Aktivistët e Lëvizjes VETËVENDOSJE! në diasporë protestuan sot në Bruksel kundër negociatave që po mbahen në mes të Qeverisë së Kosovës dhe asaj të Serbisë. Protestuesit mbanin në duar parulla si “Sovraniteti është i panegociueshëm!”, “STOP tolerimit të BE-së ndaj fashizmit”, “STOP tolerimit ndaj ekspansionit serb!”, “Serbia kurrë nuk ka kërkuar falje”, “Ktheni të pagjeturit në Kosovë!”, “Drejtësia është e panegociueshme!”, “Të drejtat tona janë të panegociueshme”, “STOP përkrahjes së BE-së ndaj politikanëve të korruptuar”, “RECIPROCITET!”, “Vetëvendosje për Kosovën”, “Duart larg nga Trepça!”, e të ngjashme.

Aktivistja Vlora Haxhimehmedi tha se Mustafa dhe Thaçi po vijnë në dialog me Vuçiqin dhe Daçiqin pa lejen e Kuvendit të Kosovës dhe pa prezantuar kurrfarë qëndrimesh, platforme apo qëllimesh. “Nuk ekziston kurrfarë dokumenti zyrtar në Kuvendin e Kosovës, e madje as në Qeverinë e Kosovës, mbi agjendën dhe karakterin e vazhdimit të dialogut. Takimi i sotëm po zhvillohet tinëz qytetarëve dhe institucioneve të Kosovës. Dialogu i deritanishëm që u zhvillua nga 8 marsi 2011 deri më 31 mars 2014 ishte përherë për çështje të brendshme të Kosovës dhe gjithnjë pa asnjë kusht për Serbinë. Ky dialog 3 vjeçar duhet të shqyrtohet e hetohet, e jo të vazhdohet nga Mustafa me avazin e vjetër sikurse Thaçi. Tanimë dihet se temat e dialogut sot janë Asociacioni i Komunave me shumicë serbe që na bosnjëzon dhe formalizimi i ndarjes së gjyqësorit në veri të Ibrit”, theksoi Haxhimehmedi.

Serbia nuk po i shpërbën strukturat e saj shtetërore brenda Kosovës. Ajo e ka Listën Serbe brenda Qeverisë dhe nëpër Komuna. Ministrat e saj i quajnë egërsira qytetarët e Kosovës. Qeveria e Kosovës po vazhdon që ta shesë çdo pasuri publike. Pasi e solli ligjin për Trepçën si ndërmarrje publike, nën trysninë e Beogradit, ligji u tërhoq për t’u zëvendësuar me një tjetër i cili nuk e bën Trepçën ndërmarrje publike. Kjo është shenjë se Isa Mustafa po përgatitet që ta vë në tavolinën e negociatave edhe Trepçën. “Ne i themi kryeministrit – mos e qit Trepçën në bisedime, sepse ajo është pasuria më e madhe natyrore që ka Kosova. Populli do ta mbrojë Trepçën me protesta e demonstrata dhe kurrë nuk do të pranojë që për pasuritë e shtetit tonë të pyeten ata të cilët në Kosovë bënë masakra e gjenocid. Kryeministër, mos negocioni me Serbinë e cila shef të ushtrisë e ka Ljubisha Dikoviçin. Ai po akuzohet për krime kundër njerëzimit në Kosovë”, bëri thirrje aktivistja Vlora Haxhimehmedi, duke shtuar se do të vazhdohet me protesta edhe në Bruksel kundër këtyre negociatave.

Kosova po negocion me Serbinë thua se ajo i ka borxh Serbisë, e jo Serbia Kosovës. Vetëm nga lufta e fundit u vranë 12.000 shqiptarë, kishim mijëra të pagjetur e afër 20.000 gra të dhunuara, mbi 1600 ende të pagjetur, 120.000 shtëpi u shkatërruar ose dogjën, u plaçkitën fondi pensional, depozitat bankare dhe 1200 artefakte kulturore. Serbia nuk na ka kërkuar falje dhe asnjë cent nuk e ka paguar për gjithë këto humbje e vuajtje që na i ka shkaktuar. Kosova nuk mori pjesë në sukcesionin e Jugosllavisë kurse Plani i Ahtisaarit na bëri të marrim pjesë në borxhin e jashtëm të Serbisë. Emrat e Vuçiqit e Daçiqit i kemi dëgjuar rregullisht në fund të viteve të ’90-ta bashkë me emrat e Milosheviqit dhe Sheshelit. Duke dialoguar me ta, Mustafa e Thaçi po i rehabilitojnë ata dhe natyrisht që mandej Serbia ecën me shpejtësi drejt BE-së kurse ne po ngecim në çdo aspekt. Për Kosovën vendos populli i Kosovës, dhe jo politikanët e saj të korruptuar në negociata pa kushte e pa parime. Për Kosovën vendosim vetë ne kolektivisht. Vetëvendosje për Kosovën!

9 shkurt 2015
Lëvizja VETËVENDOSJE!

Aktivistët e Lëvizjes VETËVENDOSJE! organizuan sot një aksion simbolik pranë objektit të Ministrisë së Zhvillimit Ekonomik të cilën e drejton Blerand Stavileci. Me deklaratën e fundit, Ministri Stavileci na tregoi se është i gatshëm për privilegjet, por jo edhe për përgjegjësitë që i takojnë. Ai po na thotë se përgjegjës për gjendjen e rëndë socio-ekonomike që e kanë qytetarët e Kosovës, janë prindërit e tyre që i kanë lindur dhe jo udhëheqja e shtetit.

“Nëse ai vërtetë mendon se nuk ka përgjegjësi për qytetarët, atëherë ai nuk ka pse të qëndrojë në postin e Ministrit. Shkaktar i varfërisë është modeli i përzgjedhur ekonomik, bashkë me korrupsionin dhe krimin e organizuar që kanë marrë përmasa alarmante, dhe jo planifikimi i familjes. Ai nuk po flet për thëngjillin e Kosovës që po monopolizohet, nuk po flet për Trepçën, nuk po flet për manipulimin me njehsorë, që po e zhvatin xhepin e varfër të qytetarëve. Në vend se të marrë përgjegjësi, ai po shfajësohet për mjerimin e krijuar”, tha aktivisti Zgjim Hyseni. Ai shtoi se në Kosovë ka varfëri sepse vetëm nga procesi i privatizimit ka mbi 76.000 qytetarë që janë larguar nga puna; sepse kemi politikanë të korruptuar; sepse kemi pabarazi të madhe ku shumica është e varfër, ndërkohë që kemi koncentrim të pasurisë tek një pjesë e vogël e njerëzve.

“Se kjo Qeveri nuk ka plan për zhvillim ekonomik dhe ulje të papunësisë, tashmë është e qartë. Për Ministrin Stavileci, çdo foshnje e lindur më shumë, është një i papunë më shumë dhe një i varfër më shumë. Dhe rruga që ai na sugjeron për dalje nga kjo gjendje është migrimi ilegal dhe ulja e lindshmërisë”, potencoi Hyseni.

Në fund, ai e dha edhe porosinë e fundit për Ministrin: “Më mirë të shkojë e të luajë me top, mbase edhe e qëllon koshin, sepse me politikë ia ka huqur”.

3 mars 2015
Lëvizja VETËVENDOSJE!

Policia e Kosovës e ka arrestuar pronarin e kompanisë së autobusëve “Pranvera” në Pejë, të kontraktuar nga Lëvizja VETËVENDOSJE! për transportin e qytetarëve në protestën e sotme. Rrjedhimisht rreth 500 qytetarë të Pejës, tani janë nisur në këmbë për në Prishtinë.

Kjo është edhe një përpjekje e ulët e pushtetit për ta parandaluar protestën legjitime të qytetarëve. Mirëpo, nuk ka asgjë që mund ta ndalë shprehjen e vullnetit të popullit

—
Lëvizja VETËVENDOSJE!

Sekretariati për Media dhe Komunikim

Policia e Kosovës ka arrestuar aktivisten Mimoza Abrazhda në Mitrovicë. Kjo ka ndodhur derisa autobusët me protestues po përgatiteshin niseshin nga Mitrovica, ndërkaq aktivistja Abrazhda po mbante rendin. Policët kanë bërë kontrolle tek protestuesit që pritnin për t’u nisur dhe i kanë bërë shumë pyetje duke e vonuar edhe nisjen e tyre.

Pas pamundësimit të vendosjes së binës në sheshin “Skënderbeu” Policia e Kosovës konfiskon kamionetën në të cilën gjendej zërimi dhe me të cilën u bëhej thirrje qytetarëve që të bashkohen në protestë.

Gjithashtu, Në hyrje të autostradës Prizren Policia ndalon autobusët me qytetarë dhe i bastisur, pastaj i ka nxjerrë jashtë të gjithë ata që qëndronin në këmbë.

Lëvizja VETËVENDOSJE!
Sekretariati për Media dhe Komunikim

Në protestën tonë të organizuar për sot ne i kemi dhënë ultimatum Isa Mustafës që brenda 48 orëve, pra deri në ora 16 të së hënës ta shkarkojë Jabllanoviqin dhe ta sjellë në Kuvend Ligjin që e shndërron Trepçën në ndërmarrje të veçantë publike, për të cilën vendimet i merr Kuvendi i Republikës së Kosovës. Me këtë ultimatum ka përfunduar protesta e organizuar nga Lëvizja VETËVENDOSJE! dhe Thirrjet e Nënave.

Ato që kanë ndodhur jashtë marshit dhe skenarit për të cilin ishim dakorduar nuk janë pjesë e protestës. Një grup i vogël njerëzish në protestë nuk e kanë respektuar skenarin tonë dhe kanë ndërmarrë veprime me të cilat nuk pajtohemi. Po ashtu dënojmë ashpër dëmtimin e lokaleve private në shesh.

Gjithashtu, duam të potencojmë që dy protestuesit e arrestuar nga Policia e Kosovës nuk janë aktivistë të Lëvizjes VETËVENDOSJE!.

24 janar 2015
Lëvizja VETËVENDOSJE!

Në protestën tonë të organizuar për sot ne i kemi dhënë ultimatum Isa Mustafës që brenda 48 orëve, pra deri në ora 16 të së hënës ta shkarkojë Jabllanoviqin dhe ta sjellë në Kuvend Ligjin që e shndërron Trepçën në ndërmarrje të veçantë publike, për të cilën vendimet i merr Kuvendi i Republikës së Kosovës. Me këtë ultimatum ka përfunduar protesta e organizuar nga Lëvizja VETËVENDOSJE! dhe Thirrjet e Nënave.

Ato që kanë ndodhur jashtë marshit dhe skenarit për të cilin ishim dakorduar nuk janë pjesë e protestës. Një grup i vogël njerëzish në protestë nuk e kanë respektuar skenarin tonë dhe kanë ndërmarrë veprime me të cilat nuk pajtohemi. Po ashtu dënojmë ashpër dëmtimin e lokaleve private në shesh.

Gjithashtu, duam të potencojmë që dy protestuesit e arrestuar nga Policia e Kosovës nuk janë aktivistë të Lëvizjes VETËVENDOSJE!.

24 janar 2015
Lëvizja VETËVENDOSJE!

Kryetari i Lëvizjes VETËVENDOSJE!, Albin Kurti, ka mbajtur një ligjëratë para studentëve të universiteteve “EMA Venice” dhe atyre të “Vienna Master of Arts in Human Rights”, të cilët po qëndrojnë gjatë një seminari në Prishtinë. Në prezantimin e tij, Kurti ka folur mbi historikun e VETËVENDOSJE!-s dhe situatën politike e socio-ekonomike në Kosovë dhe në rajon.

“Ne mendojmë se shteti duhet të luajë rol në ekonomi, jo ta kontrollojë e centralizojë atë, por të jetë aktor dhe faktor, sepse nuk ka sundim të ligjit pa shtet të së drejtës dhe nuk ka progres shoqëror pa ekonomi të prodhimit vendor. Republika dhe socialdemokracia formojnë kombinimin që siguron edhe daljen nga kriza edhe ecjen përpara”, ka thënë Kurti.

Duke shpjeguar Alternativën Qeverisëse, Kurti tha se Lëvizja VETËVENDOSJE! angazhohet në veçanti për të varfrit dhe klasën e mesme sepse këta kanë nevojë më së shumti për institucionet që i mbrojnë e për politikën që i përfaqëson. Në vijim Kurti foli edhe mbi strategjinë e VETËVENDOSJE!-s e cila protestat në rrugë i ka bërë institucion demokratik, kurse brenda vetë institucioneve zyrtare e ka sjellë protestën demokratike.

Pas prezantimit të tij, studentët bënë pyetje të shumta për qëndrimin e Kurtit në burg dhe proceset gjyqësore kundër tij, njëherë nga Serbia e pastaj nga UNMIK-u dhe EULEX-i. pastaj për gjeopolitikën në Ballkan, për rolin e BE-së e NATO-s në Kosovë, për mënyrat e organizimit dhe aktivizimit të qytetarëve, e deri te takimet dhe bashkëpunimi i VETËVENDOSJE!-s me partitë e majta në BE.

14 janar 2015
Lëvizja VETËVENDOSJE!

Viti 2014 i ka dhënë të drejtë VETËVENDOSJE!-s si asnjë vit tjetër. Le të ndalemi vetëm në tri çështje kryesore. E para, thoshin VETËVENDOSJE! e ka gjuhën e ashpër. Prej që ka folur ambasadorja amerikane, asnjëri më nuk po na thotë VETËVENDOSJE!-a e ka gjuhën e ashpër. Na thoshin që VETËVENDOSJE!-a është ekskluzive dhe nuk bashkëpunon me askënd tejtër. Mirëpo, jemi përpjekur me mish e me shpirt, me gjithë kapacitetin tonë fizik, intelektual, politik e moral që ta bashkojmë opozitën kundër partisë shtet dhe kemi dëshmuar që VETËVENDOSJE! nuk është ajo e cila është ekskluzive, por ka të tjerë të cilët janë opozitë e rrejshme. Dhe në vitin 2014 kemi arritur një fitore të madhe: ka marrë fund opozita e rrejshme. Dhe, çështja e tretë është ankesa e të tjerëve për kritikat tona ndaj misioneve ndërkombëtare. Ne asnjëherë nuk e kemi bërë këtë për hir të kundërshtimit apo kritikës, por duhet theksuar që ankesat ndaj VETËVENDOSJE!-s tashmë kanë pushuar. Dhe, kjo është një fitore tjetër e vitit 2014. Pasi që ish-ambasadori amerikan Dell përfundoi në listë të rrogave të Bechtel-it dhe pasi që shpërtheu skandali i korrupsionit në majat e EULEX-it te gjykatësit e saj duhet të jesh fort naiv që të besosh se të huajt na nxjerrin nga kriza apo na sjellin drejtësi. Edhe njëherë u dëshmua VETËVENDOSJE!-a në kritikën e saj të drejtë ka pasur të drejtë.

Problemet kryesore të Kosovës po barten nga viti 2014 në vitin 2015, ashtu siç u kopjua buxheti i shtetit prej një qeverie në tjetrën, që nuk janë realisht as qeveri as të tjera.

Lëvizja VETËVENDOSJE! e ka të qartë se kjo është një qeverisje për mision të vjetër, në të cilën edhe në vitin 2015 mbesim me struktura të Serbisë në çerekun e territorit e pa Mitrovicë të bashkuar, me varfëri e papunësi, e pa ekonomi prodhuese. Mirëpo, ne nuk kemi iluzione. Nuk mund të presim që kjo të ndryshohet nga PDK-ja e LDK-ja, që u bënë bashkë për shkak se u dobësuan dhe u bënë bashkë për shkak të dobësisë. Dhe, ky bashkim i tyre, do t’i dobësojë edhe më tej. Prandaj, viti 2015 do të jetë vit i forcimit të opozitës çfare s’ka parë Kosova e pasluftës dhe i dobësimit të Qeverisë deri në rrëzimin e tyre.

Ne nuk mund të kemi shpresa te këto parti sepse ato shpresa do të ishin iluzione. Dhe këtë gjë na e kanë dëshmuar e na e kanë vërtetuar vetë ata. Pra, bëhet fjalë për politikanë, krerë partishë që e kanë bishtin e zënë me derë. E njerëzit të cilët e kanë bishtin të zënë me derë edhe kur t’ua përmendësh dritaren mendjen e kanë te dera, sepse bishtin e kanë të zënë me derë. Por, shtegu në të cilin ata kanë hyrë është një shteg në të cilin ose do të dalin nga dera ose do t’i nxjerrim nga dritarja. Zgjedhja është e tyre e puna është e jona.

Sot në botë ka shtete që janë të shtrira përdhe, ka shtete që janë në gjunjë dhe jo shumë shtete qëndrojnë në këmbë. Prej këtyre shteteve që janë të shtrira përdhe disa zvarriten ngadalë e disa dergjen në vend. Qeverisja e PDK-së me LDK-në është diku në mes të të shtririt përdhe, midis zvarritjes së ngadaltë dhe dergjjes në vend, duke lëvizur prej mesit kah dergjja. Dhe kjo duhet të jetë një motiv shtesë i yni që Kosovën ashtu qysh është përdhe ta ngrisim në gjunjë, në mënyrë që ta ngrisim në këmbë dhe ta kemi një shtet ashtu siç e meriton dhe i takon edhe popullit të Kosovës, edhe shoqërisë kosovare, edhe kombit shqiptar në përgjithësi.

Në vitin 2015 ne si Lëvizje VETËVENDOSJE! do t’i bëjmë 10 vjet. Para gati 10 vjetëve kur e filluam Lëvizjen VETËVENDOSJE! shumë shpejt u bëmë opozita kryesore kundër sistemit. Tash pas gati 10 vjetëve jemi bërë edhe opozita kryesore brenda sistemit. Nuk e kemi më opozitën e rrejshme si paravan midis nesh dhe regjimit, i cili edhe na zë udhën e qe besa edhe na e mbyllë shikimin. Pra, Lëvizja VETËVENDOSJE! sot është opozita kryesore, është opozita prijëse, për shumëçka është opozita e vetme, edhe jashtë sistemit edhe brenda sistemit.

Me organizatën tonë punëtore në terren, me qeverisjen e drejtë në komunë, me Grupin e mençur e të ditur parlamentar në Kuvend, Lëvizja VETËVENDOSJE! është e vetmja që do ta luftojë krimin e korrupsionin derisa ky krim e korrupsion të bie bashkë me regjimin. Ne jemi ata që do ta riaktualizojmë parullën e moçme kryengritëse: “Paqe kasolleve e luftë pallateve”!. Sepse e vetmja mundësi që ky popull të ngritet në këmbë është që njëherë e përgjithmonë t’i bëjmë bashkë të varfrit dhe të pasuruarit e pandershëm nëpërmjet pushtetit e politikës të marrin fund dhe të përfundojnë aty ku e kanë vendin, në burg, prapa grilave, sepse nuk duhet izoluar shoqëria prej përparimit por duhet të izolohen kriminelët prej shoqërisë.

Shqiptarët në përgjithësi i kanë humbur ëndrrat sepse kanë tepër shumë iluzione. Mirëpo, kur i humbë iluzionet nuk e fiton realitetin. Kur i humbë iluzionet pikërisht i fiton ëndrrat. Sepse pa ëndërr nuk ka realitet. Viti 2015 është viti përfundimtar i humbjes së iluzioneve, atëherë kur qytetarët e Kosovës dhe shqiptarët në përgjithësi do ta rifitojnë ëndrrën e tyre e do ta fitojnë realitetin për vete.

Unë do t’i kisha falënderuar edhe kundërshtarët tanë. Kundërshtarët tanë na kanë kundërshtuar shumë. Dhe, mos më keqkuptoni, me kundërshtarët ne jemi në luftë. Ata na kundërshtojnë, ne i luftojmë. Mirëpo, duhet t’ua japim një mirënjohje sot, dhe jo vetëm sot. E kjo është për shkak se të gjithë kundërshtarët na kanë sulmuar meqenëse kanë besuar në fitoren tonë. Nuk na kishin sulmuar po të besonin që nuk fitojmë. Arsyeja themelore pse kundërshtarët neve na sulmojnë është për shkak se ata besojnë që Lëvizja VETËVENDOSJE! një ditë do të fitojë dhe ata nuk e duan këtë ditë. Pra, ata me sulmet e tyre na e kanë shprehur neve besimin në fitoren tonë. Prandaj, unë kërkoj nga të gjithë ju një duartrokitje për kundërshtarët tanë që na kanë sulmuar çdo ditë të vitit 2014. Por, këtyre kundërshtarëve tanë ne duhet t’iu falënderohemi edhe për një gjë tjetër. Sepse ata neve na kanë kalitur. Besoni, po mos të na luftonin, po mos të na sulmonin kundërshtarët tanë, ne do të kishim menduar më pak, do të kishim vepruar më pak, do të kishim punuar më pak. Prandaj, këtu ka një lëvizje të qartë dialektike, ku kundërshtarët tanë duke na sulmuar neve shprehin besimin e tyre në fitoren tonë, rrugës sonë të vështirë na kalisin, në mënyrë që të gjitha sfidat sado të vështira ne t’i kalojmë me sukses.

Ky regjim vitin 2015 nuk mund ta bëjë vit të ri. Vitin 2015 mund ta bëjë vit të ri Lëvizja VETËVENDOSJE!. Ne mundemi, ne duhet dhe ne do ta bëjmë vitin 2015 vit të ri. Prandaj, urime e gëzuar të gjithëve!

( Albin Kurti, 30 dhjetor 2014 )

Kundërthënia e rrejshme PDK-LDK u demaskua. Ajo ka qenë maskë për antagonizmin e vërtetë të këtyre dyjave bashkë kundrejt Lëvizjes VETËVENDOSJE!.

Ata që shpresojnë se organizatat e ndryshme ndërkombëtare do të mund të na nxjerrin nga kriza apo të sjellin drejtësi duhet ta kujtojnë faktin që ish ambasadori Dell tash punon në Bechtel kurse krerët e EULEX-it dolën të korruptuar.

Ndërkombëtarët janë levizje interesash dhe opinonesh, çështja është a duam të prijmë ne.

PDK e LDK karakterizohet prej premtimeve revolucionare me veprime që s’janë as reformatore.

Nuk i kemi qytetarët e varfër e të papunë kurse pushtetarët të pasur e të korruptuar pse jemi vend pa pasuri, popull pa histori e shoqëri pa kulturë por pse dogma e neoliberalizimit është instaluar në sistemin politik dhe ekonomik të shtetit. Qytetarët e lirë të Kosovës po arratisen nga dogma e lirisë!

Qytetarët i kanë humbur iluzionet për partitë dhe kjo është një fitore e rëndësishme.

Të djathtit djathin e marrim për vete kurse ujin e njelmët me dromcat që mbesin ua lënë popullit.

Nga Gjykata Speciale veç sa do të kemi padrejtësi speciale!

Deklarata e Hashim Thaçit në Kuvend se kinse ka pasur kërkesë nga Lëvizja VETËVENDOSJE! është shpifja e radhës në vazhdën e mashtrimeve të këtij personazhi.

Në respekt të informimit të drejtë të të gjithë opinionit publik, deklarojmë se në asnjë rast a rrethanë nuk ka pasur kurrfarë përpjekje për kontakt apo takime nga ana e Lëvizjes VETËVENDOSJE! me PDK-në apo ndonjë zyrtar të saj e as nuk do të ketë.

E vetmja përpjekje për takim ka qenë ajo e PDK-së, kërkesë të cilën nuk kemi pranuar as ta diskutojmë dhe e kemi bërë publike me kohë për publikun.

Kushdo që pretendon të kundërtën i ftojmë ta dëshmojë me fakte e publikisht.

Për sa na takon, jemi angazhuar dhe do të vijojmë, për ndryshim rrënjësor të realitetit në Kosovë ku personazhet e klanit Thaçi dhe ai vetë dalin para drejtësisë dhe shpaguajnë dëmet që i kanë bërë Kosovës.

8 dhjetor 2014

“Shumica dërmuese e mallrave që i konsumojnë shqiptarët nuk janë të prodhuara nga shqiptarët. Kjo mund të ndryshohet dhe duhet të ndryshohet. Përveç se gjuhë dhe flamur, përveç se kulturë dhe histori, kombi është edhe ekonomi. Ndërkaq, ekonomia kombëtare, dihet se para së gjithash dhe mbi të gjitha është prodhim. Prodhimi do të na bëjë të barabartë edhe me të tjerët, ashtu sikurse rishpërndarja na bën të barabartë brenda vetes. Fushata “Blej Shqip” ka filluar në vitin 2009, dhe, ja ku jemi 5 vjet më vonë duke e shndërruar atë në nivel institucional të bashkëpunimit midis Komunës së Prishtinës dhe Ministrisë së Zhvillimit Ekonomik; midis Komunës së Prishtinës në Kosovë dhe Ministrisë së Zhvillimit Ekonomik në Shqipëri; midis Kryetarit Ahmeti dhe Ministrit Ahmetaj.

Sot është dita e kombit shqiptar, është dita e bashkimit të shqiptarëve. 28 nëntori është datë themeltare e identitetit tonë që na bën të jemi ata që jemi dhe është datë me të cilën mund të ecim dhe duhet të ecim përpara.

Ne kemi nevojë që kufirin midis Kosovës dhe Shqipërisë, i cili është kufi i Serbisë dhe i Jugosllavisë, sepse nuk është kufi i shqiptarëve, ta eliminojmë edhe në aspektin praktik e njerëzor, por në të njëjtën kohë ta eliminojmë edhe në aspektin ekonomik dhe institucional. Unë besoj që një qeveri e ardhshme VETËVENDOSJE!-s do ta bënte edhe këtë gjë, ndërkohë që me qeveritë e pasluftës nuk e kemi parë deri më tash. Besoj që dallimet midis Kosovës dhe Shqipërisë, ndarjet ekzistuese midis Kosovës dhe Shqipërisë, mirëmbahen prej atyre që përfitojnë financiarisht dhe ekonomikisht nga kjo gjë. Mirëpo, në Kosovë duhet të ndodh një përmbysje e këtyre konjukturave, të cilat përfitojnë nga dallimi Kosovë – Shqipëri dhe një ardhje e brezave të rinj edhe e politikanëve, të cilët do të bëjnë që të përfitojë populli nga bashkimi kombëtar.”

Qendra e Lëvizjes VETËVENDOSJE! në Gjilan organizoi sot një aktivitet përmes të cilit u bëri thirrje qytetarëve që t’i bojkotojnë produktet e Serbisë. Disa nga parullat që u paraqitën në këtë aksion ishin: “Bojkoto produktet e Serbisë”, “Blej shqip”, “Produktet e Serbisë për Kosovë janë të dyshimta”, “Ata po kërkojnë vrasjen e shqiptarëve, ne po ua mbushim arkën me para”, “Dëmtoje Serbinë, ndihmoje Kosovën”, e të tjera.

Aktivisti Yll Islami foli për shifrat që ka përfituar shteti serb ndër vite nga produktet e veta që i ka shitur në Kosovë. “Nga viti 2002 deri në vitin 2013 nga Serbia tregtarët tanë i kanë importuar 2 miliardë e 600 milionë euro produkte të Serbisë. Në vitin 2011 nga Serbia janë importuar mbi 75 milionë euro, në vitin 2012 mbi 81 milionë euro, kurse në vitin 2013 janë importuar 91 milionë e 161 mijë euro”, theksoi Islami.

Ai tutje shtoi se Serbia, ndër të tjera, nuk e njeh pavarësinë e Kosovës dhe vazhdon të financojë strukturat e veta kriminale që çdo ditë e më shumë po e bëjnë të pamundshëm funksionimin e shtetit të Kosovës. “Serbia e ka edhe të kaluarën edhe të tashmen kriminale ndaj Kosovës dhe shqiptarëve në përgjithësi. Vetëm gjatë luftës së fundit në Kosovë vrau mbi 14 mijë shqiptarë, i dëboi mbi 800 mijë, vazhdojnë të jenë të zhdukur mbi 1700, dhunoi mbi 20 mijë gra e vajza, vodhi artefaktet dhe fondin pensional, e të tjera. Kurse tash, në Serbi po i djegin furrat dhe shtëpitë e shqiptarëve. Konsumi i produkteve të Serbisë, është financim i minimit të shtetit të Kosovës nga ana e Serbisë”, tha Islami.

Duke konsumuar produktet e Serbisë, me një veprim i shkaktojmë dy dëme: një produkt i Serbisë i blerë më shumë, është një produkt i shitur më pak nga prodhuesit vendorë, është një hap më pak drejt zhvillimit të brendshëm; një produkt i Serbisë i shitur më shumë është një shtytje për ta forcuar shtetin që e lufton vendin tonë.

Prandaj kërkojmë nga ju qytetar të nderuar t’i bojkotoni produktet e Serbisë, që ta zhvillojmë e ta rrisim produktin vendorë, e që të mos e ndihmojmë ekonominë e një shteti që është armiqësor ndaj nesh.

7 nëntor 2014

Lëvizja VETËVENDOSJE! Qendra në Gjilan

Të nderuar delegatë të Këshillit të Përgjithshëm të VETËVENDOSJE!-s,

Të dashur aktivistë të Lëvizjes sonë,

Mirë se e gjejmë njëri-tjetrin në këtë Mbledhjen e XVII të Këshillit të Përgjithshëm të Lëvizjes VETËVENDOSJE!.

Lëvizja VETËVENDOSJE! gjithnjë ka qenë me qytetarët, në takime e tubime publike me ta, pa u shkëputur asnjëherë nga populli. Ne kurrë nuk e harrojmë që politikisht nuk ekzistojmë për vetveten tonë por për qytetarët që i përfaqësojmë e iu shërbejmë. Prandaj, edhe jemi subjekti i vetëm në Kosovë, që ballëhapur iu flet e i dëgjon qytetarët, u jep llogari e përgjegjësi qytetarëve dhe kërkon mendimin e tyre për situatën aktuale në institucionet dhe shoqërinë tonë. Anembanë Kosovës, me ftesë publike, në një vend publik, vijnë qytetarët që nuk janë publik yni por që marrin pjesë aktivisht në diskutime për qëndrimet e parimet, për strategjitë e zhvillimet politike. Kur s’ka Kuvend me demokraci atëherë së paku duhet të ketë demokraci edhe pa Kuvend.

Konteksti politik në Kosovë, që prej mbledhjes së fundit të Këshillit të Përgjithshëm, ka pasur tre elementë të rëndësishëm. Ato janë: 1) Ngjarjet mes shumicës parlamentare dhe qeverisë në ikje, si dhe ato përbrenda shumicës parlamentare; 2) Ngjarjet e korrupsionit në strukturat e larta të EULEX-it; 3) Ngjarjet rajonale, që pasuan ndeshjen e futbollit Serbi – Shqipëri.

Të nderuar pjesëmarrës të kësaj mbledhjeje,

1) Shumica parlamentare vazhdon të jetë e vendosur në kundërshtimin e çfarëdo bashkëpunimi me qeverinë. Lajmet e ndryshme me të cilat bombardojnë mediet e regjimit kanë për qëllim që të përhapin konfuzion te qytetarët dhe ta zbusin pozitën e pavolitshme të PDK-së dhe satelitëve të saj. Edhe Thaçi gjithashtu duket i vendosur për të mos e lëshuar qeverisjen. Ai ka keqpërdorur tashmë çdo institucion shtetëror të pavarur. Njëherë përdori kushtetuesen, pastaj kryesuesen dhe tani po përdor presidenten. Qeveria në ikje përherë e ka luftuar republikën parlamentare në Kosovë. Ajo e luftoi republikën përmes pazareve me Serbinë, privatizimit në ekonomi dhe korrupsionit në institucione. Kurse tash e lufton Kuvendin përmes Hasanit, Brovinës dhe Jahjagës. Këtë gjendje të bllokuar në përplasjen për konstituimin e parlamentit, duket se mund ta zgjidhë vetëm një ndërhyrje jashtë logjikës parlamentare. Thaçit i intereson që kjo ndërhyrje të jetë prej ndërkombëtarëve, prej ambasadorëve, prej të huajve, për kompromis. Ai nuk po thotë më se i ka numrat por po kërkon qeveri gjithpërfshirëse. Neve na intereson që ndërhyrjen jashtë-parlamentare ta bëjnë qytetarët, ose ta bëjmë ne si Lëvizje VETËVENDOSJE!. Sepse, neve na intereson demokracia, dhe na intereson sovraniteti. Mënyrat për të ndërhyrë qytetarët, janë ato që dihen: protestat dhe demonstratat. Mënyrat për të ndërhyrë ne, si Lëvizje VETËVENDOSJE!, janë duke e bindur koalicionin LAN që të konstituojë Kuvendin dhe institucionet, pa marrë parasysh reagimin e PDK-së apo të Gjykatës Kushtetuese.Tash për tash, krerët e tjerë të shumicës parlamentare nuk besojnë që duhet bërë një zgjidhje siç propozojmë ne. Nëse ata vazhdojnë të hezitojnë, ka gjasë që të fitojë mbështetje interesi i Thaçit, pra që situata të zgjidhet me ndërhyrje prej ndërkombëtarëve. Edhe për një situatë të tillë, vlen fjalia ime e fundit në seancën e fundit të Kuvendit: Nëse qëndrojmë, fitojmë! Nuk e di nëse të tjerët do të qëndrojnë, besoj se edhe të tjerët do të qëndrojnë, dhe, është për t’u vlerësuar fakti se kanë qëndruar tash e gati pesë muaj. Sa i përket çështjes së kryeparlamentarit, kryeministrit dhe presidentit me emra të përveçëm ajo është një çështje e marrëveshjes së koalicionit LAN të bërë me 10 qershor e ku nuk ka marrur pjesë Lëvizja VETËVENDOSJE!. Pavarësisht që Gjykata Kushtetuese e kafshoi një të tretën e asaj marrëveshje, jam shumë optimist që koalicioni LAN nuk do të lëkundet nga ky shkak. Në anën tjetër, Lëvizja VETËVENDOSJE! e ka me koalicionin LAN marrëveshjen e 10 shtatorit për kursin e ri të shtetit që paraqet marrëveshje më thelbësore e më përmbajtësore.

Të dashur aktivistë të VETËVENDOSJE!-s,

2) Ditët e fundit ju e keni lexuar nëpër gazeta dëshminë e një prokuroreje të EULEX-it. Denoncimet e saj na tregojnë edhe një herë atë që ne e kemi ditur përherë. Drejtësia nuk mund të importohet. Demokracia nuk mund të importohet. Ato duhet të ndërtohen nga vetë shoqëria, pasi vetëm shoqëria mund ta ndërtojë shtetin e saj. Për lirinë e Kosovës, së pari, gjakun e kanë derdhur shqiptarët, për dekada me radhë, e pastaj e morëm edhe ndihmën ndërkombëtare. Edhe luftën kundër korrupsionit vendor, sikurse edhe zhvillimin ekonomik, së pari duhet ta bëjmë ne, shqiptarët, pastaj të kërkojmë ndihmë nga të huajt. Janë përpjekur ta bindin popullin tonë se korrupsionin mund ta luftojnë vetëm të huajt, pasi ata na paskan vlera dhe etikë më të lartë se ne. Por edhe të huajt që erdhën këtu për të na sjellë drejtësinë, janë korruptuar. Sepse ata nuk i lidh me këtë vend atdhedashuria. Ne, që e duam këtë vend, ne do ta sjellim shtetin, drejtësinë, demokracinë, zhvillimin e mirëqenien për këtë vend. Sepse kështu ka bërë çdo vend i botës, dhe nuk mund të bëhet ndryshe. Më këtë Qeveri dhe me këtë EULEX, shteti i Kosovës po digjet pa eksplodim. Për djegien kujdeset qeveria, kurse për mungesën e ekplodimit EULEX-i. Veçse tash vetë EULEX-i po digjet e kjo qeveri po shkon.

Të nderuar delegatë të Lëvizjes,

3) Në mesin e muajin që lamë pas, në Beograd u shfaq edhe një herë ideologjia dhe struktura që sundon në Serbi. Ajo e racizmit, fashizmit dhe shovinizmit kundër shqiptarëve. Por, për të njohur këtë ideologji nuk na duhej loja e futbollit. Ne këtë e dinim si prej historisë po ashtu edhe prej luftës së fundit. Serbia vazhdon të refuzojë të kthejë të pagjeturit, të dënojë kriminelët, të kërkojë falje, të dëmshpërblejë. Në anën tjetër, është hipokrizi kur ata që kanë bërë çmos që të harrohet padrejtësia gjenocidale e luftës, tash bëhen patriotë për një ndeshje futbolli. Në këtë rast, është e domosdoshme të pohojmë karakterin emancipues të nacionalizmit tonë çlirimtar. Ne nuk i urrejmë serbët. Ne nuk jemi kundër asnjërit komb a etni. Ne jemi për çlirimin tonë, për drejtësi ndaj nesh, dhe për barazi me të tjerët. Kërkesa jonë has në qëndrimin kundërshtues dhe shkatërrues të Serbisë. Por, Serbia ka gjetur shpesh aleatë te disa politikanë shqiptarë të korruptuar, dhe te disa biznesmenë tregtarë, që udhëhiqen vetëm nga paraja. Politikanët tregtarë si Hashim Thaçi dhe tregtarët politikanë si Ramiz Kelmendi i kanë normalizuar personalisht marrëdhëniet me Daçiqa e Mishkoviqa, por kurrsesi Kosova dhe populli shqiptar me ta.

Pas ngjarjes në Beograd, lindi edhe një ndjenjë e përbashkët, komunitare, e cila ishte shumë e dobishme. Shqiptarët në Kosovë, në Maqedoni, në Shqipëri, në Luginë të Preshevës e në Mal të Zi, reaguan si një komb, dhe kjo është gjë e mirë. Njëkohësisht, shumë njerëz të medias e kuptuan ç’është nacionalizmi serb. Shumë njerëz nëpër media filluan të përsërisin mesazhin tonë të kahershëm të fushatës nga viti 2006: “Bojkotoni produktet e Serbisë!”. Sepse Serbia na e ka pushtuar ekonominë, po na lë të varfër, po i merr fitimet nga ne për të prodhuar agresion. Por ky mesazh nuk bën të jetë veç fjalë. Populli është i varfër, ai në shitore shpesh gjen vetëm produkte të Serbisë. Ne nuk mund të vëmë asnjë grimë faji tek të varfërit tanë. Fajin e kanë ata tregtarë që importojnë apo kontrabandojnë me Serbinë. Fajin e kanë ata pushtetarë që financohen prej atyre tregtarëve, e që sot janë në pushtet.Që të shpëtojmë prej agresionit ekonomik dhe shtetëror të Serbisë, ne duhet të ndërtojmë ekonominë tonë, prodhimin tonë, klasën tonë punëtore. E kjo mund të bëhet vetëm me një qeverisje të drejtë, një qeverisje me VETËVENDOSJE!-n.

Ju faleminderit

2 nëntor 2014
Lëvizja VETËVENDOSJE!

Dhjetëra pyetje nga qytetarët e Ferizajt u shtruan në drejtim të Kryetarit të Lëvizjes VETËVENDOSJE! Albin Kurti, deputetes Albulena Haxhiu dhe Koordinatorit të Qendrës se Ferizajt Emrush Xhemajlit lidhur me situatën politike të krijuar në vend. Këto ndodhën në tubimin “Zgjidhja sipas qytetarëve” i cili u mbajt në Qendrën e Kulturës në Ferizaj.

Pasi shpjegoi në pika të shkurtra se si u pamundësua formimi i Qeverisë Thaçi 3, duke i përmendur dy marrëveshjet, të 10 qershorit, të LAN-it dhe të 10 shtatorit, të Lëvizjes VETËVENDOSJE! me LAN-in, Albin Kurti tha:”Kemi dëgjuar se presidentja mund të na çojë në zgjedhje. Po të kishte mundësi të tilla kushtetuese e ligjore kjo mundësi do të shfrytëzohej dhe unë nuk do të isha fare sot në Ferizaj”. “Ne jemi gjithmonë të gatshëm për zgjedhje, por Kosova nuk ka nevoje për to, por për nje qeverisje ndryshe e qeveri te re të shumicës parlamentare”, vazhdoi Kurti gjatë diskutimit. Meqë, kjo çështje ishte interesim i qytetarëve, deputetja Albulena Haxhiu shpjegoi edhe procedurat se kur vendi mund të shkojë në zgjedhje. “Presidentja nuk ka të drejtë t’i shpallë zgjedhjet tani kur nuk është funksionalizuar dhe konstituuar Kuvendi”, tha Haxhiu. Ajo po ashtu shtoi se nuk duhet pranuar përgjithësimi që iu bëhet të gjitha subjekteve për bllokimin e formimit të institucioneve të vendit. Sipas saj, përgjegjësja e vetme për këtë është PDK-ja.

“Lëvizja VETËVENDOSJE! është e interesuar që ta kemi edhe programin qeverisës edhe formimin e qeverisë, mirëpo tash për tash jemi në këtë situatë në të cilën është pamundësuar zgjedhja e kryeparlamentarit pasi nuk ka seancë. Besojmë se të keqen që e kemi ndalur është shumë e madhe, dhe besojmë se nuk do të ketë lëkundje”, ka thënë Kurti përgjatë diskutimit të zhvilluar.

Ai po ashtu tha se po ta printe këtë proces Lëvizja VETËVENDOSJE!, Enver Hasani do ta kishte fatin e Ibrahim Gashit. Kurse lidhur me marrëveshjen e 10 shtatorit mbi parimet, të nënshkruar me LAN-in, Kurti tha se asnjë nga 8 pikat e saj nuk i konvenon PDK-së. Duke i shpjeguar pikat një nga një Albin Kurti tha se kjo marrëveshje do t’i vendosë binarët për një kurs të ri të shtetit.

Marrëveshja e 10 shtatorit është quajtur nga qytetarët si parimore dhe pa ndërhyrje. Po ashtu, edhe në këtë tubim interesimi lidhej me propozimet e VETËVENDOSJE! sa i përket procesit të privatizimeve. Ata kanë vlerësuar se parimet bazë të Lëvizjes janë ruajtur.

Në situatën e tanishme mund të thuhet se Thaçi është dëmi që e ndërpremë, kurse shumica parlamentare është shansi, i cili nuk bën të humbet. Kurti tregoi se si Lëvizja VETËVENDOSJE! është “kritikuar” shumë pas kësaj marrëveshjeje dhe është interesant se si disa aktivistë të PDK-së derdhshin lot krokodili për parimet e VETËVENDOSJE!-s. Ai shpjegoi se veprimet e VETËVENDOSJE!-s janë strategji e pasuruar, brenda konceptit të njëjtë dhe për qëllimin e njëjtë. “Pastërtia morale e aktivistit të VETËVENDOSJE!-s nuk është qëllim, por është mjet për t’u përdorur politikisht, për të mirën e popullit”, tha Kurti.

Edhe aktivist Emrush Xhemajli tha se situata është mjaft e qartë, nga njëra anë kemi një shumicë parlamentare dhe nga ana tjetër një pakicë, PDK-në, që po e ndalon rotacionin demokratik, pra ndërrimin e pushtetit”.

1 nëntor 2014
Lëvizja VETËVENDOSJE!

Lëvizja VETËVENDOSJE! mbajti sot tubim me qytetarët e Gjilanit, ku u diskutua lidhur me bllokimin që ia ka bërë pakica parlamentare shtetit, pra PDK-ja. Në këtë tubim ishin deputetët, Ismajl Kurteshi, Besa Baftiu dhe Kryetari, Albin Kurti.

Deputeti Ismajl Kurteshi tha se në një situatë kur procesi zgjedhor nuk kontestohet, dhe kur mbi 50% e deputetëve pajtohen për formimin e institucioneve, askush nuk ka të drejtë t’i pengojë. “Është me rëndësi të kuptohet se PDK-ja, që i ka tani 36 deputetë dhe ka dalë e para në zgjedhjet e 8 qershorit, nuk i ka fituar zgjedhjet. Kjo do të thotë se PDK nuk mundet t’i formojë institucionet. Institucionet mund t’i formojë vetëm subjekti ose koalicioni që i ka së paku 61 deputetë, e më shumë se kaq deputetë i kanë vetëm katër subjektet që e kanë nënshkruar marrëveshjen e 10 shtatorit”, tha Kurteshi. Ai përfundoi fjalën e tij duke thënë se “koalicioni, duke e respektuar Kushtetutën dhe procedurat zgjedhore, por pa hequr dorë nga parimi bazë i demokracisë dhe pa humbur kohë, duhet ta zgjedh Kryetarin e Kuvendit të Kosovës e pastaj menjëherë edhe Qeverinë e vendit”, përmbajtje kjo që u përsërit disa herë në forma të ndryshme nga qytetarët që morën fjalën në këtë tubim.

Kryetari Albin Kurti duke iu drejtuar të pranishmëve, foli për dëmet që ia ka shkaktuar qeverisja e PDK-së Kosovës, për kapjen që ia ka bërë shtetit kjo parti, gjë që dëshmohet edhe me insistimin e Enver Hasanit, Flora Brovinës dhe Atifete Jahjagës në të drejtën e paqenë të PDK-së për ta mbajtur Kryeparlamentarin, si dhe për marrëveshjen e arritur më 10 shtator në mes VETËVENDOSJE!-s, LDK-së, AAK-së dhe NISMA-s.

Lidhur me marrëveshjen e 10 shtatorit, për të cilën edhe pyetën qytetarët, Kurti tha se kjo marrëveshje përqendrohet në çështjet e zhvillimit ekonomik, tek rritja e punësimit dhe mirëqenies së qytetarëve, tek reformat substanciale në arsim dhe shëndetësi, në forcimin e shtetit ligjor dhe luftën kundër krimit të organizuar dhe korrupsionit, për reformat institucionale dhe demokratike; në dialog të ri me Bashkimin Evropian për anëtarësimin e Kosovës edhe në NATO edhe në BE, në dialog të hapur me pakicën serbe ku i trajtojmë ata si qytetarë të Republikës në kuadër të zhvillimit për hir të zhvillimit.

Gjatë këtij bashkëbisedimi me qytetarët e Gjilanit u shtjellua edhe pika e pestë e marrëveshjes, pasi që qytetarët donin ta kuptonin mënyrën se si dhe në çfarë kushtesh do të mund të zhvilloheshin negociata të shtetit të Kosovës me cilindo shtet tjetër, nga qeveria e shumicës parlamentare. “Në pikën e pestë, të marrëveshjes së 10 shtatorit, themi që angazhohemi për dialog parimor, cilësor, të përgatitur mirë e të udhëhequr nga Lëvizja VETËVENDOSJE!. Përveç kësaj ky dialog parimor duhet të jetë i tillë që e përfshinë parimin e reciprocitetit dhe të respektimit të ndërsjellë të sovranitetit dhe integritetit territorial”, potencoi Kurti. Ndërsa sa i përket dialogut të deritanishëm ai tha: “Dialogun e deritanishëm do ta hetojmë e hulumtojmë me Komision Hetimor Parlamentar. 40 takime Thaçi-Daçiç. Nuk i kemi as transkriptet as procesverbalet. Andaj, dialogu duhet t’i nënshtrohet një hetimi, dhe gjithashtu do t’i përdorim mekanizmat për ta vlerësuar kushtetutshmërinë e marrëveshjeve të arritura, duke shfrytëzuar edhe Komisionin e Venedikut”, duke shtuar se PDK i bëri koncesione pafund Serbisë, bëri korrupsion pafund në Kosovë, dhe shkatërroi institucionet dhe shoqërinë në përgjithësi.

Qytetarët donin të dinin më shumë lidhur me raportin në mes të VETËVENDOSJE!-s dhe LAN-it, me ç’rast Kurti tha se shumica parlamentare nuk është e përsosur aspak në të mirën e saj, mirëpo e dimë që kjo shumicë parlamentare është për kundruall PDK-së, e cila është gati e përsosur në të keqen e saj. Pasi përmendi disa nga krimet skandalet që PDK i ka bërë gjatë qeverisjes, Kurti tha se këta njerëz nuk e kanë vendin në pushtet, por në burg. “Mirëpo, pikërisht këta e kanë kapur shtetin, në mënyrë që gjyqësia, prokuroria, policia, Presidentja, Gjykata Kushtetuese, të mos jenë në shërbim të qytetarëve por në shërbim të kësaj partie shtet e cila e kupton se është në liri vetëm kur është në pushtet. Posa ta humbin pushtetin, këta e dinë që e humbin edhe lirinë”, u shpreh Kurti.

Disa nga të pranishmit që morën fjalën në këtë tubim, kërkuan që të ndërmerren hapa konkretë, sa më shpejt, për konstituimin e Kuvendit dhe më pas formimin e Qeverisë. “Të mos presim më shumë se populli është lodhur tashmë. Duhet të formohen institucionet nga ata që e kanë shumicën në Kuvend. Prandaj, deputetët e VETËVENDOSJE!-s dhe LAN-it duhet të insistojnë më shumë në të drejtën e tyre”, tha njëri nga qytetarët e Gjilanit.

1 nëntor 2014
Lëvizja VETËVENDOSJE!

Lëvizja VETËVENDOSJE! mbajti sot tubim me qytetarët e Prizrenit, për të diskutuar bashkë me ta zgjidhjen për ndryshimin e situatës aktuale në Kosovë. Në këtë tubim ishin të pranishëm deputetët Visar Ymeri dhe Mytaher Haskuka, si dhe Koordinatori i Qendrës së VETËVENDOSJE!-s në Prizren, Jeton Jagxhiu.

Deputeti Visar Ymeri tha në këtë tubim se partia që ka fituar më shumë vota në zgjedhje nuk po mund ta formojë Qeverinë, ndërkohë që po tenton ta mbajë të bllokuar shtetin përmes kapjes që ia ka bërë tashmë. “Po tentohet të krijohet një situatë e mjegulluar, dhe po tentohet të bindet qytetari që në këtë situatë nuk ka rrugëdalje. Situata është shumë e thjeshtë: Janë katër subjekte në njërën anë që i kanë 63 deputetë, shumicën absolute të Kuvendit, dhe në anën tjetër e kemi një subjekt të vetëm me 37 deputetë që përmes kapjes së shtetit, kapjes së Gjykatës Kushtetuese, po e mbajnë të bllokuar shtetin. Shumica në Kuvend e ka mundësinë, të drejtën dhe detyrën për t’i themeluar institucionet. Kjo është e vërteta, që rrallë po del nëpër media”, tha Ymeri, duke shtuar se VETËVENDOSJE! mban qëndrimin se duhet të vazhdojmë me zgjedhjen e Kryetarit të Kuvendit, e më pas t’i hapim rrugë formimit të Qeverisë.

Qytetarët ishin të interesuar që të dijnë më shumë për mënyrën e thirrjes së seancës konstituive, ngase ata tashmë janë të bindur se PDK-ja bashkë me Presidenten dhe Gjykatën Kushtetuese kanë bërë që Kuvendi të bllokohet e të mos konstituohet ende. Lidhur me këtë çështje, deputeti Ymeri shpjegoi në detaje të drejtën e deputetëve për ta zgjedhur Kryetarin e tyre. Kryetari i Kuvendit të Kosovës zgjidhet me shumicën e votave të deputetëve. E siç e dimë, shumica e deputetëve nuk është në anën e PDK-së që po bllokon, por në anën e subjekteve tjera që tashmë kanë marrëveshje të përbashkët të parimeve, të nënshkruar më 10 shtator të këtij viti. Ndërkaq, lidhur me çështjen e ngritur nga qytetarët se nëse partitë nënshkruese të kësaj marrëveshjeje do të heqin dorë nga pozita e Kryeparlamentarit, Ymeri tha se një çështje e tillë nuk është diskutuar asnjëherë në takimet mes përfaqësuesve të LAN-it dhe VETËVENDOSJE!-s, dhe se partitë nënshkruese të marrëveshjes mbajnë qëndrimin e përbashkët për të mos lëshuar pe karshi PDK-së.

Njëri nga qytetarët e pranishëm në këtë tubim, tha se kemi një kryesuese të rastësishme të Kuvendit, për shkak të moshës që ka. “Nuk mund të kemi ligjshmëri e kushtetueshmëri përderisa një kryesuese ceremoniale që e mbanë atë pozitë për shkak të moshës, e bllokon Kuvendin duke thënë se e thërras seancën konstituive vetëm nëse partitë merren vesh. Nga po e merr kjo këtë të drejtë?”, pyeti ai. “Ju si VETËVENDOSJE!, bashkë me subjektet e LAN-it, duhet të insistoni në të drejtën tuaj, ngase jeni shumicë, duke e respektuar ligjin dhe rregulloren e Kuvendit, duke e shqyrtuar mundësinë edhe për shkarkimin e saj meqë nuk po e kryen punën që i takon”, u shpreh ai. Në këtë tubim ndër të tjera u fol edhe për vendimin e Gjykatës Kushtetuese, me ç’rast qytetarët thanë se duhet pasur guxim dhe vullnet nga ana e të gjitha subjekteve që janë përfshirë në marrëveshje, për ta kundërshtuar e për të mos e pranuar këtë vendim. Ata theksuan faktin se aktgjykimi i Gjykatës Kushtetuese nuk është në përputhje me parimet bazë të Kushtetuesës, pasi që po e pezullon pa të drejtë mandatin e deputetit deri në zgjedhjen e Kryetarit të Kuvendit.

Përderisa Qeveria në ikje po vazhdon që të marrë vendime, e në anën tjetër ka bllokuar të gjitha institucionet tjera, veçanërisht Kuvendin, e keqja është edhe më e madhe. Gjendja ekonomike dhe sociale po vazhdon të rëndohet edhe më shumë në vend. Prandaj, është e domosdoshmë rrëzimi i kësaj qeverie, ndryshimi thelbësor i politikave ekonomike dhe sociale, ashtu që ta vendosim Kosovën në binarët e duhur. Qeveria e re e Republikës së Kosovës do të ishte qeveri që do t’i hapte rrugë zhvillimit ekonomik, dhe do t’ia niste seriozisht luftën ndaj korrupsionit dhe krimit të organizuar në Kosovë.

25 tetor 2014
Lëvizja VETËVENDOSJE!

Vendimi i UEFA-së për ndeshjen Serbi – Shqipëri i ka dhënë fitoren Serbisë. Më pas ata e kanë penalizuar Serbinë me tri pikë, duke e barazuar me Shqipërinë në ndëshkim, nga zero pikë secila dhe me nga një gjobë të barabartë. Por, fitorja iu dha Serbisë, qoftë si numër golash, qoftë si shpërblim moral.

Ky vendim normalizon thirrjet raciste brenda dhe jashtë stadiumit për të vrarë gjithë shqiptarët. Ky vendim normalizon hyrjen në fushë nga tifozët, madje edhe të atyre me precedentë të njohur kriminale. Ky vendim normalizon terrorin që kanë pësuar lojtarët e kombëtares, të mbajtur nën tension nga policia, të rrahur nga tifozët dhe kujdestarët e fushës.

Qëndrimi i UEFA-së i ngjan shumë qëndrimit zyrtar të institucioneve të BE-së ndaj Serbisë në raport me kombin shqiptar. Ashtu si UEFA në vendimin e saj, BE-së në marrëdhëniet ndërkombëtare i ka munguar vullneti politik për të ndërmarrë masa kundër ekspansionit të trashëgimtarëve të Millosheviçit që janë sot në krye të shtetit në Serbi. Në vend që të veprojë kundër, BE-ja po punon për t’i kënaqur këto përpjekje në kurriz të drejtësisë për kombin tonë. Ky “neutralitet” është mohim i të drejtave politike të popullit shqiptar dhe favorizim i politikave raciste të Serbisë.

Dy shtetet shqiptare duhet të veprojnë sa më parë për një politikë të re unike të jashtme, veçanërisht karshi shtetit serb. Historia dhe e tashmja na dëshmojnë se një shtet me tipare të tilla raciste nuk ndalet duke ia përmbushur atij synimet, por duke e kushtëzuar atë drejtpërdrejt deri në ndryshimin e politikave ekspansioniste. Sa kohë që Kosova dhe Shqipëria do të qëndrojnë si dy shtete të ndara aq më shumë do të thellohet padrejtësia ndaj kombit shqiptar.

Duhet të heqim dorë nga politikanët e korruptuar dhe të paaftë që qëndrojnë në pushtet veç ngaqë i premtojnë të tjerëve nënshtrimin e popullit tonë. Gjendja e rëndë e shoqërisë shqiptare është pasojë edhe e politikave të ndjekura prej tyre.

24 tetor 2014
Lëvizja VETËVENDOSJE!

Kryetari i Lëvizjes VETËVENDOSJE! Albin Kurti, Koordinatorja e Qendrës së Pejës, Fatmire Mullhaxha – Kollçaku si dhe deputeti Ilir Deda, në rreth dy orë bashkëbisedim me qytetarë të Pejës kanë dëgjuar mendimet dhe ato që ata kanë propozuar si zgjidhje për situatën aktuale politike. Në shumë prej mendimeve të shprehura gjatë këtij tubimi doli se qeveria e re nuk po mund të formohet për shkak se shteti është i kapur dhe se mjetet po shterren një nga një dhe dalëngadalë po vjen koha kur shumica parlamentare duhet të veprojë fuqishëm.

Fatmire Kollçaku potencoi se Lëvizja VETËVENDOSJE! ka pasur rol kyç në pengimin e një të keqeje të madhe që do të ishte qeverisja Thaçi 3. Ajo rikujtoi se shumica parlamentare duhet ta përbëjë qeverinë dhe tashmë kjo shumicë ekziston. Kurse Ilir Deda tha se duhet të synojmë që bashkë të ecim përpara dhe ky rrugëtim duhet të bëhet me Lëvizjen. Qytetarët e pranishëm, kanë pyetur folësit për parimet e Lëvizjes VETËVENDOSJE!, dhe bashkëpunimin me bllokun LDK-AAK-Nisma. Kurti tha se “edhe në paçin (këto parti) ngjashmëri të mëdha me PDK-në, ato s’e kanë kapur shtetin. Sipas tij, në zgjedhjet e fundit, nuk ka fituar PDK e Thaçi, por klientelizmi e kapja e shtetit.

Poashtu, Kurti tha se pastërita morale e aktivistit të VETËVENDOSJE!-s nuk është qëllim por mjet. “Edhe kur kemi marrë pjesë në zgjedhje e kemi hyrë në institucione në vitin 2010 na thoshin që kemi shkelur parime. Këta lotë krokodolli për parimet tona janë qesharakë. Veprimet tona janë strategji e pasuruar për qëllimin e njëjtëe brenda konceptit të njëjtë”, tha ai.

Një nga qytetarët e pranishëm në këtë tubim kërkoi nga përfaqësuesit e Lëvizjes VETËVENDOSJE! që të bëhet një strategji alternative për t’iu përgjigjur vendimit të padrejtë të Gjykatës Kushtetuese.

Kurti ndër të tjera përmendi edhe disa arsye se pse është e nevojshme kjo qeveri.”Ne e shohim këtë si qeveri të emergjencës për ta hspëtuar shtetin së jashtmi, e shohim si qeveri të zorit 2+2 vjet së brendshmi, andaj po bashkohemi edhe pa qenë subjekti i parë”, tha ai.

Kurse, lidhur me dialogun që u zhvillua në vitet 2011 deri në 2014 me Serbinë, Kurti tha se ishte dialog sipas kushteve të Serbisë, pasi që Serbia nuk u konsiderua si borxhli ndaj shqiptarëve. Ai shtoi se duhet ndryshuar korniza dhe karakteri i dialogut e jo vetëm akterët e duke e vazhduar atë njësoj.

Pas tubimit të djeshëm, ky është tubimi i dytë në kuadër të diskutimit rreth zgjidhjes politike nga dëgjimi i drejtpërdrejtë i propozimeve të qytetarëve. Ditët në vijim do të ketë edhe tubime në qytete të tjera lidhur me temën e njëjtë “Zgjidhja sipas qytetarëve”.

23 tetor 2014
Lëvizja VETËVENDOSJE!

Lëvizja VETËVENDOSJE! mbajti sot konferencë për media ku deputeti Visar Ymeri dhe anëtari i Komitetit për energji, prof. Naim Hoxha, folën për KEDS-in dhe ZRRE. Privatizimi i Kompanisë Kosovare për Distribucion dhe Furnizim me Energji Elektrike, arsyetohej atëbotë nga Besim Beqaj me domosdonë e rritjes së efiçiencës së kompanisë. Kjo rritje e efiçiencës do të rezultonte në dobi të qytetarit sepse, na thuhej, do të përmirësohej furnizimi me energji elektrike, do të rriteshin investimet, dhe do të kishim çmime më të lira. Këto janë arsyetimet kujdestare të privatizimit.

Deputeti Visar Ymeri tha se pas një viti e gjysmë të menaxhimit privat të KEDS-së, çmimet i kemi shumë më të larta, furnizimi ka rënë në cilësi, e investimet janë vetëm ato projekte të bartura nga koha kur kompania ishte në pronësi publike. “Këtë vit i kemi pasur dy ngritje të çmimit të tarifave të energjisë, njëherë 4.57% dhe herën tjetër 5.18%. Vetëm ky fakt, pa u ndalur fare te të tjerat, tregon qartë për rënie drastike të efiçiencës së ndërmarrjes, pasi një ndërmarrje efiçiente ofron shërbime më cilësore me çmime më të ulëta. Po të kthehemi prapa, çmimet e energjisë elektrike kanë qenë relativisht stabile prej viti në vit që prej pas luftës. Rritja e parë domethënëse prej 8.9% ka ndodhur në vitin 2012 kur Qeveria e shpalli konzorciumin Limak Çalik si fitues të tenderit të privatizimit të KEDS-it. Dhe prej atëherë kemi edhe dy rritje tjera të çmimit të energjisë këtë vit për të cilat fola më lartë”, tha ai, duke shtuar se viti i vetëm kur nuk ka pasur rritje të çmimit që prej privatizimit ka qenë viti i kaluar kur siç dihet ZRRE-ja e kishte obliguar KEK-un kompaninë publike që t’ia jap 17.9 milionë euro KEDS-së me arsyetimin e përshtatjes së të hyrave maksimale të mbledhura nga viti paraprak.

Në shqyrtimin e fundit të jashtëzakonshëm të tarifave i arsyetuar nga nevoja për rritje të importit pas shpërthimit në Kosova A, ZRRE-ja merr vendim për t’ia pranuar KEDS-it kërkesën për rritje të të hyrave maksimale, por jo edhe KEK-ut, i cili kishte kërkuar të hyra shtesë për investime në sanimin e dëmeve nga shpërthimi.

“Humbjet e energjisë vazhdojnë me ritmin e njëjtë sikur me parë. Reduktimi i humbjeve që ka ndodhur gjatë një viti të afarizmit të KEDS-së nën menaxhim privat janë kryesisht reduktim i humbjeve komerciale, pra rritje e inkasimit. Edhe kjo jo me trendin që ka performuar kompania kur ishte në pronësi publike. Në këtë drejtim kohëve të fundit është vërejtur një dukuri tepër shqetësuese. Ka pasur disa ankesa të qytetarëve në asistencë sociale të cilëve kompania përmbaruese e kontraktuar nga KEDS-ja ua ka marrë paratë nga llogaria bankare për ta shlyer borxhin e energjisë elektrike”, tha Ymeri. Ligji për procedurën përmbarimore, i cili e privatizon shërbimin e përmbarimin dhe të cilin ne e kemi kundërshtuar kategorikisht në Kuvend, në Nenin 85 dhe pastaj në Nenin 112 i përjashton këto të ardhura, dhe të gjitha të ardhurat në nivelin e asistencës sociale nga procedura e përmbarimit. Asistenca sociale nuk e mbulon as minimumin jetik për një familje. Kur këtyre u hiqet një pjesë për llogarinë e KEDS-it atëherë këto familje shtyhen drejt urisë. Prandaj i bëjmë ftesë të gjithë qytetarëve të cilët kanë mundur të jenë viktimë e varfërimit të mëtutjeshëm të tyre përmes përmbarimit t’i nisin procedurat kontestimore përmes Qeverisë dhe gjykatave.

“Nga dje punëtorët e KEDS-it kanë hyrë në grevë. Ata kërkojnë kushte më të mira të punës, rritje të pagave në nivel të sektorit dhe siguri në punë. Këto kërkesa bazike janë të arsyeshme dhe ne i mbështesim punëtorët dhe grevën e tyre. Njëkohësisht kërkojmë nga organet shtetërore t’i marrin të gjitha masat që t’ua sigurojnë punëtorëve të drejtën për grevë, dhe nga gjykatat që në asnjë mënyrë të mos bëhen pre e menaxhmentit të KEDS-it dhe kërkesave të tyre absurde që gjykata ta ndal grevën. Grevën mund ta ndalë menaxhmenti dhe atë vetëm duke ua plotësuar kushtet punëtorëve. Gjatë muajit shtator Edita Tahiri e ka arritur edhe një marrëveshje me Serbinë për energji, Planin operativ të zbatimit të marrëveshjes së vitit të kaluar. Ky plan asnjëherë nuk u bë publik. Kërkesës sonë për qasje në këtë dokument zyrtar zyra e Edita Tahirit i përgjigjet me vonesë dhe e refuzon atë me një arsyetim banal procedural”, theksoi në fund Ymeri.

Anëtari i Komitetit për energji, prof. Naim Hoxha, foli për funksionimin e ZRRE-së, cenimin që ia bën pavarësisë së saj Qeveria, mungesën e transparencës për sajimin dhe përpilimin e çmimeve të energjisë, e të ngjashme. “ZRRE-ja ka paraqitur në raportin vjetor, se për shkak të trajtimit të tyre si shërbyes civilë, e që nuk janë, dhe për shkak të rënies të të hyrave, është shkaktuar ikja e kuadrove, gjë që ka pamundësuarfunksionimin normal të ZRRE-së. Edhe përkundër mbetjes së bordit me vetëm tre anëtarë, edhe përkundër mungesës së konsiderueshme të stafit cilësor, ZRRE vazhdon t’i kryej obligimet e veta, sipas saj pa pasoja. ZRRE vazhdon tutje me mungesë të plotë të transparencës për llogaritje të HML-MAR, llogaritje kjo që përcakton çmimin e energjisë elektrike, si dhe dokumente si rritja e çmimit e të tjera. Nga kërkesa jonë ajo na dërgon një pjesë të dokumenteve financiare të operatorëve të përpunuara, jo origjinale”, tha ndër të tjera Hoxha.

Kthimi i lejuar (RTNC) është interesi që i përket pronarit dhe që duhet t’i kthehet për shkak të vlerës së investimit të tij. “Kjo vlerë, deri në shitjen e Distribucionit dhe Furnizimit të KEK-ut (KEDS), ka qenë e ndërruar nga ana e ZRrE-së dhe nga Ministria nga vlerat maksimale 12% deri në 5.5%. Derisa KEDS ishte për nga vlera e treta pas Minierave dhe Gjenerimit, tani ka dale e para dhe paraqitet si vlerë më e madhe e kthimit të interesit. Pra, KEDS ka vlerë me të madhe se Minierat dhe se Gjenerimi “Kosova A” dhe “Kosova B”, rrjedhimisht, mund të pritet që edhe këto të shiten madje më lire se 26.3 milionë”, u shpreh Hoxha.

“Shembull i trajtimit jokorrekt të elementeve të HML është kompensimi për Borxhet e këqija i cili sipas viteve ka qenë 10.8, 12.1 deri 13 milionë për vitet respektive 2012 – 2014. Këto vlera kanë qenë të inkorporuara në çmimin të cilin e kanë paguar konsumatorët “e mirë”, në vend të atyre “të këqij”. Dhe tani shtrohet pyetja pse inkasimet e borxheve nuk i kthen konsumatorit meqë ato janë kompensuar?”, pyeti në fund Hoxha.

23 tetor 2014
Lëvizja VETËVENDOSJE!
Komiteti për energji

http://www.vetevendosje.org/news_post/1-vit-e-gjysme-pas-privatizimit-keds-cmime-me-te-larta-me-pak-furnizim-pa-investime-te-reja/

Lëvizja VETËVENDOSJE! mbajti sot tubim me qytetarët e Prishtinës me temën “Zgjidhja sipas qytetarëve”, ku temë ishte situata politike e krijuar në vend. Në këtë tubim folën Kryetari i Lëvizjes, Albin Kurti, si dhe Koordinatori i Qendrës së Prishtinës, Ylli Hoxha. Gjatë tubimit drejtuesit e VETËVENDOSJE!-s shpjeguan në detaje se çfarë ka ndodhur në këtë periudhë bashkë me pasojat politike. Përveç dy folësve, e gatshme për t’u përgjigjur në pyetjet e qytetarëve ishte edhe deputetja Puhie Demaku. Tubimin e hapi Koordinatori i Qendrës së Prishtinës, Ylli Hoxha, i cili tha se kanë kaluar mbi katër muaj nga zgjedhjet dhe që nga atëherë po tentohen të krijohen institucionet demokratike. “Tash e katër muaj ne thamë se nuk do të ketë Qeveri Thaçi 3, dhe kjo përpjekje ka shënuar frutet e saja të para. Gjatë gjithë kësaj kohe u mbajt uniteti me subjektet tjera politike, gjë që në fillim dukej e paparamendueshme. Tash, kemi pamundësi të PDK-së që të menaxhojë me këtë vend”, tha ndër të tjera Hoxha, duke shtuar se ky tubim është thirrur për të marrë ide nga qytetarët për hapat e radhës që duhet ndërmarrë, dhe se tubimet e tilla do të vazhdojnë sërisht edhe në Prishtinë, por edhe nëpër qytetet tjera të Kosovës.

Pas tij, fjalën e mori Kryetari Albin Kurti. Ai tha se kjo periudhë paraqet kohën që ia ka dhuruar Gjykata Kushtetuese PDK-së, mirëpo kjo ishte një dhuratë e papërdorshme për PDK-në. Thjesht, askush s’do që të bashkëpunojë s’e lëre më të hyjë në koalicion me PDK-në, tha ai.

“Në Kosovë nuk kemi ngërç institucional por shtet të kapur i cili po e pengon shumicën parlamentare që t’i formojë institucionet e reja. Koalicioni LDK-AAK-Nisma nuk është bllok por PDK-ja po e bllokon shumicën parlamentare”, tha Kurti.

Ai ndër të tjera tha se PDK-ja nuk i ka as ligjin e as kushtetutën në anën e vet, por i ka tre njerëz: Enver Hasanin, Flora Brovinën por edhe Atifete Jahjagën. “Përderisa kryesuesja Brovina sipas moshës në këtë detyrë zyrtare, na thoshte që nuk ka vazhdim të seancës konstituive pa marrëveshje me PDK-në, presidentja Jahjaga zuri të thoshte se praktikisht pa marrëveshje edhe me PDK-në ajo i ka nja dy mënyra për të na çuar në zgjedhje të reja. Kosova sot nuk ka nevojë për zgjedhje të reja por për qeverisjen e shumicës parlamentare. Zgjedhjet e reja nuk kanë kurrfarë baze ligjore e kushtetuese. Ndonëse qëndrimi ynë është i mirënjohur se jemi të gatshëm për zgjedhje si Lëvizje dhe se fjalën përfundimtare për pjesëmarrje në zgjedhje e thotë Këshilli i Përgjithshëm i organizatës sonë”, theksoi Kurti, duke shtuar se Kosova nuk është as monaki parlamentare dhe as republikë presidenciale. Kosova është republikë parlamentare në të cilën kuvendi e ka zgjedhur Presidenten dhe ajo s’mund ta shpërndajë apo shpërbëjë as kuvendin e as deputetët.

” Ne i thamë Presidentes që, në situatën e krijuar, mbeten vetëm dy rrugë: Kuvendi i Kosovës ose Zanzi bari. Por, ajo ishte orvatur që zgjidhjen ta gjejë në Hamam…E në Hamam nuk ka zgjidhje”, u shpreh Kurti. Ai më tej tha se në shumicën parlamentare janë dy marrëveshje: njëra e 10 qershorit dhe tjetra e 10 shtatorit. “Në këtë marrëveshjen e dytë është edhe Lëvizja VETËVENDOSJE! dhe ajo marrëveshje është thelbësore meqenëse përmbajtja e saj i korrespodon një kursi të ri shtetëror të Kosovës. Në këtë marrëveshje që i ka 8 pika përshkruhet rruga e re për Republikën tonë”, tha Kurti përderisa shpjegonte në detaje të tetë pikat e kësaj marrëveshjeje.

“Vetëm PDK-ja e din se sa shumë humb kur humb ajo, se sa shumë humb kur bie nga pushteti. Vetëm se arsyeja pse ata s’e paramendojnë dot opozitën është sepse e dinë që kur shkon përfundimisht Qeveria e tyre, atëherë çlirohen gjyqësia, prokuroria dhe policia e shtetit. Ata nuk duan të ndodhë ky çlirim që i robëron ata. Shteti i së drejtës është saktësisht e kundërta e shtetit të kapur. Për gjendjen e tanishme politike mund të thuhet që Thaçi është dëmi që po e ndërprejmë ndërkaq shumica parlamentare është shansi që nuk bën të humbet. Qeveria e tij ka qenë forcë centrifugale në shtetndërtim. Shumica është forca centripetale në Republikë”, shtoi në fund Kurti.

Në këtë tubim qytetarët e patën mundësinë që të diskutojnë, të bëjnë pyetje dhe të japin ide për zgjidhjen e mundshme drejt krijimit të institucioneve të reja, jo vetëm për nga emri, por për nga politika që do ndjekin dhe qasja që do të kenë ato institucione ndaj shtetit dhe qytetarëve. PDK-ja kohëve të fundit është zbrapsur. Dikur thoshin i kemi numrat, tash po kërkojnë kompromis. Thoshin që qeveria është e jona, tash thërrasin për qeveri gjithpërfshirëse. Pra, Thaçi është dëmi që po e ndërprejme,ndërkaq shumica parlamentare është shanci që nuk duhet humbur. Nuk ka si të ndodh ndryshe, për shkak se qeveria e PDK-së dhe qeverisjet e PDK-së kanë qenë forcë centrifugale në shtetndërtim, kurse pikërisht shumica parlamentare është forca centripetale në Republikë.

22 tetor 2014
Lëvizja VETËVENDOSJE!

Qendra e Lëvizjes VETËVENDOSJE! në Prizren mbajti sot konferencë për media, ku folën asambleistët Drita Mullaku dhe Arbër Rexhaj.

Kohëve të fundit kemi pasur ankesa të shumta prej qytetarëve sa i përket parkingjeve te Komunës të cilat janë në shfrytëzim prej kompanive të ndryshme private. “Duke hulumtuar kontratat e Komunës me kompanitë që i menaxhojnë kemi hasur parregullsi dhe keqpërdorime të shumta të pronës publike. Rasti më flagrant është me firmën “Parking Kosova” e cila menaxhon parkingun tek Shtëpia e Bardhë, parkingun në rrugën “Shuaip Spahiu”dhe parkingun në rrugën “Suzi Qelebiu”. Kjo kompani i vjel të ardhurat nga parkingjet e automjeteve në mënyrë ilegale tashmë 10 muaj, sepse kontrata me Kuvendin Komunal të Prizrenit i ka skaduar me datën 31 dhjetor 2013”, tha Mullahu, duke shtuar se asnjëherë nuk kemi marrë përgjigje nga Drejtoria e Ekonomisë dhe Financave për të hyrat nga këto parkingje, pëvarësisht kërkesës që ia kemi bërë. “Ne jemi të bindur se kjo kopani nuk ka inkasuar fare mjete në buxhetin e publik, dhe vlera e humbjes për Komunën e Prizrenit tashmë kalon 5.000 euro”, u shpreh ajo. Kompania “Parking Kosova” përfaqësohet nga Jashar Berisha, i cili është djali i Naser Berishës, kandidatit për asamble dhe për deputet nga radhët PDK së. Pra, përveç humbjeve materiale të Komunës, këtu ka edhe konflikt interesi. Tutje, asambleistja Drita Millaku tha se gjatë hulumtimit kemi vërejtur se në parkingun e rrugës “Tahir Sinani”, te tregu “Fatoni”, kontrata ka skaduar me 30 prill 2014, dhe ky parking i është dhënë në shfrytëzim Shoqatës së Burgosurve Politik, e cila përfaqësohet nga Ruzhdi Saramati, kandidat për asamble në zgjedhjet e fundit lokale nga radhët e PDK-së. “Shkelje kemi vërejtur edhe te parkingu përball Kuvendit Komunal deri tek ura e hekurt e cila i është dhënë në shfrytëzim Shoqatës së Invalidëve të Luftës që përfaqësohet nga Bujar Ukimeri, kontrata e të cilës ka skaduar me 31 prill 2014. Shkelje janë vërejtur në të gjitha parkingjet që shfrytëzojnë pronën publike, mirëpo fokusi ynë mbetet tek shkeljet që kanë kosto më të madhe, siç është rasti i firmës “Is Company”, parkingu tek tregu i plaçkave në rrugën “Edit Dyrham”, që i ka skaduar kontrata më 13 shtator 2013, ku edhe pse në kontratë parashihet ndërprerja e punës pas skadimit të afatit, një gjë e tillë nuk ka ndodhur. “Në pyetjen tonë për drejtorin Hasan Hasani se pse këto firma i shfrytëzojnë parkingjet pa kontratë, përgjigja ka qenë se jemi në fazën e tenderimit. Porse tenderi duhet të hapet pa skaduar që të pamundësohet shfrytëzimi i pronës publike pa kompensim”, tha ndër të tjera Millaku.

Asambleisti Arbër Rexhaj tha se Komuna e Prizrenit operon me parkingje ilegale të cilat keqpërdoren nga zyrtarët komunalë për përfitime materiale. “Gjithandej nëpër komunën tonë këto parkingje dëmtojnë buxhetin publik. Parkingjet përpos që tani më po uzurpojnë hapësirat publike, ato edhe po punojnë jashtëligjshëm. Po të mos mjaftonte kjo, këta zyrtarë komunalë, veprojnë kundër interesit publik edhe me ndërmarrjet e për bartjen e automjeteve të konfiskuara, gjegjësisht me kompanitë e merimangave”, theksoi Rexhaj. Se drejtori Hasan Hasani punon ne dëm të interesave të komunës tregon edhe kontrata me kompaninë e automjeteve “NTSH Votra” nga Prizreni, e cila tregon çart se si lokacioni i poligonit “Lidhja e shofereve” i është dhënë në shfrytëzim kësaj kompanie pa kurrfarë kompensimi dhe humbjet e Komunës nga kjo kontrate për 4 vitet e kaluara kalojnë shifrën e 30 mije eurove. Për më tepër, kjo kompani nuk është e licencuar për të kryer këtë lloj të veprimtarisë, dhe ka raste të ndryshme të ankesave të qytetarëve, që kanë hapur raste edhe në gjykatë, për dëmtimin e veturave që ua ka bërë kjo kompani. “Në pyetjen tonë drejtuar Hasan Hasanit, Drejtorit të Shërbimeve Publike, se përse është kontraktuar kjo kompani e palicencuar dhe iu është dhënë në shfrytëzim prona pa kompensim, ai na ka thënë që ta pyesim Policinë e Prizrenit, sepse ata e dinë më së miri”, tha Arbër Rexhaj, duke shtuar se me kërkesën tonë drejtuar Drejtorisë së Financave, kemi pyetur se sa kanë qenë të hyrat e deklaruara nga kjo kompani, përgjigjja nuk na është dhënë sepse nuk kanë pasur përgjigje.

Ne dënojmë ashpër përfitimet e paligjshme të individëve të afërt me partinë në pushtet të cilët manipulojnë në emër të shoqatave që kanë respekt në shoqëri për dobi personale private. Qendra e Lëvizjes VETËVENDOSJE! në Prizren u bënë thirrje organeve të drejtësisë që t’i hetojnë urgjentisht këto raste të keqpërdorimit të pronës publike, sepse humbjet e Komunës veç sa po thellohen çdo ditë e më shumë.

22 tetor 2014
Lëvizja VETËVENDOSJE! në Prizren