Ne anëtarët e Grupit Punues dhe aktivistët e tjerë të Qendrës së Skenderajt, distancohemi nga deklaratat e pabaza të znj. Ajnishahe Halimi. Fillimisht, VETEVENDOSJE! në Skenderaj, ka pasur zyre edhe para ardhjes së znj. Ajnishahe. Transferimi i zyrës në pronën e saj është bërë për arsye të përfitimit personal dhe çdo vendim i tillë jo i drejtë, neve aktivistëve të Qendrës, na është transmetuar duke thënë “e di unë çka bëj, sepse kam folur edhe me Prishtinën për këtë”, deri atëherë kur ne e kemi kuptuar që kjo është një e pavërtetë dhe se ajo asnjëherë nuk është konsultuar me nivelin qendror të Lëvizjes. Është e pavërtetë që na kanë larguar nga zyra e mëparshme, por ndryshimi i zyrës është bërë me vendim të znj. Ajnishahe, për interes të saj. Pronari i zyrës së kaluar, Jeton Murtezaj, është ende i gatshëm të na e lëshoj zyrën e njëjtë.

Ne e kundërshtojmë tendencën që znj. Ajnishahe Halimi ka pasur në vazhdimësi që tërë aktivitetin e Lëvizjes VETËVENDOSJE! në Skenderaj t’ia atribuoj vetes së saj, duke e mohuar dhe duke mos e përmendur punën e palodhshme të gjithë atyre aktivistëve që janë angazhuar tash e 10 vite në Lëvizjen VETËVENDOSJE! në Skenderaj.

Në fund, znj. Ajnishahe ka vazhduar keqpërdorimet edhe këto ditë. Në një reagim të lëshuar dje gjoja nga Grupi i Punës i Qendrës së VETËVENDOSJE!-s në Skenderaj, znj. Halimi është thirrur në emra të aktivistëve që nuk janë pyetur fare për këtë reagim, dhe kjo është bërë pa njoftimin e tyre. Pra janë keqpërdorur nënshkrimet e tyre në mënyrë shumë jokorrekte. Konkretisht, Avni Ramadani dhe Imer Halili, në emrat e të cilëve është thirrur dje znj. Ajnishahe, nuk e kanë mbështetur deklaratën e lëshuar dje dhe nuk janë dakord me të.

Ne kemi raportuar për shkeljet dhe keqpërdorimet e Ajnishahe Halimit, dhe jemi të kënaqur që Lëvizja VETËVENDOSJE! ka marrë masat e duhura për t’i ndaluar këto keqpërdorime, prandaj e mbështesim fuqishëm vendimin e fundit për përjashtimin e saj nga anëtarësia e VETËVENDOSJE!-s.

Nga 8 anëtarët e Grupit Punues të Lëvizjes VETËVENDOSJE! në Skenderaj, 6 prej tyre janë plotësisht dakord me këtë vendim të VETËVENDOSJE!-s. Më poshtë i gjeni emrat tonë dhe të aktivistëve të tjerë që e dërgojnë këtë deklaratë:

Avni Ramadani – Anëtar i Grupit Punues dhe përgjegjës për financa

Hysni Mehani – Anëtar i Grupit Punues dhe përgjegjës për media

Florim Musliu – Anëtar i Grupit Punues

Besa Baliu – Anëtare e Grupit Punues dhe Koordinatore e Nënkomiteteve

Leonora Kadriu – Anëtare e Grupit Punues dhe përgjegjëse për Depart. e Votës

Imer Halili – Anëtar i Grupit Punues

Arton Dani – Delegat në Këshillin e Qendrës

Fitim Musliu – Koordinator i Pikës në fshatin Klinë e Poshtme

Blerim Dani – Koordinator i Pikës së fshatit Ticë

Hamide Zabeli – Aktiviste

Bahri Zabeli – Delegat nga Rezalla në Këshillin e Qendrës

Fidan Zabeli – Aktivist

Vjollca Ramadani – Aktiviste

Besart Ahmeti – Delegat nga Likovci në Këshillin e Qendrës

Abedin Fetahu – Aktivist

Granit Halili – Aktivist

3 prill 2015
—
Lëvizja VETËVENDOSJE! – Qendra Skenderaj

Sot, pas pranimit të një letërankese është mbledhur Komisioni Disiplinor, me ç’rast ka shqyrtuar letërankesën ndaj anëtarëve Ajnishahe Halimi dhe Arben Gecaj. Të njëjtët janë thirrur, por nuk i janë përgjigjur ftesës së Komisionit.

Më tej, Komisioni ka vazhduar punën lidhur me shqyrtimin e pretendimeve të përfshira në letërankesën e parashtruar. Me këtë rast Komisioni erdhi në përfundim se:

– Anëtarja Ajnishahe Halimi, duke abuzuar me detyrat e besuara ka krijuar favore financiare në kundërshtim me detyrat e saj, me ç’rast ushtrimi i këtyre detyrave është bërë nën rrethanat e konfliktit të interesit.

– Po ashtu, Anëtarët Ajnishahe Halimi dhe Arben Gecaj me paraqitjet e tyre publike kanë shkelur Nenin 24, paragrafi 1, Pikën c të Statutit përkitazi me respektimin e parimeve, dokumenteve themeltare të Lëvizjes VETËVENDOSJE!, Pikën ç lidhur me pranimin e vendimeve të shumicës dhe respektimin e mendimit ndryshe dhe pikën e, lidhur me mospërfshirjen në aktivitete apo sjellje që janë komprometuese për Lëvizjen VETËVENDOSJE! që e cenojnë imazhin e saj;

Për shkak të këtyre arsyeve, Komisioni duke u mbështetur në dispozitat e Nenit 88, Paragrafi 10 të Statutit të Lëvizjes VETËVENDOSJE! mori vendim që këtyre dy anëtarëve t’iu shqiptohet masa disiplinore nga Neni 88, Paragrafi 11, Pika ë: përjashtimi i plotë nga organet dhe anëtarësia e Lëvizjes VETËVENDOSJE!

2 prill 2015
Lëvizja VETËVENDOSJE!

Lëvizja VETËVENDOSJE! reagon sërish ndaj shpifjeve të reja të Ajnishahe Halimit në lidhje me gjoja keqpërdorime në Lëvizjen VETËVENDOSJE!.

Lëvizja VETËVENDOSJE! është subjekti më transparent dhe më korrekt në Kosovë sa i përket aspektit financiar. Të gjitha financat e Lëvizjes VETËVENDOSJE! janë të publikuara me kohë dhe sipas afateve e kritereve të përcaktuara nga KQZ-ja gjë për të cilën ne jemi cilësuar si subjekti më transparent dhe korrekt në aspektin financiar, nga organizatat e shoqërisë civile të cilat kanë bërë hulumtime në fushën e financave të subjekteve politike në Kosovë.

Për të dëshmuar me fakte se deklarimet e znj. Halimi janë tërësisht të pavërteta dhe qëllimkëqija, në këtë reagim po ua bashkëlidhim dy dokumente:

1. Dokumenti që dëshmon pagesën e rregullt të qirasë për zyrën qendrore të Lëvizjes VETËVENDOSJE! për të cilën znj. Halimi shpifë se nuk paguajmë qira dhe se qenka donacion.

2. Listën e pagave që i paguan Lëvizja VETËVENDOSJE, përmes bankës, ku po ashtu dëshmohet se pagat në Lëvizjen VETËVENDOSJE! jepen në mënyrë transparente dhe në përputhje të plotë me ligjin, për të cilat paga znj. Halimi prapë shpifë duke thënë se në Lëvizjen VETËVENDOSJE! administratorët paguhen në kesh e jo përmes xhirollogarisë.

Në çdo deklaratë të saj, Ajnishahe Halimi po e përgënjeshtron veten, duke tentuar që t’i ikë përgjegjësisë për keqpërdorimet e saj përmes shpifjeve joserioze si këto që po i shohim sot.

1 prill 2015
Lëvizja VETËVENDOSJE!

Në përkujtim të rënies së 10 anëtarëve të familjes Rama nga Kastrioti, deputeti i Kuvendit të Republikës së Kosovës nga radhët e Lëvizjes VETËVENDOSJE!, Rexhep Selimi, tha se ashtu siç e mbrojtën nderin kombëtar dëshmorët e kombit, ashtu edhe ne të gjallët duhet ta mbrojmë luftën dhe idealin e tyre. “Mbrojtja e luftës së drejtë të tyre sot mbetet sfidë përballë gjykimeve të padrejta. Ne duhet ta mbrojmë luftën e pastër çlirimtare. Kujtimi më i mirë për dëshmorët është mbrojtja e idealit, flamurit dhe atdheut për të cilin ata ranë”, tha ndër të tjera Selimi.

Sot, me datë 26 mars, një delegacion i Lëvizjes VETËVENDOSJE! dhe i Qendrës së Lëvizjes VETËVENDOSJE! në Viti, bëri homazhe tek varrezat e dëshmorëve të mbarë trojeve shqiptare në Viti.

Deputeti, Salih Salihu, në prononcimin e tij për këtë ngjarje tha se “26 marsi i vitit 2001 na përkujton një betejë të ashpër me forcat armike serbe si dhe luftën e Komandantit Njiazi Azemi (Komandant Mjekrra) që ra dëshmorë në njërën nga betejat dhe ngjarjet më të rëndësishme të luftës së UÇPMB-së.”

Sot, më 7 mars, në ditën e mësuesit, Qendra e Lëvizjes VETËVENDOSJE! në Prizren së bashku me “Qytetarët aktivë”, Shoqatën e Veteranëve të Arsimit dhe subjektet tjera opozitare ka organizuar protestë kundër degradimit të sektorit të arsimit në Prizren.

Edhe pas 128 viteve nga hapja e mësonjëtoreve të para shqipe, qytetarët e Prizrenit nuk mund të kërkojnë arsimim të mirëfilltë pa pasur problem me pushtetin. Përmes frikësimeve, shantazheve dhe kërcënimeve që ka bërë dhe po i bënë punëtorëve të arsimit, pushteti aktual me të gjitha mekanizmat e vetë po vazhdon ta luftoj çdo përpjekje për shprehje të pakënaqësisë qytetare për një jetë më të mirë dhe shërbime publike më të dinjitetshme. Drejtoria e Arsimit, drejtorët e shkollave dhe sindikatat e kapura të arsimit janë vënë në veprim për t’i zmbrapsur punëtorët e arsimit që të marrin pjesë në këtë protestë. Kjo gjë vendin tonë e kthen 128 vite prapa, kur kërkesa për arsimim konsideroj krim.

Drejtoria e Arsimit në Prizren është njëri nga sektorët më të kriminalizuar të qeverisjes së Ramadan Mujës. Që nga trashëgimi i pozitave nëpër shkolla deri tek punësimi jashtë kritereve, që nga abuzimi me paranë publike deri tek shitja e vendeve të punës, që nga punësimet partiake e deri tek punësimet me porosi nga lartë, ky sektor falë qeverisjes kriminale të këtij pushtetit ka arritur pikën më të lartë të degradimit te tij, me cilësi më të keqe në 50 vite të fundit, dhe standard me të ulët se sa në vitet 90’ta.

Skandalet e publikuara së fundmi flasin qartë për gjendjen e pashpresë në arsim, degradimi i së cilës kulmoi në menaxhimin e drejtorit Nexhat Çoçaj. Artan Abrashi nga Lëvizja VETËVENDOSJE! në Prizren shprehi habinë për mosveprimin e organeve të drejtësisë pas publikimeve të shumta të parregullsive në këtë sektor. Sipas legjislacionit në fuqi, Prokuroria e shtetit duhej te vepronte me automatizëm, sipas detyrës zyrtare, sa herë që flitet për vepra të cilat cenojnë ligjet në fuqi. Gjithashtu Këshilli Prokurorial i Kosovës duhej të vepronte sa here që ndonjë prokuror nuk i përmbahet funksionit të tij zyrtar. Mirëpo këto gjëra nuk po ndodhin edhe pse Prokuroria Publike e Qarkut në Prizren ka zgjedhur heshtjen dhe dorëzimin para krimit. Rrjedhimisht kemi një situatë ku organet e ndjekjes nuk ndjekin keqbërësit, dhe organet e drejtësisë nuk ndajnë drejtësi për abuzimet e pushtetarëve.

Përgjegjësia kryesore për degradimin e arsimit në Komunën e Prizrenit bie mbi Nexhat Çoçajn dhe pushtetin që përfaqëson ai. Ky pushtet i ardhur me blerje dhe vjedhje të votës, me sistemin e tij shtypës dhe abuziv po e bënë atë që nuk mundi ta bënte asnjë okupatorë, ta shkatërrojë arsimin prizrenas. Andaj, Lëvizja VETËVENDOSJE! konsideron se largimi i kësaj qeverisjeje të keqe tashmë paraqet kusht ekzistencial për një të ardhme më proesperuese të shoqërisë sonë.

7 mars 2015
Lëvizja VETËVENDOSJE! – Qendra në Prizren

Kryetari i Lëvizjes VETËVENDOSJE! Albin Kurti, i shoqëruar nga Puhie Demaku, Sekretare për Marrëdhënie me Jashtë dhe Glauk Konjufca, nënkryetar i Kuvendit të Kosovës nga radhët e Lëvizjes VETËVENDOSJE!, kanë pritur sot në zyrat e Lëvizjes VETËVENDOSJE!, delegacionin e Ministrisë së Punëve të Jashtme të Republikës së Shqipërisë, prirë nga Ministri z. Ditmir Bushati, Ambasadori i Republikës së Shqipërisë në Kosovë, Qemal Minxhozi, Drejtori i Kabinetit të Ministrit, Pirro Vengu, Drejtor i lartë në Ministri, Bashkim Rama, e të tjerë .

Në takimin e përbashkët u diskutua për aktualitetin politik në Kosovë dhe për qëndrimet e Lëvizjes VETËVENDOSJE! në raport me këtë aktualitet politik. Kurti tha se temat që do të kryesojnë agjendën politike në Kosovë për muajt e ardhshëm janë Trepça, Gjykata Speciale, Asociacioni i Komunave me Shumicë Serbe dhe energjia e ndërtimi i termocentraleve te reja.

Temë e veçantë e takimit ishte bashkëpunimi në mes Kosovës dhe Shqipërisë në disa fusha, si institucionale, politike, ekonomike, arsimore, sociale etj, ku të dyja vendet do të mund ta plotësonin njëra tjetrën.

Z. Kurti e njoftoi Ministrin Bushati edhe për ndryshimet brenda Lëvizjes VETËVENDOSJE! si organizatë dhe për sfidat që e presin lidershipin e ri të Lëvizjes, si dhe rolin që Lëvizja VETËVENDOSJE! e luan në zhvillimet politike si opozita kryesore në vend, brenda Kuvendit dhe jashtë tij.

27 shkurt 2015
Lëvizja VETËVENDOSJE!

Sot pushteti kishte urdhëruar mbajtjen e seancës gjyqësore për aktivistët e Lëvizjes VETËVENDOSJE! të arrestuar për protestën e zhvilluar në 25 gusht 2009, kundër EULEX. Në këtë seancë u prunë para gjyqit aktivistët e arrestuar, Dardan Molliqaj, Frashër Krasniqi, Fatmir Kurtaj, Glauk Konjufca, Kasim Uka, Kujtim Kosumi, Kushtrim Zeqiri, Pajtim Demaj dhe Skënder Mërturi.

Për shkak të mospjesëmarrjes së dëshmitarëve, të cilët janë zyrtarë të Policisë së Kosovës, u vendos që seanca të shtyhet për datën 16 mars 2016, ndërsa për aktivistët u vendos që të mbahet e njëjta masë sigurie, pra paraburgimi. Arsyeja pse u zgjat paraburgimi për aktivistët është thjesht politike. Me mbajtjen e tyre pushteti synon të dobësojë Lëvizjen VETËVENDOSJE!, e cila tashmë është pjesë e organizimit të protestave gjithëpopullore që kërkojnë të ndalin bërjen president të Hashim Thaçit dhe dorëheqjen e qeverisë antikushtetuese. Kurrë më shumë se në këtë seancë nuk është vënë re anshmëria politike e gjyqësorit.

Ky gjyq i padrejtë është i urdhëruar politikisht. Prania e EULEX në Kosovë vazhdon të ketë një natyrë koloniale, pasi EULEX nuk e njeh pavarësinë dhe shtetësinë e Kosovës. Po ashtu EULEX nuk ka ndihmuar për të sjellë drejtësi në Kosovë. Përkundrazi, nën mbikëqyrjen e EULEX, ashtu si edhe më përpara në mbikëqyrjen e UNMIK, drejtësia e Kosovës ka dështuar, është korruptuar edhe më shumë, dhe nuk ka mbërritur të vërë para përgjegjësisë fajtorët për krime të mëdha të cilët janë të veshur me pushtet politik dhe ekonomik. Siç raportohet nga mediet dhe nga persona të brendshëm të EULEX, korrupsioni i drejtësisë vendore nuk ka mbetur pa prekur edhe vetë EULEX-in. Pra protesta jonë e vitit 2009 ishte e drejtë. Drejtësia nuk importohet. Sistemi vendor i drejtësisë e i gjyqësorit, së bashku me vlerat politike e shoqërore që e mbështesin, mund të ndërtohen vetëm si pasojë e një ideali demokratik e atdhedashës.

Glauk Konjufca, kryesuesi i Grupit parlamentar të Lëvizjes VETËVENDOSJE!, i arrestuar edhe pse me imunitet parlamentar, mbajti një fjalim para trupit gjykues ku tha se qëllimi kryesor i dërgimit në burg të aktivistëve të Lëvizjes VETËVENDOSJE është drejtpërdrejtë i lidhur me qëllimin për t’i izoluar ata prej ngjarjeve politike të rëndësishme që po ndodhin në Kosovë, dhe jo për të bërë drejtësi. “Kjo çka po e përjetojmë ne është dëshmi që shefi juaj i vërtetë nuk është Kushtetuta por kryeministri, pasi po të mos ishte kështu, ne nuk do të ishim në sallë. Arsyeja kryesore pse jemi këtu është sepse jemi kundërshtarë të Zajednicës. EULEX ka dështuar në qëllimet e veta, që ishin sundimi i ligjit dhe lufta kundër korrupsionit. Kështu që ky rast duhet të hidhet poshtë, kjo aktakuzë e padrejtë duhet të hidhet poshtë”, tha Konjufca.

Edhe Dardan Molliqaj, sekretar organizativ i Lëvizjes VETËVENDOSJE! e mbajti një fjalim përpara trupit gjykues. Ai kërkoi lirimin e menjëhershëm të të gjithë aktivistëve, një pjesë e madhe e të cilëve janë arrestuar një ditë përpara protestës gjithëpopullore të 17 shkurtit, me qëllim që të dobësohej protesta dhe që të provokohej masa. Molliqaj ka thënë se gjyqtarët dhe policia po kontrollohen me urdhëra të drejtpërdrejtë politikë, dhe se po bëhen vegël e pushtetit. “Sapo të lirohemi nga burgu do të bëjmë publike të gjitha rastet e korrupsionit dhe të marrjes së mitos që kanë bërë prokurorët dhe gjyqtarët e Kosovës. Këto raste janë të shumta, dhe po na i tregojnë vetë të burgosurit që po i takojmë në burgjet e ndryshme të Kosovës ku po mbahemi”.
Lëvizja VETËVENDOSJE! proteston kundër këtyre proceseve të padrejta gjyqësore, të cilat nuk janë asgjë tjetër përveçse përndjekje e opozitës dhe persekutim politik. Gjyqësori dhe prokuroria në një shtet të së drejtës do të duhej të merreshin me hajnat e mëdhenj dhe me korrupsionin qeveritar që po e mbyt krejt ekonominë e Kosovës. Ne kërkojmë lirimin e menjëhershëm të aktivistëve, dhe ndaljen e përndjekjes.

25 shkurt 2016
Lëvizja VETËVENDOSJE!

Përfaqësuesit e Lëvizjes VETËVENDOSJE!, Albin Kurti, Visar Ymeri, Ismajl Kurteshi, Hydajet Hyseni dhe Belgzim Kamberi, pritën sot në takim deputetët shqiptarë nga Lugina e Preshevës, z. Riza Halimin dhe z. Shaip Kamberin.

Në këtë takim u diskutua për pozitën e rëndë politike dhe socio-ekonomike të shqiptarëve në Preshevë Medvegjë dhe Bujanoc, si dhe rolin të cilin duhet ta kenë Republika e Shqipërisë dhe ajo e Kosovës në përmirësimin e pozitës dhe avancimin e të drejtave të shqiptarëve atje.

Z. Halimi dhe z. Kamberi i njoftuan përfaqësuesit e Lëvizjet për problemet e vazhdueshme me të cilat ballafaqohen shqiptarët atje që prej diplomave të fakulteteve të cilat nuk u pranohen nga Serbia e deri te mungesa absolute e përfaqësimit proporcional në gjyqësi dhe polici. Presheva si komunë me shumicë dërmuese të popullsisë shqiptare nuk ka fare gjykatë themelore, edhe pse një të tillë e ka pasur më herët, ndërkohë që prokuroria për tërë rajonin gjendet në Vranjë. Në kuadër të Gjykatës ka12 gjykatës prej të cilëve vetëm tre janë shqiptarë, ndërsa 9 janë serb. Dy vendet e lira, sistematizim të përcaktuara për gjykatës shqiptarë, për gati dy vite, nuk janë plotësuar.

Kjo është në shpërputhje të plotë me koncesionet të cilat Qeveria e Republikës së Kosovës po i bën në këtë fushë, sikur në fushat tjera, ndaj Serbisë. Asnjëherë Qeveria e Republikës së Kosovës nuk e ka ngritur në Bruksel shtypjen dhe diskriminimin që Serbia ua bën shqiptarëve në Preshevë, Bujanoc dhe Medvegjë.

Lëvizja VETËVENDOSJE! do të mbetet e përkushtuar që t’i ndihmojë përfaqësuesit e shqiptarëve të Preshevës, Bujanocit dhe Medvegjës në kërkesat e tyre politike, si dhe të kërkojë përgjegjësi nga Qeveria e Republikës së Kosovës për angazhimin e tyre institucional në të mirë të shqiptarëve atje.

23 shkurt 2015
Lëvizja VETËVENDOSJE!

Rezultatet paraprake të votimit për zgjedhjet e brendshme

Komisioni Zgjedhor i Përgjithshëm i Lëvizjes VETËVENDOSJE! ka pranuar të dhënat me rezultatet paraprake nga të gjitha vendvotimet e hapura brenda dhe jashtë Kosovës për zgjedhjet e brendshme. Në këto zgjedhje u votua për dy çështje: (1) për Kryetar të Lëvizjes VETËVENDOSJE!, dhe (2) për ndryshimin statutor në lidhje me mekanizmin e vendimmarrjes sa i përket koalicioneve në nivel lokal, për ta kaluar këtë kompetencë nga anëtarësia e gjerë te Këshilli i Përgjithshëm. Në vijim janë paraqitur rezultatet paraprake për këto dy votime që u mbajtën në datat 21 dhe 22 shkurt 2015:

Votimi për Kandidatin për Kryetar të Lëvizjes VETËVENDOSJE!, Visar Ymeri:

Për: 96.42%
Kundër: 1.88%
Abstenim: 1.32%
Të pavlefshme: 0.37%

Votimi për ndryshimin statutor:

Për: 87.57%
Kundër: 9.07%
Abstenim: 3.00%
Të pavlefshme: 0.35%

Rezultatet përfundimtare të këtij votimi do të shpallen ditën e diel, më 1 mars, në mbledhjen e Këshillit të Përgjithshëm të Lëvizjes VETËVENDOSJE!.

23 shkurt 2015
Komisioni Zgjedhor i Përgjithshëm
Lëvizja VETËVENDOSJE!

Në ora 10:00 të mëngjesit ka nisur sot votimi për zgjedhjet e brendshme të Lëvizjes VETËVENDOSJE!. Në këto dy ditë anëtarët e Lëvizjes VETËVENDOSJE! do të votojnë sipas parimit një anëtar një votë në mbi 200 vendvotime të hapura anembanë Kosovës, si dhe në 6 shtete të Evropës.

Kryetari aktual i Lëvizjes VETËVENDOSJE! ka qenë ndër anëtarët e parë që ka votuar këtë mëngjes. Pas votimit ai dha prononcimin në vijim:

VETËVENDOSJE! është jo vetëm lëvizja politikisht më aktive në Kosovë, jo vetëm subjekti konceptualisht më i thellë në Kosovë, por njëkohësisht është organizata përmbajtësisht më demokratike në Kosovë.

Sot dhe nesër, pra me 21 dhe 22 shkurt të vitit 2015 po mbajmë zgjedhje të lira, të ndershme e demokratike brenda Lëvizjes VETËVENDOSJE!, për Lëvizjen VETËVENDOSJE!, dhe jo vetëm për Lëvizjen VETËVENDOSJE! për shkak se me procesin tonë demokratik, ne me shembullin tonë tregojmë se si duhet të ndërtohet demokracia edhe në mbarë Republikën e Kosovës. Me këtë rast, në më shumë se 200 vendvotime anë e mbanë Kosovës po organizohen zgjedhjet për Kryetar të ri të Lëvizjes VETËVENDOSJE!, dhe më pas do e kemi edhe kryesinë e re në mbledhjen e ardhshme të organit më të lartë të lëvizjes sonë, i cili është Këshilli i Përgjithshëm.

Me këtë rast, unë iu bëj thirrje të gjithë anëtarëve të VETËVENDOSJE!-s që të votojnë dhe ta shprehin lirshëm vullnetin e tyre, ta deklarojnë zgjedhjen e tyre në këto votime të lira, të cilat po i organizon Lëvizja VETËVENDOSJE!.

21 shkurt 2015
Lëvizja VETËVENDOSJE!

Në ditën e katërt të protestës para kompanisë “Pastrimi” përkrahja e punëtorëve të kësaj ndërmarrjeje po rritet. Kjo dëshmohet edhe me informacionin që ata sot i kanë dhënë protestuesve se uzurpatori Feim Salihu do të përpiqet të futet në ndërtesë.

Kësisoj, me një skenar të paramenduar, dy punëtorë filluan kinse pastrimin e oborrit të ndërmarrjes dhe hapësirës së vendit ku qëndronin protestuesit. Ata pa asnjë paralajmërim filluan të lagnin protestuesit me vrushkuj uji nga cisterna. Kjo shprehte qëllimin e qartë të tyre për provokimin e situatës dhe pengimin e protestës.

Duke qenë se Policia e Kosovës ishte e pranishme dhe nuk mori asnjë hap, protestuesit u detyruan që të mbrohen nga sulmi i paramenduar.

Gjatë këtyre ditëve të protestës, komunikimi i protestuesve me punëtorët e ndërmarrjes Pastrimi ka qenë i vazhdueshëm. Asnjë punëtor përgjatë këtyre katër ditëve nuk është penguar në punën e tij dhe ata kanë qarkulluar vazhdimisht me makinat përkatëse përpara protestuesve.

20 shkurt 2015
Lëvizja VETËVENDOSJE!

Dokumenti për formimin e Gjykatës Speciale, i sjellë nga Ministria e Drejtësisë në Komisionin Parlamentar për Legjislacion, përmban 2 amendamentet kushtetuese dhe një projektligj për krijimin e dhomave të veçanta dhe themelimin e prokurorisë speciale. Është tërësisht e padrejtë që të kërkohet që i njëjti të mbahet konfidencial, dhe është në shpërputhje të plotë me ligjet e aplikueshme mbajtja konfidenciale e këtij dokumenti. Me ligjin për klasifikimin e dokumenteve, dokumentet që mbahen shumë sekrete ose konfidenicale janë vetëm dokumentet që cenojnë ose rrezikojnë sigurinë shtetërore. Aq i madh dhe urgjent është interesi i qytetareve për t’u informuar sa më shumë dhe sa më parë me këtë çështje kaq të rëndësishme, sa që është e domosdoshme që ta publikojmë këtë material menjëherë.

Procedurat nëpër të cilat do të kalojë ndërtimi i këtij sistemi të plotë paralel të gjyqësisë në Kosovë nga ana e Gjykatës Speciale është guri i fundit i atij pak sovraniteti e pavarësie që kishte Kosova. Me këtë proces nuk mbetet më asgjë nga shteti i së drejtës, në një republikë të pavarur.

Mbikëqyrja e punës së kësaj gjykate dhe zyra e prokurorit nuk i nënshtrohen asnjë mbikëqyrjeje nga Këshilli Gjyqësor, gjyqtarët pa përjashtim që të gjithë janë ndërkombëtarë dhe të njëjtit nuk emërohen sipas procedurave të parapara me legjislacionin në fuqi. Kontrolli ligjor dhe kushtetues kalon nëpër fazat procedurale tërësisht të pavarura me rregullimin aktual.

Dhomat do të kenë selinë edhe në Kosovë krahas edhe një vendi tjetër, por ku, nuk specifikohet në ligj. Për zyrën e prokurorit është vënë opsionale që selia të jetë në Kosovë. Pra, në parim selia e prokurorisë është jashtë vendit.

Ndër veçoritë më të rëndësishme është se me ndryshimet kushtetuese, gjykatës do t’i jepet mundësia që të lidh marrëveshje të karakterit ndërkombëtar, pa kaluar procedurat për ratifikim siç është paraparë me Nenin 19 të Kushtetutës. Kemi të bëjmë me precedent në të drejtën ndërkombëtare, kur një gjykatë e fut një shtet të pavarur në obligime ndërkombëtare, qofshin ato bilaterale apo multilaterale.

Sa i përket dënimeve dhe gjykimeve, të gjitha gjykimet dhe dënimet do të mbahen dhe ekzekutohen jashtë territorit të Republikës së Kosovës. Kjo paraqet një problem në kuptimin e përgjithshëm, sepse Kuvendi është dashur që me një vendim të veçantë të njoh të drejtën e ekstradimit të qytetarëve të vet, e jo përmes një pakoje të kategorisë kushtetuese të njihet e drejta e ekstradimit dhe ekzekutimit të dënimeve ndaj shtetasve të një shteti të pavarur në këtë mënyrë. Dënimi më i lartë që mund ta shqiptojë kjo Gjykatë është dënimi me burgim të përjetshëm.

Sa i përket kontrollit kushtetues, që i përket trajtimit të respektimit të të drejtave të njeriut në procedurë, për këtë do të vendosin vetëm tre gjyqtarë ndërkombëtarë në Gjykatën Kushtetuese. Tre gjyqtarë të Gjykatës Kushtetuese përjashtojnë nga vendimmarrja të gjithë gjyqtarët të tjerë të saj dhe vendimi i tyre është ekuivalent me çdo vendim tjetër të Gjykatës Kushtetuese. Propozim-Amandamentet kushtetuese garantojnë përzgjedhjen edhe për një mandat tjetër të këtyre gjyqtarëve ndërkombëtarë në Gjykatën Kushtetuese.

Sa i përket përbërjes së dhomave, ato përbëhen nga gjyqtarët ndërkombëtarë që zgjidhen me një konkurs ndërkombëtar e që përzgjidhen nga një panel i veçantë, i përbërë prej tre anëtarëve. Pas përzgjedhjes së tyre, emërimi i tyre bëhet nga Shefi i Misionit të EULEX-it.

Në Kapitullin 1 , neni 1.2 specifikohet qartë qëllimi i Gjykatës Speciale: fushëveprimi i saj ka të bëjë me pretendimet e Raportit të senatorit zviceran Dick Marty. Raporti i Dick Marty u prezantua në KiE, në dhjetor të vitit 2010 dhe është kurorëzim i një iniciative ruse e serbe dhe dështim mjaft serioz i politikës sonë qeveritare, i diplomacisë sonë pasive, si dhe i “miqve tanë ndërkombëtarë”. Ky raport arriti që të bëhet madje edhe Rezolutë e Këshillit të Evropës. Raporti i Martyt bazohet në pretendimet e ish kryeprokurores së Gjyqit të Hagës, Karla del Ponte. Sipas këtij raporti UÇK-ja ka bërë trafikim të organeve.

Gjykata Speciale po krijohet edhe përkundër faktit që 3 instanca të rëndësishme ndërkombëtare, kanë përfunduar hetimet e tyre pa gjetjen e ndonjë fakti relevant. Së pari këto pretendime e hetoi UNMIK-u më 2002, 2003 dhe 2004. Pastaj një ekip investigues i kryeprokurores del Ponte dhe së fundi edhe Taskforca Speciale e EULEX-it, më 2009 e 2010. Të tri këto institucione nuk gjetën ndonjë fakt që do të përbënte material të mjaftueshëm për padi dhe gjykime. Dhe nga ky prizëm duhet të kuptohet edhe intervista e saj e vitit të kaluar, në të cilën ajo shprehi befasinë e saj se si institucionet e Kosovës me aq lehtësi e pranuan krijimin e një gjykate ndërkombëtare për UÇK-në. Përgjatë kësaj kohe, kanë qenë konstante presionet e Serbisë dhe Rusisë në Kombet e Bashkuara dhe nëpër institucione të ndryshme evropiane siç është KiE, që të themelohet Gjykatë Ndërkombëtare për Krimet e supozuara të UÇK-së.

Prandaj krijimi i kësaj Gjykate enkas për UÇK-në është një dështim kapital me pasoja të pallogaritshme kombëtare, për popullin dhe interesat tona. Ky dështim është i barasvlershëm me çarmatosjen e UÇK-së, dhe ky proces i dëmshëm pa dyshim që simbol të vetin politik e ka ish kryeministrin Thaçi. Pasi UÇK-ja u çarmatos e u shkatërrua, pasi ajo u shporr nga vlerat tona institucionale e kushtetuese, tash po i nënshtrohet kapitullit të fundit të ndëshkimit moral e politik.

Edhe një herë po vërtetohet që fuqizimi i shtetit, funksionimi i Republikës dhe ngritja e kombit tonë është në kundërthënie të pa kompromis me pushtetin e garniturave politike qeverisëse të korruptuara dhe servile, të cilët duhet t’i heqim sa më parë ashtu që ta shpëtojmë veten dhe interesin tonë nacional.

19 shkurt 2015
Lëvizja VETËVENDOSJE!

Kompania Regjionale e Mbeturinave (KRM) “Pastrimi” është një ndërmarrjeve tejet e rëndësishme për qytetarët e Prishtinës pasi ajo kryen një shërbim të domosdoshëm për mirëmbajtjen e pastërtisë. Në të janë të punësuar rreth 500 punëtorë, dhe ajo shtrihen në 7 komuna, por Komuna e Prishtinës është aksionari kryesor me 77.4% të aksioneve, dhe vendos për Kryesuesin e Bordit të KRM “Pastrimi” dhe për drejtimin e kësaj ndërmarrjeje.

Më 26 shkurt 2014 Komuna e Prishtinës cakton Komisionin e ri Komunal të Aksionarëve të KRM “Pastrimi”.
Pas 8 muajve probleme dhe moszbatim detyrash të Bordit, ky Komision shkarkon anëtarin e Bordit që përfaqësonte Komunën, Shaujb Mehmeti.
Më 9 nëntor shpallet konkurs 15 ditor për zëvendësimin e këtij anëtari, dhe në pozicionin e Kryesuesit të Bordit shpallet Prof. Ass. Dr. Bardhyl Noci.
Prof. Noci mban më 30 dhjetor mbledhjen e parë të Bordit. Mbledhjen përpiqen ta pengojnë Feim Salihu, Kryeshefi Ekzekutiv i KRM “Pastrimi”, me 20 persona të tjerë të drejtuar nga Besnik Salihu, shef i sigurimit të KRM “Pastrimi” dhe djali i axhës i Feim Salihut. Kjo bandë sulmon Prof. Nocin fizikisht, e ofendon dhe e kërcënon me jetë.
Më 5 janar 2015 Prof. Noci bën kallëzim penal në prokurori ndaj Feim Salihut, Besnik Salihut dhe 20 personave që ushtruan dhunë mbi të për të penguar mbledhjen.
Më 9 janar 2015 Bordi i KRM “Pastrimi” mban mbledhje dhe shkarkon Feim Salihun.
Më 13 janar 2015 hapet rasti për Feim Salihun pranë Gjykatës Themelore në Prishtinë për mënyrën se si a është punësuar dhe për keqpërdorimin e detyrës.
Më 16 janar 2015 Gjykata Themelore në Prishtinë merr vendimi për t’ia ndaluar menjëherë Feim Salihut ushtrimin e detyrës së tij. Vendimi i përcillet Policisë.
Gjatë komunikimit të Policisë me Komunën, më 21 janar 2015 Policia refuzon t’i respektojë vendimet e Bordit të KRM “Pastrimi” dhe vendimin e Gjykatës. Disa policë tregojnë që Skender Hyseni, Ministri i Punëve të Brendshme, po e pengon ndërhyrjen e Policisë.
Më 27 janar 2015, Prof. Noci, Kryeseusi i Bordit të KRM “Pastrimi”, njofton bankat për vendimin e Bordit dhe të Gjykatës dhe ia heq Feim Salihut autorizimin për të kryer veprime bankare të KRM “Pastrimi”.
Më 16 shkurt 2015, mbi 30 ditë pas vendimit të Bordit dhe të Gjykatës, dhe pas refuzimit të policisë për të zbatuar ligjin, Asamblistë të Prishtinës, aktivistë dhe qytetarë dolën në protestë kundër Feim Salihut, dhe nuk e lejuan të hynte në ndërmarrje. Ndërhyri Policia për të larguar protestuesit dhe lëshoi fletarrest për Ylli Hoxhën, Asambleist në Komunën e Prishtinës, me akuzën “pengim i personit zyrtar”, duke ju referuar Feim Salihut. Por, me vendim Bordi e Gjykate, Feim Salihu nuk është person zyrtar.
Më 18 shkurt 2015, Asamblistët e Prishtinës, aktivistët dhe qytetarët dolën sërish në protestë kundër Feim Salihut. Policia e Kosovës duke mos ndërmarrë asnjë hap për zbatimin e vendimit të Bordit dhe Gjykatës, arrestoi Asamblistin e VETËVENDOSJE!-s Ylli Hoxha përderisa shkonte në mbledhjen e Komitetit për Politikë dhe Financa në Komunë.

Protestat kundër uzurpatorit Feim Salihu, do të vazhdojnë deri në largimin e tij.

18 shkurt 2015
Lëvizja VETËVENDOSJE!

Aktivistët e Lëvizjes VETËVENDOSJE! në diasporë protestuan sot në Bruksel kundër negociatave që po mbahen në mes të Qeverisë së Kosovës dhe asaj të Serbisë. Protestuesit mbanin në duar parulla si “Sovraniteti është i panegociueshëm!”, “STOP tolerimit të BE-së ndaj fashizmit”, “STOP tolerimit ndaj ekspansionit serb!”, “Serbia kurrë nuk ka kërkuar falje”, “Ktheni të pagjeturit në Kosovë!”, “Drejtësia është e panegociueshme!”, “Të drejtat tona janë të panegociueshme”, “STOP përkrahjes së BE-së ndaj politikanëve të korruptuar”, “RECIPROCITET!”, “Vetëvendosje për Kosovën”, “Duart larg nga Trepça!”, e të ngjashme.

Aktivistja Vlora Haxhimehmedi tha se Mustafa dhe Thaçi po vijnë në dialog me Vuçiqin dhe Daçiqin pa lejen e Kuvendit të Kosovës dhe pa prezantuar kurrfarë qëndrimesh, platforme apo qëllimesh. “Nuk ekziston kurrfarë dokumenti zyrtar në Kuvendin e Kosovës, e madje as në Qeverinë e Kosovës, mbi agjendën dhe karakterin e vazhdimit të dialogut. Takimi i sotëm po zhvillohet tinëz qytetarëve dhe institucioneve të Kosovës. Dialogu i deritanishëm që u zhvillua nga 8 marsi 2011 deri më 31 mars 2014 ishte përherë për çështje të brendshme të Kosovës dhe gjithnjë pa asnjë kusht për Serbinë. Ky dialog 3 vjeçar duhet të shqyrtohet e hetohet, e jo të vazhdohet nga Mustafa me avazin e vjetër sikurse Thaçi. Tanimë dihet se temat e dialogut sot janë Asociacioni i Komunave me shumicë serbe që na bosnjëzon dhe formalizimi i ndarjes së gjyqësorit në veri të Ibrit”, theksoi Haxhimehmedi.

Serbia nuk po i shpërbën strukturat e saj shtetërore brenda Kosovës. Ajo e ka Listën Serbe brenda Qeverisë dhe nëpër Komuna. Ministrat e saj i quajnë egërsira qytetarët e Kosovës. Qeveria e Kosovës po vazhdon që ta shesë çdo pasuri publike. Pasi e solli ligjin për Trepçën si ndërmarrje publike, nën trysninë e Beogradit, ligji u tërhoq për t’u zëvendësuar me një tjetër i cili nuk e bën Trepçën ndërmarrje publike. Kjo është shenjë se Isa Mustafa po përgatitet që ta vë në tavolinën e negociatave edhe Trepçën. “Ne i themi kryeministrit – mos e qit Trepçën në bisedime, sepse ajo është pasuria më e madhe natyrore që ka Kosova. Populli do ta mbrojë Trepçën me protesta e demonstrata dhe kurrë nuk do të pranojë që për pasuritë e shtetit tonë të pyeten ata të cilët në Kosovë bënë masakra e gjenocid. Kryeministër, mos negocioni me Serbinë e cila shef të ushtrisë e ka Ljubisha Dikoviçin. Ai po akuzohet për krime kundër njerëzimit në Kosovë”, bëri thirrje aktivistja Vlora Haxhimehmedi, duke shtuar se do të vazhdohet me protesta edhe në Bruksel kundër këtyre negociatave.

Kosova po negocion me Serbinë thua se ajo i ka borxh Serbisë, e jo Serbia Kosovës. Vetëm nga lufta e fundit u vranë 12.000 shqiptarë, kishim mijëra të pagjetur e afër 20.000 gra të dhunuara, mbi 1600 ende të pagjetur, 120.000 shtëpi u shkatërruar ose dogjën, u plaçkitën fondi pensional, depozitat bankare dhe 1200 artefakte kulturore. Serbia nuk na ka kërkuar falje dhe asnjë cent nuk e ka paguar për gjithë këto humbje e vuajtje që na i ka shkaktuar. Kosova nuk mori pjesë në sukcesionin e Jugosllavisë kurse Plani i Ahtisaarit na bëri të marrim pjesë në borxhin e jashtëm të Serbisë. Emrat e Vuçiqit e Daçiqit i kemi dëgjuar rregullisht në fund të viteve të ’90-ta bashkë me emrat e Milosheviqit dhe Sheshelit. Duke dialoguar me ta, Mustafa e Thaçi po i rehabilitojnë ata dhe natyrisht që mandej Serbia ecën me shpejtësi drejt BE-së kurse ne po ngecim në çdo aspekt. Për Kosovën vendos populli i Kosovës, dhe jo politikanët e saj të korruptuar në negociata pa kushte e pa parime. Për Kosovën vendosim vetë ne kolektivisht. Vetëvendosje për Kosovën!

9 shkurt 2015
Lëvizja VETËVENDOSJE!

Aktivistët e Lëvizjes VETËVENDOSJE! organizuan sot një aksion simbolik pranë objektit të Ministrisë së Zhvillimit Ekonomik të cilën e drejton Blerand Stavileci. Me deklaratën e fundit, Ministri Stavileci na tregoi se është i gatshëm për privilegjet, por jo edhe për përgjegjësitë që i takojnë. Ai po na thotë se përgjegjës për gjendjen e rëndë socio-ekonomike që e kanë qytetarët e Kosovës, janë prindërit e tyre që i kanë lindur dhe jo udhëheqja e shtetit.

“Nëse ai vërtetë mendon se nuk ka përgjegjësi për qytetarët, atëherë ai nuk ka pse të qëndrojë në postin e Ministrit. Shkaktar i varfërisë është modeli i përzgjedhur ekonomik, bashkë me korrupsionin dhe krimin e organizuar që kanë marrë përmasa alarmante, dhe jo planifikimi i familjes. Ai nuk po flet për thëngjillin e Kosovës që po monopolizohet, nuk po flet për Trepçën, nuk po flet për manipulimin me njehsorë, që po e zhvatin xhepin e varfër të qytetarëve. Në vend se të marrë përgjegjësi, ai po shfajësohet për mjerimin e krijuar”, tha aktivisti Zgjim Hyseni. Ai shtoi se në Kosovë ka varfëri sepse vetëm nga procesi i privatizimit ka mbi 76.000 qytetarë që janë larguar nga puna; sepse kemi politikanë të korruptuar; sepse kemi pabarazi të madhe ku shumica është e varfër, ndërkohë që kemi koncentrim të pasurisë tek një pjesë e vogël e njerëzve.

“Se kjo Qeveri nuk ka plan për zhvillim ekonomik dhe ulje të papunësisë, tashmë është e qartë. Për Ministrin Stavileci, çdo foshnje e lindur më shumë, është një i papunë më shumë dhe një i varfër më shumë. Dhe rruga që ai na sugjeron për dalje nga kjo gjendje është migrimi ilegal dhe ulja e lindshmërisë”, potencoi Hyseni.

Në fund, ai e dha edhe porosinë e fundit për Ministrin: “Më mirë të shkojë e të luajë me top, mbase edhe e qëllon koshin, sepse me politikë ia ka huqur”.

3 mars 2015
Lëvizja VETËVENDOSJE!

Policia e Kosovës e ka arrestuar pronarin e kompanisë së autobusëve “Pranvera” në Pejë, të kontraktuar nga Lëvizja VETËVENDOSJE! për transportin e qytetarëve në protestën e sotme. Rrjedhimisht rreth 500 qytetarë të Pejës, tani janë nisur në këmbë për në Prishtinë.

Kjo është edhe një përpjekje e ulët e pushtetit për ta parandaluar protestën legjitime të qytetarëve. Mirëpo, nuk ka asgjë që mund ta ndalë shprehjen e vullnetit të popullit

—
Lëvizja VETËVENDOSJE!

Sekretariati për Media dhe Komunikim

Policia e Kosovës ka arrestuar aktivisten Mimoza Abrazhda në Mitrovicë. Kjo ka ndodhur derisa autobusët me protestues po përgatiteshin niseshin nga Mitrovica, ndërkaq aktivistja Abrazhda po mbante rendin. Policët kanë bërë kontrolle tek protestuesit që pritnin për t’u nisur dhe i kanë bërë shumë pyetje duke e vonuar edhe nisjen e tyre.

Pas pamundësimit të vendosjes së binës në sheshin “Skënderbeu” Policia e Kosovës konfiskon kamionetën në të cilën gjendej zërimi dhe me të cilën u bëhej thirrje qytetarëve që të bashkohen në protestë.

Gjithashtu, Në hyrje të autostradës Prizren Policia ndalon autobusët me qytetarë dhe i bastisur, pastaj i ka nxjerrë jashtë të gjithë ata që qëndronin në këmbë.

Lëvizja VETËVENDOSJE!
Sekretariati për Media dhe Komunikim

Në protestën tonë të organizuar për sot ne i kemi dhënë ultimatum Isa Mustafës që brenda 48 orëve, pra deri në ora 16 të së hënës ta shkarkojë Jabllanoviqin dhe ta sjellë në Kuvend Ligjin që e shndërron Trepçën në ndërmarrje të veçantë publike, për të cilën vendimet i merr Kuvendi i Republikës së Kosovës. Me këtë ultimatum ka përfunduar protesta e organizuar nga Lëvizja VETËVENDOSJE! dhe Thirrjet e Nënave.

Ato që kanë ndodhur jashtë marshit dhe skenarit për të cilin ishim dakorduar nuk janë pjesë e protestës. Një grup i vogël njerëzish në protestë nuk e kanë respektuar skenarin tonë dhe kanë ndërmarrë veprime me të cilat nuk pajtohemi. Po ashtu dënojmë ashpër dëmtimin e lokaleve private në shesh.

Gjithashtu, duam të potencojmë që dy protestuesit e arrestuar nga Policia e Kosovës nuk janë aktivistë të Lëvizjes VETËVENDOSJE!.

24 janar 2015
Lëvizja VETËVENDOSJE!

Në protestën tonë të organizuar për sot ne i kemi dhënë ultimatum Isa Mustafës që brenda 48 orëve, pra deri në ora 16 të së hënës ta shkarkojë Jabllanoviqin dhe ta sjellë në Kuvend Ligjin që e shndërron Trepçën në ndërmarrje të veçantë publike, për të cilën vendimet i merr Kuvendi i Republikës së Kosovës. Me këtë ultimatum ka përfunduar protesta e organizuar nga Lëvizja VETËVENDOSJE! dhe Thirrjet e Nënave.

Ato që kanë ndodhur jashtë marshit dhe skenarit për të cilin ishim dakorduar nuk janë pjesë e protestës. Një grup i vogël njerëzish në protestë nuk e kanë respektuar skenarin tonë dhe kanë ndërmarrë veprime me të cilat nuk pajtohemi. Po ashtu dënojmë ashpër dëmtimin e lokaleve private në shesh.

Gjithashtu, duam të potencojmë që dy protestuesit e arrestuar nga Policia e Kosovës nuk janë aktivistë të Lëvizjes VETËVENDOSJE!.

24 janar 2015
Lëvizja VETËVENDOSJE!

Kryetari i Lëvizjes VETËVENDOSJE!, Albin Kurti, ka mbajtur një ligjëratë para studentëve të universiteteve “EMA Venice” dhe atyre të “Vienna Master of Arts in Human Rights”, të cilët po qëndrojnë gjatë një seminari në Prishtinë. Në prezantimin e tij, Kurti ka folur mbi historikun e VETËVENDOSJE!-s dhe situatën politike e socio-ekonomike në Kosovë dhe në rajon.

“Ne mendojmë se shteti duhet të luajë rol në ekonomi, jo ta kontrollojë e centralizojë atë, por të jetë aktor dhe faktor, sepse nuk ka sundim të ligjit pa shtet të së drejtës dhe nuk ka progres shoqëror pa ekonomi të prodhimit vendor. Republika dhe socialdemokracia formojnë kombinimin që siguron edhe daljen nga kriza edhe ecjen përpara”, ka thënë Kurti.

Duke shpjeguar Alternativën Qeverisëse, Kurti tha se Lëvizja VETËVENDOSJE! angazhohet në veçanti për të varfrit dhe klasën e mesme sepse këta kanë nevojë më së shumti për institucionet që i mbrojnë e për politikën që i përfaqëson. Në vijim Kurti foli edhe mbi strategjinë e VETËVENDOSJE!-s e cila protestat në rrugë i ka bërë institucion demokratik, kurse brenda vetë institucioneve zyrtare e ka sjellë protestën demokratike.

Pas prezantimit të tij, studentët bënë pyetje të shumta për qëndrimin e Kurtit në burg dhe proceset gjyqësore kundër tij, njëherë nga Serbia e pastaj nga UNMIK-u dhe EULEX-i. pastaj për gjeopolitikën në Ballkan, për rolin e BE-së e NATO-s në Kosovë, për mënyrat e organizimit dhe aktivizimit të qytetarëve, e deri te takimet dhe bashkëpunimi i VETËVENDOSJE!-s me partitë e majta në BE.

14 janar 2015
Lëvizja VETËVENDOSJE!