligjore nuk mjaftojnë për t’i bërë ballë mafias që ka kapur shtetin. Në këtë kuptim ky projektligj është i pamjaftueshëm, por megjithatë është i domosdoshëm dhe e vlerësojmë vetëm si një nga shumë masat që nevojiten për ta çkapur shtetin nga mafia e pushtetit.

Policia nuk kishte as prova të montuara për Astrit Deharin

Arrestimi i aktivistit Astrit Dehari pa asnjë provë, asnjë fakt, madje as të montuar, e përbën skandalin më të madh gjyqësor e politik në sistemin e drejtësisë. Nuk ka asnjë sms, nuk ka asnjë bisedë të tij që është inkriminuese. Nuk ka asnjë postim në Facebook që Policia mund ta llogarisë inkriminuese. Në të gjtiha pajisjet që i janë konfiskuar Astritit; veturë, telefon, lap-top, nuk është gjetur asgjë sipas pretendimeve të Policisë. Poashtu, ADN-ja e Astritit nuk përputhet. I tërë procesi është i ndërtuar mbi dy dëshmitarë dhe as këta dy dëshmitarë nuk e kanë përmendur Astrit Deharin. Astriti u arrestua e u mbajt në burg sepse ishte aktivist.

Sekretari i VETËVENDOSJE!-s Dardan Molliqaj në një konferencë për këtë rast tha se i  tërë procesi që është montim politik, i bazuar vetëm në deklaratat jokredibile të dy dëshmitarëve për aktivistët e Lëvizjes VETËVENDOSJE! tashmë ka dështuar.

“I vetmi fakt që Policia e pranon pse e ka arrestuar Astritin, është shoqërizimi i tij me aktivistët Atdhe Arifi dhe Egzon Haliti. Dëshminë për këtë shoqërizim, madje e ka të bazuar nga aktiviteti i tyre në rrjetin Facebook. Kjo pranohet në dokumentet zyrtare të vetë Prokurorisë”, sqaroi Molliqaj.

Molliqaj shoti më tëj se deklarata e personit që pretendon se e ka shitur motorin aktivistëve tonë, thotë se motori u është shitur tre personave të gjatësisë së njëjtë, të cilin kishin theks nga Rahoveci. Aktivistët e arrestuar janë të gjithë nga Prishtina dhe kanë dallim në gjatësinë e tyre, sidomos Astriti me Atdheun dhe Egzonin. Nga fotot e të dyshuarve, dëshmitari nuk kishte arritur ta identifikojë Astritin. Ai i kishte identifikuar vetëm vetëm dy persona dhe Astriti nuk ishte i dyshuar.

Astriti vdiq faji i këtij pushteti. Astriti u mbajt në burg i pafajshëm. Seanca për Astritin ende nuk është mbajtur e procesi ka dështuar. Astriti vazhdon ta denoncojë këtë pushtet. Ky pushtet ka emra të përveçëm të fajtorëve. Disa prej tyre janë: Mentor Shala, Ridvan Berisha, Shpend Maxhuni, Fatos Makolli, Luan Keka, Abdyrrahim Islami, Vehbi Kashtanjeva, Sylë Hoxha, Metush Biraj, Nexhmi Krasniqi, Skender Hyseni dhe Dhurata Hoxha.

Ne as nuk harrojmë, as nuk falim.

Lëvizja VETËVENDOSJE!
18 janar 2017

Treni i linjës Beograd-Mitrovicë, i cili cenon tutje sovranitetin e Kosovës, është produkt i pastër i negociatave pa parime e pa kushte të shtetit tonë me Serbinë. Dhe sikurse për koncesione të tjera, përgjegjësit kryesor edhe për këtë iniciativë të Serbisë brenda Kosovës janë Hashim Thaçi, Edita Tahiri dhe Isa Mustafa.

Ky tren që po qarkullon për herë të parë në relacionin Beograd-Mitrovicë që nga viti 1999, është përplot me motive të trashëgimisë kulturore e fetare serbe në Kosovë dhe me thënie që konsiderojnë Kosovën si pjesë të Serbisë. Dhe kjo, është qartas mesazhi i Serbisë që e do Kosovën si në vitin 1999.

E kundruall gjithë kësaj, institucionet tona që detyroheshin nga Lista Srpska që të mbulonin muralet me simbole kombëtare në Kuvendin e Kosovës, kanë zgjedhur të mos veprojnë dhe të viktimizohen. Përballë këtij projekti famëkeq, negociatorët deklarojnë se treni është ilegal, se nuk janë marrë vesh për të në negociata, dhe kërkojnë që ai të ndalet nga Bashkimi Evropian. Ndonëse, në vazhdimësi të njëjtit negociatorë janë deklaruar për suksese të njëpasnjëshme të Kosovës në procesin negociator me Serbinë.

Qeveria e Kosovës është vënë në shërbim të Serbisë. Nënshtrimi i vazhdueshëm ndaj Serbisë përmes negociatave me të, dhe nënshtimi ndaj degëzimit të saj në Kosovë, Listës Srpska, është garancë edhe për projekte të tjera që do ta minimizojnë shtetësinë e Kosovës. Prandaj, që të ruhet sovraniteti i Republikës së Kosovës duhet që të mos lejohet Serbia brenda saj. Dhe që të ndalet Serbia, është e domosdoshme që të ndërpritet procesi negociator pa parime e pa kushte më të, gjë të cilën nuk e bën dot qeveria aktuale e Kosovës, e cila funksionon pa asnjë parim dhe e kushtëzuar nga shteti serb.

Në ditën e dytë të vizitës në Mbretërinë e Bashkuar, delegacioni i Lëvizjes VETËVENDOSJE!, i udhëhequr nga kryetari Visar Ymeri, u takua me deputetin e Partisë Laburiste Britanike, Khalid Mahmood, i cili mban pozicionin e Ministrit në hije të Punëve të Jashtme.

Në këtë takim Kryetari Ymeri prezantoi pikat kryesore të programit politik të Lëvizjes VETËVENDOSJE! si dhe situatën politike në Kosovë dhe më gjerë në Ballkan. Deputeti Khalid Mahmood tregoi se synimi i kryetarit të Partisë Laburiste, Jeremy Corbyn, është të ndihmojë partitë e pozicionuara majtas në rajonin e Ballkanit, dhe shprehu interesimin për të ardhur në një vizitë zyrtare në Kosovë gjatë këtij viti.

Më tej delegacioni zhvilloi një vizitë në Universitetin “London School of Economics” (LSE) për t’u takuar me profesorin shqiptar Arjan Gjonçaj, dhe gjatë ditës u zhvillua një takim edhe me organizatën anglo-shqiptare “British Albanian Kosovar Council”. Takimet e delegacionit do të vazhdojnë në Londër deri në fund të kësaj jave.

12 janar 2017
Lëvizja VETËVENDOSJE!

Një delegacion i Lëvizjes VETËVENDOSJE! po merr pjesë në një vizitë zyrtare në Mbretërinë e Bashkuar për t’u takuar me mërgatën shqiptare, partitë politike britanike, dhe organizata shqiptare dhe ndërkombëtare. Delegacioni udhëhiqet nga Kryetari i Lëvizjes VETËVENDOSJE!, Visar Ymeri dhe është i përbërë nga Glauk Konjufca, Kryetar i grupit parlamentar, Fisnik Ismaili, deputet, dhe Fitore Pacolli, Drejtuese e Komitetit për Marrëdhënie me Jashtë.
Në ditën e parë të vizitës delegaioni është takuar me përfaqësues të lartë të Partisë Laburiste Britanike si Baronesha Janet Royall, me Ndërlidhsen e Marrëdhënieve me Jashtë Znj. Jo Greening dhe me Menaxheren e Projekteve Ndërkombëtare Znj. Nabila Sattar.

Baronesha Royall, e cila ka dhënë më herët një kontribut të çmuar gjatë luftës së vitit 1999 në Kosovë, shprehu interesimin që të mësojë më shumë mbi zhvillimet e fundit politike në Kosovë si dhe tregoi gatishmërinë e saj për të forcuar marrëdhëniet bilaterale me Lëvizjen VETËVENDOSJE!. Baronesha Royall dhe Kryetari Visar Ymeri e përqendruan diskutimin te forcimi i marrëdhënieve mes forcave progresive social-demokrate në Evropë si strategji e domosdoshme për të sfiduar pushtet e djathta dhe konservatore. Kryetari Ymeri e njohu Borenesën me zhvillimet e fundit ekonomiko-politike në Kosovë duke u ndalur edhe te pasojat negative që ka sjell dialogu pa kushte me Serbinë.

Delegacioni i Lëvizjes VETËVENDOSJE! do të vazhdojë vizitën gjatë kësaj jave në takime të tjera me përfaqësues të partisë Laburiste, me Ministrinë e Punëve Jashtme Britanike, me gazetarë si dhe në takime dhe një tubim me mërgatën shqiptare. Ndër të tjera, në datën 13 janar, Visar Ymeri dhe Glauk Konjufaca do të mbajnë edhe një ligjëratë në Universitetin Sussex me temën “Kosova dhe shqiptarët në një Evropë në ndryshim”

11 janar 2017
Lëvizja VETËVENDOSJE!

Vendimi për ndërtimin e linjës hekurodhore Beograd – Mitrovicë është cenim i drejtpërdrejt i sovranitetit të Kosovës. Ky projekt është vazhdimësi e shmangies së shtetit tonë dhe krijon lidhje direkte me shtetin e Serbisë. Serbia po e bën zhvendosjen e kufirit para syve të qeveritarëve tanë. Tashmë, kufiri me Serbinë, nga Leposaviçi është zhvendosur në lumin Ibër ku është ndërtuar një mur ndarës. Ndërkaq, linja hekurudhore që është vendim i shtetit serb është tregues i sjelljes së Beogradit sikur të ishin brenda të të njëjtit shtet me pjesën veriore të Mitrovicës.

Linja hekurodhore nuk ka të bëjë me kurrfarë integrimi për të cilin flasin qeveritarët tanë. Përkundrazi, kjo linjë është dëshmi që Serbia e injoron krejtësisht kufirin dhe shtetin e Kosovës dhe përpiqet që t’i tërheqë drejt vetës serbët e Kosovës.

Kjo Serbi po i bën të gjitha projektet që e cenojnë sovranitetin në veri të vendit tonë. Me të njëjtën Serbi, Qeveria jonë ka pranuar të negociojë. Prej së njëjtës Serbi dhe me Listën Serbe po provohet të instalohet “Zajednica” në Kosovë. Ky projekt nuk është i ndryshëm. Linja hekurodhore është vetëm njëri prej treguesve se si mund të dukej “Zajednica” e cila sjellë ndarje reale por edhe simbolike. Flamujt dhe kishat ortodokse në trenat e ri, janë vetëm kujtesë që ndarja është etnike dhe nuk bëhet fjalë për hekurudha përbashkuese.

Ardhja e pelegrinëve serbë në kishën ortodokse të Gjakovës është veprim provokues, i cili i rëndon edhe më shumë plagët e shumë familjeve që kanë humbur të dashurit e tyre gjatë luftës së fundit. Protestat e vazhdueshme kundër këtyre vizitave janë thirrje për t’u vendosur drejtësi, kurse dhuna policore nga organet e rendit ndaj protestuesve është veprim kundër drejtësisë, dhe si i tillë i papranueshëm.

Sikurse edhe në herat e kaluara, Policia e Kosovës ka arrestuar edhe sot qytetarë që po kundërshtonin ardhjen e këtyre pelegrinëve, bashkë me të cilët edhe kriminelë të luftës, të cilët nuk u hetuan asnjëherë.

Lëvizja VETËVENDOSJE! shpreh shqetësimin për arrestimin e Hazbije Pruthit, Mimoza Shalës, Haxher Bytyqit, Shkëndije Hodës dhe Sanije Berishës, si dhe kërkon lirimin e mënjehershëm të tyre.

Nuk mund të ketë pajtim me Serbinë përderisa drejtësia nuk është vendosur. Serbia përveçse nuk ka kërkuar falje, ajo po mban në fuqi fletë-arrestet për pjesëmarrësit në luftën tonë çlirimtare. Prandaj, protestat janë të pashmangshme deri në zbardhjen e fatit të të pagjeturve dhe vendosjen e drejtësisë.

Lëvizja VETËVENDOSJE! ka nënshkruar koalicion për qeverisje lokale në Komunën e Mitrovicës me subjektin politik Aleanca Kosova e Re – AKR. Kjo marrëveshje politike është nënshkruar në Mitrovicë, nga kryetari i Qendrës së Mitrovicës Faruk Mujka dhe përfaqësuesi nga AKR-ja, kryetari i Mitrovicës Agim Bahtiri.

Qyteti i Mitrovicës është i rëndësishëm për shkak të pretendimeve ekspansioniste që ka Serbia karshi pjesës veriore. Për këtë duhet një qasje politike që i përgjigjet këtyre pretendimeve. Qëndrimet e kryetarit të Mitrovicës kanë qenë edhe parimore dhe konsistente. Në këtë drejtim dhe me këtë synim Lëvizja VETËVENDOSJE! ka arritur marrëveshje të bashkëqeverisjes me kryetarin Bahtiri, në këta muaj të mbetur të qeverisjes.

Ne mendojmë se situata politike dhe e sigurisë në Mitrovicë është jashtëzakonisht e ndjeshme dhe kjo duhet të nënkuptojë angazhim më të shtuar të forcave që besojnë në një Mitrovicë të zhvilluar, prosperuese dhe që merren me probleme të dala që nga paslufta deri më tani. Me këtë marrëveshje politike, ne angazhohemi për një qeverisje lokale profesionale, të guximshme dhe të ndershme.

Lëvizja VETËVENDOSJE! do të qeverisë me Drejtorinë e Shëndetësisë, Drejtorinë e Arsimit dhe Drejtorinë për Kulturë, Rini dhe Sport. Kurse nënkryetari i komunës së Mitrovicës do të jetë z. Faruk Mujka.

VETËVENDOSJE! zotohet se do ta kryejë me përgjegjësi të plotë dhe me përkushtim obligimin që ka marrë për këto drejtori.

Lëvizja VETËVENDOSJE! – Qendra Mitrovicë

Në 18 dhjetorin e vitit të kaluar 78 aktivistë të Lëvizjes VETËVENDOSJE! kanë dorëzuar kallëzimet e tyre penale në Prokurorinë Themelore të Prishtinës në lidhje me intervenimin policor të 28 nëntorit në Selinë e VETËVENDOSJE!-s. Sot e asaj dite nuk është ndërmarrë asnjë veprim, përkundër kërkesës së vazhdueshme nga institucione kredibile vendore e ndërkombëtare për të drejtat e njeriut.

Anëtari i Kryesisë Sami Kurteshi, gjatë konferencës për media tha se e tërë kjo tregon se sistemi shtetëror në Kosovë është i kapur nga një regjim kriminal me elemente fashiste e terroriste. Duke shtuar po ashtu se e tërë kjo ka qenë pjesë e skenarit për eliminimin e VETËVENDOSJE!-s nga skena politike.

“Intervenimi i Policisë në zyrat e Lëvizjes me njësitë antiterroriste, ka pasur elemente terroriste. Qëllimi i intervenimit ka qenë krijimi i panikut, së pari midis aktivistëve, e pastaj edhe midis qytetarëve, të cilët janë sulmuar brutalisht, në mënyrë klandestine, me numër jashtëzakonisht të madh të forcave policore (mbi 1000) të të gjitha njësive, përfshirë edhe Njësitet Antiterroriste FIT, me përdorimin e të gjithë arsenalit të disponueshëm të armëve të zjarrit në Policinë e Kosovës”, deklaroi Kurteshi.

Ai shtoi se ky veprim terrorizues i policisë është bërë pa asnjë vendim të ndonjë gjykate në Kosovë, por sipas urdhërit politik të regjimit fashistoid të Thaçit, Mustafës e Veselit. E po ashtu sqaroi se kallëzuesit i kishin bazuar pretendimet e tyre në përshkrimin kushtetues 128, par. 4, i cili përkufizon zixhirin komandues në Policinë e Kosovës dhe rrjedhimisht për personat përgjegjës thotë se duhet të bartin pasojat e veprimeve policore të asaj dite, duke kërkuar ndjekjen e tyre.

Kurteshi përmendi shqetësimin e Amnesty International dhe kërkesën për hetimin e dhunës të asaj dite drejtuar Ministrisë së Punëve të Brendshme në Kosovë, si dhe kërkesën nga Avokati i Popullit për iniciimin e hetimeve. Por, ai theksoi se i gjithë mosveprimi shpjegohet duke pasur parasysh se në krye të organeve të rendit ka njerëz si Shpend Maxhuni e Rashit Qalaj apo në krye të drejtësisë njerëz si Ymer Beka, Sylë Hoxha e Metush Biraj, duke i quajtur të gjithë shërbyes të klanit “Pronto”.

“Të githa këto që kanë ndodhur shkelin Neni 6 të Konventës Evropiane të Drejtave të Njeriut dhe Nenin 53 dhe 54 të Kushtetutës së Republikës së Kosovës”, tha ndër të tjera Sami Kurteshi, duke përmendur se pas intervenimit të 28 nëntorit, pushteti dhe analistë e gazetarë të afërt me pushtetin kanë cilësuar si veprime terroriste shumë aktivitete të VETËVENDOSJE!-s dhe kanë montuar akuza ndaj 6 aktivistëve pa asnjë dëshmi të qëndrueshme.

Tentimi për nxjerrjen e Lëvizjes nga skena politike e Kosovës është pasojë e frikës nga filozofia e saj politike, qëndrimit të saj parimor në lidhje me problemet politike e shoqërore në Kosovë e më gjerë dhe për shkak të veprimit të saj të vazhdueshëm konkret kundër veprimeve antishoqërore, antikombëtare dhe kundërkushtetuese të këtij regjimi, kundërshtia ndaj të cilit nuk do të ndalet në asnjë moment.

Të gjeturat nga mjeko-ligjorët Besim Ymaj dhe Besim Latifaj hedhin poshtë raportin e mjeko-ligjorëve të caktuar nga institucionet shtetërore, i cili raport nuk shpjegonte lidhjet shkencore e logjike midis konstatimeve të shkakut të vdekjes (asfiksisë) dhe shkaktarit të vdekjes (dëmtime të vetëshkaktuara “hezituese”).

Ky raport i detajizuar nga Dr. Ymaj dhe Dr. Latifaj demanton shumë konstatime nga organet e hetuesisë dhe prokuroria, të cilat me nguti, pas shumë deklaratave kontradiktore, vdekjen e Astritit u përpoqën ta paraqesin si “vetëvrasje”. Dhe për më keq, Kryeprokurori Sylë Hoxha, mënjeherë pas publikimit të këtij raporti deklaron se këtë raport të ekspertëve ligjorë të pavarur nuk do ta marrin parasysh.

Është jashtëzakonisht shqetësuese dhe e papranueshme që institucionet e drejtësisë të pengojnë zbardhjen e vdekjes të një qytetari në një institucion të sigurisë. Këto institucione, të cilat që nga 5 nëntori nxorrën vetëm deklarata kontradiktore dhe një raport jokredibil të autopsisë, të shpërfillin raportin e publikuar nga mjeko-ligjorët e pavarur që është i bazuar në fakte dhe dëshmi, përveç se në autopsinë e trupit të pajetë të Astritit.

Ky raport dallon nga ai zyrtar edhe në shumësinë e fakteve që sjellë, edhe me konsistencën ligjore që e ngërthen në vete. Dhe fakti që prokuroria po refuzon ta përdorë këtë raport tregon se ajo nuk e do as të vërtetën e as drejtësinë për Astritin. Tregon se prokuroria ka përgjigje negative për kërkesën e familjes, Lëvizjes VETËVENDOSJE! dhe qytetarëve të shumtë për hetim të pavarur.

Prandaj, ne qëndrojmë prapa kërkesës për hetim të pavarur, dhe nuk do të ndalemi së kërkuari zbardhjen e tij. Është momenti i fundit që institucionet të reflektojnë dhe reagojnë për zbardhjen e rastit. Shteti i kapur nga klani “Pronto” prodhon kryeprokurorë e prokurorë si Sylë Hoxha e Metush Biraj, të cilët nuk e kanë synim shtetin e së drejtës. Drejtësia mundësohet vetëm me çlirimin e institucioneve nga ky grupim kriminal.

1. Mentor Shala – Drejtori i RTK-së është nismëtar i propagandës mediatike, të njëanshme dhe të padrejtë ndaj aktivistëve të Lëvizjes VETËVENDOSJE! para se të arrestoheshin ata.

2. Ridvan Berisha – Kryeredaktor i RTK-së, i cili akuzoi Lëvizjen VETËVENDOSJE! drejtpërdrejtë për sulmet disa ditë para se të arrestoheshin aktivistët tanë.

3. Shpend Maxhuni – Kryepolici i cili për ta vazhduar mandatin e tij i qëndroi besnik shtetit të kapur, Grabovcit e Veselit duke e organizuar tërë policinë e Kosovës për ta montuar këtë rast politik ndaj aktivistëve tanë.

4. Fatos Makolli – Drejtuesi i njësitit anti-terror i cili në një paraqitje publike pati thënë se është i bindur se aktivistët tanë kanë kryer sulmin ndaj Kuvendit. Ai është drejtues i një njësiti policor i cili ka falsifikuar e montuar prova duke dashur t’i çojë drejt dënimit aktivistët e VETËVENDOSJE!-s për terrorizëm. Fakte e dëshmi që nuk i kemi parë deri më tani.

5. Luan Keka – Ky është personi më meritor për këtë të keqe. Ky ka qenë udhëheqës i këtij operacioni të padrejtë. Ky ishte personi i cili kishte dalur në konferencën e parë ku janë paraqitur “faktet”, dhe pasi që u demaskua nga ne pasi që kishte lidhje të afërta me klanin ‘Pronto’, që kishe miqësi të afërt me Ridvan Berishën dhe se gruaja e tij ishte kandidate për deputete e PDK-së në zgjedhjet e kaluara – nuk u paraqit më asnjëherë në media, edhe pse ishte udhëheqës i operacionit.

6. Abdurrahim Islami – Ky është personi cili e ka mundësuar infrastrukturën e këtij procesi politik. Ky prokuror i cili kishte marrë këtë rast dy ditë pasi që është kthyer nga pushimet dhe ka urdhëruar arrestimin e aktivistëve tanë pa e parë lëndën, dhe pa e studiuar atë. Një tjetër fakt i ri është se djali i Prokurorit Islami, punon në AKI, brenda njësitit anti-terror. Pra, si bëhet që të gjithë personat e caktuar për ta përndjekur Lëvizjen VETËVENDOSJE! qenkan të lidhur familjarisht? Kjo nuk është e rastësishme. Ky është personi kryesor se pse kanë qëndruar aktivistët tanë në burg. Ky i ka bërë të gjitha kërkesat që aktivistët të mbahen në burgje e arreste shtëpiake, të cilat tash po dalin se kanë qenë të padrejta ashtu siç kemi thënë.

7. Vehbi Kashtanjeva – Ky është gjyqtari i rastit. Njeriu i cili ka marrë vendim për të gjitha masat kundrejt aktivistëve tanë. Një panel i gjykatës së apelit ka konsideruar se vendimi i tij është i padrejtë. Dhe ky njeri për t’u bërë ende më kriminal pati thënë disa ditë pas vdekjes së Astritit se nuk ka dhënë leje për ta vizituar Astritin në burg për Dardan Molliqajn e Sami Kurteshin . Por, kur ne mbajtëm një konferencë për media duke dëshmuar se kemi pasur leje nga ky gjyqtar, ai doli dhe tha “po kam dhënë leje, por kam shumë kërkesa për leje”. Pra, Vehbi Kashtanjeva gënjeu publikisht dhe ka marr vëndim për t’i çuar në burg aktivistët tanë.

8. Sylë Hoxha – I apostrofuar në video e klanit ‘Pronto’, i cili në procesin pas vdekjes së Astritit ka qenë skandaloz. Ky person ende pa përfunduar hetimet dhe pa dalur raporti i autopsisë kishte deklaruar se Astriti kishte bërë vetëvrasje. Ky ka pasur të angazhuar si prokuror të këtij rasti Metush Birajn, prej të cilit kishte kërkuar vite më parë që t’ia ulte dënimin vëllait të tij, i cili kishte qenë një gjyqtar i dënuar për korrupsion. Një fenomen i cili nuk ndodh kurrë, që një prokuror të kërkojë ulje të dënimit. Këta njerëz janë produkte të klanit ‘Pronto’.

9. Metush Biraj – Prokurori i cili kishte kërkuar uljen e dënimit për vëllain e Sylë Hoxhës, një gjyqtar i dënuar për korrupsion. Pra, ja çfarë prokuror kemi, të tillë që kërkojnë uljen e dënimit për një person të korruptuar.

10. Nexhmi Krasniqi – Drejtor i Policisë në Prizren, një person shumë i dëmshëm, i dërguar disa herë në Inspektoriatin e Policisë për shkak problemeve me ligjin. Ende sot e kësaj dite nuk ka dhënë deklarim publik, s’ka dhënë dorëheqje dhe nuk kanë filluar hetimet ndaj tij, i cili si komandant i policisë deklaroi në fillim se Astriti ka vdekur nga mbidoza e barnave, gjë që u demantua ditë më pas nga autopsia. Ky është personi që i ka udhëhequr hetimet, i cili po ashtu ka bërë publike xhirimet ku shihet Astriti në burg, dhe pjesë nga ditari i tij.

11. Skender Hyseni – Ministri i Punëve të Brendshme të Kosovës, i cili s’ka folur pothuajse fare për këtë çështje dhe që është drejtues i tërë Policisë së Kosovës. Ky ministër mban përgjegjësi për faktin se s’ka ndërmarrë asnjë veprim sa i përket rastit që nga fillimi, pra prej arrestimeve e deri më sot. Ky mbetet përgjegjësi kryesor politik për këtë rast.

12. Dhurata Hoxha – Ministrja e Drejtësisë e cila pas disa javëve nga vdekja e Astritit, suspendoi dhe pushoi nga puna disa persona me përgjegjësi shumë të ulët, në vend se t’i hiqte nga puna personat më përgjegjësi të lartë dhe natyrisht ajo vetë nuk dha dorëheqje. Ministrja pas raportit të autopsisë bëri thirrje për hetime ndërkombëtare pasi që as ajo vetë nuk i besonte drejtësisë Kosovare.

Delegacioni i Lëvizjes VETËVENDOSJE! e ka përmbyllur pjesëmarrjen në Kongresin e Partisë Social-demokrate Zvicerane me takime të shumta dhe me një tubim shtesë me mërgatën shqiptare.

Përveç takimit me Ministrin e Punëve të Brendshme në Zvicër, Alain Berset, delegacioni i Lëvizjes VETËVENDOSJE, i udhëhequr nga Visar Ymeri, pati mundësinë të takohet me deputetin dhe Zv/Presidentin e Partisë, Cédric Wermuth, deputeten Barbara Gysi, Sekretarin Ndërkombëtar Peter Hug anëtarin e Presidencës së Partisë Socialiste Evropiane, Walter Suter, etj. Në të gjitha këto takime u diskutua lidhur me çështjet që prekin mërgatë shqiptare dhe marrëdhëniet mes Kosovës dhe Zvicrës, si dhe u ngrit çështja e Astrit Deharit. Më tej nga këto takime u bisedua edhe për lidhjen e marrëdhënieve më të ngushta të bashkëpunimit bilateral mes Lëvizjes VETËVENDOSJE! dhe Partisë Social-demokrate zvicerane.

Vizita në Zvicër u mbyll me nje tubim me pyetje-përgjigje me bashkatdhetarë në qytetin e Bernit.

Një delegacion i Lëvizjes VETËVENDOSJE! është ftuar të marrë pjesë në Kongresin e Partisë Social-demokrate të Zvicrës, i cili zhvillohet më 3 dhe 4 dhjetor 2016, në qytetin e Bernit. Ky delegacion është i përbërë nga Kryetari Visar Ymeri, Nënkryetarja Fatmire Kollçaku, deputeti Faton Topalli dhe Kryetari i Qendrës së Lëvizjes VETËVENDOSJE! në Zvicër, Mujë Shala.

Me këtë rast, Qendra e aktivistëve të Lëvizjes VETËVENDOSJE! në Zvicër ka organizuar një tubim me mërgatën shqipëtare në Zyrih në mbrëmjen e datës 2 dhjetor. Tubimi nisi me mbajtjen e një minutë heshtje për humbjen e aktivistit Astrit Dehari. Kryetarja e Pikës së VETËVENDOSJE!-s në Zyrih, Njomëza Gutaj shpjegoi qëllimin e vizitës së delegacionit, dhe më tej diskutimi u përqëndrua në angazhimin për të vendosur drejtësi për rastin e Astritit si dhe në Alternativën e Lëvizjes VETËVENDOSJE!.

Kryetari Ymeri foli për situatën e rëndë poltike në Kosovë pas vdekjes së dyshimtë të aktivistit Astrit Dehari. Kërkesa “Drejtësi për Astritin” sot përveç se është shndërruar në kërkesë gjithëpopullore, është kërkesë Drejtësi për Kosovën. Sepse rasti i Astrit Deharit është e vërteta e katandisjes së shtetit të Kosovës, si një shtet i kapur që është shndërruar në shtet kundër popullit. Ashtu siç i njëjti shtet i kapur u angazhua kundër territorit me nënshkrimin e Marrëveshjes së dëmshme për shenjimin e vijës kufitare me Malin e Zi; ashtu siç shteti i kapur u ngrit kundër Republikës me nënshkrimin e marrëveshjes për themelimin e “Zajednicës”.

Fatmire Kollçaku diskutoi lidhur me liberalizimin e vizave, Demarkacionin dhe “Zajednicën”, ku theksoi se nuk ka mundësi që të bëhen koncesione sa i përket sovranitetit të vendit dhe ta falim pasurinë shteterore kinse në emër të liberalizimit. Ajo foli edhe lidhur me gjendjen në sektorin e shëndetesisë dhe ndihmën e vazdueshme të cilen e jep mërgata për shërimin e qytetarëve në Kosovë dhe të gjitha aktet tjera të bamirësisë, atë që në fakt është obligim i shtetit. Po ashtu ajo theksoi se vetëm me Lëvizjen VETËVENDOSJE ka mundësi që të ndryshohet situata në Kosove dhe ftoi bashkatdhetarët që t’i bashkohen kauzës së drejte për të cilën angazhohemi.

Nga ana tjetër, deputeti Faton Topalli tha se Kosova, vendi më i varfër në Evropë, në të njëjtën kohë është edhe vendi më i shtrenjtë. Pa mbështetjen e mërgimtarëve, që sjellin çdo vit rreth 780 milionë Euro, do te rrezikohej ekzistenca dhe paqja sociale. Mjerisht Qeveria e Kosovës po i perdor këto të ardhura për të siguruar vende pune në Serbi, e cila është eksportuesi kryesor ekonomik në Kosovë, në vend se te krijonte kushte që keto mjete të shfrytezohen për zhvillim ekonomik të Kosoves.

Ndërkaq, sot paradite, delegacioni i Lëvizjes VETËVENDOSJE! ka mbërritur në hapjen e punimeve të Kongresit të Partise Social-demokrate Zvicerane, të pritur nga Sekretari Ndërkombëtar dhe përfaqësues të tjerë të lartë të kësaj partie me të cilët do kenë mundësi të zhvillojnë takime gjatë dy ditëve të Kongresit.

3 dhjetor 2016
Lëvizja VETËVENDOSJE!

Aktivistët e Lëvizjes VETËVENDOSJE! kanë dorëzuar në Gjykatën Themelore dhe poashtu Prokurorinë Themelore materialet me video ku dëshmohet pafajësia e gjashtë aktivistëve të Lëvizjes, të arrestuar para më shumë se 3 muaj dhe duke u hetuar për terrorizëm. Ky sistem i drejtësisë që i trajton ata si të dyshuar për sulmin mbi Kuvendin e Kosovës, tashmë i ka edhe provat se aktivistët nuk kanë qenë fare as afër vendit ku ka ndodhur sulmi atë natë.

“Tashmë faktin që aktivistët e nuk kanë qenë aty dhe alibinë e dëshmuar me video dje në konferencën e Lëvizjes, e ka parë gjithë opinioni në Kosovë, por meqë mund të ketë hapësirë për keqkuptime, ne sot i kemi sjellë nga një kopje të kësaj videoje edhe prokurorisë e edhe gjykatës”, ka thënë aktivisti Valdrin Ahmeti pas dorëzimit të alibive në Gjykatë.

Ne kërkojmë lirimin e menjëhershëm të aktivistëve tanë që po mbahen padrejtësisht në burg: Atdhe Arifi dhe Egzon Haliti, dhe aktivistët Adea Batusha dhe Frashër Krasniqi që po mbahen në arrest shtëpiak.

“Deri më tani, përveç fotografive nga disa markete dhe fotografive nëpër bankomate, hetuesia dhe prokuroria nuk ka paraqitur ndonjë provë bindëse as për t’i mbajtur 48 orë, e lëre më 95 ditë siç po ndodhë”, shtoi më tej Ahmeti.

Pikërisht duke vujatur padrejtësisht burgun nga ky proces gjyqësor i montuar politikisht, vdiq në rrethana shumë të dyshimta shkoku dhe bashkeaktivisti yne Astrit Dehari. Siç dëshmohet edhe nga videoja Astriti dhe 5 aktivistët e tjerë nuk kanë të bëjnë fare me rastin, dhe shteti duhet të japë përgjegjësi për burgosjen e tyre.

Ne nuk do të ndalemi së kërkuari drejtësi në Kosovë, nuk do të ndalemi së kërkuar Drejtësi për Astritin deri sa të zbardhet i gjithë rasti. Nuk do të ndalemi së kërkuari Drejtësi për aktivistët që po mbahen padrejtësisht nëpër burgje e arreste shtëpiake.

Administrimi i procesit të hetimit, deklaratat publike kundërthënëse të policisë, rrjedhja e të dhënave, kontradiktat shkencore në shkaqet e vdekjes, përgjithësisht angazhimi i hetuesisë në propagandë publike më shumë se sa në hetime serioze, e kanë bërë procesin e hetimit të vdekjes së Astrit Deharit absolutisht të pabesueshëm dhe të dyshimtë. Dhe pikërisht në këtë moment në skenë del EULEX-i për të na bindur se hetimet qenkan kryer sipas standardeve dhe se qenkan të besueshme. Pas të gjitha atyre shkeljeve edhe procedurale, e etike, dhe pas përfshierjes së drejtpërdrejt të njerëzve të lidhur me Klanin Pronto në këto hetime, ato jo që nuk janë kredibile, por më shumë ngrisin dyshime për synim të fshehjes së të vërtetës se sa zbardhje të saj.

EULEX-i as nuk është i pavarur e as i paanshëm. Gjatë kohës sa shërbejnë në Kosovë EULEX ka qenë subjekt i skandaleve të shumta dhe dyshimeve të mëdha për intervenime gjyqësore me qëllime politike e deri te skandalet e shumta të korrupsionit. Edhe këto EULEX-i kishte thënë që i kanë hetuar. Dhe nuk kanë gjetur asgjë. Mu sikur në këtë rastin e fundit të monitorimit të hetimeve të prokurorisë për vdekjen e Astritit.

Si u bë që EULEX-i nuk gjeti as shkeljen më të vogël në këtë proces hetimi? Nuk japin kurrfarë shpjegimi për ngarendjen e Sylë Hoxhës për ta cilësuar rastin si vetëvrasje 1 orë pas raportit të autopsisë i cili përkundër kontradiktave të mëdha shkencore, nuk e sjellë një përfundim të tillë. EULEX-i nuk e shpjegon se pse kemi kaq shumë deklarime zyrtare që e përjashtojnë njëra tjetrën prej policisë e cila tha që vdekja kishte ardhur si rezultat i konsumimit të mbidozuar të medikamenteve, e deri te deklaratat që Astriti ka vdekur rrugës, ose se ai ka pasur puls dhe frymëmarrje normale në momentin kur është gjetur në qeli, që kanë ardhë nga persona të ndryshëm përgjegjës brenda Shërbimit korrektues.

EULEX-i nuk mund të sigurojë hetime të pavarura. As nuk e ka kredibilitetin minimal për të qenë të përfshirë në një rast të tillë. Kjo komunikatë fatkeqësisht shihet vetëm si vazhdimësi e luftës propagandistike për ta mbështetur konstatimin e Sylë Hoxhës me pronto eprorët e tij.

Qytetarët e Kosovës sot duan ta dijnë të vërtetën për vdekjen e Astritit. Dhe, në lidhje me këtë, ta diskutojnë karakterin e shtetit që i vdesin njerëzit në burg dhe që nuk merr asnjë përgjegjësi. Jo të dëgjojnë propagandëagjitative në gjuhë të ndryshme. Pavarësisht gjuhën në të cilën flitet, pra shqip ose anglisht në këtë rast, kjo propagandë synon ta fsheh të vërtetën, dhe asgjë tjetër.

Gjykata themelore në Prishtinë ka vendosur që të ndërmarrë edhe një veprim arbitrar ndaj aktivistëve të Lëvizjes VETËVENDOSJE! që tash e tre muaj po mbahen padrejtësisht në burgje dhe arreste shtëpiake, duke iu vazhduar masat e mbajtjes në paraburgim, përkatësisht në arrest shtëpiak, edhe për një muaj.

Edhe përkundër faktit që secili nga ta akuzohet për veprën e njëjtë, të gjithë këta padrejtësisht nën akuza të montuara e të paprovuara, ndaj tyre janë vazhduar masa të ndryshme të sigurisë. Atdhe Arifi e Egzon Haliti do të vazhdojnë të mbahen në burg, kurse Adea Batusha e Frashër Krasniqi vazhdojnë të mbahen nën arrest shtëpiak, teksa Petrit Ademit i është caktuar masa e paraqitjes në Polici.

Ky vendim është kryekëput politik e arbitrar. Arbitrariteti në këtë rast përcillet më shkelje flagrante të procedurave penale e gjyqësore. Gjatë këtyre 3 muajve nuk është paraqitur asnjë provë kredibile që i lidh aktivistët me veprën për të cilën po akuzohen e hetohen. Ndërkohë që pavarësisht kësaj gjykatësi ia pranon secilën kërkesë të prokurorit të rastit Avdurrahman Islami që 5 aktivistët të mbahen nën arrest për të katërtin muaj. Ky prokuror që i kërcënon aktivistët duke ua shprehur dëshirën e tij sadiste që të gjithë të mbahen në burg, edhe pse nuk ka se si ta argumentojë këtë dëshirë të tijën, e shpërfaq më së miri se si funksionon regjimi autoritar, zaptues i organeve shtetërore, ndaj kundërshtarëve politikë, e konkretisht Lëvizjes VETËVENDOSJE!.

Kujtojmë po ashtu se nga ky proces i padrejtë gjyqësor, brenda ambienteve të burgut, aktivisti Astrit Dehari ka humbur jetën në rrethana të pasqaruara, e për çfarë deri më tani askush nuk ka marrë përgjegjësi. Pas vdekjes së tij të dyshimtë, institucionet përkatëse gjithashtu kanë bërë një sërë shkejesh procedurale, duke problematizuar edhe më shumë zbardhjen e këtij rasti.

Ky vendim sikurse i tërë procesi është i padrejtë, i pabazuar, dhe shkelje flagrante e të drejtave qytetare, dhe lirisë politike e kolektive. Shteti i kapur është vënë kundër Republikës. Dhe po e sulmon atë vazhdimisht, duke ia sulmuar popullin Republikës me vendime arbitrare gjyqësore, me cenim të lirisë, e mos garantim as të sigurisë minimale në [elitë e burgut. Kjo është përndjekje klasike. Si e tillë bëhet dëshmi e gjallë e ndërtimit të një aparati autoritar shtetëror. Këtë nuk duhet ta lejojmë. Këtë nuk do ta lejojmë. Drejtësia do të vijë në vend. Krimi nuk mund e nuk do të fitojë.

Gjashtëmbëdhjetë ditë pas vdekjes së dhunshme të Astrit Deharit në burg, asnjë person nuk ka dhënë përgjegjësi. Në lidhje me këtë dhe me shkeljet e e të drejtave elementare në rastin Dehari, sot gjatë një konference për shtyp folën deputetët Driton Çaushi dhe Aida Dëeguti.

Në fjalën e tij, deputeti Çaushi numëroi katër prej parimeve fundamentale të Konventës Evropiane për të Drejtat e Njeriut, të cilat janë shkelur, e të cilat janë:

Neni 2, përkatësisht e drejta në jetë, dhe detyrimi i shtetit për të mbrojtur njeriun nga marrja e jetës sidomos kur ai është nën jurisdiksionin e tij direkt;

Neni 6, përkatësisht e drejta për një gjykim të pavarur dhe të drejtë, në të cilin shteti garanton të drejtën e viktimës për një hetim të shpejtë dhe të pacenuar nga interferimi politik;

Neni 8, përkatësisht e drejta në respektim të privatësisë dhe jetës private, në kuptim të detyrimit të shtetit për të mos i dhënë publikut informacione paragjykuese që ndryshojnë rrjedhën e procedurës penale kundër dikujt, përpara se ai të jetë gjykuar në mënyrë të plotë dhe të pavarur; dhe

Neni 3, përkatësisht e drejta e çdokujt për t’u mos keqtrajtur, trajtuar çndershëm, apo ushtruar trajtim degradues në qendrat e paraburgimit dhe të dënimit.

“Duhet qartësuar që Republika e Kosovës, në kuptim të Nenit 53 të Kushtetutës, është e detyruar që t’i respektojq vendimet gjyqësore të Gjykatës së Strasburgut erga omnes. Mosrespektimi i cilitdo standard të Konventës i interpretuar me vendim të Gjykatës së Strasburgut përbën shkelje jo vetëm të Konventës por edhe të vet Kushtetutës së Kosovës”, deklaroi ndër të tjera Çaushi.

Kurse, deputetja Aida Dërguti theksoi që sa i takon të drejtës në jetë në kuptim të qendrave të paraburgimit dhe vuajtjes së dënimit ka disa raste kur Gjykata e Strasburgut i ka bërë përgjëgjës institucionet shtetërore.

“Në rastin Anguelova kundër Bullgarisë, Gjykata e Strasburgut vendosi standardin që vdekja në burg e Anguelova, ndër të tjera, vendoste përgjegjësinë ndërkombëtare mbi Bullgarinë për shkakun që ajo dështoi të hetonte në mënyrë objektive dhe gjithëpërfshirëse përgjegjësit e saj”, deklaroi Dërguti

Ajo shtoi se në këtë rast Gjykata kishte konstatuar që Bullgaria dështoi të respektonte parimin e sigurisë së deklaratave të dëshmitarëve, si elementë krucial në identifikimin e fajtorëve, dështoi të heqte dyshimet mbi kundërthëniet e shprehura në mes të shumë raporteve zyrtare, dhe vendimi i prokurorisë për të mbyllur hetimet ishte cilësuar krejtësisht i bazuar në bindjen e krijuar në opinionin publik e cila ishte paragjykuese.

“Një drejtim i tillë i ngjarjes përbën shkelje të Nenit 4, Nenit 5 dhe Nenit 6 të Konventës, dhe vesh Bullgarinë me përgjegjësinë për një shkelje të tillë”, tha Dërguti.

Gjithashtu, Dërguti deklaroi se Gjykata e Strasburgut ka përcaktuar detyrimin e shtetit sa i procesit të pavarur të hetimi në rastet e vdekjeve në qendra paraburgimi, duke përmendur rastin Jordan kundër Britanisë së Madhe. Këtu Gjykata e Strasburgut përcaktoi se hetimi i shtetit për vdekjen duhet të jetë plotësisht i pavarur.

Ajo tha se Gjykata e Strasburgut vendosi standardin që pavarësia e tillë duhet të sigurohet në kuptimin që:

• hetuesit e rastit të vdekjes në qendrën e paraburgimit duhet të mos kenë qenë më parë të përfshirë në asnjë rrethanë, qoftë edhe të lejuar, në rastin e viktimës;
• hetimi duhet të jetëi shpejtë, procesi hetues duhet të nxjerri të dhëna që mundësojnë atribuimin e përgjegjësisë së atyre që janë përgjegjës për vdekjen e tillë, e jo t’i shkatërrojnë të dhënat e tilla duke e mbyllur praktikisht rastin;
• hetimi të dërgojë në përcaktimin e shkakut dhe përgjegjësisë për vdekjen dhe dënimin e atyre që janë përgjegjës i) t’i mundësojë familjarëve pjesëmarrje në plotë në tërë procesin hetimor për t’i arritur interesat legjitime të viktimës.

Dërguti foli edhe për rastin Kelli dhe të tjerët kundër Britanisë së Madhe, me ç’rast Gjykata e Strasburgut gjithashtu kishte vendosur detyrimin që asnjë nga deklaratat e dëshmitarëve dhe detajeve të procesit të hetimit të vdekjes të mos lejohen të nxjerren në publik, përpara se ato t’i jenë nënshtruar në mënyrë të paanshme vlerësimit gjyqësor në praninë e të afërmëve të viktimës.

“Në të dyja rastet, Gjykata e Strasburgut vendosi që kishte shkelje të Nenit 2 (të drejtës në jetë) dhe Nenit 6 (të drejtës për një gjykim të drejtë dhe fer) për shkakun që shteti nuk kishte garantuar rrjedhjen e hetimit në një mënyrë që do të linte dozë të mjaftueshme të besueshmërisë për t’i nxjerrur fajtorët përpara drejtësisë”, përfundoi Dërguti.

Keqadministrimi i rastit të Deharit ka treguar që shteti Kosovës nuk e ka as synim e as praktikë drejtësinë e nuk po pyet për këto shkelje. Ky pushtet është i vendosur që të tentojë t i heshtë zërat që kërkojnë drejtësi. Por, këta zëra që e kanë tejkaluar Lëvizjen VETËVENDOSJE! është e vështirë të ndalen dhe drejtësia për këtë rast do të vijë.

Sot, avokati i familjes, z. Tomë Gashi, e ka marrë Raportin e Autopsisë. Aty konfirmohet se Astrit Dehari ka vdekur nga asfiksia mekanike, nga bllokimi i rrugëve të sipërme të frymëmarrjes nga mjeti i fortë.
Kryeprokurori z. Sylë Hoxha doli në konferencë shtypi me konstatime ende pa u bërë e pa u kryer hetimet.
Ekspertët e mjekësisë ligjore që i ka angazhuar familja, Dr.Besim Ymaj dhe Dr.Besim Latifaj, kanë qenë të pranishëm gjatë obduksionit, por nuk janë ftuar për të thënë fjalën e tyre dhe nuk u janë dhënë materialet bazë e provat, madje as fotografitë me ngjyra.
Në këtë Raport nuk shpjegohen lidhjet shkencore e logjike midis konstatimeve të shkakut të vdekjes (asfiksisë) dhe shkaktarit të vdekjes (dëmtime të vetëshkaktuara “hezituese”). Raporti është dhe konkluzioni i tij mbi shkaktarin e vdekjes është i pabesueshëm.
Do të nevojiten disa ditë që Dr.Besim Ymaj e Dr.Besim Latifaj ta analizojnë këtë Raport të Autopsisë dhe ta thonë mendimin e tyre, bazuar edhe në shënimet e tyre të vëzhgimit të obduksionit.

Ministria e Arsimit ka lëshuar një komunikatë për Lëvizjen VETËVENDOSJE! plot me pasaktësi. Prentendimi se Lëvizja VETËVENDOSJE! ka paralajmëruar protestë të nxënësve të Prishtinës është i pavërtetë. Lëvizja VETËVENDOSJE! nuk është organizatore e kësaj proteste dhe rrjedhimisht nuk ka bërë kurrfarë paralajmërimi për të. Aktivistët e Lëvizjes VETËVENDOSJE! sigurisht që mund të marrin pjesë në protestat me të cilat pajtohen dhe kjo është një prej tyre. Kërkesa për drejtësi për Astritin është kërkesë e të gjithë qytetarëve, e jo vetëm e VETËVENDOSJE!-s. Por jo edhe e shtetit të kapur e as e kapësve të shtetit.

Ministria e Arsimit e cila e akuzon padrejtësisht VETËVENDOSJE!-n për instrumentalizim të nxënësve, po e bën të njëjtën gjë vetë. Thirrja që ata të mos dalin në protestë është përpjekje për instrumentalizim direkt të tyre. Madje, Lëvizja VETËVENDOSJE! as nuk ka lëshuar ndonjë komunikatë siç ka bërë ky institucion i dobët i qeverisë.

MASHT-i që nuk e ka thënë asnjë fjalë për vdekjen e studentit Astrit Dehari që ka vdekur 13 ditë më parë në burg, konfirmoi në këtë rast se është vegël e keqpërdorur nga Qeveria duke tejkaluar kompetencat e veta kur u bën thirrje qytetarëve që të mos dalin në protestë. MAShT-i duhet të merret me politikat e arsimit e jo me policimin e nxënësve e mësimdhënësve. Madje, ky është edhe ofendim i rëndë që u bëhet qytetarëve duke i konsideruar ata si të manipulueshëm. Ky institucion në asnjë mënyrë nuk guxon t’u bëjë thirrje: nxënësve, mësimdhënësve, prindërve dhe drejtorëve të shkollave që të mos dalin në protesta. Ky është presion i hapur, shkelje elementare e të drejtave themelore dhe për më keq është pozicionim në anën e padrejtësisë. Këto janë shenja të shteteve autoritare.

Kjo komunikatë e MASHT-it nuk tregon asgjë tjetër, vetëm se kjo ministri është një instrument i drejtuar nga njerëz të paditur, pjesë të një Qeverie pa asnjë element të drejtësisë dhe që pas rastit të vdekjes së dhunshme të Astritit po tregohen edhe pa ndjeshmëri.

Sot, avokati i familjes, z. Tomë Gashi, e ka marrë Raportin e Autopsisë. Aty konfirmohet se Astrit Dehari ka vdekur nga asfiksia mekanike, nga bllokimi i rrugëve të sipërme të frymëmarrjes nga mjeti i fortë.

Kryeprokurori z. Sylë  Hoxha doli në konferencë shtypi me konstatime ende pa u bërë e pa u kryer hetimet.

Ekspertët e mjekësisë ligjore që i ka angazhuar familja, Dr.Besim Ymaj dhe Dr.Besim Latifaj, kanë qenë të pranishëm gjatë obduksionit, por nuk janë ftuar për të thënë fjalën e tyre dhe nuk u janë dhënë materialet bazë e provat, madje as fotografitë me ngjyra.

Në këtë Raport nuk shpjegohen lidhjet shkencore e logjike midis konstatimeve të shkakut të vdekjes (asfiksisë) dhe shkaktarit të vdekjes (dëmtime të vetëshkaktuara “hezituese”). Rrjedhimisht, raporti është dhe konkluzioni i tij mbi shkaktarin e vdekjes është krejt i pabesueshëm.

Do të nevojiten disa ditë që Dr.Besim Ymaj e Dr.Besim Latifaj ta analizojnë këtë Raport të Autopsisë dhe ta thonë mendimin e tyre, bazuar edhe në shënimet e tyre të vëzhgimit të obduksionit.

Pasi që ishin bërë dhjetë ditë nga vdekja e aktivistit Astrit Dehari në Qendrën e Paraburgimit në Prizren, dhe institucionet e rendit dhe drejtësisë nuk dhanë kurrfarë sqarime për vdekjen përveçse deklarata kontradiktore e të pamatura, Lëvizja VETËVENDOSJE! mblodhi 40 nënshkrime për thirrjen e një seance të jashtëzakonshme parlamentare. Kërkesa në emër të Lëvizjes VETËVENDOSJE! dhe e mbështetur nga AAK e NISMA, si dhe disa deputetë të mazhorancës, u dorëzua nga Visar Ymeri me datën 15 nëntor pranë Kryesisë së Kuvendit.

Kërkesa ishte për seancë të jashtëzakonshme në lidhje me zhvillimet e fundit hetimore në rastin e vdekjes së të praburgosuri Astrit Dehari në Qendrën e Paraburgimit në Prizren, përmes të cilës synohej edhe nxjerrja e një rezolute që kërkon hetim të pavarur për rastin, marrë parasysh administrimin e keq që i është bërë rastit nga organet kompetente vendore.

Si pasojë e trysnisë nga pushteti, në mënyrë të koordinuar, me të filluar mbledhja e Kryesisë së Kuvendit që kishte në rend të ditës shqyrtimin e kësaj kërkese, shefit të Grupit Parlamentar të VETËVENDOSJE!-s, Glauk Konjufca, vjen njoftimi nga administrata për tërheqje të nënshkrimit nga deputeti i PDK-së, Bislim Zogaj.

Më pas, kur u zëvëndësua nënshkrimi i deputetit Zogaj, Kryesia e Kuvendit neglizhoi mbajtjen e mbledhjes së rradhës së Kryesisë së Kuvendit të kërkuar nga ne, duke mundësuar që të ushtrohet trysni edhe ndaj deputetëve të tjerë për tërheqje nënshkrimi. Si pasojë e kësaj, deputeti Danush Ademi nga Grupi 6+ dhe deputeti Veton Berisha nga LDK tërhoqën po ashtu nënshkrimet e tyre.

Arsyetimet në të tri rastet ishin përafërisisht të ngjashme, duke thënë që e shohin të udhës të pritet raport nga organet e hetuesisë dhe të merret vesh me shumë për rastin. Por, ky ishte vetëm arsyetimi formal e publik, pasi që në bisedat private me deputetët e opozitës, ata kanë pranuar trysninë që është ushtruar ndaj tyre nga partitë e koalicionit qeverisës – PDK e LDK.

Gjatë ditës së sotme, u mbajt mbledhja tjetër e Kryesisë së Kuvendit, duke e pasur parasysh tërheqjen e dy nënshkrimeve, ku ne bojkutuam mbledhjen, kurse AAK e lëshoi mbledhjen.

Pas kësaj, filloi edhe seanca e rregullt e Kuvendit, ku fillimisht mori fjalën Kryetari i Lëvizjes VETËVENDOSJE!, Visar Ymeri,  i cili deklaroi edhe një herë se vdekja e Astrit Deharit është përgjegjësi e institucioneve të Qeverisë së Ksoovës, duke shtuar se qytetarët e Kosovës sot e kanë humbur besimin e drejtësisë nga këto institucione.  Gjatë kësaj kohe, deputetët e Lëvizjes VETËVENDOSJE! shpalosën një pano me mbishkrimin “DREJTËSI!” para foltores së Kuvendit.

Më pas, Shefi i Grupit Parlamentar, Glauk Konjufca, propozoi në përputhje me Nenin 49 të Rregullores së Kuvendit, që kërkesa për seancë të jashtëzakonshme të shqyrtohet si çështje urgjente, për çfarë pati mbështetje nga dy partitë opozitare, AAK e NISMA, por jo edhe nga LDK e PDK. E në votimin që u mbajt në mungesë kuorumi, votuan 45 deputetë, prej të cilëve 25 votuan për, 16 ishin kundër dhe 4 nga ta abstenuan.Pas gjitha këtyre, përcjellë edhe me shkelje të shumta procedurale, Lëvizja VETËVENDOSJE! lëshoi seancën  e rregullt.

Lëvizja VETËVENDOSJE! konsideron se Kuvendi nuk po tregon gatishmëri për të diskutuar për vdekjen e aktivistit Astrit Dehari, e rrjedhimisht po kërkon që të heshtet vdekja e tij, për të cilën është përgjegjës shteti i Kosovës. Ne do të vazhdojmë përpjekjen tonë që kjo çështje të diskutohet, dhe në vazhdimësi do të angazhohemi që ky rast të zbardhet dhe drejtësia të vendoset.