Sot në Gjilan, opozita e bashkuar mbajti tubim mobilizues me gra, në kuadër të përgatitjeve për protestën e ardhshme kundër marrëveshjeve të dëmshme për Kosovën dhe kundër kësaj Qeverie që e ka shkelur Kushtetutën e vendit.

Para të pranishmeve folën Nënkryetarja e VETËVENDOSJE!-s, Fatmir Mulhaxha – Kollçaku, Kryetarja e Aleancës së Gruas, Magbule Shkodra, Kryetarja e Nismës së Gruas në Gjilan, Ajshe Matoshi, si dhe deputetet Donika Kadaj-Bujupi, Valdete Bajrami dhe Besa Baftiu.

Në këtë tubim u fol për rolin e gruas në ndryshimet politike në Kosovë ndër vite, si dhe për nevojën e rritjes së angazhimit në këtë fazë, ashtu që të gjithë bashkërisht t’i ndalim marrëveshjet që e cenojnë sovranitetin e Republikës së Kosovës. Tash e disa muaj, opozita është bashkuar kundër proceseve të dëmshme për Kosovën, dhe me aktivitete të shumta ka kundërshtuar vazhdimisht marrëveshjet e 25 dhe 25 gushtit. Nga data 23 dhjetor jemi në situatë të re, meqë edhe Gjykata Kushtetuese ka konstatuar se Qeveria e Kosovës i ka shkelur 23 nene të Kushtetutës me marrëveshjen për “Zajednicën”. Prandaj, kjo Qeveri nuk ka më as legjitimitet e as legalitet të udhëheq me vendi. Largimi i saj është i domosdoshëm. Këtë e kërkoi populli i Kosovës fuqishëm më 9 janar, e edhe më fuqishëm do ta kërkojë më 17 shkurt të këtij viti.

Gratë pjesëmarrëse në këtë tubim u shprehen të revoltuara me mënyrën e qeverisjes së këtij pushteti, qeverisje kjo që i ka sjellë dëme të mëdha Republikës së Kosovës. Ato u shprehen gatshme për angazhim të përbashkët në protestën tonë të drejtë, deri në anulimin e marrëveshjeve dhe deri në largimin e kësaj qeverie.

“Mirupafshim më 17 shkurt”, ishte emëruesi i përbashkët i folëseve në këtë tubimi.

31 janar 2016
Opozita e bashkuar – Gjilan

Sot në kohën kur po mbahej seanca e rregullt e Kuvendit Komunal në Malishevë, policia rrethoi ndërtesën e e Kuvendit dhe më pas arrestoi asmableistin e VETËVENDOSJE!-s, Valon Hoti.

Pushteti përmes policisë së instrumentalizuar futet dhunshëm në mjediset e Kuvendit Komunal duke bërë presion ndaj Komunës së Malishevës dhe asambleistëve të saj madje,dhe duke arrestuar njërin nga ta si hakmarrje ndaj qëndrimit që ky Kuvend kishte nxjerrë, në kundërshtim të marrëveshjeve të dëmshme për Kosovën që dolën të jenë edhe antikushtetuese.

Malisheva si kurrë më parë është bashkuar rreth kauzës në mbrojtje të sovranitetit dhe Republikës, e veprimi i sotëm i regjimit nuk mund as ta frikësojë e as ta zmbrapsë këtë vullnet.

Opozita e bashkuar në Malishevë dënon ashpër këtë akt tinëzar dhe qyqar të orkestruar nga pushteti në theqafje, i cili tashmë në panik ka filluar të futet edhe në ndërtesat dhe institucionet që përfaqësojnë vullnetin e lirë të qytetarëve.

Këtij regjimi po i numërohen orët dhe do t’i jepet goditja përfundimtare nga qytetarët e Kosovës. Ne nuk do të ndalemi. Qytetaret çdo ditë e më tepër po bashkohen rreth kauzës sonë dhe kështu së bashku do të vazhdojmë derisa ta ndalim degradimin e Republikës sonë.

29 janar 2016
Opozita e Bashkuar – Malishevë

Posta dhe Telekomi i Kosovës është ndarë nga Serbia 55 vjet më parë. E tash, për herë të parë, me nënshkrim të Qeverisë së Kosovës, operatori shtetëror serb kthehet në Kosovë. Dhe kjo bëhet kinse për kodin telefonik, për të cilin aplikon Austria me pëlqimin e Kosovës dhe Serbisë. Me marrëveshjen për telekomunikacion, Kosova u betonua në një rajon që formalisht gjendet nën sovranitetin e Serbisë (të paktën në sektorin e telekomunikacionit). Peticionin kundër kësaj marrëveshjeje, kundër të gjitha marrëveshjeve të 25 gushtit me Serbinë, dhe kundër marrëveshjes për demarkacion me Malin e Zi, e kanë nënshkruar 205.254 qytetarë.

Protesta e thirrur nga Opozita e Bashkuar, u bë një protestë gjithëqytetare. Pjesëmarrja e qytetarëve ishte masive si kurrë më parë. Opozita falenderon dhe shprehë mirënjohje për të gjithë qytetarët, anëtarët e simpatizantët e subjekteve opozitare për pjesëmarrjen e tyre në këtë protestë.

Para disa ditësh Isa Mustafa tha se do ta zbatojë “Zajednicën” pavarësisht vendimit të Gjykatës Kushtetuese. Ai tha se opozita nuk ka mbështetje dhe se nuk po i dalin njerëzit në protesta.

Sot, qytetarët ia dhanë përgjigjen qeverisë Mustafa, duke dalë në protestën më të madhe të zhvilluar në Kosovë që prej pasluftës. Rreth 100.000 pjesëmarrës i kanë mbushur rrugët dhe sheshet e Prishtinës, të ardhur nga gjithë qytetet e fshatrat e Kosovës, si dhe nga vise të tjera nga trojet shqiptare dhe nga diaspora.

Organizimi i protestës ka qenë tepër korrekt. Siç u tha edhe në tubimin e sotëm, protestuesit vetë shënojnë ardhjen e një kohe të re për Kosovën, e për të gjithë, pa dallim.

Policia që prej orëve të para të ditës në disa raste ka provokuar protestuesit duke ndalur shumë autobusë e duke i penguar qytetarët të vijnë në Prishtinë.

Në përmbyllje të protestës, shumë qytetarë kanë reaguar spontanisht duke protestuar me vendosmëri ndaj ndërtesave qeveritare. Mllefi i qytetarëve që po shprehet në përballje me policinë është rezultat i insistimit të Isa Mustafës për të ruajtur Zajednicën dhe pushtetin e vet personal. Ne shprehim keqardhje për çdo incident, por nënvizojmë se shkaktari kryesor edhe i këtyre incidenteve është mos-reflektimi i qeverisë përballë reagimit kaq të fuqishëm qytetar.

Qeveria duhet ta dijë se pas gjithë zullumeve të saj, duke përfshirë edhe shkeljen e vetë Kushtetutës, është vështirë që qytetarët do të mbeten të qetë. Zemërimi i qytetarëve është i drejtë. Për t’u qetësuar qytetarët, nevojitet dorëheqja e menjëhershme e qeverisë Mustafa.

Askush dhe asgjë nuk mund ta zbehë mesazhin që dhanë qytetarët e Kosovës sot me pjesëmarrjen e tyre masive në protestën e madhështore e paqësore kundër “Zajednicës”, demarkacionit dhe qeverisë antikushtetuese.

Protestat vazhdojnë!

Lëvizja VETËVENDOSJE!
Aleanca për Ardhmërinë e Kosovës
NISMA për Kosovën

Etja e pakufizuar për pushtet dhe dëshira e pangopur për pasuri janë karakteristikat më tipike të forcave që po e qeverisin aktualisht Kosovën.

Për të mirëmbajtur sistemin e tyre klientelist, partitë në pushtet, pra PDK e LDK kontrollojnë përmes bordeve të gjitha ndërmarrjet publike, autoritetet që me ligj janë të pavarura dhe institucionet kushtetuese. Po ashtu, përmes kontrollit të bordeve këto parti sigurojnë edhe zhvatjen që ia bëjnë ekonomisë sonë.
Në një llogari të thjeshtë, vetëm në bordet e KOSTT, Aeroportit të Gjakovës, Ibër-Lepencit, Infrakos-it, PTK-së, Trainkos-it, AKP-së, ARKEP-it dhe ZRRE-së janë plot 34 individë të cilët kanë lidhje të ngushta me partitë në pushtet si edhe me persona të caktuar të qeverisë. Kjo lidhje nuk është për ide e projekte, por për favore e për tendera.

Këta persona, emrat e të cilëve ne sot po i publikojmë, janë një hallkë e rëndësishme në zinxhirin urdhërues që varet prej Isa Mustafës dhe Hashim Thaçit.

Me këtë shtrirje të korrupsionit, me këtë kapje të të gjitha enteve e ndërmarrjeve, e institucioneve asnjëherë nuk do të mund të kemi një shtet të së drejtës, apo një shtet zhvillimor. Mungesa e efikasitetit ekonomik dhe ndarjes së drejtësisë do të jetë karakteristikë e përhershme e këtyre ndërmarrjeve dhe institucioneve, edhe pse ato kanë potencial.

Nuk po i bëjmë thirrje qeverisë t’i pastrojë bordet e institucionet prej njerëzve partiakë instrumente të korrupsionit, meqenëse ata në 16 vite kanë bërë vetëm të kundërtën. Por tashmë kemi kërkuar që Qeveria vetë të largohet, dhe këtë do ta arrijmë edhe nëpërmjet protestave që nisin në 9 janar.

E me qeverinë e re, këta që janë aty si duar të zgjatura të korrupsionit qeveritar nëpër borde e institucione, që e mbajnë peng Kosovën, nuk do të jenë më, ndërsa në vend të tyre do të jenë profesionistët, punëtorët dhe menaxherët, pra njerëzit e ndershëm e të guximshëm nga fushat përkatëse.

Të hënën, në datën 28 dhjetor 2015, aktivistë të Lëvizjes VETËVENDOSJE! kanë gjuajtur me vezë zëvendëskryetarin e PDK-së, Memli Krasniqin.

Memli Krasniqi, aktualisht Ministër i Bujqësisë në qeverinë e Isa Mustafës, është një prej mbrojtësve më të zellshëm të veprimeve kundër-kushtetuese të qeverisë. Ai ka mbrojtur marrëveshjet kriminale të nënshkruara nga qeveria, dhe ka justifikuar veprimet e dhunshme të cilat pushteti i ka ndërmarrë ndaj aktivistëve dhe deputetëve të opozitës.

Përndryshe, Memli Krasniqi si Ministër ka dështuar në çdo politikë të ndihmës ekonomike, të subvencionimit, apo të planifikimit zhvillimor për sektorin e bujqësisë, i cili është një prej sektorët e lënë pas dore edhe pse potencialin zhvillimor e ka të madh.

Për arsye të servilizmit të tij ndaj “shefave të mëdhenj”, për arsye të korrupsionit e të klientelizmit që e shoqërojnë këtë ministër kudo që shkon, si në Ministrinë e Kulturës ashtu edhe në Ministrinë e Bujqësisë, ai e meriton protestën e aktivistëve, dhe i meriton tërësisht vezët. Asnjë zyrtar i lartë i kësaj qeverie kriminale nuk do të mund të qëndrojë rehat, larg protestës së opozitës.

Gjatë zhvillimit të këtij aksioni gjashtë ose shtatë truproja të Memli Krasniqit kanë rrahur në mënyrën më brutale e më çnjerëzore, pa asnjë të drejtë, aktivistin Egzon Azemi. Dëshmitarë të kësaj rrahje u bënë shumë qytetarë, që kanë qenë duke kaluar në atë kohë në Rrugën “Rexhep Luci”. Më pas Egzon Azemi është dërguar në polici.

Egzon Azemi ka ushtruar një të drejtë themelore si qytetar, atë të protestës, dhe për këtë arsye askush nuk ka të drejtë ta privojë nga liria apo ta arrestojë. Kërkojmë menjëherë lirimin e aktivistit Egzon Azemi, dhe respektimin e të drejtave të tij.

Po ashtu, kërkojmë nga policia evidentimin dhe arrestimin e menjëhershëm të personave që e kanë rrahur aktivistin Egzon Azemi, të cilët janë truproja të Memli Krasniqit. Nuk guxojmë kurrë të lejojmë që truprojat “të bëjnë ligjin” në vendin tonë.

Gjykata Themelore në Prishtinë sot vazhdoi masën e arrestit shtëpiak për deputetin e Lëvizjes VETËVENDOSJE!, Albin Kurti, deri më 17 shkurt të vitit 2016. E njëjta Gjykatë, i shqiptoi sot masën 30 ditë paraburgim koordinatorit të sekretariateve të VETËVENDOSJE!-s, Nol Nushit.

Ky sistem i kapur i drejtësisë, është vënë në shërbim të kësaj Qeverie kriminale, e cila përmes marrëveshjeve antikushtetuese po do ta instalojë “Zajednicën” në Kosovës.

I bëjmë thirrje Qeverisë që t’i ndalë përpjekjet për ta shtypur opozitën. I bëjmë thirrje Gjykatave që të vihen në shërbim të Republikës, dhe t’i nxjerrin para drejtësisë kriminelët e pushtetit, ata të cilët shkelën Kushtetutën, e për të cilët nuk vlen asnjë ligj në Kosovë.

Pushteti nuk mbahet me represion ndaj opozitës. Ne nuk ndalemi. Përpjekjet tona për ta mbrojtur Republikën e Kosovës nga marrëveshjet e dëmshme dhe nga kjo Qeveria, nuk do të ndalen. Më 9 janar, populli i Kosovës do ta thotë fjalën e vetë.

28 dhjetor 2016
Lëvizja VETËVENDOSJE!

Opozita e bashkuar ka deklaruar dhe argumentuar se marrëveshja e 25 gushtit me Serbinë e nënshkruar nga Isa Mustafa dhe Aleksandër Vuçiq në Bruksel është në kundërshtim me Kushtetutën e Republikës së Kosovës dhe frymën e saj.

Rrjedhimisht kjo marrëveshje dhe ‘Zajednica’ në përgjithësi janë në kundërshtim me Kushtetutën dhe si të tilla janë të vdekura.

Isa Mustafa dhe Hashim Thaçi, si dhe koalicioni i tyre duhet të japin përgjegjësi për shkelje të Kushtetutës.

Këta shkelën Kushtetutën, dhe mashtruan qytetarët duke u përpjekur ta fshihnin këtë mashtrim. Po ashtu, ata kanë vënë në lajthitje Kuvendin e Republikës, duke tentuar dhunshëm ta bëjnë atë pjesë të shkeljes së tyre të rëndë.

Kundër argumenteve tona Isa Mustafa dhe Hashim Thaçi patën deklaruar se Zajednica është OJQ, është në përputhje me ligjet dhe Kushtetutën dhe se Dekretin për themelimin e saj do ta dërgonin në Gjykatën Kushtetuese.

Ata nën këto qëndrime antikushtetuese shpërfillën Peticionin e 205 254 qytetarëve, arrestuan deputetët tanë, aktivistët e qytetarët protestues.

Ata na akuzuan se po shkelim ligjin teksa kishin shkelur thelbësisht Kushtetutën e vendit tonë, pra interesin tonë shtetëror.

Prandaj largimi i menjëhershëm i Mustafës dhe Thaçi është i domosdoshëm dhe më e pakta që duhet të ndodhë.

Lëvizja VETËVENDOSJE!
Aleanca për Ardhmërinë e Kosovës
NISMA për Kosovën

Ministri i Zhvillimit Ekonomik, Blerand Stavileci, është një nga përgjegjësit për shkatërrimin ekonomik të Kosovës. Ai bashkë me Kryeministrin Isa Mustafa, u tërhoqën nga Ligji për Trepçën, meqë një gjë të tillë e kërkoi Beogradi.

E për t’i shkuar edhe më për shtati politikave të Serbisë mbi Kosovën, Ministri Blerand Stavileci dje në Beograd nuk guxoi asnjëherë ta përmend fjalën Republikë, pra nuk guxoi të thotë “Republika e Kosovës”, përderisa në anën tjetër Marko Gjuriq vazhdimisht i referohej Kosovës si Kosovë e Metohi.

Aktivistët e VETËVENDOSJE!-s sot e gjuajtën me vezë këtë ministër, për t’i treguar edhe njëherë Qeverisë së Kosovës që pa u tërhequr nga marrëveshjet me Serbinë dhe demarkacioni me Malin e Zi nuk do të ketë qetësi dhe rehati për ministrat e saj.

22 dhjetor 2015
Lëvizja VETËVENDOSJE!

Të nderuar anëtarë të Këshillit të Përgjithshëm
Të shumërespektuar aktivistë mysafirë të kësaj mbledhjeje të Këshillit
Të dashur aktivistë e simpatizantë,
Zonja e zotërinj

Që prej se jemi takuar herën e fundit, e kemi kaluar një kohë jashtëzakonisht aktive. Po i lëmë prapa plot 4 muaj të protestës së vazhdueshme, angazhime tw aksionit politik e të ballafaqimit.

Këta muaj të ballafaqimit janë muajt më intenziv të Lëvizjes sonë. Janë muajt që e definojnë 10 vjeçarin e organizatës sonë. Por jo vetëm kaq. Këta janë muajt që po e definojnw të ardhmen e Kosovës dhe rrjedhimisht të ardhmen e Lëvizjes në të.

Dhe të tillë do të jenë edhe muajt që po vijnë.

Republika e Kosovës po vazhdon të kërcënohet nga “Zajednica” e Serbisë. Territori i kësaj Republike po vazhdon të kërcënohet me tkurrje nga marrëveshja për demarkacionin me Malin e Zi. Qeveria e policëve po vazhdon të egërsohet e të kërcënojë. Po hyjmë në një fazë të definimit të qartë të pozicioneve brenda shtetit tonë.

Populli i Kosovës bashkë me Opozitën e Bashkuar në njërën anë duke e kundërshtuar formalizimin dhe konsolidimin e ndërhyrjes së Serbisë brenda territorit, institucioneve, pasurisë, resurseve të Republikës së Kosovës. E treshja Mustafa – Thaçi – Veseli në anën tjetër duke e luftuar këtë kundërshtim, duke e keqpërdorur aparatin shtetëror, polici, gjyqësi, për të vënë atë në funksion të hapjes së rrugës për këtë ndërhyrje të Serbisë.

Situata është tejet e qartë dhe po qartësohet përherë e më shumë.

Kohëve të fundit klika Mustafa – Thaçi janë duke e shqyrtuar mundësinë e ndarjes formale të Trepçës në dy ndërmarrje funksionale. Njëra në veri e tjetra në jug. Kështu vepron “Zajednica”. Kështu duket “Zajednica”. Dhe për këtë po insistohet të themelohet ajo. Që resurset e Kosovës të jenë në kontroll juridik të Serbisë, përmes kreaturës institucionale të saj në Kosovë, “Zajednicës”.

Ndarja e Trepçës në dysh nënkupton përgjysmim të kapaciteteve të saj, dhe përgjysmim të potencialit të saj profit për Republikën e Kosovës.

Ashtu siç po e ndajnë sistemin e energjisë, atë të telekomunikacionit, tregun e mallrave, buxhetin e vendit, ashtu “Zajednica” po kërkon ta ndajë edhe potencialin industrial, turistik, e minerar të vendit.

Ndërkohë që Serbia tashmë ka filluar ta kërkojë kontrollin mbi hapësirën ajrore të Kosovës, si dhe të ndërhyjë dretpërdrejt në menaxhimin e Parkut Nacional të Sharrit.

Mustafa e Thaçi, si bashkëpunëtorë në këtë rast të Vuçiqit e Daçiqit po i kalojnë pasuritë e Kosovës në pronësi faktike të Sërbisë pjesë – pjesë. Njëlloj, sikur hajni që e shet makinën e vjedhur pjesë – pjesë.

Kjo është mendësia politike e cila është ulur këmbëkryq tash e 8 vite pavarësi në institucionet e Kosovës. Mendësi politike që karakterizohet nga serviliteti, inferioriteti e qyqarllëku ndaj atyre lart, dhe egërsia dhuna e brutaliteti ndaj atyre poshtë. Kështu Thaçi e Mustafa dhe të tjerët si ata që bartin këtë mendësi politike janë jashtëzakonisht të nënshtruar politikisht e intelektualisht ndaj çdokujt dhe çdogjëje jashtë Kosovës, për ta kompensuar pastaj këtë inferioritet e servilizëm me egërsi brenda.

Serbisë i bëjnë koncensione qoftë në sovranit mbi territorin qoftë në sovranitet mbi resurset, e ato që mbeten egërsisht, brutalisht e primitivisht i ndajnë mes vete. Nënshkruajmë marrëveshje shtetrrënuese jashtë sepse ashtu po ua kërkokan, e pastaj arrestojnë deputetë, rrahin e keqtrajtojnë aktivistw, arrestojnë qytetarë për t`i zbatuar këto marrëveshje.

Çfarëdo nërhyrje politike e Serbisë në Kosovë, e lehtë apo e rënduar qoftë ajo, përherë ka kërkuar të burgosur politik. Edhe sot që Serbia me Zajednicë po e ndan Kosovën, Mustafa e Thaçi me prokurorë e gjykatës po mbajnë të burgosur politik. Albin Kurti, Albulena Haxhiu, Faton Topalli, Finsnik Ismajli, Ismajl Kurteshi janë deputetët e VETËVENDOSJES!-s që aktualisht gjenden në burg. Besa Baftiu, Aida Dërguti e Glauk Konjufca po ashtu janë arrestuar nga policia në Kuvend.

Valdrin Ahmeti, Egzon Balaj, Pajtim Demaj, Veron Hasani, Kushtrim Avdimetaj
Trim Gashi, Besnik Zeqiraj – janë aktivistë të arrestuar që kanë mbajtur paraburgim – disa prej tyre vazhdojnë të mbahen në paraburgim.

Egzon Azemi, Ardian Huli, Luan Hoti, Durim Elshani, Valmir Osmanaj, Arianit Manxhuka. Agron Kabashi – janë aktivistë të cilët ishin mbajtur në burg dhe tash janë në arres shtëpiak. Poashtu edhe Artan Abrashi, Zgjim Hyseni e të tjerë që kishin kaluar nëpër duart e policisë e veçanërisht rreth 100 që u arrestuar më 28 nëntor ditën e ndërhyrjes brutale të policisë në zyret e Lëvizjes VETËVENDOSJE!
Po ta bëjmë një llogari të thjeshtë, vetëm muajt e fundit janë mbajtur rreth 1020 ditë nga aktivistë të Lëvizjes VETËVENDOSJE! Kjo i bie, afërsisht 3 vite burg përgjatë këtyre muajve të protestave që kemi qenë bashkë të angazhuar.

Dhe pastaj thonë duam të dialogojmë. I kemi dëgjuar disa herë edhe Mustafën, edhe Thaçin, bashkë me Jahjagën e cila është qind përqind vegël e kësaj mendësie politike, dialogun po e kërkojnë sa për ta maskuar këtë të vërtetë të tyre politike Dialogun po e duan ashti siç e do Serbia dialogun me Kosovën: dialog pa kushte nga Kosova dhe dialog “Zajednicën”.

Nuk ka dialog për “Zajednicën” sepse nuk mund të ketë dhe nuk do të ketë “Zajednicë”. Kundër “Zajednicës” dhe sponsorizuesve e lehtësuesive të saj ka vetëm ballafaqim politik, angazhim protestues, e vetëmohim deri në anulimin e saj.

Dialogu sot do të nënkuptonte marrëveshje për themelimin e “Zajedenicës” e marrëveshje për legjitimimin e këtij pushteti policor, me shtetin e tij të kapur. Do të nënkuptonte mohim i tërë përpjekjes sonë të përbashkët, mohim i vullnetit të qytetarëve i shprehur përmes peticionit e protestës, si dhe mohim i interesit të Republikës ashtu siç e kemi identifikuar bashkërisht.

Nuk mund të jetë as në interes të Republikës dhe as të popullit të kësaj Republike sepse në interes të populli të kësaj Republike është republika e barazisë, e zhvillimit, mirëqenies dhe e bashkimit. Jo Republikë që ndan resusre, ndan territore dhe që arreston e burgos qytetarët e saj. Një Republikë e cila do ta krijonte hapësirën e domosdoshme të lirisë, punës dhe zhvillimit për qytetarët e vet dhe jo një republikë e cila krijon hapësirën e kërkuar nga shteti armik i kësaj Republike, nga Serbia përmes “Zajednicës”. Një “Zajednicë” të tillë dhe një republikë të tillë nuk do të lejojmë që të zbatohet në Kosovë sepse në Kosovë mund të ketë vetëm një Republikë dhe ajo është Republika e këtij populli, e këtyre qytetarëve, dhe Republika e cila ua mundëson mirëqenien këtyre qytetarëve.

Manifestimit të Opozitës së Bashkuar për Republikën dhe kundër marrëveshjeve me Serbinë e asaj për demarkacionin me Malin e Zi, qytetarët e prizrenit i janë përgjigjur masivisht. Në numër shumë të madh ata sot kanë demonstruar vullnetin e tyre për t’i kundërshtuar këto marrveshje.

Marrëveshjet nuk do të kalojnë, Serbia nuk do të lejohet të kthehet në Kosovë dhe nuk mund t’i falim tokë askujt. Këto kanë qenë tri pikat kryesore gjatë fjalëve të mbajtura gjatë manifestimit në Prizren.

Sikur janarin e kaluar, edhe janarin që po vjen do të ketë protesta. Ato do të ndalen kur të tërhiqen marrëveshjet. Kjo qeveri duhet të reflektojë mbi alternativat tona që i kemi dhënë si Opozitë e Bashkuar. Nuk mund të na përgjigjen vetëm me polici gjithmonë.

Shumica e pankartave që mbaheshin prej pjesëmarrësve i drejtoheshin si thirrje e kërkesa Qeverisë së Kosovës, por disa iu drejtuan edhe policisë për shkak të arrestimve të shumta që po i bën opozitës dhe dhunës që ushtron ndaj tyre.

Qytetarët nuk do ta lejojnë zbatimin e marrëveshjeve, por as nuk do ta tolerojnë gjatë një qeveri e cila në formën më të papërgjegjshme nënshkroi marrëveshje tepër të dëmshme për shtetësinë e Kosovës.

Prizreni sot dëshmoi se marrëveshjet kriminale nuk do të kalojnë.

Gjykata Themelore e Prishtinës, me një trupë gjykuese të udhëhequr nga gjyqtari Beqir Kalludra ka vendosur që të zgjasë edhe për dy muaj mbajtjen në paraburgim të deputetëve të Lëvizjes VETËVENDOSJE! që janë Albin Kurti, Albulena Haxhiu dhe Faton Topalli. Po ashtu, është vazhduar edhe për dy muaj arresti i shtëpisë për deputeten e Aleancës për Ardhmërinë e Kosovës, Donika Kadaj-Bujupi.

Është i njëjti sistem i gjyqësorit, i cili në 16 vitet e pasluftës dhe në 8 vite të pavarësisë kurrë nuk ka nisur procese të tilla kundër korrupsionit dhe krimit të organizuar i cili është prezent në të gjitha nivelet e larta të politikës dhe ekonomisë në vend.

Ky gjyqësor sot po përdoret, pikërisht nga kriminelët në pushtet, që të mbajë pa asnjë të drejtë në burg deputetët të cilët ende kanë imunitet në bazë të mandatit të marrë nga votat e popullit.

Këta deputetë, të gjitha veprimet që i kanë bërë, i kanë bërë me ndërgjegje të plotë politike, për të ndalur marrëveshjet e dëmshme që i ka sjellë qeveria e paaftë, e korruptuar dhe e shantazhuar e Mustafës dhe e Thaçit. Pra sot ata janë të burgosur politikë.

Vendimi i padrejtë për të mbajtur në burg deputetët do të ketë një kosto të madhe për pushtetin. Ne nuk do të ndalemi së protestuari.

Kërkojmë të lirohen menjëherë deputetët dhe aktivistët e tjerë. Kërkojmë që qeveria të ndalë mbrojtjen me dhunë të marrëveshjeve të padrejta për Zajednicë dhe Demarkacion.
Protestat e janarit po afrojnë. Në ato protesta jo vetëm që do të ndalet zbatimi i marrëveshjeve, por do të ndalet edhe praktika e korruptuar sipas së cilës qeveria kontrollon gjykatat e policinë për të burgosur opozitën. Qeveria e re do të sjellë liri edhe për gjykatat e për institucionet e rendit, që sot janë të kapura në mënyrë skandaloze nga Qeveria e Rashkës dhe nga SHIK-u.

Seanca e sotme e improvizuar nëpër skuta i ka nxjerrë në pah tre gënjeshtarë të mëdhenj, të cilët edhe sot nuk hezituan të vazhdojnë ta mbulojnë diktaturën e tyre me fjalime hipokrite e patetike.

I pari foli ish shefi i SHIK-ut, i rehabilituar si kryetar i institucionit më të lartë të një demokracie parlamentare, siç është Kuvendi. Të gjithë e mbani mend kur, para pak ditësh Kadri Veseli betohej se kurrë nuk do të lejonte të hynte policia në Kuvend, dhe kurrë nuk do të përjashtohej opozita, për sa kohë që Ai, do të ishte kryetar kuvendi. E sot, Kadri Veseli bën thirrje për skanera specialë, ndërkohë që e ka mbushur sallën e Kuvendit me policë me maska gazi. Kadri Veseli ka urdhëruar kontrollin e deputetëve të opozitës, ndërkohë që shumë prej bashkëpunëtorëve të tij në SHIK, që sot janë deputetë e ministra të partive në pushtet, kurrë nuk janë kontrolluar e kurrë nuk janë hetuar. Kadri Veseli ka kërkuar sot edhe masa të shtuara represive kundër opozitës, sepse sipas tij policia nuk mjafton, edhe pse i kemi parë të gjithë arrestimet dhe ndërhyrjet policore ndaj opozitës dhe mbështetësve të saj.

Në seancën e turpshme ku partitë në pushtet u mblodhën të diskutojnë pasi e përjashtuan opozitën, kryeministri i Qeverisë së Rashkës, Isa Mustafa, ka përsëritur edhe një herë se kërkesat e opozitës për tërheqje të marrëveshjeve nuk janë të sinqerta, dhe kinse Opozita e Bashkuar paska kërkesa të tjera.

Kjo nuk është hera e parë që Mustafa e thotë të njëjtën gënjeshtër, pasi ai këtë gjë e ka pretenduar edhe në kohën kur Opozita protestonte kundër ministrit të tij me qëndrime raciste, Jabllanoviqit. Por veprimet opozitare gjithnjë kanë qenë të përgjegjshme, dhe kanë vërtetuar të kundërtën. Mjafton që Isa Mustafa të heqë dorë nga dy marrëveshjet e dëmshme për të ardhmen e Kosovës, dhe ne garantojmë se secili aktivist e secili deputet opozitar do t’i kthehet normalitetit.

Mashtruesi i tretë ishte Hashim Thaçi, personi i cili i ka ndërtuar gjithë këto marrëveshje të cilat tash i ka nënshkruar Mustafa. Thaçi ka deklaruar me pafytyrësinë më të madhe se me bllokimin e këtyre marrëveshjeve, opozita ia paska pamundësuar Kosovës përfitimin e 60 milion eurove. Sipas zëvendësit të Mustafës ia vlen ta ndërtojmë Republikën Serbe në Kosovë, me një çmim të tillë. Hashim Thaçi mendon se qytetarët i kanë harruar aferat me qindra milionë të cilat ai dhe njerëzit e tij i kanë përfituar nëpër privatizime shkatërruese të pronës publike. Vetëm kontrata që Hashim Thaçi ka lidhur për privatizimin e KEDS-it, ia ka vjedhur fitimin mbi një qarkullim prej 300 milionë eurosh në vit. E kësaj i shtohen qindra milionë prej shumë privatizimeve e koncesioneve të dyshimta. Pra Thaçi nuk duhet të na tregojë çmimin me të cilin duhet të shesim Kosovën përmes marrëveshjeve, por duhet të shkojë sa më parë në Gjykatë për korrupsionin masiv të partisë të tij, korrupsion që tashmë është bërë shqetësimi kryesor edhe i ndërkombëtarëve në Kosovë.

Këta tre zyrtarë po thonë se në emër të demokracisë do të përjashtojnë e do të arrestojnë opozitën. Këta po thonë se në emër të drejtësisë do të përndjekin opozitën dhe do të mbrojnë korrupsionin e tyre.
Por ne jemi të vendosur se marrëveshjet për “Zajednicë” e Demarkacion, nuk kalojnë! Opozita nuk ndahet! Normaliteti do të kthehet vetëm kur të kthehet demokracia! Protestat nuk ndalen!

Lëvizja VETËVENDOSJE!
Aleanca për Ardhmërinë e Kosovës
Nisma për Kosovën

Ky ministër para disa ditësh e ka krahasuar forcën më të madhe opozitare në Kuvendin e Kosovës me terroristët e ISIS.

Abrashi është një abuzues dhe ofendues, i cili ka etiketuar rëndë opozitën e vendit të tij, duke përdorur fjalë të njëjta me Serbinë. Sipas Abrashit, aktivistët që përdorin ngjyrë e vezë për të protestuar janë terroristë. Ndërkohë kolegët qeveritarë e partiakë të Abrashit mbajnë nëpër shtëpi e nëpër makinat e tyre arsenale armësh pa leje, dhe i përdorin këto armë për të shantazhuar qytetarët e policët, dhe për të mbrojtur aferat e tyre korruptive, për të cilat as nuk mundohen që t’i fshehin.

Përveç kësaj, Abrashi është një prej mbrojtësve më të zellshëm të “Zajednicës” dhe të marrëveshjeve qeveritare me Beogradin, të cilat po ndajnë e po dëmtojnë rëndë Kosovën.

Qeveria e Kosovës dhe zyrtarët e saj nuk do të mund të kenë rehati pa u tërhequr marrëveshjet me Serbinë dhe demarkacioni me Malin e Zi.

Kërkojmë lirimin e menjëhershëm të aktivistit të arrestuar nga Policia e Kosovës gjatë realizimit të këtij aktiviteti.

Aktivistët nuk do të ndalen, Zajednica nuk do të kalojë!

E arrestuam dhe Albulenën. Do krijojmë një parajsë për serbët dhe një rezervat burgu për cilindo mbron të drejtat në nivel kushtetues për shqiptarët. Me pjesëmarrjen e ndërgjegjshme të shqiptarëve të partive. Jo, shumë më keq: me pjesëmarrjen e heshtur të shqiptarëve veteranë dhe pacifistë. Sepse, në ndërgjegjen e tyre të lodhur, disa shqiptarë janë pacifistë dhe veteranë për sa i takon çështjes së tyre. U arrestua dhe Albulena. Nuk kishte si të mos arrestohej Albulena. Kështu, në mënyrë të heshtur, kemi arrestuar dhe të atin, dhe familjen, dhe të qenit deputete, dhe familjen e saj.

Dhe kur arrestohet Albulena më shkon mendja natyrshëm te votuesit e LDK-së, te baza e LDK-së. Sepse nuk e di me cilët janë ata? Me Ibrahim Rugovën apo me Isa Mustafën. Mendoj për anëtarin e thjeshtë të LDK-së, jo për atë që përfiton ditë për ditë prej dhunës mbi shtetin shqiptar të Kosovës. Anëtari i LDK-së, sipas filozofisë rugoviane e do paqen me çdo kusht. Anëtari i LDK-së sipas filozofisë së Isa Mustafës e do Serbinë brenda Kosovës me çdo kusht. Ditën kur arrestohet Albulena dhe historia e popullit rezistues të Kosovës, ka fituar Isa Mustafa mbi Ibrahim Rugovën. Le ta dijë këtë çdo aktivist e anëtar i LDK-së. Kështu e shohim ne të tjerët prej jashtë. E ta dijë që veç turpi i ka ngelë. Sepse kur vetëm 3% janë pro Zajednicës, duhet ta vlerësojë ky njeri skizofreninë e madhe në të cilën është zhytë: përpara atdheut, partia; përpara Rugovës, Mustafa; përpara historisë, Beogradi. E kur të jetë i qetë, në vetmi të vetë, le të shtrojë një pyetje të thjeshtë: sa për qind e shqiptarëve votojnë arrestimin e deputetëve që nuk e pranojnë Beogradin brenda Kosovës.

E pra pacifist rugovian: po e mbështet mirë vazhdimin e luftës me Serbinë. Qëkurse je me arrestimet që i bën qeveria e Mustafës opozitës ndaj dhënies së sovranitetit dhe territoreve, po e përgatit luftën. Nuk ka paqe më të keqe se dhuna që përgatit luftën. Të paktën pacifizmi i Rugovës përgatiti luftën çlirimtare. Dhuna e Isa Mustafës mbi opozitën po përgatit pushtimin. Dhe mos mendo o pacifist rugovian se të ka mbetë ndonjë lidhje me Rugovën. Je zhytë thellë në vite e ke ringjallë Rahman Morinën. Nga skutat më të thella të ndrydhjes e nxorre dhe njëherë të keqen dhe i dhurove mbështetje. Dhe nesër, kur gjërat të ndryshojnë mos më thuaj se Isa Mustafa ishte i vetmi fajtor.

E pas pacifistit vjen veterani, që po aq në majë të gishtit të Thaçit nuk sheh talljet me Jasharajt. Veterani, ose baza e PDK-së, me shpirtin e vet te lufta çlirimtare heshti para urës së Ibrit siç po hesht dhe Zajednicën. Përsëri partia para atdheut. Edhe njëherë degjenerimi i Jasharajve në formë Thaçi. Nga skutat më të thella të ndrydhjes erdhi shuarja e trimit. Nga trimat u kalua prapë te viktima. Albulena u arrestua. O veteran a më thua dot se kush po e arreston Albulenën? Janë po ata që goditën Gani Krasniqin. Po kush janë ata, nëse nuk i kanë marrë votat dhe mbështetjen tënde? E pra, ti që rri heshtur nën petkun e veteranit e ke arrestuar luftën dhe rezistencën.

E kështu me radhë. Heshtja e arreston drejtësinë dhe viktima e vret. Pacifizmi dhe veterani i heshtur, për ata mendoj tani.

Lufta e një populli nuk shuhet dot por vullneti i disa njerëzve shuhet prej interesit. Opozita sot është shumica. Është mirë që të ndihet zëri i veteranëve dhe pacifistëve që mos të përfundojmë në LDK Mustafash dhe në PDK Thaçësh. Sepse nuk mund të arrestohet një popull. Albulena e arrestuar është frika e të paktëve që janë vënë në shërbim të Beogradit dhe që fshihen pas jush, pas emrit tuaj, pas vullnetit tuaj të lodhur. Edhe pak duhej që vullneti i Bacës të kryhej. Por me heshtjen tuaj ju po na e shtyni projektin. Por, pa merak, heshtja juaj nuk kthen nga rruga popullin që është sot në opozitë. Albulena nuk është arrestuar, nuk është ndalur. Vullneti juaj është i arrestuar, ka ndalur së punuari. Mirë është të nisni e ta çlironi veten.

Autori është profesor i Filozofisë në Tiranë

Plani i Ahtisaarit ishte qartazi i keq për Kosovën dhe jo mjaftueshëm i mirë për Serbinë. Serbia e pranon Planin e Ahtisarit si dysheme a themel të Kosovës por jo edhe si tavan a kulm të tij. Ajo e do Kosovën shtet të hapur për Serbinë, shtet që i ulet vazhdimisht tavani në drejtim të dyshemesë apo që mbetet i pambrojtur sepse pa kulm. ‘Zajednica’ është faza e ardhshme dhe vendimtare e shtetrrënimit të Kosovës.

Dialogu që u zhvillua në vitet 2011 deri në 2014 me Serbinë, u vazhdua njësoj edhe në vitin 2015 – dialog sipas kushteve të Serbisë: të diskutohet për çështje të brendshme të Kosovës, pa u konsideruar Serbia si borxhli ndaj Kosovës dhe shqiptarëve. ‘Zajendica’ është pasojë e natyrshme e kësaj qasjeje të qeverisë së Kosovës. Cila është vlera e pavarësimit të Kosovës nëse bosnjëzimi e pason atë? Kjo qeveri gjithsesi duhet ndalur.

Normalizimi i marrëdhënieve midis Kosovës dhe Serbisë është veçse përshtatje dhe lejim. Përshtatje e Kosovës me Serbinë brenda saj dhe shtirje se kjo për të dyjat, edhe për Kosovën edhe për Serbinë, do të thotë përshtatje me Bashkimin Evropian. Pra, Kosova po përshtatet me strukturat shtetërore paralele të Serbisë, me ndarjen në lumin Ibër në Mitrovicë, me qëndrimin e Serbisë se serbët në Kosovë s’mund të jenë asnjëherë pakicë kombëtare etj. Normalizimi si përshtatje nuk është ndryshim i gjendjes, por ndryshim i qëndrimit tonë karshi gjendjes. Normalizimi nuk e bashkon Mitrovicën por na ndryshon neve karshi ndarjes atje.

Bashkimi Evropian njëmend na e ka konfirmuar perspektivën evropiane qysh në Samitin e Selanikut të vitit 2003. Mirëpo, premtimet e Brukselit për Ballkanin perëndimor ne nuk duhet t’i marrim më seriozisht sesa vetë ata. BE-ja ka hallet e veta të cilat sa vie rriten e shtohen. Për integrim dhe anëtarësim në BE, Serbia varet shumë nga Kosova. Ne mund ta lëmë tash Serbinë jashtë BE-së, ndërkaq më vonë, kur të hyjë ajo në BE para nesh, pikërisht Serbia do ta lë Kosovën jashtë.

Siç thotë një mik imi arkitekt, as çlirimi i Kosovës e as shpallja e pavarësisë së saj nuk na kanë pajisur me të drejtën për të planifikuar. Kosova vazhdon vetëm të zbatojë urdhëra të huaj të cilat ne i marrim si obligime që të mos i marrim si kërcënime. Planifikimi të bën subjekt politik e shtet sovran, që ka vizion për popullin e për shtetin, për shoqërinë e për ekonominë, për rininë e për dekadat që vijnë.

Në vazhdimësi na thuhet se jemi të dobët e të brishtë si shtet prandaj kemi Quintin, Zhbogarin, KFOR-in dhe EULEX-in, ndërkohë që edhe me të gjithë këta ne nuk po forcohemi por vetëm sa po vulosemi në pafuqinë tonë që po përjetësohet. Faktorët ndërkombëtarë në Kosovë e rreth Kosovës e preferojnë stabilitetin në Kosovë kundrejt drejtësisë, demokracisë dhe zhvillimit. Drejtësinë, demokracinë dhe zhvillimin ata jo vetëm që i shohin si ndërmarrje me rrezik por, madje, edhe si ndërmarrje të rrezikshme. Dhe, për të qenë edhe më keq, ky stabilitet në Kosovë vihet në funksion të stabilitetit rajonal, gjithnjë afatshkurtër.

Pushteti në Kosovë përherë insiston në rëndësinë e faktorëve dhe institucioneve ndërkombëtare, nirëpo për çështjen e ‘Zajednicës’, Presidentja Jahjaga e dërgoi atë në Gjykatën Kushtetuese të Kosovës dhe refuzoi ta bëjë këtë te Komisioni i Venedikut. Mirëpo, është e qartë si drita e diellit që as Presidentja dhe as Gjykata Kushtetuese nuk e kanë me ‘Zajednicën’ e Serbisë por me opozitën e bashkuar. Madje ato edhe i janë referuar në mënyrë eksplicite ‘bllokimit në Kuvend’ në tekstet e tyre.

Opozita e bashkuar është edhe opozitë edhe e bashkuar. Përballë nuk e ka vetëm një qeveri jodemokratike por edhe një regjim që ka kapur shtetin. Betejat do të jenë të vështira, por pa ato beteja nuk ka kalitje që do të na e sjell fitoren. E drejta është në anën tonë. ‘Zajednica’ e Serbisë dhe falja e tokës Malit të Zi nuk mund të kalojnë dhe nuk do të kalojnë. Sepse nuk ka ndryshuar Serbia që tash të ndryshojmë ne dhe nuk kemi as tokë as shtet për t’u dhënë të tjerëve. Betejat në javët e muajt në vijim përcaktojnë edhe fatin e brezave të ardhshëm.

Sot, kryetari i SHIK-ut të dyshuar por të pahetuar, njëkohësisht kryetar i Kuvendit të Kosovës, Kadri Veseli, bashkë me disa vartës të tij vizituan ambientet e Akademisë së Shkencave dhe Arteve të Kosovës.

Kryetari i kësaj Akademie, Hivzi Islami, kurrë nuk e ka përdorur prestigjin që ia jep institucioni të cilin e drejton për të kritikuar korrupsionin endemik dhe kapjen e shtetit prej kriminelëve të të gjitha llojeve. Ai kurrë më parë nuk ka folur për pushtimin partiak të institucioneve të pavarura, që nga gjyqësori e deri tek arsimi. Ky kryetar akademie kurrë nuk ia ka bërë një kritikë serioze shkatërrimit të kulturës, edukimit, shkencës edhe artit që vjen si pasojë e keqqeverisjes dhe e mentalitetit uzurpator që ka mbizotëruar në qeveritë e Kosovës prej pasluftës e deri tash. Hivzi Islami, i cili sot bën thirrje për “zgjidhje institucionale”, kurrë nuk e ka bërë një analizë kritike, apo qoftë edhe mbrojtëse të procesit të negociatave, apo të dy marrëveshjeve të fundit për Zajednicën e Demarkacionin, dy marrëveshje prej të cilave nuk humb opozita, por humb shumë gjithë Kosova.

Megjithatë, ky kryetar i heshtur i kësaj Akademie të fjetur, sot e ka përdorur autoritetin dhe prestigjin e postit të tij për të kërkuar dy gjëra.

Së pari, Hivzi Islami ka kërkuar rehabilitimin e një personi si Kadri Veseli, i cili ka futur në sallën e Kuvendit truproja, policë specialë e njësi të sigurimit, për të bërë presion mbi opozitën. Është i njëjti person që ka urdhëruar nxjerrjen e gjithë opozitës prej Kuvendit, dhe që ka futur në burg deri më tani tetë deputetë të opozitës. Hivzi Islami pra, sot i doli në krah dikujt që i ka drejtuar tytat e armëve opozitës, dhe e ka trajtuar atë si armike, duke shkatërruar kështu demokracinë.

Dhe së dyti, Hivzi Islami sot ka kërkuar më shumë mbështetje financiare, pra më shumë para për Akademinë. Këto para ia ka premtuar edhe Kadri Veseli, edhe vartësi i tij Arsim Bajrami.

Nuk mundemi të bëjmë gjë tjetër, veçse të ndjejmë keqardhje për derexhen ku e ka katandisur ASHAK-un kjo klasë kriminale pushtetarësh.

Sot, Qeveria Mustafa-Thaçi, arrestoi edhe një deputet të opozitës. Deputeti Pal Lekaj u dërgua para prokurorisë për shkak se ka kundërshtuar, së bashku me të gjithë deputetët e opozitës, “Zajednicën” dhe demarkacionin me Malin e Zi.

Ky rast, e shpërfaqë edhe njëherë hipokrizinë e Qeverisë së Kosovës. Ajo në njërën anë po do që të duket e hapur për dialog dhe qetësim të situatës ndërsa në anën tjetër nuk po e ndal represionin autoritar ndaj opozitës.

Është shumë e rëndësishme për Kosovën, që kjo Qeveri sa më parë ta kuptojë që nuk do të ketë rrugë tjetër përveçse të tërhiqet nga marrëveshjet me Serbinë dhe demarkacioni me Malin e Zi si dhe t’i lirojë të gjithë të burgosurit politikë. Sa më shumë që vonon, aq më i madh do të jetë çmimi për Kosovën.

Deputetët dhe aktivistët e burgosur politikisht duhet të lirohen menjëherë. Në të kundërtën, situata do të përkeqësohet dhe tensionohet edhe më shumë.

7 dhjetor 2015
Lëvizja VETËVENDOSJE!

Aktivistët e opozitës kanë realizuar një aksion simbolik para stacionit kryesor të policisë në Prishtinë ku përmes parullave kanë bërë thirrje për lirimin e aktivistëve e deputetëve të cilët po mbahet padrejtësisht në burgje.

Aktivisitja e Lëvizjes VETËVENDOSJE! Teutë Hasani ka përsëritur tri mundësitë që opozita ia ka dhënë Qeverisë në manifestimin për Repubilkën.
• Të tërhiqen marrëveshjet,
• Të dërgohen në Referendum ose
• Vendi të shkojë në zgjedhje
“Këto mundësi do ta tejkalonin këtë krizë, do ta kthenin normalitetin në vend, dhe mbi të gjitha, do të parandalonin copëtimin apo bosnjëzimin e Kosovës”, tha Hasani.
Sipas saj, Kryeministri Isa Mustafa këtyre nuk do të duhej t’iu përgjigjej me dhunë, por do të duhej të reflektonte dhe të vendoste për njërën nga to.

“Duam ta shprehim pakënaqësinë dhe shqetëzimin tonë në lidhje me arrstimin e deputetëve dhe suspendimin e opozitës. Arrestimi dhe suspendimi i tyre është akt jodemokratik. Ata, as askush nuk mund të arrestohen vetëm pse mendojnë ndryshe”, ka thënë Diellza Hoti nga Aleanca për Ardhmërinë e Kosovës.

Më tej, i është bërë thirrje policisë që të mos bjerë pre e ndikimeve partiake por të jetë në shërbim të qytetarëve. “Bastisja e zyrave të opozitës është element i sistemeve totalitare që botës i kanë sjellë vetëm shtypje dhe terror. Veprimet e jashtëzakonshme të opozitës janë normale në një situatë jonormale ka shtuar aktivisti i NISMËS për Kosovën, Endrit Hoxha.

Në Kuvendin e Serbisë, përveç dy deputetëve shqiptarë atje, nuk kishte asnjë deputet që ishte për anëtarësimin e Kosovës në UNESCO. Po ashtu, asnjë ministër a zëvendës-ministër në Qeverinë e Serbisë nuk ishte për anëtarësimin e Kosovës në UNESCO. Në anën tjetër, në Kuvendin e Kosovës shumica e deputetëve, për shkak të koalicionit PDK-LDK-Srpska, janë për ‘Zajednicën’ e Serbisë në Kosovë. Asnjë ministër a zëvendësministër i Qeverisë së Kosovës nuk doli kundër ‘Zajednicës’ së Serbisë! Pra, në Beograd politikanët serbë janë unikë kundër Kosovës dhe shqiptarëve. Në Prishtinë, ne politikanët shqiptarë jemi të ndarë rreth Serbisë dhe apetiteve të saj! Skena politike në Kosovë nuk është e ndarë si opozitë-pozitë për pushtet në Kosovë, por është ndarë për e kundër ‘Zajednicës’ nga shteti i Serbisë. Pyka në politikën kosovare është serbe.

Fushata kundër anëtarësimit të Kosovës në UNESCO është e keqja më e vogël që Serbia ia ka bërë Kosovës. Të këqijat e tjera që na i ka bërë e po na i bën Serbia janë më të mëdha e shumë më të mëdha se kaq, por ja që për ato asnjë fjalë asnjëherë nuk e thotë Qeveria. Mustafa e Thaçi heshtën edhe për bllokimin e librave shkollorë shqip në terminalin doganor në Preshevë. Ama bash asnjë fjalë s’e tha asnjëri prej tyre për nxënësit shqiptarë që mbetën pa librat shqip.

Veçse kjo heshtje e përgjithshme e Qeverisë së Kosovës gjithsesi e ka edhe një ambient të përshtatshëm në shoqëri e posaçërisht në medie. Disi edhe elitës kosovare vazhdimisht po duhet t’ua përkujtojë Serbia se kush është ajo. Elita kosovare është bërë porsi një kompjuter me RAM memorie pa hard disk. U kujtuan për Serbinë armike e keqbërëse, u kujtuan për ndërprerje ose ridimensionim të dialogut me Serbinë, vetëm pasi që Kosova nuk u pranua në UNESCO. Për elitën kosovare Serbia është e keqe vetëm nëse është vazhdimisht e keqe.

Jo rastësisht në thumb të kësaj elite prej opinionistësh ndodhet ‘dhuna opozitare’. Polarizimi aktual në Kosovë ka nxjerrur në pah diç shumë të rëndësishme: nëpër debatet televizive po demaskohen analistët! Në neutralitetin e tyre po shihet se kanë qenë bukur pranë qeverisë e mjaft larg opozitës. Shumica e këtyre opinionistëve neutralë doli se janë një hap larg qeverisë dhe pesë hapa larg opozitës! I këtillë na paska qenë neutraliteti i tyre. Ata kanë qenë të paanshëm në kuptimin që s’kanë qenë identik me pozicionin as të qeverisë dhe as të opozitës së bashkuar, mirëpo fare nuk kanë qenë të baraslarguar në këtë ‘paanshmërinë’ e tyre.

Të gjithë opinionistët e paanshëm që flasin një herë për ‘dhunën’ e opozitës së bashkuar apo të VETËVENDOSJE!-s do të duhej të flasin 10 herë për dhunën e plaçkitjes së dhomave të dëshmive në policinë e Kosovës ku u vodhën droga, ari dhe dosjet, apo jo? Por ja që këtë nuk e bëjnë pothuajse asnjëri prej tyre. Dhe, duhet kritikuar 20 herë ‘Zajednica’ e Serbisë dhe ‘Demarkacioni’ me Malin e Zi, 10 herë dhuna policore në rrugët e Prishtinës dhe nëpër stacione të policisë, e vetëm njëherë gazi e spreji lotsjellës në Kuvend si dhe gurët në duart e protestuesve të paarmatosur përballë policëve specialë të armatosur gjer në dhëmbë. Përndryshe, s’ka kuptim ky farë ‘opinioni neutral’.

Qeveria e Kosovës moti ia ka mbyllur me shul derën popullit të Kosovës andaj tash ai ia theu xhamat e dritareve asaj. Prona shtetërore e publike është uzurpuar nga kjo qeveri kuislinge e ‘Zajednicës’. Ne nuk po dëmtojmë diçka që është e popullit por diçka që i është marrur popullit, i është uzurpuar atij. Dëmet materiale nuk janë më dëmtime të pronës së popullit por dëmtime të qeverisë anti-popullore. Dhe, jo vetëm kaq. Të gjithë policët e lënduar në të kaluarën, të gjithë policët që mund të lëndohen në të ardhmen, duhet t’i kërkojnë llogari qeverisë pse nuk po tërhiqet prej pazareve të tyre me Serbinë dhe Malin e Zi ku Kosova shitet më lirë se badihava.

Qeveritarët kosovarë me në krye Isa Mustafën duket se janë të obsesionuar me pronat private dhe indiferentë ndaj territorit të shtetit. Pra, ata sillen si biznesmenë meskinë e jo si përfaqësues dhe dalzotës të popullit. Njëmend ‘Zajednica’ është pasojë e Marrëveshjes së 19 prillit 2013 para se të jetë e asaj të 25 gushtit 2015. Mirëpo, pa këtë marrëveshjen e Isës me Vuçiqin, ajo e Thaçit me Daçiqin nuk do të konkretizohej praktikisht. Sigurisht që strukturat shtetërore të Serbisë në Kosovë kanë mundur ta shpallin ‘Zajednicën’ e komunave me shumicë serbe. Mirëpo, çështja që shtrohet këtu është pse këtë shpallje t’ia bëjë ‘Zajednicës’ vetë shteti i Kosovës përkatësisht qeveria Mustafa?! Kur ta thyejnë këmbën, më mirë është të mos e vësh në gjips fare sesa ta vësh gjipsin e një kallëpi të gabueshëm i cili mandej do të detyrojë ta thyesh sërish këmbën, por asaj radhe t’ia thyesh vetes këmbën!

Nuk mund të rrinë në Kosovë edhe Republika jonë edhe ‘Zajednica’ e Serbisë. Prandaj do të bijnë ose Qeveria ose ‘Zajednica’ ose të dyja këto. Mustafa e Thaçi po i konsiderojnë pazaret e tyre me Serbinë e Malin e Zi sikur të ishin libra të shenjtë. Qeveria e Kosovës nuk po e mbron shtetin e Kosovës nga Serbia, por po e demonstron pushtetin e saj mbi opozitën. Këso nënshtrimi ndaj Serbisë moti s’ka pasur kush në Kosovë. ‘Zajednicën’ e Serbisë në Kosovë mund ta mbrosh ose nga gjendja e mazokistit ose nga pozita e serbofilit ose nga rrethana e të shantazhuarit.

Albin Kurti

29 nëntor 2015, burgu i Dyzit