Alban Bajrami është lindur më 9 qershor 1993 dhe jeton në Ferizaj. Ka përfunduar studimet bachelor
në Shkenca Politike në Universitetin e Prishtinës “Hasan Prishtina” dhe po vazhdon studimet master
në Integrime Evropiane.
Për dy vite ka punuar si drejtor në një kompani private për menaxhimin e resurseve njerëzore, duke
fituar përvojë të rëndësishme në menaxhim dhe organizim.
Angazhimi politik i tij nisi në moshën 20-vjeçare në Lëvizjen VETËVENDOSJE!, ku gradualisht ka
mbajtur pozita të rëndësishme, si kryetar Pike, anëtar i Kryesisë dhe ushtrues detyre i Sekretarit
Organizativ në Qendrën e Ferizajt.
Që nga viti 2021, Albani ka shërbyer si deputet i Kuvendit të Kosovës, duke qenë një zë aktiv për
adresimin e sfidave sociale dhe ekonomike të vendit. I nxitur nga vullneti për barazi sociale dhe
gjinore, ai e sheh zbatimin e meritokracisë si një hap kyç drejt përmirësimit të mirëqenies në vend.
Alban Bajrami beson fuqishëm se sistemi i drejtësisë duhet të reformohet përmes procesit të
vettingut, për të ndërtuar institucione të pakorruptuara dhe të besueshme. Si kandidat për deputet
nga lista e Lëvizjes VETËVENDOSJE!, ai synon të vazhdojë angazhimin për një shoqëri të drejtë, me
mundësi të barabarta për të gjithë qytetarët, duke u përqendruar në zhvillimin ekonomik, luftën
kundër korrupsionit dhe fuqizimin e institucioneve demokratike.

Brunilda Gjura ka lindur në Peshkopi, Shqipëri, dhe që nga viti 2009 jeton dhe vepron në Kosovë.
Aktiviste politike që nga viti 2017, ajo është pjesë e Lëvizjes VETËVENDOSJE! dhe aktualisht shërben

si Këshilltare në Sekretariatin e Përgjithshëm të Lëvizjes. Brunilda është duke përfunduar Masterin e
dytë në Gazetari dhe Komunikim Masiv.
Një emër i shquar në fushën e autosportit, Brunilda është kampione e Kosovës për tre vite radhazi
dhe e para grua shqiptare që ka fituar çmimin prestigjioz “Helmeta e Artë.” Me mbi 45 çmime dhe
trofe në karrierë, ajo arriti sukses të jashtëzakonshëm duke u renditur e gjashta në botë në Lojërat
Olimpike të Motorsportit (Auto Slalom Electric për femra) të mbajtura në Spanjë në tetor 2024.
Autosportin e ka përdorur si platformë për thyerjen e barrierave gjinore dhe për të promovuar
kauza të rëndësishme, si sensibilizimi për kancerin e gjirit dhe mbështetja për të mbijetuarit e
dhunës seksuale gjatë luftës në Kosovë.
Si deputete e ardhshme, Brunilda synon të përqendrohet në barazinë gjinore dhe politikat
gjithëpërfshirëse, mbrojtjen e të drejtave të grupeve të margjinalizuara dhe zhvillimin e sportit me
fokus në gjithëpërfshirje. Angazhimi i saj reflekton përkushtimin për një shoqëri më të drejtë dhe
mundësi të barabarta për të gjithë qytetarët e Kosovës.

Biografi e shkurtër e kandidates për deputete FATBARDHA ZOGAJ REKA
Fatbardha Zogaj Reka u lind më 7 korrik 1972 në Prishrinë. Ajo jeton dhe punon në Ferizaj.
Fatbardha ka përfunduar studimet në Fakultetin e Edukimit në Universitetin e Prishtinës, dega
Matematikë-Informatikë. Ajo ka 28 vjet përvojë në arsim si mësimdhënëse e Matematikës dhe
krahas mësimdhënies për 24 vjet është e angazhuar si trajnere në programe të ndryshme për
ngritjen dhe avansimin e cilësisë në arsim dhe edukimin për të drejtat e fëmijëve.
Në periudhën 2004-2008 ka qenë e angazhuar në Kuvendin Komunal të Ferizajt si Koordinatore për
të Drejtat e Fëmijëve.
Kontributin në arsim Fatbardha e ka orientuar edhe në një drejtim tjetër shumë të rëndësishëm. Ajo
është bashkautore e librave shkollor MATEMATIKA 6 , MATEMATIKA 7 dhe MATEMATIKA 9.
E rritur dhe edukuar nga prindër që gjithë jetën ia kushtuan çështjes kombëtare, Fatbardha,
natyrisht që iu bashkua programit të Lëvizjes VETËVENDOSJE!.
Ajo është Kryetare e Qendrës së Lëvizjes VETËVENDOSJE! në Ferizaj dhe ka kandiduar për deputete
në Kuvendin e Republikës së Kosovës me synimin se do të jetë zë i lartë dhe i arsyeshëm i
përfaqësimit dinjitoz për të mirën e qytetarëve të Republikës së Kosovës.
Fokusi i saj në këtë rrugëtim do të jenë angazhimi për arsim cilësor që përgatit individ të gatshëm
për tregun e punës e akademik të nivelit të lartë, mirëqenia dhe shëndetësi që rrisin standardin e
jetës, barazia gjinore dhe avansim të të drejtave të fëmijëve dhe të rinjëve.

Salih Zyba ka lindur më 1 janar 1977 në Prizren. Studimet universitare i kreu në Menaxhment dhe
Informatikë, në Fakultetin Ekonomik të Universitetit të Prishtinës.
Ka një histori të spikatur si ushtar i tri luftrave çlirimtare. Pas luftës, ai u angazhua në shërbimet
publike, duke punuar në Ministrinë për Punë dhe Mirëqenie Sociale, deri në largimin e tij për shkak
të përfshirjes aktive në aktivitetet e Lëvizjes VETËVENDOSJE!.

Anëtar i Lëvizjes që nga themelimi, Salih Zyba ka mbajtur pozita të rëndësishme brenda organizatës,
duke qenë anëtar i Kryesisë për dy mandate, pjesë e Këshillit të Përgjithshëm dhe kryetar i Qendrës
së Lëvizjes në Therandë. Ai ka shërbyer gjithashtu si Drejtor i Inspeksionit në Komunën e Prishtinës.
Në karrierën e tij parlamentare, Zyba është zgjedhur deputet për tri mandate radhazi në Kuvendin e
Kosovës. Si deputet, ka shërbyer në komisione kyçe, duke përfshirë Komisionin për Bujqësi, Pylltari,
Zhvillim Rural, Mjedis dhe Planifikim Hapësinor, Komisionin për të Drejtat e Njeriut, Barazi Gjinore,
Persona të Pagjetur dhe Peticione, si dhe Komisionin Hetimor Parlamentar për Hidrocentrale.
Aktualisht, në legjislaturën VIII, ai është Nënkryetar i Komisionit për Mbikëqyrjen e Agjencisë së
Kosovës për Inteligjencë dhe anëtar i Komisionit për Mjedis, Ushqim, Bujqësi, Planifikim dhe
Zhvillim.
Salih Zyba mbetet i përkushtuar në promovimin e sigurisë dhe mbrojtjes së mjedisit, duke ofruar
kontribut të vazhdueshëm në këto fusha përmes angazhimit të tij politik.