Lëvizja VETËVENDOSJE! po përcjellë me vëmendje të plotë reagimet dhe zhvillimet e ngjarjeve pas lojës Shqipëri-Serbi që ndodhën në fillim të kësaj jave. Me shqetësim po marrim lajme për sulmet ndaj shqiptarëve që jetojnë në Serbi. Këto sulme që nuk janë risi e kësaj jave, por që ndodhin në baza ditore, e në mënyrë sistematike kundër bashkëkombasve tanë, nuk kanë gjetur kurrë as reagim institucional e as joformal qoftë nga Presidentja e Republikës, Atifete Jahjaga qoftë nga Qeveria e Republikës së Kosovës .

Përderisa Qeveria në ikje me nënshtrim të plotë ka marrë pjesë në një dialog të pabarabartë me Serbinë, ajo dhe përfaqësuesit e saj në asnjë moment nuk i kanë dalë në mbrojtje të drejtave të shqiptarëve që jetojnë në Serbi.

Përveç masave konkrete, as edhe një letër e vetme proteste nuk i është dërguar Serbisë për incidentet e shumta që kanë ngjarë ndaj shqiptarëve atje. Kështu po ndodh edhe sot.

Është detyrë e secilës Qeveri, madje edhe asaj që është në ikje, të reagojë për të mbrojtur të drejtat e bashkëkombasve të saj kudo që jetojnë. Paaftësia për të reaguar dhe për të kërkuar mbrojtjen e të drejtave dhe dinjitetin e shqiptarëve, i legjitimon si të drejta aktet vandale ndaj tyre.

Qeveria e skaduar që nuk i kursen ditët e numëruara për të nënshkruan kontrata gjysmë miliardëshe për autostrada, për të keqpërdorë buxhetin për privilegje personale, po vazhdon të jetë e heshtur përballë sulmeve të paramenduara fashiste e raciste ndaj popullatës shqiptare.

Po ashtu asnjë reagim nuk po vjen nga Presidentja Jahjaga, roli i të cilës është drejtimi i politikës së jashtme të Republikës tonë. Teksa çdo ditë flitet në forume vendore e ndërkombëtare për mbrojtjen e të drejtave kudo në botë është e patolerueshme heshtja përballë cenimit ekstrem të shqiptarëve në Serbi.

17 tetor 2014
Lëvizja VETËVENDOSJE!

Me qeverisjen e re, jeta e qytetarëve të Gjilanit jo vetëm që nuk është përmirësuar, por çdo ditë e më tepër po shkon duke u rënduar në të gjitha sferat, përfshirë edhe shëndetësinë. Shqetësuese është se shëndeti i qytetarëve të Komunës tonë nuk është as preokupim, e lëre më prioritet i kësaj qeverie.

Përmirësim në këtë sektor nuk pritet as në vitin e ardhshëm, pasi që propozimi i buxhetit për vitin 2015 për sektorin e shëndetësisë nuk shkon në favor të shëndetit të qytetarëve të Komunës së Gjilanit. Për vitin 2015 janë të planifikuara më pak mjete për investime kapitale si dhe për mallra dhe shërbime. Derisa në këtë vit, shuma e mjeteve për investime kapitale është 148.000.00 euro, për vitin 2015 janë planifikuar vetëm 80.000.00 euro, ose 40% me pak. Ndërsa, shuma e mjeteve për mallra dhe shërbime këtë vit është 423.584.00 euro, e për vitin 2015 janë planifikuar 330.000.00 euro, ose për 25% me pak se këtë vit. Me këtë lloj planifikimi të buxhetit të shëndetësisë, Komuna po tregohet e papërgjegjshme karshi nevojave të qytetarëve për ngritjen e cilësisë së shërbimeve në shëndetësi.

Gjendja është aq e rëndë sa që në të gjitha qendrat e mjekësisë familjare si dhe ambulancat e fshatrave mungon edhe pambuku për dhënien e injeksioneve, e mos të flasim për barërat të cilat janë në mungesë çdo herë. Edhe ekipet emergjente shumë herë ballafaqohen me mungesë të disa barnave të cilat janë të domosdoshme për të shpëtuar jetën e pacientit siç është antishok terapia.

Gjatë 10 muajve të qeverisjes Haziri, kemi dështime të shumta në sektorin e Shëndetësisë, duke filluar nga vijueshmëria jo e rregullt e mjekëve neper ambulancat e fshatrave, mos funksionimi i disa ambulancave si që janë ambulanca e Livoqit të Epërm, Shurdhanit, e të tjera. Kurse, në Gjilan është një numër i madh i mjekëve të ri që presin punë. Në anën tjetër, në QKMF, numri i mjekëve dhe sidomos shefave është tejet i madh. Ka qenë rekomandim prej komitetit te shëndetësisë si dhe zotim i drejtoreshës së kësaj sfere se shumë shpejtë do të rihapet ambulanca në Shurdhan, mirëpo nuk ka filluar punën. Atje ku ka pas mjekë me orar të rregullt, tani punohet dy herë në javë siç është rasti në Cernikë.

Po ashtu, Drejtoria e Shëndetësisë dhe Mirëqenies Sociale (DShMS) ka dështuar në projektin për dezinsektim, dezinfektim dhe deratizim të ambientit, të objekteve shkollore, shëndetësore e të tjera. Kjo ka ndodhur për shkak të mosrespektimit të procedurave të tenderimit dhe anulimit nga ana e Kryetarit të Komunës, por në fund del se Komuna është e obliguar të paguaj kompensim kompanisë “Fauna” rreth 170.000.00 euro për një vit edhe përkundër faktit se nuk ka pasur dezisektim, deratizim dhe dezinfektim këtë vit.

Janë bërë pothuajse 5 muaj që DShMS nuk ka drejtor por vetëm ushtrues detyre, e këtë funksion e kryen drejtori i QKMF-së. Ky është konflikt interesi kur dihet se drejtori i DShMS-së e kontrollon punën e drejtorit të QKMF-së që në këtë rast i bie që drejtori duhet ta kontrollon vetë veten.

Kryetari i Lëvizjes VETËVENDOSJE!, Albin Kurti, bashkë me Puhie Demakun, Sekretare për Marrëdhënie me Jashtë në Lëvizjen VETËVENDOSJE!, sot pritën në takim ambasadorin e Shtetit të Katarit në Tiranë, z. Yousef Hassan Al-Saai.

Kurti e njoftoi ambasadorin me Alternativën Qeverisëse të Lëvizjes VETËVENDOSJE, qëndrimin për bashkimin kombëtar e deri te zgjidhjet socio-ekonomike për Kosovën që Lëvizja VETËVENDOSJE i ka në programin e saj.

“Marrëdhëniet e mira ekzistuese me shtetin e Katarit duhet të intensifikohen, dhe kjo mund të ndodhë sapo ta formojmë qeverinë e re. Mundësitë e bashkëpunimit janë të shumta, mirëpo për lëvizje në atë drejtim na duhet të hapet rruga për krijimin e qeverisë,” ka thënë Kurti.

15 tetor 2014
Lëvizja VETËVENDOSJE!

Kryetari i Lëvizjes VETËVENDOSJE!, Albin Kurti, së bashku me Puhie Demakun, Sekretare për marrëdhënie me jashtë e Lëvizjes VETËVENDOSJE!, kanë pritur në takim Ambasadoren e Mbretërisë së Belgjikës në Sofje, ambasadore jorezidente për Kosovë, zonjën Anick Van Calster dhe të ngarkuarin me punë në Zyrën Diplomatike të Begjikës në Prishtinë, z. Jean-François Brackman.

Në takim më Ambasadoren Van Calster janë diskutuar zhvillimet e fundit politike në Kosovë dhe mundësitë për krijimin e institucioneve të Republikës së Kosovës.

“Shumica parlamentare po pengohet padrejtësisht në rrugën drejt formimit të qeverisë së re për të cilën ka aq shumë nevojë populli i Kosovës. Partia e cila e ka kapur shtetin po e pengon konstituimin e Kuvendit vetëm që të mbetet me çdo kusht në pushtet. Kjo parti-shtet nuk mund ta paramendojë veten në opozitë dhe ajo e ka të pamundur të jetë demokratike e ligjore. Shumica parlamentare nuk do të lëshojë pe sepse përveçqë nuk mund të bëhet kompromis me demokracinë dhe drejtësinë, po ashtu nuk mund të lejojmë të humbet shansi për popullin e Kosovës për zhvillim ekonomik dhe çlirim të shtetit nga korrupsioni e krimi qeveritar”, tha Albin Kurti.

15 tetor 2014
Lëvizja VETËVENDOSJE!

Kalaja e Prizrenit vlerësohet si një monument me vlera të jashtëzakonshme arkeologjike, arkitektonike dhe historike në Kosovë dhe rajon. E vendosur mbi një kodër në qendrën historike të Prizrenit, ajo paraqet një peizazh kulturor që simbolizon qytetin dhe një elementë me rëndësi të identitetit tonë.
Kalaja e Prizrenit gjendet në listën e trashëgimisë kulturore nën mbrojtje të përkohshme, e kategorizuar si Nënkategori: Lokalitet Arkeologjik / Rezervat.

Gërmimet arkeologjike zhvillohen në Kala prej pesë vitesh dhe po vijojnë edhe këtë vit. Krahas gërmimeve arkeologjike janë vërejtur edhe rindërtime të pjesshme të mureve të Kalasë. Aktiviteti ndërtimor i fundit që u zhvillua gjatë kësaj vere ishte ndërtimi i një ndërtese në formë të katër dhomave.
Këto ndërtimet po bëhen në kundërshtim me aktet ligjore dhe parimet e udhëzuara në Konventat Ndërkombëtare për ruajtjen e trashëgimisë arkeologjike.

Duke u bazuar në aktet ligjore që rregullojnë aktivitetet e lejuara në lokalitete arkeologjike në Kosovë, rezervatet arkeologjike paraqesin hapësira me rëndësi të jashtëzakonshme të cilat duhet të ruhen për gjeneratat e ardhshme. Ky ligj ndalon veprimtaritë që shkaktojnë dëmtime apo degradim të vlerave shkencore të rezervateve. Gjithashtu ky ligj obligon që të gjeturat e bëra nga gërmimet arkeologjike të prezantohen për publikun nëpërmjet publikimeve dhe ekspozitave të ndryshme, gjatë vitit kur janë kryer gërmimet.

Bazuar në Konventën Evropiane për ruajtjen e Trashëgimisë Arkeologjike (Konventa e Valetës, 1992), intervenimet hulumtuese dhe konservuese në lokalitete arkeologjike duhet të bëhen me një kujdes maksimal duke përdorur metoda jo-destruktive për të ruajtur autenticitetin e shtresave të ndryshme që paraqiten në lokalitet.

Aktivitetet hulumtuese në Kalanë e Prizrenit për pesë vite me radhe asnjëherë nuk i janë prezantuar publikut për të pasqyruar gjetjet shkencore që janë bërë në këtë lokalitet me rëndësi të jashtëzakonshme.

Ndërtimet e fundit degradojnë vlerat e Kalasë së Prizrenit në disa aspekte:
– Dëmtim i gjurmëve dhe dëshmive arkeologjike: ndërtimi i objektit është bërë mbi gjurmët e mureve të vjetra të Kalasë;
– Degradim i tërësisë vizuale të Kalasë: objekti i ndërtuar cenon pamjen vizuale të Kalasë së Prizrenit duke dalë në pah si një strukturë e huaj.

Në Kalanë e Prizrenit mungojnë dispozitat themelore për mbrojtjen e vlerave të saj, hyrja në Kala nuk është e kontrolluar duke e rrezikuar edhe integritetin e ruajtjen e shtresave arkeologjike të gjurmuara.
Rindërtimet e fundit vetëm se e rrisin rrezikun e degradimit të mëtejmë të vlerave, duke inkurajuar trendin e ndërtimeve në një lokalitet arkeologjik me rëndësi të jashtëzakonshme.

Veprime të tilla ad hoc pa e pasur pasqyrën e plotë të një plani menaxhues për Kalanë e Prizrenit, i cili në terma afatgjatë do të përcaktojë nevojat dhe aktivitetet që do të zhvillohen në Kala, vetëm se do të degradojnë më tej vlerat e mbetura të këtij monumenti me rëndësi të jashtëzakonshme.

Kalaja e Prizrenit së bashku me kodrën ku është e vendosur dhe hapësirën e saj rrethuese duhet të trajtohen me kujdesin më të madh nga ana e profesionistëve të specializuar në fushën e mbrojtjes së trashëgimisë kulturore. Ky monument duhet të mbrohet me vendosmërinë më të madhe si një burim jo i ripërtërishëm dhe i pazëvendësueshëm. Rrjedhimisht çdo trajtim dhe çdo intervenim duhet të bazohet në strategji të ndërhyrjes minimale dhe mbrojtjes maksimale, duke i respektuar Kartat ndërkombëtare për Mbrojtje të trashëgimisë arkeologjike dhe arkitektonike.

Duke u bazuar në këtë gjendje alarmante për ruajtjen e autenticitetit të Kalasë së Prizrenit, Qendra e Lëvizjes VETËVENDOSJE! kërkon nga Ministria e Kulturës, Rinisë dhe Sportit që të:
1. Ndalojë aktivitetet ndërtuese në Kala;
2. Të prezantojë planin e objekteve dhe destinimin e tyre para publikut;
3. Të organizojë një debat publik me profesionistë të fushës së trashëgimisë dhe qytetarë për të prezantuar dhe diskutuar gjetjet e bëra deri më sot dhe planet afatgjate lidhur me masat për ruajtjen dhe zhvillimin e Kalasë së Prizrenit.

14 tetor 2014
Qendra e Lëvizjes VETËVENDOSJE!, në Prizren.
Nënkomiteti për Urbanizëm, Planifikim dhe Trashëgimi Kulturore

Të martën, më 7 tetor, Lëvizja VETËVENDOSJE! organizoi aksion simbolik përmes të cilit pasqyrohet kapja e Gjykatës Kushtetuese nga SHIK-u dhe PDK-ja. Në sheshin kryesor të Prishtinës u vendos një kalë që mbante emrin e Kryetarit të Gjykatës Kushtetuese, Enver Hasani, e që tërhiqte “qerren” e PDK-së me në krye Hashim Thaçin dhe Kadri Veselin.

Qerrja e PDK-së mbante mbi vete asociacionin e komunave serbe, kapjen e shtetit nga strukturat e SHIK-ut, marrëveshjet me Serbinë, thellimin e varfërisë dhe papunësisë, shkatërrimin dhe privatizimin e ndërmarrjeve publike, shkatërrimin dhe privatizimin e ndërmarrjeve shoqërore, futnotën si dhe “rehatimin” e dajave.

Në këtë aksion u prononcua aktivisti i Lëvizjes VETËVENDOSJE!, Frashër Krasniqi. Ai midis të tjerash tha se “pushtetet në Kosovë, në vend që të jenë të ndara nga njëra tjetra, janë shumë të varura prej njëra tjetrës. Pra, në vend që ta kemi një Gjykatë Kushtetuese me integritet dhe pavarësi nga pushteti i kaluar, e kemi një Gjykatë Kushtetuese komplet të varur nga PDK-ja dhe SHIK-u. Në vend që ta kemi një Kryetar të denjë të Gjykatës Kushtetuese, e kemi Enver Hasanin, i cili është njeri i varur nga kryetari i PDK-së, Hashim Thaçi, dhe nga shefi i SHIK-ut, Kadri Veseli. Enver Hasani përmes Gjykatës Kushtetuese është duke e tërhequr zvarrë “qerren” e PDK-së e cila ka ngelur në baltë dhe nuk po ec më, sepse nuk e ka shumicën. Enver Hasani po mundohet ta tërheqë zvarrë një qerre e cila bartë vetëm mjerim, negociata e marrëveshje me Serbinë, kompromise të dhimbshme e degradim ekonomik për popullin e Kosovës”, u shpreh Krasniqi.

Ai ndër të tjera shtoi se qytetarët e Kosovës vazhdimisht po vetëdijesohen se demokracia në Kosovë nuk mund të ndërtohet duke u bazuar në vendimet e këtyre personave kaq të korruptuar, të shantazhuar e të kontrolluar nga njerëzit e PDK-së dhe të SHIK-ut. “Demokracinë në Kosovë duhet ta gjejmë diku tjetër, e kurrsesi në Gjykatën Kushtetuese, e as në vullnetin e PDK-së dhe të Hashim Thaçit”, tha në fund aktivisti Frashër Krasniqi.

7 tetor 2014
Lëvizja VETËVENDOSJE!

Menaxhmenti i Radio Televizionit të Kosovës i mbuluar me petkun e mediumit publik të paanshëm dhe neutral në raport me qëndrimet e subjekteve politike, në fakt e ka vendosur këtë institucion në mesin e institucioneve të kapura nga PDK-ja që ishte në pushtet deri tash.

Radio Televizioni i Kosovës duke qenë medium publik do të duhej të ishte zëri i qytetarëve dhe të zhvillonte politika mediale në shërbim të interesit të përgjithshëm. Por drejtuesit e tij, statusin e të qenit publik në fakt po e përdorin si maskë për të mbuluar shërbimet që në vazhdimësi ua bëjnë interesave private të pushtetarëve.

Kështu, kur flasim për dëmet që Kosovës ia shkaktoi Qeveria e Hashim Thaçit, për gjendjen e mjerë ekonomike, politike dhe sociale në Kosovë, nuk kemi se si të mos flasim edhe për politikën e ndjekur nga menaxhmenti i RTK-në që vazhdimisht u përpoq të injektojë vetëm rrëfimin qeveritar, duke e paraqitur situatën në Kosovë si normale, veprimet e pushtetit të Thaçit si historike, dhe grevat e protestat si të pandodhura. Kjo padyshim që u shoqërua nga sulmet për opozitën qytetare dhe politike, padyshim përmes manipulimit të opinionit.

Drejtuesit e RTK, pra pjesa udhëheqëse që përcakton politikat e saj redaktoriale, mori pjesë drejtpërdrejtë në krijimin e kësaj gjendjeje të mjerë që kemi sot. Nga një institucion që do të duhej të vendoste madje standarde në komunikim e gazetari si dhe cilësi në programacion, ajo u kujdes në vazhdimësi që të parandalonte çdo kritikë dhe pakënaqësi qytetare duke përdorur kështu teknika dhe praktika të manipulimit e të deformimit të informacionit mbi ngjarjet politike, shoqërore e ekonomike në vend.

Për të shpjeguar më hollësisht këtë kapje të RTK-së nga pushteti, nuk ka nevojë për kushedi çfarë analize. Një shqyrtim i thjeshtë i individëve udhëheqës në menaxhmentin e këtij mediumi, dhe lidhjeve të tyre me udhëheqësit e PDK-së, i fakton qartë konkludimet e mësipërme.

Për këto arsye dhe për plotë të tjera që tashmë janë bërë publike në opinionin publik nga të gjitha palët që janë të shqetësuara për gjendjen në RTK, ne sot organizuam një aksion simbolik ku paraqitëm lidhjet nepotike brenda këtij institucioni. Frashër Krasniqi i cili u deklarua për media pas vendosjes së banerit në rrethojat e ndërtesës ku gjendet menaxhmenti i RTK-së tha midis të tjerash se lidhjet e këtyre punësimeve me pushtetin e PDK-së, kabinetin e Hashim Thaçit, kryeministrit në ikje, janë evidente dhe numëroi disa prej tyre.

RTK-ja ka ardhur deri në këtë gjendje ngase u vendos nën diktatin e plotë të familjarëve dhe të afërmve e krerëve të PDK-së:

– Mentor Shala, drejtori aktual i këtij mediumi, sikurse edhe paraardhësi i tij, janë njerëz shumë të afërt të Hashim Thaçit dhe Hajderin Kuçit. OJQ-të fantazma, të këtij personi dhe të gruas së tij Ramize Murtezi – Shala, kanë marrë fonde ekskluzive nga Qeveria e Thaçit.
– Mustafë Mustafa, pronari i lokalit të uzurpuar Zanzi Bar, që është militant i PDK-së, është personi kryesor në RTK për administratë dhe financa, dhe përmes tij realizohen të gjitha punësimet.
– Hashim Thaçi, Bekim Çollaku, Bekim Haxhiu (Kamishi), Shaip Muja, Vlora Çitaku, Xhevahire Izmaku, Azem Syla, Abelard Tahiri – të gjithë këta zyrtarë të PDK-së, i kanë punësuar dhe vendosur në pozita shumë të rëndësishme në RTK, kunatat, vëllezërit, gratë, motrat, miqt, mbesat dhe militantët e tyre.

Çlirimi i shtetit tonë nga kapja që ia ka bërë PDK-ja, që të jetë i plotë, nënkupton edhe çlirimin e RTK-së nga njerëzit e pushtetit që kanë zënë rrënjë aty. Kjo edhe do të ndodhë.

11 shtator 2014
Lëvizja VETËVENDOSJE!

Pas takimit me kryetarët dhe përfaqësuesit e LDK, AAK dhe NISMA, në përgjigjet për pyetjet e gazetarëve Kryetari Kurti tha:

“Ne në Lëvizjen VETËVENDOSJE! kur të vijë puna tek formimi i Qeverisë së re e cila do ta ndryshojë Kosovën si në aspektin politik ashtu edhe në atë socio-ekonomik, do ta mbajmë referendumin brenda Lëvizjes VETËVENDOSJE!.

Ajo që kemi bërë sot, me rastin e tremujorit të fillimit të bisedimeve tona, është që Lëvizja VETËVENDOSJE! bashkë me koalicionin LAN jemi marrë vesh që Kosovën ta hedhim në binaret e drejtësisë, zhvillimit, barazisë, të luftimit të krimit dhe korrupsionit, ndërkaq formimi i Qeverisë dhe pjesëmarrja në qeveri do të jetë një marrëveshje e ardhshme.

Theksi i kësaj marrëveshjes është zhvillimi ekonomik, qeverisja parimore, reformat institucionale, mirëqenia sociale, dhe natyrisht që në këtë marrëveshje ne kemi përfshirë edhe çështjet e dialogut ku ne së pari e kemi përmendur dialogun me Bashkimin Evropian, me Komisionin Evropian, për anëtarësimin e Kosovës në BE, me institucionet e BE-së, pastaj e kemi gjithsesi dialogun me serbët e Kosovës për integrimin e tyre në shoqëri dhe gjithashtu kemi edhe dialogun në përgjithësi i cili gjithsesi do të jetë parimor sikurse qeverisja e ardhshme.

Me sot po fillon një ndryshim i madh në Kosovë. Pas pamundësimit të ripërtëritjes së regjimit të vjetër me një qeveri të re, tash ne po e mundësojmë një qeveri të re pa regjim, ku qytetari i Republikës do të jetë në qendër të vëmendjes. Në tekstin e marrëveshjes të cilin do t’ua shpërndajmë në formën e nënshkruar dhe aty do të keni tërësisht të qartë se për çfarë jemi marrë vesh. E në fakt, nuk është se ju nuk e dini.

Pra, teksti i marrëveshjes është i qartë dhe nuk ka nevojë për komente shtesë. Funksionimi i institucioneve, shtetndërtimi demokratik në Kosovë, nuk do të vazhdojë gjurmëve të qeverive të mëparshme. Ky është një zhvillim i ri për të mirën e Kosovës. Ky zhvillim nënkupton se ne po vendosim Kosovën dhe qytetarët në binarët e progresit, drejtësisë, të parimeve, gjë që nuk ka qenë rasti deri tash.

Andaj, jam optimist se ashtu siç e kemi arritur këtë marrëveshje, do ta kemi në të ardhmen edhe marrëveshjen tjetër për programin qeverisës dhe për çështjet e përgjegjësive në ekzekutiv. Asisoj, Kosova në këtë shteg të ri të shtetit republikan, të zhvillimit ekonomik, të mirëqenies sociale, reduktimit të krimit dhe korrupsionit, do të ec drejt dhe sigurt, e për këtë është garanci bashkëpunimi ynë i vazhdueshëm.

Duhet t’i përmbaheni tekstit të marrëveshjes që vazhdimisht vë në spikamë zhvillimin ekonomik, sundimin e ligjit, shtetin e së drejtës dhe mirëqenien sociale. Kosova ka nevojë për një agjendë të re në mënyrë që të ndryshojë për të mirë.”

Prishtinë, 10 shtator 2014
Lëvizja VETËVENDOSJE!

Sot aktivistët e Lëvizjes VETËVENDOSJE! organizuan një aksion simbolik në Gjykatën Kushtetuese të Republikës së Kosovës.
Ky aksion erdhi pas Aktgjykimit arbitrar të gjashtë , prej gjyqtarëve të Gjykatës Kushtetuese, pra Enver Hasani, Arta Rama, Ivan Cukaloviq, Altay Suroy, Almiro Rodrigues dhe Snezhana Botusharova, të cilët me vendimin e tyre kanë cenuar rendin demokratik në vend.
Pas këtij aksioni për mediet u deklarua Zgjim Hyseni, anëtar i Këshillit të përgjithshëm të Lëvizjes VETËVENDOSJE!, cili tha se: “Gjykata Kushtetuese përmes vendimit të fundit, duke interpretuar Kushtetutën e ka ndryshuar atë. Ky fakt në vetvete nuk përbën problem. Kushtetuta jonë edhe ashtu ka shumë pika ku duhet ndryshuar. Në shumë pika të saj ajo ka kufizime e barriera të cilat populli i Kosovës domosdo do t’i tejkalojë.
Problemi është që këto ndryshime nuk po bëhen për të zgjeruar fushën e të drejtave që u takojnë qytetarëve, dhe rritur mundësitë që këto të drejta të realizohen, por pikërisht e kundërta. Vendimi i Gjykatës Kushtetuese e ka bërë vetë Kushtetutën mjet pushteti. Në vend se të ishte formalizimi juridiko-politik i vullnetit popullor, përmes vendimit të fundit, Kushtetuta po përdoret si instrument për ta shtypur këtë vullnet e për t’i dhënë formë legale sundimit jodemokratik. Ai sundim autoritar që braktis vullnet popullor, por ushtrohet përmes procedurave ligjore quhet tirani.
Ky aksion simbolik që kemi organizuar sot ka për qëllim protestën dhe kundërshtimin e këtij vendimi. Kjo kurorë varri tregon se çfarë i ka bërë Gjykata Kushtetuese demokracisë parlamentare në Kosovë: e ka varrosur. E ndërsa grafiti që shkruam në murin e saj, “E nxone- PDK” shpërfaq realitetin e këtyre gjyqtarëve.
Por, ka diçka që duhet t’i kujtojmë kësaj Gjykate sot. Në krye të çdo vendimi të Gjykatës jo më kot kemi shprehjen “në emër të popullit”. Ka një gjykatës që është edhe mbi ju”.

28 gusht 2014
Lëvizja VETËVENDOSJE!

Hua për bukën e përditshme, borxh te shitorja e mëhallës dhe kredi për të larë kredinë. Derisa e dyta është për të larë të parën, e para është marrë për t’i gjetur një strehë kokës, për të paguar studimet e fëmijëve, kredi për t’u martuar, kredi për t’u shëruar, kredi për t’i rregulluar dhëmbët, kredi për rroba pune, për libra, për syze me dioptri, pa dioptri, për pushime, për smartphone natyrisht, kredi për të blerë një lopë, kredi për farë, për ta mbjellë arën, për ta lëvruar (kreditë rurale kanë normë të interesit më të lartë sesa ato urbane), kredi konsumi, konsumi… Kredi kudo që je dhe për çfarëdo halli që nuk po të ndahet. Dhe dimë se kreditë e këqija janë të ulta vetëm në Kosovë, derisa rajoni lulëzon prej tyre.

Ndoshta e keqja e vërtetë duhet parë nga këndvështrimi i huamarrësit dhe atëherë konkluzioni do të jetë tjetër. Por, terminologjia është vendosur nga zoti i pareve, bankës.

Ka kohë që fitimi i bankave në një vend me varfëri të madhe duket absurd. Por, pikërisht kjo e bën të vërtetë gjithë historinë e fitimit.

Nuk ka hapësirë për çudi që në vendet e pazhvilluara bankat fitojnë më shumë sesa në vendet e zhvilluara, ama kjo nuk duhet marrë si e mirëqenë e pakritikueshme. Secila bankë në Kosovë është më fitimprurësja në grupin e saj ku bëjnë pjesë banka të vendeve shumë më të zhvilluara.

Ndërkohë bankat tona (territorialisht tonat) mbesin të pashqetësuara, të paktën nga justifikimi i detajuar, derisa jeta e shifrave të bankierëve mbetet mister i pazbërthyeshëm prej popullit që duke zgjatur duart shumanshëm, arriti të marrë mallin më të kërkuar në Kosovë, kredinë.

Sipas një llogaritjeje të bërë për një hulumtim të botuar vitin e kaluar, pasi ProCredit kishte larguar nga puna me forma të sofistikuara me dhjetëra punëtorë (disa raportuan mbi 100 punëtorë) del se ProCredit në Kosovë, megjithëse ka banka në vende shumë të zhvilluara, në vendin e pazhvilluar Kosovë, operon me një fitim shumë të lartë.

Në bilancin e gjendjes, të publikuar në faqen zyrtare te PCB-së në Kosovë, kjo bankë në fund të vitit 2012 ka pasur një fitim të përgjithshëm shumën prej 15 milionë eurosh, saktësisht 15,101,00.00 euro. Kurse, në raportin e publikuar në faqen e ProCredit Group (pasqyrat e konsoliduara financiare) për periudhën janar – shtator 2012, fitimi total i grupit është 36 milionë euro.

Duhet pasur parasysh që ProCredit Group përbëhet nga 21 banka në vende të ndryshme të botës (operon në tri kontinente), që do të thotë se, nëse PCB në Kosove ka pasur 27% të fitimit të përgjithshëm, mesatarja e fitimit për të gjitha bankat e mbetura është 3.6%.

Pothuaj secila bankë në Kosovë, është më fitimprurësja në grupin e saj të bankave të tjera. E, si do të ishte ndryshe me kamatat deri në 14 përqind dhe brengën e madhe të bankierëve për të mos rrezikuar asgjë në Kosovë? Apo bankierët tonë kanë mjaftueshëm kredi, por nuk kanë besim (lat. credo, prej nga vjen ‘credit’) Pra, këto janë bankat, me përfitime 700 mijë euro përfitime në ditë (Zëri, 18 gusht 2014) që mbahen në kurriz të njerëzve që miellin e marrin hua, e paguajnë lartë për qira.

Ndërkohë, raporti kredi-depozita është 72 përqind. Norma mesatare e interesit në depozita në tremujorin e parë, 2014 u zvogëlua në 2.13 përqind, nga 3.61 përqind sa ishte në periudhën e njëjtë, 2013. Po kjo si justifikohet? Ndoshta me diplomaci strucësh mund edhe të justifikohet, por me çfarë të paguhet kësti?

Ndoshta kur shtrëngimet e sofrës nuk mjaftojnë dikush mund të shesë gjak për të shuar etjen e bankierëve që mbajnë mesataren e normës së interesit në kredi 13.2 përqind. Sigurisht se prej bankave që lëshojnë kredi e që bëjnë kërdinë, nuk pritet të sillen sipas politikave për barazi shoqërore.

Ata vështirë se mund ta kuptojnë Ajtene Krasniqin e cila zbuloi ilaçin që shëron bakterin e ushqimit escherichia coli dhe refuzoi që patenta për këtë të jipet në Gjermani ku i ishin ofruar asaj miliona euro për këtë gjetje. Zonja Krasniqi, sipas funksionit të intelektualit, nuk mund ta shohë zbulimin e saj jashtë përdorimit të popullit. Ajo po vazhdon ta prodhojë këtë ilaç te shtëpia e saj në Prizren dhe ta shesë me çmime lehtësisht të përballueshme.

Sikur ajo të kishte pranuar që t’ia jepte licencën shtetit gjerman për këtë, të prekurve nga ky bakter do t’u mbetej të mburreshin me vlerat simbolike të tipit “një shqiptare e ka zbuluar ilaçin”. Kurse në atmosferën e saj të përditshme sigurisht që përballet edhe me mirënjohjen për ilaçin që ua mundëson të shërohen brenda Kosovës dhe krenarinë që po shërohen nga zbulimi shqiptar (tog fjalësh i rrallë).

E meqë te bankat nuk presim në vullnetin e mirë e mohimin financiar imediat si të zonjës Ajtene, duhen zgjidhur ato dreq lëndësh në gjykata, qofshin të sistemit financiar, apo të çfarëdo natyre. U duhet hequr ky argument bankave që i bëjnë ato t’i mbajnë kreditë kaq të larta. Duhet hapur edhe një bankë publike. Duhet ndërhyrë aq sa është e mundshme që t’i hiqet laku nga fyti qytetarëve.

Po nuk deshëm që të kemi kthim ironik të gjërave duhet të mos e injorojmë si problem. Është plaçkitje dhe si e tillë duhet demaskuar. Bankat duke qenë përcaktuese si problemi dhe zgjidhja e shumë çështjeve nuk duhen injoruar.

Nëse nuk duam t’i trembin bankierët që e meritojnë, duke iu cituar Brehtin kur thotë se çka është plaçkitja e një banke në krahasim me themelimin e saj, atëherë bile ta kemi parasysh Nonda Bulkën kur përshkruan bankat: “Financa qeveris, financa udhëheq, financa firmon paqe, shpall luftëra, përpilon ligje, ngre dhe shtie qeveri, emëron ministra dhe financa vepron nën dhe. Asnjeri s’e merr vesh. Asnjëri s’e provon dot. Megjithatë, ashtu është”.

PS. Nuk duhesh me qenë “e fushës” për ta parë vështirësinë e papërballueshme për ta larë kredinë dhe domosdonë për të.

Prishtinë, 21 gusht 2014

Të dielën, më 6 korrik 2014, me ftesë të Ministrisë së Punëve të Jashtme të Republikës së Shqipërisë, Kryetari i Lëvizjes VETËVENDOSJE!, Albin Kurti mori pjesë në panelin e organizuar në kuadër të Konferencës katër ditore të Ambasadorëve, “SHQIPËRIA NË RAJON – NGA PERIFERI, NË QENDËR.

Të ftuar të tjerë në panel ishin z. Pëllumb Xhufi, historian dhe ish Zëvendësministër i Jashtëm, z. Qemal Minxhozi, Ambasador i RSH-së në Kosovë dhe z. Bashkim Rama, ish Ambasador.

Konferenca e Ambasadorëve shërben si një platformë për shkëmbimin e informacioneve dhe ideve, si dhe ngre për diskutim disa prej çështjeve që lidhen me vendet tona, rajonin dhe arenën ndërkombëtare.

Në këtë Konferencë, ishin të ftuar si panelistë për të ndërvepruar me diplomatët, anëtarë të kabinetit qeveritar të Republikës së Shqipërisë, individë nga shoqëria civile, analistë të pavarur dhe përfaqësues të botës akademike, si nga hapësira shqiptare ashtu edhe ajo ndërkombëtare, me qëllim diversifikimin e opinioneve dhe ideve mbi zhvillimet aktuale të marrëdhënieve ndërkombëtare.

Sot ka ndërruar jetë edhe qytetari i katërt nga Kosova që po punonte në Astana të Kazakistanit. Lëvizja VETËVENDOSJE! i shprehë ngushëllimet familjeve dhe njëkohësisht shpreh shqetësimin për humbjen e jetës së qytetarëve të cilët janë detyruar të mërgojnë për sigurimin e ekzistencës.

Kosova është nga vendet e rralla në botë që e sheh të zbatuar aq pastër skllavërinë neoliberale. Në Kosovë eksportohen njerëzit, importohen produktet për t’u eksportuar edhe paratë pastaj. Gjuha e ftohtë e ekspertëve na thotë se këto janë kushtet e tregut. Ata bile ishin të lirë të zgjidhnin nëse duan të shkojnë ose jo. Por ja që “kushtet e tregut” janë kushtëzuar nga faktorë konkret subjektivë ku mund të ndikojmë dhe jo nga natyra objektive e gjërave apo fuqitë mbinatyrore mbi të cilat s’mundemi as të gjykojmë.

Konkretisht, Kosova është bërë treg i fuqisë së lirë punëtore por edhe pre e biznesmenëve matrapazë sepse ajo lëngon nga papunësia, varfëria e moszhvillimi. E, të gjitha këto vijnë nga politikat e zbatuara ekonomike tash e 16 vjet. Politika që shkatërruan potencialin prodhues, i lanë njerëzit buzë ekzistencës dhe shkatërruan shoqërinë. Nga politikanë si Isa Mustafa e Hashim Thaçi që premtojnë qindra-mijëra vende pune e kur fillojnë qeverisjen s’bëjnë gjë tjetër veçse zgjerimin e klientelës, zhvatjes së buxhetit e koncesione Serbisë.

Ky rast tragjik është thirrje që na fton për angazhim e na thërret në përgjegjësi për ta ndërtuar perspektivën këtu dhe jo të krenohemi me projektet që degdisin qytetarët jashtë vendit siç bën Qeveria.

14 korrik 2015
Lëvizja VETËVENDOSJE!

Gjatë ditës së dielë, një delegacion i Lëvizjes VETËVENDOSJE! i përbërë nga Aida Dërguti e Glauk Konjufca morën pjesë në ceremoninë e vendosjes së bustit të Fan S. Nolit në Kishën e Shën Mërisë në qytetin e Elbasanit.

Kjo ceremoni së bashku me veprën artistike të skulptorit Idriz Balani u realizuan në kuadër të 100-vjetorit të meshës së parë në gjuhën shqipe në trojet tona, e cila është mbajtur në kishën e Shën Spiridonit në Durrës më 1914.

Me këtë rast, At Nikolla Marku këtë të diel ka mbajtur edhe një meshë përshpirtje në nderim të themeluesit dhe frymëzuesit të mëvetësisë së Kishës ortodokse shqiptare dhe shqipërimit të teksteve të shenjta, figurës së shquar të Fan Nolit, bashkëthemeluesit të Kishës Autoqefale Shqiptare.

29 qershor 2014
Lëvizja VETËVENDOSJE!

Lëvizja VETËVENDOSJE! e vlerëson procesin zgjedhor deri më tash si një proces të rregullt në përgjithësi. Ka pasur probleme përgjithësisht të vogla, por jo në masë shqetësuese. Deri më tani vëzhguesit dhe komisionerët e kanë bërë punën e tyre në mënyrë të kënaqshme, dhe shpresojmë që në bashkëpunim me gjithë institucionet, procesi të vazhdojë i rregullt deri në fund.

Ne bëjmë thirrje që secili qytetar të shfrytëzojë maksimalisht çdo minutë të mbetur deri në orën 19:00 e cila është ora kur përfundon orari zyrtar i zgjedhjeve. Midis opsioneve zgjedhore ata duhet të zgjedhin çka besojnë se është më e mira, dhe duhet të aktualizojnë vullnetin e tyre. Kjo është një detyrë qytetare ndaj demokracisë e ndaj republikës në Kosovë.

Lëvizja VETËVENDOSJE! është duke e ndjekur procesin me shumë kujdes, dhe do të monitorojë deri në fund për të shmangur çdo parregullsi apo pengesë eventuale e për ta bërë sa më të lehtë procesin e votimit për secilin votues. Shpresojmë që këtë ta bëjnë edhe partitë e tjera.

8 qershor 2014
Shtabi Zgjedhor
Lëvizja VETËVENDOSJE!

“Qeveria e Kosovës nuk ka punuar për klasën e mesme dhe as atë të varfër: nuk ka vende të reja pune për ata që s’e kanë mbiemrin e duhur, nuk ka pensione që s’janë lëmoshë, kurse nga asistenca sociale del pse të përjashtojnë e jo pse je fuqizuar e aftësuar. Çka na duhet ne një qeveri e tillë? Asgjë. Kujt i duhet kjo qeveri? Vetvetes”

“Ata që i kanë investuar në bujqësi vetëm 2% të buxhetit të shtetit nuk janë në tokë të bukës. Më shumë se çereku i buxhetit të Bashkimit Evropian i dedikohet bujqësisë. Ata që i lejuan bankat komerciale ta dominojnë tregun financiar me kamata prej mbi 18% për bujqësi nuk janë qeveri e jona. Bashkimi Evropian ka bankë për zhvilim në Kosovë (BERZh-i), kurse Kosova nuk e ka një të tillë për vete.”

“Republika presidenciale mund t’i përngjajë kollaj monarkisë. Republika qeveritare i përngjan edhe më kollaj aristokracisë. Republika parlamentare i afrohet më së shumti demokracisë. Prandaj, qeverisje demokratike në Republikën e Kosovës është mu ajo që e forcon parlamentin, e jo thjesht pushtetin e vet. Buxheti vjetor për Kuvendin e Kosovës ishte 10 milionë euro, ndërkaq për zyrën e Kryeministrit ndaheshin 12 milionë euro.”

“Mirëqenia e njeriut është ushqim, veshmbathje, ngrohje, higjienë e strehim, por mirëqenia e qytetarit të Republikës është arsim, shëndetësi, punësim, kulturë dhe pension i dinjitetshëm. Pa të dytën e humbet edhe të parën. Pra, kur nuk ke mirëqenie si qytetar, shpejt mbetesh pa mirëqenie edhe si njeri.” Tash #meLëvizjen

Më 10 maj 2014, me ftesë të Kolegji St. John, Universiteti i Oxfordit, ai do të jetë pjesë e panelit në konferencën me titullin “Pajtimi dhe drejtësia në Ballkanin Perëndimor” që organizohet po nga ky kolegj. Në këtë konferencë, ai është i ftuar të flasë mbi temën “Paqja pa ndarje”.

Përpos pjesëmarrjes në këtë konferencë, z.Kurti do të takojë edhe bashkatdhetarë që jetojnë në Britani të Madhe.

—
Lëvizja VETËVENDOSJE!
Sekretariati për Media dhe Komunikim

Poqese shfletojmë fjalorin, fjala komunikim që rrjedh nga gjuha latine, nënkupton shkëmbim mendimesh me dikë, bisedim, marrëveshje me dikë. Natyrisht, në këtë rast nevojiten të përfshihen palët të cilat kanë interesa të caktuara për të arritur një marrëveshje.

Kur bëhet fjalë për komunikimin në mes të subjekteve politike, praktika e komunikimit mes tyre duhet të jetë përmes shefave të grupeve parlamentare gjatë kohës sa janë në Kuvend, apo përmes kërkesave zyrtare në adresë të subjekteve. Mirëpo, shumica e partive politike nuk praktitojnë një formë të tillë. Ashtu siç ishte dikur zakoni i këtij vendi,  që bajraktarët merrnin vendime nëpër oda, edhe sot vazhdon. Shumicën e liderëve të partive, i kemi parë shumë herë që të anashkalojnë institucionet dhe vendimet e rëndësishme t’i marrin diku tjetër dhe njëkohësisht të keqinformojnë publikun. Tashmë me avansimin e teknologjisë, jemi mësuar që udhëheqësit qeveritar por edhe të partive, të përdorin Facebook-un. Mirëpo, shfrytëzimi i kësaj hapësire për të shprehur propozime opozitës, të cilët nuk i ka as miq në Facebook, nuk është serioz, për të mos thënë se është  qesharak.

Mik pas miku, më rastisi të shoh postimin e kryetarit të LDK-së Isa Mustafës në Facebook, ku kritikon Qeverinë për krizën politike dhe institucionale në Kosovë. Në fund, iu bën thirrje partive opozitare dhe koalicionit qevererisës që të bashkohen për ta shpërbërë Kuvendin. Pra, Isa Mustafa kërkon ta ndëshkojë Kuvendin, për punën e keqe të Qeverisë. Adresimi i problemit dhe propozimi për zgjidhje, kanë një problem të thellë logjik. Për sa kohë Isa Mustafa konstaton se Qeveria është fajtore për situatën e krijuar, pse kërkon shpërbërjen e Kuvendit? Mbase edhe kjo është pjesë e marrëveshjes, që mos t’ia jap ndëshkimin e merituar PDK-së, të cilën planifikon ta ketë partner të ardhshëm të koalicionit. Prandaj, as neve dhe as opinionit le të mos përpiqen të na shesin dushk për gogla. Po të ishte LDK e interesuar që ta ndal keqqeverisjen dhe të mbronte interesat e vendit, do të pranonte formimin e bllokut opozitar të propozuar nga Lëvizja VETËVENDOSJE! qysh vitin e kaluar.

Puna e mbrapshtë e kësaj Qeverie është parë qysh në ditët e para të qeverisjes së saj dhe kriza e parë institucionale është parë me zgjedhjen e presidentit, me ç’rast u anashkaluan institucionet dhe u bë një marrëveshje ‘bajraktarësh’ në mes të liderëve të PDK, LDK dhe AAK, për ta tejkaluar ngërçin e parë institucional. Kësi lloj marrëveshjesh u bënë sa herë që kishin nevojë të kontrabandonin në Kuvend ndonjë vendim që është në dëm të interesave të qytetarëve dhe të vendit. I kemi parë të qeverisin e të bashkëqeverisin, por ndryshimi asnjëherë nuk ka ndodhur. Reciklimi i keqqeverisjes edhe për katër vite, do të jetë fatkeqësia më e madhe e këtij vendi.

Sot jemi këtu që të kujtojmë dëshmorët e komunës së Prishtinës. Dëshmorët janë dëshmi e sakrificës dhe e vetëmohimit, kontributit e luftës, rezistencës e kryengritjes tonë dhe njëkohësisht këta janë edhe dëshmi që Serbia ishte agresore, okupatore, shtypëse, shfrytëzuese dhe prandaj, në Ballkan për të pasur paqe dhe drejtësi do të duhej të kishim një tribunal për Serbinë e kurrsesi për Kosovën.

Kryeministri i Kosovës po tregon që ka kapitulluar dhe prandaj tash po vjen tribunali. Pra, kapitullimi që e përjetoi në Bruksel gjatë negociatave me Daçiqin e Vuçiqin, po kurorëzohet me një tribunal kundër Kosovës. Tribunali i këtillë, të cilin po e mirëpret kryeministri, ndonëse po e din që është i padrejtë, në fakt është shtruar edhe nga deklaratat e tij se ai ka qenë larg fronteve të luftës. Me fjalë të tjera, ai tha se “shokët e mi që kanë qenë në front të luftës merrni lirisht, ndërkaq unë isha shumë larg atyre”. Dhe, e fundit është që një tribunal i këtillë për Kosovën, apo gjykatë e veçantë siç po quhet, në fakt është ekstradim edhe i pavarësisë, edhe i luftës çlirimtare, është dorëzim jashtë vendit tone i këtyre gjërave që janë aq themeltare e aq thelbësore, sa që na bëjnë ata që jemi.

Kryeministri i Kosovës po pajtohet me qëndrimet e VETËVENDOSJE!-s se ai e ka bishtin e zënë me derë. Ai po thotë se tribunal është i padrejtë, mirëpo duhet të votohet pikërisht sepse është i shantazhuar. Ky është konfirmim i shantazhit ndaj Kryeministrit.

18 prill 2014
Lëvizja VETËVENDOSJE!